Ҳужжат кучини йўқотган " " 06.12.2019
Ўзбекистон Республикаси Вазирлар Маҳкамасининг
қарори
Ўзбекистон Республикаси фуқароларининг чет элга боришлари тартибини ва Ўзбекистон Республикасининг дипломатик паспорти тўғрисидаги низомни тасдиқлаш ҳақида
[Кўчирма]
 LexUZ шарҳи
Мазкур қарор Ўзбекистон Республикаси Вазирлар Маҳкамасининг 2019 йил 5 декабрдаги 970-сонли «Ўзбекистон Республикаси биометрик паспорт тизими такомиллаштирилиши муносабати билан Ўзбекистон Республикаси Ҳукуматининг айрим қарорларини ўз кучини йўқотган деб ҳисоблаш тўғрисида»ги қарорига асосан ўз кучини йўқотган.
Ўзбекистон Республикаси Президентининг «Ўзбекистон Республикасида паспорт тизими тўғрисидаги Низом»ни амалга киритиш ҳақида» 1994 йил 23 декабрдаги Фармонини ҳисобга олган ҳолда Ўзбекистон Республикаси фуқароларининг чет элга боришлари тартибини янада соддалаштириш мақсадида Вазирлар Маҳкамаси қарор қилади:
1. Вазирлар Маҳкамасининг «Ўзбекистон Республикаси фуқароларининг чет элга боришларининг тартиби тўғрисида» 1994 йил 17 мартдаги 141-сон қарори ўз кучини йўқотган деб ҳисоблансин.
2. Қуйидагилар тасдиқлансин:
Ўзбекистон Республикаси фуқароларининг чет элга чиқиши ва Ўзбекистон Республикаси ҳудудига кириши тартиби 1-иловага мувофиқ;
(2-банднинг иккинчи хатбошиси Ўзбекистон Республикаси Вазирлар Маҳкамасининг 2011 йил 7 июлдаги 200-сонли қарори таҳририда — ЎР ҚҲТ, 2011 й., 29-сон, 301-модда)
Ўзбекистон Республикасининг дипломатик паспорти тўғрисидаги Низом ва дипломатик паспорт бериладиган шахслар рўйхати 2, 3-иловаларга мувофиқ;
Олдинги таҳрирга қаранг.
(2-банднинг тўртинчи хатбошиси Ўзбекистон Республикаси Президентининг 2014 йил 5 мартдаги ПҚ-2142-сонли қарорига асосан чиқарилган — ЎР ҚҲТ, 2014 й., 10-сон, 103-модда)
Олдинги таҳрирга қаранг.
(2-банднинг бешинчи хатбошиси Ўзбекистон Республикаси Президентининг 2014 йил 5 мартдаги ПҚ-2142-сонли қарорига асосан чиқарилган — ЎР ҚҲТ, 2014 й., 10-сон, 103-модда)
3. Ўзбекистон Республикаси Ички ишлар вазирлиги, Ташқи ишлар вазирлиги ва Миллий хавфсизлик хизмати ўзларининг йўриқнома ҳужжатларини мазкур қарорга мувофиқлаштирсинлар.
Вазирлар Маҳкамасининг Раиси И. КАРИМОВ
Тошкент ш.,
1995 йил 6 январь,
8-сон
Вазирлар Маҳкамасининг
1995 йил 6 январдаги 8-сон қарорига
1-ИЛОВА
Олдинги таҳрирга қаранг.
Ўзбекистон Республикаси фуқароларининг чет элга чиқиши ва Ўзбекистон Республикаси ҳудудига кириши
ТАРТИБИ
(1-илованинг номи Ўзбекистон Республикаси Вазирлар Маҳкамасининг 2011 йил 7 июлдаги 200-сонли қарори таҳририда — ЎР ҚҲТ, 2011 й., 29-сон, 301-модда)
I. Умумий қоидалар
1. Ўзбекистон Республикаси фуқаролари, Ўзбекистон Республикасининг қонун ҳужжатларида белгиланган чеклашлардан ташқари, чет элга эркин чиқиш ва ушбу Низомда назарда тутилган тартибда Ўзбекистон Республикасига келиш ҳуқуқига эгадирлар.
2. Ушбу Низом Ўзбекистон Республикаси фуқароларининг хорижий давлатларга чиқишларига татбиқ этилади, Ўзбекистон Республикасининг халқаро шартномаларига мувофиқ уларга кириш учун кириш визаларини расмийлаштириш талаб этилмайдиган хорижий давлатлар бундан мустасно.
(2-банд Ўзбекистон Республикаси Вазирлар Маҳкамасининг 2015 йил 22 октябрдаги 301-сонли қарори таҳририда — ЎР ҚҲТ, 2015 й., 42-сон, 539-модда)
3. Чет элга вақтинча чиқаётганда фуқароларга чет элга бориш учун 2 йил мобайнида амал қиладиган рухсатнома ёзуви стикери (кейинги ўринларда стикер деб юритилади) расмийлаштирилади. Фуқаролар кўрсатилган муддат мобайнида бир неча марта чет элга чиқиши мумкин. Стикернинг амал қилиш муддати паспортнинг амал қилиш муддатидан ошмаслиги керак.
Доимий яшаш учун чет элга чиқишда фуқароларга амал қилиш муддатисиз стикер расмийлаштирилади.
