Oʻzbekiston Respublikasi “Prokuratura toʻgʻrisida”gi Qonunining 13-moddasi va “Jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish toʻgʻrisida”gi Qonunining 15-moddasiga muvofiq buyuraman:

1. Terrorchilik faoliyatida yoki ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslar roʻyxatiga kiritilgan shaxslarning operatsiyalarini toʻxtatib turish, pul mablagʻlarini yoki boshqa mol-mulkini ishga solmay toʻxtatib qoʻyish, ishga solmay toʻxtatib qoʻyilgan mol-mulkidan foydalanishga ruxsat berish va operatsiyalarini tiklash tartibi toʻgʻrisidagi nizom ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasining “Jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish toʻgʻrisida”gi Qonuniga muvofiq terrorchilik faoliyatida yoki ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslar roʻyxatiga kiritilgan shaxslarning operatsiyalarini toʻxtatib turish, pul mablagʻlarini yoki boshqa mol-mulkini ishga solmay toʻxtatib qoʻyish, ishga solmay toʻxtatib qoʻyilgan mol-mulkidan foydalanishga ruxsat berish va operatsiyalarini tiklash tartibini belgilaydi.

1. Ushbu Nizomda quyidagi asosiy tushunchalar qoʻllaniladi:

pul mablagʻlarini yoki boshqa mol-mulkni ishga solmay toʻxtatib qoʻyish — pul mablagʻlarini yoki boshqa mol-mulkni oʻtkazishni, konversiyalashni, tasarruf etishni yoxud koʻchirishni taqiqlash;

Oʻzbekiston Respublikasining vakolatli organlari — Oʻzbekiston Respublikasi Davlat xavfsizlik xizmati, Ichki ishlar vazirligi, Bosh prokuraturasi va Vazirlar Mahkamasi huzuridagi Sanoat, radiatsiya va yadro xavfsizligi qoʻmitasi;

terrorchilik faoliyatida ishtirok etayotgan yoki ishtirok etishda gumon qilinayotgan shaxs — terrorchilik faoliyatida ishtirok etayotgan yoxud ishtirok etishda gumon qilinayotgan yuridik yoki jismoniy shaxs, terrorchilik faoliyatini amalga oshirayotgan yoxud amalga oshirishda gumon qilinayotgan tashkilotning bevosita yoki bilvosita mulkdori boʻlgan yoxud uni nazorat qilayotgan yuridik yoki jismoniy shaxs, shuningdek, terrorchilik faoliyatini amalga oshirayotgan yoki amalga oshirishda gumon qilinayotgan jismoniy shaxsning yoxud tashkilotning mulkidagi yoki nazorati ostidagi yuridik shaxs;

ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxs — Oʻzbekiston Respublikasi tomonidan tan olingan, ommaviy qirgʻin qurolini tarqatishini oldini olishga qaratilgan Birlashgan Millatlar Tashkiloti Xavfsizlik Kengashining (bundan buyon matnda BMT Xavfsizlik Kengashi deb yuritiladi) tegishli rezolyutsiyalari hamda boshqa xalqaro-huquqiy hujjatlar bilan belgilangan jismoniy yoki yuridik shaxs;

operatsiyalarni toʻxtatib turish — mijozning pul mablagʻlarini yoki boshqa mol-mulkni koʻchirish, konversiyalash, oʻzga shaxslarga egalik qilish va foydalanish uchun berish, shuningdek yuridik ahamiyatga ega boʻlgan boshqa harakatlarni bajarish toʻgʻrisidagi topshiriqnomalari ijrosini toʻxtatib turish;

BMT Xavfsizlik Kengashining sanksiyaviy roʻyxatlari — BMT Xavfsizlik Kengashi va uning qoʻmitalari tomonidan tuziladigan, shu jumladan BMT Xavfsizlik Kengashining ISHID (DAISH) va “Al-Qoida” boʻyicha 1267, 1989 va 2253-rezolyutsiyalari asosida tashkil etilgan qoʻmitaning hamda “Tolibon” tashkiloti boʻyicha 1988 va Koreya Xalq Demokratik Respublikasi boʻyicha 1718-rezolyutsiyalari asosida tashkil etilgan qoʻmitalarning terrorchilik faoliyatiga yoki ommaviy qirgʻin qurolini tarqatishga aloqador boʻlgan shaxslarga nisbatan sanksiyalar qoʻllanilishi belgilangan jismoniy va yuridik shaxslar roʻyxatlari;

BMT Xavfsizlik Kengashining tegishli rezolyutsiyalari — BMT Xavfsizlik Kengashi tomonidan qabul qilingan terrorizmga qarshi kurashishga qaratilgan rezolyutsiyalar (1267 (1999), 1333 (2000), 1363 (2001), 1373 (2001), 1390 (2002), 1452 (2002), 1455 (2003), 1526 (2004), 1617 (2005), 1730 (2006), 1735 (2006),1822 (2008), 1904 (2009), 1988 (2011), 1989 (2011), 2161 (2014), 2170 (2014), 2178 (2014), 2253 (2015), 2368 (2017) va ularni rivojlantirishga qaratilgan rezolyutsiyalar) yoki ommaviy qirgʻin qurolini tarqatishga qarshi kurashishga qaratilgan rezolyutsiyalar (1718 (2006), 1737 (2006), 1747 (2007), 1803 (2008), 1874 (2009), 1929 (2010), 2087 (2013), 2094 (2013), 2231 (2015), 2270 (2016), 2321 (2016), 2356 (2017), 2371 (2017), 2375 (2017), 2397 (2017) va ularni rivojlantirishga qaratilgan rezolyutsiyalar);

maxsus vakolatli davlat organi — qonunchilik hujjatlariga muvofiq jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish masalalari boʻyicha belgilanadigan davlat organi.

2. Oʻzbekiston Respublikasi fuqarolari va yuridik shaxslari, chet el fuqarolari va yuridik shaxslari hamda fuqaroligi boʻlmagan shaxslar Oʻzbekiston Respublikasi hududida terrorchilik faoliyatida yoki ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslar roʻyxatiga kiritilgan shaxslarga hamda ularning topshirigʻiga koʻra harakat qilayotgan shaxslarga, shuningdek terrorchilik faoliyatida ishtirok etayotgan yoxud ishtirok etishda gumon qilinayotgan jismoniy shaxsning yoxud tashkilotning mulkidagi yoki nazorati ostidagi yuridik shaxsga bevosita yoki bilvosita pul mablagʻlari yoki boshqa mol-mulkni taqdim etishi, moliyaviy va boshqa xizmatlar koʻrsatishi yoki bunday xizmatlardan foydalanishga ruxsat berishi taqiqlanadi.

3. Pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilotlar:

operatsiya ishtirokchilarini terrorchilik faoliyatida yoki ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslar roʻyxatiga kiritilgan shaxslar bilan solishtirishi;

terrorchilik faoliyatida yoki ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslar roʻyxatiga kiritilgan shaxslarning operatsiyasini kechiktirmasdan va oldindan xabar qilmasdan toʻxtatib turishi, bundan yuridik yoki jismoniy shaxsning hisobvaragʻiga tushgan pul mablagʻlarini hisobga kiritish boʻyicha operatsiyalar mustasno, va (yoki) pul mablagʻlarini yoki boshqa mol-mulkini ishga solmay toʻxtatib qoʻyishi, shuningdek shubhali operatsiya toʻgʻrisida maxsus vakolatli davlat organiga xabar yuborishi shart.

4. Terrorchilik faoliyatida yoki ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslar roʻyxati (bundan buyon matnda Roʻyxat deb yuritiladi) Oʻzbekiston Respublikasining vakolatli organlari tomonidan taqdim etiladigan maʼlumotlar, shuningdek chet davlatlarning vakolatli organlaridan hamda xalqaro tashkilotlardan rasmiy kanallar orqali olingan maʼlumotlar asosida maxsus vakolatli davlat organi tomonidan shakllantiriladi. Roʻyxat va uning shakli maxsus vakolatli davlat organining rahbari tomonidan tasdiqlanadi.

5. Roʻyxat quyidagi boʻlimlardan iborat boʻladi:

Oʻzbekiston Respublikasining vakolatli organlari va xorijiy davlatlarning vakolatli organlarining maʼlumotlari asosida tuziladigan milliy roʻyxat;

xalqaro tashkilotlardan olinadigan maʼlumotlar asosida tuziladigan xalqaro roʻyxat.

6. Shaxsni Roʻyxatga kiritish uchun quyidagilar asos boʻlib hisoblanadi:

a) Oʻzbekiston Respublikasi sudining terrorchilik faoliyati yoki ommaviy qirgʻin qurolini tarqatish bilan bogʻliq jinoyatni sodir etgan shaxsni aybdor deb topish haqidagi qonuniy kuchga kirgan hukmi;

b) Oʻzbekiston Respublikasi sudining tashkilotni terrorchilik tashkiloti deb topish va uni tugatish yoki Oʻzbekiston Respublikasi hududida faoliyatini taqiqlash toʻgʻrisidagi qonuniy kuchga kirgan qarori;

v) tergovchi yoki prokurorning terrorchilik faoliyati yoki ommaviy qirgʻin qurolini tarqatish bilan bogʻliq jinoyatni sodir etgan shaxsni jinoyat ishida gumon qilinuvchi yoki ayblanuvchi tariqasida ishtirok etishga jalb qilish toʻgʻrisidagi qarori;

g) terrorchilik faoliyati yoki ommaviy qirgʻin qurolini tarqatish bilan bogʻliq jinoyatni sodir etgan shaxsga nisbatan qidiruv, shu jumladan davlatlararo yoki xalqaro qidiruv eʼlon qilinishi;

d) jismoniy shaxs yoki tashkilot BMT Xavfsizlik Kengashining sanksiyaviy roʻyxatlari yoxud uning tegishli rezolyutsiyalariga kiritilishi;

e) Oʻzbekiston Respublikasi tomonidan tan olingan xalqaro shartnomalar yoki oʻzarolik prinsipi asosida xorijiy davlatlarning terrorchilik faoliyatida yoki ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslarning roʻyxatlari;

j) Oʻzbekiston Respublikasi tomonidan tan olingan xalqaro shartnomalar yoki oʻzarolik prinsipi asosida xorijiy davlat sudining shaxsni terrorchilik faoliyati yoki ommaviy qirgʻin qurolini tarqatish bilan bogʻliq jinoyatni sodir etishda aybdor deb topish haqidagi qonuniy kuchga kirgan hukmi, shuningdek tashkilotni terrorchilik tashkiloti deb topish va uni tugatish yoki faoliyatini taqiqlash toʻgʻrisidagi qonuniy kuchga kirgan qarori;

z) Oʻzbekiston Respublikasi tomonidan tan olingan xalqaro shartnomalar yoki oʻzarolik prinsipi asosida xorijiy davlatlar vakolatli organlarining terrorchilik faoliyatida yoki ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslarning operatsiyalarini toʻxtatib turish va (yoki) pul mablagʻlarini yoki boshqa mol-mulkini ishga solmay toʻxtatib qoʻyish toʻgʻrisidagi soʻrovlari.

7. Roʻyxatni shakllantirish uchun Oʻzbekiston Respublikasining vakolatli organlari ushbu Nizomning 6-bandida nazarda tutilgan maʼlumotlarni, ular olingan paytdan boshlab yoki shaxsni Roʻyxatga kiritish uchun asoslar yuzaga kelgan vaqtdan boshlab bir ish kuni mobaynida tasdiqlovchi hujjatlarning koʻchirma nusxalarini ilova qilingan holda maxsus vakolatli davlat organiga taqdim etadilar.

Maʼlumotlar qogʻoz yoki elektron koʻrinishdagi hujjat sifatida rasmiylashtiriladi hamda maxsus vakolatli davlat organiga shaxsan yoki maxsus moʻljallangan pochta aloqasi yoxud himoyalangan aloqa kanallari orqali taqdim etiladi.

8. Maxsus vakolatli davlat organi tomonidan ushbu Nizomning 6-bandida nazarda tutilgan maʼlumotlar “Elektron jinoiy-huquqiy statistika” yagona axborot tizimidan foydalangan holda ham olinadi.

9. Maxsus vakolatli davlat organi BMT Xavfsizlik Kengashining sanksiyaviy roʻyxatlari yoki tegishli rezolyutsiyalariga kiritilgan shaxslar toʻgʻrisidagi maʼlumotlarni BMT Xavfsizlik Kengashining rasmiy veb-saytidan oladi.

