toggle_night_mode
Oʻzbekiston Respublikasi Vazirlar Mahkamasining
qarori
“Davlat hokimiyati va boshqaruvi organlari faoliyatining ochiqligi toʻgʻrisida”gi Oʻzbekiston Respublikasi Qonuni qoidalarini amalga oshirishga yoʻnaltirilgan kompleks chora-tadbirlar koʻrish toʻgʻrisida
“Davlat hokimiyati va boshqaruvi organlari faoliyatining ochiqligi toʻgʻrisida”gi Oʻzbekiston Respublikasi Qonuni va Oʻzbekiston Respublikasi Prezidentining “Oʻzbekiston Respublikasi Konstitutsiyasiga tuzatishlarni amalga oshirish boʻyicha qonun ijodkorligi ishlari dasturi toʻgʻrisida” 2014-yil 25-iyundagi F-4305-son farmoyishi ijrocini taʼminlash maqsadida Vazirlar Mahkamasi qaror qiladi:
1. “Davlat hokimiyati va boshqaruvi organlari faoliyatining ochiqligi toʻgʻrisida”gi Oʻzbekiston Respublikasi Qonuni qoidalarini amalga oshirish boʻyicha kompleks chora-tadbirlar (keyingi oʻrinlarda Kompleks chora-tadbirlar deb ataladi) 1-ilovaga muvofiq tasdiqlansin.
2. Quyidagilar Kompleks chora-tadbirlarni amalga oshirishni moliyalashtirishning asosiy manbalari etib belgilansin:
Oʻzbekiston Respublikasi Davlat budjeti, shuningdek vazirliklar, davlat qoʻmitalari va idoralarning budjetdan tashqari fondlari mablagʻlari;
Oʻzbekiston Respublikasi Oliy Majlisi huzuridagi Nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat fondining davlat grantlari va ijtimoiy buyurtmalar shaklida belgilangan tartibda ajratiladigan mablagʻlari;
Oldingi tahrirga qarang.
xalqaro moliya institutlarining begʻaraz texnik koʻmagi (grantlari) mablagʻlari, imtiyozli kreditlari va qonunchilikda taqiqlanmagan boshqa manbalar.
(2-bandning toʻrtinchi xatboshisi Oʻzbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik maʼlumotlari milliy bazasi, 05.04.2022-y., 09/22/153/0266-son)
3. Fuqarolik jamiyati shakllanishini monitoring qilish mustaqil instituti, Oʻzbekiston nodavlat notijorat tashkilotlari milliy assotsiatsiyasi, Oʻzbekiston mustaqil bosma ommaviy axborot vositalari va axborot agentliklarini qoʻllab-quvvatlash va rivojlantirish jamoat fondi, Oʻzbekiston elektron ommaviy axborot vositalari milliy assotsiatsiyasi, boshqa nodavlat notijorat tashkilotlari, ommaviy axborot vositalari va davlat muassasalarining Davlat hokimiyati va boshqaruvi organlari faoliyatining ochiqligini taʼminlash faoliyatini muvofiqlashtirish va monitoringini olib borish boʻyicha jamoatchilik kengashini 2-ilovaga muvofiq tarkibda tashkil etish toʻgʻrisidagi taklifiga rozilik berilsin, quyidagilar uning faoliyatining asosiy vazifalari va ustuvor yoʻnalishlari etib belgilansin:
davlat hokimiyati va boshqaruvi organlari faoliyatining ochiqligini oshirish, ular faoliyati ustidan jamoatchilik nazorati mexanizmlarini rivojlantirish jarayonlariga, shuningdek davlat boshqaruvining sifatidan fuqarolarning qoniqishi oʻsishiga koʻmaklashish;
davlat hokimiyati va boshqaruvi organlarining faoliyati toʻgʻrisida jamoatchilikni xabardor qilishning samarali, amaliy mexanizmlarini belgilash, davlat organlari tomonidan qabul qilinayotgan qarorlardan va eng avvalo fuqarolarning huquqlari, erkinliklari va qonuniy manfaatlariga daxldor boʻlgan qarorlardan aholi, jamoat birlashmalari keng foydalanishini taʼminlashga har tomonlama koʻmaklashish;
