2. Мазкур модданинг 1-бандида назарда тутилган имтиёзлар фуқаролик, оилавий ва жиноят ишлари бўйича амалга ошириладиган барча процессуал ҳаракатларга, шу жумладан, қарор ёки ҳукмни ижро этишга нисбатан қўлланилади.

3-модда

Оилавий ва мулкий аҳвол тўғрисидаги ҳужжатни тақдим этиш

1. Мазкур Конвенциянинг 2-моддасида назарда тутилган имтиёзлар илтимоснома берган шахснинг оилавий ва мулкий аҳволи тўғрисидаги ҳужжат асосида тақдим этилади. Ушбу ҳужжат ариза берувчининг доимий яшаш ёки вақтинча турган жойи ҳудудида жойлашган Аҳдлашувчи Томоннинг ваколатли органи томонидан берилади.

2. Агар ариза берувчи Аҳдлашувчи Томон ҳудудида доимий ёки вақтинча яшаш жойига эга бўлмаса, у фуқароси бўлган Аҳдлашувчи Томоннинг тегишли дипломатик ваколатхонаси ёки консуллик муассасаси томонидан берилган ҳужжатни тақдим этиши кифоя қилади.

3. Имтиёзлар тўғрисидаги ариза бўйича қарор қабул қилувчи муассаса ҳужжатни берган муассасадан қўшимча маълумотларни ёки зарур тушунтиришларни талаб қилиши мумкин.

II қисм

Ҳуқуқий ёрдам

4-модда

Ҳуқуқий ёрдам кўрсатиш

1. Аҳдлашувчи Томонларнинг адлия муассасалари мазкур Конвенция қоидаларига мувофиқ фуқаролик, оилавий ва жиноий ишлар бўйича ўзаро ҳуқуқий ёрдам кўрсатадилар.

2. Аҳдлашувчи Томонларнинг адлия муассасалари мазкур модданинг 1-бандида кўрсатилган ишлар бўйича Аҳдлашувчи Томонларнинг бошқа муассасаларига ҳам ҳуқуқий ёрдам кўрсатадилар.

3. Ҳуқуқий ёрдам сўраётган Аҳдлашувчи Томоннинг адлия муассасалари томонидан сўралаётган Аҳдлашувчи Томон адлия муассасаларига юборилган топшириқлар ва мазкур Конвенцияда назарда тутилган бошқа сўровлар асосида кўрсатилади.

5-модда

Алоқалар тартиби

1. Аҳдлашувчи Томонларнинг ваколатли адлия муассасалари ҳуқуқий ёрдам кўрсатиш чоғида, агар мазкур Конвенцияда алоқанинг бошқача тартиби белгиланмаган бўлса, ўзларининг марказий, ҳудудий ва бошқа органлари орқали бир-бири билан алоқа ўрнатадилар. Аҳдлашувчи Томонлар ўзларининг тўғридан-тўғри муносабатларни амалга оширишга ваколатли марказий, ҳудудий ва бошқа органларининг рўйхатини белгилайдилар, улар тўғрисида ратификация ёрлиқлари ёки қўшилиш тўғрисидаги ҳужжатларни топшириш вақтида депозитарийга хабар берадилар.

Аҳдлашувчи Томонлар марказий, ҳудудий ва бошқа органлар рўйхатидаги ўзгаришлар тўғрисида депозитарийни хабардор қиладилар.

2. Прокурорнинг (суднинг) санкциясини талаб қилувчи процессуал ҳаракатлар ва қидирув тадбирларини ўтказиш тўғрисидаги топшириқларни ижро қилиш масалалари бўйича алоқа прокуратура органлари орқали амалга оширилади.

6-модда

Ҳуқуқий ёрдам кўлами

Аҳдлашувчи Томонлар сўралаётган Аҳдлашувчи Томонлар қонунчилигида назарда тутилган процессуал ва бошқа ҳаракатларни бажариш, хусусан, ҳужжатларни расмийлаштириш, жўнатиш ва қабул қилувчига топшириш, кўздан кечириш, тинтув, олиб қўйишни ўтказиш, ашёвий далилларни юбориш, экспертиза ўтказиш, томонлар, учинчи шахслар, гумон қилинувчилар, айбланувчилар, жабрланувчилар, гувоҳлар, фуқаровий даъвогарлар, фуқаровий жавобгарлар, уларнинг вакиллари, айбланувчиларнинг қонуний вакиллари ва экспертларни сўроқ қилиш, таниб олиш учун кўрсатиш, шу жумладан, видеоалоқа, видеоёзувлар ва бошқа техник воситалардан фойдаланган ҳолда, шахсларни қидириш, тергов қилинаётган жиноят иши, жиноий таъқиб доирасида тезкор-қидирув тадбирларини амалга ошириш, шахсларни, уларни жиноий жавобгарликка тортиш ёки ҳукмни ижро этиш учун топшириш, жиноий йўл билан олинган пул маблағлари ва мол-мулкни, шунингдек, жиноий фаолиятдан олинган даромадларни қидириш ва тақиқ солиш (олиб қўйиш), шунингдек, фуқаролик ишлари, хўжалик ва бошқа иқтисодий низолар бўйича ҳал қилув қарорларини ижро этиш учун фуқаровий жавобгарларнинг мол-мулки ва пул маблағларини қидириш, ижро варақалари, фуқаролик ишлари бўйича суд қарорлари ва ҳукмларни тан олиш ва ижро этиш йўли билан ўзаро ҳуқуқий ёрдам кўрсатадилар.

Аҳдлашувчи Томонлар ўзаро ҳуқуқий ёрдамни, аниқ ҳолатлар, одил судлов ва бутун жамият манфаатларидан келиб чиққан ҳолда ва Аҳдлашувчи Томонларнинг ички қонунчилигига мувофиқ бошқа шакл ва кўринишларда ҳам кўрсатишлари мумкин,

7-модда

Ҳуқуқий ёрдам кўрсатиш тўғрисидаги топшириқнинг мазмуни ва шакли

1. Ҳуқуқий ёрдам кўрсатиш тўғрисидаги топшириқда қуйидагилар кўрсатилиши керак:

а) сўралаётган Аҳдлашувчи Томон адлия муассасасининг номи;

б) сўраётган Аҳдлашувчи Томон адлия муассасасининг номи;

в) ҳуқуқий ёрдам сўралаётган ишнинг номи ва рақами;

г) жисмоний шахс тўғрисидаги маълумотлар: фамилияси, исми, отасининг исми, туғилган санаси ва жойи, яшаш жойи, фуқаролиги, фаолият тури; юридик шахс тўғрисида: номи, юридик манзили ёки жойлашган жойи, банк реквизитлари ва фискал кодлари;

д) «г» кичик бандда кўрсатилган шахсларнинг вакиллари бўлса, уларнинг фамилияси, исми, отасининг исми ва манзили;

е) топшириқнинг қабул қилинганлиги ва уни бажариш пайтида олинган маълумотларнинг сир сақланишини таъминлаш зарурати;

ж) топшириқнинг мазмуни, шунингдек, уни бажариш учун зарур бўлган бошқа маълумотлар.

2. Ҳужжатни топшириш тўғрисидаги топшириқда қабул қилувчининг аниқ манзили ва тақдим этилаётган ҳужжатнинг номи кўрсатилиши керак.

3. Топшириқ иш иш юритувида бўлган шахс томонидан имзоланган ва сўраётган Аҳдлашувчи Томон адлия муассасасининг гербли муҳри билан тасдиқланган бўлиши керак. Топшириқда алоқа телефонлари ва бошқа алоқа каналлари кўрсатилади.

4. Мазкур модданинг 1 — 3-бандлари талабларига мувофиқ расмийлаштирилган ҳуқуқий ёрдам кўрсатиш тўғрисидаги топшириқ, сўраётган Аҳдлашувчи Томон адлия муассасасининг раҳбари томонидан мазкур Конвенциянинг 5-моддаси қоидаларига риоя қилган ҳолда сўралаётган Аҳдлашувчи Томон адлия муассасасига юборилади.

5. Кечиктириш мумкин бўлмаган ҳолатларда, мазкур моддада белгиланган қоидаларга мувофиқ расмийлаштирилган ҳуқуқий ёрдам тўғрисидаги топшириқ факс, шунингдек, бошқа алоқа воситаларидан фойдаланган ҳолда юборилиши мумкин. Шу билан бирга, топшириқнинг асли почта ёки курер орқали юборилиши зарур.

8-модда

Ҳуқуқий ёрдам кўрсатиш тўғрисидаги топшириқни бажариш тартиби

1. Ҳуқуқий ёрдам кўрсатиш тўғрисидаги топшириқни бажаришда сўралаётган Аҳдлашувчи Томоннинг адлия муассасаси ўз Аҳдлашувчи Томони қонунчилигини қўллайди. У, Сўраётган Аҳдлашувчи Томон адлия муассасасининг сўровига кўра сўраётган Аҳдлашувчи Томоннинг процессуал қоидаларини қўллаши мумкин, агар улар сўралаётган Аҳдлашувчи Томоннинг қонунчилигига зид бўлмаса. Бундай ҳолда, сўраётган Аҳдлашувчи Томон процессуал қонун матнини тақдим этиши шарт.

2. Агар сўралаётган Аҳдлашувчи Томоннинг адлия муассасаси топшириқни бажаришга ваколатли бўлмаса, у 5 кунлик муддат ичида топшириқни ваколатли адлия муассасасига юборади ва бу ҳақда сўраётган Аҳдлашувчи Томоннинг адлия муассасасини хабардор қилади.

3. Сўраётган Аҳдлашувчи Томон адлия муассасасининг сўровига кўра, сўралаётган Аҳдлашувчи Томоннинг адлия муассасалари, Сўраётган Аҳдлашувчи Томон адлия муассасаси томонидан тайинланган вакиллар сўралаётган Аҳдлашувчи Томон адлия муассасалари билан келишган ҳолда ва унинг қонунчилигига мувофиқ топшириқни бажаришда ҳозир бўлишлари, шунингдек, агар сўралаётган Аҳдлашувчи Томоннинг қонунчилигига зид бўлмаса процессуал ҳаракатлар ва қидирув тадбирларини амалга оширишда иштирок этиши учун уни топшириқни бажариш вақти ва жойи ҳақида ўз вақтида хабардор қилади

4. Агар топшириқда кўрсатилган шахснинг аниқ манзили номаълум бўлса, сўралаётган Аҳдлашувчи Томоннинг адлия муассасаси унинг аниқ манзилини (жойлашган ерини) аниқлаш учун зарурий чораларни кўради.

5. Агар мазкур Конвенцияда бошқача тартиб назарда тутилган бўлмаса, сўралаётган Аҳдлашувчи Томоннинг адлия муассасаси, топшириқ бажарилгандан сўнг, олинган ҳужжат, ашё ва материалларни сўраётган Аҳдлашувчи Томоннинг адлия муассасасига юборади. Ҳуқуқий ёрдам кўрсатишнинг имкони бўлмаган тақдирда, сўраётган Аҳдлашувчи Томоннинг адлия муассасаси топшириқнинг бажарилишига тўсқинлик қилаётган ҳолатлар тўғрисида хабардор қилинади.

9-модда

Жабрланувчилар, фуқаровий даъвогарлар, фуқаровий жавобгарлар, уларнинг вакиллари, гувоҳлар, экспертлар ва бошқа шахсларни чақириш

1. Жабрланувчи, фуқаровий даъвогар, фуқаровий жавобгар ва уларнинг вакиллари, шунингдек, гувоҳ, эксперт ёки сўралаётган Аҳдлашувчи Томон адлия муассасасининг чақирувига биноан сўраётган Аҳдлашувчи Томон адлия муассасасига келган бошқа шахслар, фуқаровий мансублигидан қатъи назар, сўраётган Аҳдлашувчи Томон ҳудудида жиноий ёки маъмурий жавобгарликка тортилиши, қамоққа олиниши ва давлат чегарасини кесиб ўтгунга қадар содир этган қилмиши учун жазога тортилиши мумкин эмас. Бундай шахслар, шунингдек, иш юритиш предмети ҳисобланган жиноят иши бўйича берган гувоҳлик кўрсатувлари ёки эксперт сифатида берган хулосалари учун жавобгарликка тортилиши, қамоққа олиниши ёки жазоланиши мумкин эмас.

Уларнинг жиноий жавобгарлиги масаласи мазкур Конвенциянинг IV бўлими қоидаларига мувофиқ ҳал қилинади.

2. Чақирилган шахс, агар у, сўраётган аҳдлашувчи томоннинг адлия муассасаси уни ушбу Аҳдлашувчи Томон ҳудудида бўлиб туришига ортиқ зарурат йўқлиги ҳақида хабардор қилганидан сўнг, имконияти бўлгани ҳолда, унинг ҳудудини 15 кун ичида тарк этмаса юқорида таъкидланган иммунитетни йўқотади. Ушбу муддат, шахс ўзига боғлиқ бўлмаган сабабларга кўра сўраётган Аҳдлашувчи Томон ҳудудини тарк эта олмаган вақтни ҳисобга олмайди.

3. Мазкур модданинг 1-бандида кўрсатилган чақирилган шахсга, сўраётган Аҳдлашувчи Томон тарафидан сўраётган давлатга саёҳат қилиш ва у ерда бўлиб туриши билан боғлиқ харажатлар, ишдан ажралган кунлари учун олинмаган иш ҳақи қоплаб берилади, экспертлар, шунингдек, экспертиза ўтказгани учун ҳақ олиш ҳуқуқига ҳам эга. Чақирувда, чақирилувчи шахслар қандай тўловларни олишга ҳақли эканлиги кўрсатилиши керак; уларнинг талабига кўра сўраётган Аҳдлашувчи Томоннинг адлия муассасаси тегишли харажатларни қоплаш учун аванс тўлаб беради.

4. Аҳдлашувчи томонлардан бирининг ҳудудида яшовчи, мазкур модданинг 1-бандида назарда тутилган шахсларни бошқа аҳдлашувчи томоннинг адлия муассасасига чақириш, улар ҳозир бўлмаган тақдирда, мажбурлов чораларини қўллаш ҳақидаги таҳдидни ифода этмаслиги керак.

10-модда

Экспертиза текширувлари ўтказишни ташкил қилиш

1. Аҳдлашувчи Томонларнинг адлия муассасалари Аҳдлашувчи Томонларнинг махсус экспертиза, илмий-тадқиқот ва бошқа ваколатли муассасаларида фуқаролик, оилавий ва жиноий ишлари бўйича экспертизаларни ташкил этиш ва ўтказишда ўзаро ҳуқуқий ёрдам кўрсатадилар.

2. Бундай экспертизаларни ташкил этиш ва ўтказишда Аҳдлашувчи Томонларнинг адлия муассасалари ички қонунчиликка амал қиладилар. Сўралаётган Аҳдлашувчи Томон тарафидан ушбу Аҳдлашувчи Томон қонунчилигига мувофиқ берилган экспертиза хулосалари сўралаётган Аҳдлашувчи Томонда айни юридик кучга эга бўлиб, ушбу Аҳдлашувчи Томоннинг адлия муассасалари томонидан ҳеч қандай махсус тасдиқномасиз қабул қилинади.

3. Бундай ҳолатларда экспертизаларни ташкил этиш ва ўтказиш билан боғлиқ харажатлар, агар Аҳдлашувчи Томонлар тарафидан бошқача тартиб белгиланмаган бўлса, сўраётган Аҳдлашувчи Томон тарафидан қопланади.

11-модда

Ҳужжатларни топшириш

1. Сўралаётган Аҳдлашувчи Томоннинг адлия муассасалари, ҳужжатларни топширишни ушбу Аҳдлашувчи Томонда амалда бўлган тартибга мувофиқ амалга оширади, агар топширилиши лозим бўлган ҳужжатлар ушбу Аҳдлашувчи Томон тилида ёки рус тилида тузилган бўлса ёхуд ушбу тилларга тасдиқланган таржимаси билан таъминланган бўлса. Акс ҳолда, у ҳужжатларни қабул қилувчига топширади, агар у ҳужжатларни қабул қилишга ўз хоҳишига кўра рози бўлса,

2. Агар ҳужжатларни топшириқда кўрсатилган манзил бўйича топширишнинг иложи бўлмаса, сўралаётган Аҳдлашувчи Томоннинг адлия муассасаси ўз ташаббуси билан манзилни аниқлаш учун зарур чораларни кўради. Қабул қилувчининг манзилини аниқлашнинг иложи бўлмаса, сўралаётган Аҳдлашувчи Томоннинг адлия муассасаси сўраётган Аҳдлашувчи Томоннинг адлия муассасасини бу ҳақда хабардор қилади ва унга топширилиши лозим бўлган ҳужжатларни қайтаради.

3. Ҳужжатларни топшириш ҳужжат топширилган шахс томонидан имзоланган ва сўралаётган Аҳдлашувчи Томон адлия муассасанинг гербли муҳри билан муҳрланган ва топшириш санаси ва ҳужжатни топширган муассаса ходимининг имзосини акс эттирувчи тасдиқнома ёки мазкур муассаса томонидан берилган ва топшириш усули, жойи ва вақтини кўрсатувчи бошқа ҳужжат билан шаҳодатланади. Қабул қилувчи ҳужжатларни қабул қилиш ёки тасдиқномани имзолашдан бош тортган ҳолатларда, сўралаётган Аҳдлашувчи Томоннинг адлия муассасаси сўраётган Аҳдлашувчи Томоннинг адлия муассасасини бу ҳақда хабардор қилади.

