O‘zbekiston Respublikasi Prezidentining “Respublika davlat boshqaruvi organlari tizimini takomillashtirish to‘g‘risida” 2003-yil 9-dekabrdagi PF-3358-son Farmoniga muvofiq hamda O‘zbekiston Respublikasi Davlat geologiya va mineral resurslar qo‘mitasini boshqarish tizimini yanada takomillashtirish maqsadida Vazirlar Mahkamasi qaror qiladi:

1. Quyidagilar O‘zbekiston Respublikasi Davlat geologiya va mineral resurslar qo‘mitasining asosiy vazifalari etib belgilansin:

yer osti boyliklarini geologik o‘rganish, ulardan foydalanish va ularni qo‘riqlash, mineral-xomashyo bazasini takroriy ishlab chiqarish sohasida yagona davlat siyosatini ro‘yobga chiqarish, kon munosabatlari sohasida davlat boshqaruvini amalga oshirish;

yer osti boyliklarini geologik o‘rganish, konlarni prognoz qilish va aniqlash bo‘yicha ishlarni tashkil etish, foydali qazilmalar resurslarini (uglevodorodlar bundan mustasno) geologik-iqtisodiy baholash, yer osti boyliklari uchastkalaridan foydali qazilmalarni qazib chiqarish bilan bog‘liq bo‘lmagan maqsadlarda foydalanish imkoniyatini asoslash;

o‘z vakolatlari doirasida davlat yer osti boyliklari fondini va davlat tosh geologik materiallari fondini, shuningdek alohida qo‘riqlanadigan geologik obyektlarni davlat tomonidan boshqarish;

O‘zbekiston hududini geologik o‘rganish bilan bog‘liq ishlarni (uglevodorodlar bo‘yicha ishlar bundan mustasno) muvofiqlashtirish.

2. Quyidagilar:

O‘zbekiston Respublikasi Davlat geologiya va mineral resurslar qo‘mitasi to‘g‘risidagi nizom 3-ilovaga muvofiq tasdiqlansin.

O‘zbekiston Respublikasi Davlat geologiya va mineral resurslar qo‘mitasi raisiga xodimlarning belgilangan umumiy soni doirasida Davlat qo‘mitasi markaziy apparati tuzilmasiga o‘zgartirishlar kiritish huquqi berilsin.

3. O‘zbekiston Respublikasi Davlat geologiya va mineral resurslar qo‘mitasi bir oy muddatda O‘zbekiston Respublikasi Davlat geologiya va mineral resurslar qo‘mitasi huzuridagi Foydali qazilmalar zaxiralari bo‘yicha davlat komissiyasi to‘g‘risidagi nizom loyihasini ishlab chiqsin va belgilangan tartibda O‘zbekiston Respublikasi Vazirlar Mahkamasiga kiritsin.

4. O‘zbekiston Respublikasi Hukumatining 4-ilovaga muvofiq qarorlari o‘z kuchini yo‘qotgan deb hisoblansin, shuningdek ayrimlariga o‘zgartirishlar kiritilsin.

5. Mazkur qarorning bajarilishini nazorat qilish Bosh vazir o‘rinbosari O‘.T. Sultonov zimmasiga yuklansin.

1. O‘zbekiston Respublikasi Davlat geologiya va mineral resurslar qo‘mitasi (keyingi o‘rinlarda matnda Davlat geologiya qo‘mitasi deb yuritiladi) davlat boshqaruvi organi hisoblanadi.

Davlat geologiya qo‘mitasi o‘z faoliyatida O‘zbekiston Respublikasi Vazirlar Mahkamasiga hisobot beradi.

2. Davlat geologiya qo‘mitasi o‘z faoliyatida O‘zbekiston Respublikasi Konstitutsiyasi va qonunlariga, O‘zbekiston Respublikasi Oliy Majlisi qarorlariga va boshqa hujjatlariga, O‘zbekiston Respublikasi Prezidentining farmonlari va farmoyishlariga, O‘zbekiston Respublikasi Vazirlar Mahkamasining qarorlari va farmoyishlariga, shuningdek mazkur Nizomga amal qiladi.

3. Davlat geologiya qo‘mitasi o‘z faoliyatini davlat boshqaruvining boshqa organlari, mahalliy davlat hokimiyati organlari, jamoat birlashmalari va boshqa tashkilotlar bilan o‘zaro hamkorlikda amalga oshiradi.