BMT Xavfsizlik Kengashining sanksiyaviy roʻyxatlari va tegishli rezolyutsiyalariga asosan shaxslarni Roʻyxatga kiritish va undan chiqarish maxsus vakolatli davlat organining qarori bilan tasdiqlanmaydi.

10. Roʻyxatga kiritiladigan shaxslarni identifikatsiya (verifikatsiya) qilish uchun maxsus vakolatli davlat organiga Oʻzbekiston Respublikasining vakolatli organlari tomonidan quyidagi maʼlumotlar taqdim qilinadi:

a) taqdim qilinishi shart boʻlgan maʼlumotlar:

yuridik shaxsga nisbatan — nomi va soliq toʻlovchining identifikatsion raqami (STIR);

jismoniy shaxsga nisbatan — familiyasi, ismi, otasining ismi, tugʻilgan yili (kun, oy, yil) va joyi, pasporti (identifikatsiya ID kartasi) yoki shaxsni tasdiqlovchi boshqa hujjatining rekvizitlari, yashash joyi (roʻyxatdan oʻtish) manzili yoki turish joyi;

b) qoʻshimcha maʼlumotlar, agarda mavjud boʻlsa:

yuridik shaxsga nisbatan — davlat roʻyxatidan oʻtkazilganligi toʻgʻrisidagi guvohnomaning raqami, tashkiliy-huquqiy shakli va faoliyat turi, yuridik manzili, rahbar va taʼsischilari (mulkdorlar) toʻgʻrisidagi (familiyasi, ismi, otasining ismi, tugʻilgan sanasi, yashash manzili) maʼlumot, banklardagi hisob raqamlari va mol-mulki toʻgʻrisidagi maʼlumotlar;

jismoniy shaxsga nisbatan — jismoniy shaxsning shaxsiy identifikatsion raqami (JSHSHIR), ish joyi va lavozimi toʻgʻrisidagi maʼlumotlar, agarda yakka tartibdagi tadbirkor sifatida faoliyat koʻrsatayotgan boʻlsa, davlat roʻyxatidan oʻtgan guvohnomasining raqami va faoliyat turi.

11. Agarda olingan maʼlumotlar toʻliq boʻlmasa yoki noaniq boʻlsa maxsus vakolatli davlat organi qoʻshimcha maʼlumot olish uchun maʼlumotlar bazalaridan foydalanadi yoki Oʻzbekiston Respublikasining tegishli vakolatli organlariga murojaat qiladi.

Oʻzbekiston Respublikasining vakolatli organlari soʻrovni olgan kundan uch ish kuni davomida qoʻshimcha maʼlumotlarni taqdim etadilar, bundan ularni taqdim etish uchun xorijiy davlatlarning vakolatli organlari yoki xalqaro tashkilotlarga murojaat qilish zarur boʻlgan holatlar mustasno.

12. Shaxslarni Roʻyxatga kiritishda qoʻshimcha maʼlumot olish zaruriyati boʻlsa, maxsus vakolatli davlat organi ushbu masala hal etilgunga qadar mazkur shaxslarning operatsiyalarini 30 ish kunidan koʻp boʻlmagan muddatga toʻxtatib qoʻyishi mumkin.

13. Maxsus vakolatli davlat organi quyidagi muddatlarda Roʻyxatni shakllantiradi hamda unga oʻzgartirish va qoʻshimchalar kiritadi:

maʼlumotlar BMT Xavfsizlik Kengashining rasmiy veb-saytidan olingan vaqtdan boshlab bir soat ichida;

maʼlumotlar Oʻzbekiston Respublikasining vakolatli organlaridan yoki xorijiy davlatlarning vakolatli organlaridan kelib tushgan yoxud “Elektron jinoiy-huquqiy statistika” yagona axborot tizimidan olingan vaqtdan boshlab darhol, biroq ish kuni tugamasdan.

14. Shaxslarni Roʻyxatdan chiqarish BMT Xavfsizlik Kengashining sanksiyaviy roʻyxatlari yoki tegishli rezolyutsiyalaridan chiqarilishi toʻgʻrisida BMT Xavfsizlik Kengashining rasmiy veb-saytidan olingan maʼlumotlar, shuningdek Oʻzbekiston Respublikasining vakolatli organlari, xorijiy davlatlar vakolatli organlarining murojaatlari, “Elektron jinoiy-huquqiy statistika” yagona axborot tizimidan olingan maʼlumotlar hamda Roʻyxatga kiritish uchun asos boʻlgan maʼlumotlarni tekshirish natijalari boʻyicha yoki sudning qaroriga koʻra amalga oshiriladi.

Shaxsni Roʻyxatdan chiqarish toʻgʻrisidagi murojaat maxsus vakolatli davlat organiga Roʻyxatdan chiqarish uchun asos boʻluvchi maʼlumotlar olingan yoki aniqlangan kundan keyingi ish kunidan kechiktirmasdan yuboriladi.

15. Shaxslarni Roʻyxatdan chiqarish uchun quyidagilar asos boʻlib hisoblanadi:

a) Oʻzbekiston Respublikasi sudining terrorchilik faoliyati yoki ommaviy qirgʻin qurolini tarqatish bilan bogʻliq jinoyatni sodir etishda ayblangan (sudlangan) shaxsga nisbatan chiqarilgan qonuniy kuchga kirgan oqlov hukmi;

b) Oʻzbekiston Respublikasi sudining tashkilotni terrorchilik tashkiloti deb topish va uni tugatish yoki Oʻzbekiston Respublikasi hududida faoliyatini taqiqlash toʻgʻrisidagi qarorni bekor qilish haqidagi qonuniy kuchga kirgan qarori;

v) terrorchilik faoliyati yoki ommaviy qirgʻin qurolini tarqatish bilan bogʻliq jinoyatni sodir etgan shaxs tayinlangan jazo muddatini oʻtab boʻlishi;

g) terrorchilik faoliyati yoki ommaviy qirgʻin qurolini tarqatish bilan bogʻliq jinoyatni sodir etgan shaxsga nisbatan Oʻzbekiston Respublikasining Jinoyat-protsessual kodeksi 83-moddasi hamda 84-moddasi birinchi qismi 1 — 3-bandlarida nazarda tutilgan asoslarga koʻra jinoyat ishi tugatilishi;

d) jismoniy shaxs yoki tashkilot BMT Xavfsizlik Kengashining sanksiyaviy roʻyxatlari yoxud tegishli rezolyutsiyalaridan chiqarilishi;

