O‘zbekiston Respublikasining Mehnat kodeksiga muvofiq vaqtinchalik mehnatga layoqatsizlik, homiladorlik va tug‘ish davrida, yangi tug‘ilgan bolani farzandlikka olgan yoki unga vasiy qilib belgilangan hamda bolani parvarishlash ta’tilidagi xodimlarga nafaqalarni tayinlash va to‘lashni tartibga solish maqsadida Vazirlar Mahkamasi qaror qiladi:

1. O‘zbekiston Respublikasi Mehnat kodeksining:

a) 281-moddasida ish beruvchi qonunchilikda belgilangan tartibda o‘rtacha ish haqi yoki uning bir qismi miqdorida vaqtinchalik mehnatga layoqatsizlik bo‘yicha nafaqa to‘lashi;

b) 404 — 406-moddalarida homiladorlik va tug‘ish nafaqasini, bolasi ikki yoshga to‘lguniga qadar bolani parvarishlash ta’tili davri uchun hamda yangi tug‘ilgan bolani farzandlikka olgan yoki unga vasiy qilib belgilangan xodimga bola ikki yoshga to‘lguniga qadar bolani parvarishlash ta’tili davri uchun nafaqa tayinlash va to‘lash tartibi Vazirlar Mahkamasi tomonidan belgilanishi nazarda tutilganligi ma’lumot uchun qabul qilinsin.

2. Quyidagilarni nazarda tutuvchi:

a) Vaqtinchalik mehnatga layoqatsizlik, homiladorlik va tug‘ish bo‘yicha nafaqalarni hamda yangi tug‘ilgan bolani farzandlikka olgan yoki unga vasiy qilib belgilangan xodimga nafaqani tayinlash hamda to‘lash tartibi to‘g‘risidagi nizom 1-ilovaga muvofiq:

vaqtinchalik mehnat layoqatini yo‘qotish bilan bog‘liq kasallik vaqtida (shikastlanishda), sanatoriy va sog‘lomlashtirish muassasalarida davolanganda, kasallangan oila a’zosini parvarishlash zarur bo‘lganda, xodimlarga vaqtinchalik mehnatga layoqatsizlik nafaqasini berish tartibi;

homiladorlik va tug‘ish davrida, yangi tug‘ilgan bolani farzandlikka olgan yoki unga vasiy qilib belgilangan hamda bolani parvarishlash ta’tilidagi xodimlarga nafaqalarni hisoblash, tayinlash va to‘lash tartibi;

a¹) Yangi tug‘ilgan bolani farzandlikka olgan yoki vasiy qilib belgilangan xodimga beriladigan nafaqaning bir qismini qoplab berish tartibi to‘g‘risidagi nizomning 1¹-ilovasiga muvofiq:

tug‘ish vaqtida yoki tug‘ishdan keyingi davrda ona vafot etganda, tug‘ilgan bolani (bolalarni) farzandlikka olgan yoki unga vasiy qilib belgilangan xodimga minimal iste’mol xarajatlarining 4 baravari miqdorida nafaqa to‘lanishi;

nafaqa mehnatga layoqatsizlik varaqasi asosida Sog‘liqni saqlash vazirligining Yagona tibbiy axborot tizimidan olingan ma’lumotlar asosida “Ijtimoiy himoya yagona reyestri” axborot tizimi orqali fuqarolarning murojaatlarisiz “proaktiv shakl”da tayinlanishi va to‘lanishi;

b) Budjet tashkilotlari hisoblanmaydigan yuridik va jismoniy shaxslarda ishlaydigan onalarga bola ikki yoshga to‘lgunga qadar bola parvarishi bo‘yicha oylik nafaqa tayinlash va to‘lash tartibi to‘g‘risidagi nizom 2-ilovaga muvofiq tasdiqlansin:

bola parvarishi bo‘yicha nafaqa parvarish qilinayotgan bolalar sonidan va nafaqa oluvchi shaxsning mehnat stajidan qat’i nazar, har oyda mehnatga haq to‘lashning eng kam miqdorining 60 foizi miqdorida to‘lanishi;

ishlaydigan onalarga bola ikki yoshga to‘lgunga qadar parvarishlash ta’tili davrida nafaqa tayinlash va to‘lash tartibi.

4. O‘zbekiston Respublikasi Kambag‘allikni qisqartirish va bandlik vazirligi manfaatdor vazirliklar va idoralar bilan birgalikda o‘zlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.

5. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari — iqtisodiyot va moliya vaziri J.A. Qo‘chqorov hamda O‘zbekiston Respublikasi kambag‘allikni qisqartirish va bandlik vaziri B.A. Musayev zimmasiga yuklansin.

1. Ushbu Nizom vaqtinchalik mehnatga layoqatsizlik, homiladorlik va tug‘ish bo‘yicha nafaqalarni hamda yangi tug‘ilgan bolani farzandlikka olgan yoki unga vasiy qilib belgilangan xodimga nafaqani (keyingi o‘rinlarda — nafaqa) tayinlash hamda to‘lash tartibini belgilaydi. Bunda:

a) homiladorlik va tug‘ish nafaqasini tayinlash va to‘lashga doir normalar “Davlat ijtimoiy sug‘urtasi to‘g‘risida”gi Qonun tatbiq etilmaydigan tashkilotlarning xodimlariga ushbu turdagi nafaqani tayinlanishi va to‘lanishi bilan bog‘liq munosabatlarni;

b) vaqtinchalik mehnatga layoqatsizlik nafaqasini tayinlash va to‘lashga doir normalar:

“Davlat ijtimoiy sug‘urtasi to‘g‘risida”gi Qonun tatbiq etilmaydigan tashkilotlarning xodimlariga ushbu turdagi nafaqani tayinlanishi va to‘lanishi bilan bog‘liq munosabatlarni;

davlat ijtimoiy sug‘urtasi bo‘yicha mehnatga layoqatsizlik davrining ish beruvchi tomonidan to‘lanadigan qismi bo‘yicha vaqtinchalik mehnatga layoqatsizlik nafaqasini tayinlash va to‘lash bilan bog‘liq munosabatlarni tartibga soladi.

2. Mazkur Nizomda quyidagi asosiy tushunchalar qo‘llaniladi:

vaqtinchalik mehnatga layoqatsizlik nafaqasi — vaqtinchalik mehnat layoqatini yo‘qotish bilan bog‘liq kasallik vaqtida (shikastlanishda), sanatoriy va sog‘lomlashtirish muassasalarida davolanganda, kasallangan oila a’zosini parvarishlash zarur bo‘lganda, karantinda, sil yoki kasb kasalligi tufayli vaqtincha boshqa ishga o‘tkazilganda, mehnat layoqatini tiklash yoki yasama a’zo (protez) qo‘ydirish uchun reabilitatsiya muassasalariga yotqizilganda xodim mehnat majburiyatlarini bajara olmaganligi uchun ish beruvchilar tomonidan to‘lanadigan kafolatli qo‘shimcha to‘lov;

mehnatga layoqatsizlik varaqasi — xodimni ishdan ozod qilish, vaqtinchalik mehnatga layoqatsizlik nafaqasi yoki homiladorlik va tug‘ish nafaqasi to‘lash uchun asos bo‘ladigan hamda vaqtincha mehnatga layoqatsizlik bilan kechadigan kasallanishning hisobi yuritiladigan hujjat;

homiladorlik va tug‘ish nafaqasi — ayolga tug‘ruqqacha yetmish kalendar kun hamda tug‘ruqdan keyin ellik olti kalendar kun (tug‘ish qiyin kechgan yoxud ikki yoki undan ortiq bola tug‘ilgan taqdirda, yetmish kalendar kun) davomida ta’til davrida mehnat majburiyatlarini bajara olmaganligi uchun ish beruvchilar tomonidan to‘lanadigan kafolatli qo‘shimcha to‘lov;

yangi tug‘ilgan bolani farzandlikka olgan yoki unga vasiy qilib belgilangan xodimga beriladigan nafaqa — xodimga yangi tug‘ilgan bolani farzandlikka olgan yoki vasiylik belgilangan kundan (farzandlikka olish bo‘yicha sud hal qiluv qarori kuchga kirgan va bolaga vasiy tayinlash bo‘yicha tuman, shahar hokimining qarori qabul qilingan kundan) boshlab va bola tug‘ilgan kundan e’tiboran ellik olti kalendar kun (bir vaqtning o‘zida ikki yoki undan ortiq bola farzandlikka olingan taqdirda esa, yetmish kalendar kun) o‘tguniga qadar ta’til davrida mehnat majburiyatlarini bajara olmaganligi uchun ish beruvchilar tomonidan to‘lanadigan kafolatli qo‘shimcha to‘lov;

umumiy ish staji — nafaqa miqdorini belgilash uchun aniqlanadigan xodimning tashkilotlarda mehnat faoliyati amalga oshirilgan umumiy davr.

3. Budjet tashkilotlari tomonidan nafaqa budjet mablag‘lari hisobidan to‘lanadi.

Ish beruvchilar tomonidan nafaqa o‘z mablag‘lari hisobidan to‘lanadi.

Budjet tashkilotlaridan tashqari barcha yuridik shaxslarda va yakka tartibdagi tadbirkorlarda ishlovchi yangi tug‘ilgan bolani farzandlikka olgan yoki unga vasiy qilib belgilangan xodimga respublika budjeti mablag‘lari hisobidan beriladigan nafaqani qoplab berish tartibi 1¹-ilovaga muvofiq amalga oshiriladi.

Ish beruvchilarning ushbu nafaqani to‘lash bo‘yicha majburiyatlari O‘zbekiston Respublikasi Prezidenti huzuridagi Ijtimoiy himoya milliy agentligi tomonidan respublika budjeti mablag‘lari hisobidan beriladigan nafaqa miqdorida kamaytiriladi.

