Ushbu Qonunning maqsadi gidrometeorologiya faoliyati sohasidagi munosabatlarni tartibga solishdan iborat.

Gidrometeorologiya faoliyati to‘g‘risidagi qonunchilik ushbu Qonun va boshqa qonunchilik hujjatlaridan iboratdir.

Agar O‘zbekiston Respublikasining xalqaro shartnomasida O‘zbekiston Respublikasining gidrometeorologiya faoliyati to‘g‘risidagi qonunchiligida nazarda tutilganidan boshqacha qoidalar belgilangan bo‘lsa, xalqaro shartnoma qoidalari qo‘llaniladi.

Ushbu Qonunda quyidagi asosiy tushunchalar qo‘llaniladi:

atrof tabiiy muhit ifloslanishining monitoringi — atrof tabiiy muhitning hamda atmosfera havosi, yer usti suvlari va tuproq ifloslanishining doimiy kompleks kuzatuvlari, shuningdek atrof tabiiy muhit holatini baholash va prognozlash;

gidrometeorologik axborot — gidrometeorologik hodisalar va atrof tabiiy muhit holatining kuzatuvlari natijalari, shuningdek ishlov berish hamda tahlil qilish yo‘li bilan olingan, foydalanish, tarqatish va saqlash uchun mo‘ljallangan axborot;

gidrometeorologik jarayonlar — atmosferaning va gidrosferaning holatini tavsiflovchi gidrometeorologik hodisalarning vaqt va makonda izchil rivojlanishi;

gidrometeorologik jarayonlarga faol ta’sir ko‘rsatish — aholiga, iqtisodiyot tarmoqlariga va ijtimoiy sohaga ehtimol tutilgan zararni kamaytirish uchun gidrometeorologik jarayonlarni atrof tabiiy muhitga ta’sir ko‘rsatish orqali boshqarish (ko‘chkilarni majburan tushirish, do‘l yog‘ishining, yog‘ingarchiliklarning, sel kelishining oldini olish);

gidrometeorologik hodisalar — atmosferada, yer yuzasida va undagi obyektlarda, yer usti suvlarida ro‘y beradigan, gidrometeorologik sharoitlarni tavsiflaydigan jarayonlarning namoyon bo‘lish shakllari (atmosfera bosimi, shamol, namlik, havo va suv harorati, suv sathi va sarfi, toshqinlar, sellar, ayozlar);

gidrometeorologiya faoliyati — meteorologiya, gidrologiya, glyatsiologiya, iqlimshunoslik, agrometeorologiya, aerologiya, aviatsiya meteorologiyasi, atrof tabiiy muhit ifloslanishining monitoringi va gidrometeorologik jarayonlarga faol ta’sir ko‘rsatish sohasidagi gidrometeorologik axborotni tayyorlash (kuzatish, yig‘ish, unga ishlov berish, uni tahlil qilish, saqlash va undan foydalanish), shuningdek uni tarqatish jarayoni;

ixtisoslashtirilgan gidrometeorologik axborot — foydalanuvchining talablariga muvofiq tayyorlangan hamda ishlov berish, tahlil qilish, saqlash va taqdim etish uchun qo‘shimcha ishlar hamda xarajatlar talab qilinadigan gidrometeorologik axborot;

muhofaza zonasi — gidrometeorologik stansiyalar va postlar atrofida ularning hududi chegarasidan ikki yuz metr masofada joylashgan, yopiq chiziq bilan chegaralangan yer uchastkasi yoki suv akvatoriyasi;

tezkor gidrometeorologik axborot — aholining hayotiga va sog‘lig‘iga tahdid solishi, shuningdek atrof tabiiy muhitga, iqtisodiyot tarmoqlariga va ijtimoiy sohaga zarar yetkazishi mumkin bo‘lgan xavfli gidrometeorologik hodisalar to‘g‘risidagi zudlik bilan taqdim etiladigan gidrometeorologik axborot;

umumiy gidrometeorologik axborot — jamoatchilik foydalanishi uchun respublika ijro etuvchi hokimiyat organlariga, xo‘jalik boshqaruvi organlariga, mahalliy ijro etuvchi hokimiyat organlariga, yuridik va jismoniy shaxslarga taqdim etiladigan gidrometeorologik axborot.

