O‘zbekiston Respublikasining “Ixtirolar, foydali modellar va sanoat namunalari to‘g‘risida”gi O‘zbekiston Respublikasining Qonuniga o‘zgartish va qo‘shimchalar kiritish haqida”gi Qonuni va O‘zbekiston Respublikasi Vazirlar Mahkamasining 2008-yil 7-maydagi 89-sonli “O‘zbekiston Respublikasi Hukumatining ayrim qarorlariga o‘zgartish va qo‘shimchalar kiritish to‘g‘risida (“Tovar belgilari, xizmat ko‘rsatish belgilari va tovar kelib chiqqan joy nomlari to‘g‘risida”gi O‘zbekiston Respublikasi Qonuniga o‘zgartish va qo‘shimchalar kiritish haqida”gi 2007-yil 19-sentabrdagi O‘RQ-111-sonli Qonuni)”gi qaroriga muvofiq buyuraman:

1. O‘zbekiston Respublikasi Intellektual mulk agentligining Apellatsiya kengashiga apellatsiyalar va arizalarni topshirish hamda ko‘rib chiqish qoidalari ilovaga muvofiq tasdiqlansin.

2. O‘zbekiston Respublikasi Davlat patent idorasi direktorining 2003-yil 11-noyabrdagi 67-sonli “O‘zbekiston Respublikasi Davlat patent idorasining Apellatsiya kengashiga apellatsiyalarni topshirish va ko‘rib chiqish qoidalarini tasdiqlash to‘g‘risida”gi buyrug‘i (2003-yil 24-dekabr, ro‘yxat raqami 1293) o‘z kuchini yo‘qotgan deb hisoblansin.

3. Ushbu buyruq O‘zbekiston Respublikasi Adliya vazirligida davlat ro‘yxatidan o‘tkazilgandan keyin o‘n kun o‘tgach kuchga kiradi.

Ushbu Qoidalar O‘zbekiston Respublikasi Vazirlar Mahkamasining 2003-yil 1-iyuldagi 298-sonli qarori bilan tasdiqlangan “O‘zbekiston Respublikasi Intellektual mulk agentligining Apellatsiya kengashi to‘g‘risida”gi nizomga muvofiq, O‘zbekiston Respublikasi Intellektual mulk agentligining Apellatsiya kengashiga (bundan keyingi o‘rinlarda Apellatsiya kengashi deb yuritiladi) apellatsiyalar va arizalarni topshirish hamda ko‘rib chiqish tartibini belgilaydi.

1. Apellatsiya kengashiga quyidagi apellatsiyalar topshirilishi mumkin:

a) O‘zbekiston Respublikasi Davlat Intellektual mulk agentligining (keyingi o‘rinlarda Agentlik deb ataladi):

ixtiro, foydali model, sanoat namunasi, tovar belgisi, tovar kelib chiqqan joy nomlari, seleksiya yutug‘i, integral mikrosxemalar topologiyasiga talabnomani ko‘rib chiqishga qabul qilishni rad etish to‘g‘risidagi;

ixtiro, foydali model, sanoat namunasi, seleksiya yutug‘iga patent berish to‘g‘risidagi yoki patent berishni rad etish to‘g‘risidagi;

tovar belgisi, tovar kelib chiqqan joy nomlarini ro‘yxatdan o‘tkazish yoki ro‘yxatdan o‘tkazishni rad etish to‘g‘risidagi, O‘zbekiston Respublikasining xalqaro shartnomalariga muvofiq amalga oshiriladigan muhofaza berish to‘g‘risida yoki muhofaza berishni rad etish to‘g‘risidagi;

integral mikrosxemalar topologiyasini ro‘yxatdan o‘tkazishni rad etish to‘g‘risidagi qarorlari ustidan;

b) ixtiro, foydali model, sanoat namunasi, seleksiya yutug‘iga patent berilishiga qarshi;

v) integral mikrosxemalar topologiyasining ro‘yxatdan o‘tkazilishiga qarshi;

g) ixtiro, foydali model, sanoat namunasi, seleksiya yutug‘i patentlarining haqiqiyligiga qarshi;

d) tovar belgisi va xizmat ko‘rsatish belgisi uchun guvohnomaning, tovar kelib chiqqan joy nomidan foydalanish huquqi to‘g‘risidagi guvohnomaning haqiqiyligiga qarshi;

e) belgini O‘zbekiston Respublikasi hududida xalqaro ro‘yxatdan o‘tkazishning amal qilishiga qarshi;

j) integral mikrosxemalar topologiyasini ro‘yxatdan o‘tkazilganligi to‘g‘risidagi guvohnomaning amal qilishini to‘xtatish haqida;

z) tovar belgisi va xizmat ko‘rsatish belgisi uchun hamda tovar kelib chiqqan joy nomlaridan foydalanish huquqi to‘g‘risidagi guvohnomalarning amal qilishini to‘xtatish haqida;

i) tovar kelib chiqqan joy nomlarini ro‘yxatdan o‘tkazishni bekor qilish haqida.