12-модда

Ҳужжатларнинг ҳақиқийлиги

1. Аҳдлашувчи томонлардан бирининг ҳудудида ваколатли муассаса ёки бунга махсус ваколатли шахс томонидан ўз ваколатлари доирасида ва белгиланган шакл бўйича берилган ёки тасдиқланган ва гербли муҳр билан муҳрланган ҳужжатлар бошқа Аҳдлашувчи томонларнинг ҳудудида ҳеч қандай махсус тасдиқномасиз қабул қилинади.

2. Аҳдлашувчи Томонлардан бирининг ҳудудида расмий ҳужжат деб қараладиган ҳужжатлар бошқа Аҳдлашувчи Томонлар ҳудудида расмий ҳужжатларнинг далилий кучига эга.

13-модда

Фуқаролик ҳолати ҳақидаги ҳужжатларни ва бошқа ҳужжатларни юбориш

1. Аҳдлашувчи томонлар, сўровга кўра бир-бирларига, фуқаролик ҳолати далолатномаларини рўйхатга олиш ҳақидаги ҳужжатларни Аҳдлашувчи томонларнинг фуқаролик ҳолати далолатномаларини ёзиш органлари орқали тўғридан-тўғри, таржимасиз ва бепул асосда, бундай ҳужжатлар юборилаётгани ҳақида фуқароларни огоҳлантирган ҳолда юбориш мажбуриятини оладилар.

2. Аҳдлашувчи томонлар, сўровга кўра бир-бирларига, сўраётган Аҳдлашувчи томоннинг фуқаролари ёки унинг ҳудудида яшовчи бошқа шахсларнинг таълим, меҳнат стажи, ва шахсий, мулкий ёки номулкий ҳуқуқ ва манфаатларига оид бошқа ҳужжатларни таржимасиз ва бепул асосда тақдим қилиш мажбуриятни оладилар.

14-модда

Дипломатик ваколатхоналар ва консуллик идораларининг ваколатлари

Аҳдлашувчи Томонларнинг дипломатик ваколатхоналари ва консуллик муассасалари амалдаги халқаро шартномалар, бундай шартномалар мавжуд бўлмаганда, улар жойлашган Аҳдлашувчи Томоннинг қонунчилигига зид келмайдиган бошқа ҳар қандай тартибда судга оид ва судга оид бўлмаган ҳужжатларни юбориш ёки улар вакиллик қилаётган Аҳдлашувчи Томоннинг судлари учун кўрсатмалар олиш ҳақидаги топшириқларни ижро этиш ҳуқуқига эгадирлар.

15-модда

Ҳуқуқий масалалар бўйича маълумотлар

Аҳдлашувчи Томонларнинг марказий адлия муассасалари, сўровга кўра бир-бирларига ўз ҳудудларида амалдаги ёки амалда бўлган ички қонунчилик ҳамда уларни қўллаш амалиёти тўғрисида маълумотларни тақдим этадилар.

16-модда

Манзиллар ва бошқа маълумотларни аниқлаш

1. Аҳдлашувчи томонларнинг адлия муассасалари, сўровга кўра бир-бирларига, агар бу фуқароларининг ҳуқуқларини амалга ошириш учун талаб қилинса, уларнинг ҳудудида яшовчи шахсларнинг ва юридик шахсларнинг манзилларини аниқлашда ёрдам кўрсатадилар. Сўраётган Аҳдлашувчи Томоннинг адлия муассасаси сўровда кўрсатилган шахснинг манзилини аниқлаш учун ўзида мавжуд бўлган маълумотлар ҳақида хабар беради.

2. Аҳдлашувчи Томонларнинг Адлия муассасалари сўровга кўра бир-бирларига сўралаётган Аҳдлашувчи Томон ҳудудида яшовчи, сўраётган Аҳдлашувчи Томоннинг адлия муассасалари томонидан фуқаролик, оилавий ва жиноий ишлар бўйича мулкий талаблар эълон қилинган шахсларнинг иш жойи ва даромадлари, шу жумладан, банк ҳисоб рақамларида мавжуд бўлган маблағларини аниқлашда ўзаро ёрдам кўрсатадилар.

17-модда

Тил

Мазкур Конвенцияни амалга оширишда Аҳдлашувчи Томонларнинг адлия муассасалари Аҳдлашувчи Томонларнинг расмий тилларидан ёки рус тилидан фойдаланадилар.

Агар ҳужжатлар Аҳдлашувчи Томонларнинг давлат тилларида расмийлаштирилган бўлса, уларга рус тилига тасдиқланган таржималари илова қилинади.

18-модда

Ҳуқуқий ёрдам кўрсатиш билан боғлиқ харажатлар

1. Ҳуқуқий ёрдам кўрсатиш билан боғлиқ харажатлар, агар мазкур Конвенцияда бошқача қоида назарда тутилган бўлмаса, ҳуқуқий ёрдам кўрсатиш ҳудудида бўлаётган Аҳдлашувчи Томон тарафидан қопланади.

2. Тарихий ва маданий аҳамиятга эга бўлган, шунингдек, катта моддий қийматга эга бўлган ашёларни топшириш ва ташиш билан боғлиқ харажатлар сўраётган Аҳдлашувчи Томон тарафидан қопланади.

19-модда

Мансабдор шахсларнинг хатти-ҳаракатлари устидан шикоят қилиш.

Етказилган зарарни қоплаш

1. Аҳдлашувчи Томонлардан ҳар бирининг фуқаролари ва юридик шахслари, шунингдек, унинг ҳудудида жойлашган бошқа шахслар, мазкур Конвенцияда бошқача тартиб белгиланмаган бўлса, бошқа Аҳдлашувчи Томонлар адлия муассасалари мансабдор шахсларининг мазкур Конвенция қоидаларини қўллашда содир этилган ҳаракатлари устидан, бундай ҳаракатлар ҳудудида содир этилган Аҳдлашувчи Томоннинг қонунчилигида белгиланган тартибда шикоят қилиш ҳуқуқига эга.

2. Агар, Аҳдлашувчи Томонлар адлия муассасалари мансабдор шахсларининг мазкур Конвенцияни амалга оширишда содир этган ноқонуний ҳаракатлари натижасида мазкур модданинг 1-бандида кўрсатилган шахсларга зарар етказилса, улар етказилган зарарни, адлия муассасалари мансабдор шахслари томонидан зарар етказилган Аҳдлашувчи Томоннинг қонунчилигига белгиланган тартибда қоплашни талаб қилиш ҳуқуқига эга.

20-модда

Ҳуқуқий ёрдам кўрсатишда маълумотларнинг сир сақланиши

1. Сўралаётган Аҳдлашувчи Томоннинг адлия муассасаси сўраётган Аҳдлашувчи Томон адлия муассасасининг сўровига биноан ҳуқуқий ёрдам кўрсатиш ҳақидаги топшириқ олинганлиги ва унинг мазмунини ҳамда топшириқнинг ижро этилиши натижасида олинган маълумотларнинг сир сақланишини таъминлаш учун барча зарур бўлган чораларни кўради.

2. Сўраётган ва сўралаётган Аҳдлашувчи Томонларнинг адлия муассасалари, зарурат туғилганда, топшириқларнинг бажарилиши натижасида олинган маълумотларнинг сир сақланишининг муддатлари ва шартларини ўзаро келишиб оладилар.

21-модда

Ҳуқуқий ёрдам кўрсатишни рад этиш

Ҳуқуқий ёрдам кўрсатиш, агар бундай ҳуқуқий ёрдамни кўрсатиш Сўралаётган Аҳдлашувчи Томоннинг суверенитети ёки хавфсизлигига зарар етказиши мумкин бўлса ёки унинг қонунчилигига зид бўлса тўлиқ ёки қисман рад этилиши мумкин. Ҳуқуқий ёрдам кўрсатиш ҳақидаги сўров рад этилган тақдирда, сўралаётган Аҳдлашувчи Томон рад этиш сабаблари тўғрисида дарҳол хабардор қилинади.

II БЎЛИМ

ФУҚАРОЛИК ВА ОИЛАВИЙ ИШЛАР БЎЙИЧА ҲУҚУҚИЙ МУНОСАБАТЛАР

I қисм

Ваколат

22-модда

Умумий қоидалар

1. Агар мазкур бўлимнинг II — V қисмларида бошқача тартиб назарда тутилмаган бўлса, Аҳдлашувчи Томонлардан бирининг ҳудудида яшаш жойига эга бўлган шахсларга нисбатан даъволар, уларнинг фуқаровий мансублигидан қатъи назар ушбу Аҳдлашувчи Томоннинг судларига, юридик шахсларга нисбатан даъволар, ҳудудида ушбу юридик шахснинг бошқарув органи, ваколатхонаси ёки филиали жойлашган Аҳдлашувчи Томоннинг судларига тақдим қилинади.

Агар ишда турли Аҳдлашувчи Томонларнинг ҳудудида яшаш жойи (жойлашган ери) бўлган бир нечта жавобгарлар иштирок этса, низо даъвогар танлаган ҳар қандай жавобгарнинг яшаш жойи (жойлашган ери) бўйича кўриб чиқилади.

2. Аҳдлашувчи Томонларнинг судлари қуйидаги ҳолатларда ҳам ваколатли ҳисобланади, агар унинг ҳудудида:

а) жавобгарнинг корхонаси (филиали) савдо, ишлаб чиқариш ёки бошқа хўжалик фаолиятини амалга оширса;

б) низонинг предмети бўлган шартнома бўйича мажбурият бажарилган бўлса ёхуд қисман ёки тўлиқ бажарилиши лозим бўлса;

в) шаъни, қадр-қиммати ва ишчанлик обрўсини ҳимоя қилиш тўғрисидаги даъво бўйича даъвогар доимий яшаш жойи ёки жойлашув ерига эга бўлса.

3. Кўчмас мулкка нисбатан мулк ҳуқуқи ва бошқа ашёвий ҳуқуқлар тўғрисидаги даъволар бўйича бундай мулк жойлашган жойдаги судлар мутлақ ваколатли ҳисобланади.

Юклар, йўловчилар ва багажни ташиш шартномаларидан келиб чиқувчи ташувчиларга нисбатан даъволар, унга нисбатан белгиланган тартибда эътироз билдирилган транспорт ташкилоти идораси жойлашган жойда тақдим этилади.

23-модда

Шартнома бўйича судловга тегишлилик

1. Агар томонларнинг низони ушбу судларга тақдим қилиш ҳақидаги иш мазмунан кўриб чиқулгунига қадар эришилган ёзма келишуви бўлса, Аҳдлашувчи Томонларнинг судлари ишни бошқа ҳолатларда ҳам кўриб чиқишлари мумкин.

Шу ўринда, мазкур конвенциянинг, мазкур бўлимнинг I — V қисмларида белгиланган қоидаларидан ҳамда тегишли Аҳдлашувчи Томонларнинг ички қонунчилигидан келиб чиқувчи мутлақ ваколат, томонларнинг келишувига кўра ўзгартирилиши мумкин эмас.

2. Низони ўтказиш тўғрисида келишув мавжуд бўлса, суд жавобгарнинг аризасига биноан иш юритишни тугатади.

24-модда

Суд жараёнларининг ўзаро боғлиқлиги

1. Икки Аҳдлашувчи Томонларнинг мазкур конвенцияга кўра ваколатли бўлган судлари томонидан бир хил тарафлар ўртасида бир хил предмет бўйича бир хил асосларда иш қўзғатилган ҳолатларда, ишни кейинроқ қўзғатган суд, иш юритишни тугатади.

2. Асосий даъво билан бир хил ҳуқуқий муносабатлардан келиб чиқадиган қарши даъво ва ҳисоб-китоб тўғрисидаги талаб асосий даъвони кўраётган судда кўриб чиқилиши керак.

25-модда

Прокурорнинг фуқаролик процессида иштирок этиши ҳақида сўров

Бир Аҳдлашувчи Томоннинг прокурори бошқа Аҳдлашувчи Томоннинг прокурорига сўраётган Аҳдлашувчи Томон фуқаросининг ва юридик шахсининг ҳуқуқлари ва қонуний манфаатларини ҳимоя қилиш ҳақида ушбу Аҳдлашувчи Томоннинг судида ўз ваколатлари доирасида иш қўзғатиш, бундай ишларнинг кўриб чиқилишида иштирок этиш ёки юқори турувчи суд инстанциясига кассация, апелляция ёки хусусий протест келтириш (тақдим қилиш), шунингдек, бундай ишлар бўйича суд қарорига нисбатан назорат тартибида протест келтириш (тақдим қилиш) ҳақидаги сўров билан мурожаат қилиши мумкин.

II қисм

Шахсий ҳолат

26-модда

Ҳуқуқ лаёқати ва муомала лаёқати

1. Жисмоний шахснинг муомала лаёқати ушбу шахс фуқароси бўлган Аҳдлашувчи Томоннинг қонун ҳужжатлари билан белгиланади.

2. Фуқаролиги бўлмаган шахснинг муомала лаёқати у доимий яшаш жойига эга бўлган Аҳдлашувчи Томоннинг қонунчилиги билан белгиланади.

3. Юридик шахснинг ҳуқуқ лаёқати у қонун ҳужжатларига мувофиқ ташкил этилган Аҳдлашувчи Томоннинг қонунчилиги билан белгиланади.

27-модда

Муомала лаёқати чекланган ёки муомалага лаёқатсиз деб топиш. Муомала лаёқатини тиклаш

1. Шахсни муомала лаёқати чекланган ёки муомалага лаёқатсиз деб топиш ҳақидаги ишлар бўйича ушбу шахс фуқароси бўлган Аҳдлашувчи Томоннинг суди ваколатли ҳисобланади, мазкур модданинг 2 ва 3-бандларида назарда тутилган ҳолатлар бундан мустасно.

2. Аҳдлашувчи томонлардан бирининг судига унинг ҳудудида яшовчи, бошқа Аҳдлашувчи Томоннинг фуқароси бўлган шахсни, муомала лаёқати чекланган ёки муомалага лаёқатсиз деб топиш учун асослар маълум бўлиб қолган тақдирда, у бу ҳақида ушбу шахс фуқароси ҳисобланувчи Аҳдлашувчи томоннинг судини хабардор қилади.

3. Агар муомала лаёқати чекланган ёки муомалага лаёқатсиз деб топиш учун асослар тўғрисида хабардор қилинган Аҳдлашувчи Томоннинг ваколатли суди 90 кун ичида ишни кўриб чиқиш учун қабул қилмаса ёки ўз фикрини билдирмаса, муомала лаёқати чекланган ёки муомалага лаёқатсиз деб топиш ҳақидаги иш ушбу фуқаро ҳудудида яшаш жойига эга бўлган Аҳдлашувчи Томоннинг суди томонидан кўриб чиқилади. Шахсни муомала лаёқати чекланган ёки муомалага лаёқатсиз деб топиш тўғрисидаги қарор ушбу шахс фуқароси бўлган Аҳдлашувчи Томоннинг ваколатли судига юборилади.

4. Мазкур модданинг 1 — 3-бандлари қоидалари муомала лаёқатини тиклашга нисбатан ҳам тегишлича қўлланилади.

28-модда

Бедарак йўқолган ва вафот этган деб топиш. Ўлим фактини аниқлаш

1. Шахсни бедарак йўқолган деб топиш ёки вафот этган деб эълон қилиш ҳамда ўлим фактини аниқлашга оид ишлар бўйича шахс тириклик вақтидаги охирги маълумотларга кўра, у фуқароси ҳисобланган Аҳдлашувчи Томоннинг адлия муассасалари, бошқа шахсларга нисбатан — шахснинг охирги яшаш манзилидаги адлия муассасалари ваколатли ҳисобланади.

2. Ҳар бир Аҳдлашувчи Томоннинг адлия муассасалари бошқа Аҳдлашувчи Томоннинг фуқаролари ёки ўз ҳудудида яшаган бошқа шахсларни бедарак йўқолган ёки вафот этган топиши, шунингдек, унинг ҳудудида яшовчи, ҳуқуқ ва манфаатлари ушбу Аҳдлашувчи Томоннинг қонунчилигига асосланган манфаатдор шахсларнинг илтимосига кўра шахснинг вафот этганлик фактини белгилаши мумкин.

3. Бедарак йўқолган деб топиш ёки вафот этган деб эълон қилиш ва ўлим фактини белгилаш ҳақидаги ишларни кўришда Аҳдлашувчи Томоннинг адлия муассасалари ўз Аҳдлашувчи Томонининг қонунчилигини қўллайди.

III қисм

Оилавий масалалар

29-модда

Никоҳ тузиш

Бўлажак турмуш ўртоқлар учун никоҳ тузиш шартлари, улар фуқаролари ҳисобланувчи Аҳдлашувчи Томонларнинг қонунчилиги билан, фуқаролиги бўлмаган шахслар учун эса, уларнинг доимий яшаш жойи ҳисобланувчи Аҳдлашувчи Томоннинг қонунчилиги билан белгиланади. Бундан ташқари, никоҳга тўсқинлик қиладиган ҳолатлар бўйича, ҳудудида никоҳ тузилаётган Аҳдлашувчи Томоннинг қонунчилиги талаблари қўлланилиши лозим.

30-модда

Эр-хотиннинг ҳуқуқий муносабатлари

1. Эр-хотиннинг шахсий ва мулкий ҳуқуқий муносабатлари, ҳудудида уларнинг биргаликдаги яшаш жойи бўлган Аҳдлашувчи Томон қонунчилиги билан белгиланади.