4. Davlat geologiya qo‘mitasi apparati ta’minoti O‘zbekiston Respublikasi Moliya vazirligi bilan kelishilgan xarajatlar smetasiga muvofiq Qo‘mitaga qarashli davlat korxonalari va tashkilotlarining ajratmalari hamda qonun hujjatlarida taqiqlanmagan boshqa manbalar hisobiga amalga oshiriladi.

5. Davlat geologiya qo‘mitasi yuridik shaxs hisoblanadi, O‘zbekiston Respublikasi Davlat gerbi aks ettirilgan va o‘z nomi yozilgan muhrga ega bo‘ladi.

6. Quyidagilar Davlat geologiya qo‘mitasining asosiy vazifalari hisoblanadi:

yer osti boyliklarini geologik o‘rganish, ulardan foydalanish va ularni qo‘riqlash, mineral-xomashyo bazasini takroriy ishlab chiqarish sohasida yagona davlat siyosatini ro‘yobga chiqarish, kon munosabatlari sohasida davlat boshqaruvini amalga oshirish;

yer osti boyliklarini geologik o‘rganish, konlarni prognoz qilish va aniqlash bo‘yicha ishlarni tashkil etish, foydali qazilmalar resurslarini (uglevodorodlar bundan mustasno) geologik-iqtisodiy baholash, yer osti boyliklari uchastkalaridan foydali qazilmalarni qazib chiqarish bilan bog‘liq bo‘lmagan maqsadlarda foydalanish imkoniyatini asoslash;

o‘z vakolatlari doirasida davlat yer osti boyliklari fondini va davlat tosh geologik materiallari fondini, shuningdek alohida qo‘riqlanadigan geologik obyektlarni davlat tomonidan boshqarish;

O‘zbekiston hududini geologik o‘rganish bilan bog‘liq ishlarni (uglevodorodlar bo‘yicha ishlar bundan mustasno) muvofiqlashtirish.

7. Davlat geologiya qo‘mitasi o‘ziga yuklangan vazifalarni bajarish uchun quyidagi funksiyalarni amalga oshiradi:

O‘zbekiston hududining geologik jihatdan o‘rganilganligini, iqtisodiyotning foydali qazilmalar zaxiralari bilan ta’minlanganligini tahlil qiladi va shuning asosida vazirliklar, idoralar va mahalliy davlat hokimiyati organlari bilan birgalikda mineral-xomashyo bazasidan foydalanish, takroriy ishlab chiqarish sur’atlarini, yanada kengaytirish, mustahkamlash va sifat jihatidan yaxshilash, oqilona va kompleks foydalanish strategiyasi va ushbu maqsadlar uchun zarur bo‘lgan davlat mablag‘lari va boshqa investitsiyalar haqida takliflarni ishlab chiqadi;

respublikani ijtimoiy va iqtisodiy rivojlantirish prognozlarini, respublikaning mineral-xomashyo bazasini takroriy ishlab chiqarish, yer osti boyliklarini muhofaza qilish dasturlarini, yer osti boyliklarini geologik o‘rganish va muhofaza qilish xalqaro dasturlarini ishlab chiqishda va amalga oshirishda qatnashadi;

yer osti boyliklarini geologik o‘rganish va mineral resurslardan foydalanish sohasida ilmiy-tadqiqot, mavzuli, tajriba-konstruktorlik ishlari, konlar va kon jinslarining texnologik tadqiqotlari, shuningdek boshqa ishlarning ustuvor yo‘nalishlari ilmiy asoslanishini ta’minlaydi;

geologiya-qidiruv, ilmiy-tadqiqot va tajriba-konstruktorlik ishlari o‘tkazilishiga davlat buyurtmalarini o‘ziga qarashli korxonalar va tashkilotlar o‘rtasida taqsimlaydi, Davlat budjeti mablag‘lari va Davlat geologiya qo‘mitasining o‘z mablag‘lari hisobiga ularning bajarilishini moliyalashtiradi;

yer osti boyliklarini geologik o‘rganish ishlari olib borilishini, foydali qazilmalarning asosiy turlari zaxiralari o‘sishi va respublika moddiy-xomashyo bazasi shakllantirilishi, mustahkamlanishi va kengaytirilishi bo‘yicha (uglevodorod xomashyodan tashqari) hamda respublika hududini geologik o‘rganish sohasidagi boshqa ishlar bo‘yicha davlat buyurtmalari bajarilishini ta’minlaydi;

