Oʻzbekiston Respublikasining “Normativ-huquqiy hujjatlar toʻgʻrisida”gi Qonuni, Oʻzbekiston Respublikasi Vazirlar Mahkamasining “Qonun hujjatlarini turkumlashni takomillashtirish va huquqiy axborotlarni tarqatishni tartibga solish chora-tadbirlari toʻgʻrisida” 2000-yil 5-avgustdagi 304-sonli qarorini bajarish hamda Oʻzbekiston Respublikasi normativ-huquqiy hujjatlarining davlat hisobini yuritish tartibini takomillashtirish maqsadida, buyuraman:

1. Oʻzbekiston Respublikasi normativ-huquqiy hujjatlarining davlat hisobi toʻgʻrisidagi nizom ilovaga muvofiq tasdiqlansin.

2. Mazkur buyruq davlat roʻyxatiga olinsin va bu haqda Oʻzbekiston Respublikasi vazirliklari, davlat qoʻmitalari va idoralari normativ-huquqiy hujjatlarining Davlat reyestriga tegishli yozuv kiritilsin.

3. Qonun hujjatlarini turkumlash va huquqiy axborot boshqarmasi (A. Inanbabayev):

ushbu normativ-huquqiy hujjatni 10 kun muddat ichida barcha manfaatdor shaxslarga yetkazilishini va “Oʻzbekiston Respublikasi qonun hujjatlari toʻplami” — “Sobraniye zakonodatelstva Respubliki Uzbekistan”da nashr etilishini;

Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalarining Oʻzbekiston Respublikasi normativ-huquqiy hujjatlarining davlat hisobini yuritishga doir faoliyatini muvofiqlashtirishni va nazorat qilishni, shuningdek ularga tegishli metodik yordam koʻrsatilishini taʼminlasin.

4. Oʻzbekiston Respublikasi Adliya vazirining 2000-yil 30-dekabrdagi 178-mh-sonli “Oʻzbekiston Respublikasi meʼyoriy-huquqiy hujjatlarining davlat hisobi toʻgʻrisida”gi nizomni tasdiqlash va davlat roʻyxatidan oʻtkazish haqida”gi buyrugʻi (roʻyxat raqami 1000, 2000-yil 30-dekabr — Meʼyoriy hujjatlar axborotnomasi, 2000-yil, 24-son) oʻz kuchini yoʻqotgan deb topilsin va bu haqda Oʻzbekiston Respublikasi vazirliklari, davlat qoʻmitalari va idoralari normativ-huquqiy hujjatlarining Davlat reyestriga tegishli yozuv kiritilsin.

5. Mazkur buyruq davlat roʻyxatidan oʻtkazilgan kundan boshlab oʻn kundan keyin kuchga kiradi.

6. Ushbu buyruqning ijrosini nazorat qilish vazir oʻrinbosari E. Kanyazov zimmasiga yuklatilsin.

Mazkur Nizom Oʻzbekiston Respublikasi Vazirlar Mahkamasining 2000-yil 5-avgustdagi 304-sonli “Qonun hujjatlarini turkumlashni takomillashtirish va huquqiy axborotlarni tarqatishni tartibga solish chora-tadbirlari toʻgʻrisida”gi qaroriga (Oʻzbekiston Respublikasi Hukumatining qarorlari toʻplami, 2000-y., 8-son, 47-modda) muvofiq, Oʻzbekiston Respublikasining normativ-huquqiy hujjatlari davlat hisobi tartibini belgilaydi.

1. Oʻzbekiston Respublikasining normativ-huquqiy hujjatlari davlat hisobi oʻz ichiga ushbu hujjatlarni markazlashtirilgan tartibda yigʻish, hisobga olish, Oʻzbekiston Respublikasi Qonunchilik tarmoqlarining umumhuquqiy klassifikatori (roʻyxat raqami 2333, 2012-yil 2-mart) (Oʻzbekiston Respublikasi qonun hujjatlari toʻplami, 2012-y., 8-9-son, 98-modda) asosida normativ-huquqiy hujjatlarga kod berish, tizimlashtirilgan kartoteka yuritish, ular fondlarining nazorat holati hamda bunday hujjatlar toʻgʻrisidagi markazlashtirilgan axborotni barpo etish va saqlab turishni qamrab oladi.

2. Oʻzbekiston Respublikasi normativ-huquqiy hujjatlarining davlat hisobini Oʻzbekiston Respublikasi Adliya vazirligi (keyingi oʻrinlarda matnda Adliya vazirligi deb yuritiladi) amalga oshiradi.

