O‘zbekiston Respublikasi Prezidentining “O‘zbekiston Respublikasida pasport tizimi to‘g‘risidagi Nizom”ni amalga kiritish haqida” 1994-yil 23-dekabrdagi Farmonini hisobga olgan holda O‘zbekiston Respublikasi fuqarolarining chet elga borishlari tartibini yanada soddalashtirish maqsadida Vazirlar Mahkamasi qaror qiladi:

1. Vazirlar Mahkamasining “O‘zbekiston Respublikasi fuqarolarining chet elga borishlarining tartibi to‘g‘risida” 1994-yil 17-martdagi 141-son qarori o‘z kuchini yo‘qotgan deb hisoblansin.

2. Quyidagilar tasdiqlansin:

O‘zbekiston Respublikasi fuqarolarining chet elga chiqishi va O‘zbekiston Respublikasi hududiga kirishi tartibi 1-ilovaga muvofiq;

O‘zbekiston Respublikasining diplomatik pasporti to‘g‘risidagi Nizom va diplomatik pasport beriladigan shaxslar ro‘yxati 2, 3-ilovalarga muvofiq;

3. O‘zbekiston Respublikasi Ichki ishlar vazirligi, Tashqi ishlar vazirligi va Milliy xavfsizlik xizmati o‘zlarining yo‘riqnoma hujjatlarini mazkur qarorga muvofiqlashtirsinlar.

1. O‘zbekiston Respublikasi fuqarolari, O‘zbekiston Respublikasining qonun hujjatlarida belgilangan cheklashlardan tashqari, chet elga erkin chiqish va ushbu Nizomda nazarda tutilgan tartibda O‘zbekiston Respublikasiga kelish huquqiga egadirlar.

2. Ushbu Nizom O‘zbekiston Respublikasi fuqarolarining xorijiy davlatlarga chiqishlariga tatbiq etiladi, O‘zbekiston Respublikasining xalqaro shartnomalariga muvofiq ularga kirish uchun kirish vizalarini rasmiylashtirish talab etilmaydigan xorijiy davlatlar bundan mustasno.

3. Chet elga vaqtincha chiqayotganda fuqarolarga chet elga borish uchun 2 yil mobaynida amal qiladigan ruxsatnoma yozuvi stikeri (keyingi o‘rinlarda stiker deb yuritiladi) rasmiylashtiriladi. Fuqarolar ko‘rsatilgan muddat mobaynida bir necha marta chet elga chiqishi mumkin. Stikerning amal qilish muddati pasportning amal qilish muddatidan oshmasligi kerak.

Doimiy yashash uchun chet elga chiqishda fuqarolarga amal qilish muddatisiz stiker rasmiylashtiriladi.

O‘zbekiston Respublikasi Qurolli Kuchlari harbiy xizmatchilarining chet elga chiqishi O‘zbekiston Respublikasining qonun hujjatlariga muvofiq rasmiylashtiriladi. Harbiy xizmatchilarga stiker harbiy qism (muassasa) joylashgan joy bo‘yicha rasmiylashtiriladi.

4. Biometrik diplomatik pasportlar bo‘yicha chet elga chiqish O‘zbekiston Respublikasining biometrik diplomatik pasporti to‘g‘risidagi nizomga muvofiq O‘zbekiston Respublikasi Tashqi ishlar vazirligi tomonidan rasmiylashtiriladi.

5. Xodimni xorijiy xizmat safariga yuborish to‘g‘risida taqdim etilgan hujjatlarning ishonchliligi yuzasidan javobgarlik, mulkchilik shakllaridan qat’i nazar, xizmat safariga yuborish haqida qaror qabul qilgan tashkilotlar va muassasalar rahbarlari zimmasiga yuklanadi.

