2001—2010-yillarda Oʻzbekiston Respublikasi energetikasidagi generatsiyalovchi quvvatlarni rivojlantirish va rekonstruksiya qilish dasturiga muvofiq koʻmir tarmogʻini texnika bilan qayta jihozlashning koʻmir qazib chiqarishni koʻpaytirishga yoʻnaltirilgan birinchi bosqichini amalga oshirish maqsadida Vazirlar Mahkamasi qaror qiladi:

1. “Koʻmir” aksiyadorlik birlashmasining texnologiyalarni ishlab chiqish, asbob-uskunalarni tayyorlash va yetkazib berish, shefmontaj hamda 2003-yilga borib koʻmir qazib chiqarishni 3,2 mln tonnagacha koʻpaytirishni kafolatlovchi (42 mln Germaniya markasi miqdoridagi) loyihaning birinchi bosqichi amalga oshirilishini nazorat qilish yuzasidan Germaniyaning “Krupp Ferdertexnik GMBX” firmasi bilan kontrakt tuzish toʻgʻrisidagi taklifiga rozilik berilsin.

2. Belgilab qoʻyilsinki, koʻmir tarmogʻini texnika bilan qayta jihozlashning birinchi bosqichi boʻyicha loyihani mablagʻ bilan taʼminlash:

kontrakt qiymatining 35,7 mln Germaniya markasi miqdoridagi 85 foizi — Oʻzbekiston Respublikasi Tashqi iqtisodiy faoliyat milliy banki tomonidan “Koʻmir” aksiyadorlik birlashmasiga qayta moliyalashtiriladigan xorijiy bankning “Germes” (Germaniya) jamiyati sugʻurta qoplamasi ostidagi krediti hisobiga;

kontrakt qiymatining 6,3 mln Germaniya markasi miqdoridagi 15 foizi — Oʻzbekiston Respublikasi Tashqi iqtisodiy faoliyat milliy banki tomonidan “Koʻmir” aksiyadorlik birlashmasiga qayta moliyalashtiriladigan xorijiy bank krediti hisobiga;

konlardagi kapital ishlarni amalga oshirishga qilinadigan 1991-yilgi narxlardagi 3,94 mln soʻm miqdoridagi xarajatlar — “Koʻmir” aksiyadorlik birlashmasining oʻz mablagʻlari va yetishmagan qismi, 2002-yildan boshlab, “Oʻzsanoatqurilishbank” krediti hisobiga;

xorijiy bank kreditlarini toʻlash — “Koʻmir” aksiyadorlik birlashmasining oʻz mablagʻlari hisobiga ilovaga* muvofiq amalga oshiriladi.

3. 2000-yil 9-oktabrda Oʻzbekiston Respublikasi Davlat mulki qoʻmitasi, “Koʻmir” aksiyadorlik birlashmasi va Germaniyaning “Krupp Ferdertexnik GMBX” firmasi oʻrtasida mazkur firma tomonidan “Kon texnikasi asbob-uskunalarini taʼmirlash zavodi” ochiq turdagi aksiyadorlik jamiyatining 1509800 AQSH dollariga teng miqdordagi aksiyalari paketi sotib olinishi yuzasidan shartnoma tuzilganligi maʼlumot uchun qabul qilinsin.

6. Quyidagilar:

“Koʻmir” aksiyadorlik birlashmasi — ushbu kontrakt doirasida import qilinadigan asbob-uskunalar, texnik hujjatlar, ehtiyot qismlar va materiallar uchun bojxona toʻlovlaridan (bojxona rasmiylashtirishi uchun yigʻimlardan tashqari);

xorijiy banklar — loyihani amalga oshirish uchun jalb etiladigan kreditorlar va eksport-kredit agentliklari — Oʻzbekiston Respublikasi hududida norezidentlardan undiriladigan daromad soliqlari toʻlashdan ozod qilinsin.

7. Oʻzbekiston Respublikasi Moliya vaziri xorijiy bankka va Oʻzbekiston Respublikasining mablagʻ bilan taʼminlovchi banklariga ushbu loyiha uchun jalb etiladigan kreditlar boʻyicha Oʻzbekiston Respublikasi Hukumati nomidan belgilangan tartibda kafolatnomalar berishga vakil qilinsin.

8. Oʻzbekiston Respublikasi Adliya vazirligi xorijiy banklarga beriladigan Oʻzbekiston Respublikasi Hukumati kafolatnomalari yuzasidan kredit bitimlariga ilovalarda belgilangan shakl boʻyicha, belgilangan tartibda yuridik xulosalar bersin.

9. Oʻzbekiston Respublikasi Tashqi ishlar vazirligi, Ichki ishlar vazirligi “Koʻmir” aksiyadorlik birlashmasi buyurtmanomalariga binoan, ushbu loyihani amalga oshirish uchun keladigan xorijiy mutaxassislarga, davlat boji undirmasdan, koʻp martalik kelish vizalari rasmiylashtirilishini, ularning vaqtinchalik roʻyxatdan oʻtkazilishini va vaqtinchalik roʻyxatdan oʻtkazish muddati uzaytirilishini taʼminlasinlar.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari V.Yu. Atayev zimmasiga yuklansin.