2. Apellatsiya kengashiga O‘zbekiston Respublikasida hammaga ma’lum tovar belgilari ro‘yxatini e’tirof etish to‘g‘risidagi arizalar (bundan keyingi o‘rinlarda ariza deb yuritiladi) topshirilishi mumkin.

3. Ushbu Qoidalarning 1-bandi “a” kichik bandida nazarda tutilgan apellatsiyalar ixtiro, foydali model, sanoat namunasi, seleksiya yutug‘iga talabnoma, tovar belgisiga, shu jumladan belgini xalqaro ro‘yxatdan o‘tkazishga talabnoma, tovar kelib chiqqan joy nomlari, integral mikrosxemalar topologiyasini ro‘yxatdan o‘tkazish uchun talabnoma topshirgan talabnoma beruvchi tomonidan beriladi.

Mazkur Qoidalarning 1-bandi “b” — “i” kichik bandlarida ko‘zda tutilgan apellatsiyalar manfaatdor shaxslar tomonidan beriladi.

Mazkur Qoidalarning 2-bandida nazarda tutilgan ariza o‘z tovar belgisini O‘zbekiston Respublikasida hammaga ma’lum tovar belgisi deb hisoblagan shaxs tomonidan beriladi.

4. Ushbu Qoidalarning 1 va 2-bandlarida ko‘zda tutilgan apellatsiyalar yoki arizalarni berish bilan bog‘liq harakatlarni ko‘rsatilgan shaxslar shaxsan o‘zlari yoki vakillari, shu jumladan Agentlikda ro‘yxatdan o‘tkazilgan patent vakillari orqali amalga oshirishlari mumkin.

O‘zbekiston Respublikasidan tashqarida doimiy istiqomat qiladigan jismoniy shaxslar va chet el yuridik shaxslari yoki ularning vakillari basharti, O‘zbekiston Respublikasining xalqaro shartnomalarida boshqacha tartib ko‘zda tutilmagan bo‘lsa, apellatsiyalar yoki arizalarni berish bilan bog‘liq harakatlarni, shu jumladan Apellatsiya kengashi yig‘ilishlarida qatnashishni o‘z vakillari, shuningdek Agentlikda ro‘yxatdan o‘tkazilgan patent vakillari orqali amalga oshiradilar.

5. Vakilning, tegishli hollarda patent vakilining vakolatlari amaldagi qonunchilikka muvofiq rasmiylashtirilgan va vakolatlarning hajmi ko‘rsatilgan ishonchnoma bilan tasdiqlanadi.

6. Apellatsiya yoki ariza ixtiyoriy shaklda tuziladi va umumiy qabul qilingan texnika vositalarida (yozuv mashinkasi, shaxsiy kompyuter va hokazolarda) bosilgan ko‘rinishda taqdim etiladi.

7. Apellatsiya yoki arizada quyidagilar ko‘rsatiladi:

a) apellatsiya yoki ariza bergan yuridik shaxslar uchun — uning nomi, joylashgan yeri (pochta manzili), jismoniy shaxslar uchun familiyasi, ismi, otasining ismi, turar joyi (to‘liq manzili) va boshqa ma’lumotlar;

b) ixtiro, foydali model, sanoat namunasi, seleksiya yutug‘iga talabnoma, tovar belgisiga, shu jumladan belgini xalqaro ro‘yxatdan o‘tkazishga talabnoma, tovar kelib chiqqan joy nomlariga, integral mikrosxemalar topologiyasiga talabnomaning raqami yoki apellatsiya oid bo‘lgan obyektga berilgan muhofaza hujjatining, shu jumladan belgini xalqaro ro‘yxatdan o‘tkazish raqami.

Ushbu Qoidalarning 2-bandida ko‘zda tutilgan arizada tovar belgisiga guvohnomaning yoki uni ro‘yxatdan o‘tkazish uchun berilgan talabnomaning ro‘yxat raqami ko‘rsatiladi. Ariza O‘zbekiston Respublikasida huquqiy muhofazaga ega bo‘lmagan belgiga oid bo‘lsa, arizaga “Tovar belgisi va xizmat ko‘rsatish belgisini ro‘yxatdan o‘tkazish uchun talabnoma tuzish, topshirish va ko‘rib chiqish qoidalariga (ro‘yxat raqami 1988, 2009-yil 29-iyul) muvofiq tayyorlangan tovar belgisi namunasi ilova qilinadi.

v) ustidan shikoyat berilgan qarorning qonunga zidligi, patent, guvohnoma berilganligi yoki huquqiy muhofaza berilganligi qonunga zidligining asosi, apellatsiya beruvchi shaxsning barcha sabab va dalillari, taklif etilgan obyektning unga qarshi quyilgan barcha obyektlar bilan taqqoslangan tahlilini (muhofaza hujjati berish rad etilganda) apellatsiya o‘z ichiga olishi kerak.