2. Агар турмуш ўртоқлардан бири Аҳдлашувчи Томонлардан бирининг ҳудудида, иккинчиси эса бошқа Аҳдлашувчи Томоннинг ҳудудида яшаса ва ҳар иккала эр ва хотин ҳам айни фуқароликка эга бўлса, уларнинг шахсий ва мулкий ҳуқуқий муносабатлари улар фуқароси бўлган Аҳдлашувчи Томон қонунчилиги билан белгиланади.

3. Агар турмуш ўртоқлардан бири бир Аҳдлашувчи Томон фуқароси, иккинчиси эса бошқа Аҳдлашувчи Томон фуқароси бўлса ва улардан бири бир Аҳдлашувчи Томон ҳудудида, иккинчиси эса бошқа Аҳдлашувчи Томон ҳудудида яшаса, уларнинг шахсий ва мулкий ҳуқуқий муносабатлари ҳудудида уларнинг охирги умумий яшаш жойи бўлган Аҳдлашувчи Томон қонунчилиги билан белгиланади.

4. Агар мазкур модданинг 3-бандида кўрсатилган шахслар, Аҳдлашувчи Томонларнинг ҳудудларида биргаликдаги яшаш жойига эга бўлмасалар, ишни адлия муассасаси кўриб чиқаётган Аҳдлашувчи Томоннинг қонунчилиги қўлланилади.

5. Эр-хотиннинг кўчмас мулк билан боғлиқ ҳуқуқий муносабатлари ушбу мулк ҳудудида жойлашган Аҳдлашувчи Томоннинг қонун ҳужжатлари билан белгиланади.

6. Эр-хотиннинг шахсий ва мулкий ҳуқуқий муносабатларига оид масалаларда мазкур модданинг 1 — 3 ва 5-бандларига мувофиқ қонунчилиги қўлланиладиган Аҳдлашувчи Томоннинг муассасаси ваколатли ҳисобланади.

31-модда

Никоҳни бекор қилиш

1. Никоҳни бекор қилиш ҳақидаги ишлар бўйича, ариза бериш вақтида эр ва хотин фуқароси бўлган Аҳдлашувчи Томоннинг қонунчилиги қўлланилади.

2. Агар турмуш ўртоқлардан бири Аҳдлашувчи Томонлардан бирининг, иккинчиси эса бошқа Аҳдлашувчи Томоннинг фуқароси бўлса, никоҳни бекор қилиш тўғрисидаги ишни кўраётган муассаса жойлашган Аҳдлашувчи Томоннинг қонунчилиги қўлланилади.

32-модда

Аҳдлашувчи Томонлар адлия муассасаларининг ваколатлилиги

1. Мазкур Конвенциянинг 31-моддаси 1-бандида назарда тутилган ҳолларда никоҳни бекор қилиш ҳақидаги ишлар бўйича, эр-хотин ариза топшириш вақтида фуқаролари бўлган Аҳдлашувчи Томоннинг адлия муассасаси ваколатли ҳисобланади. Агар ариза топшириш вақтида эр-хотинларнинг ҳар иккиси ҳам бошқа Аҳдлашувчи Томоннинг ҳудудида яшаётган бўлса, ушбу Аҳдлашувчи Томоннинг муассасаси ваколатли ҳисобланади.

2. Мазкур Конвенциянинг 31-моддаси 2-бандида назарда тутилган ҳолларда никоҳни бекор қилиш ҳақидаги ишлар бўйича, эр-хотинларнинг ҳар иккиси ҳам яшаётган Аҳдлашувчи Томоннинг адлия муассасаси ваколатли ҳисобланади. Агар эр-хотинлардан бири бир Аҳдлашувчи Томон ҳудудида, иккинчиси эса бошқа Аҳдлашувчи Томон ҳудудида истиқомат қилса, никоҳни бекор қилиш ҳақидаги иш бўйича эр-хотинлар ҳудудида яшовчи ҳар иккала Аҳдлашувчи Томоннинг муассасаси ваколатли ҳисобланади.

33-модда

Никоҳни ҳақиқий эмас деб топиш

1. Никоҳни ҳақиқий эмас деб топиш ҳақидаги ишларда, мазкур Конвенциянинг 26-моддасига мувофиқ никоҳни тузиш пайтида қўлланилган Аҳдлашувчи Томоннинг қонунчилиги қўлланилади.

2. Никоҳни ҳақиқий эмас деб топиш ҳақидаги ишлар бўйича муассасаларнинг ваколатлилиги мазкур Конвенциянинг 32-моддасига мувофиқ белгиланади.

34-модда

Оталик ёки оналикни белгилаш ва низолашиш

Оталик ёки оналикни белгилаш ва низолашиш бола фуқароси бўлган Аҳдлашувчи Томоннинг қонунчилиги билан, агар унинг фуқаровий мансублигини аниқлашнинг иложи бўлмаса, бола туғилиши бўйича фуқароси бўлган Аҳдлашувчи Томоннинг қонунчилиги билан белгиланади.

35-модда

Ота-оналар ва болалар ўртасидаги ҳуқуқий муносабатлар

1. Ота-оналар ва болаларнинг ҳуқуқ ва мажбуриятлари, шу жумладан, ота-оналарнинг болаларни боқиш мажбуриятлари улар ҳудудида биргаликдаги доимий яшаш жойига эга бўлган Аҳдлашувчи Томоннинг қонунчилиги билан белгиланади, агар ота-оналар ва болаларнинг биргаликдаги доимий яшаш жойи бўлмаса, уларнинг ўзаро ҳуқуқ ва мажбуриятлари бола фуқароси бўлган Аҳдлашувчи Томоннинг қонунчилиги билан белгиланади.

Даъвогарнинг алимент мажбуриятлари бўйича талабига нисбатан бола доимий истиқомат қилувчи Аҳдлашувчи Томоннинг қонунчилиги қўлланилади.

2. Вояга етган болаларнинг ота-оналари фойдасига алимент бўйича мажбуриятлари, шунингдек, бошқа оила аъзоларининг алимент бўйича мажбуриятлари улар биргаликдаги яшаш жойига эга бўлган Аҳдлашувчи Томоннинг қонунчилиги билан белгиланади. Биргаликдаги яшаш жойи бўлмаган тақдирда, бундай мажбуриятлар даъвогар фуқароси бўлган Аҳдлашувчи Томоннинг қонунчилиги билан белгиланади.

3. Ота-оналар ва болалар ўртасидаги ҳуқуқий муносабатларга оид ишлар бўйича мазкур модданинг 1 ва 2-бандларига мувофиқ қонунчилиги қўлланилиши лозим бўлган Аҳдлашувчи Томоннинг суди ваколатли бўлади.

4. Болаларни тарбиялаш билан боғлиқ ишлар бўйича суд қарорларини ижро этиш бола ҳудудида яшаётган Аҳдлашувчи Томоннинг қонунчилигида белгиланган тартибда амалга оширилади.

5. Агар жавобгар бошқа Аҳдлашувчи томоннинг ҳудудида эканлигини гумон қилиш учун етарлича асослар мавжуд бўлса ҳамда суднинг унга нисбатан қидирув эълон қилиш тўғрисидаги ажрими бўлса, Аҳдлашувчи Томонлар, алимент ундириш тўғрисидаги ишлар бўйича жавобгарни қидиришда бир-бириларига ёрдам кўрсатадилар.

36-модда

Васийлик ва ҳомийлик

1. Васийлик ва ҳомийликни белгилаш ёки бекор қилиш унга нисбатан васийлик ёки ҳомийлик белгиланаётган ёки бекор қилинаётган шахс фуқароси бўлган Аҳдлашувчи Томоннинг қонунчилигига мувофиқ амалга оширилади.

2. Васий ёки ҳомий билан васийлик ёки ҳомийликдаги шахс ўртасидаги ҳуқуқий муносабатлар муассасаси васий ёки ҳомийни тайинлаган Аҳдлашувчи Томоннинг қонунчилиги билан тартибга солинади.

3. Васийлик ёки ҳомийликни қабул қилиш мажбурияти васий ёки ҳомий этиб тайинланаётган шахс фуқароси бўлган Аҳдлашувчи Томоннинг қонунчилиги билан белгиланади.

4. Бир Аҳдлашувчи Томон шахсларининг ҳомийси ёки васийси қилиб бошқа Аҳдлашувчи Томоннинг фуқаролари тайинланиши мумкин, агар улар васийлик ёки ҳомийлик амалга ошириладиган Аҳдлашувчи Томоннинг ҳудудида истиқомат қилса.

37-модда

Васийлик ва ҳомийлик масалалари бўйича муассасаларнинг ваколатлари

Агар мазкур Конвенцияда бошқача белгиланган бўлмаса, васийлик ва ҳомийликни белгилаш ёки бекор қилиш ҳақидаги ишлар бўйича ўзига нисбатан васийлик ёки ҳомийлик белгиланаётган ёки бекор қилинаётган шахс фуқароси ҳисобланган Аҳдлашувчи Томоннинг муассасаси ваколатли ҳисобланади.

38-модда

Васийлик ва ҳомийлик чораларини қўллаш тартиби

1. Бир Аҳдлашувчи Томоннинг, доимий яшаш жойи, бўлиб туриш жойи ёки мулки бошқа Аҳдлашувчи Томоннинг ҳудудида жойлашган фуқаросининг манфаатида васийлик ёки ҳомийлик билан боғлиқ чораларни кўриш зарурати юзага келган тақдирда, ушбу Аҳдлашувчи Томоннинг муассасаси 37-моддага кўра ваколатли бўлган муассасани кечиктирмасдан хабардор қилади.

2. Кечиктириб бўлмайдиган ҳолатларда, бошқа Аҳдлашувчи Томоннинг муассасаси ўз қонунчилигида белгиланган тартибда зарурий вақтинчалик чораларни кўриши мумкин. Бундай ҳолатда, ушбу муассаса 37-моддага мувофиқ ваколатли бўлган муассасани кўрилган вақтинчалик чоралар ҳақида кечиктирмасдан хабардор қилиши зарур. Ушбу чоралар 37-моддада кўрсатилган муассаса томонидан бошқа қарор қабул қилингунича ўз кучини сақлаб қолади.

39-модда

Васийлик ва ҳомийликни ўтказиш тартиби

1. Аҳдлашувчи Томонлардан бирининг мазкур Конвенциянинг 37-моддасига мувофиқ ваколатли бўлган муассасаси, васийлик ёки ҳомийликни бошқа Аҳдлашувчи Томоннинг муассасасига ўтказиши мумкин, агар васийлик ёки ҳомийлик остида бўлган шахс ушбу Аҳдлашувчи Томоннинг ҳудудида яшаш жойи, бўлиб туриш жойи ёки мулкка эга бўлса. Васийлик ёки ҳомийликни ўтказиш, сўралаётган Аҳдлашувчи Томоннинг муассасаси васийлик ёки ҳомийликни ўзига қабул қилган ва бу ҳақида сўраётган Аҳдлашувчи Томоннинг муассасасини хабардор қилган вақтдан бошлаб кучга киради.

2. Мазкур модданинг 1-бандига мувофиқ васийлик ёки ҳомийликни қабул қилган муассаса, уларни ўз Аҳдлашувчи Томони қонунчилигига мувофиқ амалга оширади.

40-модда

Фарзандликка олиш

1. Фарзандликка олувчи фарзандликка олиш ёки уни бекор қилиш тўғрисида ариза берилган вақтда фуқароси ҳисобланган Аҳдлашувчи Томоннинг қонунчилигига мувофиқ амалга оширилади, агар фарзандликка олиш ёки уни бекор қилиш тўғрисида ариза берилган вақтда, фарзандликка олинаётган бола фуқароси бўлган Аҳдлашувчи Томон қонунчилигида бошқача тартиб белгиланмаган бўлса.

2. Агар бола бошқа Аҳдлашувчи Томон фуқароси бўлса, фарзандликка олиш ёки уни бекор қилишда қонуний вакил ёки ваколатли давлат органининг, шунингдек, агар бола фуқароси бўлган Аҳдлашувчи томоннинг қонунчилигига мувофиқ талаб қилинса, боланинг ҳам розилиги олиниши зарур.

3. Агар бола, бири Аҳдлашувчи Томонлардан бирининг, иккинчиси эса, бошқа Аҳдлашувчи Томоннинг фуқароси ҳисобланувчи эр-хотин томонидан фарзандликка олинаётган бўлса, фарзандликка олиш ёки уни бекор қилиш мазкур модданинг 1 ва 2-бандлари қоидаларини инобатга олган ҳолда, ҳар иккала Аҳдлашувчи Томоннинг ҳам қонунчилигида белгиланган тартибда амалга оширилиши керак.

4. Фарзандликка олиш ёки уни бекор қилиш ҳақидаги ишлар бўйича, фарзандликка олиш ёки уни бекор қилиш ҳақидаги ариза берилган вақтда фарзандликка олувчи фуқароси бўлган Аҳдлашувчи Томоннинг муассасаси ваколатли ҳисобланади, мазкур модданинг 3-бандида назарда тутилган ҳолларда эса, эр-хотинлар охирги марта биргаликда яшаш ёки бўлиб туриш жойига эга бўлган Аҳдлашувчи Томоннинг муассасаси ваколатли ҳисобланади.

IV қисм

Мулкий ҳуқуқий муносабатлар

41-модда

Эгалик ҳуқуқи

1. Кўчмас мулкка эгалик ҳуқуқи кўчмас мулк ҳудудида жойлашган Аҳдлашувчи Томонларнинг қонунчилиги билан белгиланади. Қандай мулк кўчмас мулк эканлиги тўғрисидаги масала ушбу мулк ҳудудида жойлашган Аҳдлашувчи Томонларнинг қонунчилигига мувофиқ ҳал қилинади.

2. Давлат реестрига киритилиши лозим бўлган транспорт воситаларига эгалик ҳуқуқи, транспорт воситасини рўйхатдан ўтказган орган ҳудудида жойлашган Аҳдлашувчи Томоннинг қонунчилигига мувофиқ белгиланади.

3. Мулкка бўлган эгалик ҳуқуқи ёки бошқа ашёвий ҳуқуқнинг пайдо бўлиши ёки тугатилиши унинг пайдо бўлишига ёки бундай ҳуқуқ бекор қилинишига асос бўлган ҳаракат ёки бошқа ҳолат содир бўлган пайтда мулк ҳудудида жойлашган Аҳдлашувчи Томоннинг қонунчилиги билан белгиланади.

4. Битимнинг предмети ҳисобланувчи мулкка бўлган мулк ҳуқуқи ёки бошқа ашёвий ҳуқуқнинг вужудга келиши ва тугатилиши, агар тарафларнинг келишувида бошқача тартиб назарда тутилган бўлмаса, битим тузилган жойнинг қонунчилиги билан белгиланади.

42-модда

Битимнинг шакли

1. Битимнинг шакли у ҳудудида тузилган Аҳдлашувчи Томоннинг қонунчилиги билан белгиланади.

2. Кўчмас мулк ва унга бўлган ҳуқуқлар билан боғлиқ битимнинг шакли бундай мол-мулк ҳудудида жойлашган Аҳдлашувчи Томоннинг қонунчилиги билан белгиланади.

43-модда

Ишончнома

Ишончноманинг шакли ва амал қилиш муддати у ҳудудида берилган Аҳдлашувчи Томоннинг қонунчилиги билан белгиланади. Ҳудудида фойдаланиладиган Аҳдлашувчи Томоннинг тилига ёки рус тилига нотариал тасдиқланган таржимаси билан бундай ишончнома бошқа Аҳдлашувчи Томонларнинг ҳудудларида ҳеч қандай махсус тасдиқланмаган ҳолда қабул қилинади.

44-модда

Битим тарафларининг ҳуқуқ ва мажбуриятлари

Битим тарафларининг ҳуқуқ ва мажбуриятлари, агар тарафларнинг келишувида бошқача тартиб назарда тутилган бўлмаса, битим тузилган жойнинг қонунчилиги билан белгиланади.

45-модда

Зарарни қоплаш

1. Зарарни қоплаш мажбуриятлари зарарни қоплаш тўғрисидаги талаб учун асос бўлган ҳаракат ёки бошқа ҳолат ҳудудида содир бўлган Аҳдлашувчи Томоннинг қонунчилиги билан белгиланади, шартномалар ва бошқа ҳуқуқий ҳаракатлардан келиб чиқувчи ҳолатлар бундан мустасно.

2. Агар зарар етказувчи ва жабрланувчи бир Аҳдлашувчи Томоннинг фуқаролари бўлса, ушбу Аҳдлашувчи Томоннинг қонунчилиги қўлланилади.

3. Мазкур модданинг 1 ва 2-бандларида кўрсатилган ишлар бўйича, зарарни қоплаш тўғрисидаги талаб учун асос бўлган ҳаракат ёки бошқа ҳолат ҳудудида содир бўлган Аҳдлашувчи Томоннинг суди ваколатлидир. Жабрланувчи, шунингдек, жавобгар яшаш жойига эга бўлган Аҳдлашувчи томоннинг судига ҳам даъво киритиши мумкин.

46-модда

Даъво муддати

Даъво муддати масалалари тегишли ҳуқуқий муносабатларни тартибга солиш учун қўлланиладиган қонунчилик бўйича ҳал қилинади.

V қисм

Мерос

47-модда

Тенглик принципи

Аҳдлашувчи Томонлардан ҳар бирининг фуқаролари, бошқа Аҳдлашувчи Томоннинг ҳудудида мулк ёки ҳуқуқни қонун ёки васиятнома бўйича, ушбу Аҳдлашувчи томоннинг фуқаролари билан тенг шартларда ва бир хил миқдорда мерос қилиб олишлари мумкин.