Ўзбекистон Республикаси Қуролли Кучлари ҳарбий хизматчиларининг чет элга чиқиши Ўзбекистон Республикасининг қонун ҳужжатларига мувофиқ расмийлаштирилади. Ҳарбий хизматчиларга стикер ҳарбий қисм (муассаса) жойлашган жой бўйича расмийлаштирилади.
4. Биометрик дипломатик паспортлар бўйича чет элга чиқиш Ўзбекистон Республикасининг биометрик дипломатик паспорти тўғрисидаги низомга мувофиқ Ўзбекистон Республикаси Ташқи ишлар вазирлиги томонидан расмийлаштирилади.
(4-банд Ўзбекистон Республикаси Вазирлар Маҳкамасининг 2013 йил 14 октябрдаги 281-сонли қарори таҳририда — ЎР ҚҲТ, 2013 й., 42-сон, 557-модда)
5. Ходимни хорижий хизмат сафарига юбориш тўғрисида тақдим этилган ҳужжатларнинг ишончлилиги юзасидан жавобгарлик, мулкчилик шаклларидан қатъи назар, хизмат сафарига юбориш ҳақида қарор қабул қилган ташкилотлар ва муассасалар раҳбарлари зиммасига юкланади.
6. Чет элга чиқиш учун рухсатнома ёзуви стикери фуқароларнинг доимий рўйхатда турган жойлари (ҳарбий хизматчилар учун — ҳарбий қисм (муассаса) жойлашган жой) бўйича Ўзбекистон Республикаси Ички ишлар вазирлиги, Қорақалпоғистон Республикаси Ички ишлар вазирлиги, вилоятлар ички ишлар бошқармалари, Тошкент шаҳар ички ишлар бош бошқармасининг Кириш-чиқиш ва фуқароликни расмийлаштириш бошқармаси, шунингдек Тошкент шаҳар ички ишлар бош бошқармасининг туман бўлинмалари (кейинги ўринларда КЧФР бўлинмалари деб юритилади) томонидан, шунингдек ушбу Тартибда назарда тутилган ҳолларда чет элдаги Ўзбекистон Республикаси консуллик муассасалари томонидан кириш-чиқиш ва фуқароликни расмийлаштириш бўлинмалари билан келишган ҳолда расмийлаштирилади.
(I-бўлим Ўзбекистон Республикаси Вазирлар Маҳкамасининг 2011 йил 7 июлдаги 200-сонли қарори таҳририда — ЎР ҚҲТ, 2011 й., 29-сон, 301-модда)
7. Ўзбекистон Республикасидан ёхуд Ўзбекистон Республикасининг халқаро шартномаларига мувофиқ уларга кириш учун кириш визаларини расмийлаштириш талаб этилмайдиган хорижий давлатлардан бошқа хорижий давлатларга стикер расмийлаштирмасдан чиқиш қонун ҳужжатларида белгиланган жавобгарликка олиб келади, Ўзбекистон Республикасининг халқаро шартномаларига мувофиқ уларга кириш учун кириш визаларини расмийлаштириш талаб этилмайдиган хорижий давлатлар ўртасида сафар қилиш бундан мустасно.
Стикернинг амал қилиш муддати чет элда тамом бўлиши Ўзбекистон Республикасига киришда, шунингдек бир хорижий давлатдан бошқасига сафар қилишда жавобгарликка тортиш учун асос бўлмайди, Ўзбекистон Республикасининг халқаро шартномаларига мувофиқ кириш визаларини расмийлаштириш талаб этилмайдиган хорижий давлатлардан бошқа хорижий давлатларга сафар қилиш бундан мустасно.
(7-банд Ўзбекистон Республикаси Вазирлар Маҳкамасининг 2015 йил 22 октябрдаги 301-сонли қарорига асосан киритилган — ЎР ҚҲТ, 2015 й., 42-сон, 539-модда)
II. Ўзбекистон Республикаси фуқароларининг чет элга боришларини расмийлаштириш тартиби
1. Чет элга бормоқчи бўлган фуқаролар, Ўзбекистон Республикасининг халқаро шартномаларига мувофиқ уларга кириш учун кириш визаларини расмийлаштириш талаб этилмайдиган хорижий давлатлар бундан мустасно, паспортини, белгиланган намунадаги анкета-аризани, давлат божи тўланганлиги тўғрисидаги квитанцияни, 35 х 45 мм ўлчамли 4 та фотосуратни, ҳарбий гувоҳномани (ҳарбий гувоҳнома мавжуд бўлмаган тақдирда чақирув ёшидаги шахслар учун мудофаа ишлари бўйича бўлимнинг белгиланган намунадаги маълумотномасини) тақдим этган ҳолда доимий рўйхатда турган жойдаги кириш-чиқиш ва фуқароликни расмийлаштириш бўлинмаларига (ҳарбий хизматчилар учун ҳарбий қисм (муассаса) жойлашган жой бўйича) мурожаат қиладилар.
(1-банд Ўзбекистон Республикаси Вазирлар Маҳкамасининг 2015 йил 22 октябрдаги 301-сонли қарори таҳририда — ЎР ҚҲТ, 2015 й., 42-сон, 539-модда)
2. Кириш-чиқиш ва фуқароликни расмийлаштириш бўлинмалари фуқаронинг мурожаатини 15 иш куни мобайнида кўриб чиқади ва чет элга чиқиш ҳуқуқига чекловлар учун асос бўлмаган тақдирда унинг паспортига стикер ёпиштиради.