Gidrometeorologiya faoliyatining asosiy prinsiplari quyidagilardan iborat:

globallik, tizimlilik va uzluksizlik;

gidrometeorologik kuzatuvlar va atrof tabiiy muhit ifloslanishining monitoringi natijasida olingan ma’lumotlarni yig‘ish, ularga ishlov berish, ularni saqlash hamda tarqatish usullarining birligi va qiyosiyligi;

gidrometeorologik axborotning to‘liqligi, ishonchliligi va undan foydalana olish;

ochiqlik va xavfsizlik.

Gidrometeorologiya faoliyatining globalligi, tizimliligi va uzluksizligi prinsipi atmosfera, gidrosfera hamda tuproqning o‘zaro bog‘liqlik shartlarini tavsiflovchi gidrometeorologik hodisalarni kompleks o‘rganishdan iboratdir.

Gidrometeorologiya faoliyatining globalligi, tizimliligi va uzluksizligi prinsipi gidrometeorologik hodisalarning doimiy monitoringini o‘tkazish hamda gidrometeorologik kuzatuvlar ma’lumotlari fondini uzluksiz ravishda shakllantirib borish yo‘li bilan ta’minlanadi.

Gidrometeorologik kuzatuvlar va atrof tabiiy muhit ifloslanishining monitoringi natijasida olingan ma’lumotlarni yig‘ish, ularga ishlov berish, ularni saqlash va tarqatish usullarining birligi va qiyosiyligi prinsipi o‘lchov vositalarini standartlashtirish hamda metrologik nazorat talablariga rioya etishdan, gidrometeorologik kuzatuvlar ma’lumotlarini yig‘ishga, ularga ishlov berishga va ularni tahlil qilishga doir milliy hamda xalqaro tavsiyalar va qoidalarga asoslangan birxillashtirilgan usullar hamda yondashuvlardan foydalanishdan iboratdir.

Gidrometeorologik axborotning to‘liqligi, ishonchliligi va undan foydalana olish prinsipi qarorlar qabul qilish uchun gidrometeorologik parametrlarning yetarli to‘plamidan, ushbu axborotdan foydalanish paytida uning qimmatini va dolzarbligini saqlab qolishdan, foydalanuvchi tomonidan axborotni samarali tarzda o‘zlashtirish va tushunishdan iboratdir.

Gidrometeorologik axborotning to‘liqligi, ishonchliligi va undan foydalana olish prinsipi foydalanuvchilar tomonidan qarorlar qabul qilish uchun ushbu axborotni uslubiy jihatdan to‘g‘ri yig‘ish, unga ishlov berish, uni tahlil qilish va o‘zgartirish hisobidan ta’minlanadi.

O‘zbekiston Respublikasi Gidrometeorologiya xizmati markazi o‘z faoliyati to‘g‘risidagi axborot mavjud bo‘lgan ochiq axborot resurslarini shakllantiradi va ulardan zamonaviy axborot-kommunikatsiya texnologiyalarini qo‘llagan holda foydalanilishini ta’minlaydi.

Gidrometeorologiya faoliyatini amalga oshirish xavfsizligi texnika xavfsizligi va mehnatni muhofaza qilish talablariga og‘ishmay rioya etish yo‘li bilan ta’minlanadi.

Atmosfera, gidrosfera, tuproq, shuningdek atrof tabiiy muhitni ifloslantiruvchi komponentlar gidrometeorologiya faoliyatining obyektlaridir.

Gidrometeorologiya faoliyatining subyektlari quyidagilardan iborat:

O‘zbekiston Respublikasi Gidrometeorologiya xizmati markazi va uning hududiy boshqarmalari;

respublika ijro etuvchi hokimiyat organlari va mahalliy davlat hokimiyati organlari;

o‘lchov vositalarining metrologik attestatsiyasiga oid maxsus sertifikat asosida gidrometeorologiya faoliyatini amalga oshiruvchi tashkilotlar va davlat boshqaruvi organlarining tarkibiy bo‘linmalari;

o‘lchov vositalarining metrologik attestatsiyasiga oid maxsus sertifikat asosida gidrometeorologiya faoliyatini amalga oshiruvchi yuridik shaxslar;

gidrometeorologik jarayonlarga faol ta’sir ko‘rsatish bo‘yicha ixtisoslashtirilgan tashkilotlar;

gidrometeorologiya sohasidagi ilmiy-tadqiqot va ta’lim tashkilotlari.

Gidrometeorologiya faoliyatining subyektlari O‘zbekiston Respublikasi Gidrometeorologiya xizmatining milliy tizimini tashkil etadi.

