O‘zbekiston Respublikasi “Prokuratura to‘g‘risida”gi Qonunining 13-moddasi, “Jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish to‘g‘risida”gi Qonunining 15-moddasi va O‘zbekiston Respublikasi Prezidentining 2006-yil 21-apreldagi PQ-331-sonli “Moliya-iqtisodiy, soliq sohasidagi jinoyatlarga, jinoiy faoliyatdan olingan daromadlarni legallashtirishga qarshi kurashishni kuchaytirish chora-tadbirlari to‘g‘risida”gi qaroriga asosan buyuraman:

1. Terrorchilik faoliyatida yoki ommaviy qirg‘in qurolini tarqatishda ishtirok etayotgan yoki ishtirok etishda gumon qilinayotgan shaxslar ro‘yxatiga kiritilgan shaxslarning operatsiyalarini to‘xtatib turish, pul mablag‘larini yoki boshqa mol-mulkini ishga solmay to‘xtatib qo‘yish, ishga solmay to‘xtatib qo‘yilgan mol-mulkidan foydalanishga ruxsat berish va operatsiyalarini tiklash tartibi to‘g‘risidagi nizom ilovaga muvofiq tasdiqlansin.

2. Mazkur buyruq rasmiy e’lon qilingan kundan e’tiboran uch oy o‘tgach kuchga kiradi.

Mazkur Nizom O‘zbekiston Respublikasining “Jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish to‘g‘risida”gi Qonuni, O‘zbekiston Respublikasi Prezidentining 2006-yil 21-apreldagi PQ-331-sonli “Moliya-iqtisodiy, soliq sohasidagi jinoyatlarga, jinoiy faoliyatdan olingan daromadlarni legallashtirishga qarshi kurashishni kuchaytirish chora-tadbirlari to‘g‘risida”gi qarori, O‘zbekiston Respublikasi Vazirlar Mahkamasining 2004-yil 10-sentabrdagi 424-sonli “BMT Xavfsizlik Kengashi 1540-son (2004) Rezolyutsiyasining bajarilishini tashkil etish chora-tadbirlari to‘g‘risida”gi va 2009-yil 12-oktabrdagi 272-sonli “Jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish bilan bog‘liq axborotni taqdim etish tartibini takomillashtirish to‘g‘risida”gi qarorlariga asosan terrorchilik faoliyatida yoki ommaviy qirg‘in qurolini tarqatishda ishtirok etayotgan yoki ishtirok etishda gumon qilinayotgan shaxslar ro‘yxatiga kiritilgan shaxslarning operatsiyalarini to‘xtatib turish, pul mablag‘larini yoki boshqa mol-mulkini ishga solmay to‘xtatib qo‘yish, ishga solmay to‘xtatib qo‘yilgan mol-mulkidan foydalanishga ruxsat berish va operatsiyalarini tiklash, shuningdek, ushbu ro‘yxatni tuzish va pul mablag‘lari yoki boshqa mol-mulk bilan bog‘liq operatsiyalarni amalga oshiruvchi tashkilotlarga yetkazish tartibini belgilaydi.

1. Ushbu Nizomda quyidagi asosiy tushunchalar qo‘llaniladi:

pul mablag‘larini yoki boshqa mol-mulkni ishga solmay to‘xtatib qo‘yish — pul mablag‘larini yoki boshqa mol-mulkni o‘tkazishni, konversiyalashni, tasarruf etishni yoxud ko‘chirishni taqiqlash;

terrorchilik faoliyatida ishtirok etayotgan yoki ishtirok etishda gumon qilinayotgan shaxs — terrorchilik faoliyatida ishtirok etayotgan yoxud ishtirok etishda gumon qilinayotgan yuridik yoki jismoniy shaxs, terrorchilik faoliyatini amalga oshirayotgan yoxud amalga oshirishda gumon qilinayotgan tashkilotning bevosita yoki bilvosita mulkdori bo‘lgan yoxud uni nazorat qilayotgan yuridik yoki jismoniy shaxs, shuningdek, terrorchilik faoliyatida ishtirok etayotgan yoxud ishtirok etishda gumon qilinayotgan jismoniy shaxsning yoxud tashkilotning mulkidagi yoki nazorati ostidagi yuridik shaxs;

ommaviy qirg‘in qurolini tarqatishda ishtirok etayotgan yoki ishtirok etishda gumon qilinayotgan shaxs — O‘zbekiston Respublikasi tomonidan tan olingan, ommaviy qirg‘in qurolini tarqatishini oldini olishga qaratilgan BMT Xavfsizlik Kengashining rezolyutsiyalari hamda boshqa xalqaro-huquqiy hujjatlari bilan belgilangan jismoniy yoki yuridik shaxs;

operatsiyalarni to‘xtatib turish — mijozning pul mablag‘larini yoki boshqa mol-mulkni ko‘chirish, konversiyalash, o‘zga shaxslarga egalik qilish va foydalanish uchun berish, shuningdek yuridik ahamiyatga ega bo‘lgan boshqa harakatlarni bajarish to‘g‘risidagi topshiriqnomalari ijrosini to‘xtatib turish;

BMT Xavfsizlik Kengashining qo‘mitalari tomonidan tuzilgan sanksiyaviy ro‘yxatlar — BMT Xavfsizlik Kengashining qo‘mitalari tomonidan tuziladigan, shu jumladan 1267/1989/2253 Qo‘mitasining IShID (DAISh) va “Al-Qoida”ga qarshi sanksiyalar yuzasidan, 1988 sanksiyalar Qo‘mitasining (“Tolibon” tashkiloti yuzasidan) qarorlari bilan sanksiyalar qo‘llanilishi belgilangan terrorchilik harakatlari yoki ommaviy qirg‘in qurolini tarqatishga aloqador bo‘lgan yuridik va jismoniy shaxslarning ro‘yxatlari;