4. Xodimga nafaqa, agar uni olish huquqi ish beruvchi bilan yakka tartibdagi mehnatga oid munosabatlarda bo‘lgan davrda (sinov davri hamda ishdan bo‘shatilgan kunni ham qo‘shib) paydo bo‘lsa, beriladi.

5. Vaqtinchalik mehnatga layoqatsizlik, shuningdek, homiladorlik va tug‘ish ta’tili, yangi tug‘ilgan bolani farzandlikka olgan yoki unga vasiy qilib belgilangan xodimga beriladigan ta’til kunlari xodimning ishdan noqonuniy bo‘shatilgani to‘g‘risida nizo ko‘rib chiqilayotgan davrga to‘g‘ri kelgan hollarda, u ishga tiklangan yoki sud tomonidan mehnat shartnomasi qonunga xilof ravishda bekor qilinganligi bo‘yicha qaror qabul qilingan taqdirdagina (barcha mehnatga layoqatsiz davr uchun), nafaqa olish huquqiga ega bo‘ladi.

6. Nafaqa to‘lash muddatlari jamoa shartnomasida yoki ichki hujjatda, ular mavjud bo‘lmaganda esa mehnat shartnomasida shart qilib ko‘rsatilgan muddatlarda belgilanadi, lekin mehnatga layoqatsizlik varaqasi taqdim etilgandan kundan boshlab o‘n olti kalendar kundan ko‘p bo‘lmasligi lozim (qonunchilikda belgilangan ish haqi bir oyda bir marta to‘lanadigan xodimlar toifasi bundan mustasno).

7. Vaqtinchalik mehnatga layoqatsizlik nafaqasi quyidagi hollarda beriladi:

vaqtinchalik mehnat layoqatini yo‘qotish bilan bog‘liq kasallik vaqtida (shikastlanishda);

sanatoriy va sog‘lomlashtirish muassasalarida davolanganda;

kasallangan oila a’zosini parvarishlash zarur bo‘lganda;

karantinda;

sil yoki kasb kasalligi tufayli vaqtincha boshqa ishga o‘tkazilganda;

mehnat layoqatini tiklash yoki yasama a’zo (protez) qo‘ydirish uchun reabilitatsiya muassasalariga yotqizilganda.

8. Vaqtinchalik mehnatga layoqatsizlik nafaqasini tayinlash uchun faqat qonunchilikda belgilangan tartibda berilgan mehnatga layoqatsizlik varaqasi asos bo‘ladi.

Mehnatga layoqatsizlik varaqasi yo‘qolgan hollarda, nafaqa, uning o‘rniga takroriy berilgan vaqtincha mehnatga layoqatsizlik varaqasi (dublikat) asosida beriladi.

9. Vaqtinchalik mehnatga layoqatsizlik nafaqasi mehnat layoqati yo‘qolgan birinchi kundan boshlab u tiklangunga qadar yoki O‘zbekiston Respublikasi Prezidenti huzuridagi Ijtimoiy himoya milliy agentligi hamda uning hududiy bo‘linmalari tomonidan nogironlik belgilangunga qadar, hatto bu davrda xodim bilan mehnat shartnomasi bekor qilingan hollarda ham beriladi.

10. Oliy, o‘rta maxsus, kasb-hunar ta’lim tashkilotlarini, magistratura, klinik ordinatura, tayanch doktorantura va doktoranturani tamomlagan hamda belgilangan tartibda ishga yuborilgan shaxslarga nafaqa mehnat shartnomasiga ko‘ra ular ishga chiqishi lozim bo‘lgan kundan boshlab beriladi.

11. Ish haqi, sutkalik va ko‘chish bo‘yicha xarajatlarni olish huquqiga ega bo‘lgan xodimga ish joyiga borayotgan davrda boshlangan mehnatga layoqatsizlik kunlari uchun nafaqa to‘lanadi.

12. Xodimning mehnatga layoqatsizlik kunlari yillik (asosiy va qo‘shimcha) ta’til davriga to‘g‘ri kelgan hollarda, mehnatga layoqatsizlik varaqasida ko‘rsatilgan davr uchun nafaqa to‘lanadi.

13. Sanatoriy va sog‘lomlashtirish muassasalarida davolanishda, agar asosiy va qo‘shimcha ta’til xodimning sanatoriy va sog‘lomlashtirish muassasalarida davolanishi uchun yetarli bo‘lmasa, nafaqa beriladi. Bunday holda sanatoriy va sog‘lomlashtirish muassasalarida davolanishning barcha davri uchun (yo‘llanma, davolanish muddati) sanatoriy va sog‘lomlashtirish muassasalariga borish-kelish vaqtini qo‘shib, ammo xodimning yillik ta’tilini chiqarib tashlagan holda nafaqa beriladi.

Baynalminal jangchilarga, Chernobil AES falokati oqibatlarini tugatishda qatnashgan, shuningdek, sanatoriy va sog‘lomlashtirish muassasalariga davolanishni davom ettirish uchun davolash muassasalaridan o‘tkir miokard infarkti bilan kasallangan, jarrohlik uslubi bilan yurakni aortakoronar shuntirlash va anevrizmlari, oshqozonning yaralik kasalligi, o‘n ikki barmoq ichak kasalligidan davolangan va o‘t pufagini olib tashlashdan keyin bevosita yuborilgan, shuningdek, sil kasalligi bilan og‘rigan xodimlarga nafaqa sanatoriy va sog‘lomlashtirish muassasalarida bo‘lgan barcha vaqt uchun beriladi.

O‘n olti yoshgacha nogironligi bo‘lgan bolani tarbiyalayotgan ota-onalardan biriga (homiyga yoki vasiyga), nogironligi bo‘lgan bolaning sanatoriy va sog‘lomlashtirish muassasalarida davolangan barcha davri uchun (sanatoriy va sog‘lomlashtirish muassasalariga borib-kelish vaqtini hisobga olib) unga yakka tartibda parvarish zarurligi to‘g‘risidagi tibbiy xulosa mavjud bo‘lganda nafaqa beriladi.

14. Uch yoshgacha bolani yoki 16 yoshgacha nogironligi bo‘lgan bolani parvarishlash bilan band bo‘lgan ona yoki ota kasal bo‘lib, bolani parvarishlashga qurbi yetmay qolgan hollarda, parvarish bilan band bo‘lgan ishlayotgan boshqa oila a’zolari yoki qarindoshlariga (mehnatga layoqatsizlik varaqasiga asosan) nafaqa beriladi.

15. Agarda xodim karantin choralari amalga oshirilayotgan vaqtda sanitariya-epidemiologiya xizmati organlari tomonidan atrofidagi shaxslar orqali yuqumli kasallikka chalinish xavfining oldini olish maqsadida ishdan chetlatilgan bo‘lsa, nafaqa beriladi.

16. Sil kasalligi yoki kasb kasalligiga chalingan xodim davolanish qoidasini buzmagan holda boshqa ishni bajarish imkoniga ega bo‘lib, u tibbiy-maslahat komissiyasi xulosasi (bunday komissiyalar bo‘lmagan joylarda esa davolovchi shifokorning, davolash muassasasining bosh shifokori tomonidan tasdiqlangan xulosasi) asosida vaqtincha boshqa ishga o‘tkazilishi mumkin.

Kasb kasalligi oqibatida boshqa ishga o‘tkazilgan shaxslarga nafaqa, agar u amaldagi qonunchilik hujjatlariga binoan avvalgi ish haqi bilan yangi ish haqi o‘rtasidagi farqni ish beruvchilardan olish huquqiga ega bo‘lmasa beriladi.

Basharti, mehnatga layoqatsizlik varaqasida ko‘rsatilgan muddatda ish beruvchi xodimga boshqa ish topib bera olmagan bo‘lsa, u holda shuning oqibatida bekor o‘tgan ish kunlari uchun nafaqa umumiy asoslarda to‘lanadi.

17. Reabilitatsiya muassasalarida bo‘lgan barcha vaqt va unga kelib-ketish vaqti uchun nafaqa to‘lanadi.

18. Mavsumiy va vaqtinchalik ishlarda band bo‘lgan xodimlarga mehnatda mayiblanish yoki kasb kasalligi oqibatida vaqtinchalik mehnatga layoqatsizlik, homiladorlik va tug‘ish bo‘yicha nafaqa umumiy asoslarda, boshqa sabablar oqibatidagi vaqtinchalik mehnatga layoqatsizlik nafaqasi mavsumiy yoki vaqtinchalik ish to‘g‘risida tuzilgan mehnat shartnomasida ko‘rsatilgan ish kunlari doirasida to‘lanadi.

19. Vaqtinchalik mehnatga layoqatsizlik quyidagi davrlarga to‘g‘ri kelganda nafaqa to‘lanmaydi:

ish haqi saqlanmagan ta’til;

ish haqi qisman saqlanadigan ta’til;

bolani parvarishlash bo‘yicha ta’til;

ish vaqtincha to‘xtatilgan (ish haqi saqlanmagan vaqtda);

xodim ishdan (lavozimdan) chetlashtirilib, ish haqi to‘lash to‘xtatib qo‘yilganligi sababli ishlamagan;

harbiy o‘quv yoki tekshiruv yig‘ini;

ishlab chiqarishdan ajralmagan holda o‘quv yurtlarida tahsil olish munosabati bilan berilgan o‘quv ta’tili vaqtida.

Ushbu davrlardan boshlanib davom etayotgan vaqtinchalik mehnatga layoqatsizlik nafaqasi xodim ishga chiqishi (lavozimga tiklanishi) lozim bo‘lgan kundan boshlab beriladi.

20. Vaqtinchalik mehnatga layoqatsizlik nafaqasi quyidagi hollarda berilmaydi:

ishdan yoki boshqa vazifalardan bo‘yin tovlash maqsadida o‘z salomatligiga ataylab ziyon yetkazgan yoxud o‘zini kasallikka solganda;

giyohvandlik yoki mastlik bilan bog‘liq harakatlar oqibatida, shuningdek, spirtli va giyohvandlik moddalarini iste’mol qilish natijasida kasallikka chalinganda (jarohatlanganda);

jinoyat sodir qilish vaqtida jarohatlanganda;

sud qarori asosida majburiy davolanishga yuborilganda (ruhiy kasallardan tashqari);

hibsda bo‘lgan davrda;

sud-tibbiyot ekspertizasidan o‘tish davrida.

