O‘zbekiston Respublikasining “Jismoniy tarbiya va sport to‘g‘risida”gi Qonuniga muvofiq buyuraman:

1. Sport turi bo‘yicha sportchi, trener va sport hakami kasblariga qo‘yiladigan malaka talablari ilovaga muvofiq tasdiqlansin.

2. Mazkur buyruq rasmiy e’lon qilingan kundan e’tiboran kuchga kiradi.

Mazkur malaka talablari O‘zbekiston Respublikasining “Jismoniy tarbiya va sport to‘g‘risida”gi Qonuniga muvofiq, sport turi bo‘yicha sportchi, trener va sport hakami kasblariga qo‘yiladigan malaka talablarini belgilaydi.

1. Mazkur malaka talablarida quyidagi asosiy tushunchalar qo‘llaniladi:

sportchi — tanlagan sport turi yoki sport turlari bilan muntazam shug‘ullanadigan, doimo o‘zining sport mahoratini oshirib boradigan va sport tadbirlarida qatnashadigan jismoniy shaxs;

trener — sportchilarni tayyorlash hamda ularning musobaqalarga tayyorgarlik ko‘rishini tashkil etish, ularga nazariy va amaliy bilimlarni berish, shuningdek ularni jismoniy jihatdan kamol toptirishni amalga oshiruvchi jismoniy shaxs;

sport hakami — sport turi qoidalariga va sport musobaqasi to‘g‘risidagi nizomga (reglamentga) rioya etilishini ta’minlash uchun vakolat berilgan jismoniy shaxs.

2. Mazkur malaka talablari sportchi, trener va sport hakami kasblarida ishlashga talabgor yoki ishlayotgan shaxslarga nisbatan tatbiq qilinadi.

3. Sport turi bo‘yicha sportchi (terma jamoa a’zosi bo‘lgan sportchi), trener (trener-o‘qituvchi, trener-instruktor, ommaviy sport bo‘yicha trener-seleksioner, terma jamoa treneri, terma jamoa katta treneri, terma jamoa bosh treneri) va sport hakami (musobaqa bosh kotibi va uning o‘rinbosari, musobaqa bosh hakami va uning o‘rinbosari) hamda ushbu lavozimlarga tavsiya etilayotgan nomzodlar quyidagilarni bilishi kerak:

O‘zbekiston Respublikasining Konstitutsiyasini;

jismoniy tarbiya va sport sohasidagi xalqaro hujjatlarni;

jismoniy tarbiya va sport to‘g‘risidagi qonunchilik hujjatlarini;

sport mashg‘uloti va faoliyati uslubiyotini;

pedagogika, psixologiya, sport tibbiyoti, mehnatni muhofaza qilish, tegishli sanitariya normalari, qoidalari va gigiyena normativlari, texnika va yong‘in xavfsizligi qoidalarini.

4. Sport turi bo‘yicha O‘zbekiston Respublikasining sport terma jamoasi a’zosi bo‘ladigan sportchi:

kattalar — “Sport ustaligiga nomzod” toifasi yoki “Xalqaro toifadagi O‘zbekiston sport ustasi” yoxud “O‘zbekiston sport ustasi” sport unvoniga;

yoshlar — kamida birinchi sport razryadiga;

o‘smirlar (Qoraqalpog‘iston Respublikasi, viloyatlar va Toshkent shahri terma jamoalari o‘smirlari ham) — kamida o‘smirlar uchun birinchi sport razryadiga ega bo‘lishi lozim.

5. Sport turi bo‘yicha sportchiga, paralimpiya hamda surdlimpiya, maxsus olimpiya, ko‘zi ojizlar sporti va boshqa adaptiv sport turlari bo‘yicha terma jamoalar sportchilariga malaka talablari qo‘yilmaydi.

6. Quyidagilar sport turi bo‘yicha terma jamoa bosh treneriga qo‘yiladigan malaka talablari hisoblanadi:

jismoniy tarbiya bo‘yicha oliy ma’lumotga ega bo‘lishi;

“Oliy toifali trener” malaka toifasiga ega bo‘lishi;

sport turi bo‘yicha trener-o‘qituvchi lavozimida kamida 3 yillik yoki terma jamoaning katta treneri lavozimida kamida 2 yillik ish stajiga ega bo‘lishi.

7. Quyidagilar sport turi bo‘yicha terma jamoa katta treneriga qo‘yiladigan malaka talablari hisoblanadi:

jismoniy tarbiya bo‘yicha oliy ma’lumotga ega bo‘lishi;

“Oliy toifali trener” malaka toifasiga ega bo‘lishi;

sport turi bo‘yicha trener-o‘qituvchi yoki terma jamoaning treneri lavozimida kamida 2 yillik ish stajiga ega bo‘lishi.

