Ўзбекистон Республикаси фуқароларининг чет элга боришларини соддалаштириш мақсадида ҳамда Ўзбекистон Республикаси Президентининг «Иқтисодий ислоҳотларни янада чуқурлаштириш, хусусий мулк манфаатларини ҳимоя қилиш ва тадбиркорликни ривожлантириш чора-тадбирлари тўғрисида» 1994 йил 21 январдаги Фармонига мувофиқ Вазирлар Маҳкамаси қарор қилади:

1. Ўзбекистон Республикаси фуқароларининг чет элга боришларининг Вақтинчалик тартиби 1-иловага мувофиқ тасдиқлансин.

2. Ўзбекистон Республикасининг дипломатик паспорти тўғрисидаги Низом ҳамда дипломатик паспорт бериладиган шахслар рўйхати 2-иловага мувофиқ тасдиқлансин.

3. Чет элга боришлари махсус келишувни талаб қилувчи мансабдор шахсларнинг рўйхати тасдиқлансин (3-илова).

4. Ўзбекистон Республикаси Вазирлар Маҳкамасининг «Ўзбекистон Республикаси делегациялари, мутахассислари ва ўқувчиларини чет элга хизмат сафарига юбориш тартиби тўғрисида» 1991 йил 25 октябрдаги 271-сон қарори ўз кучини йўқотган деб ҳисоблансин.

5. Ўзбекистон Республикаси Ташқи ишлар вазирлиги, Ички ишлар вазирлиги, Миллий хавфсизлик хизмати ўзларининг йўриқнома ҳужжатларини Президент Фармонининг 16-бандига ҳамда мазкур қарорга мувофиқлаштирсинлар.

1. Ўзбекистон Республикаси фуқаролари Ўзбекистон Республикаси қонун ҳужжатларига мувофиқ шахсий, жамоат ишлари бўйича, доимий яшаш учун, сайёҳлар сифатида, ўқишга, даволанишга ва хизмат сафарига чет элга эркин бориш ҳуқуқига эгадирлар.

Мазкур Тартиб Ўзбекистон Республикаси фуқароларининг бориш ҳужжатларини расмийлаштириш талаб қилинмайдиган МДҲ аъзолари бўлган давлатлардан бошқа хорижий мамлакатларга боришлари учун жорий қилинади.

2. Чет элга бориш учун фуқаролик паспортлари фуқароларнинг анкета-аризалари асосида уларнинг доимий яшаш жойи бўйича Ўзбекистон Республикаси Ички ишлар вазирлигининг органларида расмийлаштирилади.

3. Дипломатик паспортлар «Ўзбекистон Республикасининг дипломатик паспорти тўғрисидаги Низом»га мувофиқ Ўзбекистон Республикаси Ташқи ишлар вазирлиги томонидан берилади.

4. Чет эл хизмат сафарларини ташкил этиш ва улардан самарали фойдаланилиши учун масъулият хизмат сафарига юбориш тўғрисида қарор қабул қилган ташкилотлар ва органларнинг раҳбарлари зиммасига юклатилади.

1. Ўзбекистон Республикасининг чет элга бормоқчи бўлган фуқаролари тегишли шаклдаги анкета-аризани тўлдирган ва шахсини тасдиқловчи ҳужжатларни тақдим этган ҳолда, доимий яшаш жойи бўйича ички ишлар органларига мурожаат қиладилар.

2. Ички ишлар органлари фуқаронинг анкета-аризасини 15 кун муддатда кўриб чиқадилар ва унга чет элга бориши учун паспорт берадилар. Чет элга доимий яшашга кетаётган фуқаролар учун ҳужжатларни кўриб чиқиш муддати зарур ҳолларда 30 суткагача узайтирилиши мумкин.

Чет элга бораётган фуқаролар хорижий давлат визасини олиш учун тегишли давлатларнинг дипломатик ва консуллик ваколатхоналарига мурожаат қиладилар.

3. Анкета-ариза 18 ёшга тўлган фуқаролар томонидан тақдим этилади. 18 ёшга тўлмаган болалар бораётган ҳолларда уларнинг қонуний вакилларининг илтимосномалари тақдим этилади.

14 дан 18 ёшгача бўлган болалар доимий яшашга кетаётган ҳолларда кетаётганларнинг розилигини тасдиқловчи нотариус томонидан тасдиқланган ҳужжатлар ҳам тақдим этилиши керак.

