O‘zbekiston Respublikasi Prezidentining “Respublikada pillachilik sohasini boshqarish tizimini takomillashtirish to‘g‘risida” 1998-yil 30-martdagi PF-1982-son Farmoniga muvofiq Vazirlar Mahkamasi qaror qiladi:

1. Quyidagilar asosiy vazifalar etib belgilansin:

a) “Pilla-xolding” xolding kompaniyasi bo‘yicha:

pillachilik korxonalari va tashkilotlarining tut ipak qurtining mahsuldor turlarini hamda duragaylarini yaratish va joriy etish, sifatli ipak qurt urug‘i yetishtirish bo‘yicha faoliyatini muvofiqlashtirish;

sifatli pilla yetishtirilishini va tayyorlanishini, raqobatbardoshli pilla xomashyosi va ipak kalava olish uchun ularni dastlabki qayta ishlashni tashkil etish;

qishloq xo‘jaligi korxonalarini va dehqon xo‘jaliklarini tut qatorlari va maydonlarini saqlab qolganlik va kengaytirganlik uchun rag‘batlantirish;

quruq pillani, pilla xomashyosi va ipak kalavani tovar mahsulot sifatida shartnoma asosida iste’molchilarga “Shoyi” aksiyadorlik kompaniyasining shoyi to‘qish fabrikalariga hamda eksportga sotishda korxonalarga ko‘maklashish;

pillakashlik va ipak kalava ishlab chiqarishlarining ilg‘or texnologiyalarini joriy etish sohasida yagona texnika va investitsiya siyosatini o‘tkazish;

b) “Shoyi” aksiyadorlik kompaniyasi bo‘yicha:

shoyi to‘qish korxonalarining yuqori sifatli sof va aralash shoyi gazlamalar ishlab chiqarish bo‘yicha faoliyatini muvofiqlashtirish;

shoyi to‘qishning zamonaviy texnologiyalarini joriy etish, ishlab chiqarilayotgan mahsulot turlarini yangilash va kengaytirish bo‘yicha korxonalarga ko‘maklashish;

shoyi to‘qish ishlab chiqarishi tayyor mahsulotini sotish bozorlarini kengaytirish, eksport qilish hajmlarini ko‘paytirish bo‘yicha marketing tadqiqotlari o‘tkazish;

korxonalar aksiyalarini, shu jumladan xorijiy investorlarga erkin sotish, xorijiy sarmoyalar ishtirokidagi qo‘shma korxonalar tashkil etish yo‘li bilan shoyi to‘qish tarmog‘ida investitsiyalar o‘sishini ta’minlash.

2. Quyidagilar:

“Pilla-xolding” xolding kompaniyasi tarkibiga kiruvchi korxonalar va tashkilotlar ro‘yxati, xolding kompaniyaning boshqaruv apparati tuzilmasi, uning hududiy aksiyadorlik birlashmalari namunaviy tuzilmasi 1*, 2, 3-ilovalarga muvofiq;

“Shoyi” aksiyadorlik kompaniyasi tarkibiga kiruvchi korxonalar va tashkilotlar ro‘yxati va uning boshqaruv apparati tuzilmasi 4* va 5-ilovalarga muvofiq;

“O‘zbek ipagi” uyushmasining tashkiliy tuzilmasi va boshqaruv apparati tuzilmasi 6 va 7-ilovalarga muvofiq tasdiqlansin.

3. “O‘zbek ipagi” uyushmasi rahbarlari, “Pilla-xolding” xolding kompaniyasi raisi va “Shoyi” aksiyadorlik kompaniyasi raisi (ular lavozimiga ko‘ra “O‘zbek ipagi” uyushmasi raisining o‘rinbosarlari hisoblanadilar) muassislarning umumiy yig‘ilishida saylanadilar hamda O‘zbekiston Respublikasi Vazirlar Mahkamasi qarori bilan lavozimga tasdiqlanadilar.

Maqomi, maishiy ta’minoti, tibbiy va transport xizmati ko‘rsatish sharoitlariga ko‘ra uyushma raisi O‘zbekiston Respublikasi vaziriga, uning birinchi o‘rinbosari — vazirning birinchi o‘rinbosariga, rais o‘rinbosarlari — vazir o‘rinbosarlariga tenglashtirilsin.

