Ўзбекистон Республикаси Президенти ва Қозоғистон Республикаси Президенти томонидан 1997 йил 2 июнда имзоланган Ўзбекистон Республикаси билан Қозоғистон Республикаси ўртасида икки томонлама ҳамкорлик бўйича ҳукуматлараро қўшма комиссия тузиш тўғрисидаги Протоколга мувофиқ ҳамда анъанавий дўстона алоқаларни янада ривожлантириш ва чуқурлаштириш ва икки давлат ўртасидаги халқаро шартномалар ва битимларни амалга ошириш мақсадида Вазирлар Маҳкамаси қарор қилади:

1. Ўзбекистон Республикаси билан Қозоғистон Республикаси ўртасида икки томонлама ҳамкорлик бўйича ҳукуматлараро қўшма комиссиянинг Ўзбекистонга оид қисми иловага* мувофиқ тузилсин.

2. Белгилансинки, Ўзбекистон Республикаси билан Қозоғистон Республикаси ўртасида икки томонлама ҳамкорлик бўйича ҳукуматлараро қўшма комиссиянинг Ўзбекистонга оид қисми аъзолари бошқа ишга ўтганлари тақдирда уларнинг лавозимларига янгидан тайинланган шахслар унинг таркибига киради.

3. Ўзбекистон Республикаси Вазирлар Маҳкамасининг «Кўп томонлама ҳамкорликни кенгайтириш масалалари бўйича Ўзбекистон —Қозоғистон қўшма комиссиясининг Ўзбекистонга оид қисмини тузиш тўғрисида» 1997 йил 18 февралдаги 83-сон қарори ўз кучини йўқотган деб ҳисоблансин.