Ишлаб чиқарувчи кучларни маҳаллий табиий-иқтисодий шароитларни, Ўзбекистон Республикасини ва унинг минтақаларини ижтимоий-иқтисодий ривожлантириш истиқболларини ҳисобга олган ҳолда оқилона жойлаштириш масалаларида ягона умумдавлат ёндашувини таъминлаш мақсадида Вазирлар Маҳкамаси қарор қилади:

1. Ўзбекистон Республикаси Вазирлар Маҳкамаси ҳузурида Ишлаб чиқарувчи кучларни жойлаштириш бўйича доимий ишловчи идоралараро кенгаш 1-иловага* мувофиқ таркибда тузилсин.

2. Ўзбекистон Республикаси Вазирлар Маҳкамаси ҳузуридаги Ишлаб чиқарувчи кучларни жойлаштириш бўйича доимий ишловчи идоралараро кенгаш тўғрисидаги Низом 2-иловага мувофиқ тасдиқлансин.

3. Қорақалпоғистон Республикаси Вазирлар Кенгашига, вилоятлар ва Тошкент шаҳар ҳокимликларига ўз тасарруфларидаги ҳудудда ишлаб чиқарувчи кучларни жойлаштириш бўйича шунга ўхшаш ҳудудий доимий ишловчи идоралараро кенгашлар тузиш тавсия этилсин.

4. Белгилаб қўйилсинки, хўжалик органларига ер майдони бериш ва янгидан қурилаётган, қайта қурилаётган объектларнинг бошқа табиий ресурсларидан фойдаланиш ёки йирик ва мураккаб ишлаб чиқаришларни кенгайтириш бўйича қарорлар Қорақалпоғиcтон Республикаси Вазирлар Кенгаши, вилоятлар ва Тошкент шаҳар ҳокимликларининг бyюpтмачиларнинг мақсадлари тўғрисидаги таклифлари асосида (3-илова), фақат Ўзбекистон Республикаси Вазирлар Маҳкамаси ҳузуридаги Ишлаб чиқарувчи кучларни жойлаштириш бўйича идоралараро кенгашнинг тегишли хулосасидан кейингина Ўзбекистон Республикаси Вазирлар Маҳкамаси томонидан қабул қилинади.

Унча катта ва мураккаб бўлмаган ишлаб чиқариш мақсадларидаги объектларни (4-илова) жойлаштиришга ер майдони бериш ва бошқа табиий ресурслардан фойдаланиш тўғрисидаги қарорлар Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан, буюртмачининг мақсадларини ҳисобга олган ҳолда, ишлаб чиқарувчи кучларни жойлаштириш бўйича тегишли ҳудудий доимий ишловчи идоралараро кенгашнинг ижобий хулосаси бўлган тақдирда қабул қилинади.

5. Қуйидагилар ўз кучини йўқотган деб ҳисоблансин:

Ўзбекистон ССР Министрлар Советининг «Ўзбекистон ССР Давлат план комитети ҳузурида ишлаб чиқарувчи кучларни жойлаштириш бўйича доимий ишловчи идоралараро кенгаш ташкил этиш тўғрисида» 1986 йил 25 августдаги 418-сон қарори;

Ўзбекистон ССР Министрлар Советининг «Ўзбекистон ССР Давлат план комитети ҳузуридаги ишлаб чиқарувчи кучларни жойлаштириш бўйича идоралараро кенгаш тўғрисидаги Низомни тасдиқлаш ҳақида» 1986 йил 17 октябрдаги 511-сон қарори.

1. Идоралараро кенгашнинг асосий вазифаси халқ хўжалигининг ҳудудий тузилишини такомиллаштириш муаммоларини ҳар томонлама комплекс баҳолаш, бозор муносабатларига ўтиш шароитларида истиқболда Ўзбекистон Республикасини ижтимоий-иқтисодий ривожлантириш тамойиллари, ишлаб чиқарувчи кучларни жойлаштиришнинг бош ва тармоқ истиқболлари иқтисодиётни таркибий қайта ўзгартиришнинг давлат дастурлари, инвестициялар ҳамда вазирликлар, идоралар, уюшмалар, концернлар, корпорациялар, компаниялар, бирлашмалар, мулкчилик шаклидан қатъи назар, бошқа ташкилотлар, кооперативларнинг, рақобатга бардошли маҳсулот ишлаб чиқарадиган корхоналарни янгидан ташкил этиш, ишлаб турганларини кенгайтириш ва қайта қуриш тўғрисидаги таклифлари асосида ишлаб чиқарувчи кучларни жойлаштиришнинг асосланганлигини оширишдир.

