O‘zbekiston Respublikasi Prezidentining “Ichki ishlar organlari faoliyati samaradorligini tubdan oshirish, jamoat tartibini, fuqarolarning huquqlari, erkinliklari va qonuniy manfaatlarini ishonchli himoya qilishni ta’minlashda ularning mas’uliyatini kuchaytirish chora-tadbirlari to‘g‘risida” 2017-yil 10-apreldagi PF-5005-son Farmoniga muvofiq, shuningdek huquqni muhofaza qiluvchi organlarning Xalqaro jinoyat politsiyasi tashkiloti — Interpol bilan samarali hamkorlik sohasidagi faoliyatini takomillashtirish maqsadida Vazirlar Mahkamasi qaror qiladi:

1. Interpol kanallaridan yanada faol foydalanishni nazarda tutgan holda, Xalqaro jinoiy politsiya tashkiloti (keyingi o‘rinlarda — Interpol) bilan hamkorlik samaradorligini oshirish sohasida quyidagi asosiy yo‘nalishlarni amalga oshirish O‘zbekiston Respublikasi Ichki ishlar vazirligining eng muhim vazifasi deb hisoblansin:

birinchi — O‘zbekiston Respublikasi huquqni muhofaza qilish organlarining Interpol axborot resurslaridan foydalanish masalalari bo‘yicha faoliyatini muvofiqlashtirish;

ikkinchi — O‘zbekiston Respublikasi huquqni muhofaza qiluvchi organlari faoliyatini axborot-tahliliy jihatdan ta’minlash, jinoyatchilikka qarshi kurashish sohasidagi ilg‘or xalqaro tajribani o‘rganish va uni joriy etish bo‘yicha takliflar ishlab chiqish;

uchinchi — xalqaro terrorizm, odam savdosi, noqonuniy migratsiya, axborot texnologiyalari va xalqaro tusdagi jinoyatchilikning boshqa turlari bilan bog‘liq jinoyatlarni aniqlash, ularga chek qo‘yish va ularni ochish, shuningdek shaxsni identifikatsiyalash masalalari bo‘yicha O‘zbekiston Respublikasi huquqni muhofaza qilish organlarining Interpolga a’zo mamlakatlarning tegishli organlari bilan o‘zaro hamkorligini ta’minlash;

to‘rtinchi — Interpol Bosh kotibiyatiga shaxslar, transport vositalari, san’at asarlari va boshqa predmetlarni xalqaro qidiruvga e’lon qilish, tanib olinmagan murdalarni identifikatsiya qilish, shuningdek, Interpolga a’zo mamlakatlarning so‘rovlari bo‘yicha O‘zbekiston Respublikasi hududida ushbu tadbirlarni tashkil etish masalalari bo‘yicha iltimosnoma.

2. Interpolning O‘zbekiston Respublikasidagi Milliy markaziy byurosi to‘g‘risidagi nizom 1-ilovaga muvofiq tasdiqlansin;

4. O‘zbekiston Respublikasi ichki ishlar vaziriga Interpolning O‘zbekiston Respublikasidagi Milliy markaziy byurosi tuzilmasiga uning belgilangan umumiy shtat birliklari doirasida o‘zgartirishlar kiritish huquqi berilsin.

5. O‘zbekiston Respublikasi Moliya vazirligi O‘zbekiston Respublikasi Ichki ishlar vazirligining asoslangan hisob-kitoblari bo‘yicha Interpolning Milliy markaziy byurosi faoliyati bilan bog‘liq xarajatlarni qoplash uchun zarur mablag‘lar, shu jumladan xorijiy valyutada ajratilishini ta’minlasin.

6. O‘zbekiston Respublikasi Vazirlar Mahkamasining “O‘zbekiston Respublikasida Interpol Milliy markaziy byurosini tashkil etish to‘g‘risida” 1994-yil 29-noyabrdagi 573-son qarori o‘z kuchini yo‘qotgan deb hisoblansin.

7. Mazkur qarorning bajarilishini nazorat qilish O‘zbekiston Respublikasi Ichki ishlar vaziri A.A. Azizov zimmasiga yuklansin.

