O‘zbekiston Respublikasi Mehnat kodeksining 288-moddasiga va Soliq kodeksining 369-moddasiga muvofiq dala sharoitlaridagi ishlarda band bo‘lgan xodimlarning mehnatini yanada rag‘batlantirish va qo‘shimcha xarajatlarining o‘rnini qoplash maqsadida Vazirlar Mahkamasi qaror qiladi:

1. Dala sharoitlaridagi ishlarda band bo‘lgan xodimlarga dala ustamasi to‘lash tartibi to‘g‘risidagi Nizom ilovaga muvofiq tasdiqlansin.

2. Dala sharoitlaridagi ishlarda band bo‘lgan xodimlarga mehnat haqi tumanlar bo‘yicha tartibga solinadigan, shu jumladan noqulay tabiiy iqlim-sharoitlaridagi joylarda ishlaganlik uchun tuman koeffitsiyentlari bo‘yicha to‘lovlar qonunchilikka muvofiq amalga oshiriladi.

3. Vazirliklar va idoralar bir oy muddatda o‘z normativ-huquqiy hujjatlarini ushbu qarorga muvofiqlashtirsinlar.

4. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S.Azimov zimmasiga yuklansin.

1. Ushbu Nizom dala sharoitlarida geologiya-qidiruv, topografiya-geodeziya, loyiha-izlanish, ilmiy-tadqiqot ishlarini hamda boshqa ishlarni bajaradigan tashkilotlar (korxonalar) xodimlariga dala ustamasi (nafaqasi) to‘lashning umumiy tartibini va miqdorlarini belgilaydi.

2. Xodimlarga dala ustamasi ishlovchilarning vaqtincha noqulay mehnat va maishiy sharoitlar sababli dala sharoitlaridagi ishlarni bajarish, shuningdek ishlab chiqarish obyektlarining aholi punktlaridan tashqarida joylashganligi bilan bog‘liq ortiqcha xarajatlarning o‘rnini qoplash maqsadida to‘lanadi.

3. Quyidagi xodimlar dala ustamasi olish huquqiga ega:

a) dala sharoitlarida ishlovchilar va dala ishlari amalga oshirilayotgan joylarda yashovchilar;

b) ushbu Nizomning 1-bandida ko‘rsatilgan geologiya-qidiruv, topografiya-geodeziya, loyiha-izlanish va boshqa tashkilotlar (korxonalar)ga bevosita ularning bazaviy dala shaharchalarida xizmat ko‘rsatish uchun maxsus tashkil etilgan maktablar, tibbiyot, madaniy-ma’rifiy, maktabgacha ta’lim muassasalari va boshqa yordamchi bo‘linmalar xodimlari.

4. Dala nafaqasi xodimlarga, egallab turgan lavozimi va oylik maoshidan qat’i nazar, dala nafaqasi hisoblab yoziladigan sanada quyidagi miqdorlardan kam bo‘lmagan miqdorda to‘lanadi:

bevosita dala ishlari o‘tkaziladigan obyektlarda, tashkilotning daladagi bazaviy shaharchasidan tashqarida ishlaganda — kunlik mehnatga haq to‘lash eng kam miqdorining yetti foizi;

tashkilotlarning daladagi bazaviy shaharchalarida bajariladigan ish uchun — kunlik mehnatga haq to‘lash eng kam miqdorining ikki foizi.

4³. Zoologik va botanik tadqiqotlar o‘tkazuvchi O‘zbekiston Respublikasi Davlat budjeti mablag‘lari hisobiga moliyalashtiriladigan ilmiy tashkilotlarda dala ustamasi zoologik va botanik ilmiy-tadqiqot ishlarini bajaradigan ilmiy xodimlarga, egallab turgan lavozimi va oylik maoshidan qat’i nazar, dala ustamasi hisoblab yoziladigan sanada O‘zbekiston Respublikasida belgilangan bazaviy hisoblash miqdoriga nisbatan (koeffitsiyentlarda), biroq har oyda bazaviy hisoblash miqdorining 7 baravaridan ortiq bo‘lmagan quyidagi miqdorlarda haq to‘lanadi:

a) kuniga 0,3 — dala sharoitlarida bevosita dala ishlari amalga oshiriladigan obyektlarda ishlaganda;

b) kuniga 0,11 — bazaviy dala shaharchalarida ishlaganda.

5. O‘z xodimlariga dala ustamasi (nafaqasi) to‘lash huquqiga ega bo‘lgan tashkilotlar ro‘yxati mansubligi bo‘yicha vazirliklar va idoralar tomonidan, vazirliklar va idoralar tarkibiga kirmaydigan tashkilotlar (korxonalar) tomonidan esa — mustaqil ravishda (Kambag‘allikni qisqartirish va bandlik vazirligi bilan kelishgan holda) tasdiqlanadi.

6. Dala ishlariga yuborilayotgan xodimlarga dala ustamasi to‘lash tashkilot (korxona) bo‘yicha tegishli buyruq bilan belgilanadi.

7. Dala ustamasi dala ishlari amalga oshirilayotgan joyda haqiqatda bo‘lingan kalendar kunlar uchun to‘lanadi.

8. Ushbu Nizomning 4-bandida nazarda tutilgan miqdorlardagi dala ustamasi o‘rtacha oylik ish haqini hisoblashda hisobga olinmaydi va Soliq kodeksiga muvofiq xodimning daromadi sifatida hisoblanmaydi.

9. Dala ustamasi to‘lash xodim dala ishlari olib borilayotgan joyda yoki bazaviy dala shaharchasida bo‘lgan quyidagi holatlarda saqlanib qoladi:

a) vaqtinchalik ishga layoqatsiz bo‘lgan davrda;

b) davlat yoki jamoat vazifalarini bajarish vaqtida.

10. Dala ustamasi:

a) har kuni doimiy yashash joyiga qaytib kelish imkoniyatiga ega bo‘lgan barcha toifadagi xodimlarga;

b) har yilgi mehnat ta’tilida bo‘lingan vaqt uchun to‘lanmaydi.

11. Xodim xizmat safariga yuborilganda dala ustamasi to‘lash to‘xtatiladi. Bunday holatlarda xarajatlar o‘rnini qoplash xizmat safarlari to‘g‘risidagi qonunchilikka muvofiq amalga oshiriladi.

12. Tashkilotlar (korxonalar)ning jamoa shartnomalarida, jamoa kelishuvlarida va mehnat shartnomalarida dala ustamasi ushbu Nizomning 4-bandida belgilangan miqdorlardan ortiq miqdorda nazarda tutilishi mumkin, uni to‘lash budjetdan tashqari manbalar hisobiga amalga oshiriladi. Tashkilot (korxona)lar dala ustamasini o‘z mablag‘lari hisobidan to‘laydilar.

13. Budjet tashkilotlari va budjet mablag‘lari oluvchilar tomonidan dala ustamasi to‘lash bilan bog‘liq xarajatlar tegishli xarajatlar smetalarida nazarda tutilgan mablag‘lar doirasida amalga oshiriladi.

14. Ushbu Nizomning 4-bandida nazarda tutilgan normalardan ortiq miqdorda to‘lanadigan dala ustamasi O‘zbekiston Respublikasining Soliq kodeksiga muvofiq jismoniy shaxslarning daromadlari deb hisoblanadi va ulardan soliq olinadi.

15. Mazkur Nizom talablarining buzilishida aybdor bo‘lgan shaxslar qonunchilikda belgilangan tartibda javob beradilar.