Oʻzbekiston Respublikasi Prezidentining “Energiya samaradorligi sohasida davlat boshqaruvini takomillashtirish va energiya servis kompaniyalari xizmatlari bozorini rivojlantirish chora-tadbirlari toʻgʻrisida” 2025-yil 27-martdagi PF-63-son Farmoni ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Energiya samaradorligi sohasida davlat boshqaruvini takomillashtirish va energiya servis kompaniyalari xizmatlari bozorini rivojlantirish chora-tadbirlari toʻgʻrisida” 2025-yil 27-martdagi PF-63-son Farmoni bilan:

Oʻzbekiston Respublikasi Vazirlar Mahkamasi huzuridagi Energiya samaradorligi milliy agentligi (keyingi oʻrinlarda — Agentlik);

Agentlik huzurida yuridik shaxs tashkil etmagan holda budjetdan tashqari Energiya samaradorligini ragʻbatlantirish va qoʻllab-quvvatlash jamgʻarmasi (keyingi oʻrinlarda — Jamgʻarma) tashkil etilgani maʼlumot uchun qabul qilinsin.

2. Quyidagilar:

a) Oʻzbekiston Respublikasi Vazirlar Mahkamasi huzuridagi Energiya samaradorligi milliy agentligi tashkiliy tuzilmasi 1-ilovaga muvofiq;

b) Quyidagilarni nazarda tutuvchi Oʻzbekiston Respublikasi Vazirlar Mahkamasi huzuridagi Energiya samaradorligi milliy agentligi toʻgʻrisidagi nizom 2-ilovaga muvofiq;

Agentlik faoliyatini tashkil etish asoslari va tartibi;

Agentlikning asosiy vazifalari va funksiyalari;

Agentlik faoliyati samaradorligini baholash tartibi va mezonlari;

Agentlik faoliyatini moliyalashtirish va moddiy-texnik taʼminlash, uning xodimlari mehnatiga haq toʻlash va moddiy ragʻbatlantirish;

v) Quyidagilarni nazarda tutuvchi Oʻzbekiston Respublikasi Vazirlar Mahkamasi huzuridagi Energiya samaradorligi milliy agentligining Energiya samaradorligini ragʻbatlantirish va qoʻllab-quvvatlash jamgʻarmasi toʻgʻrisidagi nizom 3-ilovaga muvofiq tasdiqlansin:

Jamgʻarma faoliyatini tashkil etish tartibi va uning mablagʻlarini shakllantirish manbalari;

Jamgʻarma mablagʻlaridan foydalanish maqsadlari;

Jamgʻarma mablagʻlarini boshqarish va hisobini yuritish tartibi.

3. Oʻzbekiston Respublikasi Iqtisodiyot va moliya vazirligi tomonidan energiya samaradorligi loyihalarini sifatli amalga oshirish uchun dastlabki bosqichda Avstriya hukumati granti hisobidan xalqaro kompaniya — “ILF Consulting Engineers” strategik konsultant sifatida jalb etilgani maʼlumot uchun qabul qilinsin.

4. Agentlik va strategik konsultant oʻrtasida hamkorlik yoʻnalishlari etib quyidagilar belgilansin:

energiya samaradorligini oshirish loyihalari portfelini shakllantirish;

energiya samaradorligini oshirish loyihalarining texnik topshiriqlari va loyiha hujjatlarini tayyorlash, loyihalashtirish, qurilish va qabul qilib olish jarayonlarida muhandislik masalalari boʻyicha hamrohlik qilish;

davlat hamda ijtimoiy soha bino va inshootlarida oʻrnatilgan texnologiya va uskunalarning ekspluatatsiyasini xususiy sektorga oʻtkazish mexanizmlarini ishlab chiqish;

5. Belgilansinki:

Oʻzbekiston Respublikasi Iqtisodiyot va moliya vazirligi tomonidan keyingi bosqichlarda strategik konsultantning xizmatlari halqaro moliya institutlari kreditlari, shu jumladan, Jahon bankining “Energetika islohotlari uchun innovatsion uglerod resurslarini qoʻllash” (iCRAFT) loyihasi doirasida jalb qilingan grantlar, budjet mablagʻlari va qonunchilikda taqiqlanmagan boshqa manbalar hisobidan toʻgʻridan-toʻgʻri shartnomalar asosida moliyalashtiriladi;

Agentlikka energiya samaradorligi loyihalarini amalga oshirish doirasida sohalar kesimida energiya samarador qurilmalarga xizmat koʻrsatuvchi servis kompaniyalarning eng yaxshi takliflarini tanlab olish va jalb qilishga ruxsat beriladi.

5.¹ Hududlarda energiya samaradorligini oshirish va energiya resurslarini tejash, energiya samarador qurilma va uskunalar joriy etilishini jadallashtirish borasida hududiy tashkilotlarning oʻzaro hamkorligini muvofiqlashtirish, shuningdek, energiya samaradorligi loyihalarini shakllantirish boʻyicha Agentlik boshqaruv xodimlari doirasida tashkil etiladigan loyiha ofislari 3 ta xodimdan, shu jumladan, 1 ta loyiha ofisi rahbari va 2 ta bosh mutaxassisdan iborat boʻlim sifatida shakllantiriladi.

Bunda loyiha ofisi rahbari va mutaxassislari ish haqi shartlariga koʻra mos tarzda Agentlikning boʻlim boshligʻi va bosh mutaxassisiga tenglashtiriladi.

6. Oʻzbekiston Respublikasi Iqtisodiyot va moliya vazirligi:

ikki hafta muddatda Agentlik faoliyatini tashkil qilish uchun talab qilinadigan mablagʻlarni 2025-yil uchun Oʻzbekiston Respublikasi Davlat budjetining tasdiqlangan parametrlari doirasida ajratsin hamda Agentlikning 2025-yilga moʻljallangan xarajatlar smetasini tasdiqlasin;

2026-yildan boshlab har yili Oʻzbekiston Respublikasi Davlat budjeti parametrlarini shakllantirishda Agentlik faoliyatini moliyalashtirish uchun zarur mablagʻlarni koʻzda tutsin.

7. Agentlik Oʻzbekiston Respublikasi Iqtisodiyot va moliya vazirligiga tegishli Toshkent shahri, Yunusobod tumani Niyozbek yoʻli koʻchasi 1-uy manzilidagi binoda tekin foydalanish huquqi asosida joylashtirilsin.

8. Ushbu qarorning bajarilishini nazorat qilish va muvofiqlashtirish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.

1. Ushbu Nizom Oʻzbekiston Respublikasi Vazirlar Mahkamasi huzuridagi Energiya samaradorligi milliy agentligining (keyingi oʻrinlarda — Agentlik) maqomi, asosiy vazifalari, funksiyalari, huquqlari va majburiyatlari, faoliyatini tashkil etish tartibi, shuningdek, Agentlik direktori va uning oʻrinbosarlarining asosiy funksional vazifalari va javobgarligini belgilaydi.

2. Agentlik energiya samaradorligi sohasida yagona davlat siyosatini yuritish, sohada ragʻbatlantiruvchi va taʼsir etuvchi choralarni ishlab chiqish va tartibga solish davlat siyosatini amalga oshiruvchi mustaqil respublika ijro etuvchi hokimiyat organi hisoblanadi.