6. Chet elga chiqish uchun ruxsatnoma yozuvi stikeri fuqarolarning doimiy ro‘yxatda turgan joylari (harbiy xizmatchilar uchun — harbiy qism (muassasa) joylashgan joy) bo‘yicha O‘zbekiston Respublikasi Ichki ishlar vazirligi, Qoraqalpog‘iston Respublikasi Ichki ishlar vazirligi, viloyatlar ichki ishlar boshqarmalari, Toshkent shahar ichki ishlar bosh boshqarmasining Kirish-chiqish va fuqarolikni rasmiylashtirish boshqarmasi, shuningdek Toshkent shahar ichki ishlar bosh boshqarmasining tuman bo‘linmalari (keyingi o‘rinlarda KChFR bo‘linmalari deb yuritiladi) tomonidan, shuningdek ushbu Tartibda nazarda tutilgan hollarda chet eldagi O‘zbekiston Respublikasi konsullik muassasalari tomonidan kirish-chiqish va fuqarolikni rasmiylashtirish bo‘linmalari bilan kelishgan holda rasmiylashtiriladi.

7. O‘zbekiston Respublikasidan yoxud O‘zbekiston Respublikasining xalqaro shartnomalariga muvofiq ularga kirish uchun kirish vizalarini rasmiylashtirish talab etilmaydigan xorijiy davlatlardan boshqa xorijiy davlatlarga stiker rasmiylashtirmasdan chiqish qonun hujjatlarida belgilangan javobgarlikka olib keladi, O‘zbekiston Respublikasining xalqaro shartnomalariga muvofiq ularga kirish uchun kirish vizalarini rasmiylashtirish talab etilmaydigan xorijiy davlatlar o‘rtasida safar qilish bundan mustasno.

Stikerning amal qilish muddati chet elda tamom bo‘lishi O‘zbekiston Respublikasiga kirishda, shuningdek bir xorijiy davlatdan boshqasiga safar qilishda javobgarlikka tortish uchun asos bo‘lmaydi, O‘zbekiston Respublikasining xalqaro shartnomalariga muvofiq kirish vizalarini rasmiylashtirish talab etilmaydigan xorijiy davlatlardan boshqa xorijiy davlatlarga safar qilish bundan mustasno.

1. Chet elga bormoqchi bo‘lgan fuqarolar, O‘zbekiston Respublikasining xalqaro shartnomalariga muvofiq ularga kirish uchun kirish vizalarini rasmiylashtirish talab etilmaydigan xorijiy davlatlar bundan mustasno, pasportini, belgilangan namunadagi anketa-arizani, davlat boji to‘langanligi to‘g‘risidagi kvitansiyani, 35 x 45 mm o‘lchamli 4 ta fotosuratni, harbiy guvohnomani (harbiy guvohnoma mavjud bo‘lmagan taqdirda chaqiruv yoshidagi shaxslar uchun mudofaa ishlari bo‘yicha bo‘limning belgilangan namunadagi ma’lumotnomasini) taqdim etgan holda doimiy ro‘yxatda turgan joydagi kirish-chiqish va fuqarolikni rasmiylashtirish bo‘linmalariga (harbiy xizmatchilar uchun harbiy qism (muassasa) joylashgan joy bo‘yicha) murojaat qiladilar.

2. Kirish-chiqish va fuqarolikni rasmiylashtirish bo‘linmalari fuqaroning murojaatini 15 ish kuni mobaynida ko‘rib chiqadi va chet elga chiqish huquqiga cheklovlar uchun asos bo‘lmagan taqdirda uning pasportiga stiker yopishtiradi.

Zarur tarzda rasmiylashtirilgan hujjatlar kirish-chiqish va fuqarolikni rasmiylashtirish bo‘linmalariga berilgan kun murojaat qilingan sana deb hisoblanadi.

Amal qiladigan stiker haqiqiy bo‘lmagan pasportdan yangi pasportga ko‘chirilgan hollarda, ushbu stikerni rasmiylashtirish muddati 7 ish kunidan oshmasligi kerak.

Chet elga xizmat safariga borayotgan fuqarolarga, ular ishlaydigan tashkilotlarning mulkchilik shakllaridan qat’i nazar, chet elga chiqish huquqini cheklashlar uchun asos bo‘lmagan taqdirda, stikerni rasmiylashtirish uchun hujjatlarni ko‘rib chiqish muddati 10 ish kunidan oshmasligi kerak.

