“Faoliyatning ayrim turlarini litsenziyalash to‘g‘risida”gi O‘zbekiston Respublikasi Qonuniga muvofiq, portlovchi va zaharli moddalarni, ularni qo‘llagan holda materiallar va mahsulotlarni, shuningdek portlatish vositalarini yaratish, ishlab chiqarish, tashish, saqlash, realizatsiya qilish sohasida xavfsizlikni ta’minlash maqsadida Vazirlar Mahkamasi qaror qiladi:

1. Quyidagilar:

Portlovchi va zaharli moddalarni, ularni qo‘llagan holda materiallar va mahsulotlarni, shuningdek portlatish vositalarini yaratish, ishlab chiqarish, tashish, saqlash va realizatsiya qilish bo‘yicha faoliyatni litsenziyalash to‘g‘risidagi nizom 1-ilovaga muvofiq;

Portlovchi va zaharli moddalarni, ularni qo‘llagan holda materiallar va mahsulotlarni, shuningdek portlatish vositalarini yaratish, ishlab chiqarish, tashish, saqlash va realizatsiya qilish bo‘yicha faoliyatni litsenziyalash komissiyasi (keyingi o‘rinlarda matnda komissiya deb yuritiladi) tarkibi 2-ilovaga muvofiq;

Yaratish, ishlab chiqarish, tashish, saqlash va realizatsiya qilish bo‘yicha faoliyat litsenziyalanishi kerak bo‘lgan portlovchi va zaharli moddalar, ularni qo‘llagan holda materiallar va mahsulotlar, shuningdek portlatish vositalari ro‘yxati 3-ilovaga muvofiq tasdiqlansin.

2. Quyidagilar komissiyaning asosiy vazifalari etib belgilansin:

portlovchi va zaharli moddalarni, ularni qo‘llagan holda materiallar va mahsulotlarni, shuningdek portlatish vositalarini yaratish, ishlab chiqarish, tashish, saqlash va realizatsiya qilish hamda sarflashda nazorat qilish, hisobga olish va xavfsizlikni ta’minlashning ulardan ruxsatsiz va belgilangan maqsaddan boshqa maqsadda foydalanishni istisno qiluvchi ishonchli, samarali tizimini yaratish;

portlovchi va zaharli moddalarni, ularni qo‘llagan holda materiallar va mahsulotlarni, shuningdek portlatish vositalarini yaratish, ishlab chiqarish, tashish, saqlash va realizatsiya qilishni amalga oshiruvchi yuridik shaxslar faoliyatini litsenziyalash va keyinchalik uning monitoringini olib borish bo‘yicha ishlarni tashkil etish.

3. Komissiyaning ishchi organi funksiyasi “Sanoatgeokontexnazorat” davlat inspeksiyasiga (keyingi o‘rinlarda matnda ishchi organ deb yuritiladi) yuklansin.

Belgilab qo‘yilsinki, ishchi organ o‘z vakolatlari doirasida:

litsenziyalar berish yoki litsenziyalar berishni rad etish, litsenziyalarning amal qilishini to‘xtatish yoxud litsenziyalarni bekor qilish to‘g‘risidagi takliflarni tayyorlaydi va ko‘rib chiqish uchun komissiyaga kiritadi; tegishli xulosalar tayyorlash uchun ekspertlarni jalb etadi;

portlovchi va zaharli moddalarni, ularni qo‘llagan holda materiallar va mahsulotlarni, shuningdek portlatish vositalarini yaratish, ishlab chiqarish, tashish, saqlash va realizatsiya qilish sohasida berilgan litsenziyalarning alohida reyestrlarini yuritadi; litsenziyalanayotgan faoliyatning ayrim turlari bo‘yicha ishlayotgan yuridik shaxslar bo‘yicha ma’lumotlar bankini yaratadi va saqlaydi;

litsenziat tomonidan litsenziya talablari va shartlariga rioya etilishini (ularning buzilishidan dalolat beruvchi holatlar mavjud bo‘lgan taqdirda) belgilangan tartibda rejali va rejadan tashqari tekshiradi, tekshirish davomida paydo bo‘ladigan masalalar bo‘yicha zarur axborotlarni litsenziatdan so‘rab oladi;

litsenziya talablari va shartlarining mavjud buzilishlarini bartaraf etish bo‘yicha litsenziatga yozma ko‘rsatmalar jo‘natadi, ular bajarilmagan taqdirda esa komissiyaga ko‘rib chiqish uchun litsenziyaning amal qilishini to‘xtatish, litsenziyani bekor qilish to‘g‘risida takliflar kiritadi;