Зарур тарзда расмийлаштирилган ҳужжатлар кириш-чиқиш ва фуқароликни расмийлаштириш бўлинмаларига берилган кун мурожаат қилинган сана деб ҳисобланади.
Амал қиладиган стикер ҳақиқий бўлмаган паспортдан янги паспортга кўчирилган ҳолларда, ушбу стикерни расмийлаштириш муддати 7 иш кунидан ошмаслиги керак.
Чет элга хизмат сафарига бораётган фуқароларга, улар ишлайдиган ташкилотларнинг мулкчилик шаклларидан қатъи назар, чет элга чиқиш ҳуқуқини чеклашлар учун асос бўлмаган тақдирда, стикерни расмийлаштириш учун ҳужжатларни кўриб чиқиш муддати 10 иш кунидан ошмаслиги керак.
Ўзбекистон Республикасидан ташқарига чиқишни талаб қиладиган шошилинч даволаниш заруриятини, оғир касаллик ҳолатларини ёки яқин қариндоши вафот этганлигини тасдиқловчи ҳужжатлар мавжуд бўлганда фуқарога ва унга ҳамроҳлик қилувчи шахсларга стикерни расмийлаштириш муддати, чет элга чиқиш ҳуқуқини чеклаш учун асос бўлмаган тақдирда, 5 иш кунидан ошмаслиги керак.
Чет элда доимий яшаш учун чиқиш ҳужжатларини расмийлаштиришда фуқароларнинг доимий рўйхатда турган жойларидаги кириш-чиқиш ва фуқароликни расмийлаштириш бўлинмалари аризачиларнинг мурожаатини 15 иш куни мобайнида кўриб чиқади ва фуқаронинг чет элга чиқишига тўсқинлик қилувчи ҳолатлар бўлмаган тақдирда, унинг паспортига доимий яшаш учун стикерни ёпиштиради. Қўшимча текширишлар ўтказиш зарур бўлганда ҳужжатларни кўриб чиқиш муддати 30 кунгача узайтирилиши мумкин.
Доимий яшаш учун чет элга чиқишда фуқаролар Ўзбекистон Республикаси ҳудудида доимий яшайдиган ўз ота-онасининг ва турмуш ўртоғининг (биргаликда чиқиш ҳолатлари бундан мустасно), шунингдек агар биргаликдаги никоҳдан болалар бўлса, Ўзбекистон Республикасида доимий яшайдиган собиқ турмуш ўртоғининг нотариал тасдиқланган розилигини, улар вафот этган ёки бедарак йўқолган ҳолларда эса — вафот этганлик тўғрисидаги гувоҳномани ёки суднинг шахсни бедарак йўқолган деб эътироф этиш ҳақидаги қарорини (нусхалари олиниб, асли қайтарилади) кириш-чиқиш ва фуқароликни расмийлаштириш бўлинмаларига тақдим этадилар.
(2-бандининг еттинчи хатбошиси Ўзбекистон Республикаси Вазирлар Маҳкамасининг 2017 йил 20 декабрдаги 1001-сонли қарори таҳририда — Қонун ҳужжатлари маълумотлари миллий базаси, 23.12.2017 й., 10/17/1001/0447-сон)
Ўзбекистон Республикаси фуқаролари хорижий давлат ҳудудига кириш визасини олиш учун тегишли хорижий давлатларнинг дипломатик ваколатхоналарига ёки консуллик муассасаларига мурожаат қиладилар.
3. Хусусий контрактлар бўйича меҳнат фаолияти билан шуғулланиш учун чет элга чиқишни расмийлаштириш белгиланган тартибда амалга оширилади.
4. Чет элга кетаётган ва давлат сири бўлган маълумотлардан хабардор бўлган шахсга нисбатан кетаётган шахснинг иш жойи бўйича ташкилоти тегишли органларга давлат сири бўлган маълумотлардан хабардорлик даражаси тўғрисидаги хулосани юборади.
5. Чет элга вақтинча яшашга кетган (хизмат сафарига, ўқишга, даволанишга, контракт бўйича ишлашга) ва Ўзбекистон Республикасининг дипломатик ваколатхонасида ёки консуллик муассасасида вақтинча консуллик ҳисобида турган Ўзбекистон Республикаси фуқаролари паспортнинг амал қилиш муддати тамом бўлганлиги ҳамда паспортда белгилар ва визалар қўйиш учун варақлар тугаганлиги, паспорт яроқсиз ҳолга келганлиги ёки йўқолганлиги, шунингдек стикерни расмийлаштириш муносабати билан паспорт алмаштирилган ҳолларда Ўзбекистон Республикасининг чет элдаги дипломатик ваколатхоналарига ва консуллик муассасаларига паспорт бериш ва чет элга чиқиш учун стикерни расмийлаштириш тўғрисида белгиланган шаклда ариза билан мурожаат қиладилар.
Ўзбекистон Республикасининг халқаро шартномаларига мувофиқ уларга кириш учун кириш визалари мавжудлиги талаб этилмайдиган хорижий давлатлардаги Ўзбекистон Республикаси фуқаролари стикерни расмийлаштириш учун Ўзбекистон Республикасининг тегишли дипломатик ваколатхоналарига ёки консуллик муассасаларига белгиланган шаклдаги ариза билан мурожаат қилишлари мумкин.
