Toʻgʻridan-toʻgʻri xorijiy investitsiyalar va kreditlarni jalb qilgan holda moliyalashtirishni taʼminlash, shuningdek, “Sechankoʻl, Oqjar va Chimboy investitsiya bloklarida geologiya qidiruv ishlarini olib borish, shuningdek, Urga, Oqchalak va Chandir guruhi konlarini qazish” investitsiya loyihasi doirasida obyektlarni qurish boʻyicha ishlarni samarali tashkil etish maqsadida:

1. Maʼlumot uchun qabul qilinsinki, Oʻzbekiston Respublikasi Prezidentining 2016-yil 22-sentabrdagi “Sechankoʻl, Oqjar va Chimboy investitsiya bloklarida geologiya-qidiruv ishlarini olib borish, shuningdek, Urga, Oqchalak va Chandir guruhi konlarini qazish” investitsiya loyihasini amalga oshirish chora-tadbirlari toʻgʻrisida”gi PQ-2607-son qarorini ijro etish maqsadida:

paritet asosida masʼuliyati cheklangan jamiyat shaklida “Natural Gaz — Stream” korxonasi (keyingi oʻrinlarda — qoʻshma korxona) tuzildi hamda 300 ming AQSH dollari miqdorida birlamchi ustav fondi shakllantirildi;

“Sechankoʻl, Oqjar va Chimboy investitsiya bloklarida geologiya-qidiruv ishlarini olib borish, shuningdek, Urga, Oqchalak va Chandir guruhi konlarini qazish” loyihasining (keyingi oʻrinlarda — loyiha) dastlabki texnik-iqtisodiy asosi belgilangan tartibda tasdiqlandi;

qoʻshma korxonaning ustav fondini oshirish uchun Oʻzbekiston tomonining hissasi sifatida qoʻshma korxonaga beriladigan mulk va avvalgi xarajatlar baholandi;

qoʻshma korxona tomonidan tanlov savdolari natijalariga koʻra “ERIELL Oilfield Services Middle East DMCC” (BAA) kompaniyasi bilan “tayyor holda topshirish” shartlarida loyihalashtirish, uskunalar va materiallarni yetkazib berish, obyektni qurish boʻyicha shartnomalar tuzildi.

2. “Natural Gaz-Stream” MCHJ taʼsischilarining qoʻshma korxonaning ustav jamgʻarmasini 60,6 mln AQSH dollari, shu jumladan 30,3 mln AQSH dollari miqdorida — baholash va xorijiy investor tomonidan toʻgʻridan-toʻgʻri investitsiyalarni tegishli ravishda kiritish natijalari boʻyicha mulk hamda avvalgi xarajatlar koʻrinishidagi Oʻzbekiston tomonining ulushi hisobidan oshirish taklifi maʼqullansin.

3. “Oʻzbekneftgaz” MXK xorijiy investor bilan birgalikda ikki oy muddatda loyihani amalga oshirish uchun “Gazprombank” AJ kreditlari va qarzlarini jalb qilish shartlarini belgilasin.

4. “Oʻzbekneftgaz” MXK va xorijiy investorlarning:

loyiha doirasida qazib olinadigan tabiiy gazning barcha hajmini eksportga sotish;

qoʻshma korxona va “Oʻztransgaz” AJ oʻrtasida loyiha doirasida qazib olinadigan tabiiy gazni eksportga sotish boʻyicha 10 yil muddatga uzoq muddatli hadli shartnoma tuzish toʻgʻrisidagi taklifiga rozilik berilsin.

5. Belgilansinki, loyihani amalga oshirish uchun jalb qilinadigan qarzlarni va ular boʻyicha foizlarni soʻndirishga yoʻnaltiriladigan mablagʻlar, kreditlar va qarzlar boʻyicha majburiyatlarni teng miqdorda toʻlagan holda asosiy qarzni toʻliq soʻndirgunga qadar boʻlgan davrda, yangi qurilishlar, amaldagi ishlab chiqarishlarni modernizatsiya qilish va texnologik yangilashga jalb qilinadigan valyuta kreditlari boʻyicha asosiy qarz va foizlarni soʻndirishga yoʻnaltiriladigan mablagʻlarga preferensiyalar va imtiyozlar boʻyicha tenglashtiriladi.

6. Oʻzbekiston Respublikasi Prezidentining 2000-yil 28-apreldagi “Neft va gaz konlarini razvedka qilish hamda ularni qazib chiqarishga bevosita xorijiy sarmoyalarni jalb etish chora-tadbirlari toʻgʻrisida”gi PF-2598-son Farmonining amal qilishi:

4-bandiga doir qismida — uglevodorod konlarini izlash va razvedka qilishni amalga oshiradigan qoʻshma korxonaga, shuningdek, uning tomonidan jalb qilinadigan xorijiy pudrat va subpudrat tashkilotlariga;

5-bandiga doir qismida — uglevodorod konlarini izlash va razvedka qilish uchun qoʻshma korxonaga materiallar yetkazib berish, ishlarni olib borish va xizmatlar koʻrsatishni amalga oshiruvchi Oʻzbekiston Respublikasining rezidentlari — yuridik shaxslarga tatbiq etilsin.

10. Oʻzbekiston Respublikasi Prezidentining 2016-yil 22-sentabrdagi “Sechankoʻl, Oqjar va Chimboy investitsiya bloklarida geologiya-qidiruv ishlarini olib borish, shuningdek, Urga, Oqchalak va Chandir guruhi konlarini qazish” investitsiya loyihasini amalga oshirish chora-tadbirlari toʻgʻrisida”gi PQ-2607-son qaroriga ilovaga muvofiq oʻzgartirish va qoʻshimcha kiritilsin.

11. Mazkur Farmonning ijrosini nazorat qilish Oʻzbekiston Respublikasi Bosh vazirining oʻrinbosari Gʻ.I. Ibragimov zimmasiga yuklansin.

1. 5-banddagi “do 1-iyulya 2017 goda” soʻzlari “do 1-sentabrya 2017 goda” soʻzlari bilan almashtirilsin.

2. 10-banddagi “Sechankul, Akdjar, Chimbay” soʻzlaridan keyin “Akchalak, Chandir” soʻzlari bilan toʻldirilsin.