fuqarolik jamiyati institutlarini, ommaviy axborot vositalarini davlat hokimiyati va boshqaruvi organlari faoliyati, mamlakatda amalga oshirilayotgan islohotlar siyosati, siyosiy plyuralizm prinsiplarini, mamlakatda va uning tashqarisida yuz berayotgan voqealar toʻgʻrisida fikrlar xilma-xilligini hisobga olgan holda davlatning ichki va tashqi siyosati ochiq-oshkoraligini taʼminlashga qaratilgan chora-tadbirlarni amalga oshirishda ishtirok etishga keng jalb etish;
ochiqlikni taʼminlashning samarali tizimlarini shakllantirishda, fuqarolarning axborotni erkin olishga boʻlgan konstitutsiyaviy huquqini amalga oshirishda davlat hokimiyati va boshqaruvi organlariga metodik, maslahat yordami berish, ushbu sohada zarur standartlar va hujjatlar loyihalarini ishlab chiqish;
davlat hokimiyati va boshqaruvi organlari faoliyati ochiqligi monitoringini olib borish va uni baholash tizimini ishlab chiqish va joriy etish, davlat hokimiyati va boshqaruvi organlari faoliyatining ochiqligini taʼminlash sohasidagi ishlarning holati toʻgʻrisida jamoatchilikni keng xabardor qilish.
4. Jamoatchilik kengashi davlat hokimiyati va boshqaruvi organlari faoliyatining ochiqligini taʼminlash davlat tizimini shakllantirishga koʻmaklashish, davlat hokimiyati va boshqaruvi organlari faoliyatining ochiqligini baholash monitoringini joriy etish va uni tizimli olib borish maqsadlarida tashkil etilgan muvofiqlashtiruvchi, maslahat organi hisoblanishi maʼlumot uchun qabul qilinsin.
5. Jamoatchilik kengashiga:
Davlat hokimiyati va boshqaruvi organlari faoliyatining ochiqligini taʼminlash faoliyatini muvofiqlashtirish va monitoringini olib borish boʻyicha jamoatchilik kengashi toʻgʻrisidagi Nizomni bir oy muddatda tasdiqlash;
Davlat hokimiyati va boshqaruvi organlari faoliyatining ochiqligini taʼminlash reglamentini, shuningdek davlat hokimiyati va boshqaruvi organlari faoliyatining ochiqligi monitoringini olib borish va uni baholash metodikasini ikki oy muddatda ishlab chiqish va tasdiqlash;
“Elektron hukumat” tizimini rivojlantirish markazi, milliy ommaviy axborot vositalari, respublikaning axborot sohasida faoliyatni amalga oshiruvchi nodavlat notijorat tashkilotlari bilan birgalikda 2016-yil 1-yanvardan boshlab davlat hokimiyati va boshqaruvi organlari faoliyatining ochiqligi monitoringini olib borish va uni baholash tizimini joriy etish;
Oʻzbekiston Respublikasi Vazirlar Mahkamasiga bir yilda kamida ikki marta davlat hokimiyati va boshqaruvi organlari faoliyatining ochiqligini taʼminlashning holati toʻgʻrisidagi tahliliy maʼlumotlar, shuningdek ushbu faoliyatni tashkil etish va uning samaradorligini oshirishni yanada takomillashtirishga doir aniq takliflar taqdim etish tavsiya qilinsin.
6. Belgilansinki, vazirliklar, davlat qoʻmitalari va idoralar, Qoraqalpogʻiston Respublikasi Vazirlar Kengashi, viloyatlar, shaharlar va tumanlar hokimliklarining rahbarlari Kompleks chora-tadbirlarda nazarda tutilgan tadbirlar oʻz vaqtida va sifatli amalga oshirilishi uchun shaxsan javob beradilar.
Oldingi tahrirga qarang.
7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N. Aripov zimmasiga yuklansin.
(7-band Oʻzbekiston Respublikasi Vazirlar Mahkamasining 2016-yil 20-oktabrdagi 352-sonli qarori tahririda — OʻR QHT, 2016-y., 42-son, 490-modda)
Oʻzbekiston Respublikasining Bosh vaziri Sh. MIRZIYOYEV
Toshkent sh.,
2015-yil 6-noyabr,
320-son
Vazirlar Mahkamasining 2015-yil 6-noyabrdagi 320-son qaroriga
1-ILOVA
“Davlat hokimiyati va boshqaruvi organlari faoliyatining ochiqligi toʻgʻrisida”gi Oʻzbekiston Respublikasi Qonuni qoidalarini amalga oshirish boʻyicha
KOMPLEKS CHORA-TADBIRLAR

