Oʻzbekiston Respublikasi Prezidentining “Geologiya-qidiruv ishlarini tashkil etish va olib borish tizimi samaradorligini yanada oshirish chora-tadbirlari toʻgʻrisida” 2010-yil 27-avgustdagi PQ-1396-son qaroriga muvofiq hamda Oʻzbekiston Respublikasi Vazirlar Mahkamasi huzuridagi Yer qaʼrini geologik oʻrganish, sanoatda, konchilikda va kommunal-maishiy sektorda ishlarning bexatar olib borilishini nazorat qilish davlat inspeksiyasi tuzilmasini yanada takomillashtirish maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Vazirlar Mahkamasi huzuridagi Yer qaʼrini geologik oʻrganish, sanoatda, konchilikda va kommunal-maishiy sektorda ishlarning bexatar olib borilishini nazorat qilish davlat inspeksiyasining tashkiliy tuzilmasi, uning markaziy apparatining xodimlarning cheklangan umumiy soni 29 nafar, shu jumladan boshqaruv xodimlari 22 nafar boʻlgan tuzilmasi 1 va 2-ilovalarga muvofiq;

Oʻzbekiston Respublikasi Vazirlar Mahkamasi huzuridagi Yer qaʼrini geologik oʻrganish, sanoatda, konchilikda va kommunal-maishiy sektorda ishlarning bexatar olib borilishini nazorat qilish davlat inspeksiyasi (keyingi oʻrinlarda “Sanoatgeokontexnazorat” davlat inspeksiyasi deb ataladi) toʻgʻrisidagi nizom 3-ilovaga muvofiq tasdiqlansin.

2. Oʻzbekiston Respublikasi Davlat geologiya qoʻmitasi Yer qaʼrini geologik oʻrganish davlat nazorati boshqarmasining arxiv hujjatlarini va mol-mulkini “Sanoatgeokontexnazorat” davlat inspeksiyasi balansiga belgilangan tartibda tekin bersin.

3. Oʻzbekiston Respublikasi Hukumatining 4-ilovaga muvofiq ayrim qarorlariga oʻzgartirishlar kiritilsin.

4. “Sanoatgeokontexnazorat” davlat inspeksiyasi bir oy muddatda Oʻzbekiston Respublikasi Davlat geologiya qoʻmitasi, Adliya vazirligi hamda boshqa vazirliklar va idoralar bilan birgalikda idoraviy normativ-huquqiy hujjatlarni belgilangan tartibda ushbu qarorga muvofiqlashtirsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Oʻ.I. Ibragimov zimmasiga yuklansin.

1. Oʻzbekiston Respublikasi Vazirlar Mahkamasi huzuridagi Yer qaʼrini geologik oʻrganish, sanoatda, konchilikda va kommunal-maishiy sektorda ishlarning bexatar olib borilishini nazorat qilish davlat inspeksiyasi (keyingi oʻrinlarda “Sanoatgeokontexnazorat” davlat inspeksiyasi deb ataladi) sanoat va radiatsiya xavfsizligi, kon munosabatlari sohasidagi, respublika hududidagi barcha yuridik va jismoniy shaxslarning sanoat va radiatsiya xavfsizligi, yer qaʼridan foydalanish va ularni muhofaza qilishga doir qonun hujjatlari va normativ-texnik hujjatlar talablariga rioya etishlari yuzasidan davlat nazoratini, shuningdek davlat tomonidan tartibga solish boʻyicha boshqa chora-tadbirlarni amalga oshiruvchi maxsus vakolatli davlat boshqaruvi organi hisoblanadi.

“Sanoatgeokontexnazorat” davlat inspeksiyasi oʻz faoliyati toʻgʻrisida Oʻzbekiston Respublikasi Vazirlar Mahkamasiga hisobot beradi.

2. “Sanoatgeokontexnazorat” davlat inspeksiyasi, uning tarmoq va mintaqaviy inspeksiyalari Oʻzbekiston Respublikasining sanoat xavfsizligi sohasidagi davlat boshqaruvi organlarining yagona tizimini tashkil etadi.

Mintaqaviy inspeksiyalar mahalliy davlat hokimiyati organlaridan mustaqil hisoblanadi va bevosita “Sanoatgeokontexnazorat” davlat inspeksiyasiga boʻysunadi.

3. “Sanoatgeokontexnazorat” davlat inspeksiyasi oʻz faoliyatida Oʻzbekiston Respublikasi Konstitutsiyasiga va Oʻzbekiston Respublikasi qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, ushbu Nizomga hamda boshqa normativ-huquqiy hujjatlarga amal qiladi.

4. “Sanoatgeokontexnazorat” davlat inspeksiyasining sanoat va radiatsiya xavfsizligi, kon munosabatlari, yer qaʼridan foydalanish va ularni muhofaza qilish masalalari boʻyicha oʻz vakolati doirasida qabul qilgan qarorlari vazirliklar, davlat qoʻmitalari, idoralar, xoʻjalik boshqaruvi organlari, mahalliy davlat hokimiyati organlari, boshqa tashkilotlar tomonidan bajarilishi majburiydir.

5. “Sanoatgeokontexnazorat” davlat inspeksiyasi oʻz faoliyatini vazirliklar, davlat qoʻmitalari, idoralar, xoʻjalik boshqaruvi organlari, mahalliy davlat hokimiyati organlari, boshqa tashkilotlar bilan oʻzaro hamkorlikda amalga oshiradi, xalqaro bitimlar asosida boshqa davlatlarning davlat nazorat organlari bilan oʻzaro ish olib boradi va hamkorlik qiladi.