Доимий яшаш учун кетилаётганда ота-она, эр-хотинларнинг розилигини тасдиқловчи нотариус томонидан тасдиқланган ҳужжатлар — улар вафот этган бўлсалар — вафот этганлик тўғрисидаги гувоҳномасининг нусхаси тақдим этилиши керак.

1. Хизмат сафарларига боришни расмийлаштириш юборувчи ташкилотнинг мурожаати ҳамда борувчи шахсларнинг анкета-аризалари асосида амалга оширилади. Фуқаролик паспортлари ички ишлар органлари томонидан расмийлаштирилади, бориладиган мамлакатга хизмат визалари Ўзбекистон Республикаси Ташқи ишлар вазирлиги орқали таъминланади.

Фуқаролик паспортини ва хизмат визасини расмийлаштиришнинг умумий муддати 20 кундан ошмаслиги керак.

2. Вазирликлар, давлат қўмиталари, идоралар ҳамда давлат ва хўжалик бошқаруви бошқа органлари аппаратининг масъул ходимларини хорижий мамлакатларга хизмат сафарига юбориш тўғрисидаги қарор тегишли вазирликлар, давлат қўмиталари, идоралар ва муассасалар раҳбарлари томонидан қабул қилинади.

3. Корхоналар, муассасалар, ташкилотлар ўқув юртлари раҳбарлари ва ходимларини хорижий мамлакатларга хизмат сафарига юбориш бу тузилмаларнинг ўзларининг қарори асосида амалга оширилади.

4. Қўшма корхоналар, кичик корхоналар, масъулияти чекланган жамиятлар, акционерлик корхоналари ва жамиятлари, фирмалар ва хусусий компаниялар, мулкчиликнинг барча шаклларидаги қишлоқ хўжалиги бирлашмалари раҳбарлари ва ходимлари чет элга ўзларининг мустақил қарорлари асосида борадилар.

5. Давлат контракти асосида хорижий мамлакатларга хизмат сафарига юбориш тўғрисидаги қарор юборувчи ташкилот томонидан қабул қилинади.

Хусусий контрактлар бўйича ишлаш учун чет элга бориш Меҳнат вазирлиги томонидан расмийлаштирилади.

6. Ўқувчилар, аспирантлар, олимлар ва мутахассислар хорижий мамлакатларга ўқишга, стажировкага юборилаётганда қарорни уларни юборувчи муассаса қабул қилади.

7. Ҳукуматлараро битимлар бўйича хорижий мамлакатларга юбориш тўғрисидаги қарор тегишли вазирликлар ва идораларнинг тақдимномаси бўйича Вазирлар Маҳкамаси томонидан қабул қилинади.

8. Жамоат ташкилотлари томонидан хорижий мамлакатларга хизмат сафарига юбориш тўғрисидаги қарор бу ташкилотларнинг раҳбар органи томонидан қабул қилинади.

9. Хизмат сафарларига бораётган шахслар давлат сири ҳисобланган маълумотлардан воқиф бўлсалар юборувчи ташкилотлар уларнинг анкета-аризаси билан биргаликда воқифлик даражаси тўғрисидаги хулосани тақдим этадилар.

1. Қуйидаги сабаблар чет элга бориш ҳуқуқини вақтинча чеклаш учун асос бўлиб хизмат қилиши мумкин:

а) агар шахс давлат сири ҳисобланган маълумотлардан воқиф бўлса ёки унинг чет элга боришига монелик қилувчи бошқа шартнома, контракт мажбуриятлари амалда бўлса — бу ҳолатларнинг амал қилиши тугагунга қадар;

б) агар шахсга нисбатан жиноий иш қўзғатилган бўлса — иш судда кўриб чиқилгунга қадар;

в) агар шахс суднинг ҳукми билан хавфли рецидивист деб тан олинган ёки милициянинг маъмурий назорати остида бўлса судланганлик бекор қилинмагун (олиб ташланмагун)га қадар ёки назорат қилиш тўхтатилгунгача;

г) агар шахс унга суд томонидан юклатилган мажбуриятларни ижро этишдан бўйин товлаётган бўлса — мажбуриятларни ижро этмагунга қадар;

д) агар шахс ўзи тўғрисида шак-шубҳасиз ёлғон маълумотларни берган бўлса;

е) агар судда шахсга нисбатан фуқаролик даъвоси қўзғатилган бўлса — иш кўриб чиқилгунга қадар;

ж) агар шахс чақириқ участкасида рўйхатга олинган ва ҳақиқий хизматга чақирилиши керак бўлса — ҳақиқий муддатли хизматни ўтагунга қадар ёки қонунга мувофиқ ундан озод қилингунга қадар;

2. Ушбу бўлимнинг 1-банди «а» кичик бандида назарда тутилган ҳоллар доимий яшаш учун чет элга жўнаб кетишга рухсат беришни рад этиш учун асос бўлиши мумкин.

