Ommaviy tadbirlar oʻtkaziladigan obyektlarda yongʻin xavfsizligiga, tez tibbiy yordam koʻrsatishga, evakuatsiyaga va himoyalash boʻyicha muhandislik-texnik vositalar bilan jihozlashga qoʻyiladigan yagona talablarni belgilash hamda ularga rioya etilishi ustidan nazoratni taʼminlash maqsadida Oʻzbekiston Respublikasi Ichki ishlar vazirligi, Favqulodda vaziyatlar vazirligi, Sogʻliqni saqlash vazirligi hamda Davlat arxitektura va qurilish qoʻmitasi qaror qiladi:

1. Ommaviy tadbirlar oʻtkaziladigan obyektlarda yongʻin xavfsizligiga, tez tibbiy yordam koʻrsatishga, evakuatsiyaga va himoyalash boʻyicha muhandislik-texnik vositalar bilan jihozlashga qoʻyiladigan yagona talablar hamda ularga rioya etilishi ustidan nazoratni taʼminlash tartibi toʻgʻrisidagi nizom ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga kiradi.

Mazkur Nizom ommaviy tadbirlar oʻtkaziladigan obyektlarda yongʻin xavfsizligiga, tez tibbiy yordam koʻrsatishga, evakuatsiyaga va himoyalash boʻyicha muhandislik-texnik vositalar bilan jihozlashga qoʻyiladigan yagona talablar hamda ularga rioya etilishi ustidan nazoratni taʼminlash tartibini belgilaydi.

1. Mazkur Nizom talablari Oʻzbekiston Respublikasi hududida ommaviy tadbirlar oʻtkaziladigan obyektlar maʼmuriyati, tashkilotchilari va ishtirokchilari uchun majburiydir.

2. Mazkur Nizom talablari texnik jihatdan tartibga solish sohasidagi normativ hujjatlar talablari bajarilishini istisno etmaydi.

3. Ommaviy tadbirlar oʻtkaziladigan obyektlarda yongʻin xavfsizligini taʼminlash Odamlar ommaviy boʻladigan obyektlar uchun yongʻin xavfsizligi qoidalariga (roʻyxat raqami 354, 1997-yil 8-iyul) muvofiq amalga oshirilishi kerak.

4. Ommaviy tadbirlar oʻtkaziladigan obyektlar:

texnologik va muhandislik asbob-uskunalari, yongʻinga qarshi himoya tizimi va vositalari, yongʻinga qarshi suv taʼminoti manbalari (gidrantlar, rezervuarlar, suv havzalari, ichki yongʻin oʻchirish joʻmraklari), yongʻin oʻchirish texnikasi, yongʻinni oʻchirishning birlamchi vositalari bilan jihozlangan boʻlishi;

ommaviy tadbir oʻtkaziladigan obyektlardagi yongʻin oʻchirish avtomatika vositalari, evakuatsiya qilish yoʻllarini koʻrsatish va harakatlanish belgilari, tutun tortish va avariya yoritish tizimlari soz boʻlishi;

ommaviy tadbir oʻtkaziladigan obyektlarda yongʻinni oʻchirishda foydalaniladigan zaxira suv manbalari, statsionar zinalar va yongʻinni oʻchirishning birlamchi vositalariga olib boruvchi yoʻllar doimo boʻsh, soz va tozalangan holatda boʻlishi lozim.

5. Ommaviy tadbirlar oʻtkaziladigan obyektlarda tez tibbiy yordam koʻrsatish tadbirning turi, ishtirokchilar soni, obyekt turi va davomiylik vaqtini inobatga olgan holda tashkillashtirilishi kerak.

6. Ommaviy tadbirlar oʻtkaziladigan obyektlarda tez tibbiy yordam koʻrsatish joylari ommaviy tadbirlar oʻtkaziladigan obyektlar maʼmuriyati tomonidan taʼminlanishi zarur.

7. Tez tibbiy yordam sogʻliqni saqlash tizimining maxsus tez tibbiy yordam xizmati tomonidan amalga oshirilishi lozim.

8. Ommaviy tadbirlar oʻtkaziladigan obyektlarda ishtirokchilarning obyekt hududi boʻylab harakatini tashkil etish, tribunalarni toʻldirish va evakuatsiya qilish yoʻllari, chipta kassalari, ovqatlanish punktlari, garderoblar, dam olish, tez tibbiy yordam koʻrsatish joylari, yongʻinni oʻchirishning birlamchi vositalari va ularning joylashishi sxemalari mavjud boʻlishi kerak.

9. Muhandislik va qurilish konstruksiyalari, texnik tizimlarning ishonchliligi va barqarorligi, ishtirokchilarni evakuatsiya qilish yoʻllarining belgilangan normativlarga muvofiqligi ommaviy tadbirlar oʻtkaziladigan obyektlar maʼmuriyati tomonidan taʼminlanishi zarur.

10. Ommaviy tadbirlar oʻtkaziladigan obyektlardagi barcha muhandislik va yoritish tizimlarining uzluksiz ishlashi ommaviy tadbirlar oʻtkaziladigan obyektlar maʼmuriyati tomonidan taʼminlanadi.

11. Ommaviy tadbirlar oʻtkaziladigan obyektlarning evakuatsiya qilish yoʻllari va obyektlardan chiqish joylarida ogohlantiruvchi belgilar oʻrnatilishi lozim.

12. Ommaviy tadbirlar ishtirokchilari favqulodda vaziyatlar yuzaga kelganda huquqni muhofaza qilish organlari xodimlari koʻrsatmasiga asosan harakat qilishlari zarur.

13. Ommaviy tadbirlar oʻtkaziladigan obyektlar hududiga olib kiruvchi yoʻllarda maxsus transport vositalarining erkin kirib-chiqishi uchun maxsus yoʻlaklar ajratilishi kerak.

14. Ommaviy tadbirlar oʻtkaziladigan obyektlar va unga tutash hududlarning xavfsizligini taʼminlash maqsadida ommaviy tadbirlar oʻtkaziladigan obyektlar maʼmuriyati tomonidan statsionar foto va videokuzatuv tizimlari oʻrnatilishi mumkin.

15. Ommaviy tadbirlar oʻtkaziladigan obyektlarda yongʻin xavfsizligiga, tez tibbiy yordam koʻrsatishga, evakuatsiyaga va himoyalash boʻyicha muhandislik-texnik vositalar bilan jihozlashga qoʻyiladigan yagona talablarga rioya etilishi ustidan nazorat Qoraqalpogʻiston Respublikasi Vazirlar Kengashi, viloyatlar va Toshkent shahar, shaharlar va tumanlar hokimliklari huzurida ommaviy tadbirlar oʻtkazilishini nazorat qiluvchi komissiyalar tomonidan taʼminlanadi.

16. Qoraqalpogʻiston Respublikasi Vazirlar Kengashi, viloyatlar va Toshkent shahar, shaharlar va tumanlar hokimliklari huzurida ommaviy tadbirlar oʻtkazilishini nazorat qiluvchi komissiyalar ommaviy tadbirlar oʻtkaziladigan obyektlarda yongʻin xavfsizligiga, tez tibbiy yordam koʻrsatishga, evakuatsiyaga va himoyalash boʻyicha muhandislik-texnik vositalar bilan jihozlashga qoʻyiladigan yagona talablarga rioya etilishi ustidan nazoratni qonunchilik hujjatlarida belgilangan tartibda amalga oshiradi.

17. Mazkur Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javobgarlikka tortiladi.