Xususiy, kichik biznesni qo‘llab-quvvatlash va uning iqtisodiy bazasini mustahkamlash, uni iqtisodiy o‘sish va aholi farovonligining muhim omiliga aylantirish, shuningdek Toshkent viloyati misolida tadbirkorlikni qo‘llab-quvvatlashning yangi shakllarini sinab ko‘rish maqsadida Vazirlar Mahkamasi qaror qiladi:

1. Quyidagilar:

Toshkent viloyatining o‘z faoliyatini boshlayotgan tadbirkorlarini moliyaviy qo‘llab-quvvatlashga doir chora-tadbirlar kompleksi ilovaga* muvofiq;

tijorat banklarining tadbirkorlarga imtiyozli shartlarda kredit berish uchun maxsus kredit jamg‘armasi tashkil etish bo‘yicha tashabbusi ma’qullansin.

Toshkent viloyati hokimligi O‘zbekiston Tovar ishlab chiqaruvchilar va tadbirkorlar palatasi, Dehqon va fermer xo‘jaliklar uyushmasi, tijorat banklari va boshqa bozorga oid tuzilmalar bilan birgalikda Toshkent viloyati tadbirkorlarini moliyaviy qo‘llab-quvvatlashga doir ma’qullangan chora-tadbirlar kompleksining belgilangan muddatda bajarilishini ta’minlash yuzasidan aniq chora-tadbirlar ko‘rsin.

2. O‘zbekiston Respublikasi Markaziy banki, Moliya vazirligi, “Paxta-bank”, Tashqi iqtisodiy faoliyat milliy banki Toshkent viloyati hokimligi bilan birgalikda 2000-yil 1-iyulgacha Toshkent viloyatining kamida 100 fermer xo‘jaligiga 10 ming AQSh dollariga teng miqdorgacha xorijiy valyutada yoki milliy valyutada mikrokreditlar ajratilishini ta’minlasinlar.

3. O‘zbekiston Respublikasi Markaziy banki, Adliya vazirligi, tijorat banklari fermer xo‘jaliklariga, xususiy tadbirkorlarga hamda kichik biznesning boshqa subyektlariga tijorat banklari tomonidan milliy va xorijiy valyutada mikrokreditlar berishning soddalashtirilgan tartibini bir hafta muddatda ishlab chiqsinlar va amaliyotga kiritsinlar.

4. Belgilab qo‘yilsinki:

tadbirkorlik faoliyati subyektlarining davlat ro‘yxatidan o‘tkazilishi ular tomonidan tashqi iqtisodiy faoliyat amalga oshirilishi va ko‘rsatib o‘tilgan subyektlarni O‘zbekiston Respublikasi Tashqi iqtisodiy aloqalar, investitsiyalar va savdo vazirligida tashqi iqtisodiy aloqalar qatnashchisi sifatida qo‘shimcha ravishda ro‘yxatdan o‘tkazmasdan vakolatli banklarda valyuta hisob raqamlari ochish uchun asos hisoblanadi;

valyuta hisob raqamlari ochilgan tadbirkorlik subyektlari to‘g‘risidagi axborot, oyning 5-kunidan kechikmay, har oyda vakolatli banklar tomonidan O‘zbekiston Respublikasi Tashqi iqtisodiy aloqalar, investitsiyalar va savdo vazirligiga taqdim etiladi.

O‘zbekiston Respublikasi Tashqi iqtisodiy aloqalar vazirligi vakolatli banklar bilan birgalikda ko‘rsatib o‘tilgan ma’lumotlarni taqdim etish shaklini bir hafta muddatda belgilasin.

5. Ushbu qaror bilan ma’qullangan chora-tadbirlar kompleksining bajarilishini ta’minlash uchun shaxsan javobgarlik Toshkent viloyati hokimi va O‘zbekiston Respublikasi Markaziy banki raisi zimmasiga yuklansin.

6. O‘zbekiston Respublikasi Adliya vazirligi manfaatdor vazirliklar va idoralar bilan birgalikda o‘n kun muddatda Vazirlar Mahkamasiga qonun hujjatlariga mazkur qarordan kelib chiqadigan o‘zgartirishlar va qo‘shimchalar to‘g‘risida takliflar kiritsin.

7. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari B.S. Hamidov zimmasiga yuklansin.