3. Agentlik bevosita Vazirlar Mahkamasiga boʻysunadi va faoliyati yuzasidan hisobot beradi.

Bunda Agentlik faoliyatini muvofiqlashtirish hamda vazirlik va idoralar bilan hamkorligini tashkil qilish vazifasi Vazirlar Mahkamasining Iqtisodiyot, sanoat, moliya-bank, soliq, davlat aktivlari, tadbirkorlikni qoʻllab-quvvatlash va kambagʻallikni qisqartirish masalalari kotibiyatiga yuklanadi.

4. Agentlik oʻz faoliyatida Oʻzbekiston Respublikasining Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, shuningdek, ushbu Nizom va boshqa qonunchilik hujjatlariga amal qiladi.

5. Agentlikning oʻz vakolatlari doirasida qabul qilgan qarorlari respublika va mahalliy ijro etuvchi hokimiyat organlari, boshqa tashkilotlar, mansabdor shaxslar va fuqarolar tomonidan ijro etilishi majburiy hisoblanadi.

6. Agentlik Oʻzbekiston Respublikasi Davlat gerbi tasviri tushirilgan va oʻz nomi yozilgan muhrga va blankalarga, mustaqil balansga, Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasida shaxsiy gʻazna hisobvaraqlariga, shu jumladan, xorijiy valyutadagi shaxsiy gʻazna hisobvaraqlariga ega boʻladi.

7. Agentlikning rasmiy nomi:

a) davlat tilida:

toʻliq nomi — Oʻzbekiston Respublikasi Vazirlar Mahkamasi huzuridagi Energiya samaradorligi milliy agentligi, qisqartirilgan nomi — Energiya samaradorligi milliy agentligi;

b) rus tilida:

toʻliq nomi — Natsionalnoye agentstvo po energoeffektivnosti pri Kabinete Ministrov Respubliki Uzbekistan, qisqartirilgan nomi — Natsionalnoye agentstvo po energoeffektivnosti.

v) ingliz tilida:

toʻliq nomi — National Agency for Energy Efficiency under the Cabinet of Ministers of the Republic of Uzbekistan, qisqartirilgan nomi — National Agency for Energy Effiency.

8. Agentlikning joylashgan joyi (pochta manzili): Toshkent shahri Yunusobod tumani Niyozbek yoʻli koʻchasi 1-uy.

9. Quyidagilar Agentlikning asosiy vazifalari hisoblanadi:

energiya samaradorligini oshirish sohasida yagona davlat siyosatini yuritish, sohada ragʻbatlantiruvchi va taʼsir etuvchi choralar ishlab chiqish va tartibga solish;

energiya tejashdan daromad oluvchi energiya servis kompaniyalari (keyingi oʻrinlarda — ESKO) xizmatlari bozorini rivojlantirish;

energiya samaradorligi yuqori boʻlgan loyihalar portfelini shakllantirish va ularni amalga oshirish uchun xususiy investitsiyalarni jalb qilish;

energiya samaradorligini oshirish sohasida professional kadrlar tayyorlash, qayta tayyorlash va malakasini baholab borishni tashkil qilish;

aholi va tadbirkorlar oʻrtasida energiya resurslaridan oqilona foydalanish va isrof qilmaslikka asoslangan turmush tarzi va feʼl-atvorni shakllantirishga qaratilgan energiya isteʼmoli madaniyatini oshirish axborot kampaniyalarini tashkil etish va moliyalashtirish.

10. Agentlik oʻziga yuklangan asosiy vazifalarga muvofiq quyidagi funksiyalarni amalga oshiradi:

a) energiya samaradorligini oshirish sohasida yagona davlat siyosatini yuritish, sohada ragʻbatlantiruvchi va taʼsir etuvchi choralar ishlab chiqish va tartibga solish sohasida:

energiya servis kompaniyalari xizmatlari bozori mexanizmlariga oʻtishning asosiy bosqichlarini va ularda koʻzda tutilgan muhim shartlar va qoidalarni, shu jumladan, namunaviy shartnomalar loyihalarini nazarda tutuvchi normativ-huquqiy hujjatlar loyihalarini ishlab chiqishda ishtirok etadi;

ESKO xizmatlari bozorini tartibga solishga doir normativ-huquqiy hujjatlar ijrosini muntazam ravishda tahlil qiladi, zaruratga koʻra ularni takomillashtirish boʻyicha takliflar tayyorlaydi;

ESKO xizmatlari bozorining shaffof va raqobatli muhitda ishlashiga qaratilgan normativ-huquqiy hujjatlar loyihalarini ishlab chiqadi;

b) energiya tejashdan daromad oluvchi ESKO xizmatlari bozorini rivojlantirish sohasida:

energiya samaradorligi sohasidagi konsultantlar va menejerlar hamda energiya auditorlarni boshlangʻich va professional toifalarga ajratgan holda ularning yagona reyestrini yuritadi;

iqtisodiyotda energiya auditi, energiya servis xizmatini koʻrsatish, yashil texnologiya vositalarini ishlab chiqarish va xizmat koʻrsatish kabi yangi tadbirkorlik boʻgʻinlarini (segmentlarini) yaratishda ishtirok etadi;

v) energiya samaradorligi salohiyati yuqori boʻlgan loyihalar portfelini shakllantirish va ularni amalga oshirish uchun investitsiyalarni jalb qilish sohasida:

vazirlik va idoralar tomonidan taklif etilayotgan energiya samaradorligini oshirishga qaratilgan dasturlar loyihalarini oʻz vakolatlari doirasida kelishadi;

ESKO xizmatlari bozorini jadal rivojlantirishga qaratilgan uzoq muddatli investitsiya siyosatini shakllantirish va amalga oshirishda ishtirok etadi;

ESKO xizmatlari bozori faoliyatini muntazam monitoring qilib boradi;

ESKO xizmatlari bozorida mahalliy tovarlar va xizmatlar xarid qilinishini ragʻbatlantiruvchi mexanizmlarni joriy qilish yuzasidan takliflar ishlab chiqadi;

ESKO xizmatlari bozorining barcha ishtirokchilari uchun teng huquq va shaffoflikni taʼminlovchi qonun-qoidalarga rioya etilishini monitoring qiladi;

g) energiya samaradorligini oshirish sohasida professional kadrlar tayyorlash, qayta tayyorlash va malakasini baholab borish tizimini yoʻlga qoʻyishni tashkil qilish yoʻnalishida:

mahalliy va xorijiy ekspertlarni jalb qilgan holda energiya auditorlarini sertifikatlash tartibini ishlab chiqadi va tasdiqlaydi;

mahalliy va xalqaro ekspertlarni jalb qilgan holda energiya menejerlari malakasini oshirish va sohada professional kadrlar tayyorlash, qayta tayyorlash va malakasini baholab borish yuzasidan oʻquv kurslari, seminar, konferensiya va forumlar tashkillashtiradi;

d) aholi va tadbirkorlar oʻrtasida energiya resurslaridan oqilona foydalanish va isrof qilmaslikka asoslangan turmush tarzi va feʼl-atvorni shakllantirishga qaratilgan energiya isteʼmoli madaniyatini oshirish axborot kampaniyalarini tashkil etish va moliyalashtirish sohasida:

ommaviy axborot vositalari va ijtimoiy tarmoqlarda axborot kampaniyalari va videoroliklarni tizimli namoyish qilib boradi;

respublika hududlari boʻyicha reja-jadvallar asosida mahallalar va taʼlim tashkilotlarida tashviqot va targʻibot ishlarini amalga oshiradi;

aholi va biznes subyektlari bilan energiya servis bozoridagi xizmat koʻrsatuvchilar, yetkazib beruvchilar va moliya tashkilotlari oʻrtasida yaqindan aloqa oʻrnatishga koʻmaklashadi;

energiya samaradorligini targʻib qiluvchi axborot kampaniyalarini tashkil etadi va energiya resurslaridan oqilona foydalanishni ragʻbatlantirishga qaratilgan tanlovlar va boshqa amaliy chora-tadbirlarni moliyalashtiradi.