Gidrometeorologiya faoliyati sohasidagi davlat siyosatining asosiy yo‘nalishlari quyidagilardan iborat:

davlat dasturlarini va boshqa dasturlarni ishlab chiqish hamda amalga oshirish;

gidrometeorologiya faoliyatini amalga oshirish shartlari va tartibini belgilovchi normativ-huquqiy hujjatlarni qabul qilish, hisobga olish va hisobdorlik tizimlarini ishlab chiqish;

gidrometeorologik kuzatuvlar va o‘lchovlarning yagona davlat tizimini shakllantirish, takomillashtirish hamda uning ishlashini ta’minlash;

respublika ijro etuvchi hokimiyat organlarini, shuningdek aholini atrof tabiiy muhitning amaldagi va prognoz qilinayotgan holati, ifloslanishi to‘g‘risidagi axborot, shu jumladan tezkor axborot bilan ta’minlash;

respublika ijro etuvchi hokimiyat organlarining, xo‘jalik boshqaruvi organlarining, mahalliy davlat hokimiyati organlarining, yuridik shaxslarning gidrometeorologiyaga oid ishlarni bajarishga doir faoliyatini muvofiqlashtirish;

innovatsiya va investitsiya faoliyatini amalga oshirish;

gidrometeorologiya, iqlim o‘zgarishi, atrof tabiiy muhitning ifloslanishi sohasida ilmiy fundamental va amaliy tadqiqotlarni amalga oshirish;

xalqaro hamkorlikni rivojlantirish.

O‘zbekiston Respublikasi Vazirlar Mahkamasi:

gidrometeorologiya faoliyati sohasida yagona davlat siyosati amalga oshirilishini ta’minlaydi;

gidrometeorologiya faoliyati sohasidagi davlat dasturlarini tasdiqlaydi va ularning bajarilishini ta’minlaydi;

gidrometeorologiya faoliyati sohasidagi normativ-huquqiy hujjatlarni o‘z vakolatlari doirasida qabul qiladi;

davlat va xo‘jalik boshqaruvi organlarining gidrometeorologiya sohasidagi faoliyatini muvofiqlashtiradi;

gidrometeorologiya faoliyatini amalga oshirish tartibini belgilaydi.

O‘zbekiston Respublikasi Vazirlar Mahkamasi qonunchilikka muvofiq boshqa vakolatlarni ham amalga oshirishi mumkin.

O‘zbekiston Respublikasi Gidrometeorologiya xizmati markazi gidrometeorologiya faoliyati sohasidagi maxsus vakolatli davlat organidir (bundan buyon matnda maxsus vakolatli davlat organi deb yuritiladi).

Maxsus vakolatli davlat organi:

gidrometeorologiya faoliyati sohasida yagona davlat siyosatini amalga oshiradi;

gidrometeorologiya faoliyati sohasidagi davlat dasturlari loyihalarini ishlab chiqadi hamda O‘zbekiston Respublikasi Vazirlar Mahkamasiga kiritadi;

gidrometeorologiya faoliyati sohasidagi normativ-huquqiy hujjatlarni o‘z vakolatlari doirasida ishlab chiqadi va tasdiqlaydi;

normativ-huquqiy hujjatlar loyihalarini ishlab chiqishda o‘z vakolatlari doirasida ishtirok etadi;

kuzatuvlar olib boradi, gidrometeorologik axborotni yig‘adi, unga ishlov beradi, uni tahlil qiladi, saqlaydi va undan foydalanadi;

O‘zbekiston Respublikasi Gidrometeorologik axborot davlat fondining shakllantirilishini, to‘ldirilishini, saqlanishini va undan foydalanilishini ta’minlaydi;

respublika ijro etuvchi hokimiyat organlarini, mahalliy davlat hokimiyati organlarini, yuridik va jismoniy shaxslarni kuzatib borilayotgan hamda kutilayotgan gidrometeorologik sharoitlar, iqlim o‘zgarishi, atrof tabiiy muhitning ifloslanish darajasi to‘g‘risidagi axborot bilan, shu jumladan tezkor gidrometeorologik axborot bilan ta’minlaydi;

respublika ijro etuvchi hokimiyat organlari, mahalliy davlat hokimiyati organlari, gidrometeorologik jarayonlarga faol ta’sir ko‘rsatish bo‘yicha ixtisoslashtirilgan tashkilotlar, nodavlat notijorat tashkilotlari bilan hamkorlik qiladi;

