O‘zbekiston Respublikasi Prezidentining 2018-yil 13-apreldagi PQ-3666-son “O‘zbekiston Respublikasi Adliya vazirligi faoliyatini yanada takomillashtirishga doir tashkiliy chora-tadbirlar to‘g‘risida”gi qaroriga muvofiq hamda davlat boshqaruvi va mahalliy davlat hokimiyati organlarida normativ-huquqiy hujjatlar matnlaridan keng foydalanishni ta’minlash, shuningdek axborot-kommunikatsiya texnologiyalarining zamonaviy vositalaridan foydalanish va qonun hujjatlarining turkumlashtirilgan hisobini yuritishni soddalashtirish maqsadida buyuraman:

1. Davlat boshqaruvi organlari va mahalliy davlat hokimiyati organlarida qonun hujjatlarining turkumlashtirilgan hisobini yuritish qoidalari ilovaga muvofiq tasdiqlansin.

2. Belgilansinki, O‘zbekiston Respublikasi qonunchilik tarmoqlarining Umumhuquqiy klassifikatori asosida barcha normativ-huquqiy hujjatlarga kodlar berish hamda qonun hujjatlarini hisobga olish va turkumlash kartotekasini yuritish O‘zbekiston Respublikasi Adliya vazirligi tomonidan markazlashtirilgan tartibda amalga oshiriladi.

3. Quyidagilar o‘z kuchini yo‘qotgan deb hisoblansin:

O‘zbekiston Respublikasi adliya vazirining 2007-yil 14-iyundagi 112-mh-son “Davlat boshqaruvi organlari va mahalliy davlat hokimiyati organlarida qonun hujjatlarining turkumlashtirilgan hisobini yuritish qoidalarini tasdiqlash to‘g‘risida”gi buyrug‘i (ro‘yxat raqami 1689, 2007-yil 14-iyun) (O‘zbekiston Respublikasi qonun hujjatlari to‘plami, 2007-y., 24-son, 256-modda);

O‘zbekiston Respublikasi adliya vazirining 2011-yil 3-oktabrdagi 226-mh-son “Davlat boshqaruvi organlari va mahalliy davlat hokimiyati organlarida qonun hujjatlarining turkumlashtirilgan hisobini yuritish qoidalarini tasdiqlash to‘g‘risida”gi buyruqqa o‘zgartirishlar kiritish haqida”gi buyrug‘i (ro‘yxat raqami 1689-1, 2011-yil 3-oktabr) (O‘zbekiston Respublikasi qonun hujjatlari to‘plami, 2011-y., 40-son, 436-modda).

4. Mazkur buyruq davlat ro‘yxatidan o‘tkazilsin va Idoraviy me’yoriy hujjatlarni davlat ro‘yxatidan o‘tkazish boshqarmasi (B. Boliyev) O‘zbekiston Respublikasi vazirliklari, davlat qo‘mitalari va idoralari normativ-huquqiy hujjatlarining Davlat reyestriga tegishli yozuv kiritsin.

5. Qonun hujjatlarini turkumlash va huquqiy axborot boshqarmasi (S. Nuriyev) ushbu normativ-huquqiy hujjatning manfaatdor shaxslar e’tiboriga yetkazilishini va “O‘zbekiston Respublikasi qonun hujjatlari to‘plami” — “Sobraniye zakonodatelstva Respubliki Uzbekistan”da nashr etilishini ta’minlasin.

6. Qonun hujjatlarini turkumlash va huquqiy axborot boshqarmasi (S. Nuriyev) Huquqiy axborot bilan ta’minlash markazi (Sh. Yaminov) bilan birgalikda davlat boshqaruvi va mahalliy davlat hokimiyati organlari tomonidan Qonun hujjatlari ma’lumotlari milliy bazasidan foydalanilishi yuzasidan doimiy monitoring olib borsin.