Фуқароларнинг аризалари дипломатик ваколатхоналар ёки консуллик муассасалари томонидан белгиланган тартибда расмийлаштирилади ва Ўзбекистон Республикаси Ташқи ишлар вазирлиги орқали паспортни расмийлаштириш учун Ўзбекистон Республикаси Вазирлар Маҳкамаси ҳузуридаги Давлат персоналлаштириш марказига ва стикерни расмийлаштириш учун Ўзбекистон Республикаси Ички ишлар вазирлигига қайта жўнатилади. Расмийлаштирилган ҳужжатлар эгасига топшириш учун Ташқи ишлар вазирлиги орқали Ўзбекистон Республикасининг тегишли дипломатик ваколатхонасига ёки консуллик муассасасига юборилади. Паспортни расмийлаштиришнинг тўлиқ даврий муддати 30 иш кунидан ошмаслиги керак.
(5-банд Ўзбекистон Республикаси Вазирлар Маҳкамасининг 2015 йил 22 октябрдаги 301-сонли қарори таҳририда — ЎР ҚҲТ, 2015 й., 42-сон, 539-модда)
6. Вақтинча яшаш учун чет элга кетган, у ерга ошкора келган ва чет элда доимий яшашга қарор қилган Ўзбекистон Республикаси фуқаролари доимий яшашга рухсатномани расмийлаштириш учун белгиланган шаклдаги ҳужжатлар билан Ўзбекистон Республикасининг тегишли консуллик муассасасига мурожаат қиладилар.
Консуллик муассасаси фуқароларнинг чет элда доимий яшаш учун қолдириш бўйича ҳужжатларини расмийлаштиради ва масалани белгиланган тартибда келишиш учун ҳужжатларни Ташқи ишлар вазирлиги орқали Ички ишлар вазирлигига юборади.
(II-бўлим Ўзбекистон Республикаси Вазирлар Маҳкамасининг 2011 йил 7 июлдаги 200-сонли қарори таҳририда — ЎР ҚҲТ, 2011 й., 29-сон, 301-модда)
III. Чет элга бориш ҳуқуқидаги чеклашлар
Қуйидаги сабаблар чет элга бориш ҳуқуқини чеклаш учун асос бўлиб хизмат қилиши мумкин:
а) агар шахс давлат сири ҳисобланган маълумотлардан воқиф бўлса ёки унинг чет элга боришига монелик қилувчи бошқа шартнома, контракт мажбуриятлари амалда бўлса — бу ҳолатларнинг амал қилиши тугагунга қадар;
б) агар шахсга нисбатан жиноий иш қўзғатилган бўлса — иш бўйича якуний қарор қабул қилингунга қадар;
(III-бўлимнинг учинчи хатбошиси Ўзбекистон Республикаси Вазирлар Маҳкамасининг 2011 йил 7 июлдаги 200-сонли қарори таҳририда — ЎР ҚҲТ, 2011 й., 29-сон, 301-модда)
в) агар шахс суднинг ҳукми билан алоҳида хавфли рецидивист деб тан олинган ёки ички ишлар органларининг маъмурий назорати остида бўлса — судланганлик бекор қилинмагун (олиб ташланмагун)га қадар ёки назорат қилиш тўхтатилгунгача;
(III-бўлимнинг тўртинчи хатбошиси Ўзбекистон Республикаси Вазирлар Маҳкамасининг 2011 йил 7 июлдаги 200-сонли қарори таҳририда — ЎР ҚҲТ, 2011 й., 29-сон, 301-модда)
г) агар шахсда суд томонидан юкланган ижро этилмаган мажбуриятлар бўлса — мажбуриятлар ижро этилгунга қадар;
(III-бўлимнинг бешинчи хатбошиси Ўзбекистон Республикаси Вазирлар Маҳкамасининг 2011 йил 7 июлдаги 200-сонли қарори таҳририда — ЎР ҚҲТ, 2011 й., 29-сон, 301-модда)
д) агар шахс ўзи тўғрисида қасддан сохта маълумотларни берган бўлса;
е) агар судда шахсга нисбатан фуқаролик даъвоси қўзғатилган бўлса — иш кўриб чиқилгунга қадар;
ж) агар шахс чақириқ участкасида рўйхатга олинган ва ҳақиқий муддатли ҳарбий хизматга чақирилиши керак бўлса — ҳақиқий муддатли хизматни ёки сафарбарлик чақируви захирасидаги хизматни ўтагунга қадар Ўзбекистон Республикасининг қонун ҳужжатларига мувофиқ ундан озод қилингунга қадар;
(III-бўлимнинг саккизинчи хатбошиси Ўзбекистон Республикаси Вазирлар Маҳкамасининг 2011 йил 7 июлдаги 200-сонли қарори таҳририда — ЎР ҚҲТ, 2011 й., 29-сон, 301-модда)
з) агар шахсга нисбатан Ички ишлар вазирлигида ёки Ташқи ишлар вазирлигида ваколатли органларнинг ушбу шахснинг чет элда бўлган вақтда келган мамлакати қонунларини бузганлиги (қонун бузилишлари рўйхати тегишли органлар томонидан белгиланади) тўғрисидаги ахбороти, шунингдек бориши мақсадга мувофиқ эмаслигини кўрсатадиган ахбороти мавжуд бўлса — ахборот ҳисобга олинган кундан бошлаб икки йил ўтгунга қадар.