11. Agentlik oʻziga yuklangan vazifalarni bajarish uchun quyidagi huquqlarga ega:

oʻz vakolati doirasida, shu jumladan, boshqa davlat organlari bilan birgalikda normativ-huquqiy hujjatlarni qabul qilish;

Vazirlar Mahkamasiga normativ-huquqiy hujjatlar loyihalarini, shuningdek, Agentlikka yuklangan vazifalar va funksiyalarni bajarish bilan bogʻliq boʻlgan boshqa hujjatlarni belgilangan tartibda kiritish;

respublika va mahalliy ijro etuvchi hokimiyat organlari hamda boshqa tashkilotlar tomonidan bajarilishi majburiy boʻlgan normativ-huquqiy hujjatlarni qabul qilish, zarur hollarda boshqa vazirlik va idoralar bilan birgalikda qoʻshma qarorlar va boshqa hujjatlar qabul qilish;

energiya samaradorligiga qaratilgan chora-tadbirlar va dasturlarni ishlab chiqish;

respublika va mahalliy ijro etuvchi hokimiyat organlari hamda boshqa tashkilotlarga bajarilishi majburiy boʻlgan koʻrsatmalar kiritish;

respublika va mahalliy ijro etuvchi hokimiyat organlari hamda boshqa tashkilotlar bilan bozor ishtirokchilari faoliyatini muvofiqlashtirish;

zarur maʼlumotlarni statistika va soliq organlari, Davlat xizmatlari markazi hamda vazirlik va idoralardan bepul soʻrash va olish;

energiya samaradorligini oshirish, ESKO xizmatlari bozorini rivojlantirish, energiya auditorlari, menejerlari, konsultantlarini tayyorlash, qayta tayyorlash va ularning malakasini oshirish yoʻnalishlarida xorijiy tashkilotlar, fan va taʼlim muassasalari bilan hamkorlik qilish;

normativ-huquqiy hujjatlar loyihalarini ishlab chiqishda ilmiy va boshqa tashkilotlar olimlari va mutaxassislarining, shuningdek, mahalliy va xorijiy ekspertlarni konsultant sifatida jalb qilish va (yoki) ularning xulosa va tavsiyalarini olish;

amaliyotda qoʻllash tajribasi tahlili, olingan tavsiyalar va xalqaro tajriba asosida normativ-huquqiy hujjatlarga oʻzgartirish va qoʻshimchalar kiritish boʻyicha tashabbuslar bilan chiqish;

energiya samaradorligi sohasida bajariladigan davlat va tijorat loyihalari hamda dasturlarida ishtirok etish;

oʻz vakolatiga kiradigan masalalar boʻyicha xorijiy davlatlar, xalqaro va xorijiy tashkilotlar vakillari bilan belgilangan tartibda muzokaralar oʻtkazish;

ushbu Nizomda belgilangan maqsadlarga erishishga yoʻnaltirilgan, qonunchilik hujjatlarida taqiqlanmagan boshqa faoliyat turlarini amalga oshirish.

12. Agentlik:

energiya samaradorligi boʻyicha yagona davlat siyosati samarali amalga oshirilishi, shuningdek, yuklangan vazifalarning sifatli bajarilishi;

Oʻzbekiston Respublikasi Prezidenti va Hukumati topshiriqlarini oʻz vaqtida, toʻliq va sifatli bajarish, oʻrta va uzoq muddatli rivojlanish dasturlari ishlab chiqilishi, ularning ijrosi taʼminlanishi;

Agentlikning faoliyati bilan bogʻliq boʻlgan prognoz koʻrsatkichlariga erishish sohasidagi ishlarning samarali tashkil etilishi;

Vazirlar Mahkamasiga va Oʻzbekiston Respublikasi Prezidenti Administratsiyasiga kiritiladigan normativ-huquqiy hujjatlar va boshqa hujjatlar loyihalarining sifati, shuningdek, Agentlik tomonidan qabul qilinadigan qarorlar samaradorligi va natijadorligi taʼminlanishi;

tegishli sohani rivojlantirish va hududlarning muammoli masalalarini hal qilish boʻyicha dastur, tadbirlar rejasi, “yoʻl xaritalari” va boshqa hujjatlarning samarali bajarilishi;

Oʻzbekiston Respublikasi Prezidentining 2024-yil 14-iyundagi PQ-222-son qarori 6-bandi “v” kichik bandida belgilangan davlat organlari va tashkilotlaridagi energiya menejerlari (Energy Efficiency Manager) faoliyatini muvofiqlashtirish;

yuridik va jismoniy shaxslarning murojaatlari koʻrib chiqilishi va belgilangan muddatlarda ularga javob berilishi;

muntazam ravishda xodimlar qayta tayyorlanishi va ularning malakasi oshirilishi uchun masʼul hisoblanadi.

13. Quyidagilar direktorning asosiy funksional vazifalari hisoblanadi:

Oʻzbekiston Respublikasi Konstitutsiyasi va qonunlari hamda boshqa normativ-huquqiy hujjatlar talablariga rioya etish;

Agentlik faoliyatiga umumiy rahbarlik qilish, Oʻzbekiston Respublikasi Prezidentining tegishli hujjatlari, Vazirlar Mahkamasining qarorlari va boshqa qonunchilik hujjatlari bilan Agentlikka yuklangan vazifa va funksiyalar bajarilishini tashkil etish;

Oʻzbekiston Respublikasi Prezidenti, Oʻzbekiston Respublikasi Vazirlar Mahkamasining topshiriqlarini bajarish;

direktor oʻrinbosarlari va tarkibiy tuzilmalar rahbarlarining vakolatlarini belgilash va vazifalarni taqsimlash;

Agentlik faoliyati rejalashtirilishini tashkil etish, Agentlikning davriy ish rejalarini tasdiqlash, ularning bajarilishi yuzasidan nazoratni taʼminlash;