Komissiyaning samarali faoliyatini tashkil etish, portlovchi va zaharli moddalarni, ularni qo‘llagan holda materiallar va mahsulotlarni, shuningdek portlatish vositalarini yaratish, ishlab chiqarish, tashish, saqlash va realizatsiya qilish sohasida xavfsizlikni ta’minlash uchun zarur bo‘lgan qonun hujjatlarida belgilangan boshqa funksiyalarni bajaradi.

4. “Sanoatkontexnazorat” davlat inspeksiyasi Ichki ishlar vazirligi (Z.A. Almatov), Favqulodda vaziyatlar vazirligi (B.J. Subanov), Davlat tabiatni muhofaza qilish qo‘mitasi (B.B. Alixonov), “O‘zbekiston temir yo‘llari” davlat-aksiyadorlik kompaniyasi (A.J. Ramatov), “O‘zbekiston havo yo‘llari” milliy aviakompaniyasi (V.N. Tyan), “O‘zavtoyo‘l” davlat kompaniyasi (R.R. Yunusov) bilan birgalikda zamonaviy talablar va standartlarni hisobga olgan holda Portlovchi moddalarni, ularni qo‘llagan holda materiallar va mahsulotlarni, shuningdek portlatish vositalarini saqlash, ulardan foydalanish va ularni hisobga olish tartibi to‘g‘risidagi yo‘riqnomani, Portlovchi moddalarni, ularni qo‘llagan holda materiallar va mahsulotlarni, shuningdek portlatish vositalarini tashish qoidalarini ikki oy muddatda ishlab chiqsin va tasdiqlasin.

5. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari O‘.T. Sultonov zimmasiga yuklansin.

1. Ushbu Nizom portlovchi va zaharli moddalarni, ularni qo‘llagan holda materiallar va mahsulotlarni, shuningdek portlatish vositalarini yaratish, ishlab chiqarish, tashish, saqlash va realizatsiya qilish bo‘yicha faoliyatni litsenziyalash tartibini belgilaydi.

2. Ushbu Nizomning amal qilishi qurol-yarog‘lar va o‘q-dorilarni yaratish, ishlab chiqarish, shuningdek zaharli moddalardan tibbiyot maqsadlarida foydalanish bo‘yicha faoliyatga tatbiq etilmaydi.

3. Litsenziyalarni berish, litsenziyaning amal qilishini to‘xtatib turish yoki tugatish, shuningdek uni bekor qilish va qayta rasmiylashtirish to‘g‘risidagi qarorlar tarkibi Vazirlar Mahkamasi qarori bilan tasdiqlanadigan Portlovchi va zaharli moddalarni, ularni qo‘llagan holda materiallar va mahsulotlarni, shuningdek portlatish vositalarini yaratish, ishlab chiqarish, tashish, saqlash va realizatsiya qilish bo‘yicha faoliyatni litsenziyalash Komissiyasi (keyingi o‘rinlarda Komissiya deb ataladi) tomonidan qabul qilinadi.

4. “Sanoatgeokontexnazorat” davlat inspeksiyasi (keyingi o‘rinlarda matnda ishchi organ deb yuritiladi) komissiyaning ishchi organi funksiyasini bajaradi.

5. Ishchi organ litsenziyalar berish yoki litsenziyalar berishni rad etish, litsenziyalarning amal qilishini to‘xtatish yoxud litsenziyalarni bekor qilish to‘g‘risidagi takliflarni tayyorlaydi va ko‘rib chiqish uchun komissiyaga kiritadi.

Portlovchi va zaharli moddalarni, ularni qo‘llagan holda materiallar va mahsulotlarni, shuningdek portlatish vositalarini yaratish, ishlab chiqarish, tashish, saqlash va realizatsiya qilish huquqiga litsenziyalar berish to‘g‘risidagi arizalarni ko‘rib chiqish uchun ishchi organ tegishli xulosalar tayyorlash uchun ekspertlarni jalb qilishga haqlidir.