21. Vaqtinchalik mehnatga layoqatsizlik boshlanishidan oldin uzrsiz sabablarga ko‘ra ishga kelmagan, ular uchun shifokor belgilagan tartibni buzgan yoki uzrsiz sabablarga ko‘ra belgilangan muddatda shifokor ko‘rigiga yoki O‘zbekiston Respublikasi Prezidenti huzuridagi Ijtimoiy himoya milliy agentligi hamda uning hududiy bo‘linmalariga kelmagan xodimlar qoidani buzgan kundan boshlab ish beruvchilar tomonidan to‘lanadigan nafaqadan mahrum qilinadilar.

22. Vaqtinchalik mehnatga layoqatsizlik nafaqasi ish stajining davomiyligidan qat’i nazar, o‘rtacha ish haqining 100 foizi miqdorida quyidagilarga to‘lanadi:

baynalminal jangchilarga;

qaramog‘ida 16 yoshga (o‘quvchilar 18 yoshga) yetmagan uch yoki undan ortiq bolalari bo‘lgan xodimlarga;

Chernobil AESdagi avariya oqibatlarini tugatishda qatnashgan xodimlarga;

Chernobil AESdagi avariya natijasida radioaktiv ifloslanish zonasidan evakuatsiya qilingan va ko‘chirilgan, qon hosil qiluvchi organlar kasalliklari (o‘tkir leykoz), qalqonsimon bez (adenoma, rak) va xavfli o‘smalar bilan bog‘liq kasalliklarga chalingan xodimlarga;

mehnatda mayiblanish va kasb kasalligi natijasida vaqtinchalik mehnatga layoqatsiz bo‘lgan xodimlarga;

pandemiya, texnogen, tabiiy va ekologik tusdagi favqulodda vaziyatlar yuzaga kelgan hollarda, ushbu favqulodda vaziyatlarga sababchi bo‘lgan infeksiyasi bilan zararlanishi yoki zararlangan deb gumon qilinishi munosabati bilan karantinga joylashtirilgan va 14 yoshgacha bo‘lgan bolasini parvarish qilayotgan ota-onalarga (ularning o‘rnini bosuvchi shaxslar, vasiylar, homiylar).

23. Ijtimoiy ahamiyatga ega bo‘lgan kasalliklar (sil kasalligi, onkologiya kasalliklari, yangidan paydo bo‘ladigan xatarli o‘simtalar, jinsiy yo‘l bilan o‘tadigan kasalliklar, OITS, moxov (lepra) kasalligi, ruhiy kasalliklar) bo‘yicha hisobda turgan xodimlarga umumiy ish stajining davomiyligiga bog‘liq ravishda vaqtinchalik mehnatga layoqatsizlik nafaqasi quyidagi miqdorlarda to‘lanadi:

a) umumiy ish staji 8 yil va undan ortiq bo‘lgan xodimlarga o‘rtacha oylik ish haqining 100 foizi miqdorida;

b) umumiy ish staji 5 yildan 8 yilgacha bo‘lgan xodimlarga o‘rtacha oylik ish haqining 80 foizi miqdorida;

v) umumiy ish staji 5 yilgacha bo‘lgan xodimlarga o‘rtacha oylik ish haqining 60 foizi miqdorida.

24. Mazkur Nizomning 22 va 23-bandlarida nazarda tutilgan xodimlardan tashqari qolgan xodimlarga vaqtinchalik mehnatga layoqatsizlik nafaqasi quyidagi miqdorlarda to‘lanadi:

a) umumiy ish staji 8 yil va undan ortiq bo‘lgan xodimlarga hamda 21 yoshga yetmagan chin (sag‘ir) yetimlarga o‘rtacha oylik ish haqining 80 foizi miqdorida;

b) umumiy ish staji 8 yilgacha bo‘lgan xodimlarga o‘rtacha oylik ish haqining 60 foizi miqdorida.

25. O‘zbekiston Respublikasi Qurolli Kuchlari safida muddatli xizmatdan bo‘shatilgandan so‘ng bir oy ichida kasal bo‘lib qolgan sobiq harbiy xizmatchilarga vaqtinchalik mehnatga layoqatsizlik nafaqasi — respublikada belgilangan mehnatga haq to‘lashning eng kam miqdorida to‘lanadi.

26. Nafaqa miqdori vaqtincha mehnatga layoqatsizlik boshlangan kungacha mehnat daftarchasi yoxud elektron mehnat daftarchasi, uning o‘rniga berilgan boshqa hujjat asosida hisoblangan umumiy ish stajiga muvofiq aniqlanadi.

27. Vaqtinchalik mehnatga layoqatsizlik nafaqasini tayinlash uchun umumiy ish stajini aniqlash va hisoblashda Vazirlar Mahkamasining 2022-yil 13-oktabrdagi 592-son qarori bilan tasdiqlangan Davlat pensiyalarini tayinlash va to‘lash tartibi to‘g‘risidagi nizomda belgilangan pensiyalarni tayinlash uchun ish stajini hisoblab chiqish tartibi tatbiq etiladi.

28. Homiladorlik va tug‘ish bo‘yicha hamda yangi tug‘ilgan bolani farzandlikka olgan yoki unga vasiy qilib belgilangan (sudning hal qiluv qarori va hokimning vasiy yoki homiy tayinlash bo‘yicha qarori bo‘yicha) xodimga beriladigan nafaqalarni tayinlash va to‘lash uchun belgilangan tartibda berilgan mehnatga layoqatsizlik varaqasi asos bo‘ladi.

29. Mehnatga layoqatsizlik varaqasi yo‘qolgan hollarda, nafaqa uning o‘rniga takroriy berilgan vaqtincha mehnatga layoqatsizlik varaqasi (dublikat) asosida beriladi.

30. Homiladorlik va tug‘ish bo‘yicha nafaqa (shu jumladan, homila tushgan hollarda) hamda yangi tug‘ilgan bolani farzandlikka olgan yoki unga vasiy qilib belgilangan xodimga beriladigan nafaqa mehnatga layoqatsizlik varaqasida ko‘rsatilgan barcha davr uchun to‘lanadi.

31. Xodim ishdan bo‘shatilishining noto‘g‘riligi haqida nizo yuzaga kelgan davrda homiladorlik va tug‘ish bo‘yicha ta’til hamda yangi tug‘ilgan bolani farzandlikka olgan yoki unga vasiy qilib belgilangan xodimga ta’til berilganda, nafaqa u ishga qayta tiklangan yoki mehnat shartnomasi qonunga xilof ravishda bekor qilinganligi bo‘yicha qaror qabul qilingan taqdirda beriladi. Bunda homiladorlik va tug‘ish bo‘yicha hamda yangi tug‘ilgan bolani farzandlikka olgan yoki unga vasiy qilib belgilangan xodimga beriladigan nafaqalar qaror qabul qilingandan so‘ng to‘lanmagan barcha mehnatga layoqatsiz davr uchun to‘lanadi.

32. Oliy, o‘rta maxsus, kasb-hunar ta’lim tashkilotlarini, magistratura, tayanch doktorantura, klinik ordinatura, doktoranturani tamomlagan va belgilangan tartibda ishga yuborilgan xodimlarga ishni boshlagunga qadar nafaqalar berilgan mehnatga layoqatsizlik varaqasi asosida mehnat shartnomasiga ko‘ra xodim ishga kelishi lozim bo‘lgan kundan boshlab beriladi.

33. Ish haqi saqlanmagan holda ishi vaqtinchalik to‘xtatilgan yoki ishdan (lavozimdan) chetlashtirish oqibatida xodim ishlamagan davrda homiladorlik va tug‘ish bo‘yicha ta’til hamda yangi tug‘ilgan bolani farzandlikka olgan yoki unga vasiy qilib belgilangan xodimga ta’til berilganda, nafaqa ko‘rsatilgan davr tugagandan keyin xodim ishga chiqishi lozim bo‘lgan kundan boshlab beriladi.

34. Xodim yillik (asosiy va qo‘shimcha) ta’tilda va bolani parvarishlash uchun ta’tilda bo‘lgan vaqtda homiladorlik va tug‘ish bo‘yicha ta’til hamda yangi tug‘ilgan bolani farzandlikka olgan yoki unga vasiy qilib belgilangan xodimga ta’til berilganda, nafaqa ta’tilning mehnatga layoqatsizlik varaqasida ko‘rsatilgan barcha kunlari uchun beriladi.

35. Homiladorlik va tug‘ish bo‘yicha hamda yangi tug‘ilgan bolani farzandlikka olgan yoki unga vasiy qilib belgilangan xodimga beriladigan nafaqalar xodim:

ishga qabul qilingan kundan 12 oygacha ish stajiga ega bo‘lganda — o‘rtacha oylik ish haqining 75 foizi;

ishga qabul qilingan kundan 12 oy ortiq ish stajiga ega bo‘lganda — o‘rtacha oylik ish haqining 100 foizi miqdorida to‘lanadi.

36. Nafaqalar barcha hollarda xodimning haqiqiy ish haqidan hisoblab chiqariladi.

37. Nafaqalar bo‘yicha o‘rtacha ish haqi O‘zbekiston Respublikasi Mehnat kodeksining 257-moddasi, mazkur Nizom va mehnat to‘g‘risidagi qonunchilik hujjatlarida belgilangan tartibda hisoblanadi.

38. Nafaqaning umumiy summasi kunlik o‘rtacha ish haqini ushbu oyda vaqtinchalik mehnatga layoqatsizlik, homiladorlik va tug‘ish ta’tili hamda yangi tug‘ilgan bolani farzandlikka olgan yoki unga vasiy qilib belgilangan xodimga beriladigan ta’til tufayli ishga kelmagan ish kunlari soniga ko‘paytirish yo‘li bilan aniqlanadi.