BMT Xavfsizlik Kengashining tegishli rezolyutsiyalari — BMT Xavfsizlik Kengashi tomonidan qabul qilingan terrorizmga qarshi kurashishga qaratilgan rezolyutsiyalar (1267 (1999), 1333 (2000), 1363 (2001), 1373 (2001), 1390 (2002), 1452 (2002), 1455 (2003), 1526 (2004), 1617 (2005), 1730 (2006), 1735 (2006),1822 (2008), 1904 (2009), 1988 (2011), 1989 (2011), 2161 (2014), 2170 (2014), 2178 (2014), 2253 (2015) va ularni rivojlantirishga qaratilgan rezolyutsiyalar) yoki ommaviy qirg‘in qurolini tarqatishga qarshi kurashishga qaratilgan rezolyutsiyalar (1718 (2006), 1737 (2006), 1747 (2007), 1803 (2008), 1874 (2009), 1929 (2010) va ularni rivojlantirishga qaratilgan rezolyutsiyalar);

maxsus vakolatli davlat organi — O‘zbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti.

2. O‘zbekiston Respublikasi fuqarolari va yuridik shaxslarga, chet el fuqarolari va yuridik shaxslarga hamda fuqaroligi bo‘lmagan shaxslarga O‘zbekiston Respublikasi hududida terrorchilik faoliyatida yoki ommaviy qirg‘in qurolini tarqatishda ishtirok etayotgan yoki ishtirok etishda gumon qilinayotgan shaxslar ro‘yxatiga kiritilgan shaxslarga, shuningdek ularning topshirig‘i bo‘yicha faoliyat ko‘rsatayotgan shaxslarga, bevosita yoki bilvosita pul mablag‘lari yoki boshqa mol-mulkka, moddiy resurslarga, moliyaviy va boshqa xizmatlardan foydalanishga ruxsat berish taqiqlanadi.

3. Pul mablag‘lari yoki boshqa mol-mulk bilan bog‘liq operatsiyalarni amalga oshiruvchi tashkilotlar:

operatsiya ishtirokchilarini terrorchilik faoliyatida yoki ommaviy qirg‘in qurolini tarqatishda ishtirok etayotgan yoki ishtirok etishda gumon qilinayotgan shaxslar ro‘yxatiga kiritilgan shaxslar bilan solishtirishi;

terrorchilik faoliyatida yoki ommaviy qirg‘in qurolini tarqatishda ishtirok etayotgan yoki ishtirok etishda gumon qilinayotgan shaxslar ro‘yxatiga kiritilgan shaxslarning operatsiyasini kechiktirmasdan va oldindan xabar qilmasdan to‘xtatib turishi, bundan yuridik yoki jismoniy shaxsning hisobvarag‘iga tushgan pul mablag‘larini hisobga kiritish bo‘yicha operatsiyalar mustasno, va (yoki) pul mablag‘larini yoki boshqa mol-mulkini ishga solmay to‘xtatib qo‘yishi, shuningdek shubhali operatsiya to‘g‘risida maxsus vakolatli davlat organiga xabar yuborishi shart.

4. Terrorchilik faoliyatida yoki ommaviy qirg‘in qurolini tarqatishda ishtirok etayotgan yoki ishtirok etishda gumon qilinayotgan shaxslarning ro‘yxati (bundan buyon matnda Ro‘yxat deb yuritiladi) terrorizmga, ommaviy qirg‘in qurolini tarqatishga qarshi kurashishni amalga oshiruvchi davlat organlari va O‘zbekiston Respublikasining boshqa vakolatli organlaridan taqdim etilayotgan ma’lumotlar, shuningdek, chet davlatlarning vakolatli organlari va xalqaro tashkilotlaridan rasmiy kanallar orqali taqdim etilayotgan ma’lumotlar asosida maxsus vakolatli davlat organi tomonidan tuziladi. Ro‘yxat va uning shakli maxsus vakolatli davlat organining rahbari tomonidan tasdiqlanadi.

5. Ro‘yxat ikkita bo‘limdan iborat bo‘ladi:

Xalqaro ro‘yxat;

Milliy ro‘yxat;

Har bir bo‘lim ikkita bobga bo‘linadi:

terrorchilik faoliyatida ishtirok etayotgan yoki ishtirok etishda gumon qilinayotgan shaxslar;

ommaviy qirg‘in qurolini tarqatishda ishtirok etayotgan yoki ishtirok etishda gumon qilinayotgan shaxslar.

Boblar ikkita qismga bo‘linadi:

jismoniy shaxslar;

yuridik shaxslar.

“Milliy ro‘yxat” bo‘limi hamda uni yangilash uchun kelayotgan ma’lumotlar maxsus vakolatli davlat organi tomonidan O‘zbekiston Respublikasi Milliy xavfsizlik xizmati bilan o‘zaro kelishib olinadi.

6. Ro‘yxatga kiritish uchun quyidagilar asos hisoblanadi:

a) terrorchilik yoki ommaviy qirg‘in qurolini tarqatish xususiyatga ega bo‘lgan jinoyatni sodir etishda aybdor deb topilgan jismoniy shaxsga nisbatan qonuniy kuchga kirgan O‘zbekiston Respublikasi sudining hukmi;

b) terrorchilik tashkiloti deb topish, uni tugatish yoki faoliyatini O‘zbekiston Respublikasi hududida taqiqlash to‘g‘risida qonuniy kuchga kirgan O‘zbekiston Respublikasi sudining qarori;

v) terrorchilik yoki ommaviy qirg‘in qurolini tarqatish xususiyatga ega bo‘lgan jinoyatni sodir etishda gumon qilinuvchi yoki ayblanuvchi sifatida jinoyat ishi yuzasidan jismoniy shaxsni jalb qilish to‘g‘risida tergovchi yoki prokurorning qarori;

g) terrorchilik yoki ommaviy qirg‘in qurolini tarqatish xususiyatga ega bo‘lgan jinoyatni sodir etishda ayblash munosabati bilan shaxsni qidiruvga, shu jumladan xalqaro qidiruvga e’lon qilish;

