Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish chora-tadbirlari toʻgʻrisida”gi PQ-5-son Qarorning 7-bandida 1-aprelga qadar vegetatsiya davri uchun va 1-oktabrga qadar kuz-qish davri uchun yakuniy isteʼmolchilar kesimida ekinlarni sugʻorish uchun suv olish limitlarini hududlar boʻyicha tasdiqlangan limit doirasida ishlab chiqilishini va tasdiqlash uchun xalq deputatlari tuman Kengashlariga kiritilishi belgilab qoʻyilgan.

Marhamat tumani “Suv yetkazib berish xizmati” Davlat muassasasining 2025-yil 25-martdagi “Tumanda 2026-yil vegetatsiya davri uchun yakuniy isteʼmolchilar kesimida ekinlarni sugʻorish uchun hududlar boʻyicha suv olish limitlari toʻgʻrisida”gi 36/01-sonli xatini inobatga olib, Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish sarmaradorligini oshirish chora-tadbirlari toʻgʻrisida”gi PQ-5-son Qarori hamda Oʻzbekiston Respublikasi “Mahalliy davlat hokimiyati toʻgʻrisida”gi Qonunining 6-, 24-moddalariga asosan xalq deputatlari Marhamat tumani Kengashi qaror qiladi:

1. Marhamat tumani “Suv yetkazib berish xizmati” davlat muassasasi tomonidan ishlab chiqilib, taqdim etilgan “Marhamat tumanida 2026-yil vegetatsiya davri uchun yakuniy isteʼmolchilar kesimida ekinlarni sugʻorish uchun hududlar boʻyicha suv olish limitlari toʻgʻrisida”gi takliflari maʼlumot uchun qabul qilinsin.

2. Marhamat tumanida 2026-yil vegetatsiya davri uchun yakuniy isteʼmolchilar kesimida ekinlarni sugʻorish uchun hududlar boʻyicha suv olish limitlari:

iqtisodiyot tarmoqlari boʻyicha 2026-yil aprel – sentabr oylari uchun ajratilgan cheklangan (limit) suv limitlari taqsimoti 1-ilovaga muvofiq;

suv manbalari boʻyicha 2026-yil uchun aprel – sentabr oylari uchun ajratilgan cheklangan (limit) suv limitlari taqsimoti 2-ilovaga muvofiq;

SYBX DM sugʻorish mavsumi uchun asosiy suv manbalari boʻyicha cheklangan suv taqsimoti 3-ilovaga muvofiq;

tuman tasarrufidagi taʼminlangan massivlarga 2026-yil 1-apreldan 30-sentabrgacha ajratilgan cheklangan (limit) suv miqdori 4-ilovaga muvofiq;

tuman massivlarida 2026-yil sugʻorish mavsumiga qishloq xoʻjaligi ekinlarini kanallar boʻyicha suv limitlari 5-ilovaga muvofiq tasdiqlansin.

3. Marhamat tumani “Suv yetkazib berish xizmati” davlat muassasasi (S.Joʻrabekov)ga:

tumanga suv yetkazib berish boʻyicha ishlab chiqilgan limitlarni Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish chora-tadbirlar toʻgʻrisida”gi PQ-5-son Qarori talablariga qatʼiy rioya qilish;

ilovada koʻrsatilgan suv limitlarini oʻz vaqtida va sifatli holatda yetkazib berish;

oʻziga biriktirilgan hududda suvning hisobi va hisobotini yuritish;

sugʻorish tarmoqlari va ulardagi gidrotexnik inshootlarni soz holatda saqlash, taʼmirlash-tiklash tadbirlarini amalga oshirish;

suv olish joylarini suvni boshqarish va hisobga olish vositalari bilan jihozlash, suv monitoringi, hisobi va hisoboti yuritilishini raqamlashtirish;

isteʼmolchilar kesimida isteʼmol qilingan suv hajmi toʻgʻrisidagi maʼlumotlarni soliq organlariga taqdim etib borish;

suv isteʼmolchilarining buyurtmanomasi asosida boshqa suv xoʻjaligi xizmatlarini koʻrsatish;

amalga oshirilayotgan ishlar toʻgʻrida har yarim yilda xalq deputatlari tuman Kengashiga axborot kiritish yuklatilsin.

4. Mazkur qaror ijrosining nazorati xalq deputatlari Marhamat tumani Kengashi Agrar va suv xoʻjaligi, ekologiya masalalari boʻyicha doimiy komissiyasi (M. Ergashev) hamda tuman hokimi qishloq xoʻjalik masalalari boʻyicha oʻrinbosari A. Muxtorov zimmalariga yuklatilsin.