O‘zbekiston hududining geologiya-ekologik tadqiq etilishi dasturlari ishlab chiqilishi va amalga oshirilishida ishtirok etadi;

tadbirkorlik tavakkalchiligi sharoitlarida geologik o‘rganish, foydali qazilmalarni qazib olish, foydali qazilmalarni qazib olish bilan bog‘liq bo‘lmagan yer osti inshootlari qurish va ulardan foydalanish uchun yer osti uchastkalaridan foydalanish huquqini beruvchi litsenziyalarni O‘zbekiston Respublikasi Vazirlar Mahkamasi tomonidan belgilangan tartibda beradi (uglevodorodlar konlarini izlash va razvedka qilish hamda qazib olish maqsadida geologik o‘rganish, uglevodorodlarni saqlash uchun yer osti inshootlari qurish va ulardan foydalanish, chiqindilarni saqlash va ko‘mish uchun litsenziyalardan tashqari), texnogen mineral hosilalardan, alohida qo‘riqlanadigan geologik obyektlar hosilalaridan foydalanish hamda tovlanadigan tosh xomashyo, paleontologik qoldiqlar namunalarini va boshqa geologik kolleksiya materiallarini to‘plash;

Davlat budjeti mablag‘lari hisobiga geologik o‘rganish uchun yer osti boyliklari uchastkalaridan foydalanish huquqi paydo bo‘lishining asosi hisoblangan yer osti boyliklarini geologik o‘rganishga loyiha-smeta hujjatlarini o‘z vakolatlari doirasida tasdiqlaydi;

O‘zbekiston Respublikasi Vazirlar Mahkamasi tomonidan belgilangan tartibda foydalanish uchun berilgan yer osti boyliklari uchastkalarining davlat hisobini yuritadi, yer osti boyliklari uchastkalaridan foydalanish huquqini va yer osti boyliklarini geologik o‘rganish ishlarining davlat hisobini yuritish huquqini davlat ro‘yxatidan o‘tkazadi;

O‘zbekiston Respublikasi Davlat geologiya va mineral resurslar qo‘mitasi huzuridagi Foydali qazilmalar zaxiralari bo‘yicha davlat komissiyasi ekspertlarining shaxsiy tarkibini tasdiqlaydi;

geologiya materiallarini ko‘rib chiqadi va sanoat ahamiyatini yo‘qotgan yoxud keyinchalik olib borilgan geologiya-qidiruv ishlarida yoki konni qazishda tasdiqlanmagan foydali qazilmalar zaxiralarini yer osti boyliklaridan foydalanuvchilar balansidan qonun hujjatlarida belgilangan tartibda hisobdan chiqarish to‘g‘risidagi takliflarni O‘zbekiston Respublikasi Davlat geologiya va mineral resurslar qo‘mitasi huzuridagi Foydali qazilmalar zaxiralari bo‘yicha davlat komissiyasiga kiritadi;

davlat mablag‘lari hisobiga olingan yer osti boyliklari to‘g‘risidagi geologik axborotga va boshqa axborotga mulkdorning huquq va majburiyatlarini amalga oshiradi (uglevodorod xomashyo bo‘yicha axborotdan tashqari);

o‘z vakolatlari doirasida yer osti boyliklarini geologik o‘rganish, ulardan foydalanish va ularni muhofaza qilish ustidan davlat nazoratini amalga oshiradi;

idoraviy bo‘ysunishi va mulkchilik shakllaridan qat’i nazar korxonalar va tashkilotlar tomonidan yer osti boyliklarining geologik o‘rganilishi bo‘yicha ishlarni amalga oshirish uchun ajratiladigan davlat mablag‘laridan foydalanilishini nazorat qiladi;

ilmiy, tarixiy, madaniy, estetik ahamiyatga va boshqa ahamiyatga ega bo‘lgan alohida muhofaza qilinadigan geologiya obyektlari hududida (ilmiy va o‘quv poligonlari, geologiya zakazniklari, tabiat yodgorliklari, g‘orlar va boshqa yer osti bo‘shlig‘i) ilmiy-tadqiqot ishlari olib borilishini nazorat qiladi, alohida muhofaza qilinadigan yangi geologiya obyektlari vujudga kelishi to‘g‘risida xulosalar beradi va takliflar kiritadi;