Ushbu Qoidalarning 1-bandi “g”—“z” kichik bandlarida ko‘zda tutilgan apellatsiyalarga qo‘shimcha materiallar taqdim etilgan holda, ular patent, guvohnoma yoki huquqiy muhofaza berishni to‘liq yoki qisman haqiqiy emas deb tan olish uchun asoslar mavjudligini tasdiqlaydigan sabablarni o‘zgartirmasligi yuzasidan tekshiriladi.

Ushbu Qoidalarning 1-bandi “i” kichik bandida keltirilgan apellatsiya va/yoki unga ilova qilingan materiallar quyidagi ma’lumotlarni o‘z ichiga olishi kerak:

jug‘rofiy obyektga xos bo‘lgan shartlarning yo‘qolganligi haqida va/yoki O‘zbekiston Respublikasining tovar kelib chiqqan joy nomlari davlat reyestrida ko‘rsatilgan o‘ziga xos xususiyatlarga ega bo‘lgan tovarni ishlab chiqarish imkoni yo‘qligi haqida;

chet el yuridik shaxslari yoki chet el fuqarolari tomonidan tovar kelib chiqqan mamlakatda ushbu tovar kelib chiqqan joy nomiga bo‘lgan huquq yo‘qotilganligi haqida;

tovar O‘zbekiston Respublikasining tovar kelib chiqqan joy nomlari davlat reyestrida ushbu tovar kelib chiqqan joy nomiga nisbatan ko‘rsatilgan o‘ziga xos xususiyatlarni yo‘qotganligi haqida.

Ushbu Qoidalarning 2-bandida ko‘zda tutilgan ariza va unga ilova qilinadigan materiallar tovar belgisining hammaga ma’lum tovar belgisi deb e’tirof etilganligini tasdiqlaydigan aniq ma’lumotlardan iborat bo‘lishi kerak. Quyidagi ma’lumotlarni o‘z ichiga olgan hujjatlar shunday materiallar sifatida taqdim etilishi mumkin:

tovar belgisidan O‘zbekiston Respublikasi hududida keng foydalanilgani haqida;

tovar belgisidan foydalanilgan holda tovarlar realizatsiya qilingan aholi punktlarining ro‘yxati;

ushbu tovarlar realizatsiyasining hajmi haqida;

yarmarka va ko‘rgazmalarda tovar belgisidan foydalanilgan mahsulotlar va/yoki xizmatlar reklamasi va taqdimotini ham hisobga olgan holda, tovar belgisidan foydalanish usuli haqida;

tovar iste’molchilarining o‘rtacha yillik soni haqida;

tovar belgisi mashhur bo‘lgan mamlakatlar haqida;

Agentlik belgilagan tavsiyanomalarni hisobga olgan holda, ixtisoslashgan mustaqil tashkilot tomonidan tovar iste’molchilari orasida o‘tkazilgan so‘rov natijalari haqida.

Tovar belgisidan uzoq vaqt davomida, uzluksiz, keng va katta hajmda foydalanilganligi isboti sifatida mahsulot sifatini nazorat qiluvchi tashkilotlar, savdo tashkilotlari, iste’molchilar huquqlarini himoya qiluvchi tashkilotlar va jamiyatlarning xulosalari (ma’lumotnomalari), deklaratsiyalar, sifat sertifikatlari va shu kabi hujjatlar taqdim etilishi mumkin.

Arizada tovar belgisidan foydalanish qaysi sanadan boshlangani va ariza bergan shaxs qaysi sanadan boshlab o‘z tovar belgisini O‘zbekiston Respublikasida hammaga ma’lum tovar belgisi sifatida e’tirof etganligi ko‘rsatilishi kerak.

g) apellatsiya yoki ariza bergan shaxsning apellatsiya yoki ariza mohiyati bo‘yicha aniq bayon qilingan talablari.

Apellatsiya yoki ariza apellatsiya yoki ariza bergan shaxs yoxud uning vakili tomonidan imzolanadi. Yuridik shaxs nomidan apellatsiya yoki ariza tashkilot rahbari yoki belgilangan tartibda vakolatga ega bo‘lgan shaxs tomonidan uning lavozimi ko‘rsatilgan holda imzolanadi, imzo yuridik shaxsning muhri bilan (muhr mavjud bo‘lgan taqdirda) tasdiqlanadi.

Imzo chekayotgan shaxsning familiyasi, ismi, otasining ismi ko‘rsatilishi shart.

8. Apellatsiya bitta ixtiro, foydali model, sanoat namunasi, seleksiya yutug‘iga talabnoma yoki tovar belgisiga, tovar kelib chiqqan joy nomlariga, integral mikrosxemalar topologiyasiga talabnomaga yoxud bitta muhofazalanadigan obyekt — ixtiro, foydali model, sanoat namunasi, seleksiya yutug‘iga, tovar belgisiga, shu jumladan belgini xalqaro ro‘yxatdan o‘tkazishga, tovar kelib chiqqan joy nomlariga, integral mikrosxemalar topologiyasiga oid bo‘lishi kerak.

