Ўзбекистон Республикаси Ҳукумати ва Туркманистон Ҳукумати, кейинги ўринларда «Томонлар» деб аталувчилар,

2013 йил 25 ноябрда имзоланган Ўзбекистон Республикаси Ҳукумати билан Туркманистон Ҳукумати ўртасида фавқулодда вазиятларнинг олдини олиш ва уларнинг оқибатларини бартараф этиш соҳасида ҳамкорлик тўғрисидаги Битимнинг (кейинги ўринларда — Битим) 16-моддасига мувофиқ,

икки давлат ўртасида фавқулодда вазиятларнинг олдини олиш ва уларни бартараф этиш соҳасидаги ҳамкорликни янада ривожлантириш истагини билдирган ҳолда,

қуйидагилар тўғрисида келишиб олдилар:

Томонлар Битимни унга илова ҳисобланадиган Ўзбекистон Республикаси Фавқулодда вазиятлар вазирлигининг Фавқулодда вазиятларда бошқарув миллий маркази билан Туркманистон Мудофаа вазирлигининг Фуқаро мудофааси ва қутқарув ишлари Бош бошқармасининг Фавқулодда вазиятлар ва қутқарув ишлари бошқармаси ўртасидаги ўзаро ҳамкорлик ҳамда ахборот алмашинуви бўйича Йўриқнома билан тўлдиришга келишиб олдилар.

Мазкур Баённома Битимнинг ажралмас қисми ҳисобланади ҳамда Битимнинг 17-моддасида назарда тутилган тартибда кучга киради.

Мазкур Баённома Битимнинг амал қилиши тўхтатилган пайтдан бошлаб ўз кучини йўқотади.

Тошкент шаҳрида 2025 йил 17 ноябрда икки асл нусхада, ҳар бири ўзбек, туркман ва рус тилларида тузилди, бунда барча матнлар бир хил кучга эга.

Мазкур Баённома қоидаларини талқин қилишда келишмовчиликлар юзага келган тақдирда, Томонлар рус тилидаги матнга мурожаат қиладилар.

1.1. Ўзбекистон Республикаси Фавқулодда вазиятлар вазирлигининг Фавқулодда вазиятларда бошқарув миллий маркази (кейинги ўринларда — Ўзбекистон Республикаси ФВВ ФВБММ) билан Туркманистон Мудофаа вазирлигининг Фуқаро муҳофазаси ва қутқарув ишлари Бош бошқармасининг Фавқулодда вазиятлар ва қутқарув ишлари бошқармаси (кейинги ўринларда — Туркманистон МВ ФМҚИББФВҚИБ) ўртасида ўзаро ҳамкорлик ва ахборот алмашинувини ташкил этиш бўйича Йўриқнома трансчегаравий ҳудудларда фавқулодда вазиятлар хавфида ёки улар юзага келганда ахборот алмашинуви ва ўзаро ҳамкорлик қилиш тартибини белгилашни ташкил этиш, шунингдек, уларга биргаликда тезкор жавоб қайтариш мақсадида ишлаб чиқилган.

1.2. Туркманистон МВ ФМҚИББФВҚИБ ва Ўзбекистон Республикаси ФВВ ФВБММ навбатчи сменалари (кейинги ўринларда — НС) ўртасидаги ўзаро ахборот ҳамкорлигининг асосий шакллари Томонлар давлатларининг чегара олди ҳудудларида табиий, техноген ва экологик характердаги фавқулодда вазиятлар хавфи ёки уларнинг юзага келиши тўғрисидаги тезкор ахборотларни узатиш ҳамда қабул қилиш ҳисобланади.

2.1. Ахборот алмашинуви Ўзбекистон Республикаси ФВВ ФВБММ ва Туркманистон МВ ФМҚИББФВҚИБ ўртасида амалга оширилади.

