Ўзбекистон Республикаси Президентининг «Аҳолининг ҳожатманд қатламларини ижтимоий қўллаб-қувватлаш ҳамда тиббий-ижтимоий ёрдам кўрсатиш тизимини янада такомиллаштириш чора-тадбирлари тўғрисида» 2016 йил 22 февралдаги ПФ-4782-сон Фармонини ва Ўзбекистон Республикаси Президентининг «Ўзбекистон Республикаси Меҳнат вазирлиги фаолиятини ташкил этишни такомиллаштириш чора-тадбирлари тўғрисида» 2016 йил 24 февралдаги ПҚ-2498-сон қарорини бажариш юзасидан, шунингдек меҳнат органлари фаолиятини янада такомиллаштириш мақсадида Вазирлар Маҳкамаси қарор қилади:

1. Қуйидагилар:

Ўзбекистон Республикаси Меҳнат вазирлиги тўғрисидаги низом 1-иловага мувофиқ;

Ўзбекистон Республикасининг Бандликка кўмаклашиш давлат жамғармаси маблағларини шакллантириш ва улардан фойдаланиш тартиби тўғрисидаги низом 2-иловага мувофиқ тасдиқлансин.

2. Ўзбекистон Республикаси Меҳнат вазирлиги Молия вазирлиги билан келишган ҳолда Ўзбекистон Республикасининг Бандликка кўмаклашиш давлат жамғармаси маблағларидан фойдаланиш самарадорлигини тубдан оширишга йўналтирилган 2017 — 2020 йиллардаги қўшимча чора-тадбирлар дастурини икки ой муддатда тасдиқласин, унда қуйидаги тадбирлар назарда тутилсин:

ишсизларни касб-ҳунарга ўқитиш ва қайта тайёрлаш ҳажмларини кўпайтириш, уларни ҳақ тўланадиган жамоат ишларига жалб этиш, шунингдек аҳолининг, айниқса қишлоқ жойларда банд бўлишининг самарали шаклларини ривожлантириш;

туман (шаҳар) бандликка кўмаклашиш марказларининг бино ва хоналарини замонавий талабларга мувофиқ қуриш, реконструкция қилиш ва мукаммал таъмирлаш.

3. Ўзбекистон Республикаси Меҳнат вазирлиги марказий аппарати, Қорақалпоғистон Республикаси Меҳнат вазирлиги, вилоятлар ва Тошкент шаҳар ҳудудий меҳнат бош бошқармалари ходимларига меҳнат органлари тизимида узоқ муддат ишлаганлик учун ҳар йилги бир йўла тўланадиган мукофот белгилансин.

Белгилаб қўйилсинки, узоқ муддат ишлаганлик учун ҳар йилги бир йўла тўланадиган мукофотни бериш йил мобайнидаги иш якунларига кўра, Ходимларни моддий рағбатлантириш ва меҳнат органларининг моддий-техника базасини мустаҳкамлаш жамғармаси маблағлари ҳисобидан амалга оширилади.

4. Ўзбекистон Республикаси Молия вазирлиги Меҳнат вазирлиги билан биргаликда 2017 йилги Ўзбекистон Республикаси Давлат бюджети лойиҳасини ишлаб чиқишда туман (шаҳар) Бандликка кўмаклашиш марказларини сақлаш харажатларини Давлат бюджети маблағлари ҳисобидан амалга ошириш масаласини кўриб чиқсин.

5. Ўзбекистон Республикаси Ҳукуматининг 3-иловага мувофиқ айрим қарорлари ўз кучини йўқотган деб ҳисоблансин.

6. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари Р.С. Азимов зиммасига юклансин.

1. Ўзбекистон Республикаси Меҳнат вазирлиги (кейинги ўринларда Вазирлик деб аталади) бандлик ва меҳнатни муҳофаза қилиш соҳасидаги сиёсатни амалга оширувчи давлат бошқаруви органи ҳисобланади ва ўз фаолиятида Ўзбекистон Республикаси Вазирлар Маҳкамасига ҳисобот беради.

2. Вазирлик тизимига қуйидагилар киради:

Вазирлик марказий аппарати;

Қорақалпоғистон Республикаси Меҳнат вазирлиги, вилоятлар ва Тошкент шаҳар меҳнат бош бошқармалари, туман (шаҳар) бандликка кўмаклашиш марказлари;

Давлат меҳнат ҳуқуқ инспекцияси ҳамда Меҳнатни муҳофаза қилиш ва меҳнат шароитларини экспертизадан ўтказиш давлат инспекцияси;

давлат унитар корхонаси шаклидаги Ташқи меҳнат миграцияси масалалари агентлиги;

Бандлик ва меҳнатни муҳофаза қилиш Республика илмий маркази, Одам савдоси жабрдийдаларига ёрдам кўрсатиш бўйича Республика реабилитация маркази, банд бўлмаган аҳолини касб-ҳунарга ўқитиш минтақавий марказлари, давлат муассасаси шаклидаги Тошкент шаҳрида ишсизларни касб-ҳунарга тайёрлаш, қайта тайёрлаш ва малакасини ошириш ўқув маркази.

Қорақалпоғистон Республикаси Меҳнат вазирлиги, вилоятлар ва Тошкент шаҳар меҳнат бош бошқармалари ҳамда туман (шаҳар) бандликка кўмаклашиш марказлари Вазирликка ҳамда тегишли равишда Қорақалпоғистон Республикаси Вазирлар Кенгаши, Қорақалпоғистон Республикаси Меҳнат вазирлиги, вилоятлар, шаҳарлар ва туманлар ҳокимликларига бўйсунадилар ва ҳисобот берадилар.

3. Вазирлик ўз фаолиятида Ўзбекистон Республикаси Конституцияси ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, шунингдек ушбу Низомга амал қилади.

4. Вазирлик ўз вазифалари ва функцияларини амалга оширишда давлат бошқарувининг бошқа органлари, маҳаллий давлат ҳокимияти органлари ва бошқа ташкилотлар билан ўзаро ҳамкорлик қилади.

5. Вазирликнинг моддий-техника таъминоти ва унинг тизими ходимлари меҳнатига ҳақ тўлаш ажратиладиган маблағлар доирасида Ўзбекистон Республикаси Давлат бюджети, Ўзбекистон Республикаси Бандликка кўмаклашиш давлат жамғармаси, Меҳнат органлари ходимлари меҳнатини рағбатлантириш ва моддий-техника базасини мустаҳкамлаш жамғармаси маблағлари, шунингдек қонун ҳужжатларида тақиқланмаган бошқа манбалар ҳисобига амалга оширилади.

6. Вазирлик юридик шахс ҳисобланади, Ўзбекистон Республикаси Давлат герби тасвири туширилган ва ўз номи ёзилган муҳрга эга бўлади.

7. Қуйидагилар Вазирликнинг асосий вазифалари ҳисобланади:

аҳоли бандлиги даражасини минтақалар бўйича ёш-жинс гуруҳлари бўйича тизимли асосда чуқур таҳлил қилиш, янги иш ўринлари ташкил этиш йиллик дастурлари ишлаб чиқилишини мувофиқлаштириш, аҳоли бандлигини ва меҳнат ресурсларидан оқилона фойдаланишни таъминлаш, улар бажарилиши доимий мониторингини олиб бориш;

банд бўлмаган аҳолини, биринчи навбатда ёшлар, аёллар ва ногиронларни касб-ҳунарга ўқитиш ва қайта тайёрлашни, касбга ўқитиш ва қайта тайёрлашнинг самарали тизимини ташкил қилиш, замонавий ахборот-коммуникацион технологиялардан кенг фойдаланган ҳолда уларни ишга жойлаштиришга кўмаклашиш;

меҳнат ва бандлик соҳасида қонун ҳужжатлари талабларига риоя этилиши устидан назоратни таъминлаш, шунингдек меҳнат муносабатларини, меҳнатни моддий рағбатлантириш механизмларини янада такомиллаштириш бўйича аниқ чора-тадбирларни амалга ошириш.