Ushbu Qoidalarning 2-bandida ko‘zda tutilgan ariza ham bitta tovar belgisiga taalluqli bo‘lishi kerak. Apellatsiya materiallari ikki nusxada topshiriladi, faqat ushbu Qoidalarning 1-bandi “a” kichik bandida nazarda tutilgan apellatsiyalar va 2-bandida ko‘zda tutilgan arizalar bundan mustasno ravishda bir nusxada topshiriladi.

9. Ushbu Qoidalarning 1-bandi “a” kichik bandida ko‘zda tutilgan apellatsiyalar O‘zbekiston Respublikasining “Ixtirolar, foydali modellar va sanoat namunalari to‘g‘risida” (O‘zbekiston Respublikasi Oliy Majlisining Axborotnomasi, 2002-y., 9-son, 158-modda), “Tovar belgilari, xizmat ko‘rsatish belgilari va tovar kelib chiqqan joy nomlari to‘g‘risida” (O‘zbekiston Respublikasi Oliy Majlisining Axborotnomasi, 2001-y., 9-10-son, 178-modda), “Seleksiya yutuqlari to‘g‘risida” (O‘zbekiston Respublikasi Oliy Majlisining Axborotnomasi, 2002-y., 9-son, 156-modda), “Integral mikrosxemalar topologiyasining huquqiy muhofazasi to‘g‘risida”gi (O‘zbekiston Respublikasi Oliy Majlisining Axborotnomasi, 2001-y., 5-son, 87-modda) qonunlarida belgilangan muddatlarda beriladi.

10. Apellatsiya yoki arizaga O‘zbekiston Respublikasi Vazirlar Mahkamasining 2006-yil 20-apreldagi 65-sonli qarori bilan tasdiqlangan “Patent bojlari to‘g‘risida”gi nizomga (O‘zbekiston Respublikasi qonun hujjatlari to‘plami, 2002-y., 19-son, 151-modda) muvofiq belgilangan patent boji to‘langanligini tasdiqlovchi hujjat ilova qilinadi. Belgilangan miqdorda patent boji to‘langanligini tasdiqlovchi hujjat taqdim qilinmagan taqdirda, apellatsiya yoki arizani ko‘rib chiqish bo‘yicha yuridik ahamiyatga molik harakatlar amalga oshirilmaydi.

11. Apellatsiya yoki ariza o‘zbek yoki rus tillarida topshiriladi. Barcha qo‘shimcha materiallar, shu jumladan texnik hujjatlar o‘zbek yoki rus tillarida ikki nusxada topshiriladi. Agar qo‘shimcha materiallar boshqa tilda topshirilgan bo‘lsa, apellatsiya yoki ariza bergan shaxs uch oy muddat ichida ushbu materiallarning o‘zbek yoki rus tillariga tarjimasini taqdim etishi lozim. Tarjima taqdim qilinmagan taqdirda, ushbu materiallar apellatsiya yoki arizani ko‘rib chiqishda e’tiborga olinmaydi.

12. Agentlikka kelib tushgan apellatsiya ro‘yxatga olinadi va unga ro‘yxat raqami beriladi.

13. Agar apellatsiya ushbu Qoidalarning 2-bo‘limida nazarda tutilgan shartlarga javob bersa, Apellatsiya kengashiga kelib tushgan sanadan e’tiboran un kunlik muddat ichida apellatsiya bergan shaxsga apellatsiya ko‘rib chiqishga qabul qilinganligi haqida bildirishnoma yuboriladi.

Ushbu Qoidalarning 1-bandi “b”—“i” kichik bandlarida ko‘zda tutilgan apellatsiyalar Apellatsiya kengashi yig‘ilishi o‘tkazilgunga qadar o‘z mulohazalarini taqdim etishi haqidagi taklif bilan apellatsiya bergan shaxsga yuboriladi.

14. Agar apellatsiya mazkur Qoidalarning 2-bo‘limida belgilangan shartlar inobatga olinmasdan topshirilgan bo‘lsa, apellatsiya bergan shaxsga apellatsiyani ko‘rib chiqish uchun zarur bo‘lgan ma’lumotlarni uch oy muddat ichida taqdim etish taklifi bayon qilingan so‘rovnoma yuboriladi.

So‘rovnomada talab qilingan ma’lumotlar ko‘rsatilgan muddatda taqdim etilmasa, apellatsiya bo‘yicha ish yuritish to‘xtatiladi va bu haqda apellatsiya bergan shaxsga xabar beriladi.

15. Apellatsiya bergan shaxs ko‘rib chiqishning istalgan bosqichida apellatsiyani chaqirib olishi mumkin. Bu holda, apellatsiya bo‘yicha ish yuritish to‘xtatiladi.

16. Yig‘ilishdan o‘n kun avval tomonlarga Apellatsiya kengashi yig‘ilishining o‘tkazilish joyi, sanasi va vaqti haqidagi bildirishnoma yuboriladi.