Oʻzbekiston Respublikasi Prezidenti, Vazirlar Mahkamasi topshiriqlariga va oʻz tashabbusiga koʻra normativ-huquqiy hujjatlar loyihalarining sifatli ishlab chiqilishini, ular Oʻzbekiston Respublikasining “Normativ-huquqiy hujjatlar toʻgʻrisida”gi Qonuni, Oʻzbekiston Respublikasi Prezidenti Administratsiyasining Reglamenti va Oʻzbekiston Respublikasi Vazirlar Mahkamasi Reglamenti talablariga muvofiq ravishda oʻz vaqtida kiritilishini tashkil etish, loyihalarning Vazirlar Mahkamasida puxta ishlanishida, Vazirlar Mahkamasi rahbariyati huzurida himoya qilinishida va Oʻzbekiston Respublikasi Prezidenti Administratsiyasida koʻrib chiqilishida ishtirok etish;

Oʻzbekiston Respublikasi Prezidentining farmonlari, qarorlari, farmoyishlari, Vazirlar Mahkamasining qarorlari, farmoyishlari va topshiriqlari bajarilishini taʼminlash, tarkibiy boʻlinmalarda ijro intizomini mustahkamlash boʻyicha kompleks chora-tadbirlarni amalga oshirish, Oʻzbekiston Respublikasi Prezidentining “Qonunchilik hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qoʻshimcha chora-tadbirlar toʻgʻrisida” 2021-yil 10-fevraldagi PF-6166-son Farmoniga va “Ijro.gov.uz” ijro intizomi idoralararo yagona elektron tizimi samarali faoliyat koʻrsatishini taʼminlashga qaratilgan qoʻshimcha chora-tadbirlar toʻgʻrisida” 2021-yil 31-maydagi PQ-5132-son qaroriga muvofiq tarkibiy boʻlinma rahbarlarining shaxsiy masʼuliyatini oshirish choralarini koʻrish;

Agentlik rahbarlari va xodimlari xizmat safarlarini Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish choralari toʻgʻrisida” 2014-yil 5-martdagi PQ–2142-son va “Xorijiy xizmat safarlarida boʻlish samaradorligi va xorijiy delegatsiyalarning Oʻzbekiston Respublikasiga tashriflarini tashkil etish uchun mansabdor shaxslarning shaxsiy masʼuliyatini yanada oshirish chora-tadbirlari toʻgʻrisida” 2017-yil 3-avgustdagi PQ-3170-son qarorlari talablariga muvofiq tashkil etish, xizmat safarlarining asoslangani, samaradorligi va natijadorligini, safar uchun ajratiladigan mablagʻlardan maqsadli va oqilona foydalanishni taʼminlash;

Agentlik vakolatiga kiradigan masalalar boʻyicha koʻrsatmalar chiqarish, buyruqlar va normativ-huquqiy hujjatlarni qabul qilish;

Agentlik xodimlari tomonidan Vazirlar Mahkamasining 2022-yil 14-oktabrdagi 595-son qarori bilan tasdiqlangan Davlat fuqarolik xizmatchilari odob-axloqining namunaviy qoidalari asosida tasdiqlangan Agentlik xodimlari odob-axloq qoidalariga rioya etilishini taʼminlash;

jismoniy va yuridik shaxslarning murojaatlarini koʻrib chiqish boʻyicha ishlarni Oʻzbekiston Respublikasining “Jismoniy va yuridik shaxslarning murojaatlari toʻgʻrisida”gi Qonuni, Vazirlar Mahkamasining 2018-yil 7-maydagi 341-son qarori bilan tasdiqlangan Davlat organlarida, davlat muassasalarida va davlat ishtirokidagi tashkilotlarda jismoniy va yuridik shaxslarning murojaatlari bilan ishlash tartibi toʻgʻrisidagi namunaviy nizomga muvofiq samarali tashkil etish, jamoatchilik bilan bevosita va ochiq muloqot oʻrnatish, shaxsiy qabullar oʻtkazish, shu jumladan, jismoniy va yuridik shaxslarning vakillarini joylarga chiqib qabul qilishni tashkil etish;

davlat organlari va boshqa tashkilotlarda, Oʻzbekiston Respublikasi sudlarida, shuningdek, davlat organlari, xalqaro tashkilotlar va xorijiy mamlakat vakillari ishtirokida oʻtkaziladigan rasmiy tadbirlarda Agentlik nomidan ishtirok etish;

Oʻzbekiston Respublikasining “Korrupsiyaga qarshi kurashish toʻgʻrisida”gi Qonuni va korrupsiyaga qarshi kurashishga doir boshqa qonunchilik hujjatlariga rioya etish, faoliyatda korrupsiyaviy xavf-xatarlarni va manfaatlar toʻqnashuvini oʻz vaqtida aniqlash hamda ularga chek qoʻyish, korrupsiyaga oid huquqbuzarliklar oldini olish choralarini koʻrish hamda tizimda korrupsiyaning oldini olish va unga qarshi murosasiz kurashishga doir ishlarga rahbarlik qilish va muvofiqlashtirish;

Oʻzbekiston Respublikasining “Manfaatlar toʻqnashuvi toʻgʻrisida”gi Qonuni va manfaatlar toʻqnashuvi bilan bogʻliq munosabatlarni tartibga solishga doir ishlarga rahbarlik qilish va muvofiqlashtirish;

Oʻzbekiston Respublikasi Prezidentining Xalq qabulxonalari bilan samarali hamkorlik qilishni tashkil etish, Agentlik rahbarlari va xodimlari ularning faoliyatida faol ishtirok etishini, jismoniy va yuridik shaxslarning Oʻzbekiston Respublikasi Prezidentining Virtual qabulxonasidan kelib tushgan murojaatlarini oʻz vaqtida va toʻlaqonli koʻrib chiqilishini taʼminlash;

Agentlik Hayʼat majlislarida raislik qilish;

Agentlikka yuklangan vazifalarni bajarish uchun shartnoma asosida jalb etiladigan malakali xorijiy mutaxassislar xizmatiga haq toʻlash shartlarini xalqaro amaliyotdan kelib chiqqan holda belgilash hamda ularga Agentlik huzuridagi Energiya samaradorligini ragʻbatlantirish va qoʻllab-quvvatlash jamgʻarmasi (keyingi oʻrinlarda — Jamgʻarma) mablagʻlari hisobidan ish haqi va boshqa toʻlovlarni amalga oshirish;

Agentlik xodimlarini ularning koʻp yillik va samarali faoliyati, alohida xizmatlari uchun Oʻzbekiston Respublikasi davlat mukofotlari bilan taqdirlash uchun belgilangan tartibda takliflar kiritishni taʼminlash va tavsiyalar berish;

Agentlik mulkini qonunchilik hujjatlarida belgilangan tartibda tasarruf etish;

Agentlik vakolatiga kiradigan masalalar yuzasidan Oʻzbekiston Respublikasining xalqaro shartnomalarini belgilangan tartibda imzolash;

Agentlikning ichki tashkiliy masalalari yuzasidan qarorlar qabul qilish;

Agentlik nomidan ESKO xizmatlari bozori ishtirokchilariga yozma soʻrovlar yuborish;

Agentlik xodimlarini lavozimga tayinlash va lavozimdan ozod etish, mehnat shartnomalari (buyruqlari)ni imzolash;

Agentlik xodimlariga vazifalarni yuklash;

Agentlik xodimlarining malakasini oshirish va ularni xorijiy davlatlarga stajirovka va tajriba almashish uchun yuborishni tashkil etish;