e) shaxsni Roʻyxatdan chiqarish toʻgʻrisidagi xorijiy davlat vakolatli organining rasmiy xabari;

j) xorijiy davlat sudining terrorchilik faoliyati yoki ommaviy qirgʻin qurolini tarqatish bilan bogʻliq jinoyatni sodir etishda sudlangan shaxsga nisbatan chiqarilgan qonuniy kuchga kirgan oqlov hukmi, shuningdek tashkilotni terrorchilik tashkiloti deb topish va uni tugatish yoki faoliyatini taqiqlash haqidagi qarorni bekor qilish haqidagi qonuniy kuchga kirgan qarori;

z) xorijiy davlat vakolatli organining terrorchilik faoliyatida yoki ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslarning operatsiyalarini toʻxtatib turish va (yoki) pul mablagʻlarini yoki boshqa mol-mulkini ishga solmay toʻxtatib qoʻyish toʻgʻrisidagi soʻrovi chaqirib olinishi yoki bekor qilinishi;

i) shaxsning vafot etganlik holatini tasdiqlovchi rasmiy hujjatlar.

16. Roʻyxatni doimiy ravishda yangilab borish maqsadida maxsus vakolatli davlat organi Oʻzbekiston Respublikasining vakolatli organlari bilan birgalikda shaxsni Roʻyxatga kiritish uchun asos boʻlgan maʼlumotlarni har yili kamida bir marotaba tekshirib (solishtirib) boradi.

17. Jismoniy yoki yuridik shaxs Oʻzbekiston Respublikasi vakolatli organlarining maʼlumotlari asosida Roʻyxatga adashib kiritilganligi yoki ushbu Nizomning 15-bandida nazarda tutilgan asoslarga koʻra Roʻyxatdan chiqarilmaganlik holatlari boʻyicha maxsus vakolatli davlat organiga asoslantirilgan ariza bilan murojaat qiladi.

18. Maxsus vakolatli davlat organi arizani oʻzi koʻrib chiqadi yoki arizani olgan kundan keyingi ish kunidan kechiktirmasdan shaxsni Roʻyxatga kiritish uchun maʼlumoti asos boʻlgan Oʻzbekiston Respublikasining tegishli vakolatli organiga uni koʻrib chiqish uchun yuboradi.

Arizani qabul qilgan organ uni yetti ish kuni davomida qonunchilik hujjatlarida belgilangan tartibda koʻrib chiqadi hamda quyidagi qarorlardan birini qabul qiladi (bundan qaror qabul qilish uchun xorijiy davlatlar vakolatli organlariga yoxud xalqaro tashkilotlarga soʻrovlar yuborish zarur boʻlgan holatlar mustasno):

shaxsni Roʻyxatdan chiqarish toʻgʻrisida taklif kiritish haqida;

arizani qanoatlantirishni rad etish toʻgʻrisida.

19. Maxsus vakolatli davlat organi arizani koʻrib chiqish natijasi boʻyicha yoki Oʻzbekiston Respublikasining vakolatli organining javob xatini olgan kundan ikki ish kunidan kechiktirmasdan qabul qilingan qaror haqida arizachini xabardor qiladi.

20. Jismoniy yoki yuridik shaxs arizani qanoatlantirishni rad etish toʻgʻrisidagi qaror ustidan sud tartibida shikoyat qilish huquqiga ega.

21. Jismoniy yoki yuridik shaxs xorijiy davlatlarning vakolatli organlaridan yoki xalqaro tashkilotlardan olinadigan maʼlumotlar asosida Roʻyxatga kiritilishi ustidan quyidagi tashkilot va organlarga shikoyat qilishga haqli:

BMT Xavfsizlik Kengashining sanksiyaviy roʻyxatlari yoki tegishli rezolyutsiyalariga asosan kiritilganlik holat boʻyicha BMT Xavfsizlik Kengashining 1730 (2006) rezolyutsiyasiga asosan tuzilgan Aloqa markaziga yoki BMT Xavfsizlik Kengashining 1904 (2009) rezolyutsiyasiga asosan taʼsis etilgan Ombudsman Devonxonasiga;

xorijiy davlatning terrorchilik faoliyatida yoki ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslar roʻyxatlari asosida Roʻyxatga kiritilgan holat boʻyicha xorijiy davlatning vakolatli organiga;

shaxsni Roʻyxatga kiritish uchun asos boʻlgan xorijiy davlat sudining hukmi yoki qarori ustidan yuqori turuvchi sudiga;

shaxsni Roʻyxatga kiritish uchun asos boʻlgan operatsiyalarni toʻxtatib turish va (yoki) pul mablagʻlarini yoki boshqa mol-mulkni ishga solmay toʻxtatib qoʻyish toʻgʻrisida soʻrovni yuborgan xorijiy davlatning vakolatli organiga.

22. Maxsus vakolatli davlat organi Roʻyxatni shakllantirgan yoki unga tegishli oʻzgartirishlar kiritgandan soʻng bir soat ichida oʻzining rasmiy veb-saytiga joylashtirish yoki elektron aloqa kanallari orqali yuborish yoʻli bilan pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilotlarga yetkazadi.

Shuningdek, maxsus vakolatli davlat organi Roʻyxatni boshqa jismoniy va yuridik shaxslarga oʻzining rasmiy veb-saytiga joylashtirish orqali yetkazadi.

23. Pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilotlar Roʻyxat maxsus vakolatli davlat organining rasmiy veb-saytida yangilanganligini yoki elektron aloqa kanali orqali kelib tushganligini kuzatib borishlari hamda mazkur jarayonga masʼul boʻlgan xodimni (tarmoqni) belgilashlari shart.

Pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilotlarning masʼul xodimi (tarmogʻi) Roʻyxat maxsus vakolatli davlat organining rasmiy veb-saytida joylashtirilgan yoki elektron aloqa kanallari orqali kelib tushgan paytdan boshlab uch soat ichida Roʻyxatni ushbu tashkilotning tegishli xodimlariga (tarmoqlariga), shu jumladan mijozlar bilan bevosita ishlaydigan xodimlarga (tarmoqlarga) yuborilishini va (yoki) undan foydalanish imkoniyatini taʼminlashi shart.

24. Pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilotlar operatsiyalarni amalga oshirishda ularning ishtirokchilari va mijozlarning benefitsiar mulkdorlarini Roʻyxat bilan solishtirishlari, shuningdek ishga solmay toʻxtatib qoʻyilishi lozim boʻlgan pul mablagʻlari yoki boshqa mol-mulkni aniqlash maqsadida muntazam ravishda (Roʻyxat yangilangan har bir holatda, lekin kamida uch oyda bir marotaba) mijozlar va ularning benefitsiar mulkdorlarining maʼlumotlari bazalarini monitoring qilib borishlari shart.

25. Pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilotlar mijoz yoki operatsiya qatnashchilaridan birining identifikatsion maʼlumotlari Roʻyxatga kiritilgan shaxsning maʼlumotlari bilan toʻliq mos kelganligini, shuningdek Roʻyxatga kiritilgan shaxsning pul mablagʻlari yoki boshqa mol-mulkini aniqlagan taqdirda kechiktirmasdan va oldindan xabar qilmasdan operatsiyani amalga oshirishni toʻxtatib turadi (bundan jismoniy yoki yuridik shaxs hisobvaragʻiga tushgan pul mablagʻlarini hisobga kiritish operatsiyalari mustasno) va (yoki) pul mablagʻlarini yoki boshqa mol-mulkini ishga solmay toʻxtatib qoʻyadilar.

26. Quyidagi holatlarda ham operatsiya toʻxtatib turilishi, pul mablagʻlari yoki boshqa mol-mulk ishga solmay toʻxtatib qoʻyilishi shart, agarda:

operatsiya qatnashchilaridan biri Roʻyxatga kiritilgan shaxs nomidan yoki uning topshirigʻiga asosan faoliyat koʻrsatayotgan boʻlsa;

operatsiyani amalga oshirishda foydalanayotgan pul mablagʻlari yoki boshqa mol-mulk toʻliq yoki qisman Roʻyxatga kiritilgan shaxsga tegishli boʻlsa yoxud nazorati ostida boʻlsa;

operatsiya qatnashchisi boʻlgan yuridik shaxs Roʻyxatga kiritilgan jismoniy yoki yuridik shaxsning mulkida yoki nazorat ostida boʻlsa;

pul mablagʻlari yoki boshqa mol-mulk Roʻyxatga kiritilgan shaxslarga bevosita yoki bilvosita tegishli yoxud nazorati ostida boʻlgan pul mablagʻlari yoki boshqa mol-mulkidan foydalanish natijasida olingan yoxud sotib olingan boʻlsa.

27. Pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilot Roʻyxatga kiritilgan shaxslarning operatsiyalari toʻxtatilgan va (yoki) pul mablagʻlari yoki boshqa mol-mulkini ishga solmay toʻxtatib qoʻyilgan holatlar boʻyicha ishga solmay toʻxtatib qoʻyilgan mulkning summasini koʻrsatgan holda bir ish kunidan kechiktirmasdan shubhali operatsiya toʻgʻrisida, shuningdek bu borada koʻrilgan barcha choralar hamda mazkur operatsiyani amalga oshirishga qaratilgan urinishlar haqida maxsus vakolatli davlat organiga xabar qilishi shart.

28. Quyidagi holatlarda toʻxtatib turilgan operatsiyalar tiklanadi hamda pul mablagʻlari yoki boshqa mol-mulkni ishga solmay toʻxtatib qoʻyish bekor qilinadi:

shaxs Roʻyxatdan chiqarilganda;

operatsiyasi toʻxtatib turilgan va pul mablagʻlari yoki boshqa mol-mulki ishga solinmay toʻxtatib qoʻyilgan shaxs Roʻyxatga kiritilgan shaxs bilan bir xildagi identifikatsion maʼlumotlarga ega boʻlsa (bundan buyon matnda “yanglishish holati” deb yuritiladi).

29. Roʻyxatga kiritilgan shaxs bilan bir xildagi identifikatsion maʼlumotlarga ega boʻlgan shaxs toʻxtatib turilgan operatsiyalarini tiklash va (yoki) pul mablagʻlari yoki boshqa mol-mulkini ishga solmay toʻxtatib qoʻyishni bekor qilish yuzasidan maxsus vakolatli davlat organiga yozma murojaat qiladi.

Murojaatga shaxsning toʻliq identifikatsiya qilish uchun zarur boʻlgan hamda u Roʻyxatga kiritilgan shaxs emasligini tasdiqlovchi hujjatlar va boshqa maʼlumotlar ilova qilinishi lozim.

30. Maxsus vakolatli davlat organi murojaatni uch ish kuni mobaynida koʻrib chiqadi va operatsiya ishtirokchisi Roʻyxatga kiritilgan shaxs emasligi va bu shaxs bilan bir xildagi identifikatsion maʼlumotlarga ega ekanligi tasdiqlansa, bu haqda arizachini va pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilotni xabardor qiladi.

Agar taqdim qilingan maʼlumotlar shaxsni toʻliq identifikatsiya (verifikatsiya) qilish imkonini bermasa, maxsus vakolatli davlat organi murojaat kelib tushgan kundan boshlab uch ish kuni mobaynida arizachiga asoslantirilgan rad javobini yuboradi.

31. Pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilot quyidagi maʼlumotni olgan kunning oʻzida, lekin keyingi ish kunidan kechiktirmasdan toʻxtatilgan operatsiyani tiklaydi va (yoki) pul mablagʻlari yoki boshqa mol-mulkni ishga solmay toʻxtatib qoʻyishni bekor qiladi:

shaxs Roʻyxatdan chiqarib tashlanganligi toʻgʻrisida;

“yanglishish holati”ni tasdiqlash haqidagi maxsus vakolatli davlat organining xabarnomasi.

32. Quyidagi maqsadlarda Roʻyxatga kiritilgan shaxs yoki operatsiyaning boshqa ishtirokchisi ishga solmay toʻxtatib qoʻyilgan mol-mulkidan foydalanishga ruxsat berish uchun pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilotga murojaat qilishga haqli:

a) oziq-ovqat mahsulotlari, dori vositalari va tibbiy buyumlarni xarid qilish, turar joy ijarasi, ipoteka krediti, kommunal toʻlovlar, tibbiy xizmat, soliqlar va yigʻimlar, sugʻurta toʻlovlari, oʻrtacha bozor narxi chegarasida advokatlar xizmati va yuridik maslahatlar, bank hisobvaraqlariga xizmat koʻrsatish yoki mulkni saqlash bilan bogʻliq joriy toʻlov va yigʻimlarni toʻlash uchun;

b) favquloddagi xarajatlarni toʻlash uchun;

v) BMT Xavfsizlik Kengashining 1718 (2006), 1737 (2006), 2231 (2015) rezolyutsiyalari va ularni rivojlantirishga qaratilgan rezolyutsiyalarda nazarda tutilgan holatlar uchun.