7. Mazkur buyruq davlat ro‘yxatidan o‘tkazilgan kundan boshlab o‘n kun o‘tgandan keyin kuchga kiradi.

8. Mazkur buyruqning ijrosini nazorat qilish vazirning birinchi o‘rinbosari E. Kanyazov zimmasiga yuklatilsin.

Mazkur Qoidalar O‘zbekiston Respublikasi Prezidentining 2018-yil 13-apreldagi PQ-3666-son “O‘zbekiston Respublikasi Adliya vazirligi faoliyatini yanada takomillashtirishga doir tashkiliy chora-tadbirlar to‘g‘risida”gi qaroriga muvofiq vazirliklar, davlat qo‘mitalari va idoralar hamda ularning tarkibiy va hududiy tuzilmalarida (keyingi o‘rinlarda matnda davlat boshqaruvi organlari deb yuritiladi), shuningdek mahalliy davlat hokimiyati organlarida qonun hujjatlarining turkumlashtirilgan hisobini yuritish tartibini belgilaydi.

Boshqa organlarga qonun hujjatlarining turkumlashtirilgan hisobini yuritishda mazkur Qoidalar talablaridan foydalanish tavsiya etiladi.

1. Qonun hujjatlarining turkumlashtirilgan hisobini yuritish — ularni markazlashtirilgan tartibda yig‘ish, mazkur Qoidalarning 1-ilovasidagi Qonun hujjatlarining rasmiy davriy nashrlarini hisobga olish jurnalida (keyingi o‘rinlarda matnda Jurnal deb yuritiladi) hisobga olish hamda nazorat nusxalarini olib borishdan iborat.

2. Davlat boshqaruvi organlarida O‘zbekiston Respublikasining Konstitutsiyasi va bevosita ushbu tashkilotlar faoliyatiga tegishli sohadagi munosabatlarni tartibga soluvchi normativ-huquqiy hujjatlarning turkumlashtirilgan hisobi yuritiladi.

Davlat boshqaruvi organlarining tarkibiy va hududiy bo‘linmalarida normativ-huquqiy hujjatlarning turkumlashtirilgan hisobini yuritish ixtiyoriy bo‘lib, tegishli davlat boshqaruvi organi rahbarining qaroriga muvofiq amalga oshiriladi.

3. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarida O‘zbekiston Respublikasining Konstitutsiyasi hamda quyidagi sohalarga oid normativ-huquqiy hujjatlarning turkumlashtirilgan hisobi yuritiladi:

davlat ramzlari, poytaxt, davlat mukofotlari, faxriy unvonlar;

ma’muriy-hududiy tuzilish;

referendumlar, saylov tizimi;

yoshlarga doir siyosat;

mahalliy davlat hokimiyati;

fuqarolarning o‘zini o‘zi boshqarish organlari;

qonunchilik tashabbusi, norma ijodkorligi faoliyati;

jismoniy va yuridik shaxslarning murojaatlari;

nikoh va oila, fuqarolik holati dalolatnomalari;

mehnat, aholi bandligi, ijtimoiy sug‘urta, ijtimoiy ta’minot;

sog‘liqni saqlash, sanitariyaga oid qonun hujjatlari;

ta’lim;

uy-joy qonunchiligi, kommunal xizmat;

atrof-tabiiy muhitni muhofaza qilish;

qishloq xo‘jaligi (Toshkent shahar hokimligidan tashqari);

savdo va xizmat ko‘rsatish, transport, yo‘l xo‘jaligi;

soliq va boshqa majburiy to‘lovlar;

davlat budjeti va budjetdan tashqari jamg‘armalar;

buxgalteriya hisobi;

davlat tasarrufidan chiqarish va xususiylashtirish;

tadbirkorlik faoliyatini davlat tomonidan qo‘llab-quvvatlash;

terrorizm va diniy ekstremizm bilan kurash;

fuqarolik muhofazasi.

Mazkur bandda ko‘rsatilgan normativ-huquqiy hujjatlardan tashqari, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarida ularning o‘zlari tomonidan qabul qilingan qarorlarning, shuningdek tegishincha Qoraqalpog‘iston Respublikasi Jo‘qorg‘i Kengesi, viloyatlar va Toshkent shahar xalq deputatlari kengashlari qarorlarining turkumlashtirilgan hisobi yuritiladi.

4. Tuman (shahar) hokimliklarida tegishincha tuman (shahar) hokimining, tuman (shahar) xalq deputatlari Kengashining, Qoraqalpog‘iston Respublikasi Jo‘qorg‘i Kengesining va Vazirlar Kengashining, viloyat, Toshkent shahar hokimining hamda viloyat, Toshkent shahar xalq deputatlari Kengashi qarorlarining turkumlashtirilgan hisobi yuritiladi.