Agentlik xodimlarini ragʻbatlantirish va intizomiy javobgarlikka tortish masalalarini hal qilish, direktor oʻrinbosarlarini ragʻbatlantirish va intizomiy javobgarlikka tortish masalalarini, shu jumladan, kelgusida uning egallab turgan lavozimida qolishining maqsadga muvofiqligi masalalarini koʻrib chiqish toʻgʻrisida Vazirlar Mahkamasiga takliflar kiritish, ularning shaxsiy javobgarligini oshirish boʻyicha tizimli choralarni amalga oshirish;

Agentlikning tashqi va ichki tashkiliy faoliyati ustidan doimiy va qatʼiy nazorat oʻrnatish;

Agentlikka kiritilgan takliflar va taqdim etilgan normativ-huquqiy hujjatlar loyihalarining toʻliq va har tomonlama koʻrib chiqilishini, Oʻzbekiston Respublikasi Prezidenti Administratsiyasi Reglamenti va Oʻzbekiston Respublikasi Vazirlar Mahkamasining Reglamentida belgilangan muddatlarda kelishilishini (viza qoʻyilishi) taʼminlash;

davlat siri toifasiga kiritilgan va maxfiy axborot bilan ishlashda qonunchilik talablariga rioya qilish;

xodimlarning belgilangan cheklangan soni doirasida Agentlik shtatlar jadvalini, shuningdek, Davlat budjeti mablagʻlari hisobidan moliyalashtiriladigan Agentlikning xarajatlari smetasini tasdiqlash;

ushbu Nizomda va qonunchilik hujjatlarida nazarda tutilgan boshqa vakolatlarni amalga oshirish.

14. Quyidagilar direktor oʻrinbosarlarining asosiy funksional vazifalari hisoblanadi:

Oʻzbekiston Respublikasi Konstitutsiyasi va qonunlari hamda boshqa normativ-huquqiy hujjatlar talablariga rioya etish;

Agentlik direktori muayyan sabablarga koʻra (xizmat safari, mehnat taʼtili, betobligi davrida) yoʻqligida uning vazifalarini bajarish;

Agentlikning oʻzi nazorat qiladigan tarkibiy tuzilmalari faoliyatini muvofiqlashtirish, nazorat va bevosita rahbarlik qilish, xodimlar oʻrtasida vazifalarni taqsimlash;

Agentlik faoliyatining oʻzi mutasaddilik qiladigan yoʻnalishlarini yanada takomillashtirish yuzasidan Oʻzbekiston Respublikasi Prezidentining hujjatlari va Vazirlar Mahkamasi qarorlari bilan tasdiqlangan kompleks dastur va kompleks chora-tadbirlar ijrosini tanqidiy va chuqur tahlil qilish;

mutasaddiligidagi tarkibiy tuzilmalar boʻlinma rahbarlarining hisobotlarini muntazam eshitib borish va belgilangan koʻrsatkichlarga erishish uchun ularning shaxsiy javobgarligini oshirish;

Agentlik direktorining qonunchilik doirasidagi buyruq hamda topshiriqlari ijrosini oʻz vaqtida va sifatli taʼminlash;

Agentlikka kiritilgan takliflar va taqdim etilgan normativ-huquqiy hujjatlarning loyihalarini toʻliq va har tomonlama koʻrib chiqish;

kadrlarni belgilangan tartibda tanlash va joy-joyiga qoʻyish boʻyicha Agentlik direktoriga takliflar taqdim etish, ularning professionalligi, oʻz ishini bilishi, yuksak darajadagi ishchanlik va maʼnaviy-axloqiy fazilatlarga ega boʻlishini taʼminlash, ularning kasbiy malakasini oshirish choralarini koʻrish, mutasaddilik boʻyicha tarkibiy tuzilmalarda kadrlar zaxirasini shakllantirish choralarini koʻrish;

Agentlik xodimlari tomonidan Vazirlar Mahkamasining 2022-yil 14-oktabrdagi 595-son qarori bilan tasdiqlangan Davlat fuqarolik xizmatchilari odob-axloqining namunaviy qoidalari asosida tasdiqlangan Agentlik xodimlarining odob-axloq qoidalari talablariga rioya etilishini taʼminlash;

jismoniy va yuridik shaxslarning murojaatlarini koʻrib chiqish boʻyicha ishlarni Oʻzbekiston Respublikasining “Jismoniy va yuridik shaxslarning murojaatlari toʻgʻrisida”gi Qonuni, Vazirlar Mahkamasining 2018-yil 7-maydagi 341-son qarori bilan tasdiqlangan Davlat organlarida, davlat muassasalarida va davlat ishtirokidagi tashkilotlarda jismoniy va yuridik shaxslarning murojaatlari bilan ishlash tartibi toʻgʻrisidagi namunaviy nizomga muvofiq samarali tashkil etish, jamoatchilik bilan bevosita va ochiq muloqot oʻrnatish, shaxsiy qabullar oʻtkazish, shu jumladan, jismoniy va yuridik shaxslarning vakillarini joylarga borib qabul qilishni tashkil etish;

Oʻzbekiston Respublikasining “Korrupsiyaga qarshi kurashish toʻgʻrisida”gi Qonuni va korrupsiyaga qarshi kurashishga doir boshqa qonunchilik hujjatlariga hamda Oʻzbekiston Respublikasining “Manfaatlar toʻqnashuvi toʻgʻrisida”gi Qonuniga rioya qilish va manfaatlar toʻqnashuvi bilan bogʻliq munosabatlarni tartibga solishga doir ishlarni muvofiqlashtirish;

Agentlik faoliyatini takomillashtirish boʻyicha amaliy choralar koʻrish, ushbu sohada qonunchilikni takomillashtirishga doir takliflarni ishlab chiqib, koʻrib chiqish uchun Agentlik direktoriga kiritish;

energiya samaradorligi sohasidagi normativ bazaning tizimli asosda qayta koʻrib chiqilishini tashkil etish;

energiya samaradorligi sohasida davlat siyosatining asosiy yoʻnalishlari boʻyicha takliflar tayyorlash;

xorijiy davlatlar, xalqaro va xorijiy tashkilotlar bilan energiya samaradorligi sohasini rivojlantirish va tartibga solish masalalari boʻyicha hamkorlik qilish;

davlat siri toifasiga kiritilgan va maxfiy axborot bilan ishlashda qonunchilik talablariga rioya qilish.

15. Agentlik direktori:

Agentlikka yuklangan vazifa va funksiyalarning bajarilishi uchun;

Agentlikning ushbu Nizomda nazarda tutilgan javobgarlik sohalari boʻyicha hamda Nizomning 13-bandida koʻrsatilgan oʻz funksional majburiyatlarining sifatli bajarilishi uchun shaxsan javob beradi.

16. Agentlik direktori oʻrinbosarlari:

mutasaddilik qilinadigan yoʻnalish va tarkibiy boʻlinmalarda Agentlikka yuklangan vazifalar va funksiyalarning bajarilishi uchun;

ushbu Nizomning 14-bandida koʻrsatilgan oʻz funksional vazifalarining sifatli bajarilishi uchun shaxsan javob beradilar.