39. Agar vaqtinchalik mehnatga layoqatsizlik yoki homiladorlik va tug‘ish ta’tili hamda yangi tug‘ilgan bolani farzandlikka olgan yoki unga vasiy qilib belgilangan xodimga beriladigan ta’til davrida ish haqi o‘zgargan bo‘lsa, shu davrdan boshlab nafaqa miqdori ham tegishli ravishda qayta hisoblab chiqariladi.

40. Nafaqalar o‘rindoshlik asosidagi (shu jumladan, ichki o‘rindoshlik asosidagi) ish joyi bo‘yicha ham alohida to‘lanadi, sog‘liqni saqlash muassasasi tomonidan berilgan mehnatga layoqatsizlik varaqasining belgilangan tartibda tasdiqlangan nusxasi o‘rindoshlik asosidagi ish joyidan nafaqa olish uchun asos hisoblanadi.

41. Vaqtinchalik mehnatga layoqatsizlik, homiladorlik va tug‘ish ta’tili hamda yangi tug‘ilgan bolani farzandlikka olgan yoki unga vasiy qilib belgilangan xodimga beriladigan ta’til ish vaqtida boshlanib, tashkilot (sex, bo‘lim) ishni vaqtincha to‘xtatishi davrida davom etsa, nafaqa o‘sha kasb va malakaga ega bo‘lgan xodimlarga mana shu to‘xtatilgan davr uchun to‘lanadigan ish haqi miqdorida beriladi. Bunda nafaqa miqdori umumiy qoidalar bo‘yicha hisoblangan va olishi lozim bo‘lgan nafaqa miqdoridan oshmasligi lozim.

42. Agar vaqtinchalik mehnatga layoqatsizlik yoki homiladorlik va tug‘ish ta’tili hamda yangi tug‘ilgan bolani farzandlikka olgan yoki unga vasiy qilib belgilangan xodimga beriladigan ta’til ishning vaqtincha to‘xtatilgan davrida boshlangan bo‘lsa, ish to‘xtatib qo‘yilgan davr uchun (bekor turib qolingan vaqt uchun) nafaqa quyidagi miqdorida beriladi:

ish beruvchining aybi bilan bekor turib qolingan vaqt uchun (iqtisodiy, texnologik, texnik yoki tashkiliy sabablarga ko‘ra ishni vaqtincha to‘xtatib turish) xodimning to‘liq miqdorida;

ish beruvchiga va xodimga bog‘liq bo‘lmagan sabablarga ko‘ra bekor turib qolingan vaqt uchun bekor turib qolingan vaqtga mutanosib ravishda nafaqaning uchdan ikki qismi miqdorida.

43. Agar xodim mehnatga layoqatsizlik varaqasini ish haqiga tuman koeffitsiyenti va ustamalar belgilangan joylarda ishlash davrida olgan bo‘lsa, bu joylardan tashqarida bo‘lgan vaqt uchun vaqtinchalik mehnatga layoqatsizlik nafaqasi (shu jumladan, mehnatda mayiblanish yoki kasb kasalligi munosabati bilan) ustamalar hisobga olinmagan holda hisoblab chiqariladi.

Ushbu qoida homiladorlik va tug‘ish nafaqasi va yangi tug‘ilgan bolani farzandlikka olgan yoki unga vasiy qilib belgilangan xodimga beriladigan nafaqani hisoblab chiqarishda qo‘llanilmaydi.

44. Ish haqiga ustama yoki muayyan muddatga yoxud muayyan joyda vaqtinchalik bo‘lganligi uchun ish haqiga oshirilgan koeffitsiyent belgilangan xodimga nafaqa bu ustama yoki koeffitsiyent hisobga olingan holda, ustama yoxud oshirilgan koeffitsiyent belgilangan kungacha yoki vaqtinchalik bo‘lganligi munosabati bilan ular to‘langan joydan chiqib ketgan kungacha beriladi.

45. Ish sharoitlariga ko‘ra yilning turli davrlari bo‘yicha turlicha ish haqlari belgilangan taqdirda (daryo floti ekipajlari a’zolaridan tashqari), nafaqa xodim o‘z ish joyida qolganda oladigan ish haqi miqdoriga qarab belgilanadi. Vaqtinchalik mehnatga layoqatsizlik ma’lum bir davrda boshlanib, ikkinchi davrda davom etgan taqdirda ikkinchi davrning ish haqi bo‘yicha nafaqa ishlovchilar uchun ish haqi o‘zgargan muddatdan boshlab to‘lanadi. Mehnatga ishbay asosida haq to‘langanda yuqorida qayd etilgan hollarning ikkinchi davri uchun nafaqa xodimning tarif stavkasidan kelib chiqqan holda to‘lanadi.

46. Daryo floti ekipajlari a’zolariga nafaqa vaqtinchalik mehnatga layoqatsizlik yoki homiladorlik va tug‘ish ta’tili hamda yangi tug‘ilgan bolani farzandlikka olgan yoki unga vasiy qilib belgilangan xodimga beriladigan ta’til boshlangan yildan oldingi kalendar yildagi haqiqiy ish haqidan hisoblab chiqariladi. Vaqtinchalik mehnatga layoqatsizlik sodir bo‘lgan yilda ishga kirgan shaxslarga, shuningdek, to‘liq kalendar yil ishlamaganlar uchun nafaqani hisoblab chiqarishda vaqtinchalik mehnatga layoqatsizlik sodir bo‘lgan davrdan oldingi vaqtdagi ish haqi inobatga olinadi.

Dam olish kunlari (otgul) uchun nafaqa lavozim maoshidan (tarif stavkasidan) kelib chiqqan holda to‘lanadi.

Daryo floti ekipajlarining vaqtinchalik mehnatga layoqatsizlik (homiladorlik va tug‘ish ta’tili hamda yangi tug‘ilgan bolani farzandlikka olgan yoki unga vasiy qilib belgilangan xodimga beriladigan ta’tili) kunlari haq to‘lanmaydigan zaxirada (rezervda) bo‘lgan davrga to‘g‘ri kelgan hollarda nafaqa to‘lanmaydi.

47. Ish soatlarini hisoblab chiqish imkoni bo‘lmagan xodimlarga (uy ishchilarga, qishloq xo‘jaligi mahsulotlari, ikkilamchi va boshqa xil ashyolarning shtatli tayyorlovchilariga, oziq-ovqat chiqindilarini yig‘uvchilarga, tarqatish va tashish savdosi sotuvchilariga, suratga olish tashkilotlari agentlariga va boshqa shunday toifadagi xodimlarga) nafaqa vaqtinchalik mehnatga layoqatsizlik yoki homiladorlik va tug‘ish munosabati bilan beriladigan hamda yangi tug‘ilgan bolani farzandlikka olgan yoki unga vasiy qilib belgilangan xodimga beriladigan ta’tilning barcha kalendar kunlariga to‘lanadi.

48. Xodimlar qayta tayyorlash va ularning malakasini oshirishga ish beruvchilar tomonidan yuborilganda va o‘qish davrida nafaqalar ularning ish haqlari to‘liq yoki qisman saqlangan taqdirda, umumiy asoslarda beriladi.

49. Ishlab chiqarish amaliyoti davrida ish haqi to‘lanadigan ish o‘rinlariga yoki lavozimlarga tayinlangan oliy o‘quv yurtlari talabalariga, o‘rta maxsus, kasb-hunar ta’lim tashkilotlari, umumiy o‘rta ta’lim tashkilotlari o‘quvchilariga ishlab chiqarish amaliyotini o‘tash kunlariga to‘g‘ri kelganda nafaqa ishlab chiqarish amaliyoti o‘tayotgan joylaridan umumiy asoslarda, lekin ishlab chiqarish amaliyoti yakunlanishi lozim bo‘lgan kunga qadar to‘lanadi.

Ushbu tartib qurilish obyektlarida va iqtisodiyotning boshqa tarmoqlarida talabalar guruhlarida ishlayotgan o‘quvchilarga ham joriy etilib, nafaqa miqdori guruhda olgan ish haqidan hisoblab chiqariladi va ish joyidan beriladi.

50. Oliy, o‘rta maxsus, kasb-hunar ta’lim tashkilotlarini, magistratura, tayanch doktorantura, klinik ordinatura, doktoranturani tugatgan va belgilangan tartibda ishga yuborilgan shaxslarga nafaqaning miqdori umumiy qoidalar bo‘yicha hisoblab chiqarish va ularning egallashlari lozim bo‘lgan lavozim maoshlaridan kelib chiqqan holda belgilanadi.

51. Axloq tuzatish ishlariga hukm qilingan shaxslarga nafaqa umumiy asoslarda beriladi. Bunda avvalgi ish joylarida jazoni o‘tayotgan shaxslarga nafaqa miqdori jazoni o‘tash boshlanishiga qadar bo‘lgan umumiy ish stajiga qarab belgilanadi.

Mazkur nafaqalar sud hukmi bilan ularning ish haqlaridan undirishlar ushlab qolingan holda to‘lanadi.

52. Nafaqalar xodimning asosiy ish joyidan tashkilotning Nafaqa tayinlash komissiyasi (keyingi o‘rinlarda — Komissiya) yoki ish beruvchi tomonidan buyruq bilan vakil qilingan shaxs (keyingi o‘rinlarda — vakil qilingan shaxs) tomonidan tayinlanadi. Komissiya tarkibi, a’zolari soni va raisi ish beruvchining buyrug‘i yoki boshqaruvining qarori bilan tasdiqlanadi.

53. Komissiya yoki vakil qilingan shaxs nafaqa to‘lashga asos bo‘luvchi hujjatlarni ko‘rib chiqish jarayonida o‘ziga ma’lum bo‘lgan, sir saqlanishi lozim bo‘lgan ma’lumotlarni oshkor qilmasligi lozim.