d) BMT Xavfsizlik Kengashi qo‘mitalari tomonidan tuzilgan sanksion ro‘yxatlar yoki BMT Xavfsizlik Kengashining tegishli rezolyutsiyalari;

e) O‘zbekiston Respublikasi tomonidan tan olingan xalqaro shartnomalar yoki o‘zarolik prinsipi asosida chet davlatlar va xalqaro tashkilotlarning terrorchilik faoliyatida yoki ommaviy qirg‘in qurolini tarqatishda ishtirok etayotgan yoki ishtirok etishda gumon qilinayotgan shaxslarning ro‘yxatlari;

j) O‘zbekiston Respublikasi tomonidan tan olingan xalqaro shartnomalar yoki o‘zarolik prinsipi asosida terrorchilik yoki ommaviy qirg‘in qurolini tarqatish xususiyatga ega bo‘lgan jinoyatni sodir etishda jismoniy shaxs aybdor deb topilgan chet el davlatlarning sud hukmlari, shuningdek, terrorchilik tashkilot deb tan olish, uni tugatish yoki faoliyatini taqiqlash to‘g‘risida chet el davlatlarining sud qarorlari;

z) terrorchilik faoliyatida yoki ommaviy qirg‘in qurolini tarqatishda ishtirok etayotgan yoki ishtirok etishda gumon qilinayotgan shaxslarning operatsiyalarni to‘xtatib turish va (yoki) pul mablag‘larini yoki boshqa mol-mulkni ishga solmay to‘xtatib qo‘yish to‘g‘risida O‘zbekiston Respublikasi tomonidan tan olingan xalqaro shartnomalar yoki o‘zarolik prinsipi asosida chet davlatlar vakolatli organlarining so‘rovlari.

7. Ro‘yxatni tuzish uchun O‘zbekiston Respublikasining terrorizmga qarshi kurashishni amalga oshiruvchi davlat organlari, Bosh prokuratura, Markaziy bank va “Sanoatgeokontexnazorat” davlat inspeksiyasi ushbu Nizomning 6-bandida nazarda tutilgan ma’lumotlarni, ular ma’lum bo‘lgandan yoki Ro‘yxatga qo‘shish uchun holatlar yuzaga kelgandan boshlab uch ish kuni davomida maxsus vakolatli davlat organiga taqdim etadilar.

Ma’lumotlar qog‘oz yoki elektron ko‘rinishdagi hujjat sifatida rasmiylashtiriladi va maxsus vakolatli davlat organiga qo‘lda yoki himoyalangan maxsus aloqa kanallardan foydalangan holda maxsus alohida pochta aloqasi orqali taqdim etiladi.

8. O‘zbekiston Respublikasining Tashqi ishlar vazirligi BMT Xavfsizlik Kengashi qo‘mitalari tomonidan tuzilgan sanksion ro‘yxatlar va BMT Xavfsizlik Kengashining tegishli rezolyutsiyalari to‘g‘risida, ular rasmiy kanallar orqali kelib tushishiga qarab maxsus vakolatli davlat organini va O‘zbekiston Respublikasining vakolatli organlarini xabardor qiladi.

9. Terrorchilik yoki ommaviy qirg‘in qurolini tarqatish xususiyatga ega bo‘lgan jinoyatlar uchun hukm qilingan O‘zbekiston Respublikasining fuqarolari hamda terrorchilik tashkilot deb tan olish, uni tugatish yoki faoliyatini taqiqlash to‘g‘risida sud qarorlari to‘g‘risidagi ma’lumotlar maxsus vakolatli davlat organi tomonidan tizimli tarzda O‘zbekiston Respublikasi Oliy sudidan so‘rab olinadi.

10. Ro‘yxatga kiritilgan shaxslarni identifikatsiya (verifikatsiya) qilish uchun maxsus vakolatli davlat organiga qo‘shimcha tarzda quyidagi ma’lumotlar (agar mavjud bo‘lsa) taqdim qilinadi:

a) yuridik shaxsga nisbatan:

davlat ro‘yxatidan o‘tkazilganligi to‘g‘risidagi guvohnomaning tartib raqami, tashkiliy-huquqiy shakli va faoliyat turi;

soliq to‘lovchining identifikatsion raqami (STIR) va yuridik manzili;

rahbarlar va ta’sischilar (mulkdorlar) to‘g‘risida ma’lumot (familiyasi, ismi, otasining ismi, tug‘ilgan sanasi, yashash manzili);

banklardagi hisob raqamlar va mulk mavjudligi to‘g‘risidagi ma’lumotlar;

b) jismoniy shaxsga nisbatan:

pasport yoki shaxsni tasdiqlovchi boshqa hujjatning ma’lumotlari;

yashash joyi (ro‘yxatdan o‘tish) manzili yoki turish joyi manzili;

tug‘ilgan yili va joyi (kun/oy/yil);

soliq to‘lovchining indetifikatsion raqami (STIR);

ish joyi va lavozimi to‘g‘risidagi ma’lumotlar;

agarda yakka tartibdagi tadbirkor sifatida faoliyatni amalga oshirayotgan bo‘lsa — davlat ro‘yxatidan o‘tkazilganlik guvohnomasining tartib raqami va faoliyat turi.

11. Agarda taqdim etilgan ma’lumotlar to‘liq bo‘lmasa yoki noaniq bo‘lsa maxsus vakolatli davlat organi qo‘shimcha ma’lumot olish uchun O‘zbekiston Respublikasining tegishli vakolatli davlat organiga murojaat qiladi.

O‘zbekiston Respublikasining tegishli vakolatli davlat organlari yetti ish kuni davomida qo‘shimcha ma’lumotni taqdim etadilar, bundan ushbu ma’lumotni taqdim qilish uchun chet davlatlarning vakolatli organlariga yoki xalqaro tashkilotlarga murojaat qilish zarur bo‘lgan holatlar mustasno.