1. Interpolning O‘zbekiston Respublikasidagi Milliy markaziy byurosi (keyingi o‘rinlarda Interpol MB deb ataladi) O‘zbekiston Respublikasi Ichki ishlar vazirligining Xalqaro jinoiy politsiya tashkiloti — Interpolga (keyingi o‘rinlarda Interpol deb ataladi) a’zolik uchun O‘zbekiston Respublikasi Hukumati tomonidan Interpol Ustavining 4 va 32-moddalari asosida vazirlikka berilgan vakolatlariga muvofiq tashkil etilgan.

2. Interpolning MMB maqomiga ko‘ra mustaqil boshqarmaga tenglashtirilgan O‘zbekiston Respublikasi Ichki ishlar vazirligining (keyingi o‘rinlarda IIV deb ataladi) tarkibiy bo‘linmasi va bir vaqtning o‘zida O‘zbekiston Respublikasi huquqni muhofaza qiluvchi organlarining jinoyatchilikka qarshi kurashish sohasidagi xalqaro hamkorlik masalalari bo‘yicha faoliyatini muvofiqlashtirishni amalga oshiruvchi Interpol tashkiliy tuzilmasining bir qismi hisoblanadi.

3. Interpolning MMB yuridik shaxs hisoblanadi, o‘z nomi yozilgan muhrga, bank hisob raqamlariga, shu jumladan chet el valyutasidagi hisob raqamlariga ega bo‘ladi, o‘z faoliyatida IIV va Interpol ramzlaridan foydalanadi.

4. Interpolning MMB o‘z faoliyatida O‘zbekiston Respublikasi Konstitutsiyasi va qonunlariga, O‘zbekiston Respublikasi Oliy Majlisi palatalarining qarorlariga, O‘zbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, O‘zbekiston Respublikasining xalqaro shartnomalariga, Interpolning Ustavi va boshqa hujjatlariga, O‘zbekiston Respublikasi ichki ishlar vazirining buyruqlari va farmoyishlariga, shuningdek ushbu Nizomga amal qiladi.

5. Interpol MMB faoliyatining maqsadi O‘zbekiston Respublikasi huquqni muhofaza qilish organlarining Interpolga a’zo mamlakatlarning o‘xshash organlari bilan jinoyatchilikka qarshi kurashish masalalari bo‘yicha milliy qonunchilikka hamda xalqaro huquqning umume’tirof etilgan normalari va prinsiplariga rioya etgan holda o‘zaro hamkorligini ta’minlashdan iborat.

6. Interpol MMB faqat xalqaro xarakterdagi umumiy jinoiy jinoyatchilikka qarshi kurashish masalalari bo‘yicha o‘z funksiyalarini bajarish bilan bog‘liq faoliyatni amalga oshiradi va siyosiy, harbiy, diniy yoki irqiy xarakterdagi faoliyatga daxl qilmaydi.

7. Interpolning MMB Interpol Bosh kotibiyati, Interpolning boshqa mamlakatlardagi milliy markaziy byurolari, shuningdek O‘zbekiston Respublikasining huquqni muhofaza qiluvchi organlari bilan Interpol Ustavida belgilangan prinsiplar asosida hamda Interpolning Xalqaro politsiya hamkorligi va hisoblarning ichki nazorati reglamenti qoidalariga muvofiq hamkorlik qiladi.

8. Interpol kanallari orqali kelib tushadigan va uzatiladigan axborot bilan ishlash faqat Interpol MMB xodimlari tomonidan amalga oshiriladi, ular O‘zbekiston Respublikasi huquqni muhofaza qiluvchi organlaridan va boshqa mamlakatlarning Interpol milliy markaziy byurolaridan olinadigan so‘rovlarni belgilangan tartibda qayta ishlaydilar. Interpolning MMB ushbu Nizomning 6-bandida bayon etilgan talablarga zid bo‘lgan so‘rovlarni ijro etish uchun qabul qilmaydi.

9. Zarurat bo‘lganda va tegishli idoralararo shartnomalar tuzilgan taqdirda Interpol MMB o‘z xodimlarini tegishli milliy politsiya xizmatlari bilan tezkor hamkorlikni tashkil etish uchun boshqa mamlakatlarning Interpol milliy markaziy byurolariga yuborishi mumkin.