6. “Sanoatgeokontexnazorat” davlat inspeksiyasi, uning tarmoq va mintaqaviy inspeksiyalari faoliyatini moliyalashtirish “Sanoatgeokontexnazorat” davlat inspeksiyasiga budjetdan ajratiladigan mablagʻlar doirasida Oʻzbekiston Respublikasi Davlat budjeti mablagʻlari, xizmat koʻrsatiladigan korxonalar, “Sanoatgeokontexnazorat” davlat inspeksiyasiga idoraviy mansub tashkilotlarning oʻz faoliyatidan olingan daromadlari, “Sanoatgeokontexnazorat” davlat inspeksiyasining budjetdan tashqari jamgʻarmasi mablagʻlari, shuningdek qonun hujjatlarida taqiqlanmagan boshqa manbalar hisobiga amalga oshiriladi.

7. “Sanoatgeokontexnazorat” davlat inspeksiyasi va unga idoraviy mansub tashkilotlar yuridik shaxslar hisoblanadi, Oʻzbekiston Respublikasi Davlat gerbi tasviri tushirilgan va oʻz nomi yozilgan muhrga ega boʻladi.

8. Quyidagilar “Sanoatgeokontexnazorat” davlat inspeksiyasining asosiy vazifalari hisoblanadi:

yuridik va jismoniy shaxslarning sanoat va radiatsiya xavfsizligi, gaz taʼminoti, yer qaʼrini geologik oʻrganishda yer osti boyliklaridan foydalanish va ularni muhofaza qilish, foydali qazilmalarni qazib olish, mineral xomashyoni qayta ishlash, shuningdek kon ishlarini geologiya-marksheyderlik xizmati bilan taʼminlash sohasidagi qonun hujjatlari va normativ-texnik hujjatlar talablariga rioya qilishlari yuzasidan davlat nazoratini amalga oshirish;

sanoat va radiatsiya xavfsizligi, shuningdek kon nazorati sohasida oldini olish chora-tadbirlarini ishlab chiqish va amalga oshirish;

gaz xoʻjaligi tizimida hamda koʻp kvartirali turar joylar va respublika kommunal-maishiy obyektlarining gaz taʼminotida xavfsizlik taʼminlanishini nazorat qilish;

“Sanoatgeokontexnazorat” davlat inspeksiyasi vakolatiga kiruvchi masalalar boʻyicha normativ-huquqiy va normativ-texnik hujjatlarni ishlab chiqish va belgilangan tartibda qabul qilish;

sanoat xavfsizligi ekspertizasi, sanoat xavfsizligi sohasida faoliyat koʻrsatuvchi mutaxassislarni tayyorlash va qayta tayyorlash tizimlarini joriy etish hamda ularning faoliyati va rivojlantirilishini taʼminlash.

9. “Sanoatgeokontexnazorat” davlat inspeksiyasi oʻziga yuklangan vazifalarni bajarish doirasida quyidagi funksiyalarni amalga oshiradi:

a) nazorat-profilaktika faoliyati sohasida:

vazirliklar, davlat qoʻmitalari, idoralar bilan kelishgan holda ishlab chiqarishlar (texnologiyalar), obyektlar, asbob-uskunalar hamda potensial xavfli ishlab chiqarishlar va texnologiya obyektlariga ega boʻlgan xoʻjalik yurituvchi subyektlar roʻyxatini belgilaydi va tasdiqlaydi;

geologiya-qidiruv ishlarini olib borishda va kon ishlarini geologiya-marksheyderlik xizmatlari bilan taʼminlashda qonun hujjatlariga rioya etilishini nazorat qiladi;

Oʻzbekiston Respublikasi Moliya vazirligining Nazorat-taftish boshqarmasi mutaxassislarini, korxonalar va ilmiy muassasalarning soha boʻyicha ekspertlarini jalb etgan holda geologiya-qidiruv ishlari hajmi, sifati va ushbu ishlar natijalarining haqqoniyligini belgilangan tartibda mustaqil tekshirishlarni amalga oshiradi;

foydalanish uchun litsenziya berilgan yer qaʼri uchastkalarida dastlabki tekshirish oʻtkazadi, shuningdek keyinchalik foydali qazilmalar qazib olishning kelishilgan hajmlariga va konlardan foydalanish tartibiga rioya etilishini nazorat qiladi;

Oʻzbekiston Respublikasi Vazirlar Mahkamasi huzuridagi Foydali qazilmalar zaxiralari boʻyicha davlat komissiyasi tomonidan zaxiralarni tasdiqlashda qabul qilingan qarorlar va xulosalarning yer qaʼridan foydalanuvchilar tomonidan bajarilishini nazorat qiladi;

mineral xomashyoni qazib olishda va qayta ishlashda foydali qazilmalarning normativdan ortiqcha yoʻl qoʻyilgan yoʻqotishlarini aniqlaydi;

korxonalar, harbiylashtirilgan kon-qutqarish qismi, kon favvoralariga qarshi kurashish boʻlinmalari, gazdan qutqarish va avariya-dispetcherlik xizmatlarining sodir boʻlish ehtimoli boʻlgan avariyalarning tarqalishiga yoʻl qoʻymaslik hamda ularning oqibatlarini tugatishga tayyorligini nazorat qiladi, shuningdek koʻrsatib oʻtilgan boʻlinmalarni joylashtirish sxemalarini kelishib oladi;