54. Xodimlar vaqtinchalik mehnatga layoqatsizlik muddati tugaganidan so‘ng ishga chiqishining birinchi kunidayoq tashkilotning kadrlar bo‘limi yoki ish beruvchi tomonidan tayinlangan kadrlar bo‘yicha mas’ulga (keyingi o‘rinlarda — kadrlar bo‘limi) mehnatga layoqatsizlik varaqasini taqdim etadilar. Mehnatga layoqatsizlik davom etayotgan hollarda, navbatdagi ish haqi berilishi vaqti kelganda topshirilishi mumkin.

55. Nafaqani olish uchun masofadan turib ishlovchi xodim mehnatga layoqatsizlik varaqasining aslini, agar xodim o‘rindosh bo‘lsa, hujjatlarning ko‘chirma nusxalarini ish beruvchiga ma’lum qilinadigan buyurtma xat bilan pochta orqali yuboradi.

56. Ish beruvchilarda mehnatga layoqatsizlik varaqasining tegishli bandlari kadrlar bo‘limi tomonidan shu kunning o‘zida zarur ma’lumotlar yozilishini ta’minlaydi va mehnatga layoqatsizlik varaqasini (bemor haqidagi ma’lumotlar yozilib, imzo qo‘yilgan holda) Komissiyaga yoki vakil qilingan shaxsga topshiradi.

57. Mehnatda mayiblanish tufayli vaqtinchalik mehnatga layoqatsizlik boshlanganda nafaqa ishlab chiqarishda baxtsiz hodisa sodir bo‘lganlik haqidagi (N-1-shaklda) dalolatnoma asosida tayinlanadi.

Agar baxtsiz hodisa boshqa sharoitlarda ro‘y bersa (uyda, ishga borish yoki ishdan qaytishda, davlat yoki jamoatchilik burchini bajarayotgan paytda), nafaqa ro‘y bergan baxtsizlik sabablari ish beruvchi tomonidan o‘rganib chiqilgandan keyingina tayinlanadi.

58. Quyidagi sharoitlarda yuz bergan (jinoyat sodir qilish vaqtida jarohatlanish hollaridan tashqari) jarohatlanish mehnatda mayiblanish deb hisoblanadi:

mehnat burchini bajarayotgan paytda (shu jumladan, xizmat safari vaqtida), shuningdek, maxsus topshiriq bo‘lmagan hollarda ham ish beruvchilar manfaatini ko‘zlab amalga oshirilgan xatti-harakatlar paytida;

ish beruvchining transportida ishga borayotgan yoki ishdan qaytayotganda;

ish vaqti davomida (shu jumladan belgilangan tanaffus vaqtida) tashkilot hududida yoki biron-bir boshqa ish joyida, ish boshlashdan oldin yoki ishdan keyin ish qurollarini, kiyim-kechaklarini va hokazolarni tartibga keltirish paytlarida;

ichki mehnat tartib-qoidalariga zid bo‘lmagan taqdirda, ish vaqti davomida tashkilotga yaqin bo‘lgan joyda yoki boshqa ish joyida (belgilangan tanaffuslarda) hozir bo‘lganda;

asosiy ish bilan bog‘liq bo‘lmasa ham, davlat va jamoatchilik oldidagi burchlarini bajarayotgan chog‘ida;

inson hayotini qutqarish, huquq-tartibotni, davlat va jamoat mulkini, shuningdek, fuqarolar mulklarini muhofaza qilish bo‘yicha fuqarolik burchini bajarayotgan paytida;

donorlik vazifalarini bajarish natijasida mehnatga layoqatining yo‘qotilishi.

59. Kasb kasalliklari bo‘yicha vaqtinchalik mehnatga layoqatsizlik nafaqasi tayinlashda Vazirlar Mahkamasining 2022-yil 8-fevraldagi 62-son qarori bilan tasdiqlangan Kasb kasalliklari ro‘yxatida ko‘rsatilgan kasalliklar hisobga olinadi.

60. Mazkur Nizomga binoan nafaqa olish huquqi Komissiya yoki vakil qilingan shaxs har bir mehnatga layoqatsizlik varaqasi bo‘yicha to‘lov amalga oshirilishi lozim bo‘lgan kunlar sonini va o‘rtacha oylik ish haqiga nisbatan belgilanadigan nafaqa foizi miqdorini belgilaydi. Nafaqa foizi miqdori nafaqa belgilash bayonnomasida va Komissiya raisi yoki vakil qilingan shaxs imzosi qo‘yilgan mehnatga layoqatsizlik varaqasida qayd qilinadi.

61. Mehnatda mayiblanish tufayli vaqtinchalik mehnatga layoqatsizlik nafaqasi Komissiya yoki vakil qilingan shaxs tomonidan (jarohatlangan xodimning ahvoli Komissiya majlisiga kelishga imkon bergan taqdirda, uning ishtirokida) tayinlanadi. Nafaqadan mahrum etish, nafaqadan to‘liq yoki qisman rad etish masalasi nafaqa oluvchining ishtirokida ko‘rib chiqiladi.

62. Xodim mehnatga layoqatsizlik varaqasi bo‘yicha nafaqa olish huquqiga ega bo‘lmagan taqdirda, Komissiya yoki vakil qilingan shaxs nafaqa bermaslik to‘g‘risida qaror chiqaradi va rad etish sabablarini mehnatga layoqatsizlik varaqasiga qayd etadi.

63. Nafaqa tayinlangandan so‘ng Komissiya yoki vakil qilingan shaxs tashkilotning hisob-kitob bo‘limiga (buxgalteriya) nafaqa chiqarish va to‘lash uchun belgilangan tartibda rasmiylashtirilgan mehnatga layoqatsizlik varaqasini topshiradi.

64. To‘lanadigan va to‘lanmaydigan mehnatga layoqatsizlik varaqalari, shuningdek, nafaqa olish uchun taqdim etilgan barcha boshqa hujjatlar tashkilot buxgalteriyasida pulli hujjatlarga teng holda, barcha xarajat hujjatlaridan alohida holda saqlanadi.

65. Ish vaqtini, umumiy ish stajini hisobga olib borish, nafaqalar to‘lash uchun hisob-kitoblarni bajarishda axborot-telekommunikatsiya tarmoqlari qo‘llaniladigan tashkilotlarda mehnatga layoqatsizlik varaqalari tashkilotning kadrlar bo‘limi tomonidan hisoblash markaziga topshiriladi. U yerda nafaqa tayinlash va hisoblab chiqarish to‘g‘risida ish beruvchi tomonidan belgilangan shaklda ikki nusxada ro‘yxat tuziladi.

66. Mehnatga layoqatsizlik varaqalari axborot-telekommunikatsiya tarmoqlarida hisob-kitoblarni chiqarish uchun mas’ul shaxsning imzosi qo‘yilgan ikki nusxadagi to‘lov ro‘yxati bilan birga aniq muddatlarda (maoshlar bo‘yicha hisob-kitob qilishga 5-6 kun qolganda) Komissiyaga yoki vakil qilingan shaxsga topshiriladi.

67. Komissiya yoki vakil qilingan shaxs hisob-kitobning, mehnatga layoqatsizlik varaqasining davolash muassasasi tomonidan (shuningdek, axborot-telekommunikatsiya tarmoqlari orqali) to‘ldirilishining to‘g‘riligini, zarur hollarda boshqa hujjatlarni ham (baxtsiz hodisalar to‘g‘risidagi dalolatnomalar va boshqalar) tekshiradi va nafaqa tayinlash, belgilangan hollarda esa nafaqadan mahrum qilish bo‘yicha qaror chiqaradi. Ikki nusxadagi to‘lov ro‘yxatlar Komissiya raisi yoki vakil qilingan shaxs tomonidan imzolanadi.

To‘lov ro‘yxatining bir nusxasi mehnatga layoqatsizlik varaqasi bilan buxgalteriyaga yuboriladi. Ular tekshiruvdan o‘tkazilgandan so‘ng bosh (katta) buxgalter tomonidan imzolanib, hisoblash markaziga uzil-kesil hisob-kitob qilish va nafaqa summasini ish haqi to‘lash ro‘yxatiga kiritish uchun qaytarib yuboriladi. Shundan so‘ng to‘lov ro‘yxati mehnatga layoqatsizlik varaqalari bilan saqlash uchun buxgalteriyaga topshiriladi.

To‘lov ro‘yxatining ikkinchi nusxasi esa nafaqa tayinlash bayonnomasi sifatida Komissiyada yoki vakil qilingan shaxsda saqlanadi.

Nafaqani hisoblashda mazkur bandda ko‘rsatilgan qoidaga muvofiq mehnatga layoqatsizlik varaqasining orqa tomoni to‘ldirilmaydi.

68. Axborot-telekommunikatsiya tarmoqlari yordamida faqat nafaqa miqdori hisoblab chiqiladigan tashkilotlarda nafaqa belgilash va mehnatga layoqatsizlik varaqalarini to‘ldirish (“Buxgalteriya tomonidan to‘ldiriladi” degan bo‘limdan tashqari) mazkur Nizomning 60, 61, 65, 66 va 67-bandlarida belgilangan tartibda amalga oshiriladi.

“Buxgalteriya tomonidan to‘ldiriladi” degan bo‘limdagi maosh va uning asosida chiqarilgan nafaqa miqdori haqidagi ma’lumot axborot-telekommunikatsiya tarmoqlarida tayyorlanganda, hisob-kitob ishlari uchun mas’ul shaxsning va bosh (katta) buxgalterning imzolari bo‘lgan to‘lov ro‘yxatida keltiriladi. To‘lov ro‘yxatlariga mehnatga layoqatsizlik varaqalari ilova qilinadi.