6. Portlovchi va zaharli moddalarni, ularni qo‘llagan holda materiallar va mahsulotlarni, shuningdek portlatish vositalarini yaratish, ishlab chiqarish, tashish, saqlash va realizatsiya qilish bo‘yicha faoliyatni amalga oshirish huquqiga litsenziya 5 yil muddatga va faqat yuridik shaxslarga beriladi.

7. Quyidagilar portlovchi va zaharli moddalarni, ularni qo‘llagan holda materiallar va mahsulotlarni, shuningdek portlatish vositalarini yaratish, ishlab chiqarish, tashish, saqlash va realizatsiya qilish bo‘yicha faoliyatni amalga oshirishdagi litsenziya talablari va shartlari hisoblanadi:

litsenziat tomonidan portlovchi va zaharli moddalarni, ularni qo‘llagan holda materiallar va mahsulotlarni ishlab chiqarish, tashish, saqlash va realizatsiya qilish sohasidagi qonun hujjatlariga, davlat standartlariga, texnika xavfsizligi, mehnatni muhofaza qilish qoidalariga, tabiatni muhofaza qilish hamda sanitariya norma va talablariga majburiy rioya qilish;

portlovchi va zaharli moddalar, ularni qo‘llagan holda materiallar va mahsulotlar, shuningdek portlatish vositalari yaratiladigan, ishlab chiqariladigan obyektlarning ishonchli qo‘riqlanishini, ularni tashishning kuzatib borilishini ta’minlash hamda portlovchi va zaharli moddalardan ruxsatsiz foydalanilishiga yo‘l qo‘ymaslikka qaratilgan rejim va boshqa chora-tadbirlarni ko‘rish;

portlovchi va zaharli moddalarning, ularni qo‘llagan holda materiallar va mahsulotlarning, shuningdek portlatish vositalarining faoliyatning litsenziyalanayotgan turiga tegishli qismi miqdori va sarflanishini hisobga olib borish;

litsenziya talabgori tomonidan portlovchi va zaharli moddalarni, ularni qo‘llagan holda materiallar va mahsulotlarni, shuningdek portlatish vositalarini yaratish, ishlab chiqarish, tashish, saqlash va realizatsiya qilishning amalga oshirilishini tartibga soluvchi zarur normativ-texnik hujjatlarning mavjudligi;

litsenziya talabgorida unga mulk huquqi bilan yoki boshqacha qonuniy asosda tegishli bo‘lgan, faoliyatning litsenziyalanayotgan turini amaldagi norma va qoidalar talablariga muvofiq to‘liq hajmda bajarish uchun zarur moddiy-texnik bazaning (binolar, xonalar, hududlar, apparatlar, asbob-uskunalar, transport, nazorat va o‘lchash, hisoblash va tashkiliy texnika vositalarining) mavjudligi;

shtatda tegishli malakaga ega bo‘lgan, norma va qoidalar talablariga muvofiq portlovchi va zaharli moddalar bilan ishlashga ruxsat etilgan texnik xodimning, shu jumladan litsenziyada ko‘rsatilgan faoliyat turi bo‘yicha tegishli ma’lumotga va kamida bir yil ish stajiga ega bo‘lgan rahbarlar hamda muhandis-texnik xodimlarning mavjudligi;

surunkali ruhiy kasalliklar, giyohvandlik, toksikomaniya, alkogolizm yuzasidan hisobda turuvchi, shuningdek portlovchi va zaharli moddalarni qo‘llanish bilan bog‘liq qasddan jinoyat sodir etganligi uchun muddati o‘talmagan yoki olib tashlanmagan sudlanganligi bo‘lgan xodimlarning yo‘qligi;

faoliyatning litsenziyalanayotgan turi bilan bog‘liq ishlarni bevosita bajaruvchi xodimlarning muntazam ravishda tibbiy ko‘rikdan o‘tkazilishi;

zaharli moddalarning yonishini va oqib chiqib ketishini bartaraf etish uchun zarur bo‘lgan vositalarning mavjudligi va ishga tayyor holatda saqlanishi.