12. O‘zbekiston Respublikasining tegishli vakolatli davlat organlaridan yoki chet davlatlarning vakolatli organlari va xalqaro tashkilotlardan rasmiy kanallar orqali kelib tushgan ma’lumotlarga asosan, ular kelib tushgan kundan keyingi uch ish kunidan kechiktirmay maxsus vakolatli davlat organi Ro‘yxatga o‘zgartirish va qo‘shimchalarni kiritadi.

Ro‘yxatga o‘zgartirish va qo‘shimchalar kiritilganda, u har gal yangi tahrirda chiqariladi.

13. Shaxslarni Ro‘yxatdan chiqarilishi, ularni Ro‘yxatga kiritish uchun ma’lumotlarni taqdim etgan organning murojaatiga ko‘ra Nizomning 14-bandida nazarda tutilgan asoslar mavjud bo‘lganda yoki sudning qaroriga ko‘ra amalga oshiriladi, bunda shaxsni Ro‘yxatdan chiqarilishi faqat rasmiy tasdiqlangan hujjatlar asosida amalga oshiriladi.

Ro‘yxatdan chiqarish to‘g‘risidagi murojaat shaxsni Ro‘yxatdan chiqarish uchun asos bo‘lgan ma’lumotlar olingan yoki aniqlangan kundan keyingi uch ish kunidan kechiktirmay maxsus vakolatli davlat organiga yuboriladi.

14. Ro‘yxatdan chiqarish uchun asoslar quyidagilardan iborat:

a) terrorchilik yoki ommaviy qirg‘in qurolini tarqatish xususiyatga ega bo‘lgan jinoyatni sodir etishda jismoniy shaxsga nisbatan qonuniy kuchga kirgan O‘zbekiston Respublikasi sudining hukmi bekor qilinishi;

b) terrorchilik tashkilot deb tan olish, uni tugatish yoki faoliyatini O‘zbekiston Respublikasi hududida taqiqlash to‘g‘risida qonuniy kuchga kirgan O‘zbekiston Respublikasi sudi qarorining bekor qilinishi;

v) terrorchilik yoki ommaviy qirg‘in qurolini tarqatish xususiyatga ega bo‘lgan jinoyat uchun hukm qilingan jismoniy shaxsning sudlanganlik muddatining o‘tib ketganligi yoki sudlanganlikning olib tashlanishi;

g) terrorchilik yoki ommaviy qirg‘in qurolini tarqatish xususiyatga ega bo‘lgan jinoyatni sodir etishda ayblangan shaxsga nisbatan jinoyat ishi O‘zbekiston Respublikasi Jinoyat-protsessual kodeksining 83 va 84-moddalarida nazarda tutilgan asoslar bilan tugatilishi;

d) terrorchilik yoki ommaviy qirg‘in qurolini tarqatish xususiyatga ega bo‘lgan jinoyatni sodir etishda ayblash munosabati bilan shaxsning qidiruvi, shu jumladan xalqaro qidiruvining tugatilishi;

e) BMT Xavfsizlik Kengashi qo‘mitasi tomonidan jismoniy yoki yuridik shaxsni sanksion ro‘yxatidan chiqarib tashlash to‘g‘risidagi qaror qabul qilinganligi yoki BMT Xavfsizlik Kengashining tegishli rezolyutsiyasidan chiqarib tashlanganligi haqida rasmiy hujjat;

j) shaxs terrorchilik faoliyatida yoki ommaviy qirg‘in qurolini tarqatishda ishtirok etayotgan yoki ishtirok etishda gumon qilinayotgan shaxslarning ro‘yxatidan chiqarib tashlanganligi to‘g‘risida chet davlati yoki xalqaro tashkilotining rasmiy xabari;

z) terrorchilik yoki ommaviy qirg‘in qurolini tarqatish xususiyatga ega bo‘lgan jinoyatni sodir etishda jismoniy shaxs aybdor deb topish to‘g‘risidagi hukmi yoki terrorchilik tashkilot deb tan olish, uni tugatish yoki faoliyatini taqiqlash to‘g‘risidagi qarorini bekor qilish haqida chet davlat sudining qarori;

i) terrorchilik faoliyatida yoki ommaviy qirg‘in qurolini tarqatishda ishtirok etayotgan yoki ishtirok etishda gumon qilinayotgan shaxslarning operatsiyalarni to‘xtatib turish va (yoki) pul mablag‘larini yoki boshqa mol-mulkni ishga solmay to‘xtatib qo‘yish to‘g‘risidagi chet davlati vakolatli organlarining so‘rovini chaqirib olinishi yoki bekor qilinishi;

k) O‘zbekiston Respublikasi qonun hujjatlarida belgilangan tartibda tasdiqlangan jismoniy shaxsning vafoti to‘g‘risidagi ma’lumot.

15. BMT Xavfsizlik Kengashi qo‘mitalari tomonidan tuzilgan sanksion ro‘yxatlar yoki BMT Xavfsizlik Kengashining tegishli rezolyutsiyalariga kiritilgan shaxsni Ro‘yxatdan chiqarib tashlanishi, BMT Xavfsizlik Kengashining qo‘mitalari va rezolyutsiyalarining tegishli hujjatlarida (boshqaruv prinsiplar) belgilangan tartibda amalga oshiriladi;

BMT Xavfsizlik Kengashi qo‘mitalari tomonidan tuzilgan sanksion ro‘yxatlarga asosan Ro‘yxatga kiritilgan shaxsning o‘zi, yoki o‘limidan keyin uning qonuniy vorislari, uni Ro‘yxatdan chiqarib tashlash uchun BMT Xavfsizlik Kengashining Rezolyutsiyasi 1904 (2009) bilan ta’sis etilgan Ombudsman Devonxonasiga murojaat qilishadi.