O‘zbekiston Respublikasidan tashqariga chiqishni talab qiladigan shoshilinch davolanish zaruriyatini, og‘ir kasallik holatlarini yoki yaqin qarindoshi vafot etganligini tasdiqlovchi hujjatlar mavjud bo‘lganda fuqaroga va unga hamrohlik qiluvchi shaxslarga stikerni rasmiylashtirish muddati, chet elga chiqish huquqini cheklash uchun asos bo‘lmagan taqdirda, 5 ish kunidan oshmasligi kerak.

Chet elda doimiy yashash uchun chiqish hujjatlarini rasmiylashtirishda fuqarolarning doimiy ro‘yxatda turgan joylaridagi kirish-chiqish va fuqarolikni rasmiylashtirish bo‘linmalari arizachilarning murojaatini 15 ish kuni mobaynida ko‘rib chiqadi va fuqaroning chet elga chiqishiga to‘sqinlik qiluvchi holatlar bo‘lmagan taqdirda, uning pasportiga doimiy yashash uchun stikerni yopishtiradi. Qo‘shimcha tekshirishlar o‘tkazish zarur bo‘lganda hujjatlarni ko‘rib chiqish muddati 30 kungacha uzaytirilishi mumkin.

Doimiy yashash uchun chet elga chiqishda fuqarolar O‘zbekiston Respublikasi hududida doimiy yashaydigan o‘z ota-onasining va turmush o‘rtog‘ining (birgalikda chiqish holatlari bundan mustasno), shuningdek agar birgalikdagi nikohdan bolalar bo‘lsa, O‘zbekiston Respublikasida doimiy yashaydigan sobiq turmush o‘rtog‘ining notarial tasdiqlangan roziligini, ular vafot etgan yoki bedarak yo‘qolgan hollarda esa — vafot etganlik to‘g‘risidagi guvohnomani yoki sudning shaxsni bedarak yo‘qolgan deb e’tirof etish haqidagi qarorini (nusxalari olinib, asli qaytariladi) kirish-chiqish va fuqarolikni rasmiylashtirish bo‘linmalariga taqdim etadilar.

O‘zbekiston Respublikasi fuqarolari xorijiy davlat hududiga kirish vizasini olish uchun tegishli xorijiy davlatlarning diplomatik vakolatxonalariga yoki konsullik muassasalariga murojaat qiladilar.

3. Xususiy kontraktlar bo‘yicha mehnat faoliyati bilan shug‘ullanish uchun chet elga chiqishni rasmiylashtirish belgilangan tartibda amalga oshiriladi.

4. Chet elga ketayotgan va davlat siri bo‘lgan ma’lumotlardan xabardor bo‘lgan shaxsga nisbatan ketayotgan shaxsning ish joyi bo‘yicha tashkiloti tegishli organlarga davlat siri bo‘lgan ma’lumotlardan xabardorlik darajasi to‘g‘risidagi xulosani yuboradi.

5. Chet elga vaqtincha yashashga ketgan (xizmat safariga, o‘qishga, davolanishga, kontrakt bo‘yicha ishlashga) va O‘zbekiston Respublikasining diplomatik vakolatxonasida yoki konsullik muassasasida vaqtincha konsullik hisobida turgan O‘zbekiston Respublikasi fuqarolari pasportning amal qilish muddati tamom bo‘lganligi hamda pasportda belgilar va vizalar qo‘yish uchun varaqlar tugaganligi, pasport yaroqsiz holga kelganligi yoki yo‘qolganligi, shuningdek stikerni rasmiylashtirish munosabati bilan pasport almashtirilgan hollarda O‘zbekiston Respublikasining chet eldagi diplomatik vakolatxonalariga va konsullik muassasalariga pasport berish va chet elga chiqish uchun stikerni rasmiylashtirish to‘g‘risida belgilangan shaklda ariza bilan murojaat qiladilar.