8. Litsenziya bitimida mazkur Nizomning 7-bandida sanab o‘tilganlardan kelib chiquvchi aniq litsenziya talablari va shartlari nazarda tutilishi mumkin.

9. Litsenziya olish uchun litsenziya talabgori quyidagi hujjatlarni taqdim etadi:

litsenziya berish to‘g‘risida ariza, unda quyidagilar ko‘rsatiladi: yuridik shaxsning nomi va tashkiliy-huquqiy shakli, uning joylashgan joyi (pochta manzili), bank muassasasining nomi va bank muassasasidagi hisob raqami, litsenziyalanayotgan faoliyatning (uning bir qismining) yuridik shaxs tomonidan amalga oshirilishi mo‘ljallanayotgan turi ;

yuridik shaxsning davlat ro‘yxatidan o‘tkazilganligi to‘g‘risidagi guvohnomaning nusxasi;

faoliyatning litsenziyalanayotgan turlariga ruxsat etilgan tegishli malakali texnik xodimlarning ichki ishlar hududiy organlari bilan belgilangan tartibda kelishilgan ro‘yxati;

surunkali ruhiy kasalliklar, giyohvandlik, toksikomaniya, alkogolizm yuzasidan hisobda turuvchi, shuningdek portlovchi va zaharli moddalarni qo‘llanish bilan bog‘liq qasddan jinoyat sodir etganligi uchun muddati o‘talmagan yoki olib tashlanmagan sudlanganligi bo‘lgan xodimlarning yo‘qligi to‘g‘risidagi, tegishli tibbiyot muassasalarining ma’lumotnomalari ilova qilingan ma’lumotlar;

litsenziya talabgorida portlovchi va zaharli moddalarni amaldagi norma va qoidalar talablariga muvofiq saqlash uchun joylarning (portlovchi materiallar omborining tayyorligi to‘g‘risidagi dalolatnoma, omborning ijaraga olinganlik shartnomasi va boshqalar), ularni tashish uchun texnik vositalarning, portlovchi moddalarni tayyorlash uchun asbob-uskunalarning mavjudligini tasdiqlovchi texnik hujjatlar;

xodimning litsenziyalanayotgan faoliyat bilan bog‘liq halokatli vaziyatlarni bartaraf etish bo‘yicha harakatlar rejasi;

litsenziya talabgori tomonidan uning arizasi ishchi organ tomonidan ko‘rib chiqilganligi uchun yig‘im to‘langanligini tasdiqlovchi hujjat.

10. Litsenziya talabgoridan ushbu Nizomda nazarda tutilmagan hujjatlarni taqdim etishni talab qilishga yo‘l qo‘yilmaydi.

11. Hujjatlar ishchi organga litsenziya talabgori tomonidan bevosita yoxud ularning olinganligi to‘g‘risidagi bildirishnoma bilan pochta aloqa vositasi orqali yetkazib beriladi.

Hujjatlar ishchi organ mas’ul shaxsi tomonidan ro‘yxat bo‘yicha qabul qilinadi, ro‘yxatning nusxasi hujjatlar qabul qilib olingan sana to‘g‘risida belgi qo‘yilgan holda ariza beruvchiga yuboriladi (topshiriladi).

12. Ishonchli bo‘lmagan yoki buzilgan ma’lumotlar taqdim etilganligi uchun litsenziya talabgori qonun hujjatlariga muvofiq javob beradi.

13. Litsenziya talabgorining arizasi ko‘rib chiqilganligi uchun O‘zbekiston Respublikasi qonun hujjatlarida belgilangan eng kam oylik ish haqining to‘rt baravari miqdorida yig‘im undiriladi. Litsenziya talabgorining litsenziya berish to‘g‘risidagi arizasi ko‘rib chiqilganligi uchun yig‘im summasi ishchi organning hisob raqamiga o‘tkaziladi. Litsenziya talabgori berilgan arizadan voz kechgan taqdirda to‘langan yig‘im qaytarilmaydi.

14. Portlovchi va zaharli moddalarni, ularni qo‘llagan holda materiallar va mahsulotlarni, shuningdek portlatish vositalarini yaratish, ishlab chiqarish, tashish, saqlash va realizatsiya qilish bo‘yicha faoliyatni litsenziyalash ushbu Nizomga ilova qilinayotgan sxemaga muvofiq amalga oshiriladi.