BMT Xavfsizlik Kengashi qo‘mitalari tomonidan tuzilgan sanksion ro‘yxatlarga yoki BMT Xavfsizlik Kengashining tegishli rezolyutsiyalariga kiritilgan shaxs vafoti rasmiy tan olinganida O‘zbekiston Respublikasining vakolatli organlari bu haqda BMT Xavfsizlik Kengashining tegishli qo‘mitasiga xabar yuborish uchun O‘zbekiston Respublikasi Tashqi ishlar vazirligini tasdiqlovchi hujjatlarni ilova qilgan holda xabardor qiladilar.

16. Ro‘yxatga adashib kiritilgan yoki mazkur Nizomning 14-bandiga asosan Ro‘yxatdan chiqarib tashlanishi lozim bo‘lgan, lekin undan chiqarib tashlanmagan yuridik va jismoniy shaxslar asoslantirilgan ariza bilan maxsus vakolatli davlat organiga murojaat qiladilar.

17. Maxsus vakolatli davlat organi uch ish kunidan kechiktirmasdan arizani ko‘rib chiqish uchun Ro‘yxatga kiritishga asos bo‘lgan ma’lumotni taqdim qilgan O‘zbekiston Respublikasining tegishli vakolatli organiga yuboradi.

Arizani qabul qilgan organ uni qonunda belgilangan tartibda ko‘rib chiqadi va quyidagi asoslantirilgan qarorlardan birini qabul qiladi:

Ro‘yxatdan chiqarib tashlash to‘g‘risida taklif kiritish haqida;

arizani qanoatlantirishni rad etish haqida.

18. Maxsus vakolatli davlat organi tegishli organning qarori kelib tushgan kunidan boshlab uch ish kunidan kechiktirmasdan qabul qilingan qaror haqida arizachini xabardor qiladi.

19. Arizani qanoatlantirishni rad etish haqidagi qarori ustidan shaxs sud tartibida shikoyat qilishga haqli.

20. Yuridik yoki jismoniy shaxs uni Ro‘yxatning “Xalqaro ro‘yxat” bo‘limiga kiritish to‘g‘risidagi qarori ustidan shikoyat qilish uchun quyidagi tashkilotlarga murojaat qilishga haqli:

BMT Xavfsizlik Kengashi qo‘mitalari tomonidan tuzilgan sanksion ro‘yxatlarga yoki BMT Xavfsizlik Kengashining tegishli rezolyutsiyalariga asosan kiritilgan shaxs BMT Xavfsizlik Kengashining rezolyutsiyasiga 1730 (2006) asosan tuzilgan Aloqa markaziga yoki BMT Xavfsizlik Kengashining rezolyutsiyasiga 1904 (2009) asosan ta’sis etilgan Ombudsman Devonxonasiga;

shaxs, Ro‘yxatga chet davlat yoki xalqaro tashkilot terrorchilik faoliyatida yoki ommaviy qirg‘in qurolini tarqatishda ishtirok etayotgan yoki ishtirok etishda gumon qilinayotgan shaxslar ro‘yxati asosida kiritilganlik holatida ushbu chet davlatning vakolatli organiga yoki xalqaro tashkilotga;

Ro‘yxatga kiritish uchun asos bo‘lgan chet davlatining hukm yoki qaror chiqargan yuqori turuvchi sudiga;

Ro‘yxatga kiritish uchun asos bo‘lgan operatsiyalarni to‘xtatib turish va (yoki) pul mablag‘larini yoki boshqa mol-mulkni ishga solmay to‘xtatib qo‘yish to‘g‘risida so‘rovni yuborgan chet davlatining vakolatli organiga.

21. Ro‘yxat tuzilib tasdiqlangandan keyin bir ish kunidan kechiktirmasdan maxsus vakolatli davlat organi tomonidan ichki nazorat qoidalarini hamkorlikda tasdiqlagan tegishli nazorat qiluvchi, litsenziyalovchi va ro‘yxatdan o‘tkazuvchi organlarga elektron shaklida yetkazib beradi va Ro‘yxatni o‘zining veb-saytida joylashtiradi.

Qayd etilgan nazorat qiluvchi, litsenziyalovchi va ro‘yxatdan o‘tkazuvchi organlar Ro‘yxatni olgandan keyin uni bir ish kunidan kechiktirmasdan pul mablag‘lari yoki boshqa mol-mulk bilan bog‘liq operatsiyalarni amalga oshiruvchi tashkilotlarga yetkazib beradilar.

22. Ro‘yxatga o‘zgartirish va qo‘shimchalar kiritilgan taqdirda maxsus vakolatli davlat organi yangilangan Ro‘yxatni bir ish kunidan kechiktirmasdan mazkur Nizomning 21-bandida ko‘rsatilgan organlarga yetkazib beradi va o‘zining veb-saytida joylashtiradi. Bunda Ro‘yxatdan chiqarib tashlangan shaxslar to‘g‘risidagi ma’lumotlar alohida Ro‘yxatga ilova sifatida rasmiylashtiriladi.

23. Pul mablag‘lari yoki boshqa mol-mulk bilan bog‘liq operatsiyalarni amalga oshiruvchi tashkilotlarda, nazorat qiluvchi, litsenziyalovchi va ro‘yxatdan o‘tkazuvchi organlar bo‘lmagan holda, ular Ro‘yxatni olish uchun mustaqil ravishda maxsus vakolatli davlat organiga murojaat qilishlari yoki maxsus vakolatli davlat organining veb-saytidan ko‘chirib olishlari lozim.

Maxsus vakolatli davlat organi pul mablag‘lari yoki boshqa mol-mulk bilan bog‘liq operatsiyalarni amalga oshiruvchi tashkilotdan murojaat olingan kunidan boshlab ikki ish kunidan kechiktirmasdan unga Ro‘yxatni taqdim qiladi.

24. Pul mablag‘lari yoki boshqa mol-mulk bilan bog‘liq operatsiyalarni amalga oshiruvchi tashkilotlar operatsiyalarni amalga oshirishda ularning ishtirokchilarini Ro‘yxat bilan solishtirishlari lozim.

