«Алоҳида муҳофаза этиладиган табиий ҳудудлар тўғрисида» Ўзбекистон Республикаси Қонунига мувофиқ, Ўзбекистон Республикаси давлат кадастрлари ягона тизимининг амалда бўлишини таъминлаш мақсадида Вазирлар Маҳкамаси қарор қилади:

1. Ўзбекистон Республикасининг алоҳида муҳофаза этиладиган табиий ҳудудлари давлат кадастрини юритиш тартиби тўғрисидаги илова қилинаётган Низом тасдиқлансин.

2. Мазкур қарорнинг бажарилишини назорат қилиш Вазирлар Маҳкамасининг Агросаноат комплекси Котибиятига юклансин.

1. Алоҳида муҳофаза этиладиган ҳудудлар давлат кадастри Ўзбекистон Республикаси Давлат табиатни муҳофаза қилиш қўмитаси томонидан Фанлар академияси билан биргаликда юритилади ва табиий муҳитнинг алоҳида муҳофаза этиладиган тоифаларига киритилган объектлари бўйича бирхиллаштирилган маълумотлар тўпламидан иборат бўлади, у Ўзбекистон Республикаси Давлат кадастрлари ягона тизимининг таркибий қисми ҳисобланади.

2. Алоҳида муҳофаза этиладиган табиий ҳудудлар давлат кадастри ана шундай ҳудудлар тармоқларини режалаштириш, уларни муҳофаза қилишни таъминлаш, илмий тадқиқотлар ўтказиш, тегишли тартибга риоя қилиниши устидан давлат назорати даражасини ошириш, алоҳида муҳофаза қилинадиган табиий ҳудудларнинг асосий тавсифлари билан тезкорлик билан танишиш, шунингдек уларнинг ишлаб чиқарувчи кучларни ривожлантириш ва жойлаштиришни ривожлантиришдаги ролини ҳисобга олиш учун мўлжалланган.

3. Қуйидагилар алоҳида муҳофаза этиладиган табиий ҳудудлар давлат кадастрини ҳисобга олиш объектлари ҳисобланади:

давлат қўриқхоналари (шу жумладан биосфера, геология қўриқхоналари ва бошқалар), давлат миллий боғлари, давлат табиат ёдгорликлар, давлат заказниклари, сувни муҳофаза қилиш иҳоталари (ҳудудлари), курорт ва рекреацион ҳудудлар), ер усти ва ер ости сувлари ҳосил бўладиган ҳудудлар (дарё водийлари, сурилма конуслари, тоғ этаклари), ноёб ва қимматбаҳо металлар конлари, алоҳида муҳофаза этиладиган табиий ҳудудларнинг қўриқланадиган (буфер) ҳудудлари, балиқчилик хўжалиги ҳудудлари, тақиқланган ўрмон иҳотазорлари, тарихий-табиий ва ёдгорлик боғлар, ботаника ва зоология боғлари, дендрарийлар ҳамда қонунчилик ва халқаро шартномалар билан алоҳида муҳофаза этиладиган тоифага киритилган бошқа ҳудудлар.

4. Алоҳида муҳофаза этиладиган табиий ҳудудлар ўзининг фаолият кўрсатиш хусусиятларига ва ҳуқуқий мақомига кўра қуйидаги уч тоифага бўлинади.

I. Давлат қўриқхоналари, давлат миллий (табиий) боғлари.

II. Давлат заказниклари, давлат табиат ёдгорликлари.

III. Бошқа алоҳида муҳофаза этиладиган табиий ҳудудлар (зоология, ботаника, дендрология боғлари (парклари), сувни муҳофаза этиш рекреацион, балиқчилик хўжаликлари ҳудудлари, тақиқланган ўрмон иҳотазорлари, ер усти ва ер ости сувлари ҳосил бўладиган ҳудудлар, ноёб ва қимматбаҳо металлар конлари ва нишоналари, табиий курорт ҳудудлари ва бошқалар).