48-модда

Мерос ҳуқуқи

1. Мулкни мерос қилиб олиш ҳуқуқи васият қилувчининг охирги доимий яшаш жойи ҳудудида бўлган Аҳдлашувчи Томоннинг қонунчилиги билан белгиланади, мазкур модданинг 2-бандида назарда тутилган ҳоллар бундан мустасно.

2. Кўчмас мулкни мерос қилиб олиш ҳуқуқи ушбу мулк ҳудудида жойлашган Аҳдлашувчи Томоннинг қонунчилиги билан белгиланади.

49-модда

Мероснинг давлатга ўтказилиши

Агар меросга нисбатан қонунчилиги қўлланиладиган Аҳдлашувчи Томоннинг қонунчилигига мувофиқ давлат меросхўр ҳисобланса, кўчар мерос мулк мерос қолдирувчи шахс вафот этган пайтда фуқароси бўлган Аҳдлашувчи Томонга, кўчмас мерос мулк эса ушбу мулк жойлашган Аҳдлашувчи Томонга ўтади.

50-модда

Васиятнома

Шахснинг васиятномани тузиш ва бекор қилишга лаёқати, шунингдек, васиятноманинг шакли ва унинг бекор қилиниши, далолатнома тузиш вақтида васият қилувчининг яшаш жойи жойлашган давлат қонунчилиги билан белгиланади. Бироқ, васиятнома ёки унинг бекор қилиниши, у тузилган жойнинг қонунчилиги талабларига жавоб берса, шаклга мос келмаслиги сабабли ҳақиқий эмас деб топилиши мумкин эмас.

51-модда

Мерос ишлари бўйича ваколатлар

1. Кўчар мол-мулкни мерос қилиб олиш тўғрисидаги иш юритиш бўйича мерос қолдирувчи вафот этган пайтда унинг яшаш жойи жойлашган Аҳдлашувчи Томоннинг муассасалари ваколатлидир.

2. Кўчмас мулкни мерос қилиб олиш тўғрисидаги ишларни юритиш бўйича мулк ҳудудида жойлашган Аҳдлашувчи Томоннинг муассасалари ваколатлидир.

3. Мазкур модданинг 1 ва 2-бандлари қоидалари мерос бўйича иш юритиш билан боғлиқ низоларни кўриб чиқишда ҳам қўлланилади.

52-модда

Дипломатик ваколатхона ёки консуллик идорасининг мерос масалалари бўйича ваколати

Мерос тўғрисидаги ишлар, шу жумладан мерос низолари бўйича, ҳар бир Аҳдлашувчи томоннинг дипломатик ваколатхоналари ёки консуллик муассасалари, уларнинг давлатлари фуқароларининг вакили бўлмаса ёки улар вакил тайинламаган бўлсалар, уларнинг номидан бошқа Аҳдлашувчи Томоннинг муассасаларида махсус ишончномасиз вакиллик қилишга ваколатлидир (меросдан воз кечиш ҳуқуқи бундан мустасно).

53-модда

Меросни ҳимоя қилиш чоралари

1. Аҳдлашувчи Томонларнинг муассасалари бошқа Аҳдлашувчи Томонларнинг фуқаролари томонидан ўз ҳудудларида қолдирилган мероснинг сақланишини таъминлаш ёки уни бошқариш учун ўз Аҳдлашувчи Томонларининг қонунчилигига мувофиқ зарур бўлган чораларни кўрадилар.

2. Мазкур модданинг 1-бандига мувофиқ кўрилган чоралар тўғрисида фуқароси мерос қолдирувчи ҳисобланган Аҳдлашувчи томоннинг дипломатик ваколатхонаси ёки консуллик муассасаси дарҳол хабардор қилинади. Ушбу чора-тадбирларни амалга оширишда кўрсатилган ваколатхона ёки муассаса иштирок этиши мумкин.

3. Мазкур модданинг 1-бандига мувофиқ қабул қилинган чоралар Аҳдлашувчи Томонларнинг мерос тўғрисидаги иш бўйича иш юритишга ваколатли Адлия муассасасининг, шунингдек, дипломатик ваколатхона ёки консуллик муассасасининг илтимосига биноан ўзгартирилиши, бекор қилиниши ёки кечиктирилиши мумкин.

III бўлим

ҚАРОРЛАРНИ ТАН ОЛИШ ВА ИЖРО ЭТИШ

54-модда

Қарорларни тан олиш ва ижро этиш

1. Аҳдлашувчи Томонларнинг ҳар бири мазкур Конвенцияда назарда тутилган шартларга мувофиқ бошқа Аҳдлашувчи Томонларнинг ҳудудида қабул қилинган қуйидаги қарорларни тан олади ва ижрога қаратади:

а) Аҳдлашувчи Томонлар адлия муассасаларининг фуқаролик ва оилавий ишлар бўйича қарорлари, шу жумладан, бундай ишлар бўйича суд томонидан тасдиқланган келишув битимлари ва пул мажбуриятлари бўйича нотариал ҳужжатлар (кейинги ўринларда — қарорлар);

б) жиноят ишлари бўйича судлар ҳукмларининг (қарорлар) зарарни қоплаш, жарималарни ундириш ва мусодара қилишга оид қисмини;

в) даъвони таъминлаш мақсадида мулкни, шу жумладан банк ҳисобварақларидаги пул маблағларини хатлаш тўғрисидаги суд қарорлари.

2. Мазкур модданинг 1-бандида кўрсатилган қарорларни тан олиш ва ижро этиш сўралаётган Аҳдлашувчи Томон қонунчилигига мувофиқ амалга оширилади.

55-модда

Ижро этишни талаб қилмайдиган қарорларни тан олиш

1. Ҳар бир Аҳдлашувчи Томоннинг адлия муассасалари томонидан чиқарилган ва ўз хусусиятига кўра ижро этишни талаб қилмайдиган, қонуний кучга кирган қарорлар бошқа Аҳдлашувчи Томонларнинг ҳудудларида махсус иш юритишсиз тан олинади, агар:

а) сўралаётган Аҳдлашувчи Томоннинг адлия муассасалари муқаддам ушбу иш бўйича қонуний кучга кирган қарор чиқармаган бўлса;

б) агар иш, мазкур Конвенцияга мувофиқ, унда назарда тутилмаган тақдирда эса, ҳудудида қарор тан олиниши зарур бўлган Аҳдлашувчи Томонларнинг қонунчилигига мувофиқ ушбу Аҳдлашувчи Томон адлия муассасасининг мутлақ ваколатига кирмаса;

2. Мазкур модданинг 1-банди қоидалари, васийлик ва ҳомийлик бўйича қарорлар, шунингдек, ҳудудида қарор чиқарилган Аҳдлашувчи Томонларнинг қонунчилигига мувофиқ ваколатли бўлган муассасалар томонидан чиқарилган никоҳдан ажратиш ҳақидаги қарорларга нисбатан ҳам қўлланилади.

56-модда

Қарорни тан олиш ва ижро этиш тўғрисидаги илтимоснома

1. Қарорни тан олиш ва ижро этиш ҳақидаги илтимоснома, фойдасига ҳал қилув қарори чиқарилган томон тарафидан қарор ижро этилиши лозим бўлган Аҳдлашувчи Томонларнинг ваколатли судига берилади. Илтимоснома, шунингдек, биринчи инстанцияда иш бўйича қарор чиқарган судга ҳам топширилиши мумкин. Ушбу суд унинг қарорини тан олиш ва ижро этиш ҳақидаги илтимосномани у бўйича қарор чиқаришга ваколатли судга юборади.

2. Аризага қуйидагилар илова қилинади:

а) қарор ёки унинг тасдиқланган нусхаси, шунингдек, қарор қонуний кучга кирганлиги ва ижро этилиши кераклиги тўғрисидаги ёки қарорнинг ўзида назарда тутилмаган бўлса, у қонуний кучга киргунига қадар ижро этилиши кераклиги ҳақидаги расмий ҳужжат;

б) суд жараёнида иштирок этмаган, унга қарши қарор қабул қилинган томон тегишли тартибда ва ўз вақтида судга чақирилганлиги, у процессуал муомала лаёқатига эга бўлмаган ҳолатда эса, у белгиланган тартибда тақдим этилганлиги тўғрисида ҳужжат;

в) қарорнинг, у юборилган пайтда қисман бажарилганлигини тасдиқловчи ҳужжат;

г) шартнома бўйича судловга тегишлилик масалалари бўйича, томонларнинг келишувини тасдиқловчи ҳужжат.

3. Қарорни тан олиш ва ижро этиш ҳақидаги илтимоснома ва унга илова қилинган ҳужжатлар сўралаётган Аҳдлашувчи Томоннинг тилига тасдиқланган таржимаси билан ёки рус тилида тақдим этилади.

57-модда

Қарорларни тан олиш ва ижро этиш тартиби

1. Мазкур Конвенциянинг 54-моддасида назарда тутилган қарорларни тан олиш ва ижро этиш ҳақидаги илтимоснома ҳудудида ижро этиш амалга оширилиши лозим бўлган Аҳдлашувчи Томонларнинг судлари томонидан кўриб чиқилади.

2. Қарорларни тан олиш ва ижро этиш ҳақидаги илтимосномани кўриб чиқувчи суд мазкур конвенцияда назарда тутилган талабларга риоя қилинганлигини аниқлаш билан чекланади. Агар талаблар бажарилган бўлса, суд ижро этиш тўғрисида қарор чиқаради.

3. Қарорларни тан олиш ва ижро этиш тартиби, ҳудудида ижро этиш амалга оширилиши лозим бўлган Аҳдлашувчи Томонлар қонунчилиги билан белгиланади.

58-модда

Жарималарни ундириш, мол-мулкни ва жиноий фаолиятдан олинган даромадларни мусодара қилиш бўйича суд қарорларини ижро этиш

1. Сўраётган Аҳдлашувчи Томон судининг жарималарни ундириш, жиноий иш бўйича ашёлар ва мол-мулкни давлат фойдасига олиб қўйиш ёки ноқонуний йўл билан олинган даромадларни мусодара қилиш тўғрисидаги қарорлари сўралаётган Аҳдлашувчи Томон тарафидан мазкур Конвенциянинг 8, 54, 56, 57 ва 59-моддаларида белгиланган асосларда ва тартибда ижро этилади.

2. Ундирилган жарималар суммалари сўраётган Аҳдлашувчи Томонга ўтказилади.

3. Мусодара қилиш тўғрисидаги қарорни қайта кўриб чиқиш ҳуқуқига фақатгина сўраётган Аҳдлашувчи Томон эга. Мусодара қилишни амалга ошириш жараёни сўралаётган Аҳдлашувчи Томоннинг қонунчилиги билан белгиланади.

Сўралаётган Аҳдлашувчи Томон, фактларни аниқлаш бўйича хулосаларга улар Сўраётган Аҳдлашувчи Томон тарафидан қабул қилинган ҳукм ёки бошқа суд қарорида келтирилган даражада ёки ушбу қарор ёки бошқа суд қарори ушбу хулосаларга асосланган даражада алоқадордир.

Мусодара қилинган мол-мулк ёки унга тенглаштирилган мол-мулк тўлиқ ёки қисман мусодара қилиш тўғрисида қарор қабул қилинган Аҳдлашувчи Томонга берилиши мумкин.

Сўраётган ва сўралаётган Аҳдлашувчи Томонлар ҳар бир алоҳида ҳолатда, мазкур Конвенцияга мувофиқ мусодара қилиш тўғрисидаги қарорни бажариш чоғида сўралаётган Аҳдлашувчи Томон тарафидан олинган мол-мулкни тақсимлаш тўғрисида келишиб оладилар.

59-модда

Қарорларни тан олиш ва ижро этишни рад этиш

Мазкур Конвенциянинг 54-моддасида назарда тутилган қарорларни тан олиш ва ижро этиш рад этилиши мумкин, агар:

а) қарор мазкур Конвенцияда белгиланган қоидаларни бузган ҳолда қабул қилинган бўлса;

б) ҳудудида қарор чиқарилган Аҳдлашувчи Томоннинг қонунчилигига мувофиқ, у қонуний кучга кирмаган ёки ижро этилиши зарур бўлмаса, қарор қонуний кучга киргунга қадар ижро этилиши керак бўлган ҳолатлар бундан мустасно;

в) жавобгар, унга ёки унинг вакилига судга чақирув ўз вақтида ва лозим даражада етказилмаганлиги сабабли процессда иштирок этмаган бўлса;

г) қарор тан олиниши ва ижро этилиши лозим бўлган Аҳдлашувчи Томонлар ҳудудида бир хил тарафлар ўртасида бир хил предмет бўйича ва бир хил асослардаги иш бўйича муқаддам қонуний кучга кирган қарор чиқарилган ёки учинчи давлат судининг тан олинган қарори мавжуд бўлса ёхуд бошқа Аҳдлашувчи Томон адлия муассасасининг қарорини тан олиш ва ижро этиш тўғрисидаги илтимоснома келиб тушган пайтда қарор тан олиниши ва ижро этилиши лозим бўлган Аҳдлашувчи Томоннинг адлия муассасаси тарафидан ушбу ҳолат бўйича муқаддам иш қўзғатилган бўлса ва у тугалланмаган бўлса;

д) мазкур Конвенциянинг қоидаларига, унда назарда тутилмаган ҳолатларда эса, қарор ҳудудида тан олиниши ва ижро этилиши лозим бўлган Аҳдлашувчи томоннинг қонунчилигига мувофиқ, иш унинг адлия муассасасининг мутлақ ваколатига тегишли бўлса;

е) тарафларнинг шартнома бўйича судловга тегишлилик бўйича келишувини тасдиқловчи ҳужжат мавжуд бўлмаса;

ж) сўралаётган Аҳдлашувчи Томоннинг қонунчилиги бўйича ижро этиш учун белгиланган муддат ўтиб кетган бўлса;

з) қарорни тан олиш ва ижро этиш сўралаётган Аҳдлашувчи Томоннинг жамоат хавфсизлигига зид бўлса.

IV БЎЛИМ

ЖИНОЯТ ИШЛАРИ БЎЙИЧА ҲУҚУҚИЙ ЁРДАМ ВА ҲУҚУҚИЙ МУНОСАБАТЛАР

V қисм

Жиноят ишлари бўйича ҳуқуқий ёрдам кўрсатиш бўйича топшириқ

60-модда

Жиноят иши бўйича ҳуқуқий ёрдам кўрсатиш тўғрисидаги топшириқнинг мазмуни ва шакли

1. Жиноят иши бўйича ҳуқуқий ёрдам кўрсатиш тўғрисидаги топшириқ мазкур Конвенциянинг 7-моддаси талабларига мувофиқ тузилади.

2. Топшириқда шунингдек, қуйидагилар кўрсатилиши керак:

а) содир этилган жиноятнинг тавсифи ва малакаланиши, агар у жиноий қилмиш натижасида етказилган бўлса, зарарнинг миқдори тўғрисидаги маълумотлар;

б) жиноят иши доирасида амалга оширилиши лозим бўлган процессуал ҳаракатлар, қидирув ёки тезкор-қидирув тадбирларининг батафсил рўйхати, шунингдек, топшириқни бажариш учун зарур бўлган бошқа маълумотлар;

в) сўроқ қилиш пайтида аниқлаштирилиши керак бўлган саволлар рўйхати;

г) асосида жиноят иши тергов қилинаётган қонун нормаларининг тўлиқ матни.

3. Жиноят иши бўйича ҳуқуқий ёрдам кўрсатиш тўғрисидаги топшириққа тасдиқланган ва белгиланган тартибда шаҳодатланган, зарур ҳолатларда, Сўраётган Аҳдлашувчи Томоннинг қонунчилигида белгиланган тартибда санкцияланган процессуал ҳаракатлар, қидирув ёки тезкор-қидирув тадбирларини амалга ошириш ҳақидаги қарор илова қилинади

61-модда

Жиноят иши бўйича ҳуқуқий ёрдам кўрсатиш тўғрисидаги топшириқни ижро этиш

1. Аҳдлашувчи Томонларнинг ваколатли адлия муассасалари мазкур Конвенциянинг 8-моддаси талабларига мувофиқ жиноят ишлари бўйича ҳуқуқий ёрдам кўрсатиш тўғрисидаги топшириқларнинг бажарилишини таъминлайдилар.

2. Мазкур Конвенциянинг 60-моддаси 3-бандида кўрсатилган сўраётган Аҳдлашувчи Томон адлия муассасасининг қарорлари, унда кўрсатилган процессуал ва бошқа ҳаракатларни амалга ошириш учун асос ҳисобланади. Агар сўралаётган Аҳдлашувчи Томоннинг ички қонунчилигига зид бўлмаса, топшириқларни бажаришда уларни қўшимча равишда легализациялаш талаб қилинмайди.

3. Топшириқни тўлиқ ва аниқ бажариш мақсадида сўралаётган Аҳдлашувчи Томоннинг адлия муассасаси сўралаётган Аҳдлашувчи Томоннинг адлия муассасасидан қўшимча маълумотларни сўраши мумкин.

Топшириқни бажариш жараёнида сўралаётган ва сўралаётган Аҳдлашувчи Томонларнинг адлия муассасалари тергов ҳаракатлари, қидирув ва тезкор-қидирув тадбирлари олиб борилиши ҳақидаги маълумотларни алмашишлари, бир-бирларига қўшимча маълумотларни тақдим этишлари, шунингдек, қўшимча тергов ҳаракатлари, қидирув ёки тезкор-қидирув тадбирларини ўтказиш билан боғлиқ масалаларни келишишлари мумкин.

