1.1. Ушбу Тартиб Ўзбекистон Республикасининг «Валютани тартибга солиш тўғрисида»ги Қонунининг 7-моддасига мувофиқ ишлаб чиқилган бўлиб, унда резидентлар томонидан Ўзбекистон Республикаси ҳудудидан ташқарида чет эл валютасида ҳисобварақлар очилишининг шартлари белгилаб қўйилган.

1.2. Юридик ва жисмоний шахслар — резидентлар чет элда Ўзбекистон Республикаси Марказий банки рухсатномасига асосан ҳисобварақлар очадилар.

2.1. Резидент — юридик шахсларга, таъсис ҳужжатлари, битимлар, контракт ёки шартномаларга мувофиқ уларнинг фаолият кўрсатиш даври мобайнида чет элда ҳисобварақлар очишга рухсат берилади.

2.2. Резидент — юридик шахслар чет элда ҳисобварақлар очишга рухсатномаларни олиш учун Ўзбекистон Республикаси Марказий банкига қуйидагиларни тақдим этишлари лозим:

2.2.1. Қуйидагилар кўрсатилган илтимосномалар:

а) ҳисобварақларни очишдан кўзда тутилган мақсад;

б) ҳисобварақларнинг турлари ва улар бўйича амалга оширилиши мўлжалланаётган операциялар;

в) ҳисобварақларни очиш кўзда тутилган чет эл банк муассасалари;

г) республикамиз ваколатли банкларидаги ўз валюта ҳисобварақларининг ҳолати тўғрисидаги маълумотлар;

д) очилиши мўлжалланаётган ҳисобвараққа маблағларнинг келиб тушиш манбалари;

е) ҳисобварақларнинг амал қилиш муддати.

2.2.2. Таъсис ҳужжатларининг нусхалари;

2.2.4. Ваколатли банкларнинг чет элда ҳисобварақларни очишнинг мақсадга мувофиқлиги ва уларга хизмат кўрсатишга розилиги тўғрисидаги (Ўзбекистон Республикаси билан боғлиқ операциялар бўйича) маълумотнома;

2.2.5. Ташқи иқтисодий алоқалар агентлигининг Ўзбекистон Республикаси резидентлари ҳисобланадиган филиаллар ва ваколатхоналарни барпо этишга розилиги кўчирма нусхаси (хорижда ҳисобварақлар очилиши уларни барпо этилиши билан шартланган ҳолларда).

4.1. Ўзбекистон Республикаси Марказий банки чет элда ҳисобварақларни очишга рухсат бериш тўғрисидаги қарорни қабул қилиш учун аризачидан қўшимча ҳужжатлар ва маълумотларни талаб қилиш, шунингдек, мажбурий тартибда республика Ташқи иқтисодий алоқалар агентлиги ва Давлат солиқ қўмитасидан тегишли хулосаларни сўраш ҳуқуқига эга.

Резидентлар томонидан чет элда ҳисобварақлар очишга рухсат бериш тўғрисидаги масала ижобий ҳал этилганда Ўзбекистон Республикаси Марказий банки амал қилиш муддати кўрсатилган ёзма рухсатнома беради.

4.2. Аризачиларнинг Ўзбекистон Республикаси ваколатли банкларидаги ҳисобварақларида сақланаётган валюта маблағларининг чет элдаги ҳисобварақларга ўтказилиши амалдаги қонунчилик билан белгиланган тартибда амалга оширилади.

4.3. Чет элда ҳисобварақлар очиш учун рухсат олган резидентлар — юридик ва жисмоний шахслар ваколатли банкларга ушбу ҳисобварақлардаги маблағлар ҳаракати тўғрисида ҳар ойда ахборот берадилар.

Ваколатли банклар, ҳар ойда юридик ва жисмоний шахсларнинг чет элда очилган ҳисобварақларидаги маблағларнинг ҳаракати тўғрисидаги маълумотларни ҳисобот ойидан кейинги ойнинг 5-санасидан кечиктирмай, Ўзбекистон Республикаси Марказий банкига (ушбу Тартибга илова қилинган шакл бўйича) тақдим этадилар.

Ваколатли банклар солиқ идораларининг сўровлари ўз мижозлари бўлган корхоналарнинг солиқ тўловларини тўлалигича ва тўғри тўланиши устидан назорат қилиш мақсадида улар томонидан амалга оширилаётган операциялар бўйича маълумотномаларни тақдим этадилар.

4.4. Ўзбекистон Республикасининг «Валютани тартибга солиш тўғрисида»ги Қонуни ва бошқа қонунчилик ҳужжатларига мувофиқ ваколатли банклар ўз мижозларининг чет элда очилган ҳисобварақлари бўйича операцияларнинг амалга оширилиши ва ушбу ҳисобварақлардаги маблағларнинг ҳаракати тўғрисидаги маълумотларни ўз вақтида тақдим этилишини назорат қиладилар.

Ушбу маълумотлар мижозлардан талаб қилиб олинадиган ҳисобварақлар кўчирмалари ва резидент — юридик шахсларнинг чет элдаги ҳисобварақларига хизмат кўрсатувчи хорижий банкларнинг бошқа тасдиқловчи ҳужжатлари асосида ваколатли банклар томонидан текшириб кўрилади. Бунда берилган рухсатнома шартларига мувофиқ чет эл валютасидаги маблағлардан фойдаланиш тартиби ва уларни ҳисобвараққа ҳисоблаб ёзилиши ва ўчирилишининг асослилиги, шунингдек, амалдаги қонунчиликка мувофиқ чет эл валютасида олинган тушумнинг бир қисми мажбурий тартибда сотилганлигига алоҳида эътибор берилади.

4.5. Юридик ва жисмоний шахслар томонидан чет эл банкларида очилган ҳисобварақларга Ўзбекистон Республикаси Марказий банки рухсатисиз маблағларнинг ҳисоблаб ёзилиши уларни яшириш деб ҳисобланади.

4.6. Юридик ва жисмоний шахслар чет эл валютасидаги тушумни яширган ҳолларда Ўзбекистон Республикаси Марказий банки, Ташқи иқтисодий алоқалар агентлиги, молия ва солиқ органлари томонидан ўз ваколатлари доирасида қуйидаги жазо чоралари қўлланилади:

— барча операцияларни чет эл валютасида амалга оширишга рухсат берувчи лицензияларни қайтариб олиш;

— Ўзбекистон Республикаси қонунчилигига биноан белгиланган миқдорда молиявий жазо чораларини қўллаш ва маъмурий жарима солиш;

— тартиббузарликларга йўл қўйган ёки валюта назорати ва тартибга солиш меъёрларига риоя қилиниши учун тегишли чора-тадбирларни қўлламаган мансабдор шахсларни амалдаги қонунчиликка мувофиқ жавобгарликка тортиш.

4.7. Ўзбекистон Республикаси Марказий банки аризачилар томонидан амалдаги қонунчиликни бузиш ҳолларига йўл қўйилганлиги аниқланганда ва чет элдаги ҳисобварақлар бўйича маблағларнинг ҳаракати тўғрисидаги маълумотлар ўз вақтида тақдим этилмаганда Ташқи иқтисодий алоқалар агентлиги, Молия вазирлиги ва Давлат солиқ қўмитаси билан келишган ҳолда берилган рухсатномани бекор қилиш ҳуқуқига эга.