O‘zbekiston Respublikasining xalqaro shartnomalariga muvofiq ularga kirish uchun kirish vizalari mavjudligi talab etilmaydigan xorijiy davlatlardagi O‘zbekiston Respublikasi fuqarolari stikerni rasmiylashtirish uchun O‘zbekiston Respublikasining tegishli diplomatik vakolatxonalariga yoki konsullik muassasalariga belgilangan shakldagi ariza bilan murojaat qilishlari mumkin.

Fuqarolarning arizalari diplomatik vakolatxonalar yoki konsullik muassasalari tomonidan belgilangan tartibda rasmiylashtiriladi va O‘zbekiston Respublikasi Tashqi ishlar vazirligi orqali pasportni rasmiylashtirish uchun O‘zbekiston Respublikasi Vazirlar Mahkamasi huzuridagi Davlat personallashtirish markaziga va stikerni rasmiylashtirish uchun O‘zbekiston Respublikasi Ichki ishlar vazirligiga qayta jo‘natiladi. Rasmiylashtirilgan hujjatlar egasiga topshirish uchun Tashqi ishlar vazirligi orqali O‘zbekiston Respublikasining tegishli diplomatik vakolatxonasiga yoki konsullik muassasasiga yuboriladi. Pasportni rasmiylashtirishning to‘liq davriy muddati 30 ish kunidan oshmasligi kerak.

6. Vaqtincha yashash uchun chet elga ketgan, u yerga oshkora kelgan va chet elda doimiy yashashga qaror qilgan O‘zbekiston Respublikasi fuqarolari doimiy yashashga ruxsatnomani rasmiylashtirish uchun belgilangan shakldagi hujjatlar bilan O‘zbekiston Respublikasining tegishli konsullik muassasasiga murojaat qiladilar.

Konsullik muassasasi fuqarolarning chet elda doimiy yashash uchun qoldirish bo‘yicha hujjatlarini rasmiylashtiradi va masalani belgilangan tartibda kelishish uchun hujjatlarni Tashqi ishlar vazirligi orqali Ichki ishlar vazirligiga yuboradi.

Quyidagi sabablar chet elga borish huquqini cheklash uchun asos bo‘lib xizmat qilishi mumkin:

a) agar shaxs davlat siri hisoblangan ma’lumotlardan voqif bo‘lsa yoki uning chet elga borishiga monelik qiluvchi boshqa shartnoma, kontrakt majburiyatlari amalda bo‘lsa — bu holatlarning amal qilishi tugagunga qadar;

b) agar shaxsga nisbatan jinoiy ish qo‘zg‘atilgan bo‘lsa — ish bo‘yicha yakuniy qaror qabul qilingunga qadar;

v) agar shaxs sudning hukmi bilan alohida xavfli retsidivist deb tan olingan yoki ichki ishlar organlarining ma’muriy nazorati ostida bo‘lsa — sudlanganlik bekor qilinmagun (olib tashlanmagun)ga qadar yoki nazorat qilish to‘xtatilgungacha;

g) agar shaxsda sud tomonidan yuklangan ijro etilmagan majburiyatlar bo‘lsa — majburiyatlar ijro etilgunga qadar;

d) agar shaxs o‘zi to‘g‘risida qasddan soxta ma’lumotlarni bergan bo‘lsa;

e) agar sudda shaxsga nisbatan fuqarolik da’vosi qo‘zg‘atilgan bo‘lsa — ish ko‘rib chiqilgunga qadar;

j) agar shaxs chaqiriq uchastkasida ro‘yxatga olingan va haqiqiy muddatli harbiy xizmatga chaqirilishi kerak bo‘lsa — haqiqiy muddatli xizmatni yoki safarbarlik chaqiruvi zaxirasidagi xizmatni o‘tagunga qadar O‘zbekiston Respublikasining qonun hujjatlariga muvofiq undan ozod qilingunga qadar;

z) agar shaxsga nisbatan Ichki ishlar vazirligida yoki Tashqi ishlar vazirligida vakolatli organlarning ushbu shaxsning chet elda bo‘lgan vaqtda kelgan mamlakati qonunlarini buzganligi (qonun buzilishlari ro‘yxati tegishli organlar tomonidan belgilanadi) to‘g‘risidagi axboroti, shuningdek borishi maqsadga muvofiq emasligini ko‘rsatadigan axboroti mavjud bo‘lsa — axborot hisobga olingan kundan boshlab ikki yil o‘tgunga qadar.