8. Вазирлик ўзига юкланган вазифаларга мувофиқ қуйидаги функцияларни амалга оширади:

Ўзбекистон Республикаси Иқтисодиёт вазирлиги билан биргаликда, жамиятни ислоҳ қилишнинг мақсад ва устуворликларидан келиб чиққан ҳолда, замонавий бозор муносабатлари механизмлари ва воситалари асосида аҳоли бандлигини таъминлаш ва меҳнат бозорини изчил ривожлантириш стратегияси ишлаб чиқилишини ташкил этади ва мувофиқлаштиради;

Ўзбекистон Республикаси Иқтисодиёт вазирлиги ва Давлат статистика қўмитаси билан биргаликда республика ва ҳудудларни демографик ва иқтисодий ривожлантириш прогнозлари асосида меҳнат ресурсларининг прогноз балансларини ва аҳоли бандлигини таъминлаш бўйича самарали чора-тадбирлар комплексини ишлаб чиқади;

республика ва маъмурий-ҳудудий тузилмаларнинг меҳнат ресурслари сони ҳамда таркибини ўрганади, уни такомиллаштиришга доир таклифлар ишлаб чиқади;

аҳолининг бандлиги даражаси ва таркибини тўлиқроқ ва холисона баҳолашни таъминлаш, ишга жойлашишга муҳтож шахсларни аниқлаш мақсадида меҳнат бозорининг ҳолати мониторингини ташкил этади, ва шу асосда тармоқлар ва ҳудудлар бўйича янги иш ўринлари ташкил этишнинг йиллик буюртмаларини шакллантиради;

иш ўринлари ташкил этишнинг мақсадли дастурларини ишлаб чиқишни мувофиқлаштиради ва манфаатдор вазирликлар, давлат қўмиталари ва идоралар, маҳаллий давлат ҳокимияти органлари билан биргаликда уларни ишлаб чиқишда иштирок этади;

меҳнат миграцияси жараёнларини таҳлил қилади, ташқи меҳнат миграциясини ва хорижий фуқароларнинг Ўзбекистон Республикаси ҳудудидаги меҳнат фаолиятини ташкил этиш чора-тадбирлари амалга оширилишини ўз ваколатлари доирасида таъминлайди, шунингдек меҳнат миграцияси масалалари бўйича қонун ҳужжатларини такомиллаштириш юзасидан таклифлар ишлаб чиқади;

ишсизлар ва ишга жойлашишга муҳтож банд бўлмаган аҳоли ҳисобини юритади;

бўш иш жойлари тўғрисидаги маълумотларни йиғиш ва таҳлил қилишни ташкил этади, белгиланган тартибда тақдим этиладиган бўш иш жойлари ҳисобини юритади ва улар ҳақидаги маълумотларни ахборот-коммуникация технологияларидан фойдаланган ҳолда аҳолига етказади;

Ўзбекистон Республикаси Давлат солиқ қўмитаси билан биргаликда оилавий тадбиркорлик ва ҳунармандчилик фаолияти билан банд бўлган фуқароларни ҳисобга олишни ташкил қилади;

аҳоли, шу жумладан ёшлар, аёллар, имкониятлари чекланган шахслар, ишдан озод қилинган ходимлар ва аҳолининг бошқа тоифалари бандлигини ва улар ишга жойлаштирилиши бўйича маълумотлар шакллантирилиши ва таҳлил этилишини ташкил қилади;

манфаатдор вазирликлар, давлат қўмиталари ва идоралар билан биргаликда ўрта махсус, касб-ҳунар таълими ҳамда олий таълим муассасалари битирувчиларининг бандлигини тадқиқ қилади ҳамда унинг натижалари асосида ишчи кадрларнинг ва таълим муассасаларида мутахассисларнинг касб тайёргарлиги йўналишларини такомиллаштириш юзасидан таклифлар ишлаб чиқади;

маҳаллий давлат ҳокимияти органлари билан биргаликда шахсий ёрдамчи ва деҳқон хўжаликларида қорамол боқиш билан банд бўлган фуқароларнинг бандлигини тартибга солиш чора-тадбирларини амалга оширади;

илмий-тадқиқот ташкилотлари билан биргаликда ёшлар ва иш билан банд бўлмаган аҳолининг касб-ҳунарга хоҳишини ва меҳнат йўналишларини аниқлаш учун социологик тадқиқотлар ўтказади;

бандлик ва иш ўринларини ташкил этиш ҳудудий дастурларини ишлаб чиқишда маҳаллий давлат ҳокимияти органларига методик ва амалий ёрдам кўрсатади;

иқтисодиётни ислоҳ қилиш ва таркибий қайта ўзгартириш давомида, шунингдек ташкилотлар қайта ташкил этилганда, банкрот бўлиши ва тугатилиши натижасида ишдан бўшатиладиган ходимларни иш билан таъминлаш ва ижтимоий муҳофаза қилишга доир мақсадли минтақавий дастурлар ишлаб чиқилишини мувофиқлаштиради;

касаначилик, оилавий тадбиркорлик, ҳунармандчилик фаолияти ва аҳолининг ўзини ўзи иш билан таъминлашининг бошқа шакллари ривожлантирилишини рағбатлантириш ва қўллаб-қувватлаш юзасидан таклифлар тайёрлайди;

давлат ва хўжалик бошқаруви органларига, маҳаллий давлат ҳокимияти органларига ва бошқа ташкилотларга йирик корхоналар билан фуқаролар ўртасида кооперация асосида касаначиликни ташкил этишни кенгайтириш, шунингдек оилавий тадбиркорлик ва ҳунармандчиликни ривожлантириш масалаларида ёрдам кўрсатади;

нодавлат нотижорат ташкилотларига ва бошқа ташкилотларга ногиронлар учун иш ўринларини ташкил этишда ва уларни ишга жойлаштиришда ёрдам кўрсатади;

ногиронлар меҳнатидан фойдаланиш бўйича ихтисослаштирилган ташкилотлар ташкил этишга ва ривожлантиришга, ногиронлар бандлигини таъминлашда касаначилик ва бошқа фаолият турларини ривожлантиришга кўмаклашади;

ҳақ тўланадиган жамоат ишлари ташкил этилишини таъминлайди;

ишсизларни ва иш билан банд бўлмаган аҳолини касб-ҳунарга ўқитишни, қайта тайёрлашни ва уларнинг малакасини оширишни ташкил этади;

меҳнат бозори инфратузилмаси фаолияти такомиллаштирилишини таъминлайди;

вақтинчалик бир марталик иш билан таъминлаш марказларининг фаолиятини ташкил этади;

манфаатдор вазирликлар, давлат қўмиталари ва идоралар, маҳаллий давлат ҳокимияти органлари, тижорат банклари билан биргаликда ўз бизнесини бошламоқчи бўлган фуқароларни, шу жумладан ўрта махсус, касб-ҳунар таълими муассасаларининг битирувчиларини иқтисодий жиҳатдан қўллаб-қувватлаш ва рағбатлантириш бўйича мақсадли дастурларни ишлаб чиқади ва амалга оширади;

Ўзбекистон Республикаси Бандликка кўмаклашиш давлат жамғармаси маблағларини белгиланган тартибда тасарруф этади ва жамғарма маблағларидан мақсадли фойдаланилиши устидан назоратни таъминлаш ишларини ташкил этади;

ишсизлар ва уларнинг оила аъзоларини Ўзбекистон Республикаси Бандликка кўмаклашиш давлат жамғармаси маблағлари ҳисобига моддий қўллаб-қувватлаш таъминланишини белгиланган тартибда ташкил этади;

ташкилотларда иш ўринларининг энг кам миқдори ажратилиши ва уларга иш топишда қийналаётган ва меҳнат бозорида тенг шароитларда рақобатлашишга қодир бўлмаган аҳолининг айрим тоифаларига мансуб шахсларнинг ишга қабул қилиниши масалаларини ўрганади ва таҳлил қилади;

деҳқон ва фермер хўжаликларида ишлаётган фуқаролар, шунингдек тадбиркорлар учун белгиланган меҳнат кафолатлари амалга оширилишини ташкил этади;

одам савдоси жабрдийдаларига ёрдам бериш ва уларни ҳимоя қилиш бўйича ишларни белгиланган тартибда ташкил этади;

давлат ва хўжалик бошқаруви органлари, маҳаллий давлат ҳокимияти органларининг меҳнатни нормалаш ва ишчи касбларининг ҳамда мутахассислар ва хизматчилар лавозимларининг тариф-малака тавсифномаларини ишлаб чиқиш, шунингдек қонун ҳужжатларида белгиланган тартибда ишчиларнинг асосий касблари бўйича ишчиларга малака разрядлари бериш масалалари бўйича ишларини мувофиқлаштиради;

манфаатдор давлат ва хўжалик бошқаруви органлари билан биргаликда энг муҳим ижтимоий-меҳнат нормалари ва нормативларининг рўйхатини аниқлайди ва улар ишлаб чиқилишини мувофиқлаштиради;

манфаатдор вазирликлар, давлат қўмиталари ва идоралар иштирокида меҳнат ва бандлик соҳасига оид норматив-ҳуқуқий ҳужжатлар ва бошқа ҳужжатларнинг лойиҳаларини ишлаб чиқади;

меҳнат ва бандлик соҳасидаги норматив-ҳуқуқий ҳужжатларга риоя этилиши устидан белгиланган тартибда давлат назоратини амалга оширади;