Nafaqalar axborot-telekommunikatsiya tarmoqlarida hisoblab chiqariladigan tashkilotlarda nafaqalarni tayinlash va mehnatga layoqatsizlik varaqalarini rasmiylashtirish xuddi shunday tartibda amalga oshiriladi.

69. Vaqtinchalik mehnatga layoqatsizlik nafaqalar, shu jumladan, sil kasalligi sanatoriy va sog‘lomlashtirish muassasalarida davolanish uchun beriladigan nafaqalar, ish haqi to‘lash uchun belgilangan muddatlarda to‘lanadi.

Boshqa turdagi sanatoriy va sog‘lomlashtirish muassasalarida davolanish uchun beriladigan nafaqalar xodim sanatoriy va sog‘lomlashtirish muassasalaridan qaytgandan so‘ng to‘lanadi. Bunda nafaqa, agar bir tomonga borish vaqti bir sutkadan ortiq bo‘lsa, sanatoriy va sog‘lomlashtirish muassasalarida bo‘lgan vaqt ko‘rsatilgan “yo‘llanmaning qaytish tomoni”, shuningdek, yo‘l chiptalari Komissiyaga yoki vakil qilingan shaxsga topshirilgandagina beriladi. Yo‘llanma bo‘yicha foydalanilmagan hamda sanatoriy va sog‘lomlashtirish muassasalarida, shuningdek, yetib borish yoki qaytish yo‘li belgilangan muddatdan ortiq bo‘lgan kunlar uchun nafaqa berilmaydi.

70. Homiladorlik va tug‘ish nafaqasi tug‘ishdan oldin amalda foydalanilgan kunlarning sonidan, yangi tug‘ilgan bolani farzandlikka olgan yoki unga vasiy qilib belgilangan xodimga beriladigan nafaqa amalda foydalanilgan kunlarning sonidan qat’i nazar, ta’tilning to‘liq davri uchun bir yo‘la to‘lanadi.

71. Tashkilot tugatilganda, mazkur Nizomga muvofiq nafaqa olish huquqiga ega bo‘lgan fuqarolarga, vaqtinchalik mehnatga layoqatsizlik hamda homiladorlik va tug‘ish nafaqasi, yangi tug‘ilgan bolani farzandlikka olgan yoki unga vasiy qilib belgilangan xodimga beriladigan nafaqa tugatilgan tashkilotning huquqiy vorisi yoki tugatish komissiyasi tomonidan beriladi.

72. Ortiqcha to‘lab yuborilgan nafaqa summasi, agar ortiqcha to‘lash sanashda (arifmetik) adashish yoki nafaqa oluvchining qalbaki ma’lumotnoma taqdim qilishi (hujjatlarga o‘zgartirish kiritish va boshqalar) tufayli sodir bo‘lgan bo‘lsa, nafaqa oluvchidan ushlab qolinadi.

73. Ushlab qolish keyingi safar to‘lanadigan nafaqa yoki ish haqidan amalga oshiriladi. Har safar xodim olishi kerak bo‘lgan summaning 20 foizidan ortiq bo‘lmagan summa ushlab qolinadi. Ushlab qolish tashkilotning hisob-kitob bo‘limi orqali Komissiyaning yoki ish beruvchining qarori asosida amalga oshiriladi.

Bu qaror sanash jarayonida yo‘l qo‘yilgan xato tufayli ortiqcha to‘lash sodir bo‘lganda, nafaqa tayinlangan kundan boshlab 3 oydan kechiktirmay, o‘z huquqini suiiste’mol qilish bo‘yicha sodir bo‘lganda esa, cheklanmagan muddatda qabul qilinishi mumkin.

74. Agar xodim mazkur tashkilotda ishlamayotgan bo‘lsa, unga ortiqcha to‘lab yuborilgan nafaqa summasi sud orqali undirilib olinadi. Nafaqa olishda suiiste’mollikka yo‘l qo‘yilsa (qalbaki hujjat taqdim etish, firibgarlik va boshqalar), hujjatlar qonunda belgilangan choralarni qo‘llash uchun huquqni muhofaza qilish organlariga yuboriladi.

75. Sudlarning qaroriga asosan nafaqalardan aliment, mayib bo‘lganlik va salomatlikka yetkazilgan va boshqa zararlarni qoplash bo‘yicha chegirilishi mumkin. Nafaqalardan boshqa hech qanday chegirma amalga oshirilmaydi.

76. Xodimning vafoti kunigacha olinmay qolgan nafaqa u bilan birga yashagan oila a’zolariga, shuningdek, uning qaramog‘ida bo‘lganlarga beriladi.

Xodimning vafot etgan kuniga qadar olinmagan nafaqa vafot etgan xodim bilan qarindosh va birga istiqomat qilganlik yoki vafot etganning qaramog‘ida bo‘lganlikni tasdiqlovchi dalil bo‘lgan hujjat topshirilganidagina berilishi mumkin.

77. Tashkilotning bosh buxgalteri Komissiya yoki vakil qilingan shaxs bilan bir qatorda nafaqa to‘lash bo‘yicha mablag‘larning to‘g‘ri sarflanishi uchun javobgardir.

78. Agar nafaqa tayinlash yoki xodimning umumiy ish stajini aniqlash paytida qonunchilikda ko‘zda tutilgan qoidalar buzilishiga yo‘l qo‘yilgan yoki to‘lov uchun taqdim qilingan hujjatlar noto‘g‘ri rasmiylashtirilgan bo‘lsa, bosh buxgalter to‘lovni amalga oshirmay, ularni yo‘l qo‘yilgan xatolar to‘g‘risidagi yozma bayonnoma bilan Komissiyaga yoki vakil qilingan shaxs qaytarib berishi shart.

79. Ish beruvchilar tomonidan mehnatni muhofaza qilish va texnika xavfsizligi qoidalari buzilishi oqibatida xodimning mehnatda mayib bo‘lganligi yoki kasb kasalligiga chalinganligi aniqlansa, ish beruvchilar ushbu shikastlanish va kasallik sababli berilgan vaqtinchalik mehnatga layoqatsizlik nafaqasini to‘lashga sarflangan barcha xarajatlarni qonunchilikda belgilangan tartibda qoplashi lozim.

80. Komissiya yoki vakil qilingan shaxs tomonidan qabul qilingan qaror ustidan ish beruvchiga shikoyat qilinishi mumkin.

81. Nafaqalarni noto‘g‘ri hisoblash, belgilash va to‘lash yuzasidan qonunchilik hujjatlarida belgilangan tartibda shikoyat qilish mumkin.

82. Ushbu Nizom talablari buzilishida aybdor bo‘lgan shaxslar qonunchilik hujjatlarida belgilangan tartibda javob beradilar.

1. Ushbu Nizom O‘zbekiston Respublikasida budjet tashkilotlaridan tashqari barcha yuridik shaxslarda (keyingi o‘rinlarda — yuridik shaxslar) va yakka tartibdagi tadbirkorlarda mehnat shartnomasiga asosan oxirgi 6 oy davomida uzluksiz ish stajiga ega bo‘lgan xodimlarga yangi tug‘ilgan bolani farzandlikka olganligi yoki unga vasiy qilib belgilanganligi munosabati bilan beriladigan nafaqaning (keyingi o‘rinlarda — nafaqa) bir qismini respublika budjeti mablag‘lari hisobidan tayinlash va to‘lash tartibini belgilaydi.

2. Mazkur Nizomda quyidagi asosiy tushunchalar qo‘llaniladi:

“Ijtimoiy himoya yagona reyestri” axborot tizimining alohida moduli — idoralararo elektron o‘zaro hamkorlik asosida nafaqani “proaktiv” shaklda tayinlash va to‘lashni nazarda tutuvchi “Ijtimoiy himoya yagona reyestri” axborot tizimining tarkibiy qismi (keyingi o‘rinlarda — “Yagona reyestr” AT);

nafaqa oluvchi — O‘zbekiston Respublikasi hududidagi yuridik shaxslar va yakka tartibdagi tadbirkorlarda oxirgi olti oy davomida uzluksiz ish stajiga ega bo‘lgan hamda yangi tug‘ilgan bolani farzandlikka olgan yoki unga vasiy qilib belgilangan xodim (yakka tartibdagi tadbirkor);

to‘lov ro‘yxat (vedomost)lari — nafaqa oluvchining familiyasi, ismi va otasining ismi, pasport ma’lumotlari, bank kartasi orqali to‘langanda tegishli tijorat banki hamda nafaqa oluvchining bank kartasi rekvizitlari va to‘lanishi lozim bo‘lgan nafaqa summasiga doir ma’lumotlar aks ettirilgan, nafaqa bo‘yicha to‘lovlarni amalga oshiruvchi tijorat bankiga elektron ko‘rinishda taqdim etiladigan hujjat.

3. Ushbu Nizom budjet tashkilotlarida, shu jumladan, o‘rindoshlik asosida ishlaydigan xodimlarga tatbiq etilmaydi.

4. Nafaqa tug‘ish vaqtida yoki tug‘ishdan keyingi davrda ona vafot etgan kundan boshlab, tug‘ilgan bolani (bolalarni) farzandlikka olgan yoki unga vasiy qilib belgilangan shaxsga (xodimga), bola tug‘ilgan kunidan e’tiboran ellik olti kalendar kuni, ikki yoki undan ortiq bola tug‘ilganda yetmish kalendar kunigacha bo‘lgan muddatda belgilangan tartibda rasmiylashtirilgan mehnatga layoqatsizlik varaqasi asosida tayinlanadi va to‘lanadi.

5. Nafaqa minimal iste’mol xarajatlarining 4 baravari miqdorida to‘lanadi.

Bunda nafaqaning miqdori u tayinlangan davrda amalda bo‘lgan minimal iste’mol xarajatlarining miqdoridan kelib chiqib belgilanadi.