Murojaatga toʻlov maqsadi, summasi va asosi, ishga solmay toʻxtatib qoʻyilgan mol-mulki boʻyicha qaysi mulkidan foydalanishga ruxsat berish, pul mablagʻlari yoki boshqa mol-mulkni oluvchining rekvizitlari va identifikatsion maʼlumotlari, pul mablagʻlari oluvchining banki toʻgʻrisidagi maʼlumotlari ilova qilinadi.

33. Pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilot bunday murojaatni olgan kundan boshlab bir ish kunidan kechiktirmasdan uni maxsus vakolatli davlat organiga yuboradi.

34. Ishga solmay toʻxtatib qoʻyilgan mol-mulkdan foydalanishga ruxsat berish toʻgʻrisidagi murojaat kelib tushganidan keyin maxsus vakolatli davlat organi ikki ish kuni mobaynida quyidagi qarorlardan birini qabul qiladi:

a) murojaatni koʻrib chiqish uchun maʼlumoti shaxsni Roʻyxatga kiritish uchun asos boʻlgan Oʻzbekiston Respublikasining vakolatli organiga yuborish toʻgʻrisida.

Bunda, maʼlumoti shaxsni Roʻyxatga kiritish uchun asos boʻlgan organ yetti ish kuni davomida (Oʻzbekiston Respublikasining tegishli vakolatli organlaridan maʼlumot olish yoki xorijiy davlatlar vakolatli organlariga yoxud xalqaro tashkilotlarga soʻrovlar yuborish zaruriyati boʻlgan holatlar mustasno) murojaatni koʻrib chiqadi va qabul qilingan qaror haqida maxsus vakolatli davlat organini xabardor qiladi.

b) shaxs BMT Xavfsizlik Kengashining sanksiyaviy roʻyxatlari yoki tegishli rezolyutsiyalari yoxud xorijiy davlatlar vakolatli organlarining soʻrovlari asosida Roʻyxatga kiritilgan boʻlsa:

mazkur murojaatni koʻrib chiqish uchun BMT Xavfsizlik Kengashining tegishli rezolyutsiyalari asosida BMT Xavfsizlik Kengashi yoki uning tegishli qoʻmitasiga yuborish uchun Oʻzbekiston Respublikasi Tashqi ishlar vazirligiga yuborish toʻgʻrisida;

soʻrov yuborgan xorijiy davlat vakolatli organiga ishga solmay toʻxtatib qoʻyilgan mol-mulkdan foydalanishga ruxsat berish masalasini kelishish uchun xabarnoma yuborish toʻgʻrisida.

Maxsus vakolatli davlat organi qabul qilingan qaror haqida ikki ish kunidan kechiktirmasdan pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilotni xabardor qiladi.

35. BMT Xavfsizlik Kengashining sanksiyaviy roʻyxatlari yoki tegishli rezolyutsiyalari asosida Roʻyxatga kiritilgan shaxsga ishga solmay toʻxtatib qoʻyilgan mol-mulkdan foydalanishga ruxsat quyidagi holatlarda berilishi mumkin:

a) ushbu Nizomning 32-bandi “a” kichik bandida koʻrsatilgan maqsadlar uchun ruxsat olish toʻgʻrisidagi murojaat Oʻzbekiston Respublikasi Tashqi ishlar vazirligi tomonidan BMT Xavfsizlik Kengashi yoki uning tegishli qoʻmitasiga yetkazilganligi va BMT Xavfsizlik Kengashining tegishli rezolyutsiyalarining boshqa talablariga rioya etilganligi sharti bilan;

b) ushbu Nizomning 32-bandi “b” kichik bandida koʻrsatilgan maqsadlar uchun faqat BMT Xavfsizlik Kengashi yoki uning tegishli qoʻmitasining roziligi haqidagi diplomatik kanallar orqali olingan tasdiqlovchi hujjatlar asosida;

v) ushbu Nizomning 32-bandi “v” kichik bandida koʻrsatilgan maqsadlar uchun BMT Xavfsizlik Kengashining 1718 (2006), 1737 (2006), 2231 (2015) rezolyutsiyalari va ularni rivojlantirishga qaratilgan rezolyutsiyalarning talablariga rioya etgan holda (shu jumladan, shaxs Roʻyxatga kiritilgunga qadar tuzilgan shartnoma boʻyicha toʻlovlar amalga oshirilganda, agarda shartnoma (bitim) har qanday taqiqlangan buyumlar, materiallar, uskunalar, tovarlar, texnologiyalar, yordam koʻrsatish, oʻqitish, moliyaviy koʻmak berish, investitsiyalash, brokerlik faoliyati yoki BMT Xavfsizlik Kengashining 2231 (2015) rezolyutsiyasi va uni rivojlantirishga qaratilgan rezolyutsiyalarda qayd etilgan xizmatlar bilan bogʻliq boʻlmagan, shuningdek toʻlov BMT Xavfsizlik Kengashining 2231 (2015) rezolyutsiyasida koʻrsatilgan choralar tatbiq etiladigan shaxs tomonidan bevosita yoki bilvosita olinmagan hamda BMT Xavfsizlik Kengashiga belgilangan muddatlarda bunday toʻlovlarni olish yoki yuborish yoxud zarur boʻlgan hollarda ishga solmay toʻxtatib qoʻyilgan pul mablagʻlari yoki boshqa mol-mulkdan foydalanishga ruxsat berish toʻgʻrisida xabar yuborilgan holatlarda).

36. Pul mablagʻlari yoki boshqa mol-mulkdan foydalanishga ruxsat berilgan operatsiya, shu jumladan, uni amalga oshirishga urinish holatlari ham shubhali operatsiyalar deb topiladi hamda bunday operatsiyalar haqida bir ish kunidan kechiktirmasdan pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilotlar tomonidan qonunchilik hujjatlarida belgilangan tartibda maxsus vakolatli davlat organiga xabar qilinishi shart.