ягона техник сиёсатни амалга ошириш, тармоқнинг ахборот тизимларини яратишда ягона усул ва воситаларни қўллаш орқали меҳнат ва бандлик соҳасида ахборот тизими шакллантирилиши ва ривожлантирилишини таъминлайди;

меҳнат ва бандлик масалалари бўйича илмий тадқиқотларни мувофиқлаштиради;

Ўзбекистон Республикаси Вазирлар Маҳкамасининг 2015 йил 19 июндаги 164-сон қарори билан тасдиқланган Асосий хизматчилар лавозимлари ва ишчи касбларининг Классификаторида кўрсатилган ишчи касблари ва хизматчилар лавозимлари номларининг, илгари норматив-ҳуқуқий ва бошқа ҳужжатларда ишлатилган касблар ва лавозимларга айнанлигини ва мутаносиблигини белгилайди;

тегишли касаба уюшмалари органларининг (ходимлар бошқа вакиллик органларининг) ҳамда иш берувчиларнинг (улар бирлашмаларининг) таклифларига кўра тармоқ битимлари тузишда қатнашади;

меҳнатни нормалаш, замонавий меҳнат стандартларини жорий этиш, меҳнатга ҳақ тўлашни ташкил этиш, ишлар, касблар ва лавозимларнинг тариф-малака маълумотномаларида акс эттирилмаган лавозимлар ва ишларни тариф сеткасининг тегишли разрядларига киритиш масалаларида давлат ва хўжалик бошқаруви органларига ва бошқа ташкилотларга амалий ва методик ёрдам беради;

Ўзбекистон Республикаси Иқтисодиёт вазирлиги, Молия вазирлиги ва Давлат солиқ қўмитаси билан биргаликда аҳоли даромадларини давлат томонидан тартибга солиш механизмини такомиллаштиришга доир таклифларни тайёрлашда қатнашади;

Ўзбекистон Республикаси Иқтисодиёт вазирлиги, Молия вазирлиги ҳамда бошқа манфаатдор вазирликлар, давлат қўмиталари ва идоралар билан биргаликда иш ҳақи, пенсиялар, нафақалар, стипендияларнинг энг кам миқдорини, иқтисодиётнинг айрим тармоқ ва секторлари учун ходимлар сонининг ва меҳнатга ҳақ тўлашнинг энг кам нормативларини белгилашга доир таклифлар тайёрлайди;

манфаатдор давлат ва хўжалик бошқаруви органлари билан биргаликда давлат муассасалари ва давлат унитар корхоналари учун лавозимлар киритиш ва ходимлар сонининг нормативларини белгилаш шартларини ишлаб чиқишда қатнашади;

меҳнатни моддий рағбатлантириш механизмларини ва меҳнатга ҳақ тўлашни тартибга солиш усулларини такомиллаштиришга доир чора-тадбирларни ишлаб чиқишда қатнашади;

меҳнатга ҳақ тўлаш тизимини, ягона тариф сеткасини, иш ҳақини туманлар бўйича тартибга солишни такомиллаштириш юзасидан таклифлар ишлаб чиқади;

меҳнат хавфсизлигини таъминлаш ва шароитларни баҳолаш бўйича қонунчилик базасини яратиш мақсадида манфаатдор вазирликлар, давлат қўмиталари ва идоралар билан биргаликда меҳнатни муҳофаза қилиш масалалари бўйича техник тартибга солиш соҳасида норматив-ҳуқуқий ҳужжатлар ҳамда норматив ҳужжатлар ишлаб чиқилишини ва қайта кўриб чиқилишини, уларни келишиш ва тасдиқлашни ташкил қилади, меҳнат шароитлари бўйича иш жойларини аттестациядан ўтказиш юзасидан методик ёрдам кўрсатади;

меҳнатни муҳофаза қилиш, иш берувчининг фуқаролик жавобгарлигини мажбурий суғурта қилиш ва ишлаб чиқаришдаги бахтсиз ҳодисалардан суғурталаш, шунингдек меҳнат шароитлари ноқулай ишларда ишлаётган ходимларга кафолатлар ва компенсациялар берилиши устидан давлат назорати ва текширувини, ишлаб чиқаришдаги бахтсиз ҳодисаларни текшириш ва ҳисобга олишни белгиланган тартибда амалга оширади;

меҳнат шароитлари, иш ўринларини меҳнат шароитлари бўйича ва асбоб-ускуналарнинг жароҳатлаш хавфлилиги юзасидан аттестациядан ўтказиш материаллари давлат экспертизасидан ўтказилишини ва тегишли хулоса берилишини таъминлайди;

иш ўринларини меҳнат шароитларининг ва асбоб-ускуналарининг жароҳатлаш хавфлилиги юзасидан аттестациядан ўтказиш бўйича малака сертификатига эга бўлган мутахассислар реестрини юритади;

давлат ва хўжалик бошқаруви органларининг таклифларига кўра имтиёзли шартларда пенсияга чиқиш ҳуқуқини берувчи ишлаб чиқаришлар, муассасалар, ишлар, касблар, лавозимлар ва кўрсаткичларнинг рўйхатига ўзгартишлар киритиш, қўшимча таътил, қисқартирилган иш кунини белгилаш бўйича хулосалар беради;

ноқулай меҳнат шароитларида ишлаганлик учун бериладиган имтиёзларнинг амалдаги рўйхатларига ўзгартиришлар киритиш бўйича Ўзбекистон Республикаси Вазирлар Маҳкамасига таклифлар тайёрлайди;

меҳнат муҳофазаси бўйича баҳолаш натижаларига кўра белгиланган мезонларга мувофиқ ташкилотларни касбий хавфлилик тоифасига киритади;

меҳнат ва бандлик масалаларида халқаро ташкилотлар ва хорижий мамлакатлар билан халқаро ҳамкорлик соҳасида ўзаро самарали ҳамкорлик механизмларини ривожлантириш ва такомиллаштиришга доир таклифлар ишлаб чиқишда иштирок этади;

меҳнат ва бандлик масалалари юзасидан Халқаро меҳнат ташкилоти ва бошқа халқаро ташкилотларда белгиланган тартибда ҳамкорлик қилади ва Ўзбекистон Республикасининг манфаатлари бўйича иш кўради;

Халқаро меҳнат ташкилотининг Ўзбекистон Республикаси томонидан ратификация қилинган конвенцияларининг, меҳнат ва бандлик масалалари бўйича тузилган бошқа халқаро шартномалар бажарилиши мониторинги олиб борилишини ташкил этади, белгиланган тартибда тегишли ҳисобот ва маърузалар тайёрлайди ва тақдим этади;

манфаатдор вазирликлар, давлат қўмиталари ва идоралар билан биргаликда меҳнат ҳуқуқларига риоя этилиши бўйича халқаро ташкилотлар вакилларининг ишини ташкил этади;

чет эллик донорлар ва кредит ташкилотларининг аҳоли бандлигини таъминлаш ва меҳнат муҳофазаси мақсадларига йўналтирилган маблағларини белгиланган тартибда жалб этиш ва фойдаланишни ташкил этади;

Вазирлик тизимида молия ишларини, идоравий мансуб ташкилотлар томонидан ўтказиладиган тадбирларни, шунингдек ушбу соҳадаги илмий тадқиқотларни маблағ билан таъминлашни белгиланган тартибда ташкил этади;

Вазирлик идоравий мансуб ташкилотларининг штатлар жадвалларини келишади, молия-хўжалик фаолияти бўйича баланслар ва ҳисоботларни кўриб чиқади;

идоравий мансуб ташкилотларнинг моддий-техника базасини мустаҳкамлаш тадбирларини амалга оширади;

идоравий мансуб ташкилотларнинг марказлаштирилган капитал қўйилмалардан самарали фойдаланишини таъминлайди, Вазирлик тизимидаги объектларни қуриш ва реконструкция қилиш бўйича истиқболли дастурларнинг ишлаб чиқилишини ташкил этади;

жисмоний ва юридик шахсларнинг мурожаатларини кўриб чиқади, шунингдек Вазирлик ваколатига кирувчи масалаларда қонунчилик бузилишини бартараф этиш бўйича зарур ҳаракатларни амалга оширади;

ваколатли ҳуқуқни муҳофаза қилиш органлари билан биргаликда, ўзининг ваколати доирасида, одам савдоси жабрдийдаларини реабилитация қилиш ва уларга ёрдам кўрсатишга кўмаклашади, жабрланган фуқаролар ҳуқуқларини тушунтиради;

Вазирлик ва идоравий мансуб ташкилотларнинг ходимларини қайта тайёрлашни ва малакасини оширишни ташкил этади, раҳбарлари ва мутахассисларини аттестациясини ўтказади;

норматив-ҳуқуқий ҳужжатлар лойиҳаларини ва ижтимоий сиёсатни амалга ошириш механизмларини такомиллаштириш бўйича таклифлар ишлаб чиқишда ваколати доирасида иштирок этади;

Ўзбекистон Республикаси Иқтисодиёт вазирлиги, бошқа вазирликлар, идоралар ва илмий-тадқиқот ташкилотлари билан биргаликда аҳоли турмуши даражаси ва фаровонлиги юзасидан тадқиқотлар ўтказишда ва уни янада ошириш бўйича таклифлар ишлаб чиқишда иштирок этади.