gidrometeorologik kuzatuvlarning davlat tizimi rivojlantirilishi va takomillashtirilishini, gidrometeorologik tarmoqning modernizatsiya qilinishini ta’minlaydi;

favqulodda vaziyatlarning oldini olish va harakat qilish yagona davlat tizimiga kiradi hamda favqulodda vaziyatlarda o‘z faoliyatini O‘zbekiston Respublikasining aholini va hududlarni tabiiy va texnogen xususiyatga ega favqulodda vaziyatlardan himoya qilish to‘g‘risidagi qonunchiligiga muvofiq amalga oshiradi;

gidrometeorologiya, iqlim o‘zgarishi, atrof tabiiy muhitning ifloslanishi sohasida ilmiy fundamental va amaliy tadqiqotlar o‘tkazadi;

ishlab chiqarish va xo‘jalik faoliyati obyektlaridan olisda muhofaza etiladigan tabiiy hududlarda joylashgan atrof tabiiy muhitning barcha obyektlarida ifloslantiruvchi moddalar mavjudligi darajasining uzoq muddatli tizimli kuzatuvi tarzidagi fon monitoringini amalga oshiradi;

gidrometeorologik axborot tayyorlash hamda atrof tabiiy muhit holati va ifloslanishining monitoringi xalqaro tizimlarini muvofiqlashtiradi va integratsiya qiladi;

gidrometeorologiya faoliyati sohasida kadrlarni tayyorlash, qayta tayyorlash va ularning malakasini oshirishni tashkil etadi;

gidrometeorologiya faoliyati sohasida xalqaro hamkorlikni amalga oshiradi.

Maxsus vakolatli davlat organi qonunchilikka muvofiq boshqa vakolatlarni ham amalga oshirishi mumkin.

Davlat boshqaruvi organlari gidrometeorologiya faoliyati sohasida o‘z vakolatlari doirasida:

tarmoq ahamiyatiga ega bo‘lgan gidrometeorologiya faoliyatining amalga oshirilishini tashkil etadi va ushbu faoliyatni muvofiqlashtiradi;

o‘z tasarrufidagi gidrometeorologik stansiyalar va postlar ishini qonunchilikka muvofiq ta’minlaydi.

Davlat boshqaruvi organlari qonunchilikka muvofiq boshqa vakolatlarni ham amalga oshirishi mumkin.

Mahalliy davlat hokimiyati vakillik organlari gidrometeorologiya faoliyati sohasidagi hududiy dasturlarni tasdiqlaydi va ularning bajarilishi ustidan nazoratni amalga oshiradi.

Mahalliy ijro etuvchi hokimiyat organlari gidrometeorologiya faoliyati sohasida o‘z vakolatlari doirasida:

hududiy ahamiyatga ega bo‘lgan gidrometeorologiya faoliyatining amalga oshirilishini tashkil etadi va ushbu faoliyatni muvofiqlashtiradi;

gidrometeorologiya faoliyati sohasidagi hududiy dasturlarni tasdiqlash uchun mahalliy davlat hokimiyati vakillik organlariga kiritadi va amalga oshiradi;

hududiy dasturlarni moliyalashtiradi hamda ijtimoiy infratuzilmani rivojlantiradi, shu jumladan ishlab chiqarish va xo‘jalik faoliyatini hamda gidrometeorologiya faoliyatini moliyalashtirish sohasidagi davlat organlarining hududiy boshqarmalarini ushbu dasturlarni bajarishga jalb etishni amalga oshiradi;

davlat gidrometeorologik kuzatuvlar tarmog‘ini va atrof tabiiy muhit ifloslanishining monitoringini tashkil etish uchun yer uchastkalarini ajratadi;

maxsus vakolatli davlat organiga gidrometeorologiya faoliyatini amalga oshirishda hamda xavfli gidrometeorologik hodisalarning iqtisodiyot tarmoqlariga va ijtimoiy sohaga salbiy ta’sirini yumshatishda ko‘maklashadi.

Mahalliy davlat hokimiyati organlari qonunchilikka muvofiq boshqa vakolatlarni ham amalga oshirishi mumkin.

Yuridik shaxslar gidrometeorologiya faoliyatini gidrometeorologiya faoliyati to‘g‘risidagi qonunchilikda belgilangan tartibda amalga oshiradi.