T/r

Chora-tadbirlar

Bajarish muddatlari, masʼul bajaruvchilar

1.

Davlat hokimiyati va boshqaruvi organlari faoliyati ochiqligini taʼminlash boʻyicha reglamentini ishlab chiqish va tasdiqlash uchun Jamoatchilik kengashiga kiritish.

2015-yil 1 dekabr

“Elektron hukumat” markazi, Ommaviy kommunikatsiyalar sohasida monitoring markazi, Oʻzbekiston matbuot va axborot agentligi, Fuqarolik jamiyati shakllanishini monitoring qilish mustaqil instituti, Oʻzbekiston Nodavlat notijorat tashkilotlari milliy assotsiatsyasi, Oʻzbekiston jurnalistlari ijodiy uyushmasi, Milliy teleradiokompaniya, Oʻzbekiston mustaqil bosma ommaviy axborot vositalarini va axborot agentliklarini qoʻllab-quvvatlash va rivojlantirish jamoat fondi, Elektron ommaviy axborot vositalari milliy assotsiatsiyasi

2.

Davlat hokimiyati va boshqaruvi organlari faoliyati ochiqligi monitoringini olib borish va uni baholash metodikasini ishlab chiqish va tasdiqlash uchun Jamoatchilik kengashiga kiritish.

Davlat hokimiyati va boshqaruvi organlari ochiqligi monitoringini olib borish va uni baholashni tashkil etish va muntazamlilik asosida amalga oshirish, natijalari toʻgʻrisida jamoatchilikni, Vazirlar Mahkamasini, Oʻzbekiston Respublikasi Oliy Majlisining Qonunchilik palatasini xabardor qilish.

2015-yil 1-dekabr

“Elektron hukumat” markazi, Ommaviy kommunikatsiyalar sohasida monitoring markazi, Oʻzbekiston matbuot va axborot agentligi, Fuqarolik jamiyati shakllanishini monitoring qilish mustaqil instituti, Oʻzbekiston Nodavlat notijorat tashkilotlari milliy assotsiatsyasi, Oʻzbekiston jurnalistlari ijodiy uyushmasi, Milliy teleradiokompaniya, Oʻzbekiston mustaqil bosma ommaviy axborot vositalarini va axborot agentliklarini qoʻllab-quvvatlash va rivojlantirish jamoat fondi, Elektron ommaviy axborot vositalari milliy assotsiatsiyasi

3.

Normativ-huquqiy hujjatlarni xatlovdan oʻtkazish natijalari boʻyicha qonun hujjatlariga “Davlat hokimiyati va boshqaruvi organlari faoliyatining ochiqligi toʻgʻrisida”gi Oʻzbekiston Respublikasi Qonunidan kelib chiquvchi oʻzgartirish va qoʻshimchalar toʻgʻrisida Vazirlar Mahkamasiga takliflar kiritish.

2015-yil 20-dekabr

Oʻzbekiston matbuot va axborot agentligi, Axborot texnologiyalari va kommunikatsiyalarini rivojlantirish vazirligi, Adliya vazirligi, “Oʻzarxiv” agentligi, Alisher Navoiy nomidagi Oʻzbekiston Milliy kutubxonasi, OʻzA, Milliy teleradiokompaniya, davlat hokimiyati va boshqaruvi organlari

4.

