Davlat organlari va tashkilotlari axborot tizimlarining o‘zaro samarali hamkorligi va integratsiyasini, axborotlarni tahlil qilish, qayta ishlash va saqlash, keyinchalik hududlarni ijtimoiy-iqtisodiy rivojlantirish loyihalari va dasturlarini ishlab chiqishda ulardan foydalanish, innovatsion g‘oyalar, ishlanmalar va ishni tashkil qilish texnologiyalarini keng joriy etish, shuningdek, qo‘shni mamlakatlar bilan savdo-iqtisodiy munosabatlarni mustahkamlashni ta’minlash maqsadida:

1. O‘zbekiston Respublikasi Prezidentining “O‘zbekiston Respublikasi Prezidenti huzuridagi Loyiha boshqaruvi milliy agentligi faoliyatini tashkil etish to‘g‘risida” 2017-yil 27-iyuldagi PQ-3150-son va “Axborot-kommunikatsiya texnologiyalari sohasida loyiha boshqaruvi tizimini yanada takomillashtirish chora-tadbirlari to‘g‘risida” 2017-yil 29-avgustdagi PQ-3245-son qaroriga muvofiq:

Davlat axborot tizimlarini yaratish va qo‘llab-quvvatlash bo‘yicha yagona integrator (keyingi o‘rinlarda — Yagona integrator) tashkil etilgani;

respublika ijtimoiy-iqtisodiy rivojlanishini tizimli tahlil qilish va prognozlash imkonini beruvchi, davlat va boshqa axborot tizimlari bilan integratsiyalashgan O‘zbekiston Respublikasi Loyiha boshqaruvining yagona milliy axborot tizimini 2019-yil 1-yanvarga qadar ishga tushirish belgilangani ma’lumot o‘rnida qabul qilinsin.

2. O‘zbekiston Respublikasi Axborot texnologiyalari va kommunikatsiyalarini rivojlantirish vazirligi, Bosh prokuratura, Davlat xavfsizlik xizmati, O‘zbekiston Respublikasi Prezidenti huzuridagi Loyiha boshqaruvi milliy agentligining:

a) Qoraqalpog‘iston Respublikasi, viloyatlar va Toshkent shahrida Yagona integratorning ma’lumotlarni qayta ishlash markazlarini tashkil etish va ularga quyidagilarni:

davlat organlari va tashkilotlari ma’lumotlar bazalaridagi barcha axborotlarni saqlashni;

davlat organlari va tashkilotlarining barcha axborot tizimlari (keyingi o‘rinlarda — axborot tizimlari) o‘rtasida mustahkam o‘zaro aloqani;

ma’lumotlarni xavfsiz saqlash va barcha axborot tizimlarining barqaror ishlashini;

tarqoq axborot tizimlaridagi ma’lumotlarni keyinchalik tahliliy qayta ishlash bo‘yicha platforma yaratishni ta’minlash vazifalarini yuklash;

b) O‘zbekiston Respublikasi Loyiha boshqaruvining yagona milliy axborot tizimi funksiyalarini Yagona integratorga berish to‘g‘risidagi takliflari qabul qilinsin.

3. Belgilansinki, Yagona integrator va ma’lumotlarga ishlov berish markazlarining faoliyati:

axborot tizimlari, resurslar va dasturiy mahsulotlarning samarali faoliyat yuritishi, ularning “Elektron hukumat” tizimiga integratsiyasi, shuningdek, davlat organlari va tashkilotlarida zamonaviy axborot-kommunikatsiya texnologiyalarini joriy etishni muvofiqlashtirish sohasida — O‘zbekiston Respublikasi Axborot texnologiyalari va kommunikatsiyalarini rivojlantirish vazirligi tomonidan;

O‘zbekiston Respublikasini rivojlantirish davlat dasturlari va investitsiya loyihalarini ishlab chiqishning shaffofligi, sifatli va o‘z vaqtida amalga oshirish sohasida — O‘zbekiston Respublikasi Prezidenti huzuridagi Loyiha boshqaruvi milliy agentligi tomonidan;

davlat organlari va tashkilotlarining o‘z faoliyati shaffofligini, davlat xizmatlari qulayligi va sifatini oshirish borasidagi faoliyati ustidan nazorat qilish sohasida — O‘zbekiston Respublikasi Bosh prokuraturasi tomonidan;

Yagona integratorning xavfsiz faoliyat yuritishi, tashqi va ichki tahdidlar, xakerlik hujumlaridan, shu jumladan infratuzilma obyektlarini himoya qilish sohasida — O‘zbekiston Respublikasi Davlat xavfsizlik xizmati tomonidan ta’minlanadi.

4. Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimliklari ma’lumotlarni qayta ishlash markazlarining zaxira elektr ta’minoti, sovutish va xavfsizlik tizimiga ulangan, muhandislik-kommunikatsiya infratuzilmasi rivojlangan joylarga joylashtirilishini ta’minlasin.

5. Ma’lumotlarni qayta ishlash markazlari o‘z faoliyatini samarali tashkil etishi uchun maqsadida server uskunalari, texnikalar, dasturiy ta’minot, ehtiyot qismlari va boshqa vositalarni olib kirganlik uchun bojxona to‘lovlari (bojxona rasmiylashtiruvi uchun yig‘imlardan tashqari)dan ozod etilsin.

6. Belgilab qo‘yilsinki, davlat organlari va tashkilotlarining axborot tizimlari, resurslari va dasturiy mahsulotlarini ishlab chiqish, joriy etish va integratsiya qilishni nazarda tutuvchi normativ-huquqiy hujjatlar loyihalari, shuningdek, ularning loyihaviy va texnik hujjatlari majburiy ravishda Yagona integrator bilan kelishiladi.

13. O‘zbekiston Respublikasi Prezidenti huzuridagi Loyiha boshqaruvi milliy agentligi, O‘zbekiston Respublikasi Iqtisodiyot vazirligi, Moliya vazirligi, Ichki ishlar vazirligi, Davlat soliq qo‘mitasining quyidagilarni:

soliq to‘lovchilarni hisobga olishni kengaytirish va soliq tushumlari ustidan nazoratni kuchaytirish hisobiga budjet daromadlarini ko‘paytirish imkonini beradigan “onlayn” nazorat-kassa mashinalari tizimlarini;

telekommunikatsiya xizmatlari uchun budjet mablag‘larini tejashni, telefon so‘zlashuvlarining xavfsizligi va nazoratini ta’minlash imkonini beradigan hukumat mobil aloqa tizimini;

haydovchilik guvohnomasidan tashqari, pasportlar, tug‘ilganlik to‘g‘risidagi guvohnomalar va shaxsni tasdiqlovchi boshqa hujjatlarning mavjud tizimi o‘rniga (respublika ichida) har bir fuqaroning yagona identifikatsiya raqami, uning shaxsiy ma’lumotlarini o‘zida jamlagan va davlat xizmatlaridan foydalanishda shaxsni aniqlash uchun ishlatiluvchi identifikatsiya kartalari (ID-kartalar) tizimini;

amaldagi davlat raqamlarini xalqaro namunadagi raqamlarga almashtirish, tegishli ma’lumotlarni avtomobil egalarining identifikatsiya kartalari (ID-kartalari)ga kiritgan holda transport vositalari uchun qog‘oz hujjatlarni bekor qilishni nazarda tutuvchi transport vositalarini hisobga olish tizimini joriy etish to‘g‘risidagi takliflariga rozilik berilsin.

14. O‘zbekiston Respublikasi Prezidenti huzuridagi Loyiha boshqaruvi milliy agentligi, O‘zbekiston Respublikasi Investitsiyalar bo‘yicha davlat qo‘mitasi mas’ul vazirliklar va idoralar, yetakchi konsalting kompaniyalari va xorijlik mutaxassislar bilan birgalikda:

2018-yil 1-iyulga qadar ushbu qarorning 13-bandida nazarda tutilgan loyihalarni, shu jumladan, xalqaro moliya institutlari kreditlari, donor tashkilotlar, xorijiy davlatlarning grantlari va investorlarning xayriya mablag‘lari hisobiga moliyalashtirish bo‘yicha aniq takliflar kiritsin;

2018-yil 1-avgustga qadar ushbu qarorning 13-bandida nazarda tutilgan loyihalarning texnik topshiriqlari va texnik-iqtisodiy asoslarini tayyorlash va ekspertizadan o‘tkazishni ta’minlasin;

2018-yil 1-noyabrga qadar loyihalarni budjetdan tashqari mablag‘lar hisobiga Toshkent shahrida joriy etish va pilot tartibida ishga tushirishni ta’minlasin.

15. O‘zbekiston Respublikasi Bosh prokuraturasi va Davlat xavfsizlik xizmati mas’ul vazirlik va idoralarni jalb etgan holda ushbu qarorda nazarda tutilgan chora-tadbirlarning o‘z vaqtida va to‘liq amalga oshirilishi ustidan tizimli monitoring olib borsin.

16. O‘zbekiston Respublikasi Adliya vazirligi bir oy muddatda qonun hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin.

17. Mazkur qarorning ijrosini nazorat qilish O‘zbekiston Respublikasining Bosh vaziri A.N. Aripov, O‘zbekiston Respublikasi Davlat xavfsizlik xizmati raisi I.B. Abdullayev va O‘zbekiston Respublikasi Bosh prokurori O.B. Murodov zimmasiga yuklansin.