Oʻzbekiston Respublikasi Prezidentining “Kapital qurilishda iqtisodiy islohotlarni yanada chuqurlashtirishning asosiy yoʻnalishlari toʻgʻrisida” 2003-yil 6-maydagi PF-3240-son Farmonini bajarish yuzasidan hamda kapital qurilishda ijara va lizing xizmatlarini rivojlantirish maqsadida Vazirlar Mahkamasi qaror qiladi:

1. Vazirlar Mahkamasining Qurilish, qurilish materiallari sanoati, uy-joy-kommunal xoʻjaligi va transport kompleksi, Oʻzbekiston Respublikasi Tashqi iqtisodiy faoliyat milliy banki, “Asaka” banki, “Paxta-bank”, “Oʻzsanoatqurilishbank”, “Oʻzuyjoyjamgʻarmabank”, “Oʻzbekiston temir yoʻllari” davlat-aksiyadorlik kompaniyasi, “Oʻzbekneftgaz” milliy xolding kompaniyasi, “Oʻzbekenergo” davlat-aksiyadorlik kompaniyasining ustav jamgʻarmasi 1 mlrd soʻm boʻlgan, ulushlar 1-ilovaga muvofiq taqsimlanadigan ochiq aksiyadorlik jamiyati shaklidagi “Qurilish-lizing” lizing kompaniyasini tashkil etish toʻgʻrisidagi taklifiga rozilik berilsin.

2. “Qurilish-lizing” lizing kompaniyasiga:

oʻz moliyaviy manbalari hisobiga, shuningdek mamlakatimiz banklari va xorijiy banklar kreditlarini jalb qilish yoʻli bilan zamonaviy qurilish texnikasi, kichik mexanizatsiya va maxsus transport vositalari xarid qilish;

qurilish texnikasini, transport va kichik mexanizatsiya vositalarini mulkchilikning barcha shakllaridagi pudrat qurilish tashkilotlariga, birinchi navbatda, kichik va xususiy biznes subyektlariga shartnoma asosida lizingga va ijaraga berish yuklansin.

3. “Qurilish-lizing” lizing kompaniyasi xodimlarining cheklangan umumiy soni 34 nafar, shu jumladan boshqaruv xodimlari 19 nafar boʻlgan boshqaruv tuzilmasi 2-ilovaga muvofiq maʼqullansin.

4. Oʻzbekiston Respublikasi Davlat mulki qoʻmitasi, Moliya vazirligi:

Vazirlar Mahkamasining “2003-2004-yillarda korxonalarni davlat tasarrufidan chiqarish va xususiylashtirish dasturi toʻgʻrisida” 2003-yil 17-apreldagi 185-son qaroriga muvofiq pudrat qurilish tashkilotlarining davlat aktivlarini birja va birjadan tashqari bozorlarda sotishdan tushadigan mablagʻlarni;

iqtisodiy nochor pudrat qurilish tashkilotlarining budjet oldidagi qarzlarini qoplash hisobiga ularning mol-mulkini qarz summasi doirasida sotishdan tushadigan mablagʻlarni qaytarish asosida “Qurilish-lizing” lizing kompaniyasiga 5 yil muddatga bersinlar, ushbu mablagʻlar kompaniyaning maxsus hisob raqamiga oʻtkazilsin.

Belgilab qoʻyilsinki, koʻrsatib oʻtilgan mablagʻlardan faqat keyinchalik ularni pudrat qurilish tashkilotlariga lizing va ijaraga berish uchun qurilish texnikasi, kichik mexanizatsiya va transport vositalari xarid qilish uchun foydalanilishi mumkin.

5. Oʻzbekiston Respublikasi Moliya vazirligi, Iqtisodiyot vazirligi huzuridagi Iqtisodiy nochor korxonalar ishlari qoʻmitasi Davlat mulki qoʻmitasi va Davlat soliq qoʻmitasi bilan birgalikda tugatilayotgan iqtisodiy nochor qurilish tashkilotlarining qurilish texnikasi, transport vositalari va kichik mexanizatsiya vositalarini ularning budjet oldidagi qarzlarni qoplash hisobiga “Qurilish-lizing” lizing kompaniyasiga berish tartibini bir oy muddatda ishlab chiqsin va tasdiqlasin.

Belgilansinki, tugatilayotgan iqtisodiy nochor pudrat qurilish tashkilotlarining ularning budjet oldidagi qarzlarini qoplash hisobiga “Qurilish-lizing” lizing kompaniyasiga beriladigan asosiy vositalari daromad soligʻi va mol-mulk soligʻi boʻyicha soliqqa tortish obyekti hisoblanmaydi.

6. “Qurilish-lizing” lizing kompaniyasi:

Oʻzbekiston Respublikasi hududiga, keyinchalik ularni lizingga va ijaraga berish uchun olib kelinayotgan qurilish texnikasi, ehtiyot qismlar, qurilish transport vositalari va kichik mexanizatsiya vositalari uchun bojxona bojlari va qoʻshilgan qiymat soligʻidan 5 yil muddatga;

qurilish texnikasi va kichik mexanizatsiya vositalarini lizingga va ijaraga berishdan olingan daromadlar boʻyicha 2007-yil 31-dekabrgacha daromad (foyda) soligʻidan ozod qilinsin, soliqqa tortishdan boʻshaydigan mablagʻlar zamonaviy qurilish asbob-uskunalari va texnika xarid qilishga maqsadli yoʻnaltiriladi.

7. Vazirlar Mahkamasining Qurilish, qurilish materiallari sanoati, uy-joy-kommunal xoʻjaligi va transport kompleksi ikki hafta muddatda “Qurilish-lizing” lizing kompaniyasi aksiyadorlarining taʼsis yigʻilishi oʻtkazilishini, kompaniya ustavi tasdiqlanishini taʼminlasin.

8. Toshkent shahar hokimligi “Qurilish-lizing” lizing kompaniyasini joylashtirish uchun bir oy muddatda, belgilangan tartibda bino ajratsin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari K.N. Toʻlaganov va Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.