2. Қайд этилган вазифаларга мувофиқ Идоралараро кенгаш:

илмий-тадқиқот ва лойиҳалаштириш ташкилотлари, вазирликлар, идоралар, концернлар, уюшмалар, корпорациялар, ҳудудий бошқарув органлари томонидан тайёрланган туманлар бўйича режалаштириш схемаларини, йирик шаҳарлар бош режалари лойиҳаларини, Қорақалпоғистон Республикасини, вилоятларни ва Тошкент шаҳрини ижтимоий ва иқтисодий ривожлантиришнинг узоқ муддатли комплекс дастурлари ва тамойилларини, шаҳарларда, шаҳар посёлкаларида, туман марказларида ҳамда бошқа аҳоли яшаш жойларида йирик ва мураккаб ишлаб чиқариш объектларини жойлаштириш тўғрисидаги таклифларни кўриб чиқади;

янги йирик ва мураккаб ишлаб чиқариш корхоналарини жойлаштириш мўлжалланган жойларга доир тегишли хулосаларни тайёрлайди, баённомалар ҳолида расмийлаштиради ва уларни кўриб чиқиш учун Вазирлар Маҳкамасига тақдим этади;

ишлаб чиқарувчи кучларни жойлаштиришни давлат йўли билан бошқариш тизимини такомиллаштириш бўйича таклифлар ишлаб чиқади;

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари ҳузуридаги ишлаб чиқарувчи кучларни жойлаштириш бўйича ҳудудий идоралараро кенгашларга услубий раҳбарлик қилишни амалга оширади.

3. Идоралараро кенгаш ўз иш фаолиятида қуйидаги қоидаларга амал қилади:

Ўзбекистон Республикаси ҳудудида йирик ва мураккаб корхоналарни оқилона жойлаштириш, минтақаларнинг халқ хўжалиги тармоқларини самарали ихтисослаштириш ва комплекс ривожлантириш;

атроф-муҳитни муҳофаза қилиш ва табиий ресурслардан оқилона фойдаланиш;

кичик ва ўртача шаҳарларни, қишлоқ туманлари марказларини ва бошқа аҳоли яшаш жойларининг ривожланишини тезлаштириш, йирик шаҳарларда саноат корхоналарининг ҳаддан зиёд тўпланишини чеклаш;

корхоналарни умумий ёрдамчи ишлаб чиқариш ва муҳандислик инфраструктураси бўлган саноат марказларидаги рудасиз ҳудудларга жойлаштириш;

корхоналарни ҳалокатли тошқин, йирик техноген авариялар, табиий шароитлари ноқулай, яъни юқори сейсмик, сел босадиган ва шу каби зоналарда жойлаштирилганда кутилиши мумкин бўлган оқибатларни ҳисобга олиш;

ишлаб чиқарувчи кучларни ривожлантириш ва жойлаштиришни ҳудудий ташкил этишни тартибга солишнинг иқтисодий усулларига ўтиш.

4. Ишлаб чиқарувчи кучларни жойлаштириш бўйича Идоралараро кенгаш қуйидаги ҳуқуқларга эгадир:

Фанлар академияси, Ўзбекистон қишлоқ хўжалиги фанлари академияси, шунингдек, тегишли уюшмалар, концернлар, корпорациялар ва бирлашмалар, вазирликлар, идоралар, илмий-тадқиқот ва лойиҳалаш ташкилотлари мутахассисларини ишлаб чиқарувчи кучларни оқилона жойлаштиришга тааллуқли бўлган алоҳида масалаларни кўриб чиқишга ва улардан янги корхоналарни жойлаштиришни иқтисодий жиҳатдан асослаш учун зарур маълумотлар олишга жалб қилиш;

Кенгашнинг ҳуқуқ доирасига кирувчи масалалар бўйича кенгашлар ва конференциялар чақириш ва ўтказиш, республика ва хорижий мамлакатларнинг зарур бўлган мутахассисларини ушбу тадбирларда қатнашишга жалб этиш;

саноат корхоналарини жойлаштиришнинг муқобил вариантларини таклиф этиш;

ишлаб чиқарувчи кучларни жойлаштириш бўйича ҳудудий доимий ишловчи идоралараро кенгашлар тўғрисидаги низомларни келишиб олиш.