37. Xorijiy davlat vakolatli organining terrorchilik faoliyatida yoki ommaviy qirgʻin qurolini tarqatishda ishtirok etish yoki ishtirok etishda gumon qilish bilan bogʻliq sanksiyalar ostiga tushadigan shaxslarning operatsiyalarini toʻxtatib turish va (yoki) pul mablagʻlarini yoki boshqa mol-mulkini ishga solmay toʻxtatib qoʻyish toʻgʻrisidagi soʻrovida quyidagilar koʻrsatilishi lozim:

shaxs terrorchilik faoliyatida yoki ommaviy qirgʻin qurolini tarqatishda ishtirok etishiga yoki ishtirok etishda gumon qilinishiga asos boʻluvchi maʼlumotlar;

BMT Xavfsizlik Kengashining tegishli rezolyutsiyalarida belgilangan sanksiyalarni qoʻllash uchun asos boʻlgan mezonlarga toʻgʻri kelishi haqida maʼlumotlar;

jismoniy va yuridik shaxslar uchun ushbu Nizomning 10-bandida nazarda tutilgan maʼlumotlar.

38. Taqdim etilgan maʼlumotlar toʻliq boʻlmagan yoki noaniq boʻlgan holatlarda maxsus vakolatli davlat organi qoʻshimcha maʼlumotlarni soʻrab olish uchun tegishli xorijiy davlat vakolatli organiga murojaat qiladi.

39. Maxsus vakolatli davlat organi xorijiy davlat vakolatli organining soʻrovini bir ish kuni davomida koʻrib chiqadi va natijasi boʻyicha shaxsni Roʻyxatga kiritish yoki Roʻyxatga kiritishni rad etish toʻgʻrisida qaror qabul qiladi hamda bu toʻgʻrisida soʻrov tashabbuskorini xabardor qiladi.

40. Operatsiyalarni toʻxtatib turish va (yoki) pul mablagʻlarini yoki boshqa mol-mulkni ishga solmay toʻxtatib qoʻyish haqida soʻrov ijrosi maxsus vakolatli davlat organining vakolat doirasiga kirmasa, uni ijro etish uchun vakolatli boʻlgan Oʻzbekiston Respublikasining tegishli davlat organiga yuboradi.

41. Xorijiy davlat vakolatli organining soʻrovini ijro etish imkoni boʻlmagan taqdirda, maʼlumot va hujjatlar soʻrov tashabbuskoriga ijro etishga toʻsqinlik qiluvchi sabablar koʻrsatilgan holda qaytariladi.

42. Xorijiy davlat vakolatli organining soʻrovi Oʻzbekiston Respublikasining qonunchilik hujjatlariga zid boʻlsa yoki uning ijrosi Oʻzbekiston Respublikasi suvereniteti yoki xavfsizligiga zarar yetkazishi mumkin boʻlsa ijro etilmaydi.

43. Oʻzbekiston Respublikasi vakolatli organlari yoki maxsus vakolatli davlat organining xorijiy davlatlar vakolatli organlariga shaxslarning operatsiyalarini toʻxtatib turish va (yoki) pul mablagʻlarini yoki boshqa mol-mulkini ishga solmay toʻxtatib qoʻyish toʻgʻrisida yuboriladigan soʻrovlari BMT Xavfsizlik Kengashi tomonidan belgilangan mezonlarga koʻra ushbu shaxslar terrorchilik faoliyatida yoki ommaviy qirgʻin qurolini tarqatishda ishtirok etishiga yoki ishtirok etishda gumon qilinishiga asos boʻluvchi asoslantirilgan va yetarli maʼlumotlarni, shuningdek imkoni boricha koʻproq identifikatsion va boshqa maʼlumotlarni oʻz ichiga olishi lozim.

44. Oʻzbekiston Respublikasi Davlat xavfsizlik xizmati terrorchilik faoliyatida yoki ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslarni BMT Xavfsizlik Kengashining sanksiyaviy roʻyxatlariga kiritish uchun takliflar yuborishga masʼul boʻlgan davlat organi hisoblanadi.

45. BMT Xavfsizlik Kengashining sanksiyaviy roʻyxatlariga kiritilishi lozim boʻlgan shaxslarni aniqlash va identifikatsiya qilish Oʻzbekiston Respublikasi Davlat xavfsizlik xizmati tomonidan, shu jumladan Oʻzbekiston Respublikasining boshqa vakolatli organlari yoki maxsus vakolatli davlat organi bilan hamkorlikda, BMT Xavfsizlik Kengashi tomonidan belgilangan mezonlarga koʻra va tartibda amalga oshiriladi.

46. Oʻzbekiston Respublikasining boshqa vakolatli organlari yoki maxsus vakolatli davlat organi BMT Xavfsizlik Kengashining sanksiyaviy roʻyxatlariga kiritilishi lozim boʻlgan shaxs toʻgʻrisidagi maʼlumotlarni aniqlagan yoki olgan taqdirda, bunday maʼlumotlarni Oʻzbekiston Respublikasi Davlat xavfsizlik xizmatiga yuboradilar.

47. Oʻzbekiston Respublikasi Davlat xavfsizlik xizmati BMT Xavfsizlik Kengashining sanksiyaviy roʻyxatlariga kiritilishi lozim boʻlgan shaxslarni aniqlash va identifikatsiya qilish uchun zarur boʻlgan maʼlumotlarni Oʻzbekiston Respublikasining boshqa vakolatli organlari, maxsus vakolatli davlat organi hamda boshqa davlat organlaridan soʻrab olish huquqiga ega.

Soʻralgan maʼlumotlar uch ish kuni davomida taqdim etiladi, bundan ularni taqdim etish uchun xorijiy davlatlarning vakolatli organlari yoki xalqaro tashkilotlarga murojaat qilish zarur boʻlgan holatlar mustasno.

48. Oʻzbekiston Respublikasi Davlat xavfsizlik xizmati BMT Xavfsizlik Kengashi tomonidan belgilangan mezonlarga koʻra shaxslar terrorchilik faoliyatida yoki ommaviy qirgʻin qurolini tarqatishda ishtirok etishiga yoki ishtirok etishda gumon qilinishiga asos boʻluvchi asoslantirilgan va yetarli maʼlumotlar mavjud boʻlganda, mazkur shaxslarni BMT Xavfsizlik Kengashining sanksiyaviy roʻyxatlariga kiritish uchun takliflar yuborish toʻgʻrisida qaror qabul qiladi.