Oʻzbekiston Respublikasining harbiylashtirilgan kon-qutqarish qismiga tezkor va metodik rahbarlikni amalga oshiradi;

iqtisodiyotning tegishli tarmoqlarida sanoat va radiatsiya xavfsizligini taʼminlash tizimini takomillashtirish boʻyicha takliflar tayyorlaydi;

xavfli ishlab chiqarish obyektlarining sanoat xavfsizligi ekspertizasini tashkil etadi;

turar joylar va kommunal-maishiy obyektlarning gaz xoʻjaligi tizimida sanoat xavfsizligini taʼminlash sohasida kommunal-maishiy korxonalar xizmatlari tomonidan normativ-huquqiy va normativ-texnik hujjatlarning bajarilishini tekshiradi va monitoringini olib boradi;

oʻz nazoratidagi korxonalar va obyektlarni foydalanishga qabul qilish davlat komissiyalari tarkibida qatnashish uchun vakillarni tayinlaydi, ushbu obyektlarda foydalanish uchun qabul qilish qoidalariga rioya etilishini nazorat qiladi;

oʻz vakolatlari doirasida respublika darajasida ionlovchi nurlanish manbalarining davlat tomonidan hisobga olish va nazorat qilishni, milliy reyestri yuritilishini taʼminlaydi;

xavfli ishlab chiqarish obyektlarining davlat reyestrida xavfli ishlab chiqarish obyektlari hisobini yuritadi;

yuqori texnogen xavfli hududlarning davlat kadastri yuritilishini muvofiqlashtiradi;

xavfli ishlab chiqarish obyektidan foydalanishga, nazoratdagi obyektlarda avariyalar va ishlab chiqarishda jarohatlanishning oldini olish boʻyicha tadbirlarni ishlab chiqish va amalga oshirishga tashkilotlarning tayyorligini nazorat qiladi;

sanoat xavfsizligi deklaratsiyalarini ishlab chiqish va taqdim etishning toʻgʻriligi monitoringini amalga oshiradi;

ishlayotgan va qurilayotgan xavfli ishlab chiqarish obyektlari sanoat xavfsizligining deklaratsiya etilishini nazorat qiladi;

gaz nazorati obyektlarini, bosim ostida ishlovchi bugʻ va suv isitish qozonlarini, idishlarni, bugʻ va issiq suv quvurlarini va koʻtarish inshootlarini roʻyxatdan oʻtkazadi;

avariyalar va ishlab chiqarishda jarohatlanishlarning oldini olish maqsadida sanoat, radiatsiya xavfsizligi va yer qaʼri boyliklarini muhofaza qilish talablarini targʻib qiladi;

sanoat va radiatsiya xavfsizligi, yer qaʼridan foydalanish va ularni muhofaza qilish, sanoat xavfsizligi sohasidagi ekspert tashkilotlarini akkreditatsiya qilish hamda “Sanoatgeokontexnazorat” davlat inspeksiyasi vakolatiga kiruvchi boshqa masalalar boʻyicha normativ-huquqiy va normativ-texnik hujjatlarni ishlab chiqadi va belgilangan tartibda qabul qiladi;

sanoatda ishlarni bexatar olib borish, asbob-uskunalarni loyihalash, tayyorlash, qurish va ishlatish, yer qaʼrini geologik oʻrganishda ulardan foydalanish va ularni muhofaza qilish, foydali qazilmalarni qazib olish va mineral xomashyoni qayta ishlash boʻyicha talablardan iborat boʻlgan davlat standartlari hamda boshqa normativ hujjatlar loyihalarini koʻrib chiqadi va belgilangan tartibda kelishib oladi, shuningdek ushbu masalalar boʻyicha qoida va normalarni tasdiqlaydi;

foydali qazilmalar konlarini qazib oluvchi korxonalar va obyektlarni tugatish va konservatsiya qilishda yer qaʼri boyliklaridan foydalanuvchilar tomonidan bajarilishi kerak boʻlgan texnik talablarni belgilaydi (ishlarning xavfsizligi, foydali qazilmalar konlarini ishga tushirishda yer qaʼri boyliklarini muhofaza qilish hamda iqtisodiyot tarmoqlarida foydalanishga yaroqli boʻlgan kon mahsulotlarini saqlash qismi boʻyicha);

oʻz vakolatlari doirasida faoliyatning ayrim turlariga litsenziyalar beradi;

“Sanoatgeokontexnazorat” davlat inspeksiyasi vakolatlariga kiruvchi alohida ish turlariga belgilangan tartibda ruxsatnomalar beradi va ularni bekor qiladi;

foydali qazilmalar konlarini qazib olish uchun, shuningdek foydali qazilmalar qazib olish bilan bogʻliq boʻlmagan yer osti inshootlari qurilishi va ulardan foydalanish uchun kon ajratish dalolatnomalarini beradi;

qazib olish jarayonida qazib olingan va yoʻqotilgan foydali qazilmalar zaxiralarini qazib olish korxonalari hisobidan chiqarishni kelishib oladi;

geologiya-qidiruv ishlari loyihalarini, kon qazuvchi va qayta ishlovchi korxonalarning texnik loyihalarini, foydali qazilmalarni qidirish va qazib olishda ishlarni bexatar olib borish yuzasidan texnik yechimlarga doir kon ishlari rejalarini, mineral xomashyoni qazib olish va qayta ishlashda foydali qazilmalarning kamayishi va maydalashuvi normativlarini kelishib oladi;