Litsenziya talabgoriga litsenziya berish yoki litsenziya berishni rad etish to‘g‘risidagi qaror litsenziya talabgorining arizasi ishchi organ tomonidan olingan kundan boshlab o‘ttiz kundan ortiq bo‘lmagan muddatda qabul qilinadi.

Ishchi organ ariza olingan kundan boshlab yigirma kundan ortiq bo‘lmagan muddatda hujjatlarni ko‘rib chiqadi, litsenziya berish yoki litsenziya berishni rad etish to‘g‘risidagi takliflarni tayyorlaydi va ko‘rib chiqish uchun komissiyaga kiritadi.

Ishchi organ litsenziya talabgorining litsenziya talablari va shartlariga muvofiqligini aniqlash uchun yuqorida ko‘rsatib o‘tilgan muddat doirasida:

litsenziya talabgorida litsenziyalanayotgan faoliyat turini amalga oshirish uchun mavjud shart-sharoitlarni joyiga borib baholash;

tegishli xulosalar tayyorlash uchun shartnoma asosida ekspertlarni jalb etish huquqiga ega.

Komissiya ishchi organning taklifi olingandan keyin o‘n kundan ortiq bo‘lmagan muddatda uni ko‘rib chiqadi va qabul qilingan qaror protokolini tasdiqlaydi. Komissiya tomonidan qabul qilingan qaror protokoli komissiya raisi (uning o‘rinbosari) tomonidan imzolanadi.

15. Ishchi organ litsenziya talabgorini qabul qilingan qaror to‘g‘risida tegishli qaror qabul qilingandan keyin uch kun mobaynida xabardor qiladi.

Litsenziya berishga qaror qilinganligi to‘g‘risidagi bildirishnoma litsenziya talabgoriga bank hisob raqami rekvizitlari, davlat boji to‘lash muddati ko‘rsatilgan holda yozma shaklda yuboriladi (topshiriladi).

16. Litsenziya bitimi ishchi organ va litsenziat o‘rtasida tuziladi va unda quyidagilar bo‘lishi kerak:

bitimni imzolagan shaxslarning familiyasi, ismi, otasining ismi, lavozimi;

tomonlarning rekvizitlari;

amalga oshirilishiga litsenziya berilayotgan faoliyat turining nomi;

litsenziyaning amal qilish muddati;

litsenziatga qo‘yiladigan litsenziya talablari va shartlari;

litsenziya bitimi talablari va shartlari buzilganligi uchun tomonlarning javobgarligi;

litsenziat tomonidan litsenziya bitimi talablari va shartlari bajarilishini ishchi organ tomonidan nazorat qilish tartibi.

Litsenziya bitimi ikki nusxada — litsenziat va ishchi organ uchun bir nusxadan tuziladi.

17. Litsenziya blankalari qat’iy hisobda turadigan hujjatlar hisoblanadi, hisobga olish seriyasiga, tartib raqamiga va himoyalanganlik darajasiga ega bo‘ladi. Litsenziya blankalari namunalari ishchi organ tomonidan ishlab chiqiladi, komissiya tomonidan tasdiqlanadi va ishchi organ buyurtmasi bo‘yicha “Davlat belgisi” davlat-ishlab chiqarish birlashmasida bosmaxona usulida tayyorlanadi. Ishchi organ rahbari litsenziyalar blankalarining hisobga olinishi, saqlanishi va ulardan maqsadli foydalanilishi uchun shaxsan javob beradi.

Litsenziyalar ishchi organ tomonidan rasmiylashtiriladi va komissiya raisi (uning o‘rinbosari) tomonidan imzolanadi.

18. Litsenziya litsenziya talabgori tomonidan davlat boji to‘langanini tasdiqlovchi hujjat taqdim etilgandan va u litsenziya bitimini imzolagandan keyin uch kun muddatda beriladi.

Agar litsenziat litsenziya berish to‘g‘risida qaror qabul qilinganligi haqidagi bildirishnoma yuborilgan (topshirilgan) vaqtdan boshlab uch oy mobaynida ishchi organga litsenziya berilganligi uchun davlat boji to‘langanligini tasdiqlovchi hujjatni taqdim etmasa yoxud litsenziya bitimini imzolamasa, komissiya litsenziya berish to‘g‘risidagi qarorni bekor qilishga haqlidir.