Davlat budjeti mablag‘lari hisobiga yer osti boyliklarini geologik o‘rganish ishlarini olib boruvchi yuridik va jismoniy shaxslar tomonidan bajarilishi majburiy bo‘lgan yer osti boyliklarini geologik o‘rganish ishlarini loyihalashtirish va yuritish sohasida normalar va qoidalarni ishlab chiqadi va tasdiqlaydi;

yer osti boyliklarini geologik o‘rganish ishlarini olib borishga loyiha-smeta hujjatlari ekspertizasini tashkil etadi va uning amalga oshirilishini ta’minlaydi, belgilangan tartibda loyiha-smeta hujjatlarini tasdiqlaydi;

O‘zbekiston Respublikasi Davlat tabiatni muhofaza qilish qo‘mitasi va Sanoatda va konchilikda ishlarning bexatar olib borilishini nazorat qilish davlat inspeksiyasi bilan birgalikda O‘zbekiston Respublikasining keng tarqalgan foydali qazilmalari ro‘yxatini aniqlaydi va uni tasdiqlash uchun O‘zbekiston Respublikasi Vazirlar Mahkamasiga taqdim etadi;

yer osti boyliklari to‘g‘risidagi geologik axborotlar va boshqa axborotlarning davlat fondini, tosh geologik materiallari davlat fondini yuritadi;

foydali qazilmalar konlarini kelgusida aniqlash mumkin bo‘lgan konlar va yer osti boyliklari uchastkalari davlat reyestrini (o‘z vakolatlari doirasida), foydali qazilmalar zaxiralari davlat balansini, shu jumladan uglevodorodlar davlat balansini, konlarning, foydali qazilmalar va texnogen mineral hosilalar namoyon bo‘lishi davlat kadastrini, davlat suv kadastrini (yer osti suvlari), tabiiy xavf yuqori zonalar (xavfli geologiya jarayonlari paydo bo‘lish zonalari) davlat kadastrini yuritadi, shuningdek muhofaza etiladigan tabiiy hududlar davlat kadastri bo‘yicha chuchuk yer osti suvlari shakllanishi zonalari yuzasidan ma’lumotlarni tuzadi va taqdim etadi;

manfaatdor vazirliklar va idoralar bilan o‘zaro hamkorlikda yer osti boyliklari davlat monitoringi, shu jumladan yer osti suvlari monitoringi amalga oshirilishini ta’minlaydi;

xavfli geologiya jarayonlari (ko‘chki, o‘pirilish, cho‘kish, suffoziylar, karstlar)ni o‘rganish, shuningdek ularning hosil bo‘lishi va rivojlanishini kuzatish ishlarini amalga oshiradi;

qo‘shni davlatlarning geologiya xizmatlari bilan birgalikda transchegara hududlar doirasida radioaktiv va zaharli elementlar bilan ifloslanish o‘choqlarini aniqlash va o‘rganish ishlarini amalga oshiradi, qo‘shni hududlarning ekologik holatiga salbiy ta’sir ko‘rsatishi mumkin bo‘lgan alohida xavfli zonalar va uchastkalarni aks ettirgan holda geologiya xaritalari va atlaslarini tuzadi hamda ularni O‘zbekiston Respublikasi Vazirlar Mahkamasiga, manfaatdor vazirliklar va idoralarga taqdim etadi;

vazirliklar va idoralar bilan birgalikda suv resurslaridan (yer osti suvlaridan) foydalanish hamda hududlarni texnogen va xavfli geologiya jarayonlari ta’siridan himoya qilish sxemalarini ishlab chiqadi;

qonun hujjatlarida belgilangan tartibda geologiya muhiti obyektlari qo‘riqlanishi, shu jumladan yer osti suvlarining ifloslanish va qurib qolishdan qo‘riqlanishi ustidan nazoratni amalga oshiradi;

suvdan foydalanish uchun quduqlarni burg‘ulashga ruxsatnoma va suvdan (yer osti suvlaridan) maxsus foydalanishga ruxsatnoma berilishini kelishadi;