shaxtalar (konlar)ning bir toifadan boshqa toifaga oʻtkazilishini tasdiqlaydi va kelishib oladi;

neft-gaz quduqlarini foydalanishga, tugatishga va konservatsiyaga berish dalolatnomalarini kelishib oladi;

ishlarning ayrim masʼuliyatli texnologik bosqichlarini, texnologik reglamentlarni va boshqalarni olib borish ish rejalarini kelishib oladi;

nazoratdagi obyektlarda sanoat xavfsizligi va yer qaʼrini muhofaza qilish boʻyicha xorijiy texnologiyalar va asbob-uskunalarni qoʻllanish toʻgʻrisidagi ekspertiza xulosasini koʻrib chiqadi va tasdiqlaydi;

sanoat xavfsizligi sohasidagi ekspertiza tashkilotlarini belgilangan tartibda akkreditatsiya qiladi va ularning faoliyatini muvofiqlashtiradi;

xavfli yuklar va portlovchi moddalarni tranzit tashishda qonun hujjatlariga muvofiq xulosalar beradi va ularning nazoratini amalga oshiradi.

sanoat va radiatsiya xavfsizligi, yer qaʼrini geologik oʻrganish, ulardan foydalanish va ularni muhofaza qilish masalalari boʻyicha ilmiy tadqiqotlar hamda mutaxassislar tayyorlash dasturlarini shakllantirishda va kelishib olishda qatnashadi;

sanoat va radiatsiya xavfsizligi hamda yer qaʼrini muhofaza qilish sohasida xavfli ishlab chiqarish obyektlari xodimlarini tayyorlash va attestatsiyadan oʻtkazish (bilimlarini tekshirish) tartibini belgilaydi;

sanoatda ishlarni bexatar olib borishni nazorat qilish, kon nazorati, atom energetikasi va ilmiy tadqiqotlar sohasida xalqaro hamkorlikni amalga oshiradi, “Sanoatgeokontexnazorat” davlat inspeksiyasi vakolatiga kiruvchi masalalar boʻyicha xalqaro tashkilotlar, boshqa mamlakatlarning tegishli nazorat organlari bilan belgilangan tartibda aloqa oʻrnatadi;

atom energiyasidan tinchlik maqsadida foydalanish sohasidagi xalqaro shartnomalar boʻyicha Oʻzbekiston Respublikasi majburiyatlarining bajarilishini taʼminlaydi.

10. Davlat inspeksiyasi:

koʻmir, kon-ruda va noruda, kimyo, metallurgiya, neft va gaz qazib olish, neft va gazni qayta ishlash sanoatida, geologiya-qidiruv ishlarida, magistral neft-gaz va ularni uzatish quvurlarida, ishlab chiqarish jarayonida gazdan foydalanishda, portlash va yongʻin xavfi boʻlgan obyektlarda, donni saqlash hamda qayta ishlash obyektlarida, yer ostida transport va gidrotexnika qurilishlarini olib borishda, portlash va yongʻin xavfi boʻlgan qurilish obyektlarida va boshqa tarmoqlarning xavfli ishlab chiqarish obyektlarida;

sanoat portlovchi moddalari va portlatuvchi vositalarni ishlab chiqarish, saqlash, ishlatish va hisobga olishda;

gaz, neft va ularning mahsulotlari uzatiladigan magistral quvurlarni, shaharlar va aholi yashash joylarini, koʻp kvartirali uy-joylarni gaz bilan taʼminlash tizimlarini, shuningdek neft mahsulotlarini, tabiiy va suyultirilgan (propan-butan) gazlarni tashish, saqlash va ulardan foydalanish bilan bogʻliq obyektlarni loyihalash, qurish, ishlatish va taʼmirlashda;

yer qaʼri boyliklaridan foydalanishda va ularni muhofaza qilishda, kon ishlarini geologiya-marksheyderlik xizmatlari bilan taʼminlashda, shu jumladan uglevodorod konlarini qidirishda, neft va gaz quduqlarini qazishda, ularni sinab koʻrishda va ishlatishga tayyorlashda;

portlash va yongʻin xavfi boʻlgan, nazorat ostidagi ishlab chiqarishlar hamda obyektlarni qurishda, rekonstruksiya qilishda, ulardan foydalanishda va ularni taʼmirlashda;

radioaktiv materiallar va rudalarni (vakolatiga koʻra), ionlovchi nurlanish manbalari mavjud boʻlgan buyumlarni tashish, saqlash, ulardan foydalanish va ularni koʻmib tashlash, qazib olish, qayta ishlash va hisobga olishda, yadro obyektlaridan va ionlovchi nurlanish manbalaridan foydalanuvchi yoki ularni oluvchi boshqa obyektlardan foydalanishda;

koʻtarish inshootlarini, bugʻ va suv isitish qozonlarini, bosim ostida ishlaydigan idishlarni, bugʻ va issiq suv quvurlarini, shuningdek nazorat ostidagi boshqa obyektlarni ishlab chiqish, loyihalash, tayyorlash, montaj qilish, taʼmirlash va ulardan foydalanishda;

xavfli yuklar va portlovchi moddalarni tranzit tashishda oʻz vakolatiga muvofiq davlat nazoratini amalga oshiradi.

“Sanoatgeokontexnazorat” davlat inspeksiyasi oʻziga yuklangan vazifalar va funksiyalarni bevosita, shuningdek oʻz tarkibiy boʻlinmalari va idoraviy mansub tashkilotlari orqali amalga oshiradi.