6. Nafaqani to‘lash va noto‘g‘ri tayinlangan nafaqani qaytarish bilan bog‘liq xarajatlar respublika budjetidan O‘zbekiston Respublikasi Prezidenti huzuridagi Ijtimoiy himoya milliy agentligiga (keyingi o‘rinlarda — Agentlik) mazkur maqsadlarda ajratilgan mablag‘lari hisobidan amalga oshiriladi.

7. Nafaqa oluvchining asosiy ish joyi hisoblangan yuridik shaxslar va yakka tartibdagi tadbirkorlarning nafaqa to‘lash bo‘yicha majburiyatlari Agentlik tomonidan to‘langan nafaqa miqdorida kamaytiriladi.

8. Nafaqa “Yagona reyestr” AT tomonidan fuqarolarning murojaatlarisiz “proaktiv shakl”da tayinlanadi va to‘lanadi.

9. Belgilangan tartibda berilgan mehnatga layoqatsizlik varaqasi nafaqani tayinlash va to‘lash uchun asos bo‘ladi.

10. Mehnatga layoqatsizlik varaqasi hududiy ambulator-poliklinika yoki tug‘uruqxona muassasasi, shuningdek, mehnatga layoqatsizlik varaqasi berishga vakolatli boshqa tibbiy muassasalar tomonidan Sog‘liqni saqlash vazirligining Yagona tibbiy axborot tizimiga (keyingi o‘rinlarda — “Yagona tibbiy” AT) elektron shaklda rasmiylashtiriladi.

11. “Yagona tibbiy” AT tomonidan mehnatga layoqatsizlik varaqasi avtomatik ravishda “Yagona reyestr” ATga yuboriladi.

12. “Yagona reyestr” AT tomonidan mehnatga layoqatsizlik varaqasi to‘g‘risidagi ma’lumotlar kelib tushgandan so‘ng, avtomatik ravishda nafaqa oluvchining oxirgi olti oy davomida:

uzluksiz ish stajiga ega ekanligi va yuridik shaxsda bandligi “Yagona milliy mehnat tizimi” idoralararo dasturiy-apparat kompleksi (keyingi o‘rinlarda — “YAMMT” IDAK), yakka tartibdagi tadbirkorlarda bandligi Soliq qo‘mitasining ma’lumotlar bazasi orqali;

mehnatga haq to‘lash tarzidagi daromadlari mavjudligi — Soliq qo‘mitasining ma’lumotlar bazasi orqali;

budjet tashkilotlarida ishlashi yoki ishlamasligi Iqtisodiyot va moliya vazirligining “UzASBO” dasturiy majmuasi orqali avtomatik ravishda tekshiriladi.

13. Nafaqa oluvchining oxirgi olti oy davomidagi uzluksiz ish stajini hisoblashda, yuridik shaxslarda “YAMMT” IDAKdagi va yakka tartibdagi tadbirkorlarda Soliq qo‘mitasining ma’lumotlar bazasidagi mehnatga layoqatsizlik varaqasi rasmiylashtirilgan kunga qadar olti oy uzluksiz ish staji inobatga olinadi.

Bunda ushbu davrda o‘ttiz bir kundan ko‘p bo‘lmagan tanaffuslar bo‘lganda, mehnatga layoqatsizlik varaqasi rasmiylashtirilgan kundan oldingi o‘n ikki oy davomidagi ketma-ket davrlar ish stajini hisoblashda qo‘llaniladi. Agar oxirgi olti oy davomidagi uzluksiz ish staji davrida xodimning mehnatga haq to‘lash tarzidagi daromadlari mavjud bo‘lmasa, ushbu davr ish stajini hisoblashda inobatga olinmaydi.

Bolani parvarishlash uchun ta’tilda bo‘lgan xodimning ish stajini Soliq qo‘mitasining ma’lumotlar bazasi orqali tekshirishda uning ta’tilga chiqishidan oldingi davri hisobga olinadi.

14. Nafaqa xodim yillik (asosiy va qo‘shimcha) mehnat ta’tilida, bolani parvarishlash uchun ta’tilda yoki ish haqi saqlanmaydigan ta’tillarda bo‘lganda ham to‘lab beriladi.

15. Nafaqa oluvchining oxirgi olti oy davomidagi uzluksiz ish staji davridagi mehnatga haq to‘lash tarzidagi daromadlari mavjud bo‘lsa va “YAMMT” IDAKda ish staji to‘g‘risidagi ma’lumot bo‘lmagan taqdirda, bu haqda “Yagona reyestr” AT tomonidan avtomatik tarzda nafaqa oluvchining “Yagona tibbiy” ATda qayd etilgan mobil telefon raqamiga SMS-xabar, shuningdek, ish beruvchining Soliq qo‘mitasining ma’lumotlar bazasidagi va “YAMMT” IDAKdagi shaxsiy kabinetlariga xabarnoma yuboriladi.

Nafaqa oluvchining ish staji nomutanosibligi (noto‘g‘ri kiritilganligi yoki kiritilmaganligi) xabarnoma olingan oydan keyingi oyning oxirgi ish kuniga qadar “YAMMT” IDAKda ish beruvchi tomonidan to‘g‘rilanishi lozim.

16. Xabarnoma yuborilgan nafaqa oluvchilarning oxirgi olti oy davomidagi uzluksiz ish staji xabarnoma yuborilgan oydan keyingi oyning oxirgi ish kunida qayta tekshiriladi.

Nomutanosiblik to‘g‘rilanmagan hollarda, nafaqa tayinlashni rad etish to‘g‘risidagi qaror “Yagona reyestr” AT tomonidan avtomatik tarzda shakllantiriladi.

17. “Yagona reyestr” AT tomonidan nafaqa oluvchining oxirgi olti oy davomidagi uzluksiz ish staji, mehnatga haq to‘lash tarzidagi daromadlari va uning ishlashi tasdiqlanganda, nafaqani tayinlash to‘g‘risidagi qaror avtomatik tarzda shakllantiriladi.

18. “Yagona reyestr” AT tomonidan:

nafaqa tayinlash to‘g‘risidagi qaror qabul qilinganda, nafaqaning to‘lov shakli va muddati bo‘yicha;

nafaqa tayinlashni rad etish to‘g‘risidagi qaror qabul qilinganda, rad etish sabablari bo‘yicha nafaqa oluvchining “Yagona tibbiy” ATda qayd etilgan mobil telefon raqamiga SMS-xabar, shuningdek, ish beruvchining Soliq qo‘mitasining ma’lumotlar bazasidagi va “YAMMT” IDAKdagi shaxsiy kabinetlariga avtomatik tarzda xabarnoma yuboriladi.

19. Ushbu Nizomga muvofiq tayinlangan nafaqani to‘lab berish Agentlik tomonidan to‘g‘ridan-to‘g‘ri shartnoma asosida jalb etilgan tijorat banki tomonidan amalga oshiriladi.

20. “Yagona reyestr” AT tomonidan har oyning 10-sanasiga qadar nafaqa bo‘yicha to‘lov ro‘yxat (vedomost)lari tijorat bankiga taqdim etiladi hamda Agentlikning maxsus g‘azna hisobvarag‘idan zarur mablag‘lar belgilangan tartibda tijorat bankiga o‘tkazib beriladi.

Ushbu bandda ko‘rsatilgan muddatning oxirgi kuni bayram va dam olish kunlariga to‘g‘ri kelganda, to‘lov ro‘yxat (vedomost)lari va zarur mablag‘lar keyingi 2 ish kuni mobaynida tijorat bankiga taqdim etilishi va moliyalashtirilishi mumkin.

21. Nafaqani to‘lash uchun tijorat bankida alohida maxsus bank hisobvaraqlari ochiladi.

22. “Yagona reyestr” AT tomonidan to‘lov ro‘yxat (vedomost)lari bank kartasi bo‘yicha shakllantiriladi. Bunda tegishli banklararo reprotsessing markazlaridan nafaqa oluvchining nomiga ochilgan, aktiv holatda bo‘lgan, oxirgi oltmish kun davomida oxirgi tranzaksiya amalga oshirilgan bank plastik kartasi tanlab olinadi.

Nafaqa oluvchining bank kartasi bo‘lmaganda, to‘lov naqd pul ko‘rinishida amalga oshiriladi.

23. Tijorat banki tomonidan nafaqa to‘lov amalga oshiriladigan oyning 27-sanasiga qadar to‘lab beriladi.

24. Tijorat banki tomonidan nafaqani naqd pul ko‘rinishida nafaqa oluvchining murojaatiga asosan, biroq nafaqa tayinlanganligi to‘g‘risida SMS-xabar yuborilgan kundan boshlab to‘qson kun davomida belgilangan tartibda to‘lanadi.

25. Joriy oy mobaynida nafaqa oluvchilar tomonidan talab qilinmagan mablag‘larni tijorat bankining maxsus hisobvaraqlardan kelgusida to‘lash uchun Agentlik maxsus g‘azna hisobvarag‘iga qaytariladi.

26. Tijorat banki har oyning oxirgi ish kuniga qadar ushbu oy uchun va yil boshidan amalga oshirilgan to‘lovlar hamda to‘lanmagan mablag‘lar haqidagi ma’lumotlarni “Yagona reyestr” ATga taqdim etadi.

27. Nafaqa oluvchilarga tijorat banki tomonidan nafaqani naqd pul shaklida to‘lab berganlik uchun bank xizmat haqi miqdori tijorat banki va Agentlik o‘rtasida tuziladigan shartnomaga muvofiq, biroq naqd pul shaklida to‘lab berilgan nafaqa miqdorining 0,5 foizidan oshmagan miqdorda belgilanadi.

28. Nafaqa oluvchining vijdonsizligi yoki hisob-kitoblardagi xatoliklar tufayli noto‘g‘ri to‘langan nafaqa nafaqa oluvchi tomonidan Agentlikka bir oy ichida qaytarilishi lozim. Bunda ixtiyoriy ravishda qaytarilmagan yoki to‘liq qaytarilmagan mablag‘ sud tartibida undiriladi.