9. Вазирлик ўзига юкланган вазифалар ва функциялар бевосита ўзи томонидан ҳамда ҳудудий бўлинмалар ва бошқа идоравий мансуб ташкилотлар орқали бажарилишини таъминлайди.

10. Вазирлик ўзига юкланган вазифалар ва функцияларни бажариш учун қуйидаги ҳуқуқларга эга:

Вазирликка юкланган вазифалар ва функцияларнинг бажарилиши билан боғлиқ норматив-ҳуқуқий ҳужжатлар лойиҳаларини ҳамда бошқа ҳужжатларни белгиланган тартибда Ўзбекистон Республикаси Вазирлар Маҳкамасига киритиш;

давлат бошқаруви органлари, маҳаллий давлат ҳокимияти органларининг меҳнат, бандлик ва меҳнатни муҳофаза қилиш соҳасида давлат сиёсатини амалга ошириш масалаларидаги фаолиятини белгиланган тартибда мувофиқлаштириш;

Вазирлик ваколатига кирадиган масалаларни ҳал этиш учун давлат бошқаруви органлари ва маҳаллий давлат ҳокимияти органларидан ахборотларни белгиланган тартибда сўраш ва олиш;

Вазирлик ваколатига кирадиган масалалар юзасидан зарур статистик маълумотларни давлат статистика органларидан бепул олиш;

ташкилотларда меҳнат, бандлик ва меҳнатни муҳофаза қилиш, меҳнат шароитлари ва стандартлари масалалари бўйича қонунчиликка, шу жумладан Ўзбекистон Республикаси томонидан ратификация қилинган халқаро конвенциялар қоидалари ва талабларига риоя этилиши юзасидан қонун ҳужжатларида белгиланган тартибда ўрганиш ва текширишлар ўтказиш;

ташкилотлар томонидан ногиронлар учун ижтимоий инфратузилма объектларига тўсқинликсиз кириш шароитларини таъминланиши устидан белгиланган тартибда давлат назоратини амалга ошириш;

ишлаб чиқаришдаги бахтсиз ҳодисалар бўйича қонун ҳужжатларида белгиланган тартибда махсус текширишлар ўтказиш ёки текширишларда иштирок этиш;

меҳнат, бандлик ва меҳнатни муҳофаза қилиш тўғрисидаги қонун ҳужжатлари бузилганлиги учун қонун ҳужжатларида белгиланган тартибда мансабдор шахсларга маъмурий жазолар бериш;

ташкилотлар фаолиятини ҳамда меҳнат хавфсизлиги талабларига жавоб бермайдиган ва ходимлар соғлиғи ёки ҳаётига хавф туғдирадиган ишлаб чиқариш воситаларидан фойдаланишни улар меҳнат хавфсизлиги талабларига мувофиқлаштирилгунга қадар ўз ваколатлари доирасида ва қонун ҳужжатларида белгиланган тартибда тўхтатиб туриш;

ўзининг ташкилий тузилмаси доирасида, Вазирликка ва унга идоравий мансуб тузилмаларга тегишли давлат мулкини бир тузилмадан иккинчисига, белгиланган тартибда, бепул фойдаланиш ҳуқуқи билан бериш;

ҳудудий меҳнат органлари, туман (шаҳар) Бандликка кўмаклашиш марказлари ва идоравий мансуб ташкилотларнинг ходимларини, улар томонидан фаолиятнинг асосий параметрлари бажарилишини ҳисобга олган ҳолда, моддий рағбатлантиришнинг миқдорлари ва шартларини белгилаш;

қуйидаги буюртмаларни тендер ўтказмасдан жойлаштириш: Вазирлик ваколатига кирадиган масалалар юзасидан илмий ишлар бажариш ва тадқиқотлар ўтказишни — идоравий мансуб Республика аҳоли бандлиги ва меҳнатни муҳофаза қилиш илмий марказида; соҳага оид ахборот-компьютер технологияларини ишлаб чиқиш, жорий этиш ва сақлашни — идоравий мансуб «Ахборот-компьютер маркази «Mehnat.uz» МЧЖ»да, меҳнат органлари ходимларини тайёрлаш, қайта тайёрлаш ва малакасини оширишни — Республика меҳнат тизими ходимларининг малакасини ошириш курсларида;

белгиланган тартибда ноширлик фаолиятини амалга ошириш;

аҳоли бандлиги, ишга жойлаштириш ва меҳнатни муҳофаза қилиш масалалари бўйича ижтимоий реклама маҳсулотларига буюртма бериш ҳамда уларни давлат оммавий ахборот воситаларида, стендларда, баннерларда ва ушбу маҳсулотлардан аҳолининг кенг фойдаланиши имконини таъминловчи бошқа усулларда бепул жойлаштириш;

биноларга хизмат кўрсатиш, инвентарлар ва хўжалик воситалари, автотранспорт, алоқа воситалари, ҳисоблаш, компьютер ва ташкилий техникаларни сақлаб туриш ва фойдаланиш ишларини бажариш, дастурий маҳсулотларни сотиб олиш юзасидан белгиланган тартибда шартномалар тузиш;

Вазирлик ваколатига тегишли масалаларни ҳал қилишга илмий ташкилотларни, олимлар ва мутахассисларни, шу жумладан хорижий олимлар ва мутахассисларни шартнома асосида жалб этиш;

давлат ва хўжалик бошқаруви органлари ҳамда бошқа ташкилотларнинг меҳнат, бандлик ва меҳнатни муҳофаза қилиш тўғрисидаги қонун ҳужжатлари бузилган ҳолда қабул қилинган буйруқлари ва бошқа ҳужжатларини бекор қилиш юзасидан белгиланган тартибда таклифлар киритиш;

бутунжаҳон Интернет ахборот тармоғида ва ижтимоий тармоқларда белгиланган тартибда расмий веб-сайтлар яратиш;

Вазирлик ваколатига кирувчи масалалар бўйича хорижий давлатлар ва халқаро ташкилотларнинг тегишли тузилмалари билан халқаро ҳамкорликни амалга ошириш;

Ҳукуматнинг топшириғига кўра Ўзбекистон Республикасининг манфаатларини халқаро ташкилотларда ифодалаш ҳамда қонун ҳужжатларида назарда тутилган тартибда ва халқаро ҳуқуқ нормаларига мувофиқ бошқа мамлакатларнинг ваколатли ташкилотлари билан бандлик ва меҳнатни муҳофаза қилиш масалаларида ҳамкорлик тўғрисида шартномалар имзолаш.

Вазирлик қонун ҳужжатларига мувофиқ бошқа ҳуқуқларга ҳам эга бўлиши мумкин.

11. Вазирлик ўз ваколатлари доирасида давлат бошқаруви органлари, маҳаллий давлат ҳокимияти органлари, бошқа ташкилотлар, мансабдор шахслар ва фуқаролар томонидан бажарилиши мажбурий бўлган норматив-ҳуқуқий ҳужжатларни қабул қилишга ҳақлидир.

Вазирлик, зарур ҳолларда, давлат бошқаруви бошқа органлари билан биргаликда белгиланган тартибда қўшма қарорлар ва бошқа ҳужжатлар чиқариш ҳуқуқига эга.

12. Вазирлик ўзига юкланган вазифаларнинг самарали бажарилиши учун жавоб беради.

13. Вазирликка Ўзбекистон Республикаси Президенти томонидан лавозимга тайинланадиган ва лавозимдан озод қилинадиган Ўзбекистон Республикаси Меҳнат вазири (кейинги ўринларда — Меҳнат вазири деб аталади) бошчилик қилади.

Меҳнат вазирининг Ўзбекистон Республикаси Президенти томонидан лавозимга тайинланадиган ва лавозимдан озод қилинадиган бир нафар ўринбосари бўлади.