5. Алоҳида муҳофаза этиладиган табиий ҳудудлар ўзининг бўйсуниши, муҳимлиги, шунингдек табиий объектларининг ноёблигига кўра туман, вилоят (Қорақалпоғистон Республикаси) ва республика аҳамиятига эга бўлиши мумкин.

6. Фақат қонунчиликда белгиланган тартибда ташкил этилган объектларгина рўйхатдан ўтказилади ва алоҳида муҳофаза этиладиган табиий ҳудудлар кадастрига киритилади.

Объектларни кадастрга киритиш учун зарур бўладиган ҳужжатлар рўйхати Давлат табиатни муҳофаза қилиш қўмитаси томонидан белгиланади.

7. Алоҳида муҳофаза этиладиган табиий ҳудудлар давлат кадастри ушбу ҳудудларнинг ҳуқуқий мақоми ва тартиби, уларнинг жуғрофий ҳолати, миқдори ва сифатига оид тавсифлари, экологик, илмий, маърифий, тарихий ва бошқа қимматлари, идоравий мансублиги, ер эгалари ва ердан фойдаланувчилар, шунингдек ҳисобга олинган ҳар бир объект бўйича ушбу ҳудудлардаги табиий ресурслардан фойдаланиш характери тўғрисидаги маълумотлардан иборат бўлади.

Кадастр ҳужжатлари картография, фотография, ҳисобот, ҳисобга олиш материалларини ва бошқа материалларни, алоҳида муҳофаза этиладиган табиий ҳудудларнинг ҳолати тўғрисидаги, кадастр шаклларини тузишда ҳисобга олинадиган маълумотларни ўз ичига олади.

8. Алоҳида муҳофаза этиладиган табиий ҳудудлар кадастри қуйидаги асосий шаклларни ўз ичига олади:

1-шакл (йиғма) — «Алоҳида муҳофаза этиладиган табиий ҳудудлар рўйхати»;

2-шакл — «Алоҳида муҳофаза этиладиган I тоифа табиий ҳудудларнинг ер-сув ресурслари»;

3-шакл — «Алоҳида муҳофаза этиладиган I тоифа табиий ҳудудларнинг ўсимликлар дунёси»;

4-шакл — « Алоҳида муҳофаза этиладиган I тоифа табиий ҳудудларнинг ҳайвонот дунёси»;

5-шакл — «Алоҳида муҳофаза этиладиган II тоифа табиий ҳудудларнинг умумий тавсифи»;

6-шакл — «Алоҳида муҳофаза этиладиган III тоифа табиий ҳудудларнинг умумий тавсифи»;

7-шакл — «Алоҳида муҳофаза этиладиган табиий ҳудудлар табиатни муҳофаза қилиш фаолиятининг асосий натижалари».

Шаклларнинг тузилиши ва мазмуни Давлат табиатни муҳофаза қилиш қўмитаси томонидан белгиланади.

9. 7-шаклдан ташқари, барча шакллар бўйича маълумотлар туман («Т» литерли шакл), вилоят («В» литерли шакл) ва республика (литерсиз шакл) даражасида ишлаб чиқилади. 7-шакл бўйича маълумотлар фақат туман даражасидагина берилади.

Барча шаклларга (туман, вилоят ва республика даражасида) алоҳида муҳофаза этиладиган табиий ҳудудларнинг ҳозирги ҳолати ва унинг ўзгариши даражаси таҳлил қилинган ҳолдаги қисқача изоҳнома берилади.

10. Туман даражасида — алоҳида муҳофаза этиладиган табиий ҳудудлар кадастри таркибига «Т» литери билан барча шакллар бўйича маълумотлар, алоҳида муҳофаза этиладиган табиий ҳудудлар раҳбарларининг ҳисоботлари, тадқиқотлар, изланишлар материаллари, ҳисобга олиш маълумотлари ва бошқа бирламчи кадастр ҳужжатлари киритилади.

Вилоят даражасида — алоҳида «муҳофаза этиладиган табиий ҳудудлар кадастри таркибига «Т» ва «В» литерлари билан барча шакллар бўйича маълумотлар киритилади.