Chet elga chiqish huquqini cheklash uchun asoslar ro‘yxatiga kengaytirilgan izoh berilmaydi.

Ushbu Tartibning III bo‘limida nazarda tutilgan asoslar bo‘yicha chet elga borishga ruxsat berishning rad etilishi, javob berishning belgilangan muddatdan ortiqcha kechiktirilishi ustidan fuqaro yuqori organga shikoyat qilishi mumkin, bu organ bir oydan ko‘p bo‘lmagan muddatda javob berishi kerak, fuqaro uning qaroridan norozi bo‘lganda sudga shikoyat qilishi mumkin. Mazkur Tartibning III bo‘limning “a”, “b”, “j” va “z” kichik bandlarida ko‘rsatilgan sabablar bo‘yicha chet elga borish huquqini cheklash ustidan shikoyat qilinishi mumkin emas.

1. Chet elda vaqtincha yoki doimiy yashovchi O‘zbekiston Respublikasi fuqarolari O‘zbekiston Respublikasi fuqarosining amaldagi pasporti yoki O‘zbekiston Respublikasiga qaytib kelishga sertifikat mavjud bo‘lganda O‘zbekiston Respublikasi hududiga erkin kirish huquqiga egadir.

2. Pasportning amal qilish muddati chet elda tugagan, u yaroqsizlangan yoki yo‘qolgan hollarda, shuningdek qonun hujjatlarida nazarda tutilgan boshqa hollarda (familiyasi, ismi va otasining ismi, tug‘ilgan sanasi o‘zgargan, yozuvlarda noaniqliklar va xatolar aniqlangan, varaqlar ishlatib bo‘lingan va boshqa hollarda) chet elda doimiy yashaydigan O‘zbekiston Respublikasi fuqarosi yangi pasportni rasmiylashtirish uchun o‘zi turgan mamlakatdagi O‘zbekiston Respublikasining konsullik muassasasiga murojaat qiladi.

Agar fuqaro turgan mamlakatda O‘zbekiston Respublikasining konsullik muassasasi bo‘lmasa, fuqaro o‘zi turgan mamlakat konsullik okrugiga kiradigan O‘zbekiston Respublikasining konsullik muassasasiga murojaat qiladi.

3. Chet elda vaqtincha turgan va o‘zi turgan mamlakatdagi O‘zbekiston Respublikasining konsullik muassasasida konsullik hisobida turmagan fuqaro, ushbu bo‘limning 2-bandida ko‘rsatilgan hollarda, O‘zbekiston Respublikasiga qaytishga sertifikat olish uchun O‘zbekiston Respublikasining tegishli konsullik muassasasiga murojaat qiladi.

4. Chet elda doimiy yashaydigan va O‘zbekiston Respublikasiga vaqtincha kelgan O‘zbekiston Respublikasi fuqarolariga O‘zbekiston Respublikasida bo‘lgan vaqtda pasportning amal qilish muddati tugagan yoki u yo‘qolgan hollarda, shuningdek mazkur bo‘limning 2-bandida ko‘rsatilgan boshqa hollarda pasport berish yoki almashtirish hamda ruxsatnoma yozuvi stikerini rasmiylashtirish O‘zbekiston Respublikasi Tashqi ishlar vazirligi tomonidan amalga oshiriladi.

5. Chet elda doimiy yashaydigan va O‘zbekiston Respublikasiga doimiy yashash uchun qaytishni niyat qilgan fuqarolar O‘zbekiston Respublikasining chet eldagi konsullik muassasasidagi konsullik hisobidan chiqishlari lozim. Fuqarolar O‘zbekiston Respublikasi hududida turgan taqdirda, ular konsullik hisobidan chiqarish uchun Tashqi ishlar vazirligiga murojaat qiladilar.