14. Меҳнат вазири:

якка бошчилик асосида Вазирлик фаолиятига раҳбарлик қилади ҳамда Вазирликка юкланган вазифалар ва функцияларнинг бажарилиши учун шахсан жавоб беради;

вазир ўринбосарининг ва Вазирлик тизимидаги бошқа мансабдор шахсларнинг ваколатларини, Вазирлик фаолиятининг алоҳида йўналишлари ва участкаларига раҳбарлик қилиш юзасидан ҳамда идоравий мансуб ташкилотлар иши юзасидан шахсий жавобгарлиги даражасини белгилайди;

ўз ваколатлари доирасида буйруқлар чиқаради ва Вазирлик тизими ходимлари бажариши мажбурий бўлган кўрсатмалар беради;

Вазирлик марказий аппаратининг харажатлари сметасини ва штатлар жадвалини ходимларнинг белгиланган сони доирасида тасдиқлайди, Вазирликнинг республика бюджетидан молиялаштириладиган идоравий мансуб ташкилотларининг харажатлари ва даромадлари сметасини, штатлар жадвалларини ҳисобга олади;

зарурат бўлганда ходимларнинг белгиланган умумий сони ва меҳнатга ҳақ тўлаш фонди доирасида марказий аппаратнинг, вилоятлар ва Тошкент шаҳри меҳнат бош бошқармалари, туман (шаҳар) бандликка кўмаклашиш марказлари ҳамда Вазирликнинг идоравий мансуб ташкилотларининг тасдиқланган тузилмасига ўзгартиришлар киритади;

Марказий аппарат бўлинмалари, Вазирлик тизимига кирувчи идоравий мансуб ташкилотлар тўғрисидаги низомларни, шунингдек туман (шаҳар) аҳоли бандлигига кўмаклашиш марказлари тўғрисидаги намунавий низомларни белгиланган тартибда тасдиқлайди;

марказий аппарат ходимларини ҳамда вазирликка қарашли ташкилотлар ва ҳудудий меҳнат органлари раҳбарларини қонунчиликда белгиланган тартибда лавозимга тайинлайди ва лавозимдан озод қилади;

қонун ҳужжатларига мувофиқ бошқа ваколатларни амалга оширади.

15. Қуйидагиларни:

Қорақалпоғистон Республикаси Меҳнат вазирини лавозимга тайинлаш ва лавозимдан озод қилиш — Вазир билан келишган ҳолда Қорақалпоғистон Республикаси Жўқорғи Кенгеси томонидан;

вилоятлар ва Тошкент шаҳри меҳнат бош бошқармалари бошлиқларини лавозимга тайинлаш ва лавозимдан озод қилиш — тегишли вилоятлар ва Тошкент шаҳри ҳокимлари билан келишган ҳолда Вазир томонидан;

туман (шаҳар) бандликка кўмаклашиш марказлари директорларини лавозимга тайинлаш ва лавозимдан озод қилиш — тегишли туманлар (шаҳарлар) ҳокимлари ва Меҳнат вазири билан келишган ҳолда Қорақалпоғистон Республикаси Меҳнат вазири, вилоятлар ва Тошкент шаҳар меҳнат бош бошқармалари бошлиқлари томонидан;

ҳудудий меҳнат органларига бўйсунувчи ташкилотлар раҳбарларини ҳамда давлат меҳнат ҳуқуқ инспекторларини, меҳнат муҳофазаси бўйича давлат техник инспекторлари ва меҳнат шароитлари бўйича давлат экспертларини лавозимга тайинлаш ва лавозимдан озод қилиш — Вазир билан келишган ҳолда Қорақалпоғистон Республикаси Меҳнат вазири, вилоятлар ва Тошкент шаҳар меҳнат бош бошқармалари бошлиқлари томонидан амалга оширилади.

Вилоятлар ва Тошкент шаҳар ҳудудий меҳнат бош бошқармалари бошлиқларини лавозимга тайинлаш ва озод қилишнинг қонунчиликда белгиланган тартибдаги жараёни якунига етгунга қадар кўрсатиб ўтилган таркибий бўлинмалар фаолиятини таъминлаш мақсадида Меҳнат вазири раҳбарнинг вазифасини вақтинча бажарувчини тайинлайди.

16. Қорақалпоғистон Республикаси Меҳнат вазирлиги, вилоятлар ва Тошкент шаҳар меҳнат бош бошқармалари тўғрисидаги низомлар Қорақалпоғистон Республикаси Вазирлар Кенгаши, тегишли вилоятлар ва Тошкент шаҳри ҳокимлари билан келишган ҳолда Вазирликнинг буйруқлари билан тасдиқланади.

Туман (шаҳар) бандликка кўмаклашиш марказлари тўғрисидаги намунавий низомлар тегишли туманлар (шаҳарлар) ҳокимлари билан келишган ҳолда тегишли равишда Қорақалпоғистон Республикаси Меҳнат вазирлиги, вилоятлар ва Тошкент шаҳар меҳнат бош бошқармаларининг буйруқлари билан тасдиқланади.

17. Ташқи меҳнат миграцияси масалалари агентлиги вазирликнинг ташқи меҳнат миграцияси жараёнларини бошқариш, Ўзбекистон Республикаси фуқароларининг чет элдаги ва хорижий фуқароларнинг Ўзбекистон Республикасидаги меҳнат фаолиятини ташкил этиш бўйича Вазирликнинг ваколатли органи ҳисобланади.

Вазирлик Ташқи меҳнат миграцияси масалалари агентлигининг муассиси ҳисобланади.

18. Меҳнат органлари тизими ходимларининг малакасини ошириш Республика курслари меҳнат органлари тизими ходимларини тайёрлаш, қайта тайёрлаш ва малакасини ошириш бўйича базавий ўқув-методик марказ ҳисобланади.

Меҳнат органлари тизими ходимларининг малакасини ошириш Республика курслари ташкилотларнинг кадрлар хизмати ходимларини тайёрлаш, қайта тайёрлаш ва малакасини оширишни шартнома асосида амалга оширади.

19. Қорақалпоғистон Республикаси Меҳнат вазирлиги, вилоятлар ва Тошкент шаҳар меҳнат бош бошқармалари ҳамда туман (шаҳар) бандликка кўмаклашиш марказларининг юридик хизматларига кадрлар хизматини ташкил этиш функцияси юкланади.

20. Давлат меҳнат ҳуқуқ инспекторлари, меҳнат муҳофазаси бўйича давлат техник инспекторлари ва меҳнат шароитлари бўйича давлат экспертлари меҳнатга ҳақ тўлашнинг разрядлари ва тариф ставкалари бўйича, тегишлича, Қорақалпоғистон Республикаси Меҳнат вазирлиги, вилоятлар ва Тошкент шаҳар ҳудудий меҳнат бош бошқармалари, туман (шаҳар) бандликка кўмаклашиш марказларининг бош мутахассисларига тенглаштирилади.

21. Вазирликда Вазир (ҳайъат раиси), меҳнат вазирининг ўринбосари, шунингдек Вазирлик фаолиятининг асосий йўналишларини мувофиқлаштирувчи Вазирлик таркибий бўлинмалари раҳбарларидан иборат таркибда ҳайъат ташкил этилади.

Ҳайъатнинг аъзолари сони ва шахсий таркиби меҳнат вазирининг тақдимномасига биноан Ўзбекистон Республикаси Вазирлар Маҳкамаси томонидан тасдиқланади.

Ҳайъат қуйидагилар билан боғлиқ масалаларни кўриб чиқади:

меҳнат ва бандлик соҳасидаги сиёсатни рўёбга чиқаришни янада такомиллаштириш бўйича қонун ҳужжатларида белгиланган Вазирлик фаолиятининг асосий концептуал йўналишларини тайёрлаш ва амалга ошириш;

Вазирлик номенклатурасига кирадиган лавозимларга кадрларни танлаш, жой-жойига қўйиш, тайёрлаш ва қайта тайёрлаш;

Ўзбекистон Республикаси Президентининг ҳужжатларида ва Ҳукумат қарорларида белгиланган вазифалар ўз вақтида ва сифатли амалга оширилишини таъминлаш учун ижро интизомини мустаҳкамлаш ва Вазирлик раҳбарлари ва ходимларининг шахсий жавобгарлигини ошириш.

Ҳайъат Вазирлик ваколатига тааллуқли бошқа масалаларни ҳам кўриб чиқиш ҳуқуқига эга.

Ҳайъат мажлисига Вазирлик ваколатига кирадиган масалалар бўйича бошқа вазирликлар, давлат қўмиталари, идоралар, маҳаллий давлат ҳокимияти органлари, бошқа ташкилотлар раҳбарлари таклиф этилиши мумкин.

Ҳайъат унинг мажлисида таркибининг ярмидан кўпи қатнашган тақдирда ваколатли бўлади. Кўриб чиқилаётган масалалар бўйича қарорлар оддий кўпчилик овоз билан қабул қилинади.

Ҳайъат қарорлари Меҳнат вазирининг буйруқлари билан амалга оширилади. Меҳнат вазири ва ҳайъат аъзолари ўртасида келишмовчиликлар пайдо бўлган тақдирда Меҳнат вазири пайдо бўлган келишмовчиликлар тўғрисида Ўзбекистон Республикаси Вазирлар Маҳкамасига ахборот берган ҳолда мустақил равишда қарор қабул қилади. Ҳайъат аъзолари ҳам ўз фикр-мулоҳазаларини Ўзбекистон Республикаси Вазирлар Маҳкамасига хабар қилишлари мумкин.