25. Mijoz yoki operatsiya qatnashchilaridan birining barcha identifikatsiya ma’lumotlari Ro‘yxatga kiritilgan shaxsning ma’lumotlari bilan to‘liq mos kelgan taqdirda pul mablag‘lari yoki boshqa mol-mulk bilan bog‘liq operatsiyalarni amalga oshiruvchi tashkilot bu operatsiyani kechiktirmasdan va oldindan xabar qilmasdan to‘xtatib turadi, bundan yuridik yoki jismoniy shaxsning hisobvarag‘iga tushgan pul mablag‘larini hisobga kiritish bo‘yicha operatsiyalar mustasno, va pul mablag‘larini yoki boshqa mol-mulkini ishga solmay to‘xtatib qo‘yadi.

Quyidagi holatlarda ham operatsiyani to‘xtatib turish va pul mablag‘larini yoki boshqa mol-mulkni ishga solmay to‘xtatib qo‘yish lozim:

agarda operatsiya qatnashchilaridan biri Ro‘yxatga kiritilgan shaxs nomidan yoki uning topshirig‘iga binoan faoliyat ko‘rsatayotgan bo‘lsa;

operatsiyani amalga oshirishda foydalanayotgan pul mablag‘lari yoki boshqa mol-mulk to‘liq yoki qisman Ro‘yxatga kiritilgan shaxsga tegishli bo‘lsa;

operatsiya qatnashchisi — yuridik shaxs Ro‘yxatga kiritilgan shaxsning mulkida yoki nazorat ostida bo‘lsa.

26. Ro‘yxatga kiritilgan shaxsning operatsiyasi to‘xtatib turilganda va (yoki) pul mablag‘larini yoki boshqa mol-mulkini ishga solmay to‘xtatib qo‘yilganda pul mablag‘lari yoki boshqa mol-mulk bilan bog‘liq operatsiyalarni amalga oshiruvchi tashkilot ishga solmay to‘xtatib qo‘yilgan mulkning miqdori ko‘rsatilgan holda bu haqda maxsus vakolatli davlat organiga shubhali operatsiya to‘g‘risida xabar yuborish lozim.

27. Operatsiyalarini tiklash va ishga solmay to‘xtatib qo‘yilgan mol-mulkidan foydalanishga ruxsat berish quyidagi holatlarda amalga oshiriladi:

Shaxs Ro‘yxatdan chiqarilganda;

operatsiyasi to‘xtatib turilgan va pul mablag‘larini yoki boshqa mol-mulkini ishga solmay to‘xtatib qo‘yilgan shaxs Ro‘yxatga kiritilgan shaxs bilan bir xildagi identifikatsiya ma’lumotlarga ega bo‘lsa (“yanglishish holati”).

28. Operatsiyasi to‘xtatib turilgan va pul mablag‘larini ishga solmay to‘xtatib qo‘yilgan, Ro‘yxatga kiritilgan shaxs bilan bir xildagi identifikatsion ma’lumotlarga ega bo‘lgan shaxslar ularni tiklash uchun maxsus vakolatli davlat organiga yozma murojaat yuboradilar.

Murojaatga shaxsning to‘liq identifikatsiya qilish uchun zarur bo‘lgan hamda u Ro‘yxatga kiritilgan shaxs emasligini tasdiqlovchi hujjat va boshqa ma’lumotlar ilova qilinishi lozim.

29. Maxsus vakolatli davlat organi murojaatni besh ish kuni davomida ko‘rib chiqadi va operatsiya ishtirokchisi Ro‘yxatga kiritilgan shaxs emasligi, balkim bu shaxs bilan bir xildagi identifikatsiya ma’lumotlarga ega ekanligi tasdiqlansa, bu haqda arizachini va pul mablag‘lari yoki boshqa mol-mulk bilan bog‘liq operatsiyalarni amalga oshiruvchi tashkilotni xabardor qiladi.

Agarda arizachi tomonidan taqdim qilingan ma’lumotlar bo‘yicha shaxsni to‘liq identifikatsiya (verifikatsiya) qilish imkoni bo‘lmasa, maxsus vakolatli davlat organi murojaat kelib tushgan kundan uch kundan kechiktirmasdan arizachiga asoslantirilgan rad javobini yuboradi.

30. Quyidagi holatlarda pul mablag‘lari yoki boshqa mol-mulk bilan bog‘liq operatsiyalarni amalga oshiruvchi tashkilot to‘xtatilgan operatsiyani o‘tkazishni tiklaydi va ishga solmay to‘xtatib qo‘yilgan mol-mulkidan foydalanishga ruxsat beradi:

yangilangan Ro‘yxat kelib tushgan kundan uch kundan kechiktirmasdan, agarda shaxs Ro‘yxatdan chiqarib tashlangan bo‘lsa;

“yanglishish holati” haqida maxsus vakolatli davlat organidan xabarnoma kelib tushgan kunning o‘zida, lekin kelib tushgan kunning keyingi ish kunidan kechiktirmasdan.

31. Quyidagi maqsadlarda Ro‘yxatga kiritilgan shaxs bazaviy hayotiy ehtiyojlarini ta’minlash maqsadida ishga solmay to‘xtatib qo‘yilgan mol-mulkidan foydalanishga ruxsat berish uchun pul mablag‘lari yoki boshqa mol-mulk bilan bog‘liq operatsiyalarni amalga oshiruvchi tashkilotga murojaat qilishga haqli:

a) oziq-ovqat mahsulotlari, turar joy ijarasi, kommunal to‘lovlar, dori vositalari, tibbiy xizmat va tibbiyot uchun mo‘ljallangan buyumlar, soliq, boshqa majburiy va sug‘urta to‘lovlar, o‘rtacha bozor narxi chegarasida advokatlar xizmati va yuridik maslahatlar, bank hisobvaraqlarga xizmat ko‘rsatish yoki mulkni saqlash bilan bog‘liq bo‘lgan to‘lov va yig‘imlar uchun;

b) favqulotdagi xarajatlar to‘lovlari uchun.