1. O‘zbekiston Respublikasi fuqarosining diplomatik pasporti O‘zbekiston Respublikasidan tashqariga chiqilganda, u yerda bo‘linganda va vaqtincha yashab turilganda O‘zbekiston Respublikasi fuqarosiligini, uning egasining shaxsini va maqomini tasdiqlovchi hujjat bo‘lib hisoblanadi.

2. Diplomatik pasport ro‘yxati O‘zbekiston Respublikasi Vazirlar Mahkamasi tomonidan tasdiqlanadigan mansabdor shaxslarga, shuningdek, chet elga doimiy ish joyiga ketayotgan diplomatik pasportga ega bo‘lgan shaxslarning erlari (xotinlari)ga va ularning qaramog‘ida bo‘lgan bolalarga beriladi.

3. O‘zbekiston Respublikasi fuqarosining diplomatik pasporti O‘zbekiston Respublikasi Tashqi ishlar vazirligi tomonidan beriladi.

Diplomatik pasportni berish tartibi O‘zbekiston Respublikasi Tashqi ishlar vazirligi tomonidan belgilanadi.

4. O‘zbekiston Respublikasi Tashqi ishlar vazirligi O‘zbekiston Respublikasi hukumati nomidan xorijiy davlatlarning barcha vakolatli organlaridan O‘zbekiston Respublikasi fuqarosining diplomatik pasportini ko‘rsatuvchilarni erkin va to‘siqsiz o‘tkazib yuborishlari va zarur bo‘lgan xollarda ularga har qanday yordamni berishlari va himoya qilishlari to‘g‘risida iltimos qiladi.

5. O‘zbekiston Respublikasi fuqarosining diplomatik pasporti O‘zbekiston Respublikasining barcha fuqarosi uchun yagona bo‘lgan namunadagi o‘zbek, rus va ingliz tillarida tayyorlanadi.

6. O‘zbekiston Respublikasi fuqarosining diplomatik pasportiga quyidagi ma’lumotlar o‘zbek, rus va ingliz tillarida kiritiladi:

familiyasi, ismi, otasining ismi;

tug‘ilgan yili, kuni, oyi;

tug‘ilgan joyi;

millat/fuqaroligi;

jinsi;

pasport berilgan muddat va uning amalda bo‘lish muddatining tugashi;

pasportni bergan organning nomi.

7. O‘zbekiston Respublikasi fuqarosining diplomatik pasportidagi yozuvlar O‘zbekiston Respublikasi Tashqi ishlar vazirligining Konsullik boshqarmasi tomonidan amalga oshiriladi.

8. O‘zbekiston Respublikasi fuqarosining diplomatik pasporti besh yil muddatga beriladi.

9. Diplomatik pasport chet elda yo‘qotib qo‘yilgan taqdirda pasport egasi o‘zi turgan mamlakatdagi O‘zbekiston Respublikasining diplomatik vakolatxonasiga yoki konsullik muassasasiga, pasport respublika hududida yo‘qotib qo‘yilganda esa — O‘zbekiston Respublikasi Tashqi ishlar vazirligiga tezlik bilan bu haqda xabar berishga majburdir.

Yo‘qotib qo‘yilgan pasport o‘rniga yangi diplomatik pasport O‘zbekiston Respublikasi Tashqi ishlar vazirligi tomonidan tasdiqlangan tartibda beriladi.

10. O‘zbekiston Respublikasi fuqarosining diplomatik pasporti O‘zbekiston Respublikasi Tashqi ishlar vazirligi tomonidan quyidagi hollarda almashtiriladi:

familiyasi, ismi, otasining ismi o‘zgarganda;

yozuvlarda noaniqliklar aniqlanganda;

vizalar uchun belgilangan varaqlar to‘lganda;

amalda bo‘lish muddati tugaganda;

foydalanish uchun yaroqsiz holda bo‘lib qolganda.

O‘zbekiston Respublikasi fuqarosining diplomatik pasportini almashtirish tartibi O‘zbekiston Respublikasi Tashqi ishlar vazirligi tomonidan tasdiqlanadi.

