Номзодлик ва докторлик диссертацияларининг ҳимояси билан боғлиқ бўлган харажатларни қоплаш ишларини тартибга келтириш мақсадида Вазирлар Маҳкамаси қарор қилади:

1. Ўзбекистон Республикаси Олий аттестация комиссияси эксперт кенгашларининг раислари, илмий котиблари ва экспертлари ишларига ҳақ тўлаш тўғрисидаги Низом 1-иловага мувофиқ ҳамда диссертацияларни ихтисослаштирилган кенгашларда ҳимоя қилиш билан боғлиқ харажатларни қоплаш тўғрисидаги Низом 2-иловага мувофиқ тасдиқлансин.

2. Ўзбекистон Республикаси Фан ва техника давлат қўмитаси диссертация ишларининг ҳимояси ва экспертизаси билан боғлиқ бўлган харажатларни қоплаш учун илмий-тадқиқот ишларини амалга оширишга йўналтириладиган маблағлар доирасида пул ажратишни ҳар йили назарда тутсин.

1. Эксперт кенгашининг раисига, (раис йўқ бўлганда) раис ўринбосарига ва илмий котибига эксперт кенгашининг ҳар бир мажлиси учун раислик қилувчига ва илмий котибга амалда сарфланган вақт ҳисобидан соатбай (лекин 5 соатдан кўп бўлмаган) иш ҳақи тўланади.

2. Ўзбекистон Республикаси Олий аттестация комиссияси эксперт кенгаши томонидан диссертациялар экспертизаси учун белгиланган экспертларга:

докторлик диссертацияси экспертизаси учун — 8 соат;

номзодлик диссертацияси экспертизаси учун — 5 соат ҳисобидан соатбай ҳақ тўланади.

3. Диссертациялар экспертизасини ўтказиш билан боғлиқ бўлган харажатларни қоплаш олий ўқув юртининг профессори (фан докторларига) ва доценти (фан номзодларига) соатбай ҳақ тўлаш ставкаларига биноан Олий аттестация комиссиясига ажратилган маблағлар ҳисобидан амалга оширилади.

1. Докторлик ва номзодлик диссертациялари ҳимояларини ўтказиш билан боғлиқ бўлган харажатлар қуйидаги нормативлар асосида қопланади:

докторлик диссертацияси бўйича жами 3 оппонентга — фан докторига, ҳар бирига 8 соат учун;

номзодлик диссертацияси бўйича жами 2 оппонентга, шу жумладан, 1 фан доктори ва 1 фан номзодига, ҳар бирига 6 соат учун;

докторлик ва номзодлик диссертациялари авторефератларини 60 нусхадан кўп бўлмаган миқдорда чиқариш ва тарқатиш. Харажатлар Ўзбекистон Республикаси Давлат матбуот қўмитасининг ўқув адабиётларини чиқарадиган нашриётлари учун белгиланган амалдаги нархлар асосида аниқланади;

бошқа шаҳарлардан келадиган оппонентларнинг хизмат сафари харажатлари (хизмат сафари муддати 3 кундан кўп бўлмаслиги керак). Тўловлар Ўзбекистон Республикаси бюджет ташкилотлари учун белгиланган нормативлар асосида амалга оширилади. Алоҳида ҳолларда докторлик диссертациялари ҳимоясида ОАК рухсати билан республика ташқарисидан бир оппонентни таклиф қилишга йўл қўйилади. Хорижий оппонентларнинг хизмат сафари харажатларини қоплаш таклиф қилувчи ташкилот томонидан валютани тартибга солиш ҳақидаги қоидаларга мувофиқ амалга оширилади.

2. Оппонентлар меҳнатига ҳақ тўлаш олий ўқув юртининг профессори (фан докторларига) ва доценти (фан номзодларига) соатбай иш ҳақи ставкаларига асосан амалга оширилади.

3. Ҳузурида ихтисослаштирилган кенгашлар ишлаётган муассаса ва ташкилотларнинг (валютадан ташқари) харажатларини Ўзбекистон Республикаси Фан ва техника давлат қўмитаси йилнинг ҳар чорагида, тасдиқловчи молиявий ҳужжатларга асосан қилинган ҳақиқий харажатлар бўйича қоплайди.