Oʻzbekiston Respublikasi Prezidentining “Chet tillarni oʻrganish tizimini yanada takomillashtirish chora-tadbirlari toʻgʻrisida” 2012-yil 10-dekabrdagi PQ-1875-son qarorining bajarilishini taʼminlash maqsadida Vazirlar Mahkamasi qaror qiladi:

1. Xalq taʼlimi vazirligi, Oliy va oʻrta maxsus taʼlim vazirligi, Oʻrta maxsus, kasb-hunar taʼlimi markazi tomonidan ishlab chiqilgan, 2013 — 2016-yillarda taʼlim muassasalarining chet tillari kabinetlarini zamonaviy axborot-kommunikatsiya, oʻqitishning texnik vositalari va anjomlari bilan jihozlashni (qoʻshimcha jihozlashni) jadallashtirish Dasturi (keyingi oʻrinlarda Dastur deb ataladi) tasdiqlansin, Dastur quyidagilarni oʻz ichiga oladi:

Taʼlim muassasalarining chet tillari kabinetlarini zamonaviy axborot-kommunikatsiya, oʻqitishning texnik vositalari va anjomlari bilan jihozlash normativlari 1-ilovaga* muvofiq;

2013 — 2016-yillarda umumtaʼlim maktablarining chet tillari kabinetlarini zamonaviy axborot-kommunikatsiya, oʻqitishning texnik vositalari va anjomlari bilan jihozlashning (qoʻshimcha jihozlashning) asosiy koʻrsatkichlari 2-ilovaga* muvofiq;

2013 — 2016-yillarda oʻrta maxsus, kasb-hunar taʼlimi muassasalarining chet tillari kabinetlarini zamonaviy axborot-kommunikatsiya, oʻqitishning texnik vositalari va anjomlari bilan jihozlashning (qoʻshimcha jihozlashning) asosiy koʻrsatkichlari 3-ilovaga* muvofiq;

2013 — 2016-yillarda oliy taʼlim muassasalarining chet tillari kabinetlarini zamonaviy axborot-kommunikatsiya, oʻqitishning texnik vositalari va anjomlari bilan jihozlashning (qoʻshimcha jihozlashning) asosiy koʻrsatkichlari 4-ilovaga* muvofiq.

2. Quyidagilar Dasturni moliyalashtirishning asosiy manbalari etib belgilansin:

Oʻzbekiston Respublikasi Moliya vazirligi huzuridagi budjetdan tashqari Taʼlim va tibbiyot muassasalarini moddiy-texnika bazasini rivojlantirish jamgʻarmasi mablagʻlari;

oliy taʼlim muassasalarida oʻqitishning toʻlov-kontrakt shaklidan tushgan mablagʻlar;

oliy taʼlim muassasalariga maqsadli ravishda budjetdan ajratiladigan mablagʻlar;

imtiyozli xorijiy kreditlar va grantlar;

qonun hujjatlariga zid boʻlmagan boshqa manbalar.

3. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi Iqtisodiyot vazirligi, Moliya vazirligi, Xalq taʼlimi vazirligi, Oliy va oʻrta maxsus taʼlim vazirligi bilan birgalikda taʼlim muassasalarini jihozlash uchun belgilangan tartibda xalqaro moliya institutlari, tashkilotlari hamda donor mamlakatlarning imtiyozli xorijiy kreditlarini jalb etish choralarini koʻrsin.

4. Oʻzbekiston Respublikasi Xalq taʼlimi vazirligi, Oliy va oʻrta maxsus taʼlimi vazirligi hamda Oʻrta maxsus, kasb-hunar taʼlimi markazi Iqtisodiyot vazirligi va Moliya vazirligi bilan kelishilgan holda har yili taʼlim muassasalarini jihozlash (qoʻshimcha jihozlash) manzilli dasturlarining shakllantirilishini va belgilangan tartibda tasdiqlanishini taʼminlasinlar.

Belgilab qoʻyilsinki, har yili taʼlim muassasalarini jihozlash (qoʻshimcha jihozlash) manzilli dasturlarini shakllantirishda har bir taʼlim muassasasining moddiy-texnika jihatidan amalda taʼminlanganligi hisobga olinadi hamda oʻqitishning texnik vositalari asossiz tarzda hisobdan chiqarilishiga yoʻl qoʻyilmaydi.

5. Chet tillarni oʻrganishni yanada rivojlantirish boʻyicha doimiy ishlaydigan Muvofiqlashtiruvchi kengashga Oʻzbekiston Respublikasi Oliy va oʻrta maxsus taʼlim vazirligi hamda Xalq taʼlimi vazirligining taklifiga koʻra, zaruriyat boʻlganda, Dasturga va jihozlash normativlariga tegishli oʻzgartirish va qoʻshimchalar kiritish huquqi berilsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.