11. “Sanoatgeokontexnazorat” davlat inspeksiyasi oʻziga yuklangan vazifalar va funksiyalarni bajarish uchun belgilangan tartibda quyidagi huquqlarga ega:

“Sanoatgeokontexnazorat” davlat inspeksiyasi vakolatiga taalluqli masalalar yuzasidan korxonalar va obyektlarni tekshirish;

nazoratidagi korxonalar, shuningdek “Sanoatgeokontexnazorat” davlat inspeksiyasi nazoratidagi obyektlarga ega boʻlgan vazirliklar, davlat qoʻmitalari, idoralar, xoʻjalik boshqaruvi organlari rahbarlariga sanoat va radiatsiya xavfsizligi, ularni geologik oʻrganishda yer qaʼridan foydalanish va ularni muhofaza qilish, foydali qazilmalarni qazib olish, mineral xomashyoni qayta ishlash talablarining aniqlangan buzilishlarini bartaraf etish toʻgʻrisida bajarilishi majburiy boʻlgan yozma koʻrsatmalar berish;

yer qaʼrini geologik oʻrganishda, ulardan foydalanish va ularni muhofaza qilishda, foydali qazilmalarni qazib olishda, mineral xomashyoni qayta ishlashda, kon ishlarini geologiya-marksheyderlik xizmatlari bilan taʼminlashda sanoat va radiatsiya xavfsizligi talablari buzilgan holda olib borilayotgan ishlarni toʻxtatib qoʻyish, shuningdek odamlar hayoti xavf ostida qolganda yoki avariya holati vujudga kelganda ularni ish joylaridan chiqarish, ish joylarini yoki asbob-uskunalarni muhrlab qoʻyish;

sanoat va radiatsiya xavfsizligi, yer qaʼridan foydalanish va ularni muhofaza qilish talablarini buzganlik uchun mansabdor shaxslar va fuqarolarni oʻz vakolatlari doirasida maʼmuriy javobgarlikka tortish;

nazoratidagi ishlab chiqarishlar uchun xodimlar tayyorlovchi kurslarni, shuningdek kon va portlatish ishlari olib borilishiga javob berish huquqi beriladigan mutaxassislar tayyorlovchi kurslarni tashkil etish, oʻta xavfli ishlarni bajarish uchun tayyorlanadigan shaxslardan imtihonlar olish va ularga guvohnomalar berish;

nazoratidagi obyektlarda xodimlarning xavfsizlik qoida va normalarini, texnologik reglamentlarni va ishchilarning mehnatini muhofaza qilish yoʻriqnomalarini bilishlarini tekshirish, nazoratidagi korxonalar, shu jumladan sanoat xavfsizligi sohasida kadrlarni tayyorlash va qayta tayyorlashni amalga oshiruvchi korxonalar rahbarlari va xodimlarining sanoat, radiatsiya xavfsizligi hamda yer qaʼri boyliklarini muhofaza qilish qoidalari va normalarini bilishlarini tekshirishda qatnashish;

xavfli ishlab chiqarish obyektlaridan foydalanuvchi tashkilotlar rahbarlarining “Sanoatgeokontexnazorat” davlat inspeksiyasi vakolatiga kiradigan masalalar boʻyicha hisobotlarini eshitish;

sanoat xavfsizligini ekspertizadan oʻtkazish huquqini beruvchi akkreditatsiya attestatining amalda boʻlishini belgilangan tartibda toʻxtatib turish, toʻxtatish yoki uni bekor qilish;

faoliyatning ayrim turlariga litsenziyaning amal qilishini toʻxtatib turish, toʻxtatish va litsenziyani bekor qilish toʻgʻrisida belgilangan tartibda qarorlar qabul qiladi;

qonun hujjatlari buzilgan holda tayyorlangan sanoat xavfsizligi ekspertizasi xulosalarini nohaqiqiy deb eʼtirof etish;

sanoat xavfsizligi sohasidagi ekspert guvohnomasining amalda boʻlishini belgilangan tartibda toʻxtatib turish, toʻxtatish yoki uni bekor qilish;

sanoat xavfsizligi sohasida akkreditatsiya qilingan ekspertiza tashkilotlari faoliyatini tekshiruv nazoratidan oʻtkazish;

geologik oʻrganishda, foydali qazilmalarni qazib olishda, mineral xomashyoni qayta ishlashda, kon ishlarini geologiya-marksheyderlik xizmatlari bilan taʼminlashda sanoat va radiatsiya xavfsizligi, yer qaʼri foydali qazilmalaridan foydalanish va ularni muhofaza qilish sohasidagi qoidalar, yoʻriqnomalar va boshqa normativ-texnik hujjatlar talablarini buzgan shaxslar bilan mehnat shartnomasini toʻxtatish yoki ularga nisbatan intizomiy choralar koʻrish yoki ularni ishlarga texnik rahbarlik qilish huquqidan bir yilgacha muddatga mahrum qilish toʻgʻrisida nazoratdagi korxonalar, vazirliklar, davlat qoʻmitalari, idoralar, xoʻjalik boshqaruvi organlari, mahalliy davlat hokimiyati organlari rahbarlariga taqdimnomalar kiritish;

ionlovchi nurlanish manbalarini hisobga olish va nazorat qilish tizimini tashkil etish, yoʻlga qoʻyish, uslubiy taʼminlash va takomillashtirish bilan bogʻliq tadbirlarni amalga oshirish;