19. Litsenziya berish “Faoliyatning ayrim turlarini litsenziyalash to‘g‘risida”gi O‘zbekiston Respublikasi Qonunining 17-moddasida nazarda tutilgan asoslar bo‘yicha rad etilishi mumkin.

Litsenziya talabgori litsenziya berishni rad etish to‘g‘risidagi qaror, shuningdek ishchi organning mansabdor shaxsi xatti-harakatlari (harakatsizligi) yuzasidan qonun hujjatlarida belgilangan tartibda shikoyat qilish huquqiga egadir.

20. Litsenziya berishni rad etish to‘g‘risida qaror qabul qilingan taqdirda rad etish to‘g‘risidagi bildirishnoma litsenziya talabgoriga rad etishning aniq sabablari va litsenziya talabgori ko‘rsatib o‘tilgan sabablarni bartaraf etib hujjatlarni takroran ko‘rib chiqishga taqdim etishi uchun yetarli bo‘lgan muddat ko‘rsatilgan holda yozma shaklda yuboriladi (topshiriladi). Litsenziya berishni rad etish haqidagi xabarnomada ko‘rsatilgan muddat kamchiliklarni bartaraf etish uchun zarur bo‘lgan vaqtga mutanosib bo‘lishi kerak.

21. Litsenziya berishni rad etish uchun asos bo‘lgan sabablar litsenziya talabgori tomonidan bartaraf etilgan taqdirda, hujjatlarni takroran ko‘rib chiqish litsenziya talabgorining arizasi barcha zarur hujjatlar bilan birgalikda olingan kundan boshlab o‘n kundan ortiq bo‘lmagan muddatda amalga oshiriladi.

Ayni vaqtda ishchi organ hujjatlar qayta taqdim etilgandan keyin besh kun mobaynida litsenziya talabgoriga litsenziya berish yoki litsenziya berishni rad etish to‘g‘risidagi taklifni tegishli qaror protokoli loyihasi bilan tasdiqlash uchun komissiyaga taqdim etadi.

Komissiya ishchi organ taklifi olingandan keyin besh kun muddatda uni ko‘rib chiqadi va qabul qilingan qaror protokolini tasdiqlaydi. Komissiya tomonidan qabul qilingan qaror protokoli komissiya raisi (uning o‘rinbosari) tomonidan imzolanadi.

Litsenziya talabgorlarining arizasi takroran ko‘rib chiqilganligi uchun yig‘im undirilmaydi.

Litsenziya talabgorining arizasini qayta ko‘rib chiqishda ilgari litsenziya berishni rad etish to‘g‘risidagi bildirishnomada ko‘rsatilmagan yangi asoslar bo‘yicha litsenziya berishni rad etishga yo‘l qo‘yilmaydi.

Litsenziya berish rad etilganligi to‘g‘risidagi bildirishnomada ko‘rsatilgan muddat o‘tgandan keyin berilgan ariza yangidan berilgan ariza hisoblanadi.

22. Litsenziat qayta tashkil etilgan, uning nomi yoki joylashgan joyi (pochta manzili) o‘zgargan taqdirda, litsenziat yoki uning huquqiy vorisi qayta ro‘yxatdan o‘tkazilgandan keyin bir oy muddatda ishchi organga ko‘rsatib o‘tilgan ma’lumotlarni tasdiqlovchi tegishli hujjatlar ilova qilingan holda litsenziyani qayta rasmiylashtirish to‘g‘risida ariza berishi shart.

23. Litsenziat litsenziya qayta rasmiylashtirilgunga qadar unda ko‘rsatilgan faoliyatni ilgari berilgan litsenziya asosida amalga oshiradi.

24. Litsenziyani qayta rasmiylashtirishda ishchi organ litsenziyalar reyestriga tegishli o‘zgartirishlar kiritadi. Litsenziyani qayta rasmiylashtirish ishchi organ tomonidan tegishli hujjatlar ilova qilingan holda litsenziyani qayta rasmiylashtirish to‘g‘risida ariza olingan kundan boshlab besh kun mobaynida amalga oshiriladi.