6. Qonun hujjatlarining turkumlashtirilgan hisobini yuritish vazifasi yuridik xizmat xodimiga (yuriskonsultga) yuklatiladi. Uning yo‘qligida ushbu vazifa davlat boshqaruvi organi yoki mahalliy davlat hokimiyati organi rahbari tomonidan boshqa shaxsga yuklatiladi.

O‘zbekiston Respublikasi qonunchilik tarmoqlarining Umumhuquqiy klassifikatori asosida barcha normativ-huquqiy hujjatlarga kodlar berish hamda qonun hujjatlarini hisobga olish va turkumlash kartotekasini yuritish O‘zbekiston Respublikasi Adliya vazirligi tomonidan markazlashtirilgan tartibda amalga oshiriladi.

7. Qonun hujjatlarining turkumlashtirilgan hisobini yuritish maqsadida davlat boshqaruvi organlari va mahalliy davlat hokimiyati organlariga kelib tushgan qonun hujjatlarining rasmiy davriy nashri (keyingi o‘rinlarda — rasmiy nashrlar) to‘g‘risidagi ma’lumotlar mazkur Qoidalarning 6-bandida ko‘rsatilgan xodimlar tomonidan Jurnalga kiritiladi.

8. Jurnalga rasmiy nashr to‘g‘risidagi quyidagi ma’lumotlar kiritiladi:

tartib raqami;

ro‘yxatga olish sanasi;

rasmiy nashrning nomi;

rasmiy nashrning chop etilgan yili;

rasmiy nashrning soni;

rasmiy nashrning bahosi;

izoh.

9. Qonun hujjatining nazorat nusxasi bo‘lib, shu hujjatga kiritilgan barcha o‘zgartish va qo‘shimchalar, hujjatning to‘liq yoki qisman o‘z kuchini yo‘qotgan deb hisoblanganligi, hujjatning to‘liq yoki qisman amal qilish muddatini uzaytirish yoxud amal qilishini to‘xtatib turish haqidagi ma’lumotlar kiritilgan nusxasi hisoblanadi.

10. Ilgari qabul qilingan normativ-huquqiy hujjat yoki uning bo‘limi, kichik bo‘limi, bobi, paragrafi, moddasi, qismi, bandi, kichik bandi, xatboshisi (keyingi o‘rinlarda matnda tuzilmaviy birliklari deb yuritiladi) o‘z kuchini yo‘qotgan deb hisoblanganda yoki yangi tahrirda qabul qilinganda, so‘nggi qabul qilingan normativ-huquqiy hujjatdagi normaga muvofiq, normativ-huquqiy hujjatning nazorat nusxasiga ushbu hujjat nomining yoki tegishli tuzilmaviy birliklarining chap tomoniga “x” belgisi qo‘yiladi, matn egri chiziq bilan o‘chiriladi hamda shu normaning mazmunini yorituvchi yozuv, so‘nggi hujjatning turi, qabul qilingan sanasi, raqami va e’lon qilingan manbasi aks ettiriladi (2-ilova).

11. Ilgari qabul qilingan normativ-huquqiy hujjat tuzilmaviy birliklarining alohida jumlalari, so‘zlari, raqamlari almashtirilganda yoki chiqarib tashlanganda, so‘nggi qabul qilingan normativ-huquqiy hujjatdagi normaga muvofiq, normativ-huquqiy hujjat nazorat nusxasidagi tegishli jumlalar, so‘zlar va raqamlar “” (almashtirilganda) yoki “” (chiqarib tashlanganda) shaklidagi gorizontal to‘g‘ri chiziq bilan o‘chiriladi hamda shu normaning mazmunini yorituvchi yozuv, so‘nggi hujjatning turi, qabul qilingan sanasi, raqami va e’lon qilingan manbasi aks ettiriladi (3-ilova).

12. Ilgari qabul qilingan normativ-huquqiy hujjatga qo‘shimchalar kiritilganda, so‘nggi qabul qilingan normativ-huquqiy hujjatdagi normaga muvofiq, normativ-huquqiy hujjat nazorat nusxasining tegishli tuzilmaviy birliklariga “” belgisi qo‘yiladi, shu normaning mazmunini yorituvchi yozuv hamda so‘nggi hujjatning turi, qabul qilingan sanasi, raqami va e’lon qilingan manbasi aks ettiriladi (4-ilova).