Чет элга чиқиш ҳуқуқини чеклаш учун асослар рўйхатига кенгайтирилган изоҳ берилмайди.
(III-бўлим Ўзбекистон Республикаси Вазирлар Маҳкамасининг 2011 йил 7 июлдаги 200-сонли қарорига асосан хатбоши билан тўлдирилган — ЎР ҚҲТ, 2011 й., 29-сон, 301-модда)
IV. Чет элга бориш ҳуқуқи рад этилганлиги устидан шикоят қилиш тартиби
Ушбу Тартибнинг III бўлимида назарда тутилган асослар бўйича чет элга боришга рухсат беришнинг рад этилиши, жавоб беришнинг белгиланган муддатдан ортиқча кечиктирилиши устидан фуқаро юқори органга шикоят қилиши мумкин, бу орган бир ойдан кўп бўлмаган муддатда жавоб бериши керак, фуқаро унинг қароридан норози бўлганда судга шикоят қилиши мумкин. Мазкур Тартибнинг III бўлимнинг «а», «б», «ж» ва «з» кичик бандларида кўрсатилган сабаблар бўйича чет элга бориш ҳуқуқини чеклаш устидан шикоят қилиниши мумкин эмас.
(IV-бўлимнинг хатбошиси Ўзбекистон Республикаси Вазирлар Маҳкамасининг 2011 йил 7 июлдаги 200-сонли қарори таҳририда — ЎР ҚҲТ, 2011 й., 29-сон, 301-модда)
V. Фуқароларнинг Ўзбекистон Республикасига келиши
1. Чет элда вақтинча ёки доимий яшовчи Ўзбекистон Республикаси фуқаролари Ўзбекистон Республикаси фуқаросининг амалдаги паспорти ёки Ўзбекистон Республикасига қайтиб келишга сертификат мавжуд бўлганда Ўзбекистон Республикаси ҳудудига эркин кириш ҳуқуқига эгадир.
2. Паспортнинг амал қилиш муддати чет элда тугаган, у яроқсизланган ёки йўқолган ҳолларда, шунингдек қонун ҳужжатларида назарда тутилган бошқа ҳолларда (фамилияси, исми ва отасининг исми, туғилган санаси ўзгарган, ёзувларда ноаниқликлар ва хатолар аниқланган, варақлар ишлатиб бўлинган ва бошқа ҳолларда) чет элда доимий яшайдиган Ўзбекистон Республикаси фуқароси янги паспортни расмийлаштириш учун ўзи турган мамлакатдаги Ўзбекистон Республикасининг консуллик муассасасига мурожаат қилади.
Агар фуқаро турган мамлакатда Ўзбекистон Республикасининг консуллик муассасаси бўлмаса, фуқаро ўзи турган мамлакат консуллик округига кирадиган Ўзбекистон Республикасининг консуллик муассасасига мурожаат қилади.
3. Чет элда вақтинча турган ва ўзи турган мамлакатдаги Ўзбекистон Республикасининг консуллик муассасасида консуллик ҳисобида турмаган фуқаро, ушбу бўлимнинг 2-бандида кўрсатилган ҳолларда, Ўзбекистон Республикасига қайтишга сертификат олиш учун Ўзбекистон Республикасининг тегишли консуллик муассасасига мурожаат қилади.
4. Чет элда доимий яшайдиган ва Ўзбекистон Республикасига вақтинча келган Ўзбекистон Республикаси фуқароларига Ўзбекистон Республикасида бўлган вақтда паспортнинг амал қилиш муддати тугаган ёки у йўқолган ҳолларда, шунингдек мазкур бўлимнинг 2-бандида кўрсатилган бошқа ҳолларда паспорт бериш ёки алмаштириш ҳамда рухсатнома ёзуви стикерини расмийлаштириш Ўзбекистон Республикаси Ташқи ишлар вазирлиги томонидан амалга оширилади.
5. Чет элда доимий яшайдиган ва Ўзбекистон Республикасига доимий яшаш учун қайтишни ният қилган фуқаролар Ўзбекистон Республикасининг чет элдаги консуллик муассасасидаги консуллик ҳисобидан чиқишлари лозим. Фуқаролар Ўзбекистон Республикаси ҳудудида турган тақдирда, улар консуллик ҳисобидан чиқариш учун Ташқи ишлар вазирлигига мурожаат қиладилар.
(V-бўлим Ўзбекистон Республикаси Вазирлар Маҳкамасининг 2011 йил 7 июлдаги 200-сонли қарорига асосан киритилган — ЎР ҚҲТ, 2011 й., 29-сон, 301-модда)
Вазирлар Маҳкамасининг
1995 йил 6 январдаги 8-сон қарорига
2-ИЛОВА
Ўзбекистон Республикасининг дипломатик паспорти тўғрисида
НИЗОМ
1. Ўзбекистон Республикаси фуқаросининг дипломатик паспорти Ўзбекистон Республикасидан ташқарига чиқилганда, у ерда бўлинганда ва вақтинча яшаб турилганда Ўзбекистон Республикаси фуқаросилигини, унинг эгасининг шахсини ва мақомини тасдиқловчи ҳужжат бўлиб ҳисобланади.