4. O‘zbekiston Respublikasi Davlat mulki qo‘mitasi bir oy muddatda:

“O‘zbek ipagi” uyushmasi, “Pilla-xolding” xolding kompaniyasi va “Shoyi” aksiyadorlik kompaniyasi bilan birgalikda yangidan xususiylashtiriladigan ipakchilik korxonalari mol-mulkini baholasin va ilgari davlat tasarrufidan chiqarilgan korxonalar mol-mulkini qayta baholasin;

O‘zbekiston Respublikasi Prezidentining 1997-yil 31-martdagi PF-1740-son va O‘zbekiston Respublikasi Prezidentining “Fond bozorini yanada rivojlantirish hamda davlat mulki negizida tashkil etilgan aksiyadorlik jamiyatlarini qo‘llab-quvvatlash chora-tadbirlari to‘g‘risida” 1998-yil 4-martdagi PF-1939-son Farmoniga muvofiq ipakchilik sohasi korxonalarini xususiylashtirish, yangi tashkil etilayotgan aksiyadorlik jamiyatlari aksiyalari to‘rt paketini taqsimlash hamda mavjud aksiyadorlik jamiyatlari aksiyalarini qayta taqsimlash bo‘yicha O‘zbekiston Respublikasi Vazirlar Mahkamasiga takliflar kiritsin. Bunda erkin sotishga mo‘ljallangan aksiyalarning muayyan qismi qishloq xo‘jaligi korxonalariga hamda pilla yetishtiruvchi jismoniy shaxslarga sotilishini nazarda tutsin;

O‘zbekiston Respublikasi Adliya vazirligi, “O‘zbek ipagi” uyushmasi, “Pilla-xolding” va “Shoyi” kompaniyalari, Namangan, Farg‘ona va Xorazm viloyatlari hokimliklari bilan birgalikda “Atlas” (Namangan shahri), “Marg‘ilon ipagi” (Marg‘ilon shahri) va “Xorazm ipagi” (Urganch shahri) aksiyadorlik jamiyatlarida pillakashlik, ipak kalava ishlab chiqarishlari va shoyi to‘qish fabrikalarini ajratsin va ularni belgilangan tartibda mustaqil aksiyadorlik jamiyatlari sifatida ro‘yxatdan o‘tkazsin.

5. Belgilab qo‘yilsinki:

“O‘zbek ipagi” uyushmasi O‘zbekiston Respublikasi Davlat mulki qo‘mitasi, “Pilla-xolding” xolding kompaniyasi va “Shoyi” aksiyadorlik kompaniyasi tomonidan ta’sis etiladi. Uyushma ustav jamg‘armasi O‘zbekiston Respublikasi Qishloq va suv xo‘jaligi vazirligi huzuridagi tugatilayotgan “Pilla” uyushmasining mol-mulki va “Shoyi” aksiyadorlik kompaniyasi, “Pilla-xolding” xolding kompaniyasi va uyushma boshqa qatnashchilarining ta’sis badallari hisobiga shakllantiriladi;

“Pilla-xolding” xolding kompaniyasi va “Shoyi” aksiyadorlik kompaniyasi ochiq turdagi aksiyadorlik jamiyati shaklida ta’sis etiladi;

“Shoyi” aksiyadorlik kompaniyasining ustav jamg‘armasi unga aksiyadorlik jamiyatlari (shoyi to‘qish korxonalari) aksiyalarining davlat paketlarini trast boshqaruvga berish hamda kompaniya boshqa qatnashchilarining ta’sis badallari hisobiga shakllantiriladi;

“Pilla-xolding” xolding kompaniyasining ustav jamg‘armasi unga “Pilla” hududiy aksiyadorlik birlashmalari aksiyalarining nazorat paketlarini trast boshqaruvga berish hamda xolding kompaniyasi boshqa qatnashchilarining ta’sis badallari hisobiga shakllantiriladi;

“Shoyi” aksiyadorlik kompaniyasi, “Pilla-xolding” xolding kompaniyasi hamda “Pilla” hududiy aksiyadorlik birlashmalari ular tarkibiga kiruvchi davlat korxonalarini va aksiyadorlik jamiyatlari bo‘lgan korxonalarni ushbu korxonalarning ularning trast boshqaruviga berilgan aksiyalari paketlariga muvofiq boshqaradilar.