Quyidagi idoraviy normativ-huquqiy hujjatlarni ishlab chiqish va belgilangan tartibda tasdiqlash:

Davlat hokimiyati va boshqaruvi organlari faoliyati toʻgʻrisidagi axborotni axborot-kutubxona va arxiv muassasalariga taqdim etish tartibi toʻgʻrisidagi Nizom;

Davlat hokimiyati va boshqaruvi organlari tomonidan axborot-kutubxona va arxiv muassasalariga taqdim etilgan hujjatlar bilan ishlash tartibi toʻgʻrisidagi Yoʻriqnoma;

Axborotdan foydalanuvchilarning davlat hokimiyati va boshqaruvi organlarining ochiq kollegial majlislarida ishtirok etishi tartibi toʻgʻrisidagi Namunaviy nizom;

Davlat hokimiyati va boshqaruvi organlari faoliyati toʻgʻrisidagi axborotni olish uchun soʻrovlarni qabul qilish, roʻyxatdan oʻtkazish va qayta ishlash tartibi toʻgʻrisidagi yoʻriqnoma.

2015-yil 25-noyabr

“Oʻzarxiv”agentligi, Alisher Navoiy nomidagi Oʻzbekiston Milliy kutubxonasi

2015-yil 25-noyabr

“Oʻzarxiv”agentligi, Alisher Navoiy nomidagi Oʻzbekiston Milliy kutubxonasi

2015-yil 25-noyabr

Axborot texnologiyalari va kommunikatsiyalarini rivojlantirish vazirligi, Oʻzbekiston matbuot va axborot agentligi, Adliya vazirligi, Oʻzbekiston Nodavlat notijorat tashkilotlari milliy assotsiatsyasi, Fuqarolik jamiyati shakllanishini monitoring qilish mustaqil instituti

2015-yil 25-noyabr

Oʻzbekiston matbuot va axborot agentligi, Adliya vazirligi, Axborot texnologiyalari va kommunikatsiyalarini rivojlantirish vazirligi

5.

“Davlat hokimiyati va boshqaruvi organlari faoliyatining ochiqligi toʻgʻrisida”gi Qonunni amalga oshirish boʻyicha qabul qilingan normativ-huquqiy hujjatlarga muvofiq idoraviy hujjatlarni tasdiqlash, jumladan:

Qonunning 5-moddasi birinchi va ikkinchi qismlariga muvofiq davlat hokimiyati va boshqaruvi organlari faoliyati toʻgʻrisidagi maʼlumotlar roʻyxatini;

davlat hokimiyati va boshqaruvi organlari faoliyati toʻgʻrisidagi axborot taqdim etilishi uchun masʼul boʻlgan mansabdor shaxslarning roʻyxatini tasdiqlash.

2015-yil 25-noyabr

davlat hokimiyati va boshqaruvi organlari

Doimo

davlat hokimiyati va boshqaruvi organlari

6.

Davlat hokimiyati va boshqaruvi organlari faoliyati toʻgʻrisidagi maʼlumotlar, eng avvalo, ijtimoiy ahamiyatga ega maʼlumotlar roʻyxatini tasdiqlash va muntazam ravishda yangilash, ularni rasmiy veb-saytlarda majburiy joylashtirish.

Doimo

davlat hokimiyati va boshqaruvi organlari

7.

Axborot xizmatlarining faoliyatini takomillashtirish, ularning moddiy-texnika bazasini yaxshilash va ularni yuqori malakali kadrlar bilan taʼminlash boʻyicha tegishli choralar koʻrish.

2015-yil 25-noyabr

davlat hokimiyati va boshqaruvi organlari, Oʻzbekiston matbuot va axborot agentligi

8.

Idoraviy arxivlar faoliyatini takomillashtirish, arxivariuslarning malakasini oshirish va arxiv fondlari saqlanishi shart-sharoitlarini yaxshilash boʻyicha tegishli choralar koʻrish.

2015-yil 25-noyabr

davlat hokimiyati va boshqaruvi organlari, “Oʻzarxiv”agentligi

9.

Budjet tashkilotlari faoliyatining ochiqligini taʼminlash, axborot xizmatlari (matbuot xizmatlari) tomonidan axborot-tushuntirish, targʻibot ishlari olib borilishi, ommaviy axborot vositalari bilan mustahkam oʻzaro hamkorlikni taʼminlash, jamoatchilik bilan aloqalarni tashkil etish bilan bogʻliq tadbirlarning budjet tashkilotlari tomonidan amalga oshirilishini moliyalashtirish tartibini ishlab chiqish va tushuntirish.