4. Сўралаётган Аҳдлашувчи Томоннинг адлия муассасаси, топшириқ бажарилганидан сўнг олинган материалларни, сўраётган Аҳдлашувчи Томон адлия муассасасига ёки топшириқ ташаббускорига сўраётган Аҳдлашувчи Томон адлия муассасасининг топшириғи бажарилганлиги тўғрисидаги хабарнома билан биргаликда юборади.

62-модда

Жиноят ишлари бўйича ҳуқуқий ёрдам кўрсатиш тўғрисидаги топшириқларни бажариш муддатлари

1. Жиноий ишлар бўйича ҳуқуқий ёрдам кўрсатиш тўғрисидаги топшириқлар сўралаётган Аҳдлашувчи Томонлар қонунчилигида назарда тутилган муддатларда ижро этилади.

2. Зарур ҳолларда, ҳуқуқий ёрдам кўрсатиш тўғрисидаги топшириқни бажариш муддати Аҳдлашувчи Томонлар ваколатли адлия муассасаларининг келишувига асосан узайтирилиши мумкин.

63-модда

Қўшма тергов-тезкор гуруҳларни тузиш ва уларнинг фаолияти

1. Бир ёки бир нечта шахслар томонидан икки ёки ундан ортиқ Аҳдлашувчи Томонлар ҳудудида содир этилган ёхуд уларнинг манфаатларига дахлдор бўлган жиноятларни тезкор ва ҳар томонлама тергов қилиш мақсадида қўшма тергов-тезкор гуруҳлари тузилиши мумкин.

2. Қўшма тергов-тезкор гуруҳни тузиш тўғрисидаги таклиф мазкур Конвенциянинг 60-моддасида назарда тутилган тартибда расмийлаштирилади.

3. Сўралаётган Аҳдлашувчи Томон қўшма тергов-тезкор гуруҳини тузиш тўғрисидаги таклифни олгандан кейин 15 кун ичида сўраётган Аҳдлашувчи Томонни қабул қилинган қарор тўғрисида хабардор қилади, агарда розилик берса, бундай гуруҳга киритилган мансабдор шахсларнинг рўйхатини бир вақтнинг ўзида тақдим этади.

4. Қўшма тергов-тезкор гуруҳининг аъзолари ўзаро бевосита биргаликда ҳаракат қиладилар, тергов, тергов ҳаракатлари, қидирув ёки тезкор-қидирув тадбирларини ўтказишнинг асосий йўналишларини келишадилар, олинган маълумотларни алмашадилар. Уларнинг фаолиятини мувофиқлаштириш келишувга асосан, қўшма тергов-тезкор гуруҳини тузиш ташаббускори ёки гуруҳ аъзоларидан бири томонидан амалга оширилади.

5. Тергов ҳаракатлари, қидирув ёки тезкор-қидирув тадбирлари ҳудудида улар ўтказилаётган Аҳдлашувчи Томоннинг қўшма тергов-тезкор гуруҳидаги аъзолари томонидан амалга оширилади. Бир Аҳдлашувчи Томоннинг қўшма тергов-тезкор гуруҳидаги аъзоларининг бошқа Аҳдлашувчи Томон ҳудудида тергов ҳаракатлари, қидирув ва тезкор-қидирув тадбирларини олиб боришда иштирок этиши мазкур Конвенциянинг 8-моддасида назарда тутилган тартибда амалга оширилади.

64-модда

Муайян шароитларда топшириқларни бажариш

1. Сўралаётган Аҳдлашувчи Томоннинг адлия муассасаси топшириқнинг бажарилишини кечиктириши ёки унинг зудлик билан бажарилиши сўралаётган Аҳдлашувчи Томон ҳудудида олиб борилаётган тергов ёки суд муҳокамасига халақит берадиган бўлса, уни қисман бажариши мумкин.

2. Сўралаётган Аҳдлашувчи Томоннинг адлия муассасаси топшириқ ижросини кечиктириш ёки қисман ижро этиш тўғрисидаги масалани ҳал қилишдан олдин маълум шартлар асосида топшириқни бажариш имкониятини кўриб чиқади. Агар сўраётган Аҳдлашувчи Томоннинг адлия муассасаси бундай шартларга рози бўлса, у сўралаётган Аҳдлашувчи Томоннинг адлия муассасасини ёзма равишда хабардор қилиши ва белгиланган шартларни бажаради.

65-модда

Топшириқни бажариш натижасида олинган далилларнинг ҳуқуқий аҳамияти

Сўралаётган Аҳдлашувчи Томонда топшириқни бажариш натижасида унинг қонунчилигига мувофиқ олинган далиллар, сўраётган Аҳдлашувчи Томонда бир хил далилий қийматга эга.

II қисм

Топшириш

66-модда

Топшириш мажбурияти

1. Аҳдлашувчи Томонлар мазкур Конвенцияда назарда тутилган шартларга мувофиқ уларнинг ҳудудида бўлиб турган шахсларни, сўровга асосан жиноий жавобгарликка тортиш ёки ҳукмни ижро этиш учун топшириш мажбуриятини оладилар.

2. Жиноий жавобгарликка тортиш учун топшириш, сўраётган ва сўралаётган Аҳдлашувчи Томонларнинг қонунчилигига мувофиқ жиноий жазога сазовор бўлган ҳамда содир этилган тақдирда бир йилдан кам бўлмаган муддатга озодликдан маҳрум қилиш ёки оғирроқ жазо назарда тутилган қилмиш учун амалга оширилади.

3. Ҳукмни ижро этиш учун топшириш, сўраётган ва сўралаётган Аҳдлашувчи Томонларнинг қонунчилигига мувофиқ жиноий жазога сазовор бўлган ҳамда топширилиши сўралаётган шахс содир қилгани учун олти ойдан кам бўлмаган муддатга озодликдан маҳрум қилиш ёки оғирроқ жазога ҳукм қилинган қилмиш учун амалга оширилади.

4. Содир қилинганлиги учун топшириш сўралаётган қилмишнинг сўраётган Аҳдлашувчи Томонларнинг миллий қонунчилигига кўра жиноий жазога сазоворлигини аниқлаш масаласини ҳал қилишда, жиноят белгиларининг алоҳида тавсифидаги ва қўлланилган атамалардаги фарқлар аҳамият касб этмайди.

67-модда

Топшириш ҳақидаги сўров

1. Топшириш ҳақидаги сўров талабнома қуйидаги маълумотларни ўз ичига олиши керак:

а) сўраётган ва сўралаётган Аҳдлашувчи Томонлар адлия муассасаларининг номлари;

б) топшириш ҳақидаги сўров билан мурожаат қилиш учун асос бўлган қилмишнинг фактик ҳолатларининг тавсифи ва сўраётган Аҳдлашувчи Томоннинг ушбу қилмишни жиноят деб топиш учун асос бўлувчи қонунининг матни, ушбу қонунда назарда тутилган жазо чоралари кўрсатилган ҳолда;

в) топширилиши лозим бўлган шахснинг фамилияси, исми, отасининг исми, унинг туғилган йили ва жойи, фуқаролиги, яшаш ёки бўлиб туриш жойи, иложи бўлса, унинг ташқи кўриниши тавсифи, фотосурати, бармоқ излари ва шахсига оид бошқа маълумотлар;

г) жиноят натижасида етказилган зарар миқдори ва унинг қопланиши ҳақидаги маълумотлар.

2. Жиноий жавобгарликка тортиш учун ушлаб бериш тўғрисидаги сўровга қамоққа олиш ва айбланувчи сифатида жалб қилиш тўғрисидаги қарорларнинг тасдиқланган нусхалари илова қилиниши керак.

3. Ҳукмни ижро этиш учун топшириш ҳақидаги сўровга ҳукмнинг тасдиқланган нусхаси, унинг қонуний кучга кирганлиги ҳақидаги ёзув билан ҳамда шахс судланишига асос бўлган жиноят қонуни қоидаларининг матни илова қилиниши керак. Агар маҳкум жазонинг муайян қисмини ўтаб бўлган бўлса, бу ҳақдаги маълумотлар ҳам хабар қилинади.

4. Топшириш ҳақидаги сўров ва унга илова қилинган ҳужжатлар мазкур Конвенциянинг 7-моддаси 3-банди ва 17-моддасининг қоидаларига мувофиқ расмийлаштирилади.

68-модда

Шахсни топшириш тўғрисидаги сўров олгандан кейин унинг жойлашган ерини аниқлаш ва қамоққа олиш

Сўралаётган Аҳдлашувчи Томоннинг ваколатли адлия муассасаси топшириш тўғрисидаги сўровни олгач, зудлик билан топширилиши сўралаётган шахснинг турган ерини аниқлаш ва уни қамоққа олиш чораларини кўради, топширишни амалга ошириш мумкин бўлмаган ҳолатлар бундан мустасно.

69-модда

Топшириш ҳақидаги сўров олингунича шахсни қидириш

1. Аҳдлашувчи Томонларнинг ваколатли адлия муассасалари агар шахс сўралаётган Аҳдлашувчи Томоннинг ҳудудида бўлиши мумкинлиги ҳақида тахмин қилиш учун асослар мавжуд бўлса шахсни қидиришни, топшириққа биноан топшириш ҳақидаги сўров қабул қилингунича амалга оширадилар, топширишни амалга ошириш мумкин бўлмаган ҳолатлар бундан мустасно.

2. Қидирувни амалга ошириш тўғрисидаги топшириқ мазкур Конвенциянинг 7-моддаси қоидаларига мувофиқ тузилади ва унинг турган ерини аниқлаш имкониятини берувчи бошқа ҳар қандай маълумотлар билан биргаликда қидирувда бўлган шахснинг иложи борича тўлиқ тавсифини, ушбу шахсни топшириш ҳақидаги сўров тақдим қилинишини кўрсатган ҳолда уни ҳибсга олиш ҳақидаги сўровни ўз ичига олиши зарур.

3. Қидирувни амалга ошириш тўғрисидаги топшириққа сўраётган Аҳдлашувчи Томон ваколатли адлия муассасасининг қидирилаётган шахсни ҳибсга олиш тўғрисидаги қарорининг ёхуд қонуний кучга кирган ҳукмнинг тасдиқланган нусхаси, жазонинг ўталмаган қисми тўғрисидаги маълумотлар, шунингдек, фотосурат ва қўл бармоқ излари (агар мавжуд бўлса) илова қилинади.

4. Топшириш ҳақидаги сўров қабул қилингунича ўтказилган шахс қидирувининг натижалари тўғрисида сўраётган Аҳдлашувчи Томоннинг ваколатли адлия муассасаси дарҳол хабардор қилинади.

70-модда

Топшириш ҳақидаги сўров олингунича қамоққа олиш ёки ушлаб туриш

1. Топшириш сўралаётган шахс, илтимосга кўра, топшириш ҳақидаги сўров олингунига қадар ҳам қамоққа олиниши мумкин. Илтимосномада сўраётган Аҳдлашувчи Томон ваколатли адлия муассасасининг қамоққа олиш тўғрисидаги қарорига ёки қонуний кучга кирган ҳукмига ҳавола бўлиши, топшириш ҳақидаги сўров қўшимча равишда тақдим этилиши кўрсатилиши керак. Топшириш ҳақидаги сўров олингунига қадар қамоққа олиш тўғрисидаги илтимоснома, унинг аслини бир вақтнинг ўзида почта ёки курер орқали жўнатган ҳолда, техник алоқа воситаларидан фойдаланиб юборилиши мумкин.

2. Топширилиши сўралаётган шахс, унга нисбатан халқаро (давлатлараро) қидирув эълон қилинганлиги муносабати блан топшириш ҳақидаги илтимоснома қабул қилингунига қадар қамоққа олиниши мумкин. Бундай ҳолатларда уни қамоққа олиш учун сўраётган Аҳдлашувчи Томон ваколатли адлия муассасасининг эҳтиёт чораси сифатида қамоққа олиш тўғрисидаги қарори ёки қонуний кучга кирган суд ҳукми асос бўлади.

3. Шахс, агар у бошқа Аҳдлашувчи Томон ҳудудида топширишга олиб келувчи жиноятни содир қилганлигини тахмин қилиш учун ички қонунчиликда назарда тутилган асос мавжуд бўлса, мазкур модданинг 1-бандида назарда тутилган илтимоснома келиб тушмаган тақдирда ҳам ушланиши мумкин.

4. Топшириш ҳақидаги сўров олингунига қадар қамоққа олиш ёки ушлаб туриш ҳақида сўраётган Аҳдлашувчи Томоннинг ваколатли адлия муассасаси дарҳол хабардор қилинади.

71-модда

Топшириш ҳақидаги сўровларни кўриб чиқиш муддатлари

1. Топшириш ҳақидаги сўров, сўралаётган Аҳдлашувчи Томоннинг қонунчилигида бошқача тартиб назарда тутилган бўлмаса, ушбу Аҳдлашувчи Томоннинг ваколатли адлия муассасасига келиб тушганидан бошлаб 30 кун ичида кўриб чиқилиши керак. Топшириш ҳақидаги сўровнинг кўриб чиқиш натижалари тўғрисида сўраётган Аҳдлашувчи Томоннинг адлия муассасасига хабар қилинади.

2. Агар топшириш ҳақидаги сўров барча зарурий маълумотларни ўз ичига олмаса, сўралаётган Аҳдлашувчи Томоннинг адлия муассасаси қўшимча маълумотларни сўраши мумкин, бунинг учун у 30 кунгача бўлган муддатни белгилайди. Ушбу муддат сўраётган Аҳдлашувчи Томон адлия муассасасининг илтимосига кўра яна 30 кунгача узайтирилиши мумкин.

72-модда

Қамоққа олинган шахсни сақлаш

1. Топшириш масаласи ҳал қилинаётган, қамоққа олинган (ушланган) шахсни қамоқда сақлаш жойларига жойлаштириш учун сўраётган Аҳдлашувчи Томон ваколатли адлия муассасасининг қамоққа олиш тўғрисидаги қарори ёки сўралаётган Аҳдлашувчи Томон ваколатли адлия муассасасининг қарори, агар бу унинг қонунчилигида назарда тутилган бўлса, асос ҳисобланади.

2. Қамоққа олинган шахсни (ушланган) ушлаб туриш сўралаётган Аҳдлашувчи Томон қонунчилигига мувофиқ амалга оширилади.

73-модда

Топширилиши лозим бўлган шахсни қамоқда сақлаш муддатини узайтириш

Агар шахсни мазкур Конвенцияда белгиланган муддатларда топширишга тўсқинлик қиладиган ҳолатлар юзага келса, сўраётган Аҳдлашувчи Томоннинг жиноят иши юритувида бўлган ваколатли адлия муассасаси Топшириладиган шахсни қамоқда сақлаб туриш муддатини узайтириш масаласини миллий қонунчилигига мувофиқ ҳал қилади ва бу ҳақдаги қарорнинг белгиланган тартибда тасдиқланган нусхасини сўраётган Аҳдлашувчи Томоннинг адлия муассасасига юборади.

74-модда

Қамоқда сақлаш муддатини ҳисобга олиш

Сўралаётган Аҳдлашувчи Томон ҳудудида топшириладиган шахсни ушлаб туриш ва қамоқда сақлаш вақти, шунингдек, уни ўтказиш вақти сўраётган Аҳдлашувчи Томон тарафидан уни қамоқда сақлашнинг умумий даврига қўшиб ҳисобланади.

75-модда

Қамоққа олинган шахсни озод қилиш

Мазкур Конвенцияга мувофиқ сўралаётган Аҳдлашувчи Томон ҳудудида қамоққа олинган шахс дарҳол озод қилиниши зарур, агар:

а) сўраётган Аҳдлашувчи Томон ваколатли адлия муассасасидан ушбу шахсни озод қилиш зарурлиги тўғрисида хабарнома келиб тушса;

б) мазкур Конвенциянинг 67-моддасида назарда тутилган топшириш тўғрисидаги сўров ва унга илова қилинган ҳужжатлар қидирувдаги шахс ушланган ва қамоққа олинган пайтдан эътиборан 40 кун ичида тақдим этилмаса;

в) сўралаётган Аҳдлашувчи Томон тарафидан мазкур Конвенциянинг 71-моддаси 2-бандига мувофиқ топшириш ҳақидаги сўровга қўшимча сифатида сўралган маълумотлар, мазкур моддада белгиланган муддатда тақдим этилмаса;

г) топширилиши лозим бўлган шахсни қамоқда сақлаб туришнинг қамоққа олиш тўғрисидаги қарорда кўрсатилган муддати тугаган ҳамда Сўраётган Аҳдлашувчи Томон ушбу муддатни узайтириш тўғрисида қарорнинг нусхасини тақдим қилмаган бўлса.

76-модда

Ҳимоя ҳуқуқини таъминлаш

1. Мазкур Конвенция қоидаларига мувофиқ қамоққа олинган (ушланган) шахслар, ҳар бир Аҳдлашувчи Томон ҳудудида унинг қонунчилигига мувофиқ ҳимоя ҳуқуқига эга.

2. Қамоқда сақланаётган шахсларнинг, уларнинг ҳимоячилари ёки қонуний вакилларининг қамоққа олиш тарзидаги эҳтиёт чорасини қўллаш ва қамоққа олиш муддатини узайтиришга нисбатан шикоятлари сўраётган Аҳдлашувчи Томоннинг судига, бошқа ваколатли адлия муассасасига берилади.