Yuridik shaxslar tomonidan amalga oshiriladigan gidrometeorologiya faoliyati gidrometeorologiya faoliyatining asosiy prinsiplariga mos bo‘lishi kerak.

Gidrometeorologiya faoliyatini amalga oshiruvchi yuridik shaxslar gidrometeorologiya faoliyati to‘g‘risidagi qonunchilikka muvofiq maxsus vakolatli davlat organi bilan shartnoma asosida axborot almashishi mumkin.

Yuridik shaxslarning gidrometeorologiya faoliyati maxsus vakolatli davlat organi tomonidan muvofiqlashtiriladi.

Gidrometeorologik axborotni tayyorlovchilar quyidagilardan iborat:

maxsus vakolatli davlat organi;

gidrometeorologiya sohasidagi ilmiy-tadqiqot institutlari;

gidrometeorologiya faoliyatini amalga oshiruvchi, gidrometeorologik kuzatuvlarning idoraviy tarmog‘iga ega bo‘lgan yuridik shaxslar.

Respublika ijro etuvchi hokimiyat organlari, xo‘jalik boshqaruvi organlari, mahalliy davlat hokimiyati organlari, yuridik va jismoniy shaxslar gidrometeorologik axborotdan foydalanuvchilardir.

O‘zbekiston Respublikasining qonunchiligiga muvofiq gidrometeorologik axborot chet el yuridik va jismoniy shaxslariga taqdim etilishi mumkin.

Gidrometeorologik axborotni tayyorlovchilar quyidagi huquqlarga ega:

o‘z faoliyatini gidrometeorologiya faoliyati to‘g‘risidagi qonunchilikka muvofiq amalga oshirish;

ixtisoslashtirilgan gidrometeorologik axborotni qat’iy belgilangan haq evaziga taqdim etish;

gidrometeorologiya faoliyatini amalga oshiruvchi yuridik shaxslardan gidrometeorologik axborotni olish;

gidrometeorologiya sohasidagi ilmiy mahsulotga va boshqa mahsulotga doir mualliflik huquqlarini hamda turdosh huquqlarni himoya qilish;

axborotni olish shartlari foydalanuvchi tomonidan buzilgan taqdirda gidrometeorologik axborotni foydalanuvchiga taqdim etishni rad etish.

Gidrometeorologik axborotni tayyorlovchilar:

normativ hujjatlar, shu jumladan texnik jihatdan tartibga solish sohasidagi normativ hujjatlar talablariga muvofiq gidrometeorologik hodisalar va jarayonlarning kuzatuvlarini amalga oshirishi;

gidrometeorologik axborotni tayyorlash va taqdim etish to‘g‘risidagi shartnoma shartlariga rioya etishi;

bajarilgan gidrometeorologiyaga oid ishlarning hisobini yuritishi va belgilangan tartibda axborot taqdim etishi;

davlat va xo‘jalik boshqaruvi organlariga, yuridik va jismoniy shaxslarga to‘liq, ishonchli hamda foydalana olinadigan gidrometeorologik axborotni taqdim etishi;

xavfli gidrometeorologik hodisalarning, tabiiy ofatlarning, atrof tabiiy muhit ifloslanishining rivojlanishi tahdidining oldini olish uchun kuzatuvlar natijalarini maxsus vakolatli davlat organining talabiga ko‘ra taqdim etishi shart.

Gidrometeorologik axborotni tayyorlovchilar qonunchilikka muvofiq boshqa huquqlarga ham ega bo‘lishi va ularning zimmasida o‘zga majburiyatlar ham bo‘lishi mumkin.

Gidrometeorologik axborotdan foydalanuvchilar quyidagi huquqlarga ega:

gidrometeorologiya faoliyati to‘g‘risidagi qonunchilikka muvofiq gidrometeorologik axborotni olish;

gidrometeorologik axborotni tayyorlovchini tanlash;

gidrometeorologik axborotni olishni rad etish hamda ushbu axborotni tayyorlovchi bilan tuzilgan shartnomani normativ hujjatlar, shu jumladan texnik jihatdan tartibga solish sohasidagi normativ hujjatlar talablari buzilgan va shartnoma shartlariga rioya etilmagan taqdirda bekor qilish.

Gidrometeorologik axborotdan foydalanuvchilar gidrometeorologik axborotni tayyorlovchilar faoliyatining texnologik jarayonlariga aralashish huquqiga ega emas.