17. Ushbu Qoidalarning 12—16-bandlarida belgilangan tartib Apellatsiya kengashiga topshiriladigan O‘zbekiston Respublikasida hammaga ma’lum tovar belgilari ro‘yxatini e’tirof etish to‘g‘risidagi arizalarga nisbatan ham qo‘llaniladi, 14-bandning ikkinchi xatboshisi bundan mustasno.

18. Apellatsiyalar quyidagi muddatlarda ko‘rib chiqiladi:

a) kelib tushgan sanasidan e’tiboran ikki oy mobaynida:

Agentlikning ixtiro, foydali model, sanoat namunasi, seleksiya yutug‘i, tovar belgisi, tovar kelib chiqqan joy nomlariga talabnomani ko‘rib chiqishga qabul qilishni rad etish to‘g‘risidagi qarori ustidan berilgan apellatsiyalar;

Agentlikning foydali modelga patent berish to‘g‘risidagi yoki patent berishni rad etish to‘g‘risidagi qarori ustidan berilgan apellatsiyalar;

Agentlikning seleksiya yutug‘iga patent berishni rad etish to‘g‘risidagi qarori ustidan berilgan apellatsiyalar, agar qo‘shimcha sinovlar o‘tkazish zarurati tug‘ilmasa.

b) kelib tushgan sanasidan e’tiboran to‘rt oy mobaynida:

Agentlikning ixtiro, foydali model, sanoat namunasiga patent berish to‘g‘risidagi yoki patent berishni rad etish to‘g‘risidagi qarori ustidan berilgan apellatsiyalar;

Agentlikning tovar belgisi, tovar kelib chiqqan joy nomlarini ro‘yxatdan o‘tkazish yoki ro‘yxatdan o‘tkazishni rad etish to‘g‘risidagi qarori ustidan berilgan apellatsiyalar;

Agentlikning O‘zbekiston Respublikasining xalqaro shartnomalariga muvofiq amalga oshiriladigan muhofaza berish to‘g‘risidagi yoki muhofaza berishni rad etish to‘g‘risidagi qarori ustidan berilgan apellatsiyalar;

Agentlikning integral mikrosxemalar topologiyasini ro‘yxatdan o‘tkazishni rad etish to‘g‘risidagi qarori ustidan berilgan apellatsiyalar;

ixtiro, foydali model, sanoat namunasiga patent berilishiga qarshi berilgan apellatsiyalar;

integral mikrosxemalar topologiyasining ro‘yxatdan o‘tkazilishiga qarshi berilgan apellatsiyalar;

ixtiro, foydali model, sanoat namunasi patentlarining haqiqiyligiga qarshi berilgan apellatsiyalar;

belgini xalqaro ro‘yxatdan o‘tkazishning O‘zbekiston Respublikasida amal qilishiga qarshi berilgan apellatsiyalar;

integral mikrosxemalar topologiyasining ro‘yxatdan o‘tkazilganligi to‘g‘risidagi guvohnomaning amal qilishini to‘xtatish haqidagi apellatsiyalar;

tovar belgisi va xizmat ko‘rsatish belgisi uchun guvohnoma, tovar kelib chiqqan joy nomlaridan foydalanish huquqi to‘g‘risidagi guvohnomaning amal qilishini to‘xtatish haqidagi apellatsiyalar;

tovar kelib chiqqan joy nomlari ro‘yxatdan o‘tkazilganligini bekor qilish haqidagi apellatsiyalar;

v) kelib tushgan sanasidan e’tiboran olti oy mobaynida:

seleksiya yutug‘iga patent berilishiga qarshi apellatsiyalar;

seleksiya yutug‘i patentlarining haqiqiyligiga qarshi berilgan apellatsiyalar, agar qo‘shimcha sinovlar o‘tkazish zaruriyati tug‘ilmasa.

Tovar belgilari va xizmat ko‘rsatish belgilarining O‘zbekiston Respublikasida hammaga ma’lum tovar belgilari ro‘yxatini e’tirof etish to‘g‘risidagi arizalar Apellatsiya kengashi tomonidan ushbu arizalar kelib tushgan sanadan e’tiboran to‘rt oy ichida ko‘rib chiqiladi.

19. Apellatsiya kengashi yig‘ilishini o‘tkazish sanasi tayinlanganligi haqidagi bildirishnoma yuborilgan tomonlar yig‘ilish sanasini olti oydan oshmagan muddatga ko‘chirish haqida asoslangan rasmiy iltimosnoma bilan Apellatsiya kengashiga murojaat etishlari mumkin. Bu holda, apellatsiyani ko‘rib chiqishning belgilangan muddatlari o‘tishi Apellatsiya kengashi yig‘ilishini o‘tkazishning yangi sanasigacha to‘xtatiladi.

