Ўзбекистон Республикаси Президентининг 2005 йил 28 февралдаги Р-2146-сонли Фармойишининг 8-бандига мувофиқ, Ўзбекистон Республикаси Олий ва ўрта махсус таълим вазирлиги Ўрта махсус, касб-ҳунар таълим маркази, Вазирлар Маҳкамаси ҳузуридаги Давлат тест маркази ва Меҳнат ва аҳолини ижтимоий муҳофаза қилиш вазирлиги қарор қилади:

1. Касбий таълим ташкилоти педагог кадрлари ва муҳандис-педагог кадрларининг бўш лавозимларни эгаллаш учун уларни танлов асосида танлаб олиш тўғрисидаги низом иловага мувофиқ тасдиқлансин.

2. Мазкур қарор кучга кирган кундан эътиборан Ўзбекистон Республикаси Олий ва ўрта махсус таълим вазирлиги Ўрта махсус, касб-ҳунар таълим маркази, Вазирлар Маҳкамаси ҳузуридаги Давлат тест маркази ва Меҳнат ва аҳолини ижтимоий муҳофаза қилиш вазирлигининг 2002 йил 3 январдаги 3, 19 ва 19-сон қарори билан тасдиқланган «Ўрта махсус, касб-ҳунар таълими тизимида раҳбар ва ўқитувчиларнинг бўш лавозимларини эгаллаш учун уларни танлов асосида танлаб олиш тўғрисида»ги низом (2002 йил 4 январь, рўйхат рақами 1093) ўз кучини йўқотган деб ҳисоблансин.

3. Ушбу қарор Ўзбекистон Республикаси Адлия вазирлигида давлат рўйхатидан ўтказилган кундан бошлаб ўн кундан кейин кучга киритилсин.

Мазкур Низом касбий таълим ташкилотларининг бўш (вакант) ўқитувчи ва ишлаб чиқариш таълими усталари лавозимларига танлов ўтказиш тартибини белгилайди.

Танлов касбий таълим ташкилотларига замонавий талабларга жавоб берувчи юқори малакали, чуқур касбий билимга, ижодий ва илмий потенциалга, юксак ахлоқий ва маънавий сифатларга эга бўлган кадрларни саралаб олиш мақсадида ўтказилади.

1. Касбий таълим ташкилотларининг ўқитувчи ва ишлаб чиқариш таълими усталари (бундан буён матнда педагоглар деб юритилади) лавозимларига номзодлар танлов асосида қабул қилинади. Танлов бўш (вакант) лавозимларга эълон қилинади.

1¹. Педагог лавозими бўшаганидан кейин 10 кун ичида педагог лавозимига касбий таълим ташкилоти томонидан оммавий ахборот воситаларида ва касбий таълим ташкилотининг расмий веб-сайтида (агар мавжуд бўлса) танлов ўтказиш тўғрисида эълон берилади.

2. Педагог лавозимига танлов мазкур Низомга асосан тузиладиган танлов ўтказиш бўйича комиссия томонидан ўтказилади.

3. Касбий таълим ташкилотларига соатбай ҳақ тўлаш асосида ишга қабул қилинаётган шахслар директор буйруғи билан танловсиз расмийлаштирилади.

5. Касбий таълим ташкилотларининг:

умумтаълим фанлари бўйича педагог лавозимини эгаллаш учун танловда илмий даражага (илмий унвон) ёки педагогик мутахассислик бўйича бакалавр ёки магистр даражасига эга ёхуд дипломли мутахассислар иштирок этишлари мумкин;

махсус фан ва касбий таълим (амалиёт) педагог лавозимига ўтказиладиган танловда таълим ташкилоти йўналиши ва ихтисосликларига мос келадиган илмий даражага (илмий унвон) ёки бакалавр ёхуд магистр даражасига эга, шунингдек дипломли мутахассислар иштирок этади. Халқ ҳунармандчилиги йўналишларидаги касбий таълим ташкилотларининг касбий таълим (амалиёт) педагог лавозимини эгаллаш учун танловда ишлаб чиқариш корхоналарининг юқори разрядли ходимлари ва миллий ҳунармандчилик усталари, ўрта махсус маълумотга эга мутахассислар иштирок этишлари мумкин.

6. Касбий таълим ташкилотига айлантирилаётган бошқа турдаги таълим муассасалари педагоглари танловда умумий асосда иштирок этадилар.

7. Педагог лавозимини эгаллаш учун ўтказиладиган танловда номзодлар аризасига биноан иштирок этадилар.

8. Ўзбекистон Республикасининг «Педагогнинг мақоми тўғрисида»ги Қонунининг 15-моддаси биринчи ва иккинчи қисмларида қайд этилган шахслар танловга қўйилмайдилар.

9. Педагогларни танловдан ўтказиш бўйича тахминий саволлар мажмуи ва танлов ўтказиш жадвали Қорақалпоғистон Республикаси Касбий таълим агентлиги, вилоятлар ва Тошкент шаҳри касбий таълим бошқармалари томонидан ишлаб чиқилади.

11. Танлов эълон қилинган кундан бошлаб 20 кун ичида педагог лавозимига танловда иштирок этишни хоҳлаган номзодларнинг аризалари тегишли касбий таълим ташкилотига тақдим этилади.

12. Аризага қуйидаги ҳужжатлар илова қилинади:

сўровнома (кадрларни ҳисобга олиш варақаси) ва таржимаи ҳол;

маълумоти ҳақидаги ҳужжатнинг нусхаси;

илмий даража ва илмий унвонлари ҳақидаги ҳужжатларнинг нусхалари (мавжуд бўлса);

илмий-услубий ишлар ва ихтиролар рўйхати (мавжуд бўлса);

Номзодга ҳужжатлар қабул қилиб олинганлиги ҳақида тилхат берилади.

12¹. Танлов номзодлардан ҳужжатларни қабул қилиш тугагандан кейин 15 кун ичида ўтказилади.

13. Педагог лавозимига танлов ўтказиш учун касбий таълим ташкилоти директорининг буйруғи билан танлов комиссияси тузилади.

14. Касбий таълим ташкилоти раҳбари томонидан тайинланадиган масъул ходим номзодларнинг ҳужжатларини ўрганиб чиқади ва танлов комиссиясига тақдим қилади.

15. Танлов комиссияси таркиби камида 5 кишидан иборат бўлади.

16. Танлов комиссияси кўпчилик томондан очиқ овоз бериш йўли билан танлов натижалари бўйича қарор қабул қилади. Овозлар тенг бўлган тақдирда комиссия раисининг овози ҳал қилувчи ҳисобланади. Танловни ўтказиш ва танлов натижалари танлов комиссияси баёни билан расмийлаштирилади.

18. Педагог лавозимига танлаб олинган номзод билан касбий таълим ташкилоти директори белгиланган тартибда меҳнат шартномасини тузади ва буйруқ билан расмийлаштиради.

19. Танлов комиссияси қароридан норози бўлган шахслар юқори турувчи органга ёки судга шикоят қилишлари мумкин.