respublikaning sho‘rlangan va cho‘lga aylangan hududlariga ta’sir ko‘rsatuvchi mintaqaviy ekzogen geologiya jarayonlarini o‘rganadi;

kelgusida sanoat va xo‘jalik qurilishi obyektlarini joylashtirish uchun muhandislik-geologiya, gidrogeologiya va geoekologiya asoslashlarini tayyorlaydi;

qurilayotgan va rekonstruksiya qilinayotgan yirik sanoat va qishloq xo‘jaligi obyektlarining atrof muhitga ta’sirini baholash ishlarida ishtirok etadi;

yer osti boyliklari uchastkalaridan foydali qazilmalarni qazish bilan bog‘liq bo‘lmagan, shu jumladan chiqindilarni saqlash va ko‘mish uchun yer osti inshootlari qurish va ulardan foydalanish uchun foydalanish imkoniyati o‘rganib chiqilishini ta’minlaydi va xulosalar beradi;

bo‘lajak qurilish uchastkalari ostida foydali qazilmalar yo‘qligi, sanoat o‘zlashtirishi uchun berilmagan foydali qazilmalar konlari maydonlarida imorat qurish imkoniyati to‘g‘risida (keng tarqalgan foydali qazilmalar konlaridan tashqari) xulosalar, shuningdek xavfli geologiya jarayonlari paydo bo‘lishi mumkin bo‘lgan zonalarda xalq xo‘jaligi va xo‘jalik obyektlari qurish uchun uchastkalarni tanlash bo‘yicha xulosalar berilishini ta’minlaydi;

yer osti boyliklari uchastkalaridan foydalanish huquqini berishga ommaviy savdolar tashkil etilishi va o‘tkazilishiga vazirliklar va idoralar bilan birgalikda materiallar tayyorlaydi va ularda qatnashadi, yer osti boyliklari uchastkalaridan foydalanish bilan bog‘liq investitsiya loyihalarining texnik-iqtisodiy asoslashlari ishlab chiqilishida ishtirok etadi;

vazirliklar, idoralar va mahalliy davlat hokimiyati organlari bilan birgalikda geologik o‘rganish, yer osti boyliklaridan foydalanish va ularni muhofaza qilish sohasida tashqi iqtisodiy aloqalarni rivojlantirish strategiyasi to‘g‘risidagi takliflarni ishlab chiqadi;

xorijiy investitsiyalarni jalb etish ishlarini olib boradi, xorijiy investorlar bilan to‘g‘ridan to‘g‘ri muzokaralar o‘tkazadi va ularga yer osti boyliklari uchastkalaridan foydalanish huquqini berish to‘g‘risidagi takliflarni (o‘z vakolatlari doirasida) O‘zbekiston Respublikasi Vazirlar Mahkamasiga kiritadi;

xalqaro hamkorlikni amalga oshiradi, konferensiyalar, simpoziumlar, ko‘rgazmalar o‘tkazadi, Davlat geologiya qo‘mitasi vakolatiga kiradigan masalalar bo‘yicha xalqaro tashkilotlar, boshqa mamlakatlarning geologiya xizmatlari bilan belgilangan tartibda aloqalar o‘rnatadi;

O‘zbekiston Respublikasining xalqaro tashkilotlardagi a’zoligidan hamda geologik o‘rganish, yer osti boyliklaridan foydalanish va ularni muhofaza qilish, mineral-xomashyo potensialini takroriy ishlab chiqarish va rivojlantirish sohasida xalqaro shartnomalarda ishtirok etishidan kelib chiquvchi majburiyatlar bajarilishini tashkil etishda va ularning muvofiqlashtirilishida ishtirok etadi;

respublikaning mineral-xomashyo bazasi holati to‘g‘risidagi axborot tizimlari faoliyat ko‘rsatishi va rivojlanishini ta’minlaydi, geologiya, geofizika, geokimyo, gidrogeologiya, muhandislik-geologiya, geoekologiya mundarijasiga ega bo‘lgan davlat xaritalari va atlaslarini, boshqa kartografiya materiallarini, axborotnomalarni, shu jumladan yer osti suvlarining holati to‘g‘risidagi axborotnomalarni, geologik o‘rganish, yer osti boyliklaridan foydalanish va ularni muhofaza qilish sohasida to‘plamlar, kataloglar, metodik materiallar, yo‘riqnomalar, ma’lumotnomalarni belgilangan tartibda nashr etadi;