Gidrometeorologik axborotdan foydalanuvchilar:

ixtisoslashtirilgan gidrometeorologik axborotdan belgilangan maqsadga va ushbu axborotni muhofaza qilish rejimiga muvofiq foydalanishi;

gidrometeorologik axborotni tayyorlovchilar bilan tuzilgan shartnomalar shartlariga rioya etishi shart.

Gidrometeorologik axborotdan foydalanuvchilar qonunchilikka muvofiq boshqa huquqlarga ham ega bo‘lishi va ularning zimmasida o‘zga majburiyatlar ham bo‘lishi mumkin.

Davlat gidrometeorologik kuzatuvlar tarmog‘idan olingan barcha ma’lumotlar maxsus vakolatli davlat organi tasarrufidagi O‘zbekiston Respublikasining Gidrometeorologik axborot davlat fondini tashkil etadi.

O‘zbekiston Respublikasining Gidrometeorologik axborot davlat fondi hujjatlari O‘zbekiston Respublikasining Milliy arxiv fondiga kiradi va arxiv ishi to‘g‘risidagi qonunchilikka muvofiq saqlanadi.

Gidrometeorologik axborot undan foydalanuvchilarga gidrometeorologiya faoliyati to‘g‘risidagi qonunchilikka muvofiq taqdim etiladi.

Rasmiy ogohlantirishlar, prognozlar va aholining turmush faoliyati xavfsizligini ta’minlash, ehtimoliy zararning oldini olish bilan bog‘liq boshqa gidrometeorologik axborot gidrometeorologik axborotdan foydalanuvchilarga faqat maxsus vakolatli davlat organi tomonidan taqdim etiladi.

Umumiy gidrometeorologik va ixtisoslashtirilgan gidrometeorologik axborot vazirliklarga va idoralarga, mahalliy davlat hokimiyati organlariga o‘zaro ma’lumotlar almashish to‘g‘risidagi qo‘shma dasturlar (kelishuvlar) asosida maxsus vakolatli davlat organi tomonidan taqdim etiladi.

Umumiy gidrometeorologik va tezkor gidrometeorologik axborot ushbu moddaning uchinchi qismida ko‘rsatilmagan gidrometeorologik axborotdan foydalanuvchilarga maxsus vakolatli davlat organining rasmiy veb-saytiga va O‘zbekiston Respublikasining ochiq ma’lumotlar portaliga joylashtirish yo‘li bilan taqdim etiladi.

Ixtisoslashtirilgan gidrometeorologik axborot undan foydalanuvchilarga shartnoma asosida taqdim etiladi.

Maxsus vakolatli davlat organi tomonidan ixtisoslashtirilgan gidrometeorologik axborotni taqdim etish va gidrometeorologiya faoliyati sohasida boshqa xizmatlar ko‘rsatish tahliliy materiallarni tayyorlash, laboratoriya va ilmiy-tadqiqot ishlarini olib borish yo‘li bilan amalga oshiriladi.

Tadqiqot mavzusi bo‘yicha tegishli gidrometeorologik axborotdan oliy ta’lim tashkilotlari va ilmiy muassasalarning so‘rovi asosida bepul foydalanishga, basharti O‘zbekiston Respublikasining Gidrometeorologik axborot davlat fondi materiallari bilan mustaqil ravishda ishlansa, ruxsat beriladi.

Ixtisoslashtirilgan gidrometeorologik axborot davlat hokimiyati organlariga, O‘zbekiston Respublikasi Ichki ishlar vazirligiga, O‘zbekiston Respublikasi Davlat xavfsizlik xizmatiga, prokuratura organlariga, sudlarga, shuningdek gidrometeorologik jarayonlarga faol ta’sir ko‘rsatish bo‘yicha faoliyat olib boruvchi O‘zbekiston Respublikasi Mudofaa vazirligiga hamda Favqulodda vaziyatlar vazirligiga so‘rov bo‘yicha bepul taqdim etiladi.

Yer uchastkalarini ularda maxsus vakolatli davlat organining gidrometeorologik stansiyalari va postlarini joylashtirish uchun ajratish qonunchilikka muvofiq amalga oshiriladi.

Gidrometeorologik axborotning uzluksizligini, to‘liqligini, ishonchliligini va foydalana olinishini ta’minlash maqsadida gidrometeorologik stansiyalar hamda postlar hududlarining chegaralarida tabiiy sharoitlarning saqlanishini ta’minlaydigan muhofaza zonalari belgilanadi.