aybdor shaxslarni jinoiy javobgarlikka tortish toʻgʻrisidagi masalani koʻrib chiqish uchun materiallarni huquqni muhofaza qilish organlariga berish;

avariyalarning holatlari va sabablarini, ishlab chiqarishda jarohatlanish, portlovchi materiallarning yoʻqolishi holatlarini belgilangan tartibda texnik jihatdan tekshirish hamda tekshirish natijalari boʻyicha “Sanoatgeokontexnazorat” davlat inspeksiyasi vakolatiga kiritilgan masalalar yuzasidan bajarilishi majburiy boʻlgan qarorlar qabul qilish;

zarurat boʻlganda tashkilotlar tomonidan asbob-uskunalar va materiallarni nazorat sinovlaridan oʻtkazishni, ish va atrof muhit tahlillarini, loyiha va loyiha-konstruktorlik yechimlarining mustaqil ekspertizasini oʻtkazishni tayinlash;

tayyorlovchi zavodlar va taʼmirlash korxonalarida nazoratdagi sanoat tarmoqlari uchun asbob-uskunalarning sanoat xavfsizligi talablariga muvofiqligini tekshirish, ular standartlar, sanoat, radiatsiya xavfsizligi qoidalariga va normalariga hamda tasdiqlangan loyihaviy yechimlar talablariga nomuvofiq boʻlgan taqdirda ularni ishlab chiqarishni toʻxtatib qoʻyish va qoʻllanishini taqiqlash;

vazirliklar, davlat qoʻmitalari, idoralar, xoʻjalik boshqaruvi organlari, mahalliy davlat hokimiyati organlari, tashkilotlardan “Sanoatgeokontexnazorat” davlat inspeksiyasi vakolatiga taalluqli masalalar boʻyicha zarur axborotlarni olish;

mansabdor va jismoniy shaxslarda ishlarga texnik rahbarlik qilish va ularni bajarish huquqini beruvchi tegishli hujjatlar mavjudligini, shuningdek ular tomonidan yuqori darajada xavflilik bilan bogʻliq ishlarni bajarish uchun maxsus belgilangan talablarga rioya etilishini tekshirish;

xizmat koʻrsatiladigan korxonalar hisobidan moliyalashtiriladigan mintaqaviy inspeksiyalarga tezkor va uslubiy rahbarlikni amalga oshirish;

vazirliklar, davlat qoʻmitalari, idoralar, xoʻjalik boshqaruvi organlari, mahalliy davlat hokimiyati organlari, tashkilotlar bilan kelishgan holda ularning mutaxassislarini ishlab chiqarishlar, obyektlar hamda yer qaʼri ishlari va uni muhofaza qilish xavfsizligi bilan bogʻliq mustaqil ekspertizalar va ishlanmalarni amalga oshirish uchun shartnoma asosida jalb etish.

“Sanoatgeokontexnazorat” davlat inspeksiyasi qonun hujjatlariga muvofiq boshqa huquqlarga ham ega boʻlishi mumkin.

12. “Sanoatgeokontexnazorat” davlat inspeksiyasi inspektorlari oʻz vazifalarini bajarayotganda nazoratidagi korxonalar ularni xizmat xonalari, aloqa vositalari, maxsus kiyim-bosh va himoya vositalari, transport bilan taʼminlaydilar, shuningdek ularga doimiy biriktirib qoʻyilgan mintaqaviy inspeksiyalar inspektorlariga esa kommunal xizmatlar koʻrsatiladigan va telefon aloqasi boʻlgan idoraviy turar joy ajratishda koʻmaklashadilar, idoraviy maktabgacha bolalar muassasalarida va sanatoriy-kurort muassasalarida joy beradilar, tibbiy xizmat koʻrsatish va ijtimoiy-maishiy taʼminot masalalarini hal qiladilar.

13. “Sanoatgeokontexnazorat” davlat inspeksiyasi oʻziga yuklangan vazifalar va funksiyalarning samarali bajarilishi uchun javob beradi.

14. “Sanoatgeokontexnazorat” davlat inspeksiyasining mansabdor shaxslari oʻz xizmat vazifalarini zarur darajada bajarmaganligi uchun belgilangan tartibda javob beradilar.

15. “Sanoatgeokontexnazorat” davlat inspeksiyasiga belgilangan tartibda Oʻzbekiston Respublikasi Vazirlar Mahkamasi tomonidan lavozimga tayinlanadigan va lavozimdan ozod qilinadigan boshliq boshchilik qiladi.

“Sanoatgeokontexnazorat” davlat inspeksiyasi boshligʻining Oʻzbekiston Respublikasi Vazirlar Mahkamasi tomonidan belgilangan tartibda lavozimga tayinlanadigan va lavozimdan ozod qilinadigan oʻrinbosari boʻladi.

“Sanoatgeokontexnazorat” davlat inspeksiyasi boshligʻi maqomiga koʻra Oʻzbekiston Respublikasi vaziriga, oʻrinbosar esa — tegishli ravishda vazir oʻrinbosariga tenglashtiriladi.