manfaatdor vazirliklar va idoralar bilan birgalikda geologiya-qidiruv ishlariga xarajatlarni (mineral-xomashyo bazasini takroriy ishlab chiqarish) qoplash stavkalari miqdorlarini, geologiya-qidiruv ishlarini moliyalashtirish va ularga kreditlar ajratish bo‘yicha normativ hujjatlarni ishlab chiqadi;

tarmoq korxonalari va tashkilotlarini davlat tasarrufidan chiqarish va xususiylashtirishga ko‘maklashadi;

ekstremal sharoitlarda (suvsizlik, baland tog‘li, yer osti va boshqa sharoitlarda) ishlarni olib borish uchun qo‘shimcha haq miqdorlarini belgilash yuzasidan takliflarni asoslaydi va ishlab chiqadi;

tarmoqda mehnatni muhofaza qilish ishlarini muvofiqlashtiradi;

kadrlarni tayyorlash va ularning malakasini oshirish ishlarini olib boradi, geolog mutaxassislarni o‘qitishni amalga oshiradi;

qonun hujjatlarida nazarda tutilgan boshqa funksiyalarni bajaradi.

8. Davlat geologiya qo‘mitasi o‘ziga yuklangan vazifalar va funksiyalarni bevosita, shuningdek o‘ziga qarashli davlat korxonalari va tashkilotlari orqali hal etadi.

9. Davlat geologiya qo‘mitasi o‘ziga yuklangan vazifalar va funksiyalarni bajarish uchun quyidagi huquqlarga ega:

vazirliklar, idoralar va mahalliy davlat hokimiyati organlaridan, yuridik shaxslardan Davlat geologiya qo‘mitasi vakolatiga tegishli masalalari bo‘yicha axborotlarni so‘rash va olish;

o‘z vakolatlari doirasida yer osti boyliklari uchastkalaridan foydalanish huquqini berish;

o‘z vakolatlari doirasida yer osti boyliklaridan foydalanuvchilarning yer uchastkalaridan foydalanish huquqini beruvchi litsenziyalarda belgilangan shartlarga, yer osti boyliklarini geologik o‘rganish ishlarini olib borish normalari va qoidalariga rioya etilishini tekshirish;

vazirliklar, idoralar, korxonalar va tashkilotlar bilan kelishuv bo‘yicha geologiya materiallari ekspertizasini o‘tkazish uchun ularning mutaxassislarini jalb etish;

O‘zbekiston Respublikasi Vazirlar Mahkamasi tomonidan belgilangan tartibda yer osti boyliklari uchastkalaridan foydalanish huquqini cheklash, to‘xtatib turish va to‘xtatish to‘g‘risida qaror qabul qilish;

zaruriyat bo‘lganda normativ-huquqiy hujjatlarni ishlab chiqish uchun olimlar, tarmoq mutaxassislari orasidan vaqtinchalik ishchi guruhlar tashkil etish, shartnoma asosida ushbu ishga boshqa vazirliklar va idoralarning mutaxassislari va ekspertlarini jalb etish;

geologiya, geofizika, geokimyo, gidrogeologiya, muhandislik-geologiya, geologiya-ekologiya mundarijasidan iborat davlat xaritalari va atlaslarini hamda boshqa kartografiya materiallari, axborotnomalar, shu jumladan yer osti suvlarining holati to‘g‘risidagi axborotnomalar, yer osti boyliklarini geologik o‘rganish, ulardan foydalanish va ularni muhofaza qilish sohasidagi to‘plamlar, kataloglar, metodik materiallar, ilmiy asarlarni nashr etish;

Davlat budjeti mablag‘lari va o‘z mablag‘lari hisobiga olingan yer osti boyliklari to‘g‘risidagi geologik axborotlar va boshqa axborotlarni belgilangan tartibda shartnoma asosida realizatsiya qilish (berish, almashtirish, sotish);

Davlat geologiya qo‘mitasi, geologiya tarmog‘i korxonalari va tashkilotlari xodimlarini, shuningdek O‘zbekiston Respublikasi va xorijiy mamlakatlarning fuqarolarini geologiya tarmog‘i ko‘krak nishonlari, faxriy yorliqlar bilan mukofotlashni ta’sis etish va belgilangan tartibda mukofotlash.