11. O‘zbekiston Respublikasi fuqarosining diplomatik pasporti bepul beriladi.

12. Diplomatik pasport O‘zbekiston Respublikasining mulki hisoblanadi.

13. Diplomatik pasportning blanklari qat’iy hisobda turuvchi hujjat bo‘lib hisoblanadi. Ular O‘zbekiston Respublikasi Tashqi ishlar vazirining talabnomasiga ko‘ra tayyorlanadi.

Diplomatik pasportlarni hisobga olish, saqlash, yo‘q qilish O‘zbekiston Respublikasi Tashqi ishlar vazirligi tomonidan amalga oshiriladi.

14. Diplomatik pasport respublikadan tashqariga chiqib ketish chog‘ida O‘zbekiston Respublikasi fuqarosi pasportining o‘rniga beriladi.

Fuqarolar chet el safarlaridan qaytib kelganlarida diplomatik pasportlar bir hafta muddatda pasportlarni saqlash va belgilangan tartibda foydalanish javobgarligi yuklanadigan O‘zbekiston Respublikasi Tashqi ishlar vazirligida O‘zbekiston Respublikasi fuqarosi pasportiga almashtirib berilishi kerak.

15. Mazkur Nizomning 2-bandida ko‘rsatilgan ro‘yxatga kiritilgan mansabdor shaxs ish joyini o‘zgartirgan va uning yangi lavozimi ushbu ro‘yxatga kiritilmay qolgan hollarda, mazkur shaxs diplomatik pasportdan foydalanish huquqini yo‘qotadi.

16. Diplomatik pasportni garovga qabul qilish va berish taqiqlanadi.

17. Mazkur Nizom qoidalarini buzish O‘zbekiston Respublikasi fuqarosining diplomatik pasportidan foydalanish huquqidan mahrum qiladi. Diplomatik pasportdan foydalanish huquqidan mahrum qilish to‘g‘risidagi masala O‘zbekiston Respublikasi Tashqi ishlar vazirligi tomonidan hal etiladi.

18. O‘zbekiston Respublikasi Tashqi ishlar vazirligi O‘zbekiston Respublikasi fuqarosi diplomatik pasportining namunalarini xalqaro hamjamiyatga taqdim etishni ta’minlaydi.

O‘zbekiston Respublikasining Prezidenti va uning oila a’zolari

O‘zbekiston Respublikasi Prezidentining Davlat maslahatchilari va ularning o‘rinbosarlari

O‘zbekiston Respublikasi Prezidenti huzuridagi Xavfsizlik kengashi kotibi va uning o‘rinbosarlari

O‘zbekiston Respublikasi Prezidenti Devonining Ishlar boshqaruvchisi va uning o‘rinbosarlari

O‘zbekiston Respublikasi Prezidenti Ijro etuvchi apparati rahbari va xodimlari

O‘zbekiston Respublikasi Prezidenti boshchilik qiladigan rasmiy delegatsiyalarga hamrohlik qiladigan O‘zbekiston Respublikasi Prezidenti devonining xodimlari

O‘zbekiston Respublikasi Prezidentining Xavfsizlik xizmati boshlig‘i va xodimlari

O‘zbekiston Respublikasi Oliy Majlisining Qonunchilik palatasi Spikeri

O‘zbekiston Respublikasi Oliy Majlisi Senati Raisi

O‘zbekiston Respublikasi Oliy Majlisi Qonunchilik palatasi Spikerining o‘rinbosarlari

O‘zbekiston Respublikasi Oliy Majlisi Senati raisining o‘rinbosarlari

O‘zbekiston Respublikasi Oliy Majlisi palatasining qo‘mitalari va komissiyalari raislari, O‘zbekiston Respublikasi Oliy Majlisining Inson huquqlari bo‘yicha vakili (ombudsman);

O‘zbekiston Respublikasi Oliy Majlisi Qonunchilik palatasining xalqaro aloqalar bo‘limi mudiri