2.2. НС Ўзбекистон Республикаси ва Туркманистон ҳудудида фавқулодда вазиятларнинг юзага келганлиги (юзага келиш хавфи) тўғрисида (ривожланиш жараёни, уларни бартараф этиш бўйича кўрилаётган чора-тадбирлар ҳақида) қуйидаги масалалар борасида ахборот алмашадилар:

қўшни давлат ҳудудига хавфли моддалар чиқарилганлиги;

радиациявий авария ҳолати, шунингдек, ядровий, радиациявий материални ташиш (эксплуатация қилиш) вақтида ёки уни сақлаш чоғида юз берган ҳодисалар тўғрисида;

қуруқлик (тупроқ, ер ости бойликлари) ҳолати, атмосфера (ҳаво муҳити) таркиби ва хоссалари, гидросфера ҳолати (сув омборлари, сув оқимлари, ер усти ва ер ости сувларининг юқори даражада ифлосланиши, сизот сувлари сатҳининг кўтарилиши) ўзгаришининг салбий оқибатлари юзага келганлиги ёки юзага келиши хавфи тўғрисида;

ўзининг ёки чегарадош давлат ҳудудидаги табиий экотизимларда ёнғинлар юзага келганлиги тўғрисида;

давлатларнинг ўз ҳудудида ёки бошқа давлат ҳудудида бедарак йўқолган фуқаролари тўғрисида (аниқ маълумотлар);

фавқулодда вазиятларнинг олдини олиш бўйича ҳаракатларга тайёргарлик кўриш, авария-қутқарув ишларини ва уларни тугатиш бўйича бошқа ишларни амалга ошириш, шунингдек, жабрланган аҳолининг ҳаётини биринчи навбатда таъминлаш тўғрисида;

авария-қутқарув ишларини ўтказиш учун тезкорлик билан жалб этилиши мумкин бўлган кучлар ва воситаларнинг тайёрлиги тўғрисида (тегишли сўровнома олинганда);

бошқа фавқулодда вазиятлар ва ҳодисалар тўғрисида (келишувга кўра).

2.3. НСнинг ўзаро ҳамкорлик кўникмаларини ошириш йўналишларидан бири ҳудудий НСни жалб қилган ҳолда ўтказиладиган қўшма машғулотларда иштирок этиш ҳисобланади.

2.4. 2.2. бандда кўрсатилган маълумотлар олинганда дарҳол НС ўзаро хабардор қилинади.

НСнинг узатиладиган ахбороти тегишли равишда мазкур идора раҳбарияти билан олдиндан келишиб олинади.

3.1. Фавқулодда вазиятлар (ҳодисалар) бўйича ахборот алмашиш ва юзага келаётган вазиятга аниқлик киритиш мавжуд ахборот-коммуникация ресурслари ва алоқа каналларидан (телефон, факс, электрон почта, телеграммалар, видеоконференцалоқа (ВКА) ва бошқалар) фойдаланган ҳолда, шунингдек, умумий фойдаланишдаги Интернет тармоғи орқали кеча-кундуз рус тилида амалга оширилади.

3.2. НС ўртасида ахборот алмашиш тартиби, маълумотларни узатиш усули ва шакли ўзгарганда, ахборот узатишни таъминлаш ва уни ҳимоя қилиш усуллари бўйича қарорлар тегишли техник мутахассислар томонидан ишчи тартибда келишилади ва мазкур Йўриқномага қўшимча билан тасдиқланади.

4.1. Сўралган зарур хизмат маълумотларига нисбатан барча зарур ва ишончли маълумотларни энг қисқа муддатларда олиш имконини берувчи ахборот ҳамкорлиги қуйидагилар томонидан амалга оширилади:

Туркманистон томонидан — Туркманистон МВ ФМҚИББФВҚИБ (744000, Ашхобод ш., Галкыныш кўчаси, 4-уй) тезкор навбатчи — телефон: +99312409911, +99312409912; факс:+99312409525; e-mail: cdrod.tkm@gmail.com;

Ўзбекистон томонидан — Ўзбекистон Республикаси ФВВ ФВБММ (100084, Тошкент ш., Кичик ҳалқа йўли кўчаси, 4-уй) тезкор навбатчи — телефон: +998712348720, +998712391685; факс: +998711506299; e-mail: odcuks(@fvv.uz.

Ўзбекистон Республикаси ФВВ ФВБММ ва Туркманистон МВ ФМҚИББФВҚИБ ўзгаришлар юзага келишига қараб, масъул вакиллар, ўзаро ҳамкорликни амалга ошириш бўйича алоқада бўлган шахслар ва ВКА ташкил этиш бўйича техник мутахассислар рўйхатларини алмашадилар.