49. Davlat xavfsizlik xizmati BMT Xavfsizlik Kengashining sanksiyaviy roʻyxatlariga kiritilishi lozim boʻlgan shaxs toʻgʻrisidagi maʼlumotlarni BMT Xavfsizlik Kengashi yoki uning tegishli qoʻmitasiga koʻrib chiqish uchun yuborish maqsadida Oʻzbekiston Respublikasi Tashqi ishlar vazirligiga taqdim etadi.

50. Ushbu Nizomning 48-bandida nazarda tutilgan maʼlumotlarni Oʻzbekiston Respublikasi Tashqi ishlar vazirligiga taqdim etishda BMT Xavfsizlik Kengashi va uning qoʻmitalari tomonidan belgilangan shakllar toʻldirilgan hamda maʼlumotlarni yuborish tartib-taomillariga rioya etilgan boʻlishi shart.

Bunda quyidagi maʼlumotlar taqdim etilishi lozim:

shaxsni BMT Xavfsizlik Kengashi tomonidan belgilangan mezonlarga muvofiq BMT Xavfsizlik Kengashining sanksiyaviy roʻyxatlariga kiritishni asoslovchi barcha zaruriy maʼlumotlar hamda shaxsni identifikatsiya qilish imkonini beruvchi aniq va ishonchli maʼlumotlar;

shaxsni BMT Xavfsizlik Kengashining sanksiyaviy roʻyxatlariga kiritilgan shaxslar bilan aloqadorligi toʻgʻrisidagi, shuningdek tegishli takliflar Oʻzbekiston Respublikasi nomidan kiritilganligini oshkor etish yoki etmaslik mumkinligi haqidagi maʼlumotlar.

51. Shaxsni BMT Xavfsizlik Kengashining sanksiyaviy roʻyxatlaridan chiqarish uchun takliflar kiritish BMT Xavfsizlik Kengashi rezolyutsiyalari va qoʻmitalarining tegishli hujjatlarida (boshqaruv prinsiplarida) belgilangan tartibda amalga oshiriladi.

52. Oʻzbekiston Respublikasining boshqa vakolatli organlari yoki maxsus vakolatli davlat organi BMT Xavfsizlik Kengashining sanksiyaviy roʻyxatlariga kiritilgan shaxs vafot etganligi toʻgʻrisida maʼlumotlarni olgan taqdirda, bu haqda Oʻzbekiston Respublikasi Davlat xavfsizlik xizmatini xabardor qiladilar.

53. BMT Xavfsizlik Kengashining sanksiyaviy roʻyxatlariga kiritilgan shaxs sudning qonuniy kuchga kirgan qarori bilan vafot etgan deb eʼlon qilingan yoki vakolatli organ tomonidan oʻlimi qayd etilgan taqdirda, Oʻzbekiston Respublikasi Davlat xavfsizlik xizmati bu haqda Oʻzbekiston Respublikasi Tashqi ishlar vazirligi orqali BMT Xavfsizlik Kengashi yoki uning tegishli qoʻmitasini tasdiqlovchi hujjatlarni ilova qilgan holda xabardor qiladi.

54. BMT Xavfsizlik Kengashining sanksiyaviy roʻyxatlariga kiritilgan shaxs vafot etgan taqdirda uning qonuniy vorislari uni BMT Xavfsizlik Kengashining sanksiyaviy roʻyxatlaridan chiqarish uchun BMT Xavfsizlik Kengashining 1730 (2006) rezolyutsiyasiga asosan tuzilgan Aloqa markaziga yoki 1904 (2009) rezolyutsiyasi bilan taʼsis etilgan Ombudsman Devonxonasiga murojaat etishlari mumkin.

55. Maxsus vakolatli davlat organining rasmiy veb-saytida shaxsni BMT Xavfsizlik Kengashi sanksiyaviy roʻyxatlaridan chiqarish tartib-taomillari bilan tanishish imkonini beruvchi BMT Xavfsizlik Kengashi rasmiy veb-saytining tegishli boʻlimlari havolasi joylashtiriladi.

56. Maxsus vakolatli davlat organi tegishli nazorat qiluvchi, litsenziyalovchi, roʻyxatdan oʻtkazuvchi organlar yoki qonunchilik hujjatlariga muvofiq nazorat yuklatilgan boshqa organlar bilan hamkorlikda pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilotlar tomonidan ushbu Nizom talablariga rioya etilishi ustidan monitoring va nazoratni amalga oshiradi.

57. Operatsiyalarni toʻxtatib turish va (yoki) pul mablagʻlari yoki boshqa mol-mulkni ishga solmay toʻxtatib qoʻyish natijasida mulkiy zarar koʻrgan jismoniy va yuridik shaxslar pul mablagʻlari yoki boshqa mol-mulkni ishga solmay toʻxtatib qoʻyish chorasi qoʻllanilgan shaxsga nisbatan ushbu zararni qoplash daʼvosi bilan sudga murojaat qilishga haqli.

58. Maxsus vakolatli davlat organi zarur hollarda terrorchilik faoliyatida yoki ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslarning pul mablagʻlari yoki boshqa mol-mulkni ishga solmay toʻxtatib qoʻyish, operatsiyalarni tiklash, ishga solmay toʻxtatib qoʻyilgan mol-mulkdan foydalanishga ruxsat berish va boshqa masalalar boʻyicha tushuntirishlar taqdim etadi hamda ularni jismoniy va yuridik shaxslar, xususan pul mablagʻlari yoki boshqa mol-mulk bilan operatsiyalarni amalga oshiruvchi tashkilotlarga, shu jumladan oʻzining rasmiy veb-saytida joylashtirish orqali yetkazadi.

59. Ushbu Nizomning buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladilar.

60. Mazkur Nizom Oʻzbekiston Respublikasi Davlat xavfsizlik xizmati, Tashqi ishlar vazirligi, Moliya vazirligi, Ichki ishlar vazirligi, Axborot texnologiyalari va kommunikatsiyalarini rivojlantirish vazirligi, Oʻzbekiston Respublikasi Prezidenti huzuridagi Loyiha boshqaruvi milliy agentligi, Markaziy banki, Sanoat xavfsizligi davlat qoʻmitasi, Monopoliyaga qarshi kurashish qoʻmitasi va Davlat aktivlarini boshqarish agentligi bilan kelishilgan.