2015-yil 1-dekabr

Moliya vazirligi, Oʻzbekiston matbuot va axborot agentligi, Oʻzbekiston mustaqil bosma ommaviy axborot vositalarini va axborot agentliklarini qoʻllab-quvvatlash va rivojlantirish jamoat fondi, Oʻzbekiston Nodavlat notijorat tashkilotlari milliy assotsiatsyasi, “Elektron hukumat” markazi

10.

Qonun normalarining maqsadlari, mazmuni va amaliy ahamiyatini ommaviy axborot vositalari orqali keng yoritish uchun respublika va mintaqaviy teleradiokanallarda telekoʻrsatuvlar, radioeshittirishlar tashkil etish, bosma nashrlarda maqolalar eʼlon qilish.

Doimo

OʻzA, Milliy teleradiokompaniya, Oʻzbekiston matbuot va axborot agentligi, Elektron ommaviy axborot vositalari milliy assotsiatsiyasi, Fuqarolik jamiyati shakllanishini monitoring qilish mustaqil instituti, Oʻzbekiston mustaqil bosma ommaviy axborot vositalarini va axborot agentliklarini qoʻllab-quvvatlash va rivojlantirish jamoat fondi, Adliya vazirligi

11.

Davra suhbatlari, seminarlar, treninglar va uchrashuvlar oʻtkazish yoʻli bilan qonun normalari va talablarini amalga oshirish boʻyicha aholi orasida, shu jumladan nodavlat notijorat tashkilotlari va tadbirkorlik faoliyati subyektlari orasida keng tushuntirish ishlari olib borish.

Doimo

Oʻzbekiston matbuot va axborot agentligi, Axborot texnologiyalari va kommunikatsiyalarini rivojlantirish vazirligi, Savdo-sanoat palatasi, Oʻzbekiston Nodavlat notijorat tashkilotlari milliy assotsiatsyasi, Fuqarolik jamiyati shakllanishini monitoring qilish mustaqil instituti, Adliya vazirligi, Elektron ommaviy axborot vositalari milliy assotsiatsiyasi, Oʻzbekiston mustaqil bosma ommaviy axborot vositalarini va axborot agentliklarini qoʻllab-quvvatlash va rivojlantirish jamoat fondi

12.

Axborot olishni taʼminlash va ommaviy axborot vositalari faoliyati sohasidagi normativ-huquqiy hujjatlar toʻplamini nashr etish (“Davlat hokimiyati va boshqaruvi organlari faoliyatining ochiqligi toʻgʻrisida”, “Ommaviy axborot vositalari toʻgʻrisida”, “Axborot olish kafolatlari va erkinligi toʻgʻrisida”, “Axborot erkinligi prinsiplari va kafolatlari toʻgʻrisida”gi qonunlar va boshqalar).

2015-yil 25-noyabr

Fuqarolik jamiyati shakllanishini monitoring qilish mustaqil instituti, Oʻzbekiston matbuot va axborot agentligi, Axborot texnologiyalari va kommunikatsiyalarini rivojlantirish vazirligi, Adliya vazirligi

13.

Davlat hokimiyati va boshqaruvi organlarining axborot xizmatlari rahbarlari uchun seminarlar-treninglar tashkil etish.

Alohida jadval boʻyicha

Oʻzbekiston matbuot va axborot agentligi, Oʻzbekiston jurnalistlari ijodiy uyushmasi, Milliy teleradiokompaniya, Oʻzbekiston mustaqil bosma ommaviy axborot vositalarini va axborot agentliklarini qoʻllab-quvvatlash va rivojlantirish jamoat fondi, Elektron ommaviy axborot vositalari milliy assotsiatsiyasi, “Elektron hukumat” markazi, davlat hokimiyati va boshqaruvi organlari

Vazirlar Mahkamasining 2015-yil 6-noyabrdagi 320-son qaroriga
2-ILOVA
Oldingi tahrirga qarang.
Davlat hokimiyati va boshqaruvi organlari faoliyatining ochiqligini taʼminlash faoliyatini muvofiqlashtirish va monitoring olib borish boʻyicha jamoatchilik kengashi
TARKIBI
Oldingi tahrirga qarang.