20. Muddatlar yig‘ilish o‘tkazishning aniq kalendar sanasi bilan belgilanadi.

21. Ish bo‘yicha ish yuritish to‘xtatilishi bilan barcha o‘tib ketmagan muddatlarning o‘tishi ham to‘xtatiladi. Ish bo‘yicha ish yuritish barcha zarur ma’lumotlar va/yoki materiallar olinmagunga qadar, to‘xtatib turiladi. Ish bo‘yicha ish yuritish tiklangan kundan boshlab muddatlarning o‘tishi davom etadi.

22. Apellatsiya yoki arizani ko‘rib chiqish Apellatsiya kengashi raisi, uning o‘rinbosari, kengash a’zolari (uchta a’zodan kam bo‘lmagan) va kotibi tarkibidagi Apellatsiya kengashi majlisida amalga oshiriladi. Kengash tarkibiga Agentlikning eng malakali va tajribali xodimlari hamda mustaqil olimlar va mutaxassislar kiradi.

23. Apellatsiya kengashida ishni ko‘rib chiqishda apellatsiya yoki ariza bergan shaxs yoki uning vakili, boshqa manfaatdor yuridik yoxud jismoniy shaxslar qatnashishi mumkin.

Ishni ko‘rib chiqishda qatnashish huquqi bo‘lgan va Apellatsiya kengashi yig‘ilishi o‘tkaziladigan sana va joyi haqida xabardor qilingan istalgan shaxsning kelmay qolishi ishni ko‘rib chiqishga to‘siq bo‘la olmaydi.

Apellatsiya kengashi ishni ko‘rib chiqishda qatnashish huquqi bo‘lgan shaxslardan birortasi kelmaganligi oqibatida ushbu yig‘ilishda ishni ko‘rib chiqish imkoniyati yo‘qligini inobatga olib, kengash yig‘ilishi o‘tkaziladigan sanani boshqa kunga ko‘chirish huquqiga ega.

Ushbu bandning birinchi xatboshisida ko‘rsatilgan shaxslar Apellatsiya kengashining istalgan a’zosiga yoki butun tarkibiga nisbatan asoslangan raddiya berishi mumkin. Raddiya ishning mohiyatini ko‘rib chiqish boshlangunga qadar berilishi lozim.

Raddiya Apellatsiya kengashi a’zolari tomonidan ko‘rib chiqilishi kerak. Agar raddiya qanoatlantirilsa, apellatsiya yoki ariza boshqa tarkibda ko‘rib chiqiladi. Ishni ko‘rib chiqishda qatnashadigan shaxslar yig‘ilishning yangi sanasi va vaqti haqida ushbu Qoidalarning 16-bandida belgilangan tartibda xabardor etiladilar.

24. Apellatsiya kengashi bir shaxs yoki bir necha shaxsning bitta obyektga — muhofazalanayotgan yoki talabnoma berilgan ixtiro, foydali model, sanoat namunasi, seleksiya yutug‘i, tovar belgisi, tovar kelib chiqqan joy nomlari, integral mikrosxemalar topologiyasiga oid bir necha apellatsiyalari ko‘rib chiqishda ekanligini aniqlasa, tomonlarning roziligini olgan holda, bu apellatsiyalarni ko‘rib chiqishni bitta yig‘ilishda birlashtirishi mumkin. Apellatsiya kengashining qarori har bir ish bo‘yicha alohida chiqariladi.

Agar arizalar bir yoki bir necha shaxslar tomonidan berilgan bo‘lsa hamda ularda bitta tovar belgisi, xizmat ko‘rsatish belgisini O‘zbekiston Respublikasida hammaga ma’lum tovar belgisi sifatida e’tirof etish so‘ralayotgan bo‘lsa, Apellatsiya kengashi bir necha arizalarning ko‘rib chiqilishini birlashtirishi mumkin.

25. Tomonlardan biri mazkur ish yurituvdan chiqib ketganda (apellatsiya yoki ariza bergan shaxsning vafot etishi, yuridik shaxsning tugatilishi, qayta tashkil etilishi va shu kabilar), Apellatsiya kengashi asoslangan ariza bo‘yicha ushbu tomonni merosxo‘ri yoki huquqiy vorislari bilan almashtiradi. Huquqiy vorislik apellatsiya jarayonining istalgan bosqichida amalga oshirilishi mumkin.

26. Ishning mohiyatidan kelib chiqib, qo‘shimcha materiallar va ma’lumotlar taqdim etishning zarurati paydo bo‘lsa, qo‘shimcha materiallar va ma’lumotlar uch oy ichida topshiriladi.

Qo‘shimcha materiallar va ma’lumotlar taqdim etuvchi tomonning rasmiy iltimosnomasiga ko‘ra, qo‘shimcha materiallar va ma’lumotlarni taqdim etish muddati Apellatsiya kengashi tomonidan uch oydan oshmagan muddatga uzaytirilishi mumkin. Rasmiy iltimosnoma bilan so‘ralgan ma’lumotlarga javob berish muddatini uzaytirish uchun uzaytirishning har bir oyi uchun belgilangan patent boji to‘langanligini tasdiqlovchi hujjat taqdim etiladi. Bu holda, apellatsiya yoki arizani ko‘rib chiqish muddatlarining o‘tishi uzaytirish muddati davomida to‘xtatiladi.