Сўраётган Аҳдлашувчи Томоннинг қидирувдаги шахсни қамоққа олиш (ушлаб туриш) жойидаги суди, бошқа ваколатли адлия муассасаси кўрсатилган шахсларнинг шикоятларини кўриб чиқишда мазкур Конвенция қоидаларига риоя этилганлигини текшириш билан чекланади.

77-модда

Топширишни кечиктириш

1. Агар топшириш сўралаётган шахс сўралаётган Аҳдлашувчи Томон ҳудудида бошқа жиноят содир этганлиги учун жиноий жавобгарликка тортилган ёки судланган бўлса, уни топшириш жиноий таъқиб тугатилгунига, ҳукм ижро этилгунга ёки жазодан озод этилгунига ёхуд уни ўтаб бўлгунига қадар кечиктирилиши мумкин.

2. Сўраётган Аҳдлашувчи Томон топшириш кечиктирилганлиги тўғрисида хабардор қилинади.

78-модда

Вақтинчалик топшириш

1. Агар мазкур Конвенциянинг 77-моддасида назарда тутилган топширишни кечиктириш жиноий таъқибни амалга ошириш муддатининг ўтиб кетишига ёки жиноятни тергов қилишга зарар етказишига олиб келиши мумкин бўлса, топшириш сўралган шахс сўровга асосан вақтинча топширилиши мумкин.

2. Вақтинчалик топширилган қилинган шахс сўралаётган Аҳдлашувчи Томонга у топширилган жиноий иши бўйича процессуал ҳаракатлар амалга ошириб бўлинганидан кейин, бироқ, шахс топширилган кундан эътиборан 90 кундан кечиктирмай қайтарилиши керак. Асослантирилган ҳолларда ушбу муддат сўраётган Аҳдлашувчи Томоннинг ваколатли адлия муассасасининг илтимосига биноан сўралаётган Аҳдлашувчи Томоннинг ваколатли адлия муассасаси томонидан узайтирилиши мумкин.

79-модда

Топшириш ҳақидаги сўровлар коллизияси

Агар бир нечта Аҳдлашувчи Томонлардан топшириш ҳақидаги сўровлар келиб тушса, сўралаётган Аҳдлашувчи Томон ушбу сўровлардан қайси бирини қаноатлантиришни мустақил ҳал қилади.

80-модда

Топширилган шахсни жиноий жавобгарликка тортиш чегараси

1. Топширилган шахс, сўралаётган Аҳдлашувчи Томоннинг розилигисиз, у топширилганидан бошқа жиноят учун жавобгарликка тортилиши ёки у топширилгунига қадар содир этилган жиноят учун жазога тортилиши мумкин эмас.

2. Сўралаётган Аҳдлашувчи Томоннинг розилигисиз шахс учинчи давлатга топширилиши мумкин эмас.

3. Агар топширилган шахс, жиноий иш юритиш тугаганидан кейин — 30 кун ўтгач, судланган тақдирда эса — жазо ўтаб бўлинганидан ёки жазодан озод қилинганидан кейин 30 кун ўтгач сўраётган Аҳдлашувчи Томон ҳудудини тарк этмаса ёки унга ўз хоҳишига кўра қайтса, мазкур модданинг 1 ва 2-бандларида назарда тутилган сўралаётган Аҳдлашувчи Томоннинг розилиги талаб қилинмайди. Топширилган шахс сўраётган Аҳдлашувчи Томон ҳудудини ўзига боғлиқ бўлмаган ҳолатларга кўра тарк эта олмаган вақт, ушбу муддатга қўшиб ҳисобланмайди.

81-модда

Ўлим жазосини қўлламаслик

Мазкур Конвенция мақсадлари учун ва сўралаётган ва сўраётган Аҳдлашувчи Томонларнинг қонунчилигига зарар етказмаган ҳолда, сўраётган Аҳдлашувчи Томон тарафидан мазкур Конвенция қоидаларига мувофиқ топширилган шахсга нисбатан ўлим жазоси қўлланилмайди, агар бундай жазо сўралаётган Аҳдлашувчи Томон тарафидан қўлланилмайдиган бўлса.

82-модда

Топшириладиган шахсни ўтказиш

1. Топшириш ҳақидаги сўров қаноатлантирилган ҳолатда, сўралаётган Аҳдлашувчи Томон сўраётган Аҳдлашувчи Томонни сўралган шахсни топшириш жойи ва вақти тўғрисида хабардор қилади ҳамда уни топшириш жойига етказади.

2. Агар сўраётган Аҳдлашувчи Томон топширилиши лозим бўлган шахсни топшириш учун келишилган муддатдан кейин 15 кун ичида қабул қилмаса, ушбу шахс қамоқдан озод қилиниши лозим. Асосланган ҳолатларда, сўраётган Аҳдлашувчи Томон ваколатли адлия муассасасининг илтимосига биноан топшириладиган шахсни ўтказиш учун белгиланган муддат 15 кунгача узайтирилиши мумкин.

83-модда

Топшириш муносабати билан такроран қамоққа олиш

1. Мазкур Конвенциянинг 75-моддасининг «а» банди, 82-моддаси 2-бандига мувофиқ шахснинг озод этилиши, топшириш ҳақида янги сўров келиб тушган тақдирда, уни топшириш учун такроран қамоққа олишга тўсқинлик қилмайди.

2. Мазкур Конвенциянинг 75-моддаси «б», «в» ва «д» бандларига мувофиқ озод қилинган шахс, топшириш ҳақидаги сўров, топшириш ҳақидаги сўровга қўшимча маълумотлар ёки қамоқда ушлаб туриш муддатининг узайтирилиши ҳақидаги қарор белгиланган муддатлар ўтгандан кейин келиб тушган ҳолатларда, топшириш учун такроран қамоққа олиниши мумкин.

84-модда

Қайта топшириш

1. Агар топширилган шахс, у топширилган жинояти учун жиноий таъқибдан ёки жазони ўташдан бўйин товласа ва сўралаётган Аҳдлашувчи Томон ҳудудига қайтса, у янги сўров бўйича мазкур Конвенциянинг 67-моддасида назарда тутилган материаллар тақдим этилмасдан топширилиши зарур.

2. Агар шахс сўраётган Аҳдлашувчи Томон ҳудудида янги жиноят содир этса ёки унга нисбатан эълон қилинган айбнинг ҳажми ўзгарган бўлса, такроран топшириш мазкур Конвенцияга мувофиқ умумий асосларда амалга оширилади.

85-модда

Жиноий иш юритиш натижалари тўғрисида хабар бериш

Аҳдлашувчи Томонлар топширилган шахсга нисбатан юритилган жиноят иши натижалари ҳақида бир-бирларини хабардор қиладилар. Сўровга асосан якуний қарорнинг нусхаси ҳам юборилади.

86-модда

Транзит ташиш, ўтказиш

1. Аҳдлашувчи Томонлардан бири бошқа Аҳдлашувчи Томоннинг илтимосига кўра, учинчи давлатлар томонидан бошқа Аҳдлашувчи Томонга топширилган ёки вақтинча топширилган шахсларни ўз ҳудуди орқали транзит ташишга, шунингдек, белгиланган тартибда ўтказилишини амалга оширишга рухсат беради. Транзит ташиш учун рухсат талаб этилмайди, агар у ҳаво транспортида, транзит, ҳудуди орқали амалга оширилаётган Аҳдлашувчи Томоннинг ҳудудига оралиқ қўнишсиз амалга оширилса.

2. Транзит ташиш, ўтказиш тўғрисидаги илтимоснома, топшириш ҳақидаги сўров билан бир хил тартибда тузилади ва кўриб чиқилади.

3. Сўралаётган Аҳдлашувчи Томон топширилган шахсни транзит ташишга ўзи энг мақбул деб ҳисоблаган тарзда ва йўналиш бўйича рухсат беради.

87-модда

Топшириш, транзит ташиш ва ўтказиш билан боғлиқ харажатлар

Топшириш, вақтинчалик топшириш ва ўтказиш билан боғлиқ харажатлар бундай эҳтиёж ҳудудида юзага келган Аҳдлашувчи Томон тарафидан, транзит ташиш билан боғлиқ харажатлар эса сўраётган Аҳдлашувчи Томон тарафидан қопланади.

88-модда

Топшириш масалалари бўйича алоқа қилиш тартиби

Агар Аҳдлашувчи Томонларнинг миллий қонунчилигида бошқача тартиб белгиланмаган бўлса, топшириш масалалари бўйича алоқа Аҳдлашувчи Томонларнинг бош прокурорлари (прокурорлари) томонидан амалга оширилади.

89-модда

Топширишни рад этиш

1. Топшириш амалга оширилмайди, агар:

а) топшириш сўралаётган шахс сўралаётган Аҳдлашувчи Томон фуқароси бўлса;

б) топшириш ҳақидаги сўров олинган пайтда, сўралаётган Аҳдлашувчи томоннинг қонунчилигига мувофиқ муддат ўтиб кетганлиги ёхуд бошқа қонуний асосга кўра жиноий таъқиб қўзғатилиши ёки ҳукм ижрога қаратилиши мумкин бўлмаса;

в) топширилиши сўралаётган шахсга нисбатан, айни жиноят учун сўралаётган Аҳдлашувчи томон ҳудудида қонуний кучга кирган ҳукм ёки жиноят иши қўзғатишни рад этиш тўғрисида ёки иш бўйича иш юритишни тугатиш ҳақида қарор чиқарилган бўлса;

г) сўралаётган ёки сўралаётган Аҳдлашувчи Томонларнинг қонунчилигига мувофиқ топшириш сўралаётган қилмиш фақатгина хусусий айблов (жабрланувчининг аризасига биноан) тартибида тергов қилинадиган бўлса.

д) топшириш, сўралаётган Аҳдлашувчи Томоннинг суверенитети ва хавфсизлигига зарар этказиши мумкин бўлса;

е) топшириш ҳақидаги сўров шахснинг ирқи, жинси, диний эътиқоди, этник келиб чиқиши ёки сиёсий қарашларига кўра таъқиб қилиш билан боғлиқ деб ҳисоблаш учун жиддий асослар мавжуд бўлса;

ж) содир этилганлиги учун топшириш сўралаётган қилмиш, сўралаётган Аҳдлашувчи Томоннинг қонунчилигига мувофиқ оддий жиноят ҳуқуқи бўйича жиноят ҳисобланмайдиган ҳарбий жиноят ҳисобланса;

з) топшириш сўралаётган шахс, илгари учинчи давлат томонидан сўралаётган Аҳдлашувчи Томонга топширилган ва бу давлатнинг топширишга розилиги олинмаган бўлса;

и) топшириш сўралаётган шахсга сўралаётган Аҳдлашувчи Томон ҳудудида бошпана берилган бўлса;

к) сўралаётган ва сўраётган Аҳдлашувчи Томонлар иштирокчи ҳисобланувчи халқаро шартномада назарда тутилган бошқа асослар бўлса.

2. Содир этилганлиги учун топшириш сўралаётган қилмиш, сўралаётган Аҳдлашувчи Томон ҳудудида содир этилган бўлса, топшириш рад этилиши мумкин.

3. Топшириш рад этилган тақдирда, сўраётган Аҳдлашувчи Томон, бундай қарор қабул қилинганидан бошлаб 10 кун ичида рад этиш асослари тўғрисида хабардор қилиниши керак.

90-модда

Топширилмаган шахсни жиноий таъқиб қилиш

Сўралаётган шахсни топшириш рад этилган тақдирда, сўралаётган Аҳдлашувчи Томоннинг ваколатли адлия муассасаси сўраётган Аҳдлашувчи Томон ваколатли адлия муассасасининг илтимосномаси ва материалларига асосланиб, топшириш рад этилган шахсни жиноий таъқиб қилиш масаласини Аҳдлашувчи Томонлар қонунчилигига мувофиқ ҳал қилади.

III қисм

Жиноий таъқибни амалга ошириш

91-модда

Жиноий таъқибни амалга ошириш мажбурияти

1. Ҳар бир Аҳдлашувчи томон бошқа Аҳдлашувчи томоннинг топшириғига биноан, сўраётган Аҳдлашувчи Томон ҳудудида жиноят содир этганликда гумон қилинаётган, айбланаётган ўз фуқароларига нисбатан жиноий таъқибни Аҳдлашувчи Томонлар қонунчилигига мувофиқ амалга ошириш мажбуриятини олади.

Аҳдлашувчи Томонлар тарафидан жиноий таъқиб қилиш, ўз ҳудудларида бўлиб турган фуқаролиги бўлмаган шахслар ва чет эл фуқароларига нисбатан ҳам, агар уларни топшириш рад этилган бўлса, амалга оширилади.

2. Агар жиноят иши қўзғатилган жиноят, жиноят натижасида зарар кўрган шахсларнинг фуқаровий-ҳуқуқий талабларини келтириб чиқарса, ушбу талаблар, агар бундай шахсларнинг зарарни қоплаш тўғрисидаги илтимосномаси мавжуд бўлса, ушбу қўзғатилган жиноят ишида ёки фуқаролик суд ишларини юритиш тартибида кўриб чиқилади.

3. Сўралаётган Аҳдлашувчи Томонда жиноий таъқиб қилиш, қилмиш ушбу Аҳдлашувчи Томонда ҳам жиноий жазога сазовор бўлиши шарти билан амалга оширилиши мумкин.

Ҳукм қилишда содир этилган жиноятга нисбатан тайинланадиган жазо, сўраётган Аҳдлашувчи Томоннинг қонунчилигида белгиланганидан қаттиқроқ бўлмаслиги керак.

92-модда

Жиноий таъқибни амалга ошириш тўғрисида топшириқ

1. Жиноий таъқибни амалга ошириш тўғрисидаги топшириқда қуйидагилар бўлиши керак:

а) сўралаётган Аҳдлашувчи Томон адлия муассасасининг номи;

б) сўраётган Аҳдлашувчи Томон адлия муассасасининг номи;

в) жиноий таъқиб қилишни амалга ошириш тўғрисида топшириқ юборилган қилмишнинг тавсифи;

г) қилмишни содир этишнинг имкон қадар аниқ вақти, жойи ва шароитлари ҳақидаги кўрсатмалари;

д) сўраётган Аҳдлашувчи Томоннинг қилмишни жиноят деб топиш учун асос бўлувчи қонуни матни, шунингдек, иш юритиш учун муҳим аҳамиятга эга бўлган бошқа қонунчилик нормаларининг матни;

е) гумон қилинувчи ёки айбланувчининг фамилияси, исми ва отасининг исми, унинг фуқаролиги, шунингдек унинг шахси тўғрисидаги бошқа маълумотлар;

ж) жабрланувчининг аризасида биноан қўзғатиладиган жиноят ишлари бўйича жабрланувчиларнинг аризалари ва етказилган зарарни қоплаш тўғрисидаги аризалар;

з) жиноят натижасида етказилган зарар миқдори ҳақидаги кўрсатув.

Топшириққа сўраётган Аҳдлашувчи Томон ихтиёрида бўлган жиноят иши материаллари илова қилинади, бунда сўраётган Аҳдлашувчи Томонда унинг ички қонунчилигига мувофиқ олинган далиллар сўралаётган Аҳдлашувчи Томонда ҳам бир хил далилий қийматга эга.

2. Сўраётган Аҳдлашувчи Томон тарафидан қўзғатилган жиноят иши юборилганда, ушбу иш бўйича тергов сўралаётган Аҳдлашувчи Томон тарафидан унинг ички қонунчилигига мувофиқ давом эттирилади.

Жиноий таъқибни амалга ошириш тўғрисида топшириқ юборилгунга қадар Сўраётган Аҳдлашувчи Томон, тергов муддатларини узайтириш, айбланувчини қамоққа олиш ва иш бўйича иш юритишни тиклаш масалаларини ҳал қилади.

3. Ишда мавжуд бўлган ҳужжатларнинг ҳар бири сўраётган Аҳдлашувчи Томон ваколатли адлия муассасасининг гербли муҳри билан тасдиқланган бўлиши керак.

4. Топшириқ ва унга илова қилинган ҳужжатлар мазкур Конвенциянинг 7 ва 17-моддалари қоидаларига мувофиқ тузилади.

5. Агар айбланувчи, жиноий таъқибни амалга ошириш тўғрисида топшириқ юборилаётган вақтда сўраётган Аҳдлашувчи Томон ҳудудида қамоқда сақланаётган бўлса, у сўралаётган Аҳдлашувчи Томонга ўтказилади.

93-модда

Ўз фуқароларини жиноий таъқибни амалга ошириш ҳақидаги топшириқ қабул қилингунча қамоққа олиш

1. Ҳар бир Аҳдлашувчи Томон бошқа Аҳдлашувчи Томоннинг илтимосига кўра ўз фуқароларини оғир ва ўта оғир жиноятларни содир этганликлари учун уларга нисбатан жиноий таъқибни амалга ошириш тўғрисида топшириқ қабул қилингунича қамоққа олишлари мумкин. Илтимосномада қамоққа олиш тўғрисидаги қарорга ҳавола ва жиноий таъқибни амалга ошириш ҳақидаги топшириқ қўшимча равишда тақдим қилиниши ҳақидаги ёзув бўлиши керак.

Кўрсатилган илтимоснома ва жиноий таъқибни амалга ошириш ҳақидаги топшириқ қабул қилингунига қадар қамоққа олиш ҳақидаги қарор, унинг аслини бир вақтнинг ўзида почта ёки курер орқали жўнатган ҳолда, техник алоқа воситаларидан фойдаланиб юборилиши мумкин.

