Oʻzbekiston Respublikasi Prezidentining 2025-yil 26-dekabrdagi “Mahalliy budjetlar va budjet tashkilotlarining moliyaviy barqarorligini oshirish, budjet intizomini kuchaytirishga doir qoʻshimcha chora-tadbirlar toʻgʻrisida”gi PQ-387-sonli qarori ijrosini taʼminlash, tuman markaziy koʻchalari boʻyida joylashgan tadbirkorlik subyektlari bilan tuzilgan shartnomalar asosida chiqindilarni olib chiqish va hududlarni obodonlashtirish xizmatlarini tizimli yoʻlga qoʻyish, ushbu xizmatlar uchun iqtisodiy asoslangan tariflarni belgilash hamda aholiga va tadbirkorlarga qulay va shaffof xizmat koʻrsatish tizimini yaratish maqsadida, “Mahalliy davlat hokimiyati toʻgʻrisida”gi Oʻzbekiston Respublikasi Qonunining 6- va 24-moddalariga muvofiq Xalq deputatlari tuman Kengashi qaror qiladi:

1. Oʻzbekiston Respublikasi Prezidentining 2025-yil 26-dekabrdagi “Mahalliy budjetlar va budjet tashkilotlarining moliyaviy barqarorligini oshirish, budjet intizomini kuchaytirishga doir qoʻshimcha chora-tadbirlar toʻgʻrisida”gi PQ-387-sonli qarori maʼlumot va ijro uchun qabul qilinsin.

2. Tuman hokimi oʻrinbosari – obodonlashtirish boshqarmasi boshligʻi M.Toʻrayevning markaziy koʻchalarda joylashgan tadbirkorlik subyektlari bilan tuzilgan shartnomalar asosida chiqindilarni olib chiqish va hududlarni obodonlashtirish xizmatlari uchun tariflarni tasdiqlash toʻgʻrisidagi axboroti maʼlumot uchun qabul qilinsin.

3. Tuman obodonlashtirish boshqarmasi tomonidan markaziy koʻchalar boʻyida joylashgan tadbirkorlik subyektlari bilan tuzilgan shartnomalar asosida chiqindilarni olib chiqish va hududlarni obodonlashtirish xizmatlari uchun tariflar 1-ilovaga muvofiq tasdiqlansin.

4. Tuman hokimining birinchi oʻrinbosari (R.Abdugʻaniyev)ga tasdiqlangan tariflarni amaliyotga toʻliq va oʻz vaqtida joriy etilishini taʼminlash, tuman Obodonlashtirish boshqarmasi, Iqtisodiyot va moliya boʻlimi hamda boshqa manfaatdor tashkilotlar faoliyatini muvofiqlashtirish, shuningdek, barcha tadbirkorlik subyektlariga xizmat koʻrsatishda yagona yondashuv va tartib-intizomni taʼminlash vazifalari topshirilsin.

5. Tuman obodonlashtirish boshqarmasi boshligʻining birinchi oʻrinbosari (U.Normaxmatov)ga markaziy koʻchalarda joylashgan tadbirkorlik subyektlari bilan tuzilgan shartnomalar asosida chiqindilarni oʻz vaqtida va sifatli olib chiqish, hududlarni sanitariya va ekologik talablarga muvofiq obodonlashtirish, belgilangan tariflar asosida xizmatlarni uzluksiz tashkil etish, shartnoma majburiyatlarini qatʼiy bajarish vazifalari yuklatilsin.

6. Tuman iqtisodiyot va moliya boʻlimi boshligʻining birinchi oʻrinbosari (B.Normatov)ga mazkur xizmatlar uchun belgilangan tariflarning iqtisodiy asoslanganligini doimiy ravishda tahlil qilib borish, xizmatlar tannarxi va moliyaviy samaradorligini oʻrganish, budjet intizomiga qatʼiy rioya etilishini taʼminlash hamda ushbu sohada ortiqcha xarajatlarning oldini olish boʻyicha aniq choralar koʻrib borish vazifalari yuklatilsin.

7. Tuman davlat soliq inspeksiyasi boshligʻi (A.Suyunov)ga xizmatlar boʻyicha shakllanadigan barcha tushumlarning toʻliq va shaffof hisobga olinishini taʼminlash, tadbirkorlik subyektlari bilan hisob-kitoblarning toʻgʻri yuritilishini nazorat qilish, yashirin iqtisodiyotning oldini olish hamda soliq bazasini kengaytirish yuzasidan qatʼiy nazorat choralarini amalga oshirish vazifalari topshirilsin.

8. Tuman hududida faoliyat yuritayotgan barcha tadbirkorlik subyektlariga tasdiqlangan tariflar asosida belgilangan xizmatlar uchun toʻlovlarni oʻz vaqtida va toʻliq amalga oshirish, tuzilgan shartnomalarga soʻzsiz rioya qilish hamda xizmat koʻrsatish jarayonida belgilangan tartib-intizomni buzmaslik majburiyati yuklatilsin.

9. Ushbu qaror ijrosini tashkil etish tuman hokimining Qurilish, toʻsiqlarsiz muhit yaratish, kommunikatsiyalar, kommunal xoʻjalik, ekologiya va koʻkalamzorlashtirish masalalari boʻyicha oʻrinbosari – tuman obodonlashtirish boshqarmasi boshligʻi M.Toʻrayev zimmasiga yuklatilsin.

10. Mazkur qaror ijrosini nazorat qilish xalq deputatlari tuman Kengashining Mahalliy budjet, tadbirkorlikni rivojlantirish va iqtisodiy islohotlar masalalari boʻyicha doimiy komissiyasi zimmasiga yuklatilsin.

11. Ushbu qaror qabul qilingan kundan eʼtiboran 3 (uch) oydan soʻng kuchga kiradi.