Ушбу Тартибнинг IV бўлимида назарда тутилган асослар бўйича чет элга боришга рухсат беришнинг рад этилиши, жавоб беришнинг белгиланган муддатдан ортиқча кечиктирилиши фуқаро томонидан юқори органга шикоят қилиниши мумкин, бу орган бир ойдан кўп бўлмаган муддатда жавоб бериши керак, фуқаро унинг қароридан норози бўлганда судга шикоят қилиши мумкин. Мазкур Тартибнинг IV бўлим 1-бандининг «б» ва «ж» бандларида кўрсатилган сабаблар бўйича чет элга бориш ҳуқуқини чеклаш устидан шикоят қилиниши мумкин эмас.

1. Ўзбекистон Республикасининг дипломатик паспорти — бу Ўзбекистон Республикаси фуқароси Ўзбекистон Республикаси ташқарисига борганда, Ўзбекистон Республикасидан ташқарида яшаганда унинг шахсини ва мақомини тасдиқловчи Ўзбекистон Республикаси Ташқи ишлар вазирлиги томонидан берилган ҳужжатдир.

2. Ўзбекистон Республикасининг дипломатик паспорти Ўзбекистон Республикасидан дунёнинг барча мамлакатларига бориш учун ҳақиқийдир.

3. Ўзбекистон Республикаси Ташқи ишлар вазирлиги Ўзбекистон Республикаси Ҳукумати номидан хорижий давлатларнинг барча ваколатли органларидан Ўзбекистон Республикасининг дипломатик паспортини кўрсатувчиларни эркин ва тўсиқсиз ўтказиб юборишларини ва зарурат бўлганда уларга ҳар қанақа кўмак беришларини ва ҳимоя қилишларини илтимос қилади.

4. Дипломатик паспорт беш йил муддатга берилади.

5. Дипломатик паспорт мазкур Низомнинг иловасида кўрсатилган мансабдор шахсларга берилади.

6. Дипломатик паспорт эр-хотинларга, дипломатик паспорти бўлган шахслар билан биргаликда борувчи 18 ёшгача бўлган болаларга ҳам берилади. 16 ёшгача бўлган болалар ота-оналаридан бирининг паспортига ёзиб қўйиладилар. Айрим ҳолларда болаларга улар балоғат ёшига етгунларига қадар ҳам дипломатик паспорт берилиши мумкин.

7. Дипломатик паспортлар Ўзбекистон Республикаси Ташқи ишлар вазирлигининг Консуллик бошқармаси томонидан берилади. Дипломатик паспортлардаги барча ёзувлар Ўзбекистон Республикаси Ташқи ишлар вазирлигининг Консуллик бошқармаси томонидан амалга оширилади. Паспорт эгаси ҳақидаги маълумотлар ўзбек, рус ва инглиз тилларида киритилади.

8. Дипломатик паспорт чет элда йўқотиб қўйилган ҳолларда паспорт эгаси тезлик билан бу ҳақда Ўзбекистон Республикасининг консуллик муассасасига, агар паспорт республика ҳудудида йўқотиб қўйилган бўлса — Ўзбекистон Республикаси Ташқи ишлар вазирлигига хабар бериши шарт.

Йўқотиб қўйилган паспорт ўрнига янги паспорт белгиланган ички тартибга мувофиқ берилади.

9. Дипломатик паспортлар бепул берилади.

10. Дипломатик паспорт Ўзбекистон Республикасининг мулки ҳисобланади.

11. Дипломатик паспортларнинг бланклари қатъий ҳисобда турадиган ҳужжатдир. Улар Ўзбекистон Республикаси Ташқи ишлар вазирлигининг буюртмаларига кўра тайёрланади.

Дипломатик паспортларни ҳисобга олиш, сақлаш, йўқ қилиш Ўзбекистон Республикаси Ташқи ишлар вазирлиги томонидан амалга оширилади.

12. Фуқаролар чет эл сафаридан қайтиб келганларида дипломатик паспортлар бир ҳафта муддатда уларни сақлаш ва фойдаланиш масъулияти юклатилган Ўзбекистон Республикаси Ташқи ишлар вазирлигига топширилиши керак.