10. Interpolning MMB jinoyatchilikka qarshi kurashish masalalari bo‘yicha xorijiy davlatlar diplomatik vakolatxonalarining tegishli xizmatlari va xalqaro tashkilotlarning O‘zbekiston Respublikasidagi vakolatxonalari bilan o‘z vakolatlari doirasida belgilangan tartibda hamkorlik qiladi.

11. Interpol MMB xodimlari o‘z vakolatlari doirasida va O‘zbekiston Respublikasi qonun hujjatlariga muvofiq o‘zlariga yuklangan vazifalar va funksiyalarni bajarish uchun tezkor-qidiruv faoliyatini amalga oshiradilar.

12. Interpolning MMB Interpol Bosh kotibiyati, boshqa mamlakatlarning Interpol milliy markaziy byurolari, shuningdek O‘zbekiston Respublikasining huquqni muhofaza qiluvchi organlari bilan axborot almashishda radio, telefon, telegraf, pochta va aloqaning maxsus turlaridan foydalanadi.

13. Interpolning MMB o‘z shaxsiy, axloqiy va kasbiy sifatlariga ko‘ra Interpolning MMBga yuklangan vazifalarni bajarishga qodir bo‘lgan ichki ishlar organlari xodimlari bilan butlanadi.

14. Quyidagilar Interpol MMBning asosiy vazifalari hisoblanadi:

O‘zbekiston Respublikasi huquqni muhofaza qiluvchi organlarining Interpol axborot resurslaridan foydalanish masalalari bo‘yicha faoliyatini muvofiqlashtirish;

O‘zbekiston Respublikasi huquqni muhofaza qiluvchi organlari faoliyatini axborot-tahliliy jihatdan ta’minlash, jinoyatchilikka qarshi kurashish sohasidagi ilg‘or xorijiy tajribani o‘rganish va uni joriy etish bo‘yicha takliflar ishlab chiqish;

O‘zbekiston Respublikasi huquqni muhofaza qilish organlarining Interpolga a’zo mamlakatlarning tegishli organlari bilan xalqaro terrorizm, odam savdosi, noqonuniy migratsiya, axborot texnologiyalari va xalqaro jinoyatchilikning boshqa turlari bilan bog‘liq jinoyatlarni aniqlash, ularga chek qo‘yish va ularni ochish, shuningdek shaxsni identifikatsiyalash masalalari bo‘yicha o‘zaro hamkorligini ta’minlash;

shaxslar, transport vositalari, san’at asarlari va boshqa predmetlarni xalqaro qidiruvga e’lon qilish, tanib olinmagan murdalarni identifikatsiya qilish masalalari bo‘yicha Interpol Bosh kotibiyatiga iltimosnoma berish, shuningdek, Interpolga a’zo mamlakatlarning so‘rovlari bo‘yicha O‘zbekiston Respublikasi hududida ushbu tadbirlarni tashkil etish.

15. Quyidagilar o‘ziga yuklangan vazifalarga muvofiq Interpol MMBning asosiy funksiyalari hisoblanadi:

a) O‘zbekiston Respublikasi huquqni muhofaza qiluvchi organlarining Interpol axborot resurslaridan foydalanish masalalari bo‘yicha faoliyatini muvofiqlashtirish sohasida:

O‘zbekiston Respublikasi huquqni muhofaza qiluvchi organlari tomonidan Interpolning imkoniyatlari va kanallaridan foydalanish masalalari bo‘yicha so‘rovlar va topshiriqlarni tayyorlash va yuborish mezonlarini belgilash, so‘rovlarning bajarilishi muddatlari va sifatini nazorat qilish;

O‘zbekiston Respublikasi huquqni muhofaza qilish organlari hududiy bo‘linmalarining Interpolning axborot resurslari va vositalaridan foydalanish sohasidagi faoliyatini tashkil etish;