3. Quyidagi normativ-huquqiy hujjatlarning davlat hisobi yuritilishi kerak:

a) Oʻzbekiston Respublikasining qonunlari;

b) Oʻzbekiston Respublikasi Oliy Majlisi palatalarining qarorlari;

v) Oʻzbekiston Respublikasi Prezidentining farmonlari, qarorlari va farmoyishlari;

g) Oʻzbekiston Respublikasi Vazirlar Mahkamasining qarorlari;

d) vazirliklar, davlat qoʻmitalari va idoralarining normativ-huquqiy hujjatlari;

e) Qoraqalpogʻiston Respublikasining normativ-huquqiy hujjatlari;

j) mahalliy davlat hokimiyati organlarining qarorlari.

4. Normativ-huquqiy hujjatlar ularning amal qilish muddatidan (doimiy yoki vaqtinchalik) va ularda mavjud boʻlgan maʼlumotlar xususiyatidan qatʼi nazar, davlat hisobiga olinishi kerak, mazkur Nizomning 5-bandida nazarda tutilgan hujjatlar bundan mustasno.

5. Quyidagilar davlat hisobiga olinmaydi:

a) “Maxfiy” va “Oʻta maxfiy” belgisi qoʻyilgan hujjatlar;

b) yakka tartibdagi xususiyatga ega boʻlgan hujjatlar:

shaxsiy tusdagi (lavozimga tayinlash, boshqa lavozimga oʻtkazish yoki lavozimdan ozod qilish, komissiya va boshqa kollegial organlar tarkibini tasdiqlash, orden va medallar bilan mukofotlash, faxriy va harbiy unvonlar berish, muayyan shaxslarga imtiyozlar berish toʻgʻrisidagi va boshqa shu kabilar);

muayyan korxona, muassasa, tashkilot va fuqarolarga yer uchastkalarini berish (realizatsiya qilish) toʻgʻrisidagi hujjatlar;

tezkor-farmoyishli tusdagi (bir martalik topshiriqlar);

v) loyihalarni koʻrib chiqish va tasdiqlash uchun kiritish toʻgʻrisidagi hujjatlar;

g) muqaddam belgilangan tartibni ijro etishni tashkil etishga yoʻnaltirilgan hamda yangi huquqiy normalarni oʻz ichiga olmagan, shu jumladan, butun mazmuni boshqa organlar va mansabdor shaxslarning hujjatlari toʻgʻrisida xabardor qilishdan iborat boʻlgan hujjatlar;

d) texnik hujjatlar, agar ular oʻz ichiga huquqiy normalarni olmasa;

e) tavsiya tusidagi hujjatlar;

j) sessiya, yigʻilish, konferensiyalarni chaqirish toʻgʻrisidagi hujjatlar;

z) normativ-huquqiy hujjatlarga rasmiy sharh berish toʻgʻrisidagi hujjatlar;

i) umumiy majburiy tusga ega boʻlmagan boshqa hujjatlar.

6. Mazkur Nizomning 5-bandida koʻrsatilgan hujjatlar belgilariga faqat qisman muvofiq keladigan hujjatlar oʻzining qolgan qismida davlat hisobiga olinishi kerak.

7. Oʻzbekiston Respublikasi Vazirlar Mahkamasining 2000-yil 5-avgustdagi 304-son qarori bilan tasdiqlangan “Normativ-huquqiy hujjatlarni tarqatish tartibi toʻgʻrisida”gi nizomning 13-bandiga muvofiq, mazkur Nizomning 3-bandi “a”, “b”, “v” va “g” kichik bandlarida koʻrsatilgan normativ-huquqiy hujjatlarning matnlari ularni qabul qilgan organlar tomonidan Adliya vazirligiga qabul qilingan kundan boshlab bir kun mobaynida qogʻoz va elektron shakllarda yuboriladi. Bunda normativ-huquqiy hujjatlarning elektron shakli Adliya vazirligiga elektron pochta tizimi orqali yuboriladi.

Mazkur Nizomning 3-bandi “d” kichik bandida koʻrsatilgan normativ-huquqiy hujjatlarning matnlari qogʻoz va elektron shakllarda Adliya vazirligining Idoraviy meʼyoriy hujjatlarni davlat roʻyxatidan oʻtkazish boshqarmasi tomonidan taqdim etiladi.

Mazkur Nizomning 3-bandi “e” va “j” kichik bandlarida koʻrsatilgan normativ-huquqiy hujjatlarning matnlari, tegishlicha Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalariga (keyingi oʻrinlarda matnda adliya boshqarmalari deb yuritiladi) ularni qabul qilgan organlar tomonidan qabul qilingan kundan boshlab uch kun ichida qogʻoz va elektron shakllarda yuboriladi.

8. Normativ-huquqiy hujjatlar Adliya vazirligiga va adliya boshqarmalariga muhrlangan holda davlat tilida oq-qora koʻrinishda yuboriladi, shuningdek bir vaqtning oʻzida rus tilida ham taqdim etilishi mumkin.