Ushbu bandda ko‘rsatilgan asoslardan boshqa sabablar bilan noto‘g‘ri to‘langan nafaqa xatolikka yo‘l qo‘ygan tashkilot xodimidan belgilangan tartibda undiriladi.

Noto‘g‘ri to‘langan nafaqa tijorat banki orqali nafaqa oluvchidan xizmat haqi undirilmagan holda qaytariladi.

29. Manfaatdor vazirliklar va idoralarning axborot tizimlaridan nafaqa oluvchi to‘g‘risida elektron shaklda avtomatlashtirilgan tarzda olingan ma’lumotlar “Shaxsga doir ma’lumotlar to‘g‘risida”gi O‘zbekiston Respublikasi Qonuniga muvofiq himoyalanadi.

Tegishli davlat organlari o‘z faoliyatini amalga oshirishi natijasida nafaqa oluvchi to‘g‘risida olingan ma’lumotlarning sir saqlanishini ta’minlaydi.

30. “Yagona reyestr” ATda hamda manfaatdor vazirlik va idoralarning axborot tizimlarida texnik nosozliklar hamda ma’lumotlar almashinuvi jarayonida uzilishlar yuzaga kelganda, ushbu holatlar to‘liq bartaraf etilgunga qadar mehnatga layoqatsizlik varaqasidagi elektron ma’lumotlarni kiritish, nafaqani tayinlash va to‘lash muddatlari uzaytirilishi mumkin.

31. Mazkur Nizom talablari buzilishida aybdor bo‘lgan shaxslar qonunchilik hujjatlarida belgilangan tartibda javob beradi.

1. Ushbu Nizom budjet tashkilotlari hisoblanmaydigan yuridik va jismoniy shaxslarda ishlaydigan onalarga va bolaning otasi, buvisi, buvasi yoki bolani haqiqatda parvarishlayotgan boshqa qarindoshlariga, shuningdek, vasiysiga (keyingi o‘rinlarda — onaning o‘rnini bosuvchi shaxslar) bola ikki yoshga to‘lgunga qadar bola parvarishi bo‘yicha oylik nafaqani (keyingi o‘rinlarda — bola parvarishi bo‘yicha nafaqa) tayinlash hamda to‘lash tartibini belgilaydi.

2. Budjet tashkilotlarida ishlaydigan ayollarga va onaning o‘rnini bosuvchi shaxslarga bolalar nafaqasini tayinlash hamda to‘lash tartibi Vazirlar Mahkamasi tomonidan belgilanadi.

3. Budjet tashkiloti hisoblanmaydigan tashkilotlarda (keyingi o‘rinlarda — tashkilot) ishlaydigan onalarga (onaning o‘rnini bosuvchi shaxslarga) bola parvarishi bo‘yicha nafaqa to‘lovi mazkur tashkilotning o‘z mablag‘lari hisobidan amalga oshiriladi. Tashkilot mablag‘lari hisobidan bola parvarishi bo‘yicha nafaqa uchun sarflangan mablag‘lar davr xarajatlariga kiritiladi.

4. Jismoniy shaxs hisoblanuvchi ish beruvchilarning xodimlari bo‘lgan onalarga (onaning o‘rnini bosuvchi shaxslarga) bola parvarishi bo‘yicha nafaqa mehnat shartnomasida nazarda tutilgan bo‘lsa, ish beruvchilar tomonidan o‘z mablag‘lari hisobidan to‘lanadi.

5. Bola parvarishi bo‘yicha nafaqa tug‘ilgan, farzandlikka, vasiylikka olingan bolani ikki yoshga to‘lgunga qadar parvarish qilish uchun qoida tariqasida bolaning onasi, otasi, buvisi, buvasi yoki bolani haqiqatda parvarishlayotgan boshqa qarindoshlariga, shuningdek, vasiyiga bolani parvarishlash ta’tili davri uchun ish beruvchining buyrug‘iga asosan tayinlanadi.

6. Bola parvarishi bo‘yicha nafaqa tayinlash uchun quyidagi hujjatlar taqdim etiladi:

a) bola parvarishi bo‘yicha nafaqa tayinlash uchun ariza;

b) bola tug‘ilganligi to‘g‘risida guvohnoma nusxasi.

Bolaning onasi o‘rniga nafaqa oluvchi shaxslar, qo‘shimcha ravishda bolaning onasi yo‘qligini tasdiqlovchi hujjat — bolaning (bolalarning) onasi vafot etganligi to‘g‘risida guvohnoma, sud organlari tomonidan onalik huquqidan mahrum qilinganlik to‘g‘risida berilgan ma’lumotnoma yoki bola parvarishi bo‘yicha nafaqani bolaning (bolalarning) onasi olish imkoni mavjud emasligini tasdiqlovchi boshqa hujjatlarni taqdim etadi.

7. Bola parvarishi bo‘yicha nafaqa onalarga (onaning o‘rnini bosuvchi shaxslarga) nafaqa olish uchun murojaat qilingan kundan boshlab, ammo homiladorlik va tug‘ish ta’tili tugagan kundan so‘ng tayinlanadi.

8. Agar ikki va undan ortiq tug‘ilgan, farzandlikka yoki vasiylikka olingan bolalar parvarishda bo‘lsa, kichik farzand ikki yoshga to‘lgunga qadar bola parvarishi bo‘yicha nafaqa tayinlanadi va to‘lanadi.

Agar ona bola ikki yoshga to‘lgunga qadar bola parvarishi davrida ikkinchi farzandga homiladorlik va tug‘ish bo‘yicha ta’til olish huquqiga ega bo‘lsa, onaning tanlovi asosida nafaqaning faqat bir turi tayinlanadi va to‘lanadi.

9. Ishlaydigan onalar (onaning o‘rnini bosuvchi shaxslar) xohishiga ko‘ra bolani parvarishlash ta’tili vaqtida to‘liqsiz ish vaqti shartlari asosida yoki ish beruvchi bilan kelishuv bo‘yicha uyda ishlashi mumkin. Bunda bola parvarishi bo‘yicha nafaqa va ish haqini bir vaqtda oladi.

10. Bola parvarishi bo‘yicha nafaqa parvarish qilinayotgan bolalar sonidan va nafaqa oluvchi shaxsning mehnat stajidan qat’i nazar har oyda mehnatga haq to‘lashning eng kam miqdorining 60 foizi miqdorida to‘lanadi.

11. To‘liq bo‘lmagan oy uchun nafaqa onaning (ona o‘rnini bosuvchi shaxsning) ushbu oydagi ta’tilda bo‘lgan kalendar kunlarga mos ulushda to‘lanadi.

12. Ishlaydigan (ishlab chiqarishdan ajralgan holda ta’lim olayotgan, xizmat o‘tayotgan) onalarga (onaning o‘rnini bosuvchi shaxslarga) bola parvarishi bo‘yicha nafaqa ish joyidan (ta’lim olish, xizmat o‘tash joyidan) to‘lanadi.

13. Bola parvarishi bo‘yicha nafaqa to‘lovi joriy oy uchun ish haqini to‘lash muddatlarida amalga oshiriladi.

14. Nafaqa oluvchi vafot etgan yoki ota-onalik huquqidan mahrum etilgan yoki bola vasiylikdan qaytarib olingan taqdirda, nafaqa bolani haqiqatda parvarish qilayotgan shaxsga tayinlanadi va oxirgi nafaqa to‘langan oydan keyingi oydan boshlab to‘lanadi.

15. Tayinlangan, ammo o‘z vaqtida talab qilib olinmagan (to‘lanmagan) bola parvarishi bo‘yicha nafaqa o‘tgan vaqt uchun nafaqa to‘lanishi kerak bo‘lgan davrda ko‘zda tutilgan miqdorda to‘lab beriladi.

Nafaqa to‘lovchi tashkilotning aybi bilan o‘z vaqtida to‘lanmagan nafaqa hech qanday muddatlar bilan chegaralanmagan holda, o‘tgan davr uchun bir vaqtning o‘zida to‘lab beriladi.

16. Bola parvarishi bo‘yicha nafaqa quyidagi holatlarda to‘xtatiladi:

a) parvarishdagi bola ikki yoshga to‘lganda;

b) bola to‘liq davlat ta’minotida bo‘lgan maxsus muassasalar (mehribonlik uyi)ga joylashtirilganda;

v) bola vafot etganda;

g) oila bola bilan birga doimiy yashash uchun O‘zbekiston Respublikasi hududidan tashqariga chiqib ketganda;

d) bolani parvarishlash boshqa qarindosh yoki vasiyga o‘tganda.

17. Bola parvarishi bo‘yicha nafaqa oluvchi shaxs nafaqa to‘lovini to‘xtatishga sabab bo‘luvchi holatlar yuzaga kelganda, nafaqa to‘lovini amalga oshirayotgan tashkilotga xabar berishi shart.

18. Oldindan ma’lum bo‘lgan noto‘g‘ri yoki qalbaki hujjatlar asosida bola parvarishi bo‘yicha nafaqa olish holatlari aniqlanganda, mazkur hujjatlarni taqdim etgan shaxs javobgarlikka tortiladi va ortiqcha to‘langan mablag‘lar belgilangan tartibda undiriladi.

Bola parvarishi bo‘yicha nafaqa oluvchi shaxs tomonidan nafaqa to‘lovini to‘xtatishga sabab bo‘luvchi holatlar yuzaga kelganligi to‘g‘risida o‘z vaqtida xabar berilmaganda, nafaqa to‘lovini amalga oshirayotgan tashkilotning qaroriga asosan ortiqcha to‘langan mablag‘lar nafaqa oluvchidan belgilangan tartibda undiriladi.

19. Nafaqalarni noto‘g‘ri hisoblash, belgilash va to‘lash yuzasidan qonunchilik hujjatlarida belgilangan tartibda shikoyat qilish mumkin.

20.Ushbu Nizom talablari buzilishida aybdor bo‘lgan shaxslar qonunchilik hujjatlarida belgilangan tartibda javob beradilar.