Oʻzbekiston Respublikasi Prezidentining 2018-yil 13-apreldagi PQ-3666-son “Oʻzbekiston Respublikasi Adliya vazirligi faoliyatini yanada takomillashtirishga doir tashkiliy chora-tadbirlar toʻgʻrisida”gi qaroriga muvofiq hamda davlat boshqaruvi va mahalliy davlat hokimiyati organlarida normativ-huquqiy hujjatlar matnlaridan keng foydalanishni taʼminlash, shuningdek axborot-kommunikatsiya texnologiyalarining zamonaviy vositalaridan foydalanish va qonun hujjatlarining turkumlashtirilgan hisobini yuritishni soddalashtirish maqsadida buyuraman:

1. Davlat boshqaruvi organlari va mahalliy davlat hokimiyati organlarida qonun hujjatlarining turkumlashtirilgan hisobini yuritish qoidalari ilovaga muvofiq tasdiqlansin.

2. Belgilansinki, Oʻzbekiston Respublikasi qonunchilik tarmoqlarining Umumhuquqiy klassifikatori asosida barcha normativ-huquqiy hujjatlarga kodlar berish hamda qonun hujjatlarini hisobga olish va turkumlash kartotekasini yuritish Oʻzbekiston Respublikasi Adliya vazirligi tomonidan markazlashtirilgan tartibda amalga oshiriladi.

3. Quyidagilar oʻz kuchini yoʻqotgan deb hisoblansin:

Oʻzbekiston Respublikasi adliya vazirining 2007-yil 14-iyundagi 112-mh-son “Davlat boshqaruvi organlari va mahalliy davlat hokimiyati organlarida qonun hujjatlarining turkumlashtirilgan hisobini yuritish qoidalarini tasdiqlash toʻgʻrisida”gi buyrugʻi (roʻyxat raqami 1689, 2007-yil 14-iyun) (Oʻzbekiston Respublikasi qonun hujjatlari toʻplami, 2007-y., 24-son, 256-modda);

Oʻzbekiston Respublikasi adliya vazirining 2011-yil 3-oktabrdagi 226-mh-son “Davlat boshqaruvi organlari va mahalliy davlat hokimiyati organlarida qonun hujjatlarining turkumlashtirilgan hisobini yuritish qoidalarini tasdiqlash toʻgʻrisida”gi buyruqqa oʻzgartirishlar kiritish haqida”gi buyrugʻi (roʻyxat raqami 1689-1, 2011-yil 3-oktabr) (Oʻzbekiston Respublikasi qonun hujjatlari toʻplami, 2011-y., 40-son, 436-modda).

4. Mazkur buyruq davlat roʻyxatidan oʻtkazilsin va Idoraviy meʼyoriy hujjatlarni davlat roʻyxatidan oʻtkazish boshqarmasi (B. Boliyev) Oʻzbekiston Respublikasi vazirliklari, davlat qoʻmitalari va idoralari normativ-huquqiy hujjatlarining Davlat reyestriga tegishli yozuv kiritsin.

5. Qonun hujjatlarini turkumlash va huquqiy axborot boshqarmasi (S. Nuriyev) ushbu normativ-huquqiy hujjatning manfaatdor shaxslar eʼtiboriga yetkazilishini va “Oʻzbekiston Respublikasi qonun hujjatlari toʻplami” — “Sobraniye zakonodatelstva Respubliki Uzbekistan”da nashr etilishini taʼminlasin.

6. Qonun hujjatlarini turkumlash va huquqiy axborot boshqarmasi (S. Nuriyev) Huquqiy axborot bilan taʼminlash markazi (Sh. Yaminov) bilan birgalikda davlat boshqaruvi va mahalliy davlat hokimiyati organlari tomonidan Qonun hujjatlari maʼlumotlari milliy bazasidan foydalanilishi yuzasidan doimiy monitoring olib borsin.

