Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish chora-tadbirlari toʻgʻrisida”gi PQ-5-sonli qarorining ijsori yuzasidan Jarqoʻrgʻon tumanida vegetatsiya davrida yakuniy isteʼmolchilar kesimida ekinlarni sugʻorish uchun suv olish limitini belgilash haqidagi Jarqoʻrgʻon tumani suv yetkazib berish xizmati davlat muassasaning 2026-yil vegetatsiya davri uchun suv limitini xalq deputatlari Jarqoʻrgʻon tuman Kengashining Agrar, suv xoʻjaligi masalalari va ekologiya boʻyicha doimiy komissiyasi (A. Xamrayev) yigʻilishida koʻrib chiqilib muhokama qilindi, sessiyada deputatlar tomonidan bildirilgan fikr, mulohazalar va takliflarni inobatga olib, Oʻzbekiston Respublikasining “Mahalliy davlat hokimiyati toʻgʻrisida”gi Qonunining 6 va 24-moddalariga asosan, xalq deputatlari Jarqoʻrgʻon tuman Kengashi qaror qiladi:

1. Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish chora-tadbirlari toʻgʻrisida”gi PQ-5-sonli qarori ijrosini taʼminlash maqsadida “Suv yetkazib berish xizmati” boʻlimi direktori K. Bekmurodovning xalq deputatlari tuman Kengashining doimiy komissiyasidagi hisoboti maʼlumot uchun qabul qilinsin.

2. Jarqoʻrgʻon tuman “Suv yetkazib berish xizmati” Davlat muassasasi direktori K. Berdimurodovning Jarqoʻrgʻon tumani boʻyicha 2026-yil vegetatsiya davrida sugʻorish ishlari uchun ajratilgan suv limiti toʻgʻrisidagi taklifi maʼqullansin va 1 — 4-ilovalarga muvofiq tasdiqlansin.

3. Jarqoʻrgʻon tuman hokimining qishloq va suv xoʻjaligi masalalari boʻyicha oʻrinbosari, tuman “Suv yetkazib berish xizmati” DM boʻlimi (K. Bekmurodov)ga:

Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish chora-tadbirlari toʻgʻrisida”gi PQ-5-sonli qarori ijrosi yuzasidan 2026-yilning aprel-oktyabr oylari uchun isteʼmolchilar kesimida belgilangan limitdan foydalanishni qattiq nazoratga olish, vazifalarni oʻz vaqtida va samarali amalga oshirish topshirilsin;

belgilangan limitlar asosida isteʼmolchilarga suv yetkazib berish;

suvni tejaydigan sugʻorish texnologiyalarini kengaytirilgan tartibda joriy etishni davom ettirish;

oʻziga biriktirilgan hududda suvning hisobi va hisobotini yuritish;

sugʻorish tarmoqlari va ulardagi gidrotexnik inshootlarni soz holatda saqlash, taʼmirlash-tiklash tadbirlarini amalga oshirish;

suv olish joylarini suvni boshqarish va hisobga olish vositalari bilan jihozlash, suv monitoringi, hisobi va hisoboti yuritilishini raqamlashtirish;

isteʼmolchilar kesimida isteʼmol qilingan suv hajmi toʻgʻrisidagi maʼlumotlarni soliq organlariga taqdim etib borish;

suv isteʼmolchilarining buyurtmanomasi asosida boshqa suv xoʻjaligi xizmatlarini koʻrsatish;

yuqorida belgilangan vazifalar ijrosi yuzasidan har chorak yakuni bilan xalq deputatlari Jarqoʻrgʻon tuman Kengashi kotibiyatiga yozma ravishda axborot kiritib borsin.

4. Tuman hokimligi axborot xizmati — davlat tili maslahatchisi (D. Choriyeva):

sohada amalga oshirilayotgan ishlar toʻgʻrisidagi maʼlumotlarni mahalliy, ommaviy axborot vositalari hamda ijtimoiy tarmoqlarida keng yoritib borish tavsiya etilsin.

5. Ushbu qarorning ijrosini taʼminlash tuman hokimining oʻrinbosari (J. Poʻlatov), amalga oshirilishini nazorat qilish xalq deputatlari Jarqoʻrgʻon tumani Kengashining “Agrar, suv xoʻjaligi va ekologiya masalalari boʻyicha doimiy komissiya”si raisi (A. Xamrayev) zimmasiga yuklatilsin.

6. Ushbu qaror qabul qilingan kundan kuchga kiradi.