Onalik va bolalikni muhofaza qilish, yosh avlod salomatligini mustahkamlash, uni maʼnaviy, axloqiy va jismoniy jihatdan tarbiyalash, unga vatanparvarlik va oʻz Vatani — Oʻzbekistonga mehr-muhabbat tuygʻusini singdirish ishidagi alohida xizmatlarni ragʻbatlantirish maqsadida, shuningdek bolalar manfaatlari yoʻlida xayriya faoliyatini rivojlantirishda faol ishtirok etganlik uchun:

1. Oʻzbekiston Respublikasining “Sogʻlom avlod uchun” ordenini taʼsis etish maqsadga muvofiq deb hisoblansin (Oʻzbekiston Respublikasining “Sogʻlom avlod uchun” ordeni toʻgʻrisidagi nizom va uning tasviri ilova qilinadi).

2. Oʻzbekiston Respublikasi Konstitutsiyasining 82-moddasiga binoan ushbu Farmon Oʻzbekiston Respublikasining Oliy Kengashiga taqdim etilsin.

1. “Sogʻlom avlod uchun” ordeni bilan kishilar onalik va bolalikni muhofaza qilishdagi, sogʻlom avlodni kamol toptirish uchun eng yaxshi moddiy sharoit va axloqiy muhitni taʼminlashdagi alohida xizmatlari uchun mukofotlanadilar.

2. “Sogʻlom avlod uchun” ordeni ikki darajadan iborat boʻladi:

I darajali “Sogʻlom avlod uchun” ordeni;

II darajali “Sogʻlom avlod uchun” ordeni.

I daraja ordenning oliy darajasidir.

I darajali “Sogʻlom avlod uchun” ordeni bilan kishilar onalik va bolalikni muhofaza qilishda, inson ekologiyasini yaxshilashda, jismonan va axloqan sogʻlom avlodni, vatanparvarlik hamda oʻz Vatani — mustaqil Oʻzbekistonga har tomonlama sodiqlik va undan faxrlanish oliy tuygʻularini tarbiyalashda, onalik va bolalikni taʼminlash uchun munosib moddiy va maʼnaviy zamin yaratishda Oʻzbekiston davlati va xalqi oldidagi juda katta xizmatlari uchun mukofotlanadilar.

II darajali “Sogʻlom avlod uchun” ordeni bilan sogʻlom avlodlarni kamol toptirish ishiga katta hissa qoʻshgan, onalik va bolalik toʻgʻrisida alohida gʻamxoʻrlik qiluvchi kishilar, nogironligi boʻlgan va yetim bolalarning vasiylari, bolalar va onalikka nisbatan muntazam oliy xayr-ehson koʻrsatuvchi jamoat tashkilotlari, xoʻjalik tuzilmalarining vakillari mukofotlanadilar.

I darajali “Sogʻlom avlod uchun” ordeni bilan mukofotlanganlar quyidagi huquqlarga ega boʻladilar:

— yiliga bir marta (har ikki tomonga) Oʻzbekiston Respublikasi hududi doirasida temir yoʻl, havo yoki shaharlararo avtomobil transportida shaxsan bepul yurish;

— shahar yoʻlovchilar transporti, qishloq joylarda avtomobil transportining barcha turlaridan (taksidan tashqari) shaxsan bepul foydalanish;

— imtiyozli tibbiy xizmatdan foydalanish va dori-darmonlarni tekin olish;

— kvartira va kommunal xizmatlar uchun haq toʻlashdan ozod boʻlish.

I darajali “Sogʻlom avlod uchun” ordeni bilan mukofotlanganlar bir vaqtning oʻzida bazaviy hisoblash miqdorining 50 baravar miqdorida pul mukofoti oladilar.

II darajali “Sogʻlom avlod uchun” ordeni bilan mukofotlanganlar:

— shahar yoʻlovchilar transporti, qishloq joylarda avtomobil transportining barcha turlaridan (taksidan tashqari) shaxsan bepul foydalanish;

— imtiyozli tibbiy xizmatdan foydalanish va dori-darmonlar narxining 50 foizini toʻlash;

— kvartira va kommunal xizmatlar haqini 50 foiz miqdori toʻlash huquqiga ega boʻladilar.

II darajali “Sogʻlom avlod uchun” ordeni bilan mukofotlanganlarga bir vaqtning oʻzida bazaviy hisoblash miqdorining 25 baravar miqdorida pul mukofoti topshiriladi.

I va II darajada “Sogʻlom avlod uchun” ordeni bilan mukofotlash toʻgʻrisida vazirliklar va idoralar, fan va madaniyat muassasalari, Qoraqalpogʻiston Respublikasi Oliy Kengashi hamda viloyatlar va Toshkent shahri hokimliklarining taqdimiga koʻra Oʻzbekiston Respublikasi Prezidentining Farmoni chiqadi.

“Sogʻlom avlod uchun” ordeni bilan boshqa davlatlarning fuqarolari ham mukofotlanishlari mumkin.

I va II darajali “Sogʻlom avlod uchun” ordeni koʻkrakning chap tomonida taqiladi.

Har bir mukofotlangan kishiga tegishli darajali “Sogʻlom avlod uchun” ordenini topshirish bilan bir vaqtda mukofotlanganlik toʻgʻrisidagi hujjatlar beriladi.

“Sogʻlom avlod uchun” ordenining darajalaridan qatʼi nazar bu orden bilan takroran mukofotlanilmaydi.

1. I darajali “Sogʻlom avlod uchun” ordeni oltin suvi yugurtirilgan metalldan tayyorlanib, 34 mm. diametrdagi toʻgʻri doira shakliga ega. Ordenning oʻng qismida quyoshning iliq nurlari aksida ona va bolaning qavariqli tasviri tushirilgan. Ordening orqa tomonida Oʻzbekiston Respublikasi gerbining qavariqli tasviri va doira boʻylab “SOGʻLOM AVLOD UCHUN” soʻzlari yozilgan. Doiraning yuqori qismida 12 ta yulduz tasvirlangan. Orden orqa tomonining chetlari boʻrtma hoshiyalangan.

Orden ilmoq va halqa yordamida yonlari kumush suvi yugurtirilgan dasta bilan biriktiriladi. Dastaning ichki qismi yashil rangli tovlanadigan lenta bilan oʻralgan. Lentaning oʻrtasida oltinrang oʻrik daraxtining gullab turgan shoxi oʻyib ishlangan.

2. II darajali “Sogʻlom avlod uchun” ordeni kumush suvi yugurtirilgan metalldan tayyorlanadi. Orden ilmoq va halqa yordamida yonlari oʻyma oltinrang dasta bilan biriktiriladi. Dastaning ichki qismi kumush rangli tovlanadigan lenta bilan oʻralgan. Lentaning oʻrtasida kumushrang oʻrik daraxtining gullab turgan shoxi oʻyib ishlangan.