Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish chora-tadbirlari toʻgʻrisida”gi PQ-5-son Qaroriga muvofiq 2024-yildan boshlab har yili 1-aprelga qadar vegetatsiya davri uchun va 1-oktabrga qadar kuz-qish davri uchun yakuniy isteʼmolchilar kesimida ekinlarni sugʻorish uchun suv olish limitlarini hududlar boʻyicha tasdiqlangan limit doirasida ishlab chiqib, tasdiqlash uchun xalq deputatlari tuman Kengashlariga kiritilishi belgilangan.

Shuningdek, Oʻzbekiston Respublikasi Vazirlar Mahkamasining 2013-yil 13-martdagi 82-son qarori bilan tasdiqlangan “Oʻzbekiston Respublikasida suvdan foydalanish va suv isteʼmoli tartibi toʻgʻrisida”gi Nizomga koʻra Suv olish limitlari Oʻzbekiston Respublikasi Suv xoʻjaligi vazirligi buyrugʻi bilan Oʻzbekiston Respublikasi Gidrometeorologiya xizmati markazining prognozi asosida Qoraqalpogʻiston Respublikasi Suv xoʻjaligi vazirligi va irrigatsiya tizimlari havza boshqarmalari buyruqlari hamda xalq deputatlari tuman (shahar) Kengashlari qarorlari bilan tasdiqlanishi koʻrsatilgan.

Oʻzbekiston Respublikasi Suv xoʻjaligi vazirligi “Norin-Qoradaryo” irrigatsiya tizimlari havza boshqarmasining 2026-yil 16-apreldagi “2026-yilning sugʻorish mavsumida iqtisodiyot tarmoqlariga ajratilgan suv olish limitlari doirasida ishlab chiqilgan yakuniy isteʼmolchilar kesimida ekinlarni sugʻorish uchun suv olish limitlarining isteʼmolchilar kesimidagi roʻyxati toʻgʻrisida”gi 411-1703-IK/2026-sonli va Marhamat tuman “Suv yetkazib berish xizmati” davlat muassasasining 2026-yil 16-aprel kungi “2026-yil vegetatsiya davri uchun suv olish limitlarini qayta koʻrib chiqish toʻgʻrisida”gi xatini koʻrib chiqib, Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish sarmaradorligini oshirish chora-tadbirlari toʻgʻrisida”gi PQ-5-son Qarori hamda Oʻzbekiston Respublikasi “Mahalliy davlat hokimiyati toʻgʻrisida”gi Qonunining 6-, 24-moddalariga asosan xalq deputatlari Marhamat tumani Kengashi qaror qiladi:

1. Oʻzbekiston Respublikasi Suv xoʻjaligi vazirligi “Norin-Qoradaryo” irrigatsiya tizimlari havza boshqarmasining 2026-yil 16-apreldagi 411-1703-IK/2026-sonli “2026-yilning sugʻorish mavsumida iqtisodiyot tarmoqlariga ajratilgan suv olish limitlari doirasida ishlab chiqilgan yakuniy isteʼmolchilar kesimida ekinlarni sugʻorish uchun suv olish limitlarining isteʼmolchilar kesimidagi roʻyxati toʻgʻrisida”gi hamda Marhamat tumani “Suv yetkazib berish xizmati” davlat muassasasining 2026-yil 16-apreldagi “2026-yil vegetatsiya davri uchun suv olish limitlarini qayta koʻrib chiqish toʻgʻrisida”gi xatlari inobatga olinsin.

2. Marhamat tumanida 2026-yilning sugʻorish mavsumida iqtisodiyot tarmoqlariga ajratilgan suv olish limitlari doirasida ishlab chiqilgan yakuniy isteʼmolchilar kesimida ekinlarni sugʻorish uchun suv limitlari 1-ilovaga muvofiq tasdiqlansin.

3. Marhamat tumani “Suv yetkazib berish xizmati” davlat muassasasi (S. Joʻrabekov)ga:

Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish chora-tadbirlari toʻgʻrisida”gi PQ-5-son Qarori asosida ishlarni tashkil etish;

hududlarda suvning hisobi va hisobotini yuritish;

sugʻorish tarmoqlari va ulardagi gidrotexnik inshootlarni soz holatda saqlash, taʼmirlash-tiklash tadbirlarini amalga oshirish;

suv olish joylarini suvni boshqarish va hisobga olish vositalari bilan jihozlash, suv monitoringi, hisobi va hisoboti yuritilishini raqamlashtirish;

tumandagi fermer xoʻjaliklari, klasterlar hamda boshqa qishloq xoʻjaligi mahsulotlari ishlab chiqaruvchi korxonalar bilan suvni tejaydigan sugʻorish texnologiyalarini joriy qilish yuzasidan muntazam ravishda uchrashuv va davra suhbatlari oʻtkazish hamda mazkur Farmon va qarorlar, undan kelib chiqadigan vazifalar, berilayotgan imtiyozlar, shuningdek, ushbu texnologiyalarning samaradorligi toʻgʻrisida batafsil maʼlumotlarni berib borishni tizimli davom ettirish;

isteʼmolchilar kesimida isteʼmol qilingan suv hajmi toʻgʻrisidagi maʼlumotlarni soliq organlariga taqdim etib borish;

suv limitlarining oʻzgarganligi boʻyicha isteʼmolchilarni oʻz vaqtida xabardor qilish;

suv isteʼmolchilarining buyurtmasi asosida boshqa suv xoʻjaligi xizmatlarini koʻrsatish;

amalga oshirilayotgan ishlar yuzasidan har chorak yakuni bilan xalq deputatlari tuman Kengashiga hisobotlarni taqdim etish vazifasi yuklatilsin.

4. Mazkur qaror qabul qilinishi munosabati bilan xalq deputatlari Marhamat tumani Kengashining 2026-yil 15-apreldagi VII-20-35-1-24-K/26-sonli qarori oʻz kuchini yoʻqotgan deb hisoblansin.

5. Mazkur qaror ijrosining nazorati xalq deputatlari Marhamat tumani Kengashi Agrar va suv xoʻjaligi, ekologiya masalalari boʻyicha doimiy komissiyasi (M. Ergashev) hamda tuman hokimining qishloq va suv xoʻjaligi masalalari boʻyicha oʻrinbosari A. Muxtorov zimmalariga yuklatilsin.