16. “Sanoatgeokontexnazorat” davlat inspeksiyasi boshligʻi:

Davlat inspeksiyasi faoliyatiga yakkaboshchilik asosida umumiy rahbarlikni amalga oshiradi hamda “Sanoatgeokontexnazorat” davlat inspeksiyasiga yuklangan vazifalar va funksiyalarning bajarilishi uchun shaxsan javob beradi;

zarurat boʻlganda, “Sanoatgeokontexnazorat” davlat inspeksiyasining markaziy apparati tuzilmasiga xodimlarning belgilangan umumiy soni doirasida oʻzgartirishlar kiritadi, shtatlar jadvalini va xarajatlar smetasini tasdiqlaydi;

“Sanoatgeokontexnazorat” davlat inspeksiyasining tarkibiy boʻlinmalari va idoraviy mansub tashkilotlari toʻgʻrisidagi nizomlarni (ustavlarni) belgilangan tartibda tasdiqlaydi, Harbiylashtirilgan kon-qutqarish qismi toʻgʻrisidagi nizom bundan mustasno;

“Sanoatgeokontexnazorat” davlat inspeksiyasining tarkibiy boʻlinmalari xodimlarini hamda idoraviy mansub tashkilotlar rahbarlarini belgilangan tartibda lavozimga tayinlaydi va lavozimdan ozod qiladi;

Harbiylashtirilgan kon-qutqarish qismi shtabining Harbiylashtirilgan kon-qutqarish qismining avariyaga uchragan odamlarni qutqarishga, yuz berayotgan avariyalar oqibatlarini lokalizatsiya qilish va bartaraf etishga hamda korxonalarda avariya-texnika ishlarini bajarishga tayyorligini taʼminlash boʻyicha ishlari yuzasidan nazoratni tashkil etadi.

“Sanoatgeokontexnazorat” davlat inspeksiyasi boshligʻi qonun hujjatlariga muvofiq boshqa vakolatlarni amalga oshiradi.

17. Tarmoq inspeksiyalari va mintaqaviy inspeksiyalar oʻz faoliyatini “Sanoatgeokontexnazorat” davlat inspeksiyasi tomonidan tasdiqlanadigan nizomlarga muvofiq amalga oshiradilar.

18. Xavfli ishlab chiqarish obyektlarini ishlatish bilan bogʻliq ishlarni muvofiqlashtirish uchun “Sanoatgeokontexnazorat” davlat inspeksiyasi huzurida “Sanoatgeokontexnazorat” davlat inspeksiyasi boshligʻi boshchilik qiladigan Sanoat xavfsizligi boʻyicha idoralararo kengash tuziladi. Sanoat xavfsizligi boʻyicha idoralararo kengashning shaxsiy tarkibi va uning toʻgʻrisidagi nizom Oʻzbekiston Respublikasi Vazirlar Mahkamasining tegishli Kompleksi bilan kelishgan holda “Sanoatgeokontexnazorat” davlat inspeksiyasi boshligʻi tomonidan tasdiqlanadi.

19. Davlat inspeksiyasida boshliq (hayʼat raisi), uning oʻrinbosari (lavozimiga koʻra), shuningdek “Sanoatgeokontexnazorat” davlat inspeksiyasi faoliyatining asosiy yoʻnalishlarini muvofiqlashtiruvchi uning tarkibiy boʻlinmalari rahbarlaridan iborat tarkibda hayʼat tashkil etiladi.

Hayʼatning aʼzolari soni va shaxsiy tarkibi “Sanoatgeokontexnazorat” davlat inspeksiyasi boshligʻining taqdimnomasiga binoan Oʻzbekiston Respublikasi Vazirlar Mahkamasi tomonidan tasdiqlanadi.

Hayʼat quyidagilar bilan bogʻliq masalalarni koʻrib chiqadi:

“Sanoatgeokontexnazorat” davlat inspeksiyasi faoliyatining respublika hududida geologik oʻrganishda, foydali qazilmalarni qazib olishda, mineral xomashyoni qayta ishlashda, kon ishlarini geologiya-marksheyderlik xizmatlari bilan taʼminlashda sanoat va radiatsiya xavfsizligi, yer qaʼri boyliklaridan foydalanish va ularni muhofaza qilish boʻyicha qonun hujjatlari va normativ-texnik hujjatlar talablariga barcha yuridik va jismoniy shaxslar tomonidan rioya qilinishi yuzasidan davlat nazorati taʼminlanishini davom ettirish, sanoat va radiatsiya xavfsizligini taʼminlash, shuningdek kon nazorati sohasida oldini olish chora-tadbirlarini ishlab chiqish va amalga oshirish boʻyicha ushbu Nizomda belgilangan asosiy yoʻnalishlarini tayyorlash va amalga oshirish;

“Sanoatgeokontexnazorat” davlat inspeksiyasi nomenklaturasiga kiradigan lavozimlarga kadrlarni tanlash, joy-joyiga qoʻyish, tayyorlash va qayta tayyorlash;

Oʻzbekiston Respublikasi Prezidentining farmonlari, qarorlari va farmoyishlarida, Oʻzbekiston Respublikasi Vazirlar Mahkamasi qarorlari va farmoyishlarida belgilangan vazifalarni amalga oshirish boʻyicha ijro intizomini mustahkamlash, ularning oʻz vaqtida va sifatli amalga oshirilishini taʼminlash yuzasidan “Sanoatgeokontexnazorat” davlat inspeksiyasi rahbarlari va xodimlarining shaxsiy masʼuliyatini oshirish.

Hayʼat “Sanoatgeokontexnazorat” davlat inspeksiyasi vakolatiga taalluqli boshqa masalalarni ham koʻrib chiqish huquqiga ega.