Abdullayev I.Z.
(kelishuv boʻyicha)

—

Oʻzbekiston Respublikasi Oliy Majlisi Qonunchilik palatasining Axborot va kommunikatsiya texnologiyalari masalalari qoʻmitasi raisi, Jamoatchilik kengashi raisi

O.M. Umarov

—

Oʻzbekiston Respublikasi Bosh vazirining maslahatchisi — IT-texnologiyalar, telekommunikatsiyalar va innovatsion faoliyatni rivojlantirish masalalari departamenti boshligʻi, Jamoatchilik kengashi raisining oʻrinbosari

Fayzullayev A.N.

—

Oʻzbekiston Respublikasi Axborot texnologiyalari va kommunikatsiyalarini rivojlantirish vazirining birinchi oʻrinbosari

Usmanov A.A.

—

Oʻzbekiston Respublikasi Adliya vazirining oʻrinbosari

lavozimi boʻyicha

—

Axborot va ommaviy kommunikatsiyalar agentligining direktori

Abdullayev A.X.

—

“Oʻzarxiv” agentligining bosh direktori

Xodjayev A.A.

—

Alisher Navoiy nomidagi Oʻzbekiston Milliy kutubxonasi — axborot resurs markazi direktori

Xikmatullayev N.N.

—

Oʻzbekiston Milliy teleradiokompaniyasi raisining birinchi oʻrinbosari

Suyarov S.L.

—

Oʻzbekiston Milliy axborot agentligi (OʻzA) bosh direktorining oʻrinbosari

Xabibullayev Sh.X.

—

Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi huzuridagi “Elektron hukumat” tizimini rivojlantirish markazi direktori

Abdukarimov G.O.

—

Fuqarolik jamiyati shakllanishini monitoring qilish mustaqil instituti direktori

Xalimbekov I.T.

—

Oʻzbekiston jurnalistlari ijodiy uyushmasi raisi

Abdullayev A.A.

—

Oʻzbekiston mustaqil bosma ommaviy axborot vositalari va axborot agentliklarini qoʻllab-quvvatlash va rivojlantirish jamoat fondi direktori

Abduxalikov F.F.

—

Oʻzbekiston elektron ommaviy axborot vositalari milliy assotsiatsiyasining raisi

Karimov A.M.

—

Oʻzbekiston Nodavlat notijorat tashkilotlar milliy assotsiatsiyasining raisi

lavozimi boʻyicha

—

Vazirlar Mahkamasining IT-texnologiyalar, telekommunikatsiyalar va innovatsion faoliyatni rivojlantirish masalalari departamenti bosh mutaxassisi, Jamoatchilik kengashi kotibi

Izoh: Jamoatchilik kengashi aʼzolari boshqa ishga oʻtgan taqdirda uning tarkibiga ushbu lavozimlarga yangidan tayinlangan shaxslar yoxud zimmasiga tegishli funksiyalarni bajarish yuklangan shaxslar kiritiladi.
(2-ilova Oʻzbekiston Respublikasi Vazirlar Mahkamasining 2020-yil 26-iyundagi 411-sonli qarori tahririda — Qonun hujjatlari maʼlumotlari milliy bazasi, 27.06.2020-y., 09/20/411/1000-son)
(Oʻzbekiston Respublikasi qonun hujjatlari toʻplami, 2015-y., 45-son, 575-modda; 2016-y., 42-son, 490-modda; Qonun hujjatlari maʼlumotlari milliy bazasi, 14.02.2018-y., 09/18/107/0697-son, 25.08.2018-y., 09/18/680/1791-son, 14.05.2019-y., 09/19/397/3123-son, 04.06.2019-y., 09/19/457/3235-son; 27.06.2020-y., 09/20/411/1000-son; Qonunchilik maʼlumotlari milliy bazasi, 05.04.2022-y., 09/22/153/0266-son)