17. Agentlikka Oʻzbekiston Respublikasi Prezidenti tomonidan lavozimga tayinlanadigan va lavozimidan ozod etiladigan direktor rahbarlik qiladi.

Agentlik direktorining oʻrinbosarlari Oʻzbekiston Respublikasi Prezidenti bilan kelishilgan holda Vazirlar Mahkamasining qarori bilan lavozimga tayinlanadi va lavozimidan ozod qilinadi.

18. Agentlik direktori:

Agentlik faoliyatiga yakka tartibda rahbarlik qiladi;

Agentlik faoliyatiga umumiy rahbarlik qiladi va Agentlikka yuklangan vazifalar va funksiyalarning bajarilishi uchun shaxsan javob beradi;

Agentlik xodimlarining lavozim majburiyatlarini belgilangan tartibda tasdiqlaydi;

oʻz vakolati doirasida Agentlik xodimlarining bajarishi majburiy boʻlgan buyruqlar va farmoyishlar chiqaradi, koʻrsatmalar beradi.

Direktor qonunchilik hujjatlariga muvofiq boshqa vakolatlarni ham amalga oshirishi mumkin.

19. Agentlik direktori maʼlum sabablarga koʻra (xizmat safari, mehnat taʼtili, betobligi davrida) yoʻqligida uning birinchi oʻrinbosari direktor vazifalarini bajaradi.

20. Agentlik oʻz vazifalari va funksiyalarini amalga oshirishda respublika ijro etuvchi hokimiyat organlari va xoʻjalik birlashmalari, mahalliy davlat hokimiyati organlari hamda boshqa tashkilotlar bilan hamkorlik qiladi.

21. Hayʼat Agentlikning kollegial organi hisoblanib, direktor (hayʼat raisi), uning oʻrinbosarlari (lavozim boʻyicha), shuningdek, Agentlik faoliyatining asosiy yoʻnalishlarini muvofiqlashtiruvchi tarkibiy boʻlinmalar rahbarlaridan iborat tarkibda tashkil etiladi.

Hayʼat tarkibining soni va shaxsiy tarkibi belgilangan tartibda Vazirlar Mahkamasi tomonidan tasdiqlanadi.

Hayʼat faoliyatining tartibi Hayʼat tomonidan tasdiqlanadigan reglament bilan belgilanadi.

22. Hayʼatga quyidagi vazifalar yuklanadi:

Agentlik vazifalarining eng muhim samaradorlik koʻrsatkichlarini ishlab chiqish va amalga oshirilishini nazorat qilish;

Agentlik faoliyati bilan bogʻliq dolzarb masalalarning joylarda muhokama etilishini taʼminlagan holda hayʼatning kengaytirilgan majlislari oʻtkazilishini tashkil etish, shuningdek, yuzaga kelgan muammolarni oʻz vakolatlari doirasida bartaraf etish boʻyicha tegishli qarorlarni ishlab chiqish va qabul qilish;

Agentlik tarkibiga kiruvchi lavozimlar nomenklaturasini koʻrib chiqish va tasdiqlash;

Oʻzbekiston Respublikasi Prezidenti va Vazirlar Mahkamasining qaror va topshiriqlarida belgilangan vazifalarning oʻz vaqtida va sifatli amalga oshirilishini taʼminlash maqsadida Agentlik rahbarlari va xodimlarining ijro intizomini mustahkamlash va shaxsiy javobgarligini oshirish.

Hayʼat, shuningdek, Agentlik vakolatiga kiritilgan boshqa masalalarni ham koʻrib chiqishga haqli.

23. Agentlik direktori qarori bilan quyidagilar:

hayʼat ish rejalari va belgilangan vazifalarni bajarish muddatlari;

takliflar tashabbusi bilan chiqish, loyihalarni boshlash va hisobot berish tartiblari;

hayʼatning faoliyatini samarali taʼminlash uchun Agentlik masʼul tarkibiy boʻlinmalarining vazifalari tasdiqlanishi mumkin.

24. Hayʼat yigʻilishiga Agentlik vakolatiga tegishli masalalar yuzasidan respublika va mahalliy ijro etuvchi hokimiyat organlari, boshqa tashkilotlar rahbarlari va ekspert mutaxassislar taklif etilishi mumkin.

25. Hayʼat majlisi aʼzolarining yarmidan koʻpi ishtirok etgan taqdirda, vakolatli hisoblanadi. Hayʼat qarorlari oddiy koʻpchilik ovozi bilan qabul qilinadi.

26. Direktor va Hayʼat aʼzolari oʻrtasida kelishmovchiliklar yuzaga kelgan taqdirda, direktor ushbu kelishmovchiliklar xususida Vazirlar Mahkamasiga va Oʻzbekiston Respublikasi Prezidenti Administratsiyasiga axborot berib, mustaqil ravishda qaror qabul qiladi. Hayʼat aʼzolari ham oʻz fikrlarini Vazirlar Mahkamasiga va Oʻzbekiston Respublikasi Prezidenti Administratsiyasiga bildirishlari mumkin.

27. Hayʼat oʻz faoliyati uchun zarur boʻlgan hujjatlar, hisobotlar va boshqa maʼlumotlarni soʻrab olishga haqli.

28. Hayʼat qarorlari Hayʼat raisi tomonidan imzolanadi va Agentlik buyrugʻi (qarori) bilan amalga oshiriladi.

29. Agentlik faoliyatining samaradorligi muntazam baholanadi.

30. Agentlik faoliyati samaradorligi va natijadorligiga berilgan baho Vazirlar Mahkamasi tomonidan tasdiqlanadigan Agentlik faoliyati samaradorligi va natijadorligini baholash mezonlari va ish indikatorlariga asoslanadi.

31. Agentlik faoliyati samaradorligi va natijadorligini baholash yakunlari boʻyicha:

Agentlik rahbarlari va xodimlarini qoʻshimcha ragʻbatlantirish (mukofotlash) yoki intizomiy javobgarlikka tortish;

Agentlik faoliyatida aniqlangan kamchiliklarni bartaraf etish va uning faoliyatini yanada takomillashtirish choralari koʻriladi.

32. Agentlik faoliyati samaradorligi va natijadorligini baholash tartibi va uslubi qonunchilik hujjatlari bilan belgilanadi.

33. Agentlikning moddiy-texnik taʼminoti, xodimlari mehnatiga haq toʻlash va ularni moddiy ragʻbatlantirish boʻyicha xarajatlarni moliyalashtirish Oʻzbekiston Respublikasi Davlat budjeti, Jamgʻarma mablagʻlari hisobidan amalga oshiriladi.

Xodimlarning mehnatiga haq toʻlash fondi lavozim maoshi, koʻp yillik xizmati uchun ustama, mukofotlar, shu jumladan, bayram kunlari uchun mukofotlar, qoʻshimcha haqlar va ustamalar, ragʻbatlantirish toʻlovlaridan, shuningdek, qonunchilik hujjatlarida nazarda tutilgan boshqa toʻlovlardan iborat.

34. Agentlik xodimlariga Oʻzbekiston Respublikasi Davlat budjeti mablagʻlaridan:

Agentlik xodimlari uchun Yagona tarif setkasi boʻyicha tasdiqlangan razryadlarga muvofiq lavozim maoshi, bunda lavozim maoshini hisoblashda tasdiqlangan tarif razryadlari tarif koeffitsiyenti 1,8 baravarga oshirilgan miqdorda qoʻllanadi.