13. Низом қоидаларини бузиш Ўзбекистон Республикасининг дипломатик паспортидан фойдаланиш ҳуқуқидан маҳрум қилади. Дипломатик паспортдан фойдаланиш ҳуқуқидан маҳрум қилиш ҳақидаги масала консуллик хизматининг тақдимномасига кўра Ташқи ишлар вазирлиги томонидан кўриб чиқилади.

14. Ўзбекистон Республикаси Ташқи ишлар вазирлиги халқаро ҳамжамиятга янги дипломатик паспортларнинг намуналари тақдим этилишини таъминлайди.

15. Ўзбекистон Республикасининг дипломатик паспортлари муомалага жорий қилиниши билан Ўзбекистон Республикаси фуқаролигига тегишлилик ҳақида белгиси бўлган собиқ ССР Иттифоқининг дипломатик паспортлари ҳақиқий эмас деб ҳисоблансин.

Ўзбекистон Республикасининг Президенти

Ўзбекистон Республикаси Президентининг Давлат маслаҳатчилари

Ўзбекистон Республикаси Президенти Котибиятининг мудири

Ўзбекистон Республикаси Президенти Аппарати Ишлар бошқарувчиси ва унинг ўринбосарлари

Ўзбекистон Республикаси Президентининг ёрдамчилари

Ўзбекистон Республикаси Президенти хавфсизлик хизматининг бошлиғи

Ўзбекистон Республикаси Президентининг матбуот котиби

Ўзбекистон Республикаси Олий Кенгашининг раиси

Ўзбекистон Республикаси Олий Кенгаши Раисининг ўринбосарлари

Ўзбекистон Республикаси Олий Кенгаши парламентлараро алоқалар бўлимининг мудири

Ўзбекистон Республикасининг Бош вазири

Ўзбекистон Республикаси Бош вазирининг биринчи ўринбосари

Ўзбекистон Республикаси Бош вазирининг ўринбосарлари

Ўзбекистон Республикаси вазирлари, давлат қўмиталарининг раислари ва уларнинг биринчи ўринбосарлари

Ўзбекистон Республикаси Фанлар академиясининг Президенти

Ўзбекистон Республикаси Марказий банки Бошқарувининг раиси

Ўзбекистон Республикаси Ташқи иқтисодий фаолият Миллий банки Бошқарувининг раиси

Фавқулодда вазиятлар бўйича давлат комиссиясининг раиси

Ўзбекистон Республикаси Миллий хавфсизлик хизматининг раиси ва унинг биринчи ўринбосари

Ўзбекистон Республикаси Бош прокурори ва унинг биринчи ўринбосари

Ўзбекистон Республикаси Конституциявий Судининг раиси

Ўзбекистон Республикаси Олий Судининг раиси ва унинг биринчи ўринбосари

Ўзбекистон Республикаси Олий Хўжалик Судининг раиси ва унинг биринчи ўринбосари

Қорақалпоғистон Республикаси Олий Кенгашининг раиси

Қорақалпоғистон Республикаси Вазирлар Кенгашининг раиси

Вилоятлар ва Тошкент шаҳар ҳокимлари

Қорақалпоғистон Республикаси Олий Кенгаши раисининг ўринбосарлари

Қорақалпоғистон Республикаси Вазирлар Кенгаши раисининг ўринбосарлари

Ўзбекистон Республикаси Ташқи ишлар вазирлигининг дипломатик ходимлари

Халқаро ташкилотлардаги дипломатик лавозимга тенглаштириладиган лавозимларда ишлаётган Ўзбекистон Республикаси ваколатхоналарининг ходимлари

Ўзбекистон Республикаси Ташқи ишлар вазирлигининг дипломатик курьерлари

Миллий хавфсизлик хизмати Раисининг ўринбосарлари

Мудофаа вазирининг ўринбосарлари

Ички ишлар вазирининг ўринбосарлари

Ҳарбий атташе, ҳарбий-ҳаво кучлари атташеси ва уларнинг ёрдамчилари

Ўзбекистон Республикаси Қуролли Кучлари қўшин турлари қўмондонлари

Ўзбекистон Республикасининг савдо вакиллари, Ўзбекистон Республикаси савдо ваколатхонасининг маслаҳатчилари ва атташелари

Давлат ва Ҳукумат расмий делегацияларининг аъзолари