Ҳайъат фаолияти тартиби унинг ҳайъат тасдиқлайдиган регламентида белгиланади.

22. Вазирлик ходимларини моддий рағбатлантириш қонун ҳужжатларига мувофиқ амалга оширилади.

23. Вазирлик ходимларининг иш ҳақи лавозим маоши, мукофотлар, қўшимча тўловлар, устамалар, амалдаги қонун ҳужжатларида назарда тутилган рағбатлантириш тўловларидан иборат бўлади.

24. Вазирлик марказий аппарати ва ҳудудий меҳнат органларининг ходимларини меҳнат органлари тизимидаги белгили хизмат муддатини узлуксиз ўтаганлиги учун йиллик бир йўла бир марталик тақдирлаш қуйидаги миқдорда амалга оширилади (рағбатлантириш коэффициентини ҳисобга олган ҳолда лавозим маошига нисбатан коэффициентларда): 3 йилдан 5 йилгача — 0,5; 5 йилдан 10 йилгача — 0,8; 10 йилдан 15 йилгача — 1,0; 15 йилдан ортиқ — 1,5. Белгили хизмат муддатини узлуксиз ўтаганлиги учун йиллик бир йўла бир марталик тақдирлаш имтиёзини берадиган меҳнат стажи касаба уюшмаси билан келишилган ҳолда Вазирлик томонидан тасдиқланадиган тартибда ҳисоблаб чиқарилади.

1. Ўзбекистон Республикасининг Бандликка кўмаклашиш давлат жамғармаси (кейинги ўринларда Бандлик жамғармаси деб аталади) бандлик ва меҳнатни муҳофаза қилиш соҳасидаги давлат сиёсатини амалга ошириш, шунингдек туман (шаҳар) бандликка кўмаклашиш марказларининг самарали фаолият кўрсатиши тадбирларини молиялаштириш учун ташкил этилган.

2. Бандлик жамғармаси мақсадли давлат жамғармаси ҳисобланади, юридик шахс ташкил этмасдан республика ва маҳаллий даражаларда ташкил этилади.

Бандлик жамғармасининг маблағлари унинг мустақил балансида акс эттирилади.

3. Республика ва маҳаллий даражада ташкил этилган Бандлик жамғармаси маблағлари Ўзбекистон Республикаси Молия вазирлигининг Ғазначилиги, Ғазначиликнинг Қорақалпоғистон Республикаси, вилоятлар ва Тошкент шаҳар бошқармалари томонидан очиладиган уларнинг шахсий ҳисоб рақамларида (кейинги ўринларда Бандлик жамғармасининг ғазначилик ҳисоб рақамлари деб аталади) жамланади.

4. Қуйидагилар Бандлик жамғармаси маблағларини шакллантириш манбалари ҳисобланади:

қонун ҳужжатларида белгиланган тартибда амалга ошириладиган ягона ижтимоий тўлов ажратмалари;

қонун ҳужжатларида назарда тутилган талаблар бузилганлиги учун давлат меҳнат ҳуқуқи инспекторлари ва давлат меҳнат муҳофазаси техник инспекторлари, шунингдек меҳнат шароитлари бўйича давлат экспертизасининг мансабдор шахслари томонидан белгиланган тартибда солинадиган маъмурий жазолар суммалари;

Ўзбекистон Республикаси Меҳнат вазирлиги тасарруфидаги давлат унитар корхоналарида Ўзбекистон Республикаси Давлат бюджетига ва давлат мақсадли жамғармаларига барча солиқлар ва бошқа мажбурий тўловлар тўлангандан сўнг қоладиган соф фойданинг муассис томонидан белгиланадиган миқдордаги қисми;

қонун ҳужжатларида белгиланган тартибда меҳнат дафтарчаларини сотишдан тушадиган даромадлар;

Бандлик жамғармасининг бўш турган маблағларини тижорат банкларида ва бошқа молиявий ташкилотларда жойлаштиришдан олинадиган даромадлар;

жисмоний ва юридик шахсларнинг ҳомийлик эҳсонлари;

қонун ҳужжатларига мувофиқ бошқа тушумлар.

5. Бандлик жамғармаси маблағларини тегишли равишда Ўзбекистон Республикаси Меҳнат вазирлиги, Қорақалпоғистон Республикаси Меҳнат вазирлиги, вилоятлар ва Тошкент шаҳар меҳнат бош бошқармалари тасарруф этадилар.

6. Қуйидагилар Бандлик жамғармасининг асосий вазифалари ҳисобланади:

меҳнат бозорини барқарор ва мувозанатли ривожлантиришни таъминлаш, аҳоли бандлиги даражасини ошириш ва меҳнат ресурсларидан оқилона фойдаланишга мақсадли йўналтирилган комплекс чора-тадбирларни амалга оширишни молиявий таъминлаш;

ишсизларни, касб-ҳунар коллежлари, академик лицейлар, олий таълим муассасаларининг битирувчиларини, шунингдек иш қидиришда қийинчиликларга дуч келаётган ва меҳнат бозорида тенг шароитларда рақобатлаша олмайдиган шахсларни ишга жойлаштириш ва моддий қўллаб-қувватлаш бўйича қонун ҳужжатларида белгиланган кафолатларни амалга ошириш;

ишсизларга ва банд бўлмаган аҳолига, биринчи навбатда, ёшлар, аёллар ва ногиронларга касб-ҳунарга қайта тайёрлаш ва ишга жойлаштириш бўйича сифатли хизматлар кўрсатилишини ташкиллаштиришга доир харажатларни молиялаштириш.

7. Бандлик жамғармаси маблағларидан қуйидагилар учун фойдаланилади:

туман (шаҳар) бандликка кўмаклашиш марказларида (кейинги ўринларда бандликка кўмаклашиш марказлари деб аталади) иш қидирувчи ва ишсиз мақомига эга сифатида рўйхатга олинган шахсларни касбга тайёрлаш, қайта тайёрлаш ва уларнинг малакасини ошириш ишларини маблағ билан таъминлаш;

ишсизлик бўйича нафақалар, бандликка кўмаклашиш марказларининг таклифига биноан ишлаш учун бошқа жойга ихтиёрий равишда кўчиб ўтиш муносабати билан компенсациялар тўлаш, ишсизларга моддий ёрдам бериш, шунингдек қонун ҳужжатларига мувофиқ касбга тайёрлаш, қайта тайёрлаш ва малака ошириш даврида бандликка кўмаклашиш марказлари томонидан бериладиган стипендияларни тўлаш;

ишсизларга муддатидан олдин пенсия тайинланганлиги сабабли Ўзбекистон Республикаси Молия вазирлиги ҳузуридаги бюджетдан ташқари Пенсия жамғармаси харажатларини қоплаш;

бандликка кўмаклашиш марказларининг айрим бўлинмалари, вақтинчалик бир марталик иш билан таъминлаш марказлари, банд бўлмаган аҳолини касб-ҳунарга ўқитиш минтақавий марказлари, ишсизларни касб-ҳунарга тайёрлаш, қайта тайёрлаш ва уларнинг малакасини ошириш ўқув марказларини қонунчиликка мувофиқ сақлаш ва моддий-техник таъминлаш, шунингдек меҳнат органларини жойлаштириш учун бинолар, хоналар қуриш ва уларни реконструкция қилиш, мукаммал таъмирлаш ишларини маблағ билан таъминлаш;

ҳақ тўланадиган жамоат ишларини қонун ҳужжатларида белгиланган тартибда маблағ билан таъминлаш;

ногиронлар ва фуқароларнинг ижтимоий ҳимояга муҳтож бўлган бошқа тоифалари меҳнатидан фойдаланиш учун ихтисослаштирилган иш ўринлари ташкил этиш тадбирларини маблағ билан қисман таъминлаш;

ахборот-маълумотномалар чиқариш ва реклама-ноширлик ишларини амалга ошириш;

иш билан таъминлаш, меҳнатни муҳофаза қилиш, меҳнат муносабатларини тартибга солиш, меҳнатни нормалаш ва унга ҳақ тўлаш масалалари бўйича норматив-услубий ва йўриқнома материаллар ишлаб чиқишни маблағ билан таъминлаш;

белгиланган тартибда республика даражасида ва ҳудудий даражада ижтимоий кузатувларни ташкил этиш ва ўтказиш, иш билан таъминлаш масалалари бўйича аҳолининг айрим гуруҳлари ўртасида анкета сўровлари ўтказиш;

иш билан банд бўлмаган аҳолига ёрдам кўрсатиш, шу жумладан маслаҳатлар бериш ва касбга йўналтиришни ташкиллаштириш билан боғлиқ харажатларни қоплаш;