O‘zbekiston Respublikasi huquqni muhofaza qilish organlarining Interpolga a’zo mamlakatlarning o‘xshash organlari bilan xalqaro tusdagi umumiy jinoiy jinoyatchilikka qarshi kurashish sohasida o‘zaro hamkorligi masalalari bo‘yicha seminarlar, uchrashuvlar, ishchi kengashlar va boshqa tadbirlarni tashkil etish va o‘tkazish;

elektron pochta, telefon va faksimil aloqa kanallari orqali axborotni qabul qilish va uzatishni kecha-kunduz ta’minlash;

b) O‘zbekiston Respublikasi huquqni muhofaza qiluvchi organlari faoliyatini axborot-tahliliy ta’minlash, jinoyatchilikka qarshi kurashish sohasidagi ilg‘or xalqaro tajribani o‘rganish va uni joriy etish bo‘yicha takliflar ishlab chiqish sohasida:

xalqaro tusdagi umumjinoiy jinoyatchilikka qarshi kurashish, shaxslar va predmetlarning xalqaro qidiruvini amalga oshirish bo‘yicha axborotni to‘plash, umumlashtirish, tizimlashtirish va tahlil qilish:

O‘zbekiston Respublikasi huquqni muhofaza qiluvchi organlarining Interpol MMB bilan o‘zaro hamkorligi samaradorligiga salbiy ta’sir ko‘rsatuvchi omillarni aniqlash, ularni bartaraf etish choralarini ishlab chiqish va qabul qilish;

o‘z vakolatlari doirasida O‘zbekiston Respublikasining huquqni muhofaza qiluvchi organlariga ularning so‘rovlari bo‘yicha Bosh kotibiyat va Interpolga a’zo mamlakatlar ma’lumotlar bazalaridagi mavjud ma’lumotlarni taqdim etish;

O‘zbekiston Respublikasining huquqni muhofaza qiluvchi organlari uchun Interpol va a’zo mamlakatlarning milliy politsiya xizmatlari materiallariga muvofiq jinoyatchilikka qarshi kurashish sohasida xalqaro hamkorlik muammolari bo‘yicha tahliliy sharhlar, ma’ruzalar va xabarlar tayyorlash;

xalqaro hamkorlik jarayonida O‘zbekiston Respublikasining huquqni muhofaza qiluvchi organlari tomonidan olingan ma’lumotlar asosida shaxslar, faktlar, narsalar va hujjatlar to‘g‘risidagi ma’lumotlar bankini shakllantirish;

jinoyatchilikka qarshi kurashish sohasidagi ilg‘or xorijiy tajribani o‘rganish va uni O‘zbekiston Respublikasi huquqni muhofaza qilish organlari faoliyatiga joriy etish bo‘yicha takliflar ishlab chiqish;

v) O‘zbekiston Respublikasi huquqni muhofaza qilish organlarining Interpolga a’zo mamlakatlarning tegishli organlari bilan xalqaro terrorizm, odam savdosi, noqonuniy migratsiya, axborot texnologiyalari va xalqaro tusdagi jinoyatchilikning boshqa turlari bilan bog‘liq jinoyatlarni aniqlash, bartaraf etish va ochish, shuningdek shaxsni identifikatsiyalash masalalari bo‘yicha o‘zaro hamkorligini ta’minlash sohasida:

xalqaro terrorizm, odam savdosi, noqonuniy migratsiya, giyohvandlik vositalari, psixotrop moddalar va ularning prekursorlari bilan qonunga xilof ravishda muomala qilish, avtotransport vositalarini o‘g‘irlash va olib qochish, madaniy boyliklarni talon-toroj qilish bilan bog‘liq jinoyatlarning oldini olish, aniqlash, ularga chek qo‘yish va ularni fosh etish masalalari bo‘yicha, shuningdek, axborot texnologiyalari, iqtisodiyot sohasida va siyosiy, harbiy, diniy yoki irqiy xarakterdagi boshqa masalalar bo‘yicha O‘zbekiston Respublikasi huquqni muhofaza qiluvchi organlarining hamda Interpolga a’zo mamlakatlarning shunga o‘xshash tuzilmalarining so‘rovlari, topshiriqlarini olish va yuborish;

xalqaro tusdagi umumjinoiy jinoyatchilikka qarshi kurashda, shu jumladan tezkor-qidiruv faoliyatini amalga oshirish orqali Interpol yo‘nalishi bo‘yicha so‘rovlar va topshiriqlarni o‘z vakolati doirasida bajarish;