7. Mazkur buyruq davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

8. Mazkur buyruqning ijrosini nazorat qilish vazirning birinchi oʻrinbosari E. Kanyazov zimmasiga yuklatilsin.

Mazkur Qoidalar Oʻzbekiston Respublikasi Prezidentining 2018-yil 13-apreldagi PQ-3666-son “Oʻzbekiston Respublikasi Adliya vazirligi faoliyatini yanada takomillashtirishga doir tashkiliy chora-tadbirlar toʻgʻrisida”gi qaroriga muvofiq vazirliklar, davlat qoʻmitalari va idoralar hamda ularning tarkibiy va hududiy tuzilmalarida (keyingi oʻrinlarda matnda davlat boshqaruvi organlari deb yuritiladi), shuningdek mahalliy davlat hokimiyati organlarida qonun hujjatlarining turkumlashtirilgan hisobini yuritish tartibini belgilaydi.

Boshqa organlarga qonun hujjatlarining turkumlashtirilgan hisobini yuritishda mazkur Qoidalar talablaridan foydalanish tavsiya etiladi.

1. Qonun hujjatlarining turkumlashtirilgan hisobini yuritish — ularni markazlashtirilgan tartibda yigʻish, mazkur Qoidalarning 1-ilovasidagi Qonun hujjatlarining rasmiy davriy nashrlarini hisobga olish jurnalida (keyingi oʻrinlarda matnda Jurnal deb yuritiladi) hisobga olish hamda nazorat nusxalarini olib borishdan iborat.

2. Davlat boshqaruvi organlarida Oʻzbekiston Respublikasining Konstitutsiyasi va bevosita ushbu tashkilotlar faoliyatiga tegishli sohadagi munosabatlarni tartibga soluvchi normativ-huquqiy hujjatlarning turkumlashtirilgan hisobi yuritiladi.

Davlat boshqaruvi organlarining tarkibiy va hududiy boʻlinmalarida normativ-huquqiy hujjatlarning turkumlashtirilgan hisobini yuritish ixtiyoriy boʻlib, tegishli davlat boshqaruvi organi rahbarining qaroriga muvofiq amalga oshiriladi.

3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarida Oʻzbekiston Respublikasining Konstitutsiyasi hamda quyidagi sohalarga oid normativ-huquqiy hujjatlarning turkumlashtirilgan hisobi yuritiladi:

davlat ramzlari, poytaxt, davlat mukofotlari, faxriy unvonlar;

maʼmuriy-hududiy tuzilish;

referendumlar, saylov tizimi;

yoshlarga doir siyosat;

mahalliy davlat hokimiyati;

fuqarolarning oʻzini oʻzi boshqarish organlari;

qonunchilik tashabbusi, norma ijodkorligi faoliyati;

jismoniy va yuridik shaxslarning murojaatlari;

nikoh va oila, fuqarolik holati dalolatnomalari;

mehnat, aholi bandligi, ijtimoiy sugʻurta, ijtimoiy taʼminot;

sogʻliqni saqlash, sanitariyaga oid qonun hujjatlari;

taʼlim;

uy-joy qonunchiligi, kommunal xizmat;

atrof-tabiiy muhitni muhofaza qilish;

qishloq xoʻjaligi (Toshkent shahar hokimligidan tashqari);

savdo va xizmat koʻrsatish, transport, yoʻl xoʻjaligi;

soliq va boshqa majburiy toʻlovlar;

davlat budjeti va budjetdan tashqari jamgʻarmalar;

buxgalteriya hisobi;

davlat tasarrufidan chiqarish va xususiylashtirish;

tadbirkorlik faoliyatini davlat tomonidan qoʻllab-quvvatlash;

terrorizm va diniy ekstremizm bilan kurash;

fuqarolik muhofazasi.

Mazkur bandda koʻrsatilgan normativ-huquqiy hujjatlardan tashqari, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarida ularning oʻzlari tomonidan qabul qilingan qarorlarning, shuningdek tegishincha Qoraqalpogʻiston Respublikasi Joʻqorgʻi Kengesi, viloyatlar va Toshkent shahar xalq deputatlari kengashlari qarorlarining turkumlashtirilgan hisobi yuritiladi.

4. Tuman (shahar) hokimliklarida tegishincha tuman (shahar) hokimining, tuman (shahar) xalq deputatlari Kengashining, Qoraqalpogʻiston Respublikasi Joʻqorgʻi Kengesining va Vazirlar Kengashining, viloyat, Toshkent shahar hokimining hamda viloyat, Toshkent shahar xalq deputatlari Kengashi qarorlarining turkumlashtirilgan hisobi yuritiladi.