2. Сўралаётган Аҳдлашувчи Томоннинг фуқароси бўлган шахсни ҳибсга олганлик тўғрисида жиноят иши юритувида бўлган сўраётган Аҳдлашувчи Томон зудлик билан (факс, телефон, телеграф ва бошқалар орқали) хабардор қилинади ва мазкур Конвенциянинг 91-моддасига мувофиқ ушбу шахсга нисбатан жиноий таъқибни олиб бориш учун тегишли материалларни юбориш масаласи ҳақида савол қўйилади.

3. Бундай шахсни жиноий таъқиб қилишда сўралаётган Аҳдлашувчи Томоннинг қонунчилиги қўлланилади.

4. Мазкур модданинг 1-бандига мувофиқ қамоққа олинган шахс қўйиб юборилиши зарур, агарда мазкур Конвенциянинг 92-моддасида назарда тутилган жиноий таъқибни амалга ошириш тўғрисидаги топшириқ, унга илова қилинган барча ҳужжатлар билан бирга ушбу шахс қамоққа олинганидан бошлаб 40 кун ичида сўралаётган Аҳдлашувчи Томон тарафидан қабул қилинмаса.

Сўралаётган Аҳдлашувчи Томон ушбу шахсга нисбатан жиноий таъқиб қилиш масаласини миллий қонунчилиги асосида ҳал қилади.

94-модда

Жиноий таъқиб қилиш масалалари бўйича алоқа қилиш тартиби

Жиноий таъқиб қилиш масалалари бўйича алоқа Аҳдлашувчи Томонларнинг бош прокурорлари (прокурорлари) томонидан, агар уларнинг ички қонунчилигида бошқача тартиб белгиланмаган бўлса, амалга оширилади.

95-модда

Юрисдикцияни ўтказиш

1. Сўралаётган Аҳдлашувчи Томон жиноят ишини иш юритувга қабул қилган пайтдан бошлаб, сўраётган Аҳдлашувчи Томон гумон қилинувчи, айбланаётган шахсни жиноий таъқибни амалга ошириш масаласи кўтарилган қилмиш учун жиноий жавобгарликка торта олмайди.

2. Жиноий таъқиб қилиш ҳуқуқи сўраётган Аҳдлашувчи Томонга ўтади, агар сўралаётган Аҳдлашувчи Томон унинг сўровини бажариш чораларини кўрмаса ёки бажаришдан бош тортса.

3. Мазкур модданинг 2-бандида назарда тутилган ҳолларда, сўралаётган Аҳдлашувчи Томон унга топширилган жиноий таъқиб материаллари ва далилларни қайтариб беради.

96-модда

Судларнинг иш юритувида бўлган жиноят ишларини ўтказиш тартиби

1. Суд мажлисларига келишдан бўйин товлаган ва суддан яширинган судланувчиларга нисбатан бўлган жиноят ишлари, уларнинг бўлиб турган ери ва сўралаётган Аҳдлашувчи Томон фуқаролигига эга эканлиги аниқланганда ёки топшириш рад этилганда, иш бўйича иш юритиш тўхтатилгани бекор қилинганидан кейин мазкур Конвенциянинг 92-моддасида назарда тутилган тартибда сўралаётган Аҳдлашувчи Томоннинг ваколатли адлия муассасасига жиноий таъқибни амалга ошириш учун юборилади.

2. Қўшимча суриштириш, терговни якунлаш ва ишни кўришда сўралаётган Аҳдлашувчи Томон қонунчилиги ва мазкур Конвенциянинг 90-моддаси қўлланилади.

97-модда

Жиноий таъқиб қилиш натижалари тўғрисида хабар бериш

Сўралаётган Аҳдлашувчи Томон сўраётган Аҳдлашувчи Томонни, унинг жиноий таъқибни амалга ошириш ҳақидаги топшириғи бўйича қабул қилинган якуний қарор ҳақида хабардор қилиши шарт. Сўраётган Аҳдлашувчи Томоннинг сўровига биноан унга якуний қарорнинг нусхаси юборилади.

98-модда

Жиноий таъқиб тўғрисидаги қарорнинг оқибатлари

Агар Аҳдлашувчи Томонга мазкур Конвенциянинг 91-моддасига мувофиқ жиноий таъқибни амалга ошириш тўғрисидаги топшириқ айни қилмиш юзасидан ҳукм қонуний кучга киргандан ёки сўралаётган Аҳдлашувчи Томоннинг ваколатли адлия муассасаси томонидан бошқа якуний қарор қабул қилингандан кейин юборилган бўлса, сўраётган Аҳдлашувчи Томоннинг ваколатли адлия муассасаси томонидан ушбу қилмиш содир этилганлиги факти бўйича жиноят иши қайта қўзғатилиши мумкин эмас ва у қўзғатган иш тугатилиши керак.

99-модда

Жавобгарликни енгиллаштирувчи ёки оғирлаштирувчи ҳолатлар

1. Аҳдлашувчи Томонларнинг ҳар бири жиноятларни тергов қилиш ва жиноят ишларини судда кўриб чиқишда, унинг қонунчилигида назарда тутилган енгиллаштирувчи ва оғирлаштирувчи ҳолатларни, улар қайси Аҳдлашувчи Томон ҳудудида келиб чиққанидан қатъий назар ҳисобга олиши мумкин.

2. Шахсни ўта хавфли рецидивист деб топиш ёки унинг ҳаракатларида рецидивликнинг турли кўринишлари мавжудлиги, жиноятни такроран содир этиш ва жазони шартли ўташ, жазони ижро этишни кечиктириш ёки шартли равишда муддатидан олдин озод қилиш билан боғлиқ мажбуриятларни бузганлик фактларини аниқлаш билан боғлиқ масалаларни ҳал қилишда, Аҳдлашувчи Томонларнинг адлия муассасалари собиқ СССР ва унинг таркибига кирган иттифоқдош республикаларнинг судлари (трибуналлари), шунингдек, Аҳдлашувчи Томонлардан ҳар бирининг судлари томонидан чиқарилган ҳукмларни тан олишлари ва ҳукм чиқаришда ҳисобга олишлари мумкин.

100-модда

Жиноят ишларини бирлаштириш

1. Агар шахс ёки шахслар гуруҳи томонидан икки ёки ундан ортиқ Аҳдлашувчи Томонлар ҳудудида жиноятлар содир этилган ҳолатларда, ушбу жиноятлар бўйича жиноят ишлари Аҳдлашувчи Томонларнинг тегишли ваколатли адлия муассасаларининг илтимосига биноан битта иш юритишга бирлаштирилиши мумкин.

2. Ишларни бирлаштириш мазкур Конвенциянинг 91 ва 92-моддалари талабларига риоя қилган ҳолда амалга оширилади.

101-модда

Икки ёки ундан ортиқ Аҳдлашувчи томонларнинг судлари судловига тегишли ишларни кўриб чиқиш тартиби

Битта шахсни ёки бир гуруҳ шахсларни бир нечта жиноятларни содир қилганликда айблашда, ишлар бирлаштирилган ёхуд икки ёки ундан ортиқ Аҳдлашувчи Томонлар судларининг судловига тегишли бўлса, уларни кўриб чиқиш учун ҳудудида дастлабки тергов тугалланган Аҳдлашувчи Томоннинг суди ваколатли бўлади. Бундай ҳолатларда, иш ушбу Аҳдлашувчи Томоннинг қонунчилигига мувофиқ кўриб чиқилади.

102-модда

Жиноий таъқиб қилишни рад этиш

1. Жиноий таъқибни амалга ошириш рад этилади, агар:

а) жиноий таъқиб тўғрисидаги топшириқ олинган пайтда шахсни жиноий жавобгарликка тортиш муддати ўтган бўлса;

б) Жиноий таъқибга олиниши масаласи ҳал қилинаётган шахсга нисбатан Сўралаётган Аҳдлашувчи Томон ҳудудида айни бир жиноят учун иш юритишни тугатиш тўғрисидаги қарор ёки қонуний кучга кирган ҳукм чиқарилган ёхуд жиноят иши қўзғатиш рад этилган бўлса;

в) содир этилган қилмиш учун жазо қўллаш имкониятини бекор қилувчи амнистия акти мавжуд бўлса;

г) шахс ижтимоий хавфли қилмишни содир этиш вақтида сўралаётган Аҳдлашувчи Томон қонунчилигига мувофиқ жиноий жавобгарликка тортиш ёшига етмаган бўлса.

2. Жиноий таъқибни амалга ошириш сўралаётган Аҳдлашувчи Томоннинг қонунчилигида назарда тутилган бошқа асосларга кўра ҳам рад этилиши мумкин.

3. Жиноий таъқибни амалга ошириш рад этилган тақдирда, Сўраётган Аҳдлашувчи Томон қарор қабул қилинган кундан бошлаб 10 кун ичида рад этиш сабаблари тўғрисида ёзма равишда хабардор қилиниши керак.

IV қисм

Жиноят ишлари бўйича ҳуқуқий ёрдам ва ҳуқуқий муносабатларга оид махсус қоидалар

103-модда

Буюмларни топшириш

1. Аҳдлашувчи Томонлар сўров бўйича бир-бирларига:

а) жиноят содир этишда фойдаланилган буюмлар, шу жумладан жиноят қуроллари; жиноят натижасида қўлга киритилган ёки у учун тўлов сифатида олинган ашёлар ёки ҳуқуқбузарнинг шу тарзда қўлга киритган буюмлари эвазига олган буюмлар;

б) жиноят ишида далил сифатида қимматли бўлиши мумкин бўлган буюмлар. Жиноятчи вафот этиши, қочиши ёки бошқа ҳолатлар туфайли уни топширишни амалга оширишнинг иложи бўлмаган ҳолатларда ҳам ушбу буюмларнинг топширилиши амалга оширилади.

2. Агар сўралаётган Аҳдлашувчи Томонга ушбу модданинг 1-бандида кўрсатилган буюмлар жиноят иши бўйича далил сифатида зарур бўлса, уларни топшириш иш юритиш тугагунига қадар кечиктирилиши мумкин.

3. Юборилган буюмларга нисбатан учинчи шахсларнинг ҳуқуқлари ўз кучида қолади. Иш юритиш тугагандан сўнг, ушбу буюмлар уларни юборган Аҳдлашувчи Томонга беғараз қайтарилиши лозим, агар ушбу томон улардан бош тортмаса.

104-модда

Мулкни қидириш, унга банд солиш ва мусодара қилинишини таъминлаш масалаларида ҳуқуқий ёрдам кўрсатиш

1. Аҳдлашувчи Томонлар ўз қонунчилиги ва мазкур Конвенция қоидаларига мувофиқ жиноий йўл билан олинган мулк, пул ва қимматликлар, шунингдек, айбланувчига (судланувчига, маҳкумга) тегишли бўлган жиноий йўл билан олинган даромадларни қидириш, уларга банд солиш ва олиб қўйиш, жабрланувчиларга (фуқаровий даъвогарларга) жиноят оқибатида етказилган зарарларни қоплаш, судларнинг жарималар ва мусодара қилиш ҳақидаги ҳукмларини ижро этишда бир-бирларига ҳуқуқий ёрдам кўрсатадилар.

2. Шу мақсадда Аҳдлашувчи Томонларнинг ваколатли адлия муассасалари жиноят ишлари бўйича ҳуқуқий ёрдам кўрсатиш ҳақидаги топшириққа асосан ўз ички қонунчиликларига мувофиқ жиноий йўл билан олинган мулк, пул ва қимматликларни, шунингдек, айбланувчига (судланувчига, маҳкумга) тегишли бўлган жиноий фаолиятдан олинган даромадларни аниқлашга қаратилган барча зарурий тергов, қидирув ёки тезкор-қидирув тадбирларини амалга оширади.

Аҳдлашувчи Томонларнинг ваколатли адлия муассасалари бундай мулк, пул, қимматликлар ва даромадларни аниқлагач, уларнинг сақланганлигини таъминлаш мақсадида улар билан ҳар қандай операцияларни олдини олиш ва олиб қўйишга тақиқ қўйиш кўринишидаги чораларни кўради.

3. Сўралаётган Аҳдлашувчи Томоннинг ваколатли адлия муассасалари жиноий йўл билан олинган мулк, пул ва қимматликларни ўз юрисдикцияси доирасида аниқлагач, уларни жиноят ишига ашёвий далил сифатида қўшиш ва кейинчалик қонуний эгаларига қайтариш, жиноят оқибатида етказилган зарарни қоплаш мақсадида сўраётган Аҳдлашувчи Томоннинг ваколатли адлия муассасасига топширади.

4. Сўралаётган Аҳдлашувчи Томоннинг ваколатли адлия муассасалари айбланувчининг (судланувчининг, маҳкумнинг) пули, қимматликлари ва мулкига, жиноий фаолиятдан олинган даромадларига банд солгач, жиноят оқибатида етказилган зарарларни қоплашда фойдаланиш ва Мазкур Конвенциянинг 58-моддасида назарда тутилган қоидаларни инобатга олган ҳолда Аҳдлашувчи Томонлар судларининг қонуний кучга кирган ҳукмлари асосида мусодара қилиш мақсадида уларнинг сақланишини таъминлайди.

5. Сўралаётган Аҳдлашувчи Томонларнинг ваколатли адлия муассасалари жиноий йўл билан олинган мулк, пул ва қимматликлар, шунингдек, айбланувчига (судланувчига, маҳкумга) тегишли бўлган жиноий фаолиятдан олинган даромадларни Сўраётган Аҳдлашувчи Томонларнинг адлия муассасаларига топширишни кечиктириши мумкин, агар улар сўралаётган Аҳдлашувчи Томонларга жиноий таъқибни амалга ошириш ёки бошқа (учинчи) шахсларнинг ҳуқуқлари бўйича низоларни ҳал қилишда керак бўлса.

105-модда

Видеоалоқа воситаларидан фойдаланиш

Аҳдлашувчи Томонларнинг ваколатли адлия муассасалари ҳуқуқий ёрдам кўрсатишда видеоалоқа воситаларидан ўзаро келишувга асосан фойдаланишга ҳақли. Видеоалоқа воситаларидан фойдаланиш Аҳдлашувчи Томонларнинг ички қонунчилигига мувофиқ амалга оширилади.

106-модда

Қамоққа олинган ёки озодликдан маҳрум қилиш тарзидаги жазосини ўтаётган шахсни вақтинча ўтказиш

1. Агар бошқа Аҳдлашувчи Томон ҳудудида қамоқда сақланаётган ёки озодликдан маҳрум қилиш тарзидаги жазони ўтаётган шахсни гувоҳ ёки жабрланувчи сифатида сўроқ қилиш, шунингдек, унинг иштирокида бошқа тергов ҳаракатларини ўтказиш зарурати туғилса, ушбу шахс, фуқаровий тегишлилигидан қатъий назар сўраётган Аҳдлашувчи Томоннинг асосланган сўровига кўра, сўралаётган Аҳдлашувчи Томоннинг адлия муассасасининг марказий органи қарорига асосан, уни қамоқда сақлаш ва белгиланган вақтда қайтариш шарти билан вақтинча топширилиши мумкин.

2. Мазкур модданинг 1-бандида кўрсатилган шахсни вақтинча топшириш тўғрисидаги сўров, мазкур Конвенциянинг 7-моддаси қоидаларига мувофиқ тузилади ва ушбу шахснинг сўраётган Аҳдлашувчи Томон ҳудудида қанча муддат давомида бўлиши ҳақидаги кўрсатувни ўз ичига олиши керак.

3. Мазкур модданинг 1-бандида кўрсатилган шахсни вақтинча топшириш қуйидаги ҳолларда амалга оширилмайди, агар:

а) унинг бундай топширишга розилиги олинмаган бўлса;

б) сўралаётган Аҳдлашувчи Томон ҳудудида дастлабки тергов ёки суд муҳокамасида унинг ҳозир бўлиши зарур бўлса;

в) бундай топшириш ушбу шахсни қамоқда сақлаш ёки озодликдан маҳрум қилиш жазосини ўташининг белгиланган муддатлари бузилишига олиб келса.

4. Ушбу модданинг 1-бандида кўрсатилган шахсга мазкур Конвенциянинг 9-моддаси 1-бандида назарда тутилган кафолатлар амал қилади.

107-модда

Айблов ҳукмлари тўғрисидаги хабарномалар ва судланганлик ҳақидаги маълумотларни тақдим қилиш

1. Аҳдлашувчи Томонларнинг ҳар бири бошқа Аҳдлашувчи Томонларни тегишли Аҳдлашувчи Томонларнинг фуқароларига нисбатан ўз судлари томонидан чиқарилган ва қонуний кучга кирган айблов ҳукмлари тўғрисида ҳар йили хабардор қилиб борадилар, бир вақтнинг ўзида маҳкумларнинг уларда мавжуд бўлган бармоқ изларини ҳам юборадилар.

2. Ҳар бир Аҳдлашувчи Томон бошқа Аҳдлашувчи Томонларга уларнинг сўровига кўра, ўз судлари томонидан илгари судланган шахсларнинг судланганлиги ҳақидаги маълумотларни, агар ушбу шахслар сўраётган Аҳдлашувчи Томон ҳудудида жиноий жавобгарликка тортилаётган бўлса бепул тақдим этади.