Республика даражасида — алоҳида муҳофаза этиладиган табиий ҳудудлар кадастри таркибига «В» литери билан ва литерсиз барча шакллар бўйича маълумотлар киритилади.

11. Алоҳида муҳофаза этиладиган табиий ҳудудлар кадастри Давлат табиатни муҳофаза қилиш қўмитасининг уччала даражалардаги органлари томонидан юритилади:

туман (шаҳар) даражасида — туман табиатни муҳофаза қилиш инспекцияси томонидан;

вилоят (Қорақалпоғистон Республикаси) даражасида — Қорақалпоғистон Республикаси Давлат табиатни муҳофаза қилиш қўмитасининг, вилоятлар ва Тошкент шаҳар табиатни муҳофаза қилиш инспекция хизмати томонидан;

республика даражасида — Давлат табиатни муҳофаза қилиш қўмитасининг республика инспекция хизмати томонидан.

12. 3 ва 4-шакллар бўйича маълумотларни тайёрлашда Ўзбекистон Республикаси Фанлар академияси иштирок этади.

13. Ер ости чучук сувлари манбаларининг ҳамда ноёб ва қимматбаҳо металлар конлари ва нишоналарининг шаклланиш ҳудудлари кадастрлари Ўзбекистон Республикаси Давлат геология ва минерал ресурслар қўмитаси томонидан юритилади. Белгиланган шаклдаги якуний маълумотлар умумий кадастрга киритиш учун ушбу Низомда назарда тутилган муддатларда Давлат табиатни муҳофаза қилиш органларига тақдим этилади.

14. Кадастр тадрижий равишда юритилади, шакллар бўйича маълумотлар, ҳисобот йилидан кейинги йилнинг 1 январидаги ҳолат бўйича, ҳар йили бир марта тақдим этилади.

15. Туман даражасида — 2-т, 3-т, 4-т, 5-т, 7-т шакллари бўйича алоҳида муҳофаза этиладиган III тоифа табиий ҳудудлар бўйича маълумотлардан ташқари маълумотлар (ҳисоботлар) туман (шаҳар) табиатни муҳофаза қилиш (объект жойлашган ердаги) инспекциясига алоҳида муҳофаза этиладиган ҳудудлар раҳбарлари* томонидан ҳисобот йилидан кейинги йилнинг 1 февралигача тақдим этилади.

6-т ва 7-т шакллари бўйича алоҳида муҳофаза этиладиган III тоифа табиий ҳудудлар — бўйича маълумотлар ерларни ҳисобга олиш ҳужжатлари асосида туман табиатни муҳофаза қилиш инспекцияси томонидан тайёрланади.

Туман инспекциялари тақдим этилган маълумотлар (ҳисоботлар)нинг тўғрилигини аниқлайдилар, туман (шаҳар) бўйича алоҳида муҳофаза этиладиган табиий ҳудудлар рўйхатини тузадилар (1-т йиғма шакл) барча кадастр материалларини туман ҳокимлиги билан келишиб оладилар ва 1-т, 2-т, 3-т, 4-т, 5-т, 6-т, 7-т шакллари бўйича 1 мартгача уларни Қорақалпоғистон Республикаси Давлат табиатни муҳофаза қилиш қўмитасига, вилоятлар ва Тошкент шаҳар табиатни муҳофаза қилиш қўмиталарига тақдим этадилар.

16. Вилоят даражасида — олинган материаллар вилоят инспекция хизмати томонидан умумлаштирилади ва таҳлил қилинади, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан келишиб олинади ҳамда 1 апрелгача 1-«В», 2-«В», 3-«В», 4-«В», 5-«В», 6-«В» шакллари бўйича Давлат табиатни муҳофаза қилиш қўмитасига жўнатилади.

17. Республика даражасида — алоҳида муҳофаза этиладиган табиий ҳудудлар давлат кадастри Давлат табиатни муҳофаза қилиш қўмитасининг «Бошерсувназорат» бошқармаси томонидан юритилади.