6. Qonun hujjatlarining turkumlashtirilgan hisobini yuritish vazifasi yuridik xizmat xodimiga (yuriskonsultga) yuklatiladi. Uning yoʻqligida ushbu vazifa davlat boshqaruvi organi yoki mahalliy davlat hokimiyati organi rahbari tomonidan boshqa shaxsga yuklatiladi.

Oʻzbekiston Respublikasi qonunchilik tarmoqlarining Umumhuquqiy klassifikatori asosida barcha normativ-huquqiy hujjatlarga kodlar berish hamda qonun hujjatlarini hisobga olish va turkumlash kartotekasini yuritish Oʻzbekiston Respublikasi Adliya vazirligi tomonidan markazlashtirilgan tartibda amalga oshiriladi.

7. Qonun hujjatlarining turkumlashtirilgan hisobini yuritish maqsadida davlat boshqaruvi organlari va mahalliy davlat hokimiyati organlariga kelib tushgan qonun hujjatlarining rasmiy davriy nashri (keyingi oʻrinlarda — rasmiy nashrlar) toʻgʻrisidagi maʼlumotlar mazkur Qoidalarning 6-bandida koʻrsatilgan xodimlar tomonidan Jurnalga kiritiladi.

8. Jurnalga rasmiy nashr toʻgʻrisidagi quyidagi maʼlumotlar kiritiladi:

tartib raqami;

roʻyxatga olish sanasi;

rasmiy nashrning nomi;

rasmiy nashrning chop etilgan yili;

rasmiy nashrning soni;

rasmiy nashrning bahosi;

izoh.

9. Qonun hujjatining nazorat nusxasi boʻlib, shu hujjatga kiritilgan barcha oʻzgartish va qoʻshimchalar, hujjatning toʻliq yoki qisman oʻz kuchini yoʻqotgan deb hisoblanganligi, hujjatning toʻliq yoki qisman amal qilish muddatini uzaytirish yoxud amal qilishini toʻxtatib turish haqidagi maʼlumotlar kiritilgan nusxasi hisoblanadi.

10. Ilgari qabul qilingan normativ-huquqiy hujjat yoki uning boʻlimi, kichik boʻlimi, bobi, paragrafi, moddasi, qismi, bandi, kichik bandi, xatboshisi (keyingi oʻrinlarda matnda tuzilmaviy birliklari deb yuritiladi) oʻz kuchini yoʻqotgan deb hisoblanganda yoki yangi tahrirda qabul qilinganda, soʻnggi qabul qilingan normativ-huquqiy hujjatdagi normaga muvofiq, normativ-huquqiy hujjatning nazorat nusxasiga ushbu hujjat nomining yoki tegishli tuzilmaviy birliklarining chap tomoniga “x” belgisi qoʻyiladi, matn egri chiziq bilan oʻchiriladi hamda shu normaning mazmunini yorituvchi yozuv, soʻnggi hujjatning turi, qabul qilingan sanasi, raqami va eʼlon qilingan manbasi aks ettiriladi (2-ilova).

11. Ilgari qabul qilingan normativ-huquqiy hujjat tuzilmaviy birliklarining alohida jumlalari, soʻzlari, raqamlari almashtirilganda yoki chiqarib tashlanganda, soʻnggi qabul qilingan normativ-huquqiy hujjatdagi normaga muvofiq, normativ-huquqiy hujjat nazorat nusxasidagi tegishli jumlalar, soʻzlar va raqamlar “” (almashtirilganda) yoki “” (chiqarib tashlanganda) shaklidagi gorizontal toʻgʻri chiziq bilan oʻchiriladi hamda shu normaning mazmunini yorituvchi yozuv, soʻnggi hujjatning turi, qabul qilingan sanasi, raqami va eʼlon qilingan manbasi aks ettiriladi (3-ilova).

12. Ilgari qabul qilingan normativ-huquqiy hujjatga qoʻshimchalar kiritilganda, soʻnggi qabul qilingan normativ-huquqiy hujjatdagi normaga muvofiq, normativ-huquqiy hujjat nazorat nusxasining tegishli tuzilmaviy birliklariga “” belgisi qoʻyiladi, shu normaning mazmunini yorituvchi yozuv hamda soʻnggi hujjatning turi, qabul qilingan sanasi, raqami va eʼlon qilingan manbasi aks ettiriladi (4-ilova).