6. Belgilansinki:

“Pilla-xolding” xolding kompaniyasi va “Shoyi” aksiyadorlik kompaniyasi o‘z aksiyalarini erkin, shu jumladan xorijiy investorlarga, kompaniyalar tarkibiga kiruvchi aksiyadorlik jamiyatlari aksiyalarining sotilmagan va kompaniyalarga berilgan ulushlari hamda uyushgan a’zolarning ta’sis badallari miqdorida sotadilar;

Pilla-xolding xolding kompaniyasi va “Shoyi” aksiyadorlik kompaniyasi aksiyalarini sotishdan olingan mablag‘lar 1999-yil 1-yanvargacha bo‘lgan davrda kompaniyalar ixtiyorida qoldiriladi va kompaniyalar korxonalari va tashkilotlarini renovatsiya qilish hamda ular mahsulotini yangilash uchun foydalaniladi;

kompaniyalarning trast boshqaruviga berilgan, tegishli kompaniyalar tarkibiga kiruvchi aksiyadorlik jamiyatlari ustav jamg‘armasining 25 foizi miqdoridagi aksiyalar davlat paketlari daxlsiz hisoblanadi va O‘zbekiston Respublikasi Vazirlar Mahkamasining tegishli qarorisiz xususiy mulk qilib sotilmaydi;

“Pilla-xolding” xolding kompaniyasi va “Pilla” hududiy aksiyadorlik birlashmalari shu’ba korxonalar bo‘yicha yig‘ma balanslar tuzadilar.

Aylanma mablag‘larni to‘ldirish va investitsiya loyihalarini amalga oshirish maqsadida “Pilla-xolding” xolding kompaniyasi va “Pilla” hududiy aksiyadorlik birlashmalari shu’ba korxonalarning budjet va boshqa kreditorlar oldidagi majburiyatlardan bo‘sh moliyaviy mablag‘larini shartnoma asosida qayta taqsimlash huquqiga egadirlar.

“O‘zbek ipagi” uyushmasi, “Pilla-xolding” xolding kompaniyasi va uning hududiy aksiyadorlik birlashmalari, “Shoyi” aksiyadorlik kompaniyasi xo‘jalik faoliyatini, shu jumladan ularning boshqaruv apparatlari xarajatlarini mablag‘ bilan ta’minlash ularning o‘z xo‘jalik faoliyati, xizmatlar ko‘rsatish, shuningdek amaldagi qonun hujjatlariga zid bo‘lmagan boshqa daromadlar hisobiga amalga oshiriladi;

“O‘zbek ipagi” uyushmasi O‘zbekiston Respublikasi Qishloq va suv xo‘jaligi vazirligi huzuridagi tugatilayotgan “Pilla” uyushmasi tomonidan tuzilgan shartnomalar va majburiyatlar bo‘yicha huquqiy voris hisoblanadi, “Pilla” hududiy aksiyadorlik birlashmalari esa tugatilayotgan Qoraqalpog‘iston respublika “Pilla” uyushmasi, Pillachilar shirkatlarining hududiy muvofiqlashtiruvchi kengashlari hamda “Andijon ipagi”, “Xon atlas” va “Kumush tola” aksiyadorlik kompaniyalarining huquqiy vorisi hisoblanadilar, ularning shoyi to‘qish korxonalarining shartnomalari va majburiyatlari bundan mustasno;

7. “O‘zbek ipagi” uyushmasi korxonalarini rekonstruksiya qilish va rivojlantirish jamg‘armasi tashkil etilsin, unga:

tut ipak qurt urug‘i yetishtirishning yuqori samarali texnologiyalarini o‘rganish va joriy etish;

ipak urug‘i qurti yetishtirish, pilla xomashyosi, ipak kalava hamda sof va aralash shoyi gazlamalar ishlab chiqarish korxonalarini rekonstruksiya qilish va texnika bilan qayta jihozlash;

ishlab chiqarish, qayta ishlash va mahsulotlarni ichki iste’molchilarga hamda eksportga sotish jarayonida ipakchilik barcha qatnashchilarining teng iqtisodiy manfaatdorligini ta’minlovchi tarmoq infratuzilmasini yaratish tadbirlarini mablag‘ bilan ta’minlash yuklansin.

Uyushma tarkibiga kiruvchi aksiyadorlik jamiyatlari aksiyalari davlat paketlaridan olingan dividendlar, shuningdek amaldagi qonun hujjatlariga zid bo‘lmagan boshqa moliyaviy tushumlar “O‘zbek ipagi” uyushmasi korxonalarini rekonstruksiya qilish va rivojlantirish jamg‘armasi mablag‘larini shakllantirish manbalari etib belgilansin.

“O‘zbek ipagi” uyushmasi O‘zbekiston Respublikasi Davlat mulki qo‘mitasi, Moliya vazirligi bilan birgalikda Jamg‘arma mablag‘larini jamlash va ulardan maqsadli foydalanish tartibini bir oy muddatda ishlab chiqsin va tasdiqlasin.