8. Quyidagilar sport turi bo‘yicha terma jamoa treneriga qo‘yiladigan malaka talablari hisoblanadi:

jismoniy tarbiya bo‘yicha oliy ma’lumotga ega bo‘lishi;

“Birinchi toifali trener” malaka toifasiga ega bo‘lishi;

sport turi bo‘yicha trener-o‘qituvchi lavozimida kamida 2 yillik ish stajiga ega bo‘lishi.

9. Sport turi bo‘yicha trener, trener-o‘qituvchi va ommaviy sport bo‘yicha trener-seleksioner jismoniy tarbiya bo‘yicha oliy yoki o‘rta maxsus ma’lumotiga, trener-instruktor esa, jismoniy-tarbiya va sport sohasi bo‘yicha yetarli bilim va amaliy tajribaga ega bo‘lishi lozim. Trener, trener-o‘qituvchi va ommaviy sport bo‘yicha trener-seleksionerlarning jismoniy tarbiya ma’lumotiga ega bo‘lishlari talab etilmaydigan sport turlari ro‘yxatida (ro‘yxat raqami 2559, 2014-yil 5-fevral) belgilangan sport turlari bo‘yicha trener va trener-o‘qituvchilar bundan mustasno.

10. Sport turi bo‘yicha trener-o‘qituvchi, trener-instruktor hamda ommaviy sport bo‘yicha trener-seleksionerlik hamda trener-instruktorlik lavozimiga tavsiya etilayotgan nomzodlarga ish stajiga ega bo‘lish talab etilmaydi.

11. Quyidagilar sport turi bo‘yicha musobaqa bosh hakamiga qo‘yiladigan malaka talablari hisoblanadi:

sport turi bo‘yicha professional mahoratga ega bo‘lishi;

“Xalqaro toifali sport hakami” yoki “Milliy toifali sport hakami” yoxud “Birinchi toifali sport hakami” malaka toifasiga ega bo‘lishi;

kamida 5 ta musobaqada sport hakami sifatida ishtirok etgan bo‘lishi.

12. Quyidagilar sport turi bo‘yicha musobaqa bosh hakami o‘rinbosariga qo‘yiladigan malaka talablari hisoblanadi:

sport turi bo‘yicha professional mahoratga ega bo‘lishi;

“Xalqaro toifali sport hakami” yoki “Milliy toifali sport hakami” yoxud “Birinchi toifali sport hakami” malaka toifasiga ega bo‘lishi;

kamida 5 ta musobaqada hakam sifatida ishtirok etgan bo‘lishi.

13. Quyidagilar sport turi bo‘yicha musobaqa bosh kotibiga qo‘yiladigan malaka talablari hisoblanadi:

sport turi bo‘yicha professional mahoratga ega bo‘lishi;

“Xalqaro toifali sport hakami” yoki “Milliy toifali sport hakami” yoxud “Birinchi toifali sport hakami” malaka toifasiga ega bo‘lishi;

kamida 3 ta musobaqada hakam sifatida ishtirok etgan bo‘lishi.

14. Quyidagilar sport turi bo‘yicha musobaqa bosh kotibi o‘rinbosariga qo‘yiladigan malaka talablari hisoblanadi:

sport turi bo‘yicha professional mahoratga ega bo‘lishi;

“Xalqaro toifali sport hakami” yoki “Milliy toifali sport hakami” yoxud “Birinchi toifali sport hakami” malaka toifasiga ega bo‘lishi;

kamida 2 ta musobaqada hakam sifatida ishtirok etgan bo‘lishi.

15. Quyidagilar sport turi bo‘yicha sport hakamiga qo‘yiladigan malaka talablari hisoblanadi:

sport turi bo‘yicha professional mahoratga ega bo‘lishi;

O‘zbekiston Respublikasi Vazirlar Mahkamasining 2025-yil 7-avgustdagi 500-son qarori bilan tasdiqlangan Sport hakamlariga malaka toifalarini berish tartibi to‘g‘risidagi nizomga muvofiq sport turlari bo‘yicha sport hakamlariga beriladigan malaka toifalaridan biriga ega bo‘lishi lozim.

16. Sport turi bo‘yicha sport hakami lavozimiga tavsiya etilayotgan nomzodlarga ish stajiga ega bo‘lish talab etilmaydi.

17. Mazkur malaka talablarining buzilishida aybdor bo‘lgan shaxslar qonunchilik hujjatlarida belgilangan tartibda javobgarlikka tortiladi.

18. Mazkur malaka talablari O‘zbekiston Respublikasi Xalq ta’limi vazirligi, O‘zbekiston kasaba uyushmalari Federatsiyasi Kengashi va O‘zbekiston Mudofaasiga ko‘maklashuvchi “Vatanparvar” tashkiloti Markaziy Kengashi bilan kelishilgan.