13. Normativ-huquqiy hujjat toʻliq yoki uning tuzilmaviy birliklarining amal qilish muddati uzaytirilganda, yoxud amal qilishi toʻxtatib turilganda, soʻnggi qabul qilingan normativ-huquqiy hujjatdagi normaga muvofiq, normativ-huquqiy hujjat nazorat nusxasi tegishli tuzilmaviy birliklarining chap tomoniga “x” belgisi qoʻyiladi, shu normaning mazmunini yorituvchi yozuv, soʻnggi hujjatning turi, qabul qilingan sanasi, raqami, eʼlon qilingan manbasi hamda hujjatning amal qilishi uzaytirilganligi yoki toʻxtatib turilganligi muddati aks ettiriladi (5-ilova).

14. Nazorat nusxalardagi yozuvlar faqat havo rangdagi sharikli ruchka bilan tushunarli yozuvda kiritilishi kerak. Agar yozuv butun hujjatga taalluqli boʻlsa, belgi normativ-huquqiy hujjat nomining chap tomoniga qoʻyiladi. Agarda yozuv normativ-huquqiy hujjatning tuzilmaviy birliklariga taalluqli boʻlsa u holda belgi tegishli tuzilmaviy birliklarning chap tomoniga qoʻyiladi.

15. Davlat boshqaruvi organlarida va mahalliy davlat hokimiyati organlarida normativ-huquqiy hujjatlarning nazorat nusxalari ular qabul qilingan tillarda yuritilishi shart.

Normativ-huquqiy hujjatlarning nazorat nusxalariga oʻzgartish va qoʻshimchalar aks ettirilgan matn yopishtiriladi (normativ-huquqiy hujjat yoki uning tuzilmaviy birliklari oʻz kuchini yoʻqotgan deb hisoblangan yoxud alohida raqamlar, soʻzlar, jumlalar, grafalar, bloklar va pozitsiyalar chiqarib tashlangan, shuningdek normativ-huquqiy hujjat yangi tahrirda qabul qilingan hollar bundan mustasno).

16. Rasmiy nashrlar qatʼiy hisobga olinishi, saqlanishi va har 5 yilda kamida bir marta xatlovdan (inventarizatsiyadan) oʻtkazilishi zarur.

Rasmiy nashrlar yil boʻyicha xronologik tartibda yigʻiladi va muqovalanadi.

Rasmiy nashrlar har bir nusxasining birinchi va oʻn yettinchi sahifalariga tamgʻa (shtamp) va inventar raqami qoʻyiladi.

17. Rasmiy nashrlar ushbu Qoidalarning 6-bandida koʻrsatilgan xodimlar tomonidan saqlanadi. Bu xodimlar moddiy javobgar shaxs hisoblanadi va ular bilan toʻliq moddiy javobgarlik toʻgʻrisida shartnoma tuziladi.

Yuqorida koʻrsatilgan xodimlar oʻzgarganda qonun hujjatlari topshirish-qabul qilish dalolatnomasi asosida topshiriladi.

18. Ushbu Qoidalarning bajarilishi ustidan nazorat Oʻzbekiston Respublikasi Prezidentining 2018-yil 13-apreldagi PQ-3666-sonli qaroriga muvofiq Oʻzbekiston Respublikasi Adliya vazirligi hamda uning hududiy boshqarmalari tomonidan amalga oshiriladi.

19. Oʻzbekiston Respublikasi Vazirlar Mahkamasining 2009-yil 31-dekabrdagi 340-son “Oʻzbekiston Respublikasi Qonun hujjatlari maʼlumotlari milliy bazasidan keng foydalanishni taʼminlash chora-tadbirlari toʻgʻrisida”gi qarorining 5-bandiga muvofiq, Oʻzbekiston Respublikasi Adliya vazirligi davlat boshqaruvi organlari va mahalliy davlat hokimiyati organlari tomonidan Qonun hujjatlari maʼlumotlari milliy bazasidan foydalanilishi yuzasidan doimiy ravishda monitoring olib boradi.

20. Mazkur Qoidalar talablarini buzganlikda aybdor boʻlgan shaxslar qonun hujjatlariga muvofiq javobgar boʻladi.