Interpolga a’zo mamlakatlar hududida noqonuniy faoliyat bilan shug‘ullanayotgan yoki jinoyat sodir etgan O‘zbekiston Respublikasi fuqarolarini Interpol kanallari orqali aniqlash;

Interpol kanallari orqali tezkor qiziqish uyg‘otuvchi shaxslarga nisbatan ularning so‘rovlari asosida O‘zbekiston Respublikasi huquqni muhofaza qilish organlari uchun axborot to‘plash, shu jumladan ularning harakatlanishi va turgan joyi ustidan nazorat o‘rnatish

o‘z vakolatlari doirasida Interpol Bosh Assambleyasining jinoyatchilikka qarshi kurashish, tashkilot faoliyatini takomillashtirish muammolari bo‘yicha qarorlari va tavsiyalari bajarilishiga ko‘maklashish;

Interpol Bosh kotibiyati tomonidan o‘tkaziladigan tadbirlarda, Interpol Bosh Assambleyasining ishchi yig‘ilishlari va konferensiyalarida, sessiyalarida ishtirok etish;

g) shaxslar, avtotransport vositalari, san’at asarlari va boshqa predmetlarni xalqaro qidiruvga e’lon qilish, tanib olinmagan murdalarni identifikatsiya qilish masalalari bo‘yicha Interpol Bosh kotibiyatiga iltimosnoma berish, shuningdek, Interpolga a’zo mamlakatlarning so‘rovlari bo‘yicha O‘zbekiston Respublikasi hududida ushbu tadbirlarni tashkil etish sohasida:

O‘zbekiston Respublikasi huquqni muhofaza qilish organlarining surishtiruv, tergov organlaridan yashirinib yurgan, jinoiy jazodan bo‘yin tovlayotgan shaxslarni, bedarak yo‘qolgan shaxslarni va qonun hujjatlarida nazarda tutilgan boshqa shaxslarni xalqaro qidiruvga e’lon qilish masalalari bo‘yicha so‘rovlarini olish va ularga ishlov berish, ular asosida Interpol Bosh kotibiyatiga yuborish uchun tegishli iltimosnomalar tayyorlash;

O‘zbekiston Respublikasi huquqni muhofaza qilish organlarining so‘rovlari bo‘yicha o‘g‘irlangan va o‘g‘irlangan avtotransport vositalari, o‘g‘irlangan madaniy va boshqa boyliklarni xalqaro qidiruvga e’lon qilish to‘g‘risida Interpol Bosh kotibiyatiga iltimosnoma berish uchun tegishli hujjatlarni tayyorlash;

O‘zbekiston Respublikasi huquqni muhofaza qiluvchi organlariga tanib olinmagan murdalarning, shuningdek yoshi yoki sog‘lig‘i tufayli o‘zi haqida tegishli ma’lumotlarni ma’lum qila olmaydigan shaxslarning shaxsini aniqlashda ko‘maklashish;

xalqaro qidiruvda bo‘lgan ushlab turilgan shaxslarni dastlabki tergov, sud yoki jazoni o‘tash joyiga jo‘natish;

Interpolga a’zo mamlakatlarning so‘rovlari bo‘yicha shaxslar, transport vositalari, san’at asarlari va boshqa ashyolarni xalqaro qidirish, shuningdek, tanib olinmagan murdalarning shaxsini aniqlash tadbirlarini tashkil etish.

16. Interpolning MMB o‘z faoliyatida bevosita O‘zbekiston Respublikasi ichki ishlar vaziriga bo‘ysunadi.

17. Interpol MMBga O‘zbekiston Respublikasi ichki ishlar vaziri tomonidan belgilangan tartibda lavozimga tayinlanadigan va lavozimdan ozod etiladigan boshliq boshchilik qiladi.