Agentlik xodimlariga koʻp yillik xizmat uchun har oyda quyidagi miqdorda ustama haqlar (ragʻbatlantirish koeffitsiyentini hisobga olgan holda, lavozim maoshiga nisbatan oshirilgan tarif koeffitsiyenti hisobida):

1 yildan 3 yilgacha — 0,3;

3 yildan 5 yilgacha — 0,6;

5 yildan 10 yilgacha — 0,8;

10 yildan 15 yilgacha — 1,0;

15 yildan 20 yilgacha — 1,2;

20 yildan ortiq — 1,5.

35. Agentlikni qayta tashkil etish va tugatish qonunchilik hujjatlarida belgilangan tartibda amalga oshiriladi.

1. Ushbu Nizom Oʻzbekiston Respublikasi Vazirlar Mahkamasi huzuridagi Energiya samaradorligi milliy agentligi (keyingi oʻrinlarda —Agentlik) huzuridagi Energiya samaradorligini ragʻbatlantirish va qoʻllab-quvvatlash jamgʻarmasining (keyingi oʻrinlarda — Jamgʻarma) vazifalari, shuningdek, mablagʻlarni shakllantirish, ulardan foydalanish hamda Jamgʻarmani boshqarish tartibini belgilaydi.

2. Jamgʻarma yuridik shaxs hisoblanmaydi.

Jamgʻarma mablagʻlari hisobidan:

energiya samaradorligini oshirish bilan bogʻliq ishlarni amalga oshirish sohasida monitoring qilish, targʻibot ishlarini tashkil etish, mutaxassislarni tayyorlash, qayta tayyorlash va ularning malakasini oshirish, ilmiy-tadqiqot faoliyatini olib borishga yoʻnaltirilgan energiya samaradorligini oshirish bilan bogʻliq tadbirlar va loyihalar;

Energiya samaradorligi milliy agentligiga yuklangan vazifalar va funksiyalarni amalga oshirish bilan bogʻliq boshqa maqsadlar moliyalashtiriladi.

3. Jamgʻarma mablagʻlari quyidagi manbalar hisobidan shakllantiriladi:

Oʻzbekiston Respublikasi Davlat budjeti mablagʻlari;

davlat ulushi boʻyicha dividendlar hisobidan neft-gaz va elektr energetikasi tarmoqlari korxonalarining sof foydasidan 5 foiz miqdoridagi oʻtkazmalar, korxonalarning sof foydasidan dividendga yoʻnaltirish toʻgʻrisida qaror qabul qilish uchun qonunchilik hujjatlarida belgilangan cheklovlar yuzaga kelgan hollar bundan mustasno. Mazkur oʻtkazma mablagʻlari Jamgʻarmaga korxonalar sof foydasining taqsimoti va davlat ulushiga hisoblangan dividendlar toʻgʻrisida ularning vakolatli boshqaruv organlari tomonidan qaror qabul qilingan sanadan boshlab bir oy ichida oʻtkazib berilishi lozim;

energiyani meʼyordan ortiqcha isteʼmol qilganlik uchun korxonalarga qoʻllanadigan oshirilgan tariflardan tushumlar;

Energiya samaradorligini oshirish raqamli platformasi operatori — “Oʻzbekiston respublika tovar-xom ashyo birjasi” AJning platformada xizmatlarni koʻrsatish uchun olinadigan komissiyaning 40 foizi;

energiya samaradorligi loyihalarini amalga oshirishda buyurtmachini saqlash xarajatlari uchun ajratiladigan mablagʻlar;

xalqaro moliya institutlari va xorijiy hukumat moliya tashkilotlarining kreditlari va grantlari;

Jamgʻarma aktivlarini boshqarish, shu jumladan, boʻsh turgan mablagʻlarni tijorat banklari depozitiga joylashtirishdan olinadigan daromadlar;

yuridik va jismoniy shaxslarning homiylik xayriyalari;

qonunchilik hujjatlarida taqiqlanmagan boshqa manbalar.

4. Jamgʻarma mablagʻlari belgilangan tartibda tasdiqlanadigan xarajatlar smetasiga asosan yoʻnaltiriladi.

5. Jamgʻarma mablagʻlaridan quyidagi maqsadlarda foydalaniladi:

xoʻjalik yurituvchi subyektlarda energiya auditi oʻtkazish va energiya samaradorligini oshirishni qoʻllab-quvvatlash boʻyicha chora-tadbirlarni amalga oshirish;

aholi uchun energiya samarador uskunalarni xarid qilish va oʻrnatishida moliyaviy yordam koʻrsatish (subsidiya ajratish), shuningdek, tijorat banklariga moliyaviy resurslarni ajratish;

energiya auditini oʻtkazish uchun zarur uskunalar va vositalarni xarid qilishni qisman moliyalashtirish;

energiya samaradorligini oshirish loyihalari doirasida tijorat banklari bilan hamkorlikda energiya servis kompaniyalarini moliyalashtirish;

energiya samaradorligini oshirish loyihalarini amalga oshirish yuzasidan davlat idoralari bilan energiya servis xizmatlarini koʻrsatishni moliyaviy qoʻllab-quvvatlash;

energiya auditorlari, konsultantlar, menejerlar va verifikatorlarni tayyorlash, qayta tayyorlash hamda ularning malakasini oshirish dasturlarini ishlab chiqish va seminarlar oʻtkazish;

energiya tejamkorligi va energiya samaradorligini oshirish sohasida xalqaro hamkorlikni yoʻlga qoʻyish;

energiya samaradorligi sohasiga oid ilmiy-texnik dasturlar, metodik hujjatlarni, texnik boshqaruv sohasida normativ hujjatlarni ishlab chiqish;

energiya samarador loyihalar va tadbirlarni amalga oshirish uchun ekspertlarni (auditorlar, yuristlar, moliyachilar, ilmiy xodimlar va shu kabilar), shu jumladan, xalqaro ekspert va konsultantlarni jalb qilish;

energiya samaradorligi bilan bogʻliq ishlarni amalga oshirish sohasida nodavlat-notijorat tashkilotlar bilan birgalikda tadbirlar oʻtkazish;

energiya samaradorligi sohasida forumlar, konferensiyalar, davra suhbatlari hamda seminarlar tashkil etish va oʻtkazish;

Agentlik tizimi xodimlarining energiya samaradorligi sohasida xalqaro koʻrgazmalar, loyihalar va dasturlarda ishtirok etishi bilan bogʻliq xarajatlarni qoplash;

energiya samaradorligini oshirish bilan bogʻliq ishlarni amalga oshirish sohasida monitoring qilish, targʻibot ishlarini tashkil etish, mutaxassislarni tayyorlash, qayta tayyorlash va ularning malakasini oshirishga yoʻnaltirilgan energiya samaradorligini oshirish bilan bogʻliq tadbirlar va loyihalarni moliyalashtirish;

Agentlikka yuklangan vazifalar va funksiyalarni amalga oshirish bilan bogʻliq boshqa maqsadlarni moliyalashtirish;

Agentlik faoliyati bilan bogʻliq ishlarni amalga oshirish sohasida xorijiy va xalqaro tashkilotlar rahbarlari va mutaxassislarining Oʻzbekiston Respublikasida boʻlishi davrida ularni qabul qilish va kuzatish;

qonunchilikda belgilangan tartibda Agentlik faoliyatiga doir shartnomaviy majburiyatlarini qoplash;

Agentlik faoliyatini taʼminlash, xodimlarini tayyorlash, qayta tayyorlash va ularning malakasini oshirish, ularni xorijiy taʼlim tashkilotlarida tajriba orttirish hamda xodimlarni moddiy ragʻbatlantirish;

Agentlik tizimining moddiy-texnik bazasini mustahkamlash va rivojlantirish uchun barcha zarur asbob-uskunalar, jihozlar, kompyuter dasturlarini xarid qilish;

Agentlikka yuklangan vazifalar va funksiyalarni amalga oshirish bilan bogʻliq boshqa maqsadlar.