Litsenziyalarni qayta rasmiylashtirishda litsenziya talabgorining litsenziya berish to‘g‘risidagi arizasi ko‘rib chiqilganligi uchun to‘lanadigan summaning yarmi miqdorida yig‘im undiriladi. Yig‘im summasi ishchi organning hisob raqamiga o‘tkaziladi.

25. Litsenziyaning amal qilish muddatini uzaytirish litsenziatning arizasiga ko‘ra amalga oshiriladi.

Litsenziyaning amal qilish muddatini uzaytirish to‘g‘risidagi ariza ishchi organga litsenziyaning amal qilish muddati o‘tgunga qadar ikki oydan kechikmay berilishi kerak.

Litsenziyaning amal qilish muddatini uzaytirish yoki uzaytirishni rad etish to‘g‘risidagi qaror litsenziya berish uchun nazarda tutilgan tartibda qabul qilinadi.

26. Amal qilish muddati o‘tmagan yo‘qolgan yoki yaroqsiz holga kelgan litsenziya o‘rniga litsenziatning arizasiga ko‘ra dublikat berilishi mumkin.

Litsenziya dublikatini berishda litsenziya talabgorining litsenziya berish to‘g‘risidagi arizasi ko‘rib chiqilganligi uchun to‘lanadigan summaning yarmi miqdorida yig‘im undiriladi. Yig‘im summasi ishchi organning hisob raqamiga o‘tkaziladi.

27. Litsenziat tomonidan litsenziya talablari va shartlariga rioya etilishi ustidan nazorat ishchi organ tomonidan qonun hujjatlarida belgilangan tartibda amalga oshiriladi.

28. Litsenziya talablari va shartlariga rioya etilishi ustidan nazoratni amalga oshirishda ishchi organ o‘z vakolatlari doirasida:

litsenziat tomonidan litsenziya talablari va shartlariga rioya etilishini qonun hujjatlarida belgilangan tartibda rejali tekshirish;

litsenziya talablari va shartlari litsenziat tomonidan buzilganligidan dalolat beruvchi hollar mavjud bo‘lgan taqdirda litsenziatning ularga rioya etishini qonunda belgilangan tartibda rejadan tashqari tekshirish;

litsenziya talablari va shartlariga rioya etilishini tekshirish chog‘ida paydo bo‘ladigan masalalar yuzasidan litsenziatdan zarur axborotni so‘rash va olish;

tekshirishlar natijalari asosida, litsenziat tomonidan litsenziya talablari va shartlarining aniq buzilishlarini ko‘rsatgan holda dalolatnomalar (ma’lumotnomalar) tuzish;

aniqlangan buzilishlarni bartaraf etish yuzasidan litsenziatga taklif yuborish, bunday buzilishlarni bartaraf etishning taklif etiladigan muddatlarini belgilash;

litsenziyaning amal qilishini to‘xtatish yoki uni bekor qilish to‘g‘risida komissiyaga ko‘rib chiqish uchun taklif kiritish.

29. Litsenziya talablari va shartlariga rioya etilishini tekshirish chog‘ida ishchi organning tekshiruvchi xodimlari tomonidan ikki nusxada dalolatnoma tuziladi, uning bir nusxasi litsenziatga beriladi, ikkinchi nusxasi ishchi organda qoladi.

30. Litsenziyaning amal qilishini to‘xtatib turish “Faoliyatning ayrim turlarini litsenziyalash to‘g‘risida”gi O‘zbekiston Respublikasi Qonunining 22-moddasida nazarda tutilgan hollarda va tartibda ishchi organ tomonidan amalga oshiriladi.

Ishchi organning litsenziyaning amal qilishini to‘xtatib turish to‘g‘risidagi qarori yuzasidan sudga shikoyat qilinishi mumkin. Litsenziyaning amal qilishini to‘xtatib turish asossiz ekanligi sud tomonidan e’tirof etilgan taqdirda, ishchi organ litsenziat oldida litsenziat ko‘rgan zarar miqdorida javob beradi.