18. Interpol MMB boshlig‘i:

Interpol MMB faoliyatiga bevosita rahbarlik qiladi va Interpol MMBga yuklangan vazifalar, funksiyalar va majburiyatlarning lozim darajada bajarilishi uchun shaxsan javob beradi;

O‘zbekiston Respublikasi ichki ishlar vaziriga Interpol MMBning tashkiliy-shtat tuzilmasini takomillashtirish bo‘yicha takliflar kiritadi, Interpol MMB bo‘linmalari va ularning xodimlarining funksional vazifalarini belgilaydi va tasdiqlaydi;

Interpol MMB bo‘linmalarining ish rejalarini tasdiqlaydi;

Interpol MMB faoliyatini moliyaviy ta’minlash masalalarini belgilangan tartibda hal etadi;

ajratiladigan mablag‘lar doirasida Interpol MMB xodimlarini rag‘batlantirish va ularga o‘z vakolatlari doirasida intizomiy jazo qo‘llash to‘g‘risida farmoyishlar chiqaradi, shuningdek, ushbu masalalar bo‘yicha O‘zbekiston Respublikasi ichki ishlar vaziriga takliflar kiritadi;

Interpol MMB xodimlarini lavozimga tayinlash, egallab turgan lavozimidan ozod etish, xizmat muddatini uzaytirish va ularga maxsus unvonlar berish to‘g‘risida O‘zbekiston Respublikasi ichki ishlar vaziriga belgilangan tartibda taqdimnomalar kiritadi;

Interpol MMB xodimlariga mehnat ta’tillarini beradi;

Interpol MMB xodimlarini xizmat safarlariga yuborish to‘g‘risidagi masalalarni belgilangan tartibda hal etadi;

O‘zbekiston Respublikasi ichki ishlar vazirining Interpol doirasida jinoyatchilikka qarshi kurashishda O‘zbekiston Respublikasining xalqaro hamkorligini ta’minlash masalalari bo‘yicha topshiriqlarini bajaradi;

O‘zbekiston Respublikasining huquqni muhofaza qiluvchi organlari va boshqa tashkilotlari, shuningdek Interpol Bosh kotibiyati, Interpolning boshqa mamlakatlar milliy markaziy byurolari, xorijiy davlatlarning diplomatik vakolatxonalari xizmatlari va xalqaro tashkilotlarning O‘zbekiston Respublikasidagi vakolatxonalari bilan o‘zaro munosabatlarda Interpolning MMB nomidan ish ko‘radi.

19. Interpol MMBni moliyalashtirish va moddiy-texnik ta’minlash O‘zbekiston Respublikasi Davlat budjeti mablag‘lari va qonun hujjatlarida taqiqlanmagan boshqa manbalar hisobidan amalga oshiriladi.

20. Interpolning MMB hisobvarag‘iga dotatsiyalar, badallar va xayr-ehsonlar shaklida tushadigan mablag‘lardan belgilangan tartibda faqat Interpolning MMB o‘z vazifalari va funksiyalarini bajarish bilan bog‘liq faoliyatni moliyalashtirish, shu jumladan uning moddiy-texnika bazasini mustahkamlash maqsadlarida foydalaniladi. Ko‘rsatib o‘tilgan mablag‘lardan to‘g‘ri foydalanilishi ustidan nazorat O‘zbekiston Respublikasi qonun hujjatlariga muvofiq amalga oshiriladi.

21. Interpol MMB xodimlarining xizmat safarlariga xorijiy valyutadagi xarajatlari belgilangan tartibda budjet mablag‘lari hisobidan qoplanadi.

22. Interpolning MMB har yili O‘zbekiston Respublikasi Moliya vazirligiga O‘zbekiston Respublikasining Interpolga a’zolik badallari, xodimlarning xizmat safarlari bo‘yicha zarur hisob-kitoblarni taqdim etadi, shuningdek foydalanilgan valyuta mablag‘lari uchun hisobot beradi.

23. Interpolning MMBni qayta tashkil etish va tugatish belgilangan tartibda amalga oshiriladi.

24. Interpolning MMBda ish yuritish IIV tomonidan belgilangan talablarga muvofiq va Interpol Bosh kotibiyati tavsiyalarini hisobga olgan holda davlat tilida va Interpolning rasmiy tillarida amalga oshiriladi.

Ish yuritish va maxfiylik rejimi bo‘yicha tadbirlar Interpol MMB tomonidan qonun hujjatlarida belgilangan tartibda mustaqil ravishda amalga oshiriladi.