2. Дипломатик паспорт рўйхати Ўзбекистон Республикаси Вазирлар Маҳкамаси томонидан тасдиқланадиган мансабдор шахсларга, шунингдек, чет элга доимий иш жойига кетаётган дипломатик паспортга эга бўлган шахсларнинг эрлари (хотинлари)га ва уларнинг қарамоғида бўлган болаларга берилади.
3. Ўзбекистон Республикаси фуқаросининг дипломатик паспорти Ўзбекистон Республикаси Ташқи ишлар вазирлиги томонидан берилади.
Дипломатик паспортни бериш тартиби Ўзбекистон Республикаси Ташқи ишлар вазирлиги томонидан белгиланади.
4. Ўзбекистон Республикаси Ташқи ишлар вазирлиги Ўзбекистон Республикаси ҳукумати номидан хорижий давлатларнинг барча ваколатли органларидан Ўзбекистон Республикаси фуқаросининг дипломатик паспортини кўрсатувчиларни эркин ва тўсиқсиз ўтказиб юборишлари ва зарур бўлган холларда уларга ҳар қандай ёрдамни беришлари ва ҳимоя қилишлари тўғрисида илтимос қилади.
5. Ўзбекистон Республикаси фуқаросининг дипломатик паспорти Ўзбекистон Республикасининг барча фуқароси учун ягона бўлган намунадаги ўзбек, рус ва инглиз тилларида тайёрланади.
6. Ўзбекистон Республикаси фуқаросининг дипломатик паспортига қуйидаги маълумотлар ўзбек, рус ва инглиз тилларида киритилади:
фамилияси, исми, отасининг исми;
туғилган йили, куни, ойи;
туғилган жойи;
миллат/фуқаролиги;
жинси;
паспорт берилган муддат ва унинг амалда бўлиш муддатининг тугаши;
паспортни берган органнинг номи.
7. Ўзбекистон Республикаси фуқаросининг дипломатик паспортидаги ёзувлар Ўзбекистон Республикаси Ташқи ишлар вазирлигининг Консуллик бошқармаси томонидан амалга оширилади.
8. Ўзбекистон Республикаси фуқаросининг дипломатик паспорти беш йил муддатга берилади.
9. Дипломатик паспорт чет элда йўқотиб қўйилган тақдирда паспорт эгаси ўзи турган мамлакатдаги Ўзбекистон Республикасининг дипломатик ваколатхонасига ёки консуллик муассасасига, паспорт республика ҳудудида йўқотиб қўйилганда эса — Ўзбекистон Республикаси Ташқи ишлар вазирлигига тезлик билан бу ҳақда хабар беришга мажбурдир.
Йўқотиб қўйилган паспорт ўрнига янги дипломатик паспорт Ўзбекистон Республикаси Ташқи ишлар вазирлиги томонидан тасдиқланган тартибда берилади.
10. Ўзбекистон Республикаси фуқаросининг дипломатик паспорти Ўзбекистон Республикаси Ташқи ишлар вазирлиги томонидан қуйидаги ҳолларда алмаштирилади:
фамилияси, исми, отасининг исми ўзгарганда;
ёзувларда ноаниқликлар аниқланганда;
визалар учун белгиланган варақлар тўлганда;
амалда бўлиш муддати тугаганда;
фойдаланиш учун яроқсиз ҳолда бўлиб қолганда.
Ўзбекистон Республикаси фуқаросининг дипломатик паспортини алмаштириш тартиби Ўзбекистон Республикаси Ташқи ишлар вазирлиги томонидан тасдиқланади.
11. Ўзбекистон Республикаси фуқаросининг дипломатик паспорти бепул берилади.
12. Дипломатик паспорт Ўзбекистон Республикасининг мулки ҳисобланади.
13. Дипломатик паспортнинг бланклари қатъий ҳисобда турувчи ҳужжат бўлиб ҳисобланади. Улар Ўзбекистон Республикаси Ташқи ишлар вазирининг талабномасига кўра тайёрланади.
Дипломатик паспортларни ҳисобга олиш, сақлаш, йўқ қилиш Ўзбекистон Республикаси Ташқи ишлар вазирлиги томонидан амалга оширилади.
14. Дипломатик паспорт республикадан ташқарига чиқиб кетиш чоғида Ўзбекистон Республикаси фуқароси паспортининг ўрнига берилади.
Фуқаролар чет эл сафарларидан қайтиб келганларида дипломатик паспортлар бир ҳафта муддатда паспортларни сақлаш ва белгиланган тартибда фойдаланиш жавобгарлиги юкланадиган Ўзбекистон Республикаси Ташқи ишлар вазирлигида Ўзбекистон Республикаси фуқароси паспортига алмаштириб берилиши керак.
15. Мазкур Низомнинг 2-бандида кўрсатилган рўйхатга киритилган мансабдор шахс иш жойини ўзгартирган ва унинг янги лавозими ушбу рўйхатга киритилмай қолган ҳолларда, мазкур шахс дипломатик паспортдан фойдаланиш ҳуқуқини йўқотади.
16. Дипломатик паспортни гаровга қабул қилиш ва бериш тақиқланади.
17. Мазкур Низом қоидаларини бузиш Ўзбекистон Республикаси фуқаросининг дипломатик паспортидан фойдаланиш ҳуқуқидан маҳрум қилади. Дипломатик паспортдан фойдаланиш ҳуқуқидан маҳрум қилиш тўғрисидаги масала Ўзбекистон Республикаси Ташқи ишлар вазирлиги томонидан ҳал этилади.