31. Litsenziyaning amal qilishini to‘xtatish “Faoliyatning ayrim turlarini litsenziyalash to‘g‘risida”gi O‘zbekiston Respublikasi Qonunining 23-moddasida nazarda tutilgan hollarda va tartibda komissiya qaroriga ko‘ra amalga oshiriladi.

Komissiyaning litsenziyaning amal qilishini to‘xtatish to‘g‘risidagi qarori yuzasidan sudga shikoyat qilinishi mumkin. Litsenziyaning amal qilishini to‘xtatish asossiz ekanligi sud tomonidan e’tirof etilgan taqdirda, komissiya litsenziat oldida litsenziat ko‘rgan zarar miqdorida javob beradi.

32. Litsenziyani bekor qilish “Faoliyatning ayrim turlarini litsenziyalash to‘g‘risida”gi O‘zbekiston Respublikasi Qonunining 24-moddasida nazarda tutilgan hollarda va tartibda komissiya qaroriga ko‘ra amalga oshiriladi.

Komissiyaning litsenziyani bekor qilish to‘g‘risidagi qarori yuzasidan sudga shikoyat qilinishi mumkin. Litsenziyani bekor qilishning asossiz ekanligi sud tomonidan e’tirof etilgan taqdirda, komissiya litsenziat oldida litsenziat ko‘rgan zarar miqdorida javob beradi.

33. Ishchi organ litsenziyalar reyestrini yuritadi.

Reyestrda quyidagilar ko‘rsatilishi kerak:

yuridik shaxsning nomi, uning tashkiliy-huquqiy shakli, pochta manzili, telefoni;

litsenziyaning berilgan sanasi va tartib raqami;

litsenziyaning amal qilish muddati;

litsenziyani qayta rasmiylashtirish, uning amal qilish muddatini uzaytirish, to‘xtatib turish va tiklashning asoslari va sanasi;

litsenziyaning amal qilishini to‘xtatish asoslari va sanasi;

litsenziyani bekor qilish asoslari va sanasi;

dublikat berish asoslari va sanasi.

34. Litsenziyalarning reyestrlarida mavjud bo‘lgan ma’lumotlar litsenziyalovchi organning veb-saytiga joylashtiriladi va tanishib chiqish uchun ochiq bo‘ladi.

36. Litsenziya berganlik va uning amal qilish muddatini uzaytirganlik uchun O‘zbekiston Respublikasi qonun hujjatlarida belgilangan eng kam oylik ish haqining o‘n baravari miqdorida davlat boji undiriladi.

37. Litsenziya berganlik uchun davlat boji respublika budjetiga o‘tkaziladi.

ammiakli selitralar asosida (ammonitlar, ammonallar, akvatollar, grammonitlar, granulitlar, detonitlar, dinamonlar, karbatollar, poremitlar va boshqalar);

nitrobirikmalar va ularning aralashmalari (trotil, dinitronaftalin, nitroglitserin, nitroglekol, TEN — pentaeritittetranitrat, geksogen, oktogen, tetril va boshqalar);

tutunli va tutunsiz poroxlar, zaryadlar va ulardan tayyorlangan mahsulotlar;

issiqqa chidamli portlovchi moddalar, zaryadlar va ulardan tayyorlangan mahsulotlar.

o‘t o‘tkazuvchi pilta, poroxlarni yoqishning maxsus vositasi;

piston — portlatgichlar, pistonsiz portlatishda tezlashtiradigan vositalar, elektrportlatgichlar, shuningdek elektralangalatuvchilar va quduqlarda o‘q otib portlatish ishlari uchun issiqqa chidamli portlovchi patronlar;

tez portlovchi piltalar, tez portlovchi tasmalar, pirotexnik rele;

oraliq portlatgichlar va shashka — portlatgichlar.

akrilonitril (ventoks);

metil spirti;

mishyakli angidrid;

mishyaksimon angidrid;

dixlorid simoblar (sulema) va boshqa simob tuzlari;

nikel tetrakarbonili;

sariq fosfor;

tsianidli vodorod va uning tuzlari (natriy tsianid, kaliy tsianid, kadmiy tsianid, kumush tsianid, simob tsianid va oksitsianid, qo‘rg‘oshin tsianid, mis tsianid, rux tsianid, kalsiy tsianid);

tsianqotishma;

“siklon”;

etilmerkurxlorid.