13. Normativ-huquqiy hujjat to‘liq yoki uning tuzilmaviy birliklarining amal qilish muddati uzaytirilganda, yoxud amal qilishi to‘xtatib turilganda, so‘nggi qabul qilingan normativ-huquqiy hujjatdagi normaga muvofiq, normativ-huquqiy hujjat nazorat nusxasi tegishli tuzilmaviy birliklarining chap tomoniga “x” belgisi qo‘yiladi, shu normaning mazmunini yorituvchi yozuv, so‘nggi hujjatning turi, qabul qilingan sanasi, raqami, e’lon qilingan manbasi hamda hujjatning amal qilishi uzaytirilganligi yoki to‘xtatib turilganligi muddati aks ettiriladi (5-ilova).

14. Nazorat nusxalardagi yozuvlar faqat havo rangdagi sharikli ruchka bilan tushunarli yozuvda kiritilishi kerak. Agar yozuv butun hujjatga taalluqli bo‘lsa, belgi normativ-huquqiy hujjat nomining chap tomoniga qo‘yiladi. Agarda yozuv normativ-huquqiy hujjatning tuzilmaviy birliklariga taalluqli bo‘lsa u holda belgi tegishli tuzilmaviy birliklarning chap tomoniga qo‘yiladi.

15. Davlat boshqaruvi organlarida va mahalliy davlat hokimiyati organlarida normativ-huquqiy hujjatlarning nazorat nusxalari ular qabul qilingan tillarda yuritilishi shart.

Normativ-huquqiy hujjatlarning nazorat nusxalariga o‘zgartish va qo‘shimchalar aks ettirilgan matn yopishtiriladi (normativ-huquqiy hujjat yoki uning tuzilmaviy birliklari o‘z kuchini yo‘qotgan deb hisoblangan yoxud alohida raqamlar, so‘zlar, jumlalar, grafalar, bloklar va pozitsiyalar chiqarib tashlangan, shuningdek normativ-huquqiy hujjat yangi tahrirda qabul qilingan hollar bundan mustasno).

16. Rasmiy nashrlar qat’iy hisobga olinishi, saqlanishi va har 5 yilda kamida bir marta xatlovdan (inventarizatsiyadan) o‘tkazilishi zarur.

Rasmiy nashrlar yil bo‘yicha xronologik tartibda yig‘iladi va muqovalanadi.

Rasmiy nashrlar har bir nusxasining birinchi va o‘n yettinchi sahifalariga tamg‘a (shtamp) va inventar raqami qo‘yiladi.

17. Rasmiy nashrlar ushbu Qoidalarning 6-bandida ko‘rsatilgan xodimlar tomonidan saqlanadi. Bu xodimlar moddiy javobgar shaxs hisoblanadi va ular bilan to‘liq moddiy javobgarlik to‘g‘risida shartnoma tuziladi.

Yuqorida ko‘rsatilgan xodimlar o‘zgarganda qonun hujjatlari topshirish-qabul qilish dalolatnomasi asosida topshiriladi.

18. Ushbu Qoidalarning bajarilishi ustidan nazorat O‘zbekiston Respublikasi Prezidentining 2018-yil 13-apreldagi PQ-3666-sonli qaroriga muvofiq O‘zbekiston Respublikasi Adliya vazirligi hamda uning hududiy boshqarmalari tomonidan amalga oshiriladi.

19. O‘zbekiston Respublikasi Vazirlar Mahkamasining 2009-yil 31-dekabrdagi 340-son “O‘zbekiston Respublikasi Qonun hujjatlari ma’lumotlari milliy bazasidan keng foydalanishni ta’minlash chora-tadbirlari to‘g‘risida”gi qarorining 5-bandiga muvofiq, O‘zbekiston Respublikasi Adliya vazirligi davlat boshqaruvi organlari va mahalliy davlat hokimiyati organlari tomonidan Qonun hujjatlari ma’lumotlari milliy bazasidan foydalanilishi yuzasidan doimiy ravishda monitoring olib boradi.

20. Mazkur Qoidalar talablarini buzganlikda aybdor bo‘lgan shaxslar qonun hujjatlariga muvofiq javobgar bo‘ladi.