Murojaatga to‘lov maqsadi, summasi, asosi, ishga solmay to‘xtatib qo‘yilgan mol-mulkidan foydalanishga ruxsat berish mulkning turi, pul mablag‘lari yoki boshqa mol-mulk oluvchining rekvizitlari va identifikatsion ma’lumotlari, pul mablag‘lari oluvchining banki to‘g‘risidagi ma’lumotlar ilova qilinadi.

32. Pul mablag‘lari yoki boshqa mol-mulk bilan bog‘liq operatsiyalarni amalga oshiruvchi tashkilot murojaat kelgan kundan boshlab bir ish kunidan kechiktirmasdan uni maxsus vakolatli davlat organiga yuboradi.

33. Maxsus vakolatli davlat organi ishga solmay to‘xtatib qo‘yilgan mol-mulkdan foydalanishga ruxsat berish to‘g‘risidagi murojaat kelgan kundan boshlab ikki ish kunidan kechiktirmasdan uni ko‘rib chiqish uchun shaxsni Ro‘yxatga kiritish uchun tegishli ma’lumotlarni taqdim etgan organga yuboradi.

Shaxsni Ro‘yxatga kiritish uchun tegishli ma’lumotlarni taqdim etgan organ yetti ish kuni davomida murojaatni ko‘rib chiqadi va qabul qilingan qaror haqida maxsus vakolatli davlat organini xabardor qiladi, bundan qaror qabul qilish uchun chet davlatlar va xalqaro tashkilotlarning vakolatli organlariga so‘rovlar yuborish zaruriyati bo‘lgan holatlar mustasno.

Maxsus vakolatli davlat organi ikki ish kunidan kechiktirmasdan qabul qilingan qaror haqida pul mablag‘lari yoki boshqa mol-mulk bilan bog‘liq operatsiyalarni amalga oshiruvchi tashkilotni xabardor qiladi.

34. Ishga solmay to‘xtatib qo‘yilgan mol-mulkdan foydalanishga ruxsat berish to‘g‘risidagi murojaat Ro‘yxatga kiritilgan shaxsning mulkiga nisbatan bo‘lsa, agarda u:

BMT Xavfsizlik Kengashi qo‘mitalari tomonidan tuzilgan sanksion ro‘yxatlarga yoki BMT Xavfsizlik Kengashining tegishli rezolyutsiyalariga asosan kiritilgan bo‘lsa, maxsus vakolatli davlat organi ikki ish kuni davomida ushbu murojaatni BMT Xavfsizlik Kengashining tegishli qo‘mitasiga yuborish uchun O‘zbekiston Respublikasi Tashqi ishlar vazirligiga taqdim etadi;

xalqaro shartnoma asosida tan olingan yoki o‘zarolik prinsipi asosida chet davlati vakolatli organining so‘roviga asosan kiritilgan bo‘lsa, maxsus vakolatli davlat organi ikki ish kuni davomida so‘rov yuborgan chet davlati vakolatli organiga murojaat olganligi haqida ishga solmay to‘xtatib qo‘yilgan mol-mulkidan foydalanishga ruxsat berish masalasini kelishish to‘g‘risida xabar yuboradi.

35. BMT Xavfsizlik Kengashi qo‘mitalari tomonidan tuzilgan sanksion ro‘yxatlarga yoki BMT Xavfsizlik Kengashining tegishli rezolyutsiyalariga asosan kiritilgan shaxsga:

mazkur Nizomning 31-bandi “a” kichik bandida ko‘rsatilgan maqsadlar uchun ishga solmay to‘xtatib qo‘yilgan mol-mulkidan foydalanishga ruxsat, bunday ruxsat olish to‘g‘risidagi murojaat O‘zbekiston Respublikasi Tashqi ishlar vazirligi tomonidan BMT Xavfsizlik Kengashining tegishli qo‘mitasiga yetkazilganligi sharti bilan beriladi;

mazkur Nizomning 31-bandi “b” kichik bandida ko‘rsatilgan maqsadlar uchun ishga solmay to‘xtatib qo‘yilgan mol-mulkidan foydalanishga ruxsat faqat murojaat BMT Xavfsizlik Kengashining tegishli qo‘mitasining roziligi va diplomatik kanallar orqali tasdiqlovchi hujjatlar olinganda beriladi.

36. Pul mablag‘lari yoki boshqa mol-mulkdan foydalanish ruxsati berilgan pul mablag‘lari yoki boshqa mol-mulk bilan bog‘liq operatsiya, shu jumladan uni o‘tkazishning urinib ko‘rishi, pul mablag‘lari yoki boshqa mol-mulk bilan bog‘liq operatsiyalarni amalga oshiruvchi tashkiloti tomonidan shubhali deb topiladi va qonun hujjatlarda belgilangan tartibda maxsus vakolatli davlat organiga xabar yuboriladi.

37. Terrorchilik faoliyatida yoki ommaviy qirg‘in qurolini tarqatishda ishtirok etish yoki ishtirok etishda gumon qilish bilan bog‘liq, sanksiyalar ostiga tushayotgan shaxslarning operatsiyalarni to‘xtatib turish va (yoki) pul mablag‘larini yoki boshqa mol-mulkni ishga solmay to‘xtatib qo‘yish to‘g‘risidagi xalqaro tashkilot yoki chet davlati vakolatli organining so‘rovi diplomatik kanallar orqali kelib tushgan taqdirda O‘zbekiston Respublikasi Tashqi ishlar vazirligi uch ish kuni davomida hujjatlarni maxsus vakolatli davlat organiga yuboradi.

Xalqaro tashkilot yoki chet davlati vakolatli organining so‘rovi quyidagilardan iborat bo‘lishi lozim:

shaxsning terrorchilik faoliyati yoki ommaviy qirg‘in qurolini tarqatishga aloqadorligi haqida batafsil ma’lumotlar, shu jumladan BMT Xavfsizlik Kengashining rezolyutsiyalarida belgilangan sanksiyalarni qo‘llash uchun asos bo‘lgan mezonlarga to‘g‘ri kelishi haqida;

jismoniy va yuridik shaxslar uchun mazkur Nizomning 10-bandida nazarda tutilgan ma’lumotlar;

operatsiyani to‘xtatib turish va (yoki) pul mablag‘larini yoki boshqa mol-mulkni ishga solmay to‘xtatib qo‘yish haqida so‘rov yuborilganligi holatini oshkor qilishga rozilik berish.