Gidrometeorologik stansiyalar va postlarning muhofaza zonalari doirasida joylashgan yer uchastkalaridan hamda suv akvatoriyalaridan muhofaza zonalarida ishlarni bajarish qoidalariga muvofiq foydalaniladi.

Gidrometeorologik stansiyalar va postlarning muhofaza zonalari doirasida joylashgan yer uchastkalaridan hamda suv akvatoriyalaridan foydalanuvchilarning mazkur yer uchastkalaridan hamda suv akvatoriyalaridan foydalanishi muhofaza zonalarida ishlarni bajarish qoidalariga muvofiq cheklanishi mumkin.

Gidrometeorologik stansiyalar va postlarning muhofaza zonalarida quyidagilar taqiqlanadi:

davlat gidrometeorologik kuzatuvlar tarmog‘ining but saqlanishi va undan foydalanish ta’minlanmaydigan ishlarni maxsus vakolatli davlat organining roziligisiz amalga oshirish;

gidrometeorologik axborotning ishonchliligida aks etishi mumkin bo‘lgan xo‘jalik faoliyatini yuritish, obyektlarni qurish, boshqa ishlarni amalga oshirish.

Gidrometeorologik kuzatuvlar tayanch punktlarining (gidrometeorologik stansiyalar va postlarning) yer uchastkalari olib qo‘yilmaydi hamda ularni boshqa joyga ko‘chirish taqiqlanadi.

Gidrometeorologiya faoliyatida foydalaniladigan davlat mol-mulki xususiylashtirilmaydi.

Davlat gidrometeorologik kuzatuvlar tarmog‘ining faoliyati xalqaro standartlarga va O‘zbekiston Respublikasining qonunchiligiga muvofiq amalga oshiriladi.

Gidrometeorologiya faoliyatini moliyalashtirish O‘zbekiston Respublikasi Davlat budjeti mablag‘lari, budjetdan tashqari jamg‘armalar va qonunchilikda taqiqlanmagan boshqa manbalar hisobidan amalga oshiriladi.

O‘zbekiston Respublikasining Milliy gidrometeorologiya xizmati xalqaro gidrometeorologiya tarmog‘ining ajralmas qismidir.

Gidrometeorologiya faoliyati sohasidagi xalqaro hamkorlik va axborot almashinuvi O‘zbekiston Respublikasining xalqaro shartnomalari hamda qonunchiligi asosida amalga oshiriladi.

O‘zbekiston Respublikasi yagona xalqaro gidrometeorologik kuzatuvlar tarmoqlarini shakllantirishga va rivojlantirishga, atrof tabiiy muhitning holati hamda uning ifloslanishi ustidan nazoratni amalga oshirishga, axborot almashishga ko‘maklashadi.

Maxsus vakolatli davlat organi xalqaro tashkilotlar va boshqa davlatlarning gidrometeorologiya xizmatlari bilan hamkorlik qilish chog‘ida gidrometeorologiya faoliyati bilan bog‘liq masalalarda O‘zbekiston Respublikasining manfaatlarini ifodalaydi hamda himoya qiladi, shuningdek gidrometeorologiya faoliyati sohasidagi xalqaro hamkorlikni amalga oshirishda O‘zbekiston Respublikasi yuridik shaxslarining gidrometeorologiya faoliyatini muvofiqlashtiradi.

Maxsus vakolatli davlat organining gidrometeorologiya faoliyati masalalari bo‘yicha xalqaro hamkorlikda ishtirok etishi tartibi O‘zbekiston Respublikasining xalqaro shartnomalarida va qonunchiligida belgilanadi.

Gidrometeorologiya faoliyati sohasidagi nizolar qonunchilikda belgilangan tartibda hal etiladi.

Gidrometeorologiya faoliyati to‘g‘risidagi qonunchilikni buzganlikda aybdor shaxslar belgilangan tartibda javobgar bo‘ladi.

O‘zbekiston Respublikasi Gidrometeorologiya xizmati markazi va boshqa manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi o‘rtasida tushuntirilishini ta’minlasin.

O‘zbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

davlat boshqaruvi organlari ushbu Qonunga zid bo‘lgan o‘z normativ-huquqiy hujjatlarini qayta ko‘rib chiqishlari va bekor qilishlarini ta’minlasin.

Ushbu Qonun rasmiy e’lon qilingan kundan e’tiboran kuchga kiradi.