Davlat geologiya qo‘mitasi O‘zbekiston Respublikasi qonun hujjatlariga muvofiq boshqa huquqlarga ham ega bo‘lishi mumkin.

10. Davlat geologiya qo‘mitasi o‘z vakolatlari doirasida vazirliklar va idoralar, mahalliy davlat hokimiyati organlari, korxonalar, muassasalar, tashkilotlar, mansabdor shaxslar va fuqarolar tomonidan bajarilishi majburiy bo‘lgan normativ-huquqiy hujjatlarni tasdiqlashga haqlidir.

Davlat geologiya qo‘mitasi, zarur hollarda, boshqa vazirliklar va idoralar bilan birgalikda qo‘shma qarorlar va boshqa hujjatlar chiqarishga haqlidir.

11. Davlat geologiya qo‘mitasi o‘ziga yuklangan vazifalarning samarali bajarilishi uchun javob beradi.

12. Davlat geologiya qo‘mitasiga qonun hujjatlarida belgilangan tartibda lavozimga tayinlanadigan va lavozimdan ozod etiladigan rais boshchilik qiladi.

Raisning qonun hujjatlarida belgilangan tartibda lavozimga tayinlanadigan va lavozimdan ozod etiladigan bir nafar o‘rinbosari bo‘ladi.

Davlat geologiya qo‘mitasi raisi moddiy, maishiy, transport va tibbiy xizmat ko‘rsatish shart-sharoitlari bo‘yicha vazirga, uning o‘rinbosari esa vazirning birinchi o‘rinbosariga tenglashtiriladi.

13. Davlat geologiya qo‘mitasi raisi:

Davlat geologiya qo‘mitasi faoliyatiga umumiy rahbarlik qiladi va Davlat geologiya qo‘mitasiga yuklangan vazifalar va funksiyalarning bajarilishi uchun shaxsan javob beradi;

zaruriyat bo‘lganda xodimlarning belgilangan umumiy soni doirasida Davlat geologiya qo‘mitasi markaziy apparati tuzilmasiga o‘zgartirishlar kiritadi, shtat jadvalini va xarajatlar smetasini tasdiqlaydi;

Davlat geologiya qo‘mitasi tizimiga kiruvchi davlat korxonalari va tashkilotlarining ustavlarini belgilangan tartibda tasdiqlaydi;

Davlat geologiya qo‘mitasi markaziy apparati xodimlarini, Davlat geologiya qo‘mitasi tizimiga kiruvchi davlat korxonalari va tashkilotlari rahbarlarini belgilangan tartibda lavozimga tayinlaydi va lavozimdan ozod qiladi;

geologiya tarmog‘ining ko‘krak nishonlari to‘g‘risidagi nizom ishlab chiqilishini tashkil etadi va uni belgilangan tartibda tasdiqlaydi, ko‘krak nishonlari tavsifini ishlab chiqadi va tasdiqlaydi, soha xodimlarini, shuningdek O‘zbekiston Respublikasi va xorijiy mamlakatlarning fuqarolarini geologiya tarmog‘i ko‘krak nishonlari, faxriy yorliqlar bilan mukofotlashga taqdim etish tartibini belgilaydi.

Rais qonun hujjatlariga muvofiq boshqa vakolatlarni amalga oshiradi.

14. Davlat geologiya qo‘mitasida qo‘mita raisi (hay’at raisi), raisning o‘rinbosari (lavozimiga ko‘ra), Davlat geologiya qo‘mitasi markaziy apparati, shuningdek qo‘mitaga qarashli korxonalar va tashkilotlar rahbar xodimlaridan iborat tarkibda 7 kishidan iborat hay’at tashkil etiladi.

Hay’atning shaxsiy tarkibi Davlat geologiya qo‘mitasi raisining taqdimnomasi bo‘yicha O‘zbekiston Respublikasi Vazirlar Mahkamasi tomonidan tasdiqlanadi.

