Oʻzbekiston Respublikasi “Mahalliy davlat hokimiyati toʻgʻrisida”gi Qonunining 24-moddasi, Oʻzbekiston Respublikasi Budjet kodeksining 27 va 147-moddalari hamda Oʻzbekiston Respublikasi Prezidentining 2017-yil 13-dekabrdagi “Mahalliy davlat hokimiyati organlarining moliyaviy erkinligini oshirish, mahalliy budjetlarga tushumlarning toʻliqligini taʼminlash boʻyicha soliq va moliya organlari javobgarligini kuchaytirishga oid qoʻshimcha chora-tadbirlar toʻgʻrisida”gi PF-5283-son Farmoniga muvofiq, xalq deputatlari tuman Kengashi qaror qiladi:

1. Boʻston tumani hokimligining Xalq deputatlari Boʻston tumani Kengashining 2025-yil 29-dekabrdagi “2026-yil uchun Boʻston tumani mahalliy budjetini tasdiqlash toʻgʻrisida”gi VII-16-171-1-19-K/25-sonli qarori ijrosi jarayonida Oʻzbekiston Respublikasining “2026-yil uchun Oʻzbekiston Respublikasining Davlat budjeti toʻgʻrisida”gi Qonuni, Oʻzbekiston Respublikasi Prezidentining 2025-yil 26-dekabrdagi “Mahalliy budjetlar va budjet tashkilotlarining moliyaviy barqarorligini oshirish, budjet intizomini kuchaytirishga doir qoʻshimcha chora-tadbirlar toʻgʻrisida”gi PQ-387-sonli hamda 2025-yil 26-dekabrdagi “Oʻzbekiston Respublikasining “2026-yil uchun Oʻzbekiston Respublikasining Davlat budjeti toʻgʻrisida”gi Qonuni ijrosini taʼminlash chora-tadbirlar toʻgʻrisida”gi qarorlari, Obodonlashtirish boshqarmasi xodimlariga 2026-yil 1-yanvardan ish haqi ustamasi va uzoq muddat xizmat qilganligi uchun toʻlovlar stavkalari oshirilganligi, mehnatga layoqatsizlik nafaqalari, kommunal toʻlovlar, xarajatlarni maqbullashtirish, ish haqi va boshqa xarajatlar boʻyicha kiritilgan oʻzgartirishlar toʻgʻrisidagi taqdimnomasi maʼlumot uchun qabul qilinsin.

2. Oʻzbekiston Respublikasi Budjet kodeksining 27 va 147-moddalariga muvofiq, budjet mablagʻlarini taqsimlovchilarga ajratiladigan mablagʻlarning aniqlashtirilgan miqdorlariga 2026-yil davomida kiritilgan oʻzgartirishlar 1 va 2-ilovalarga muvofiq tasdiqlansin.

3. Mazkur qaror ijrosini taʼminlash tuman hokimining birinchi oʻrinbosari D. Ortikov zimmasiga, uning ijrosini nazorat qilish esa Xalq deputatlari Boʻston tumani Kengashining Mahalliy budjet, tadbirkorlikni rivojlantirish va iqtisodiy islohotlar masalalari boʻyicha doimiy komissiyasi (Sh. Mamarizayev) zimmasiga yuklansin.

4. Ushbu qaror rasmiy eʼlon qilingan kundan eʼtiboran kuchga kiradi.