108-модда

Назорат остида етказиб бериш

Аҳдлашувчи Томонлар ўз миллий қонунчиликларига мувофиқ, ваколатли адлия муассасаларининг ўзаро келишувлари асосида, жиноят содир қилишда иштирок этган шахсларни аниқлаш, далиллар олиш ва жиноий таъқибни таъминлаш мақсадида тергов қилинаётган жиноят ишлари бўйича назорат остида етказиб бериш усулини қўллаш чораларни кўрадилар.

V қисм

Ҳукмларни тан олиш ва ижро этиш

109-модда

Ҳукмларни тан олиш ва ижро этиш

1. Аҳдлашувчи Томонларнинг ҳар бири мазкур Конвенцияда назарда тутилган шартларга мувофиқ, бир Аҳдлашувчи Томон суди томонидан ҳукм қилинган ва жазони ўтамаган шахсни бошқа Аҳдлашувчи Томон ҳудудида жиноий жавобгарликка тортиш учун топшириш, шунингдек, бир Аҳдлашувчи Томон тарафидан шахсни бошқа Аҳдлашувчи Томоннинг суди томонидан чиқарилган ҳукмни ижро этиш учун топширишни рад этиш ҳолатида, бошқа Аҳдлашувчи Томонларнинг судлари томонидан чиқарилган ҳукмларни тан олади ва ижро этади.

2. Ҳукмларни тан олиш ва ижро этиш ҳудудида бундай ҳукмлар тан олинадиган ва ижро этиладиган Аҳдлашувчи Томон қонунчилиги асосида амалга оширилади.

110-модда

Ҳукмни тан олиш ва ижро этиш тўғрисидаги илтимоснома

1. Ҳукмни тан олиш ва ижро этиш тўғрисидаги илтимоснома сўраётган Аҳдлашувчи Томоннинг ваколатли адлия муассасаси тарафидан сўралаётган Аҳдлашувчи Томоннинг ваколатли адлия муассасасига юборилади.

2. Аризага қуйидагилар илова қилинади:

а) қонуний кучга кирган ҳукмнинг ва ишда мавжуд бўлган юқори турувчи инстанциялар қарорларининг белгиланган тартибда шаҳодатланган нусхаси, ҳукмнинг қонуний кучга кирганлиги ва уни ижрога қаратиш тўғрисидаги расмий ҳужжат;

б) унга нисбатан ҳукмни тан олиш ва ижро этиш тўғрисида илтимоснома қўзғатилаётган шахснинг шахсияти ва фуқаролиги тўғрисидаги маълумотлар;

в) асосида шахс ҳукм қилинган қонун моддаларининг матни;

г) асосий ва қўшимча жазонинг ўталган қисми, қопланган зарарнинг миқдори тўғрисидаги маълумотнома.

3. Зарур ҳолларда, сўралаётган Аҳдлашувчи Томоннинг ваколатли адлия муассасаси қўшимча ҳужжатлар ва маълумотларни сўраши мумкин.

4. Илтимосномага илова қилинган ҳужжатлар, сўралаётган Аҳдлашувчи Томоннинг тилига ёки рус тилига тасдиқланган таржимаси билан тақдим этилади.

5. Сўралаётган Аҳдлашувчи Томоннинг ваколатли адлия муассасаси ҳукмни тан олиш ва ижро этиш тўғрисида келиб тушган илтимосномани кўриб чиқиш учун ўз Аҳдлашувчи Томонининг ваколатли судига юборади.

111-модда

Ҳукмни тан олиш ва ижро этиш тартиби

1. Суд қарорини тан олиш ва ижро этиш тўғрисидаги илтимоснома сўралаётган Аҳдлашувчи Томоннинг ваколатли суди томонидан унинг ички қонунчилигига мувофиқ кўриб чиқилади.

2. Сўралаётган Аҳдлашувчи Томоннинг ваколатли суди ҳукмни тан олиш ва ижро этиш тўғрисидаги қарорни топшириладиган шахс унинг ҳудудига амалда ўтказилгунга қадар қабул қилади.

3. Сўралаётган Аҳдлашувчи Томоннинг ваколатли суди сўраётган Аҳдлашувчи Томон суди томонидан чиқарилган ҳукм асосида, ўз ички қонунчилигига мувофиқ ҳукм билан тайинланган жазони белгилайди.

4. Агар сўралаётган Аҳдлашувчи Томон қонунчилигига кўра, ушбу қилмиш учун белгиланган жазонинг энг кўп муддати ҳукмда назарда тутилганидан кам бўлса, суд худди шундай қилмиш учун сўралаётган Аҳдлашувчи Томон қонунчилигида назарда тутилган жазонинг энг юқори муддатини белгилайди.

5. Жазонинг, ҳукмни чиқарган сўраётган Аҳдлашувчи Томон ҳудудида ўталган қисми, ҳукмни тан олиш тўғрисидаги илтимосномани кўриб чиқаётган Аҳдлашувчи Томоннинг қонунчилигига мувофиқ жазога қўшиб ҳисобланади. Ҳукмни ижро этишнинг тартиби ҳам бир вақтнинг ўзида ҳал этилади.

6. Жазо сўралаётган ва сўраётган Аҳдлашувчи Томонларнинг қонунчилигида назарда тутилган бўлса қўлланилади.

112-модда

Ҳукмни тан олиш ва ижро этишни рад этиш

Ҳукмни тан олиш ва ижро этиш рад этилиши мумкин, агар:

а) даъво муддати ўтганлиги ёки бошқа қонуний асосларга кўра, шунингдек, судланувчининг иштирокисиз сиртдан чиқарилган ҳукм асосида жазони ижро этиш мумкин бўлмаса;

б) сўралаётган Аҳдлашувчи Томон ҳудудида шахс содир этган қилмиши учун жазоланган ёки оқланган ёки жиноят иши қонунда белгиланган тартибда тугатилган, шунингдек, агар шахс сўралаётган Аҳдлашувчи Томоннинг ваколатли адлия муассасаси томонидан жазодан озод қилинган бўлса;

в) сўралаётган Аҳдлашувчи Томоннинг қонунчилигида сўраётган Аҳдлашувчи Томон ҳудудида тайинланган жазога ўхшаш жазо назарда тутилмаган бўлса;

г) ҳукм қилиш шахсни ирқи, жинси, диний эътиқоди, этник мансублиги ёки сиёсий қарашларига кўра таъқиб қилиш билан боғлиқ деб ҳисоблаш учун асосли сабаблар мавжуд бўлса.

113-модда

Ҳукмларни ижро этишда жазоларни қўшиш тартиби

Ҳукмларни ижро этиш вақтида жазоларни қўшиш ҳудудида ҳукм ижро этиладиган Аҳдлашувчи Томон қонунчилигида белгиланган қоидаларга мувофиқ амалга оширилади.

114-модда

Афв этиш ва амнистияни қўллаш

Унга нисбатан ҳукмни тан олиш ва ижро этиш тўғрисида қарор қабул қилинган шахсни афв этиш ва унга амнистия қўллаш сўраётган Аҳдлашувчи Томонлар ҳам сўралаётган Аҳдлашувчи Томонлар тарафидан ўз ички қонунчиликларига мувофиқ амалга оширилади.

115-модда

Ҳукмни қайта кўриб чиқиш тартиби

Маҳкумга нисбатан чиқарилган ва ижро этиш учун юборилган ҳукмни қайта кўриб чиқиш фақат ҳудудида ҳукм чиқарилган Аҳдлашувчи Томоннинг ваколатли суди томонидан амалга оширилиши мумкин.

116-модда

Ўзгартирилган ва бекор қилинган ҳукмларни ижро этиш

1. Агар ҳукмни ижро этиш жараёнида у, ҳудудида чиқарилган Аҳдлашувчи Томоннинг ваколатли суди томонидан ўзгартирилса, қарорнинг нусхаси ҳукмни ижро этувчи Аҳдлашувчи Томонга бундай қарорнинг ижро этилиши масаласини мазкур Конвенция талабларига мувофиқ ҳал қилиш учун зудлик билан юборилади.

2. Агар ҳукмни ижро этиш жараёнида у, ҳудудида чиқарилган Аҳдлашувчи Томоннинг ваколатли суди томонидан жиноят ишини тугатган ҳолда бекор қилинса, қарорнинг нусхаси ҳукмни ижро этувчи Аҳдлашувчи Томоннинг ваколатли муассасасига ижро этиш учун зудлик билан юборилади.

3. Агар ижро этиш жараёнида вақтида ҳукм бекор қилиниб, янгидан тергов ёки суд муҳокамаси тайинланса, ушбу қарорнинг нусхаси, жиноят иши материаллари ва жиноий таъқибни амалга ошириш ҳақидаги топшириқ мазкур Конвенциянинг 92-моддасига мувофиқ ҳукмни ижро этувчи Аҳдлашувчи Томоннинг ваколатли адлия муассасасига юборилади.

ЯКУНИЙ ҚОИДАЛАР

117-модда

Мазкур Конвенцияни қўллаш билан боғлиқ масалалар

Мазкур Конвенцияни қўллаш ва талқин қилишда юзага келадиган масалалар Аҳдлашувчи Томонларнинг ваколатли органлари томонидан ўзаро келишув асосида ҳал қилинади.

118-модда

Конвенциянинг бошқа халқаро шартномалар билан нисбати

1. Мазкур Конвенциянинг предметига тааллуқли бўлган Европа Кенгашининг жиноий соҳадаги бир ёки бир нечта конвенцияларининг иштирокчиси ҳисобланувчи Аҳдлашувчи Томонлар ўртасидаги муносабатларга Мазкур Конвенциянинг фақатгина Европа Кенгашининг кўрсатилган конвенцияларини тўлдирувчи ёки уларда назарда тутилган принципларнинг қўлланилишига ёрдам берувчи қоидалари қўлланилади.

2. Европа Кенгашининг юқорида қайд этилган конвенцияларининг иштирокчилари бўлган Аҳдлашувчи Томонлар ва бундай конвенцияларнинг иштирокчилари бўлмаган Аҳдлашувчи Томонлар ўртасидаги муносабатларда мазкур Конвенция қоидалари қўлланилади.

3. Мазкур Конвенция қоидалари Аҳдлашувчи Томонларнинг улар иштирокчиси бўлган ёки бўлиши мумкин бўлган бошқа халқаро шартномаларидан келиб чиқадиган ҳуқуқ ва мажбуриятларига дахл қилмайди.

4. Аҳдлашувчи Томонлардан бирининг илтимосига кўра, уларнинг марказий адлия муассасалари, зарур ҳолларда, Аҳдлашувчи Томонларнинг бошқа давлат органлари вакилларини жалб қилган ҳолда, мазкур Конвенция ва бошқа халқаро шартномалар ўртасидаги муносабатлар юзасидан маслаҳатлашувлар ўтказади.

119-модда

Ўзгартириш ва қўшимчалар киритиш

Аҳдлашувчи Томонларнинг розилиги билан мазкур Конвенцияга унинг ажралмас қисми ҳисобланувчи, тегишли баённомалар билан расмийлаштириладиган ва мазкур Конвенциянинг 120-моддасида назарда тутилган тартибда кучга кирадиган ўзгартириш ва қўшимчалар киритилиши мумкин.

120-модда

Кучга кириш тартиби

1. Мазкур Конвенция, уни имзолаган давлатлар томонидан ратификация қилиниши керак. Ратификация ёрлиқлари мазкур Конвенциянинг депозитарийси функцияларини бажарувчи Мустақил Давлатлар Ҳамдўстлиги Ижроия қўмитасига сақлаш учун топширилади.

2. Мазкур Конвенция учинчи ратификация ёрлиғи депозитарийга сақлаш учун топширилган кундан бошлаб ўттизинчи кундан кучга киради. Ратификация ёрлиғини мазкур Конвенция кучга кирганидан кейин депозитарийга сақлаш учун топширган давлат учун ратификация ёрлиғи депозитарийга сақлаш учун топширилган кундан бошлаб ўттизинчи кундан кучга киради.

3. Мазкур Конвенциянинг иштирокчи-давлатлари ўртасида 1993 йил 22 январдаги Фуқаролик, оилавий ва жиноий ишлар бўйича ҳуқуқий ёрдам ва ҳуқуқий муносабатлар тўғрисидаги Конвенция ва унга 1997 йил 28 мартдаги Баённома амал қилишни тўхтатади.

4. Мазкур модданинг 3-бандида кўрсатилган Конвенция ва унга Баённома мазкур Конвенциянинг иштирокчи давлати ва Конвенция ва унга Баённоманинг мазкур Конвенция кучга кирмаган иштирокчи давлати ўртасидаги муносабатларга нисбатан қўлланилишда давом этади.

121-модда

Конвенциянинг амал қилиш муддати

1. Мазкур Конвенция кучга кирган кундан бошлаб беш йил давомида амал қилади. Ушбу муддатдан тугаганидан кейин Конвенция ҳар сафар янги беш йиллик муддатга автоматик равишда узаяверади.

2. Ҳар бир Аҳдлашувчи Томон мазкур Конвенциядан, унинг амал қилиш муддатининг тегишли беш йиллик муддати тугашидан 12 ой олдин депозитарийни ёзма равишда хабардор қилган ҳолда чиқиши мумкин.

122-модда

Вақт бўйича амал қилиши

Мазкур Конвенция, унинг куч киришига қадар вужудга келган ҳуқуқий муносабатларга нисбатан ҳам қўлланилади.

123-модда

Конвенцияга қўшилиш тартиби

Мазкур Конвенцияга бошқа давлатлар, у кучга кирганидан кейин барча Аҳдлашувчи Томонларнинг розилиги билан, қўшилиш тўғрисидаги ҳужжатларни депозитарийга тақдим этиш орқали қўшилишлари мумкин. Қўшилиш, депозитарий бундай қўшилишга розилик тўғрисидаги охирги хабарномани олган кундан бошлаб ўттизинчи кундан кучга кирган деб ҳисобланади.

124-модда

Депозитарийнинг вазифалари

Депозитарий мазкур Конвенцияни имзолаган ва унга қўшилган давлатларни ҳар бир ратификация ёрлиғи ёки қўшилиш ҳақидаги ҳужжатнинг сақлаш учун топширилган санаси, мазкур Конвенциянинг кучга кирган санаси ҳамда у томонидан қабул қилинган ва мазкур Конвенцияга тааллуқли бўлган бошқа ҳужжатлар, қўшимча шартлар, билдиришномалар ва хабарномалар ҳақида зудлик билан хабардор қилади.

2002-йил 7-октябрда Кишинев шаҳрида рус тилидаги битта асл нусхада имзоланди. Асл нусха Мустақил Давлатлар Ҳамдўстлиги Ижроия қўмитасида сақланади, у мазкур Конвенцияни имзолаган ҳар бир давлатга унинг тасдиқланган нусхасини юборади.

(имзолар)

Озарбайжон Республикасининг махсус фикри

1. Мазкур Конвенция доирасида, сўров асосида тезкор-қидирув тадбирларини ўтказиш Озарбайжон Республикасининг амалдаги миллий қонунчилиги рухсат берган даражада ва фақат унинг ваколатли органлари томонидан амалга оширилади.

2. Мазкур Конвенция доирасида, суд қарори асосида фақатгина жиноят содир этишда фойдаланилган қурол ва воситалар, шунингдек, жиноий йўл билан олинган мол-мулкни мусодара қилиш мумкин.

3. Конвенциянинг 63 ва 108-моддалари Озарбайжон Республикаси учун юридик кучга эга эмас.

Озарбайжон Республикаси Президенти Г. АЛИЕВ

Украинанинг қўшимча шартлари

1. Украина Конвенциянинг 6-моддасида назарда тутилган кўламда ҳуқуқий ёрдам кўрсатиш мажбуриятини олади, ижро варақларини тан олиш ва ижро этиш бундан мустасно.

2. Украина Конвенциянинг 54-моддаси 1-бандининг «а» кичик бандида назарда тутилган, Конвенция иштирокчи давлатларининг ҳудудида чиқарилган қарорларни тан олиш ва ижро этиш мажбуриятини олади, пул мажбуриятлари бўйича нотариал ҳужжатлар бундан мустасно.

Украина Президенти Л. КУЧМА

Арманистон Республикасининг баёноти

(Арманистон Республикаси Ташқи ишлар вазирлигининг 2005 йил 21 январдаги 16/00349-сонли нотаси)

Арманистон Республикаси қуйидагиларни баён қилади:

1. Конвенциянинг 6-моддасида назарда тутилган кўламда ҳуқуқий ёрдам кўрсатиш мажбуриятини олади, ижро варақаларини тан олиш ва ижро этиш бундан мустасно.

2. Конвенциянинг 25-моддасида назарда тутилган сўровлар Арманистон Республикаси қонунчилигида прокурорга тегишли ваколатлар берилганда ва унда назарда тутилган даражада кўриб чиқилади.

3. Конвенциянинг 54-моддаси 1-қисмининг «а» бандида назарда тутилган Аҳдлашувчи Томонлар ҳудудларида қабул қилинган қарорларни тан олади ва ижро этади, пул мажбуриятлари бўйича нотариал ҳужжатлар бундан мустасно.

Аҳдлашувчи Томонлар судларининг Конвенциянинг 54-моддаси 1-қисмининг «б» бандида назарда тутилган жиноят ишлари бўйича мусодара қилиш тўғрисидаги ҳукмларини (қарорларини) ижро қилади, агар мусодара қилиш, Арманистон Республикаси Жиноят кодексида ҳам мусодара қилишни қўллаш эҳтимоли назарда тутилган жиноят учун қўлланилган бўлса.