Belgilangan patent boji to‘langanligini tasdiqlovchi hujjat taqdim etilmasa, rasmiy iltimosnoma berilmagan deb hisoblanadi.

27. Apellatsiya kengashi a’zolari ish ko‘rib chiqilishida va qaror qabul qilishda mustaqildirlar hamda O‘zbekiston Respublikasi qonunchiligiga, O‘zbekiston Respublikasining intellektual mulk obyektlari muhofazasi sohasidagi xalqaro shartnomalariga, shuningdek O‘zbekiston Respublikasi Vazirlar Mahkamasining 2003-yil 1-iyuldagi 298-sonli qarori bilan tasdiqlangan “O‘zbekiston Respublikasi Intellektual mulk agentligining Apellatsiya kengashi to‘g‘risida”gi nizomga amal qiladilar.

28. Apellatsiya kengashida ishni ko‘rib chiqishda tijorat va xizmat sirlari oshkor etilishini oldini olish maqsadida, kengash ishtirokchilari istalgan birining rasmiy iltimosnomasi bo‘yicha ishni ko‘rib chiqish maxfiyligi haqida ajrim chiqaradi. Bu holda, kengash yig‘ilishiga kiritilgan ishtirokchilarning hammasi Apellatsiya kengashida ishni ko‘rib chiqish munosabati bilan o‘zlariga ma’lum bo‘ladigan tijorat va xizmat sirlaridan iborat bo‘lgan aniq ma’lumotlarning maxfiyligini saqlash haqida majburiyatni oladilar.

29. Apellatsiya kengashida ishni yuritish o‘zbek yoki rus tillarida olib boriladi. Ish yuritish olib boriladigan tilni tushunmaydigan shaxslarga materiallar bilan tarjimon orqali tanishish va Apellatsiya kengashi ishida qatnashish, shuningdek kengash yig‘ilishida o‘zbek yoki rus tillarida so‘zga chiqish huquqi bilan ta’minlanadi.

Apellatsiya kengashi yig‘ilishida yozib olish apparaturalaridan foydalanish kengash a’zolarining roziligi bilan amalga oshirilishi mumkin.

30. Apellatsiya yoki arizani ko‘rib chiqish Apellatsiya kengashi raisining ishning mohiyatini bayon qiladigan ma’ruzasi bilan boshlanadi. Ishni ko‘rishning keyingi bosqichlari odatda quyidagilardan iborat bo‘ladi:

apellatsiya yoki ariza bergan shaxs va/yoki uning vakili, shu jumladan patent vakilining so‘zi;

ko‘rib ishga jalb qilingan ekspertning so‘zi;

chiqishda ishtirok etuvchi shaxslarning Apellatsiya kengashi a’zolari va yig‘ilish ishtirokchilarining savollariga javoblari;

ko‘rib chiqishda ishtirok etuvchi shaxslar tomonidan oldingi so‘zlangan nutqlarning to‘ldirilishi.

31. Apellatsiya kengashi yig‘ilishining bayonnomasi ovoz berish huquqiga ega bo‘lmagan Apellatsiya kengashi kotibi tomonidan olib boriladi.

Apellatsiya kengashi yig‘ilishining bayonnomasi Apellatsiya kengashi raisi va Apellatsiya kengashi kotibi tomonidan imzolanadi.

32. Ishni ko‘rib chiqishda har bir tomon o‘z talablarining asosi sifatida keltirgan dalillarni isbotlaydi.

Apellatsiyani ko‘rib chiqishda isbot va dalillar tomonlar va boshqa ishtirokchilar tarafidan yozma ravishda taqdim qilinadi hamda nusxasi barcha ishtirokchilarga tarqatiladi.

Agar taqdim qilingan isbotlar yetarli bo‘lmasa, Apellatsiya kengashi tomonlar va apellatsiya jarayonining boshqa ishtirokchilariga qo‘shimcha isbotlar taqdim etishni taklif qiladi.

33. Tomonlardan biri boshqa tomonning nuqtai nazari asosli va qonuniyligini yozma ravishda tan olgan hamda nizodan voz kechgan holda, Apellatsiya kengashi apellatsiya bo‘yicha ish yuritishni to‘xtatadi. Apellatsiya kengashiga xuddi o‘sha tomonlar orasidagi o‘sha ish va o‘sha asoslar bo‘yicha takroriy murojaat etish ushbu ishni hal qilish uchun muhim ahamiyatga ega bo‘lgan yangidan paydo bo‘lgan holatlar aniqlanganda mumkin bo‘ladi.

34. Apellatsiya kengashi apellatsiyani ko‘rib chiqish natijasi bo‘yicha apellatsiyani qanoatlantirish, qisman qanoatlantirish yoki apellatsiyani qanoatlantirishni rad etish to‘g‘risida qaror qabul qiladi.