Bunda davlat budjetidan Jamgʻarmaga ajratilgan mablagʻlar hisobidan agentlikni saqlash, xodimlar mehnatiga haq toʻlash xarajatlari uchun sarflash taqiqlanadi.

6. Jamgʻarma mablagʻlari hisobidan Agentlik xodimlarini quyidagi shakllarda moddiy ragʻbatlantirish ustamalari va ijtimoiy qoʻllab-quvvatlash (moddiy yordam) toʻlovlari amalga oshiriladi:

a) Agentlik rahbar va xodimlarini moddiy jihatdan qoʻllab-quvvatlash maqsadida Agentlik direktori tomonidan xodimlarga lavozim maoshiga (lavozim maoshiga nisbatan ragʻbatlantirish koeffitsiyentlari hamda koʻp yillik xizmat qilganlik uchun ustama miqdori hisobga olingan holda) nisbatan 200 foizgacha boʻlgan miqdorda har oylik ustamalar;

v) qonunchilikda belgilangan tartibda Oʻzbekiston Respublikasining Mehnat kodeksi 208-moddasida keltirilgan bayramlar munosabati bilan lavozim maoshining (ragʻbatlantirish koeffitsiyentlari hisobga olingan holda) nisbatan bir baravari miqdorida bir martalik mukofot puli;

g) har oyda (jamoa shartnomasiga muvofiq) yoʻl-transport xarajatlari uchun bazaviy hisoblash miqdorining bir baravarigacha hamda xodimning ovqatlanishi xarajatlariga koʻmaklashish maqsadida bazaviy hisoblash miqdorining ikki baravarigacha miqdorda toʻlovlar;

d) qishloq xoʻjaligi mahsulotlarini sotib olish uchun yilda bir marta (sentabr — noyabr oylarida) bazaviy hisoblash miqdorining oʻn baravarigacha miqdorida moddiy yordam puli;

e) zarur hollarda (ragʻbatlantiruvchi koeffitsiyentni hisobga olgan holda) bir oylik lavozim maoshi miqdorida (Ijtimoiy reyestrga kiritilgan oilalar, xodimning davolanishi, 50, 55, 60 yubiley yoshi munosabati bilan, shuningdek, pensiyaga chiqqanda, toʻy, dafn marosimi va boshqalar uchun) xodimlarga kasaba uyushmasi bilan kelishilgan moddiy yordam puli beriladi.

7. Shaxsiy va ragʻbatlantirish ustamalarini belgilash, maʼnaviy va moddiy ragʻbatlantirish, mukofotlar, ijtimoiy muhofaza qilishning aniq miqdorlari va ular tatbiq etiladigan xodimlar ushbu nizomda belgilangan miqdorlar doirasida, Jamgʻarma mablagʻlariga tushumlar hajmidan kelib chiqib, Agentlik direktori tomonidan belgilanadi.

8. Agentlik direktori rahbarlik qiluvchi Jamgʻarmaning boshqaruv Kengashi (keyingi oʻrinlarda — Kengash) Jamgʻarmani boshqarish organi hisoblanadi.

9. Kengashning shaxsiy tarkibi Agentlik direktori, Vazirlar Mahkamasi masʼul vakili, iqtisodiyot va moliya vaziri oʻrinbosari, Agentlik direktorining oʻrinbosarlari, bosh hisobchisi, bosh yuriskonsultidan tashkil topadi hamda Vazirlar Mahkamasi tomonidan tasdiqlanadi.

10. Kengash quyidagi funksiyalarni amalga oshiradi:

Jamgʻarmaning yillik xarajatlar smetasini (keyingi oʻrinlarda — Smeta) tasdiqlaydi;

energiya samaradorligiga qaratilgan tadbirlarni Jamgʻarma mablagʻlari hisobidan moliyalashtirishning ustuvor yoʻnalishlarini belgilaydi;

Jamgʻarma mablagʻlari hisobidan moliyalashtiriladigan loyihalarga kiritiladigan takliflarni (arizalarni) koʻrib chiqadi;

tasdiqlangan Smeta asosida Jamgʻarma mablagʻlari hisobidan moliyalashtiriladigan loyiha va tadbirlarni moliyalashtirishni, shu jumladan, Oʻzbekiston Respublikasi Prezidentining “Energiya samaradorligi sohasida davlat boshqaruvini takomillashtirish va energiya servis kompaniyalari xizmatlari bozorini rivojlantirish chora-tadbirlari toʻgʻrisida” 2025-yil 27-martdagi PF-63-son Farmonida aholi uchun koʻzda tutilgan subsidiya va kreditlarni ajratish yuzasidan yillik xarajatlarni tasdiqlaydi;

zarur hollarda tasdiqlangan Smetaga tegishli oʻzgartirishlar kiritadi.

Vazirlar Mahkamasi bilan kelishgan holda Jamgʻarma mablagʻlaridan foydalanish yoʻnalishlariga oʻzgartirishlarni kiritadi.

10¹. Kengashga rais rahbarlik qiladi va Kengashning vazifalari, vakolatlari va uning faoliyatini tashkil etish tartibi Kengash raisi tomonidan tasdiqlanadigan nizomga muvofiq belgilanadi.

11. Agentlik Jamgʻarmaga mablagʻlar tushumi va ulardan foydalanilishi toʻgʻrisida har yarim yillikda oʻrnatilgan tartibda Oʻzbekiston Respublikasi Iqtisodiyot va moliya vazirligiga hisobot taqdim etadi.

12. Jamgʻarma mablagʻlaridan oqilona va maqsadli foydalanilishi yuzasidan davlat moliyaviy nazorati qonunchilikda belgilangan tartibda vakolatli organ tomonidan amalga oshiriladi.

13. Jamgʻarma mablagʻlarining hisobot yilida foydalanilmagan qismi olib qoʻyilmaydi va ushbu Nizomda nazarda tutilgan tartibda foydalanish uchun keyingi yilga oʻtkaziladi.

14. Jamgʻarma mablagʻlaridan foydalanilishida kelib chiqadigan nizolar qonunchilikda belgilangan tartibda hal etiladi.

15. Ushbu Nizom talablari buzilishida aybdor boʻlgan shaxslar qonunchilikda belgilangan tartibda javob beradilar.