8. “O‘zbek ipagi” uyushmasi O‘zbekiston Respublikasi Davlat mulki qo‘mitasi bilan birgalikda:

bir oy muddatda “O‘zbek ipagi” uyushmasi, “Pilla-xolding” xolding kompaniyasi va “Shoyi” aksiyadorlik kompaniyasi ustavlarini ishlab chiqsin;

ikki oy muddatda ta’sis majlislarini o‘tkazsin, ustavlarni tasdiqlasin, kuzatuvchi kengashlar tashkil etsin va “Pilla-xolding”, “Shoyi” kompaniyalari hamda yangi tashkil etilayotgan aksiyadorlik jamiyatlari ustav jamg‘armalarini shakllantirsin.

9. “O‘zbek ipagi” uyushmasi, O‘zbekiston Respublikasi Makroiqtisodiyot va statistika vazirligi, Moliya vazirligi, Tashqi iqtisodiy aloqalar vazirligi, O‘zbekiston Respublikasi Markaziy banki boshqa manfaatdor vazirliklar va idoralar bilan birgalikda korxonalarni, shu jumladan, xorijiy investitsiyalarni jalb etish va qo‘shma korxonalar tashkil etish hisobiga, texnika bilan qayta jihozlash, modernizatsiya qilish va ularning eksport imkoniyatlarini kengaytirish dasturini ikki oy muddatda ishlab chiqsinlar va Vazirlar Mahkamasiga kiritsinlar.

10. “O‘zbek ipagi” uyushmasi Jizzax viloyati hokimligi, manfaatdor vazirliklar va idoralar bilan birgalikda “Nissyo Ivai Korporeyshn” kompaniyasi (Yaponiya) bilan superelita, elita va sanoat ipak qurt urug‘i yetishtirish bo‘yicha qo‘shma korxona tashkil etish to‘g‘risida bir oy muddatda takliflar tayyorlasin va O‘zbekiston Respublikasi Vazirlar Mahkamasiga kiritsin.

11. Belgilansinki:

“Pilla-xolding” xolding kompaniyasining ipak qurt urug‘i yetishtiruvchi, pilla tayyorlovchi va uni dastlabki qayta ishlovchi korxonalariga qishloq xo‘jaligi korxonalari maqomi tatbiq etiladi;

Qoraqalpog‘iston Respublikasi Vazirlar Kengashi, viloyatlar va tumanlar hokimliklari, “Pilla” hududiy aksiyadorlik birlashmalari va qishloq xo‘jaligi korxonalari rahbarlari tutzorlar va tut qatorlarining saqlab qolinishi va kengaytirilishi uchun javob beradilar.

14. O‘zbekiston Respublikasi Moliya vazirligi, Markaziy banki, Davlat soliq qo‘mitasi, tegishli tijorat banklari, tashkilotlar va korxonalar “O‘zbek ipagi” uyushmasi bilan birgalikda ikki oy muddatda kompaniya xo‘jalik yurituvchi subyektlarining budjetga to‘lovlar, kreditlar va boshqa moliyaviy majburiyatlarga, shuningdek, ular bo‘yicha penyalar va foizlarga oid qarzlarini belgilangan tartibda qayta rasmiylashtirsinlar.

15. “O‘zbek ipagi” uyushmasi, “Pilla-xolding” xolding kompaniyasi va “Shoyi” aksiyadorlik kompaniyasi Toshkent shahar, Amir Temur ko‘chasidagi 62-uyga joylashtirilsin, ushbu bino tasarruf etish huquqisiz foydalanish uchun “O‘zbek ipagi” uyushmasi balansiga berilsin.

16. Mazkur qarorni bajarish bilan bog‘liq bo‘lgan ishlarni muvofiqlashtirish uchun 8-ilovaga* muvofiq tarkibda ishchi komissiya tuzilsin.

17. O‘zbekiston Respublikasi Vazirlar Mahkamasining 1995-yil 3-fevraldagi 28-son va 1996-yil 26-iyuldagi 268-son qarorlari o‘z kuchini yo‘qotgan deb hisoblansin.

18. Mazkur qarorning bajarilishini nazorat qilish Bosh vazir o‘rinbosari M. Usmonov zimmasiga yuklansin.

“Pilla” hududiy aksiyadorlik birlashmalarida boshqaruv apparati xodimlari soni quyidagicha belgilanadi:

a) Andijon, Namangan, Samarqand, Farg‘ona viloyatlarida — 15 shtat birligi;

b) Buxoro, Qashqadaryo, Toshkent, Xorazm viloyatlarida — 12 shtat birligi;

v) Jizzax, Surxondaryo viloyatlarida — 10 shtat birligi;

g) Qoraqalpog‘iston Respublikasi, Navoiy, Sirdaryo viloyatlarida — 8 shtat birligi.