18. Ўзбекистон Республикаси Ташқи ишлар вазирлиги Ўзбекистон Республикаси фуқароси дипломатик паспортининг намуналарини халқаро ҳамжамиятга тақдим этишни таъминлайди.
Вазирлар Маҳкамасининг
1995 йил 6 январдаги 8-сон қарорига
3-ИЛОВА
Ўзбекистон Республикасининг дипломатик паспорти бериладиган мансабдор шахслар
РЎЙХАТИ
1-РЎЙХАТ
Ўзбекистон Республикасининг Президенти ва унинг оила аъзолари
Ўзбекистон Республикаси Президентининг Давлат маслаҳатчилари ва уларнинг ўринбосарлари
Ўзбекистон Республикаси Президенти ҳузуридаги Хавфсизлик кенгаши котиби ва унинг ўринбосарлари
Ўзбекистон Республикаси Президенти Девонининг Ишлар бошқарувчиси ва унинг ўринбосарлари
Ўзбекистон Республикаси Президенти Ижро этувчи аппарати раҳбари ва ходимлари
Ўзбекистон Республикаси Президенти бошчилик қиладиган расмий делегацияларга ҳамроҳлик қиладиган Ўзбекистон Республикаси Президенти девонининг ходимлари
Ўзбекистон Республикаси Президентининг Хавфсизлик хизмати бошлиғи ва ходимлари
(3-илованинг 1-рўйхати Ўзбекистон Республикаси Вазирлар Маҳкамасининг 2017 йил 22 июндаги 412-сонли қарори таҳририда — ЎР ҚҲТ, 2017 й., 25-сон, 551-модда)
Олдинги таҳрирга қаранг.
II. РЎЙХАТ
Ўзбекистон Республикаси Олий Мажлисининг Қонунчилик палатаси Спикери
Ўзбекистон Республикаси Олий Мажлиси Сенати Раиси
Ўзбекистон Республикаси Олий Мажлиси Қонунчилик палатаси Спикерининг ўринбосарлари
Ўзбекистон Республикаси Олий Мажлиси Сенати раисининг ўринбосарлари
Олдинги таҳрирга қаранг.
Ўзбекистон Республикаси Олий Мажлиси палатасининг қўмиталари ва комиссиялари раислари, Ўзбекистон Республикаси Олий Мажлисининг Инсон ҳуқуқлари бўйича вакили (омбудсман);
(II рўйхатнинг бешинчи хатбоши Ўзбекистон Республикаси Вазирлар Маҳкамасининг 2009 йил 27 октябрдаги 283-сонли қарори таҳририда— ЎР ҚҲТ, 2009 й., 44-сон, 467-модда)
Ўзбекистон Республикаси Олий Мажлиси Қонунчилик палатасининг халқаро алоқалар бўлими мудири
Ўзбекистон Республикаси Олий Мажлиси Сенатининг халқаро алоқалар бўлими мудири
(2-рўйхат Ўзбекистон Республикаси Вазирлар Маҳкамасининг 2005 йил 26 майдаги 135-сонли қарори таҳририда — ЎР ҚҲТ, 2005 й., 21-сон, 154-модда)
III. РЎЙХАТ
Ўзбекистон Республикасининг Бош вазири
Ўзбекистон Республикаси Бош вазирининг Биринчи ўринбосари
Ўзбекистон Республикаси Бош вазирининг ўринбосарлари
Ўзбекистон Республикаси вазирлари, давлат қўмиталари, миллий корпорацияларининг раислари, уларнинг биринчи ўринбосарлари ҳамда хизмат мақомига кўра уларга тенглаштирилган мансабдор шахслар
Ўзбекистон Республикаси Фанлар академиясининг Президенти
Ўзбекистон Республикаси Марказий банки Бошқарувининг раиси
Ўзбекистон Республикаси Ташқи иқтисодий фаолият миллий банки Бошқарувининг раиси
Ўзбекистон Республикаси Фавқулодда вазиятлар бўйича давлат комиссиясининг раиси
Ўзбекистон Касаба уюшмалари Федерацияси Кенгашининг раиси
Марказий банк ҳузуридаги Гознак давлат ишлаб чиқариш бирлашмасининг бош директори
Олдинги таҳрирга қаранг.