аҳолини иш билан таъминлаш мақсадли ҳудудий дастурларини ишлаб чиқишни ҳамда меҳнат бозорида вазият мураккаб бўлган туман ва шаҳарларда иш ўринлари ташкил этишни, шу жумладан алоҳида ҳудудларни ижтимоий-иқтисодий ривожлантириш концепцияларини тайёрлашни, хизматлар кўрсатиш, саноат ва қишлоқ хўжалиги соҳаларида объектлар ташкил этиш учун муҳандислик-коммуникация тармоқларини лойиҳалаштиришни ва архитектура-режалаштириш топшириқларини ишлаб чиқишни маблағ билан таъминлаш;

бандлик ва меҳнат муҳофазасига тааллуқли масалалар бўйича жалб этиладиган юридик ва жисмоний шахслар, шу жумладан хорижий юридик ва жисмоний шахслар билан шартномаларни амалга оширишни молиялаштириш;

аҳоли бандлигини таъминлаш ва ишга жойлаштириш, бўш иш ўринлари ва банд бўлмаган аҳолининг ҳисобини юритиш соҳаларида ахборот-компьютер тизимлари ва технологияларини яратиш, ривожлантириш ва техник жиҳатдан қўллаб-қувватлаш, шу жумладан уларга оид дастурий маҳсулотлар ишлаб чиқиш ва техника воситалари сотиб олиш;

меҳнат органларининг моддий-техника базасини ривожлантиришга йўналтирилган чора-тадбирларни молиялаштириш;

аҳоли бандлиги соҳасида халқаро ҳамкорликни молиялаштириш;

Ўзбекистон Республикасининг чет элларга ишга юборилган фуқароларини ишга жойлаштиришни ташкил этиш ва уларнинг ижтимоий ҳимоясини таъминлаш масалалари бўйича халқаро лойиҳа ва шартномаларни амалга ошириш билан боғлиқ харажатларни молиялаштириш;

Бандлик жамғармасининг ғазначиликдаги шахсий ҳисоб рақамига тушадиган маблағларнинг 5 фоизини йўналтириш орқали меҳнат органлари ходимларини моддий рағбатлантириш ва моддий-техник базани мустаҳкамлаш жамғармасини шакллантириш;

қонун ҳужжатларида тақиқланмаган бошқа чора-тадбирларни молиялаштириш.

8. Ўзбекистон Республикаси Меҳнат вазирлиги, Қорақалпоғистон Республикаси Меҳнат вазирлиги, вилоятлар ва Тошкент шаҳар меҳнат бош бошқармалари ўзларига юкланган вазифа ва функцияларни бажариш учун қуйидагиларни амалга оширадилар:

Бандлик жамғармасининг ғазначиликдаги шахсий рақамида ягона ижтимоий тўловдан ажратмаларни жамлаш;

ишсизларга ишсизлик нафақаларини, компенсацияларни, стипендияларни, моддий ёрдамни ва қонун ҳужжатларида назарда тутилган бошқа тўловларни ўз вақтида тайинлаш, молиялаштириш ва тўлаш;

Бандлик жамғармасининг молиявий аҳволини таҳлил қилиш ва прогнозлаш ҳамда унинг молиявий барқарорлигини таъминлаш учун олдини олувчи чора-тадбирларни ишлаб чиқиш;

ягона ижтимоий тўловдан ажратмалар миқдорларини белгилаш тўғрисида таклифлар тайёрлаш;

келгуси давр учун бюджет буюртмасини ишлаб чиқиш ва Ўзбекистон Республикаси Молия вазирлигига тақдим этиш;

ўз ваколатлари доирасида Бандлик жамғармасининг самарали фаолияти учун зарур бўлган норматив-ҳуқуқий ҳужжатларни ўз ваколатлари доирасида ишлаб чиқиш;

Бандлик жамғармасининг даромадлари манбалари ва улардан фойдаланиш йўналишларининг келгуси йил учун прогнози лойиҳасини ишлаб чиқиш ва Ўзбекистон Республикаси Молия вазирлигига тақдим этиш;

Бандлик жамғармаси бюджетининг ижроси бўйича ҳисоботларни, шунингдек йилига бир марта — Бандлик жамғармаси даромадлари ва унинг маблағларидан фойдаланишнинг аҳволи тўғрисидаги мустақил аудиторлик текшируви натижаларини тайёрлаш ва Ўзбекистон Республикаси Молия вазирлигига ҳамда Ўзбекистон Республикаси Вазирлар Маҳкамасига тақдим этиш;

Бандлик жамғармасининг тўловлар субъектлари ва молиялаштириш объектлари бўйича тўлиқ ҳисоби ва электрон маълумотлар базаси юритилишини таъминлаш.

Ўзбекистон Республикаси Меҳнат вазирлиги Бандлик жамғармаси ваколатига тааллуқли масалалар бўйича халқаро ташкилотлар ва хорижий давлатларнинг ваколатли органлари билан белгиланган тартибда ҳамкорлик қилади.

9. Бандлик жамғармасининг ягона ижтимоий тўлов ва бошқа манбалар ҳисобига шакллантириладиган маблағларининг етмиш фоизи Қорақалпоғистон Республикаси Меҳнат вазирлиги, вилоятлар ва Тошкент шаҳар меҳнат бош бошқармалари тасарруфида қолади ҳамда улар келгусида бандликка кўмаклашиш марказлари ўртасида қайта тақсимланади, ўттиз фоизи эса — Қорақалпоғистон Республикаси Меҳнат вазирлиги, тегишли ҳудудий меҳнат бош бошқармалари томонидан тўлов ҳужжати орқали ўтказилиб, марказлашган ҳолда республика даражасида жамланади.

10. Жойларда ташкил этилган Бандлик жамғармасининг етишмаган маблағлари Бандлик жамғармаси маблағларининг республика қисми ҳисобига қопланади.

Зарурат бўлганда, ҳисобот даврининг якунига кўра, жойларда ташкил этилган Бандлик жамғармасининг ғазначилик шахсий ҳисоб рақамидаги қолган маблағлари Ўзбекистон Республикаси Меҳнат вазирлигининг қарорига биноан унинг республика қисмига, кейинчалик қайта тақсимлаш учун, йўналтирилиши мумкин.

Йил бошида Бандлик жамғармасининг бўш турган маблағлари, қонун ҳужжатларига мувофиқ, Ўзбекистон Республикаси Давлат бюджетининг дефицитини қоплашга йўналтирилиши мумкин.

11. Бандлик жамғармаси маблағларидан қонун ҳужжатларида назарда тутилмаган мақсадларда фойдаланишга йўл қўйилмайди.

12. Ўзбекистон Республикаси Меҳнат вазирлиги қонун ҳужжатларида белгиланган тартибда ва муддатларда ҳар йили, лекин жорий йилнинг биринчи июлидан кечикмай келгуси йил учун Бандлик жамғармаси даромадларининг тушиш манбалари ва унинг маблағларидан фойдаланиш йўналишлари бўйича прогнозни (кейинги ўринларда Бандлик жамғармаси бюджети лойиҳаси деб аталади) Ўзбекистон Республикаси Молия вазирлигига кўриб чиқиш учун тақдим этади, ушбу прогноз:

ҳудудлар бўйича Жамғармага тушум манбалари бўйича ўтган йилда ҳақиқатда тушган маблағлар ва жорий йилнинг биринчи ярим йилида кутилаётган даромадлар ижросини;

Бандлик жамғармасига қонун ҳужжатларида белгиланган тўловлар бўйича молиявий ҳисобот йили охиридаги ташкилотларнинг (иш берувчиларнинг) ҳудудлар бўйича кредиторлик қарзларини;

кўриб чиқилаётган давр учун тасдиқланган прогнозларнинг бажарилишидан келиб чиқиб, фойдаланиш йўналишлари ва ҳудудлар бўйича, ўтган йилда Бандлик жамғармаси маблағларидан амалга оширилган харажатларнинг якуний кўрсаткичлари ва харажатлар қисмининг жорий йилнинг биринчи қисмида кутилаётган ижросини;

ўтган йилги ходимлар сони ва иш ҳақининг ўсиш суръатларини эътиборга олиб, ҳисобланган иш ҳақи фонди прогнозини ҳисобга олган ҳолда ишлаб чиқилади.

13. Ўзбекистон Республикаси Молия вазирлиги тақдим этилган Бандлик жамғармаси бюджети лойиҳасини кўриб чиқишда Бандлик жамғармасига келгуси йил учун ягона ижтимоий тўловдан ажратмалар ставкаларининг прогноз қилинадиган ўзгаришини ва макроиқтисодий кўрсаткичлар таъсирини ҳисобга олади.