Apellatsiya kengashi arizani ko‘rib chiqish natijasi bo‘yicha O‘zbekiston Respublikasida hammaga ma’lum tovar belgilari ro‘yxatini e’tirof etish to‘g‘risida yoki e’tirof etishni rad etish to‘g‘risida qaror qabul qiladi.

Tovar kelib chiqqan joy nomini ro‘yxatdan o‘tkazish bekor qilinganligi to‘g‘risidagi qaror qabul qilingan holda, Apellatsiya kengashi bir vaqtning o‘zida ushbu ro‘yxatdan o‘tkazilish bilan bog‘liq tovar kelib chiqqan joy nomidan foydalanish huquqi to‘g‘risidagi guvohnomalarni muddatidan avval to‘xtatish to‘g‘risida qaror qabul qiladi.

35. Apellatsiya kengashining qarori apellatsiya yoki ariza mohiyatini ko‘rib chiqish tugagandan so‘ng kengash a’zolarining yopiq yig‘ilishi natijasi bo‘yicha ko‘pchilik ovoz bilan qabul qilinadi. Apellatsiya kengashining qarori Apellatsiya kengashi raisi va nizoni ko‘rib chiqishda qatnashgan Apellatsiya kengashining barcha a’zolari tomonidan imzolanadi va tasdiqlangan sanadan e’tiboran qabul qilingan deb hisoblanadi.

Apellatsiya yoki arizani ko‘rib chiqishda qatnashgan shaxslar va Apellatsiya kengashi a’zolari kengash yig‘ilishida yoki Apellatsiya kengashi yig‘ilishi o‘tkazilgan sanadan e’tiboran uch ish kuni mobaynida yozma ravishda o‘zlarining alohida fikr-mulohazalarini bildirish huquqiga egadirlar.

Raislik qiluvchi Apellatsiya kengashi qarorining xulosa chiqarilgan qismini apellatsiya yoki arizani ko‘rib chiqishda qatnashganlarga o‘qib eshittiradi.

36. Apellatsiya kengashining qarori yozma shaklda bayon qilinadi hamda kirish, tavsiflash, asoslash va xulosa qismlaridan iborat bo‘lib, unda quyidagilar ko‘rsatiladi:

a) kirish qismida:

ish raqami (ro‘yxatga olish raqami) va apellatsiya yoki ariza topshirilgan sana;

qaror qabul qilingan sana;

Apellatsiya kengashining tarkibi;

apellatsiya yoki ariza topshirgan shaxsning va/yoki uning vakilining familiyasi, ismi, otasining ismi;

nizoni ko‘rib chiqishda qatnashgan boshqa shaxslarning familiyasi, ismi, otasining ismi;

b) tavsiflash qismida:

apellatsiya yoki ariza bergan shaxs talablarining qisqacha bayoni;

apellatsiya yoki ariza bergan shaxs mulohazasining qisqacha bayoni yoki davlat ekspertizasi vakilining tushuntirishlari;

apellatsiyada ishtirok etayotgan tomonlar va/yoki ularning vakillari tushuntirishlarining qisqacha bayoni;

v) asoslash qismida:

nizoning Apellatsiya kengashi tomonidan aniqlangan jihatlari;

tomonlarning iltimosnomalari va isbotlarini Apellatsiya kengashi qabul qilishiga yoki rad etishiga sabab bo‘lgan dalillar va faktlar;

Apellatsiya kengashi qaror qabul qilishda amal qilgan qonun hujjatlari;

g) xulosa qismida:

qo‘yilgan talablar bo‘yicha ularni qanoatlantirish, qisman qanoatlantirish yoki qanoatlantirishni rad etish to‘g‘risida, qabul qilingan qaror ustidan shikoyatnoma berish muddatlari va tartibi haqidagi ma’lumotlar.

37. Apellatsiya kengashining qarori apellatsiya yoki ariza bo‘yicha ish jildiga qo‘shib qo‘yiladi.

38. Apellatsiya kengashining qarori qabul qilingan sanadan e’tiboran besh ish kuni ichida apellatsiya yoki ariza bergan shaxsga va boshqa manfaatdor shaxslarga yuboriladi hamda Agentlikning o‘z rasmiy veb-saytida ham joylashtiriladigan rasmiy axborotnomasida e’lon qilinadi.

Agentlikning qaroriga qarshi apellatsiyalarni topshirish uchun to‘langan patent bojlari Apellatsiya kengashi tomonidan apellatsiya beruvchi foydasiga qaror chiqarilganda, O‘zbekiston Respublikasi Vazirlar Mahkamasining 2006-yil 20-apreldagi 65-sonli qarori bilan tasdiqlangan “Patent bojlari to‘g‘risida”gi nizomda belgilangan tartibda ushbu shaxsga qaytariladi.

39. Apellatsiya kengashining qarori ustidan qaror qabul qilingan sanadan e’tiboran olti oy ichida sudga shikoyat qilinishi mumkin.