Ўзбекистон Республикаси Савдо-саноат палатаси раиси
(3-рўйхат ўн биринчи хатбоши билан Ўзбекистон Республикаси Вазирлар Маҳкамасининг 2005 йил 11 февралдаги 59-сонли қарорига мувофиқ тўлдирилган — ЎР ҚҲТ, 2005 й., 5-6-сон, 34-модда)
IV. РЎЙХАТ
Ўзбекистон Республикаси Миллий хавфсизлик хизматининг раиси ва унинг биринчи ўринбосари
Ўзбекистон Республикаси Бош прокурори ва унинг биринчи ўринбосари
Ўзбекистон Республикаси Конституциявий Судининг раиси
Ўзбекистон Республикаси Олий Судининг раиси ва унинг биринчи ўринбосари
Ўзбекистон Республикаси Олий Хўжалик Судининг раиси ва унинг биринчи ўринбосари
V. РЎЙХАТ
Қорақалпоғистон Республикаси Жўқорғи Кенгесининг Раиси
Қорақалпоғистон Республикаси Вазирлар Кенгашининг Раиси
Вилоятлар ва Тошкент шаҳри ҳокимлари
Қорақалпоғистон Республикаси Жўқорғи Кенгеси Раисининг ўринбосарлари
Қорақалпоғистон Республикаси Вазирлар Кенгаши Раисининг ўринбосарлари
VI. РЎЙХАТ
Ўзбекистон Республикаси Ташқи ишлар вазирлигининг дипломатик ходимлари
Халқаро ташкилотлардаги дипломатик лавозимга тенглаштириладиган лавозимларда ишлаётган Ўзбекистон Республикаси ваколатхоналарининг ходимлари
Ўзбекистон Республикаси Ташқи ишлар вазирлигининг дипломатик куръерлари
Миллий хавфсизлик хизмати Раисининг ўринбосарлари
Мудофаа вазирининг ўринбосарлари
Ички ишлар вазирининг ўринбосарлари
Ташқи савдо вазирининг ўринбосари
(6-рўйхатнинг еттинчи хатбошиси Ўзбекистон Республикаси Президентининг 2017 йил 6 июндаги ПҚ-3037-сонли қарори таҳририда — ЎР ҚҲТ, 2017 й., 23-сон, 457-модда)
Инвестициялар бўйича давлат қўмитаси раисининг ўринбосарлари;
(6-рўйхат Ўзбекистон Республикаси Вазирлар Маҳкамасининг 2017 йил 21 августдаги 651-сонли қарорига асосан саккизинчи хатбоши билан тўлдирилган — ЎР ҚҲТ, 2017 й., 34-сон, 893-модда)
Ҳарбий атташе, ҳарбий-ҳаво кучлари атташеси ва уларнинг ёрдамчилари
Ўзбекистон Республикасининг савдо вакиллари, Ўзбекистон Республикаси савдо ваколатхоналарининг маслаҳатчилари ва атташелари
Олдинги таҳрирга қаранг.
Ўзбекистон Республикасининг Президенти, Олий Мажлисининг Қонунчилик палатаси Спикери ва Сенати Раиси ёки Бош вазири бошчилик қиладиган расмий давлат ва ҳукумат делегацияларининг аъзолари
(6-рўйхатнинг ўнинчи хатбоши Ўзбекистон Республикаси Вазирлар Маҳкамасининг 2005 йил 26 майдаги 135-сонли қарори таҳририда — ЎР ҚҲТ, 2005 й., 21-сон, 154-модда)
Олдинги таҳрирга қаранг.
Ўзбекистон Республикаси давлат органлари линияси бўйича халқаро ташкилотларга дипломатик лавозимларга тенглаштирилган лавозимларда ишлаш учун юборилган Ўзбекистон Республикасининг фуқаролари — Ўзбекистон Республикаси Ҳукуматининг қарорига кўра
(6-рўйхат ўн биринчи хатбоши билан Ўзбекистон Республикаси Вазирлар Маҳкамасининг 2004 йил 2 июлдаги 311-сонли қарорига мувофиқ тўлдирилган — ЎР ҚҲТ, 2004 й., 26-сон, 302-модда)
Олдинги таҳрирга қаранг.
Ўзбекистон Республикаси Савдо-саноат палатаси раисининг ўринбосарлари, шунингдек тижорат фаолиятини амалга оширмайдиган хориждаги унинг ваколатхонаси бошлиғи
(хатбоши Ўзбекистон Республикаси Вазирлар Маҳкамасининг 2005 йил 9 августдаги 189-сонли қарори таҳририда — ЎР ҚҲТ, 2005 й., 32-33-сон, 246-модда)
Изоҳ: Истеъфога чиққан (ишдан бўшаган) тақдирда қуйидаги шахслар дипломатик паспортдан фойдаланиш ҳуқуқини сақлаб қоладилар:
Ўзбекистон Республикасининг Президенти
Ўзбекистон Республикасининг Фавқулодда ва Мухтор Элчиси мартабасига эга бўлган дипломатик ходимлари
Олдинги таҳрирга қаранг.
(4-илова Ўзбекистон Республикаси Президентининг 2014 йил 5 мартдаги ПҚ-2142-сонли қарорига асосан ўз кучини йўқотган — ЎР ҚҲТ, 2014 й., 10-сон, 103-модда)

(Ўзбекистон Республикаси Ҳукуматининг қарорлари тўплами, 1995 й., 1-сон, 1-модда; Ўзбекистон Республикаси қонун ҳужжатлари тўплами, 2001 й., 7-сон, 36-модда; 2002 й., 10-сон, 80-модда; 2004 й., 26-сон, 302-модда; 2005 й., 5-6-сон, 34-модда, 21-сон, 154-модда, 32-33-сон, 246-модда; 2008 й., 48-сон, 475-модда; 2009 й., 44-сон, 467-модда; 2011 й., 25-сон, 259-модда, 29-сон, 301-модда; 2013 й., 42-сон, 557-модда; 2014 й., 10-сон, 103-модда; 2015 й., 42-сон, 539-модда; 2017 й., 25-сон, 551-модда, 34-сон, 893-модда; Қонун ҳужжатлари маълумотлари миллий базаси, 23.12.2017 й., 10/17/1001/0447-сон)