14. Бандлик жамғармасининг кўриб чиқилган ва келишилган бюджети лойиҳаси келгуси йил учун Ўзбекистон Республикасининг Давлат бюджети лойиҳаси билан бирга Бюджетнома таркибида Ўзбекистон Республикаси Вазирлар Маҳкамасига киритилади.

15. Келгуси йил учун Ўзбекистон Республикаси Давлат бюджетининг асосий параметрлари, давлат мақсадли жамғармаларининг бюджетлари қонун ҳужжатларида белгиланган тартибда тасдиқлангандан сўнг Ўзбекистон Республикаси Молия вазирлиги Бандлик жамғармаси бюджетининг асосий параметрларини ўн иш куни мобайнида Ўзбекистон Республикаси Меҳнат вазирлигига етказади.

16. Ўзбекистон Республикаси Меҳнат вазирлиги Бандлик жамғармаси бюджетининг асосий параметрлари Ўзбекистон Республикаси Молия вазирлигидан олинган кундан бошлаб бир ҳафта муддатда Қорақалпоғистон Республикаси Меҳнат вазирлиги, вилоятлар ва Тошкент шаҳар меҳнат бош бошқармалари, бандликка кўмаклашиш марказлари учун, келгусида уларнинг иш якунларини кўриб чиққан ҳолда, Жамғарма тушумлари манбалари бўйича даромадларининг ва унинг маблағларидан фойдаланиш йўналишлари бўйича харажатларининг келгуси йилги асосий параметрларини чоракларга бўлган ҳолда Ўзбекистон Республикаси Меҳнат вазирлиги ҳайъат мажлисида тасдиқлайди.

17. Ўзбекистон Республикаси Меҳнат вазирлиги, Қорақалпоғистон Республикаси Меҳнат вазирлиги, вилоятлар ва Тошкент шаҳри меҳнат бош бошқармалари, бандликка кўмаклашиш марказлари Бандлик жамғармаси бюджетининг тасдиқланган кўрсаткичларини бажариш учун Бандлик жамғармаси даромадлари ва харажатларининг тасдиқланган прогноз кўрсаткичлари бажарилишини таъминлайдилар.

18. Қуйидагилар Бандлик жамғармасининг ижро этувчи органлари ҳисобланади:

республика даражасида — Ўзбекистон Республикаси Меҳнат вазирлигининг Бандликка кўмаклашиш жамғармаси маблағларидан самарали ва мақсадли фойдаланиш бўлими;

ҳудудий даражада — Қорақалпоғистон Республикаси Меҳнат вазирлиги, вилоятлар ва Тошкент шаҳри меҳнат бош бошқармаларининг Бандликка кўмаклашиш жамғармаси маблағларидан самарали ва мақсадли фойдаланиш ҳамда бандликка кўмаклашиш марказлари фаолиятини мувофиқлаштириш шуъбаси.

19. Ижро этувчи орган:

Бандлик жамғармасининг даромадлари ва харажатлари прогнозини ва ҳисобот балансларини шакллантиради;

Бандлик жамғармасининг даромадлари ва харажатларининг бажарилиши ҳисобини ва ҳисоботини юритади, Бандлик жамғармаси маблағларини тасарруф этувчи томонидан тасдиқлагандан сўнг тегишли молия органларига юборади;

Бандлик жамғармаси молиявий ҳисоботларининг ҳаққонийлигини таъминлайди;

Бандлик жамғармаси маблағларидан мақсадли фойдаланиш бўйича аудитни ташкил қилади;

Бандлик жамғармаси маблағларидан мақсадли ва самарали фойдаланиш масалалари бўйича тушунтиришлар беради.

20. Ўзбекистон Республикаси Меҳнат вазирлиги, Қорақалпоғистон Республикаси Меҳнат вазирлиги, вилоятлар ва Тошкент шаҳар меҳнат бош бошқармалари, бандликка кўмаклашиш марказлари Бандлик жамғармаси маблағларидан қатъиян мақсадли ва самарали фойдаланилиши юзасидан жавоб берадилар.

21. Ишсизларга ишсизлик нафақаларининг, компенсациялар, стипендиялар, моддий ёрдам ва қонун ҳужжатларида белгиланган бошқа тўловларнинг тўғри ҳисобланиши ва тўланишини назорат қилиш Ўзбекистон Республикаси Меҳнат вазирлиги ҳамда ҳудудий меҳнат органлари томонидан амалга оширилади.

22. Бандлик жамғармаси маблағларидан фойдаланилиши юзасидан назорат Ўзбекистон Республикаси Меҳнат вазирлиги ва Молия вазирлиги томонидан амалга оширилади.

1. Вазирлар Маҳкамасининг «Ўзбекистон Республикаси Иш билан таъминлашга кўмаклашувчи давлат жамғармаси маблағларини шакллантириш ва улардан фойдаланиш тартиби тўғрисидаги низомни тасдиқлаш ҳақида» 2003 йил 2 апрелдаги 173-сон қарорининг 1 ва 3-бандлари (Ўзбекистон Республикаси ҚТ, 2003 й., 4-сон, 28-модда), шунингдек қарорга 1-илова.

2. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартиришлар киритиш тўғрисида» 2004 йил 17 январдаги 28-сон қарорига илованинг 34-банди (Ўзбекистон Республикаси ҚТ, 2004 й., 1-сон, 5-модда).

3. Вазирлар Маҳкамасининг «Ўзбекистон Республикаси Ҳукуматининг айрим қарорларига қўшимчалар киритиш тўғрисида (Ўзбекистон Республикаси Президентининг «Ўзбекистон Республикасининг Тикланиш ва тараққиёт жамғармасини ташкил этиш тўғрисида» 2006 йил 11 майдаги ПФ-3751-сон Фармони) 2006 йил 27 июлдаги 149-сон қарорига илованинг 2-банди (Ўзбекистон Республикаси ҚТ, 2006 й., 7-сон, 56-модда).

4. Вазирлар Маҳкамасининг «Ўзбекистон Республикаси Президентининг «Аҳоли бандлигини ошириш ҳамда меҳнат ва аҳолини ижтимоий муҳофаза қилиш органлари фаолиятини такомиллаштириш чора-тадбирлари тўғрисида» 2007 йил 6 апрелдаги ПҚ-616-сон қарорини амалга ошириш чора-тадбирлари ҳақида» 2007 йил 8 майдаги 95-сон қарори 3-бандининг иккинчи хатбоши (Ўзбекистон Республикаси ҚТ, 2007 й., 5-сон, 25-модда), шунингдек қарорга 2-илованинг 11-банди.

5. Вазирлар Маҳкамасининг «Ўзбекистон Республикаси Президентининг «Ўзбекистон Республикаси Меҳнат ва аҳолини ижтимоий муҳофаза қилиш вазирлиги тузилмасини такомиллаштириш чоралари тўғрисида» 2009 йил 30 декабрдаги ПҚ-1251-сон қарорини амалга ошириш чора-тадбирлари ҳақида» 2010 йил 2 февралдаги 10-сон қарори (Ўзбекистон Республикаси ҚТ, 2010 й., 2-сон, 3-модда).

6. Вазирлар Маҳкамасининг «Ўзбекистон Республикаси Ҳукуматининг айрим қарорларига қўшимча ва ўзгартиришлар киритиш, шунингдек баъзиларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Фуқароларнинг пенсия таъминоти тизимини янада такомиллаштириш чора-тадбирлари тўғрисида» 2009 йил 30 декабрдаги ПФ-4161-сон Фармони, Ўзбекистон Республикаси Президентининг «Ўзбекистон Республикаси Меҳнат ва аҳолини ижтимоий муҳофаза қилиш вазирлиги тузилмасини такомиллаштириш чора-тадбирлари тўғрисида» 2009 йил 30 декабрдаги ПҚ-1251-сон ҳамда «Ўзбекистон Республикаси Молия вазирлиги ҳузуридаги бюджетдан ташқари Пенсия жамғармасининг ташкилий тузилмасини шакллантириш чора-тадбирлари тўғрисида» 2009 йил 30 декабрдаги ПҚ-1252-сон қарорлари) 2010 йил 24 мартдаги 52-сон қарорига 1-илованинг 28 ва 35-бандлари (Ўзбекистон Республикаси ҚТ, 2010 й., 3-сон, 12-модда).

7. Вазирлар Маҳкамасининг «Ўзбекистон Республикаси Ҳукуматининг вазирликлар, давлат қўмиталари ва идоралар тўғрисидаги низомларни тасдиқлаш бўйича айрим қарорларига ўзгартириш ва қўшимчалар киритиш тўғрисида» 2010 йил 5 июндаги 108-сон қарорига илованинг 58-банди (Ўзбекистон Республикаси ҚТ, 2010 й., 6-сон, 27-модда).