Oʻzbekiston Respublikasining 2011-yildagi “Geografik obyektlarning nomlari toʻgʻrisida”gi OʻRQ-303-sonli Qonuni va Vazirlar Mahkamasining 2012-yil 16-oktabrdagi “Geografik obyektlarning nomlari toʻgʻrisida”gi Oʻzbekiston Respublikasi Qonuniga muvofiq, geografik obyektlarning nomlari sohasidagi ishlarni tartibga solish chora-tadbirlari haqida”gi 295-sonli qarori ijrosini taʼminlash, shuningdek, geografik obyektlarni nomlash va qayta nomlash sohasidagi davlat siyosatini yanada takomillashtirish hamda samarali amalga oshirish maqsadida Oʻzbekiston Respublikasi “Mahalliy davlat hokimiyati toʻgʻrisida”gi qonunining 6 va 24-moddalariga muvofiq Xalq deputatlari tuman Kengashi qaror qiladi:

1. Oʻzbekiston Respublikasi Iqtisodiyot va moliya vazirligi huzuridagi Kadastr agentligi direktorining oʻrinbosari, Geografik obyektlarga nom berish va ularni qayta nomlash toʻgʻrisidagi takliflarni davlat ekspertizasidan oʻtkazish ekspert komissiyasi raisi T.M.Abdullayevning 2026-yil 18-fevraldagi 05-19-2960-sonli eksport xulosasi, komissiya yigʻilish bayoni hamda tuman hokimining maʼnaviy-maʼrifiy ishlar samaradorligini oshirish, davlat tili toʻgʻrisidagi qonun hujjatlariga rioya etilishini taʼminlash masalalari boʻyicha maslahatchisi N.Usmonovaning axboroti maʼlumot uchun qabul qilinsin.

2. Geografik obyektlarga nom berish va ularni qayta nomlash toʻgʻrisidagi takliflarni davlat ekspertizasidan oʻtkazish ekspert komissiyasining ilovada keltirilgan qonun talablariga muvofiq deb topilgan 473 ta geografik obyekt nomlariga berilgan ekspert xulosasi maʼqullansin.

3. Tuman ichki ishlar boshqarmasi (J.Karimov), tumandagi barcha mahallalardagi qayta nomlangan koʻchalarga va tegishli yoʻl belgilariga oʻzgartirishlar kiritish bilan bogʻliq tashkiliy ishlarni amalga oshirsin.

4. Oʻzbekiston mahallalari uyushmasi tuman boʻlimi (B.Xudoyberdiyev), tuman obodonlashtirish boshqarmasi (S.Ergashev)ga, geografik obyektlarning tasdiqlangan nomlari barcha hujjatlarda birxillashtirilsin va ushbu nomlar aks etgan peshlavhalar va boshqa koʻrsatkichlardagi yozuvlarni davlat tilida (lotin yozuviga asoslangan oʻzbek alifbosida) yozilishi taʼminlash choralarini koʻrsin.

5. Tegishli mahalla fuqarolar yigʻinlari raislariga ayrim koʻchalarning yangidan nomlanishi munosabati bilan aholi oʻrtasida targʻibot-tashviqot ishlarini oʻtkazish tavsiya etilsin.

6. Tuman kadastr va tuman statistika boʻlimlariga yangi nomlangan va nomi oʻzgargan geografik obyektlarni tuman xaritasiga joylashtirish, shuningdek, tegishlicha tuman statistika maʼlumotlariga oʻzgartirishlar kiritsin.

7. “Geografik obyektlar toʻgʻrisida”gi OʻRQ-303-sonli Qonunning 16-moddasiga koʻra geografik obyektlarni nomlash va qayta nomlash masalalari boʻyicha tuman komissiyasiga ushbu geografik obyektlarga nom berilganligi va ularning nomlari oʻzgartirilganligi toʻgʻrisidagi hujjatlarni Geografik obyektlar nomlarining davlat reestriga kiritish uchun 10 kun muddatda Oʻzbekiston Respublikasi Yergedezkadastr Davlat qoʻmitasiga taqdim etish vazifasi topshirilsin.

8. “Geografik obyeklar toʻgʻrisida”gi OʻRQ-303-sonli Qonunning 20-moddasiga koʻra Aholi punktlarining tarkibiy qismlariga nom berish va ularning nomlarini oʻzgartirish tegishli mahalliy budjet hisobidan amalga oshirilishi koʻrsatilgan. Qonunga koʻra, tuman iqtisodiyot va moliya boʻlimi (I.Nazarov)ga belgilangan tartibda moliyalashtirish vazifasi yuklatilsin.

9. Tuman hokimligi axborot xizmati Oʻzbekiston Respublikasi “Geografik obyektlarning nomlari toʻgʻrisida”gi hamda “Davlat tili toʻgʻrisida”gi Qonunlari talablari asosida ushbu olib borilgan ishlarni ommaviy-axborot vositalarida yoritib borish tavsiya etilsin.

10. Mazkur qaror rasmiy eʼlon qilingan kundan eʼtiboran kuchga kiradi.

11. Mazkur qarorning ijrosini nazorat qilish xalq deputatlari tumani Kengashining Korrupsiyaga qarshi kurashish va xavfsizlik masalalari boʻyicha doimiy komissiyasi (O.Abdullayev) va Maʼnaviy-maʼrifiy ishlar samaradorligini oshirish, davlat tili toʻgʻrisidagi qonun hujjatlariga rioya etilishini taʼminlash masalalari boʻyicha tuman hokimi maslahatchi N.Usmonova zimmasiga yuklatilsin.