38. Maxsus vakolatli davlat organi kelib tushgan xalqaro tashkilot yoki chet davlati vakolatli organining so‘rovini ikki ish kuni davomida ko‘rib chiqadi va natijasi bo‘ycha shaxsni Ro‘yxatga qo‘shish yoki Ro‘yxatga qo‘shishni rad etish to‘g‘risida qaror chiqaradi.

39. Agarda pul mablag‘larini yoki boshqa mol-mulkni ishga solmay to‘xtatib qo‘yish haqida so‘rovning ijrosi maxsus vakolatli davlat organining vakolatiga kirmaydigan bo‘lsa, u O‘zbekiston Respublikasi Tashqi ishlar vazirligini xabardor qilgan holda so‘rovni bajarish vakolatiga ega bo‘lgan O‘zbekiston Respublikasining tegishli davlat organiga yuboradi.

40. So‘rovni bajarish imkoni bo‘lmagan taqdirda, ma’lumot va hujjatlar so‘rov ijrosiga to‘sqinlik qiluvchi sabablar ko‘rsatilgan holda diplomatik kanallar orqali so‘rov tashabbuskoriga qaytariladi.

41. So‘rov O‘zbekiston Respublikasi qonunchiligiga zid bo‘lsa yoki uning ijrosi O‘zbekiston Respublikasining suvereniteti yoki xavfsizligiga zarar keltirishi mumkin bo‘lsa u ijrosiz qaytariladi.

42. Terrorchilik faoliyatida yoki ommaviy qirg‘in qurolini tarqatishda ishtirok etish yoki ishtirok etishda gumon qilish bilan bog‘liq bo‘lgan sanksiyalar ostiga tushayotgan shaxslarga nisbatan O‘zbekiston Respublikasi vakolatli organlarining so‘rovlari O‘zbekiston Respublikasi Tashqi ishlar vazirligining diplomatik kanallari orqali xalqaro tashkilotlarga yoki chet davlatlarining vakolatli organlariga yuboriladi.

43. Terrorizmga qarshi kurashishni amalga oshiruvchi davlat organlari tomonidan BMT Xavfsizlik Kengashining qo‘mitalari tomonidan tuziladigan sanksion ro‘yxatlarga kiritilishi lozim bo‘lgan shaxsga nisbatan ma’lumotlar aniqlansa yoki olinsa, BMT Xavfsizlik Kengashining tegishli qo‘mitasiga ko‘rib chiqishga yuborish uchun O‘zbekiston Respublikasi Tashqi ishlar vazirligiga taqdim qilinadi, bunda bu ma’lumotlar O‘zbekiston Respublikasi Milliy xavfsizlik xizmati bilan kelishilgan bo‘lishi lozim.

44. O‘zbekiston Respublikasi Tashqi ishlar vazirligiga yuboriladigan mazkur Nizomning 43-bandida nazarda tutilgan ma’lumotlar o‘z ichiga shaxsni BMT Xavfsizlik Kengashining rezolyutsiyalarida belgilangan, BMT Xavfsizlik Kengashi qo‘mitalarining sanksion ro‘yxatlariga kiritish uchun asos bo‘luvchi mezonlarga to‘g‘ri keladigan imkoni boricha ko‘proq ma’lumotlarni hamda jismoniy va yuridik shaxslarning identifikatsion ma’lumotlarini, shu jumladan BMT Xavfsizlik Kengashi qo‘mitalari tomonidan tasdiqlangan to‘ldirilgan shakllarni o‘z ichiga olishi lozim.

45. Maxsus vakolatli davlat organi tegishli nazorat qiluvchi, litsenziyalovchi va ro‘yxatdan o‘tkazuvchi organlar bilan hamkorlikda pul mablag‘lari yoki boshqa mol-mulk bilan bog‘liq operatsiyalarni amalga oshiruvchi tashkilotlar tomonidan mazkur Nizom talablariga rioya etilishi ustidan monitoring va nazoratni amalga oshiradi.

46. Operatsiyalarni to‘xtatib turish va (yoki) pul mablag‘larini yoki boshqa mol-mulkni ishga solmay to‘xtatib qo‘yish natijasida zarar ko‘rgan jismoniy va yuridik shaxslar, mulkni ishga solmay to‘xtatib qo‘yish qarori qo‘llanilgan shaxsga nisbatan mulkiy zararni qoplash da’vosi bilan sudga murojaat qilishga haqli.

47. Mazkur Nizom talablari buzilishida aybdor bo‘lgan shaxslar qonun hujjatlariga muvofiq javobgar bo‘ladilar.

48. Mazkur Nizom O‘zbekiston Respublikasi Milliy xavfsizlik xizmati, Markaziy banki, Tashqi ishlar vazirligi, Moliya vazirligi, Adliya vazirligi, Ichki ishlar vazirligi, Axborot texnologiyalari va kommunikatsiyalarini rivojlantirish vazirligi, Mudofaa vazirligi, Favqulodda vaziyatlar vazirligi, Tashqi iqtisodiy aloqalar, investitsiyalar va savdo vazirligi, Xususiylashtirish, monopoliyadan chiqarish va raqobatni rivojlantirish davlat qo‘mitasi, Davlat soliq qo‘mitasi, Davlat bojxona qo‘mitasi, Davlat statistika qo‘mitasi, “Sanoatgeokontexnazorat” davlat inspeksiyasi va Davlat raqobat qo‘mitasi huzuridagi Qimmatli qog‘ozlar bozorini muvofiqlashtirish va rivojlantirish markazi bilan kelishilgan.