O‘zbekiston Respublikasi Oliy Majlisi Senatining xalqaro aloqalar bo‘limi mudiri

O‘zbekiston Respublikasining Bosh vaziri

O‘zbekiston Respublikasi Bosh vazirining Birinchi o‘rinbosari

O‘zbekiston Respublikasi Bosh vazirining o‘rinbosarlari

O‘zbekiston Respublikasi vazirlari, davlat qo‘mitalari, milliy korporatsiyalarining raislari, ularning birinchi o‘rinbosarlari hamda xizmat maqomiga ko‘ra ularga tenglashtirilgan mansabdor shaxslar

O‘zbekiston Respublikasi Fanlar akademiyasining Prezidenti

O‘zbekiston Respublikasi Markaziy banki Boshqaruvining raisi

O‘zbekiston Respublikasi Tashqi iqtisodiy faoliyat milliy banki Boshqaruvining raisi

O‘zbekiston Respublikasi Favqulodda vaziyatlar bo‘yicha davlat komissiyasining raisi

O‘zbekiston Kasaba uyushmalari Federatsiyasi Kengashining raisi

Markaziy bank huzuridagi Goznak davlat ishlab chiqarish birlashmasining bosh direktori

O‘zbekiston Respublikasi Savdo-sanoat palatasi raisi

O‘zbekiston Respublikasi Milliy xavfsizlik xizmatining raisi va uning birinchi o‘rinbosari

O‘zbekiston Respublikasi Bosh prokurori va uning birinchi o‘rinbosari

O‘zbekiston Respublikasi Konstitutsiyaviy Sudining raisi

O‘zbekiston Respublikasi Oliy Sudining raisi va uning birinchi o‘rinbosari

O‘zbekiston Respublikasi Oliy Xo‘jalik Sudining raisi va uning birinchi o‘rinbosari

Qoraqalpog‘iston Respublikasi Jo‘qorg‘i Kengesining Raisi

Qoraqalpog‘iston Respublikasi Vazirlar Kengashining Raisi

Viloyatlar va Toshkent shahri hokimlari

Qoraqalpog‘iston Respublikasi Jo‘qorg‘i Kengesi Raisining o‘rinbosarlari

Qoraqalpog‘iston Respublikasi Vazirlar Kengashi Raisining o‘rinbosarlari

O‘zbekiston Respublikasi Tashqi ishlar vazirligining diplomatik xodimlari

Xalqaro tashkilotlardagi diplomatik lavozimga tenglashtiriladigan lavozimlarda ishlayotgan O‘zbekiston Respublikasi vakolatxonalarining xodimlari

O‘zbekiston Respublikasi Tashqi ishlar vazirligining diplomatik kur’yerlari

Milliy xavfsizlik xizmati Raisining o‘rinbosarlari

Mudofaa vazirining o‘rinbosarlari

Ichki ishlar vazirining o‘rinbosarlari

Tashqi savdo vazirining o‘rinbosari

Investitsiyalar bo‘yicha davlat qo‘mitasi raisining o‘rinbosarlari;

Harbiy attashe, harbiy-havo kuchlari attashesi va ularning yordamchilari

O‘zbekiston Respublikasining savdo vakillari, O‘zbekiston Respublikasi savdo vakolatxonalarining maslahatchilari va attashelari

O‘zbekiston Respublikasining Prezidenti, Oliy Majlisining Qonunchilik palatasi Spikeri va Senati Raisi yoki Bosh vaziri boshchilik qiladigan rasmiy davlat va hukumat delegatsiyalarining a’zolari

O‘zbekiston Respublikasi davlat organlari liniyasi bo‘yicha xalqaro tashkilotlarga diplomatik lavozimlarga tenglashtirilgan lavozimlarda ishlash uchun yuborilgan O‘zbekiston Respublikasining fuqarolari — O‘zbekiston Respublikasi Hukumatining qaroriga ko‘ra

O‘zbekiston Respublikasi Savdo-sanoat palatasi raisining o‘rinbosarlari, shuningdek tijorat faoliyatini amalga oshirmaydigan xorijdagi uning vakolatxonasi boshlig‘i