Hayʼat majlisiga “Sanoatgeokontexnazorat” davlat inspeksiyasi vakolatiga kiradigan masalalar boʻyicha boshqa vazirliklar, davlat qoʻmitalari, idoralar, mahalliy davlat hokimiyati organlari, korxonalar, muassasalar, tashkilotlar rahbarlari taklif etilishi mumkin.

Hayʼat uning majlisida tarkibining yarmidan koʻpi qatnashgan taqdirda vakolatli boʻladi. Koʻrib chiqilayotgan masalalar boʻyicha qarorlar oddiy koʻpchilik ovoz bilan qabul qilinadi.

Hayʼat qarorlari boshliqning buyruqlari bilan amalga oshiriladi. Boshliq va hayʼat aʼzolari oʻrtasida kelishmovchiliklar paydo boʻlgan taqdirda boshliq paydo boʻlgan kelishmovchiliklar toʻgʻrisida Oʻzbekiston Respublikasi Vazirlar Mahkamasiga axborot bergan holda mustaqil ravishda qaror qabul qiladi. Hayʼat aʼzolari ham oʻz fikr-mulohazalarini Oʻzbekiston Respublikasi Vazirlar Mahkamasiga maʼlum qilishlari mumkin.

Hayʼat faoliyati tartibi uning hayʼat tasdiqlaydigan reglamentida belgilanadi.

20. “Sanoatgeokontexnazorat” davlat inspeksiyasining inspektorlari tarkibiga va organlari xodimlariga belgilangan tartibda farqlash belgilari boʻlgan formali kiyim-bosh va yagona namunadagi guvohnoma beriladi.

21. “Sanoatgeokontexnazorat” davlat inspeksiyasini qayta tashkil etish va tugatish qonun hujjatlarida belgilangan tartibda amalga oshiriladi.

1. Vazirlar Mahkamasining “Sanoatda, konchilikda va kommunal-maishiy sektorda ishlarning bexatar olib borilishini nazorat qilish davlat inspeksiyasi faoliyatini tashkil etish toʻgʻrisida” 2004-yil 10-iyuldagi 323-son qarorida (Oʻzbekiston Respublikasi QT, 2004-y., 7-son, 64-modda):

a) 1, 2 va 4-bandlar, shuningdek 1, 3 va 4-ilovalar oʻz kuchini yoʻqotgan deb hisoblansin;

b) 3-bandning ikkinchi xatboshidagi “Oʻzbekiston Respublikasi Sanoatda, konchilikda va kommunal-maishiy sektorda ishlarning bexatar olib borilishini nazorat qilish davlat inspeksiyasi Gazni nazorat qilish inspeksiyasining” soʻzlari “Oʻzbekiston Respublikasi Vazirlar Mahkamasi huzuridagi Yer qaʼrini geologik oʻrganish, sanoatda, konchilikda va kommunal-maishiy sektorda ishlarning bexatar olib borilishini nazorat qilish davlat inspeksiyasi Gaz xoʻjaligidan xavfsiz foydalanish inspeksiyasining” soʻzlari bilan almashtirilsin.

2. Vazirlar Mahkamasining “Oʻzbekiston Respublikasi Sanoatda, konchilikda va kommunal-maishiy sektorda ishlarning bexatar olib borilishini nazorat qilish davlat inspeksiyasi faoliyatini yanada takomillashtirish toʻgʻrisida” 2008-yil 29-maydagi 114-son qarorida (Oʻzbekiston Respublikasi QT, 2008-y., 5-son, 25-modda):

a) 1-banddagi “Oʻzbekiston Respublikasi Sanoatda, konchilikda va kommunal-maishiy sektorda ishlarning bexatar olib borilishini nazorat qilish davlat inspeksiyasi” soʻzlari “Oʻzbekiston Respublikasi Vazirlar Mahkamasi huzuridagi Yer qaʼrini geologik oʻrganish, sanoatda, konchilikda va kommunal-maishiy sektorda ishlarning bexatar olib borilishini nazorat qilish davlat inspeksiyasi” soʻzlari bilan almashtirilsin;

b) 2-banddagi “Sanoatkontexnazorat” davlat inspeksiyasiga” soʻzlari “Sanoatgeokontexnazorat” davlat inspeksiyasiga” soʻzlari bilan almashtirilsin;

v) 3 va 4-bandlar, shuningdek 1 va 2-ilovalar oʻz kuchini yoʻqotgan deb hisoblansin.

3. Vazirlar Mahkamasining “Xavfli ishlab chiqarish obyektlarining sanoat xavfsizligi toʻgʻrisida”gi Oʻzbekiston Respublikasi Qonunini amalga oshirishga doir qoʻshimcha chora-tadbirlar haqida” 2008-yil 10-dekabrdagi 271-son qaroriga (Oʻzbekiston Respublikasi QT, 2008-y., 12-son, 64-modda) 6-ilovaning 2-bandi oʻz kuchini yoʻqotgan deb hisoblansin.

4. Vazirlar Mahkamasining “Oʻzbekiston Respublikasi Hukumatining vazirliklar, davlat qoʻmitalari va idoralar toʻgʻrisidagi nizomlarni tasdiqlash boʻyicha ayrim qarorlariga oʻzgartirish va qoʻshimchalar kiritish haqida” 2010-yil 5-iyundagi 108-son qaroriga (Oʻzbekiston Respublikasi QT, 2010-y., 6-son, 27-modda) ilovaning 45-bandi oʻz kuchini yoʻqotgan deb hisoblansin.