Davlat geologiya qo‘mitasi hay’ati Davlat geologiya qo‘mitasi faoliyatining asosiy masalalarini ko‘rib chiqadi, Davlat geologiya qo‘mitasi korxonalari va tashkilotlarining rahbarlari hisobotlarini eshitadi, Davlat geologiya qo‘mitasining muhim qarorlari va boshqa hujjatlari loyihalarini muhokama qiladi.

Hay’at qarorlari Davlat geologiya qo‘mitasining buyruqlari bilan hayotga joriy etiladi.

15. Yer osti boyliklarini geologik o‘rganish bilan bog‘liq eng muhim yo‘nalishlarni, ishlar natijalarini va boshqa masalalarni ko‘rib chiqish uchun Davlat geologiya qo‘mitasida yuqori malakali mutaxassislardan, shuningdek ilmiy-tadqiqot institutlari va boshqa tashkilotlarning vakillaridan iborat tarkibda ilmiy-texnik kengash tashkil etiladi. Ilmiy-texnik kengashning tarkibi va uning to‘g‘risidagi Nizom Davlat geologiya qo‘mitasi raisi tomonidan tasdiqlanadi.

16. Qidiruv va foydalanish konditsiyalarini, foydali qazilmalar zaxiralarini tasdiqlash va geologiya materiallarining davlat ekspertizasini o‘tkazish uchun Davlat geologiya qo‘mitasida Foydali qazilmalar zaxiralari bo‘yicha davlat komissiyasi tashkil etiladi, komissiyaga Davlat geologiya qo‘mitasi raisi boshchilik qiladi.

17. Davlat geologiya qo‘mitasi qonun hujjatlarida belgilangan tartibda qayta tashkil etiladi va tugatiladi.

1. Vazirlar Mahkamasining “O‘zbekiston SSJ Davlat geologiya va mineral resurslar qo‘mitasini tashkil etish to‘g‘risida” 1991-yil 10-maydagi 125-son qarori (O‘zbekiston Respublikasi QT, 1991-y., 5-son, 15-modda).

2. Vazirlar Mahkamasining “Davlat geologiya qo‘mitasining neft va gazni geologik-qidiruv hamda izlash ishlarini amalga oshiruvchi korxonalarini “O‘zbekneftgaz” milliy korporatsiyasi tarkibiga o‘tkazish to‘g‘risida” 1995-yil 3-yanvardagi 2-son qaroriga 2-ilovaning 1-bandi.

3. Vazirlar Mahkamasining “O‘zbekiston Respublikasi Davlat geologiya va mineral resurslar qo‘mitasi to‘g‘risidagi nizomni tasdiqlash haqida” 1996-yil 9-dekabrdagi 435-son qarori (O‘zbekiston Respublikasi QT, 1996-y., 12-son, 34-modda).

1. Vazirlar Mahkamasining 1997-yil 13-yanvardagi 19-son qarori bilan tasdiqlangan Yer osti boyliklaridan foydalanish va muhofaza qilish, yer qa’rini geologik o‘rganish va mineral resurslardan oqilona foydalanish ustidan davlat tekshiruvi va nazorati o‘rnatish to‘g‘risidagi nizomda:

3-bandning to‘rtinchi xatboshidagi “va uning hududiy bo‘limlari” so‘zlari chiqarib tashlansin;

6-bandda:

birinchi xatboshidagi “Yer qa’rini geologik o‘rganish va mineral resurslardan oqilona foydalanish ustidan davlat nazorati (davlat geologiya nazorati bo‘limi) bo‘limi boshlig‘i” so‘zlari “Davlat geologiya nazorati boshqarmasi boshlig‘i” so‘zlari bilan almashtirilsin;

ikkinchi va uchinchi xatboshidagi “bo‘lim” so‘zi “boshqarma” so‘zi bilan almashtirilsin;

to‘rtinchi xatboshi chiqarib tashlansin.

2. Vazirlar Mahkamasining “Davlat va xo‘jalik boshqaruvi respublika organlarining boshqaruv xodimlari sonini maqbullashtirish va qisqartirish to‘g‘risida” 2004-yil 5-yanvardagi 1-son qaroriga 3-ilovaning “V. Yoqilg‘i-energetika kompleksi bo‘limida” 52-bandning 6-satrida “41” raqami “45” raqami bilan, “564,5” raqami “560,5” raqami bilan almashtirilsin.