9. Adliya vazirligi va adliya boshqarmalari Oʻzbekiston Respublikasining normativ-huquqiy hujjatlari davlat hisobi reyestrlarini (keyingi oʻrinlarda matnda reyestrlar deb yuritiladi) ilovaga muvofiq yuritadi.

Adliya vazirligiga va adliya boshqarmalariga kelib tushgan normativ-huquqiy hujjatlar, mazkur Nizomning 11-bandiga muvofiq ushbu normativ-huquqiy hujjatlar toʻgʻrisidagi maʼlumotlarni reyestrlarga kiritish bilan davlat hisobiga olinadi.

Adliya boshqarmalari har chorakda hisobot choragidan keyingi oyning 3-kunigacha, davlat hisobiga olingan normativ-huquqiy hujjatlar toʻgʻrisida reyestrdan koʻchirma shaklida olingan qogʻoz va elektron shakllardagi maʼlumotlarni Adliya vazirligiga joʻnatadi.

10. Ilgari davlat hisobiga olingan normativ-huquqiy hujjatlarga oʻzgartirish va qoʻshimchalar kiritish yoki oʻz kuchini yoʻqotgan deb topish toʻgʻrisidagi normativ-huquqiy hujjatlar, mazkur Nizomning 9-bandiga muvofiq reyestrga kiritiladi.

11. Reyestrga kiritilgan tuzatishlar, oʻzgartishlar va qoʻshimchalar bunga vakolatli shaxslar imzosi bilan tasdiqlanadi.

12. Reyestrga normativ-huquqiy hujjatlar toʻgʻrisidagi quyidagi maʼlumotlar kiritiladi:

normativ-huquqiy hujjatning reyestrdagi tartib raqami;

normativ-huquqiy hujjatni reyestrga kiritish sanasi;

normativ-huquqiy hujjatning turi;

normativ-huquqiy hujjatni qabul qilgan organ(lar);

normativ-huquqiy hujjatning nomi;

normativ-huquqiy hujjatni qabul qilish sanasi va uning raqami (vazirliklar, davlat qoʻmitalari va idoralarining normativ-huquqiy hujjatlari uchun ularning Adliya vazirligida davlat roʻyxatiga olingan raqami va sanasi);

normativ-huquqiy hujjatning kuchga kirish sanasi va amal qilish muddati;

normativ-huquqiy hujjatning rasmiy nashrlarda eʼlon qilinishi toʻgʻrisidagi maʼlumotlar;

normativ-huquqiy hujjatga oʻzgartish va qoʻshimchalar kiritish hamda oʻz kuchini yoʻqotganligi toʻgʻrisidagi maʼlumotlar;

normativ-huquqiy hujjatning Oʻzbekiston Respublikasi Qonunchilik tarmoqlari umumhuquqiy klassifikatori boʻyicha kodi;

boshqa maʼlumotlar (izoh).

13. Normativ-huquqiy hujjatlarning matnlari xronologik tartibda tizimlashtiriladi va maxsus yigʻmajildlar hamda maʼlumotlarning elektron bazalarida saqlanadi.

14. Reyestrlar Oʻzbekiston Respublikasi axborot resursining tarkibiy qismi boʻlib, undagi davlat hisobiga olish uchun kelib tushgan normativ-huquqiy hujjatlarning matnlari esa rasmiy hisoblanadi.

15. Reyestrlar qogʻoz, elektron shakllarda yuritiladi va Adliya vazirligi va adliya boshqarmalarining rasmiy saytlarida eʼlon qilinadi.

16. Davlat hisobiga qabul qilingan normativ-huquqiy hujjatlar asosida Adliya vazirligida va adliya boshqarmalarida normativ-huquqiy hujjatlarning fondlari tashkil etiladi.

17. Adliya vazirligi va adliya boshqarmalari normativ-huquqiy hujjatlarni fondlarga oʻz vaqtida kiritilishini va tegishli oʻzgartishlar kiritish yoʻli bilan ularni nazorat holatida ushlab turishni taʼminlaydi.

18. Barcha yuridik va jismoniy shaxslar reyestrlarda joylashtirilgan maʼlumotlardan yozma murojaatlar asosida yoki Adliya vazirligining rasmiy saytidan axborot olishlari va undan foydalanishlari mumkin.

19. Reyestrlardan maʼlumot taqdim etish arizachining yozma murojaati asosida tegishlicha Adliya vazirligi va adliya boshqarmalari tomonidan amalga oshiriladi.

20. Reyestrlarda maʼlumot olish uchun yozma murojaatda normativ-huquqiy hujjatni qidirish uchun kerakli boʻlgan maʼlumotlar koʻrsatilishi lozim.

21. Reyestrlar va fondlarning saqlanishi, ishonchliligi uchun javobgarlik Adliya vazirligi va adliya boshqarmalarining mansabdor shaxslari zimmasiga yuklanadi.