Oʻzbekiston Respublikasining 2022-yil 22-iyuldagi “Ichimlik suvi taʼminoti va oqova suvlarni chiqarib yuborish toʻgʻrisida”gi OʻRQ-784-sonli Qonuni, Oʻzbekiston Respublikasi Prezidentining “Aholining ichimlik suvi taʼminoti va oqova suv xizmatlari bilan taʼminlanganlik darajasini oshirish boʻyicha qoʻshimcha chora-tadbirlar toʻgʻrisida” 2022-yil 24-maydagi PQ-257-son qarori, 2018-yil 27-iyuldagi Osiyo Taraqqiyot banki ishtirokida “Jizzax shahrida kanalizatsiya tizimini rivojlantirish” loyihasini amalga oshirishga doir qoʻshimcha chora-tadbirlar toʻgʻrisida”gi PQ-3885-sonli qarori, 2018-yil 4-maydagi “Jizzax viloyati aholisini sifatli ichimlik suvi bilan taʼminlashni yaxshilash chora-tadbirlari toʻgʻrisida”gi PQ-3695-sonli qarori hamda 2023-yil 2-maydagi “2023-2025-yillarda Jizzax viloyatini kompleks ijtimoiy-iqtisodiy rivojlantirish va aholi turmush darajasini yanada yaxshilashga doir qoʻshimcha chora-tadbirlar toʻgʻrisida”gi PQ-146-sonli qarorlariga asosan “Mahalliy davlat hokimiyati toʻgʻrisidagi” Oʻzbekiston Respublikasi Qonunining 6- va 24-moddalariga muvofiq xalq deputatlari Jizzax viloyati Kengashi qaror qiladi:

1. Viloyat hokimligining 2026-yil 5-martdagi 02-472-sonli “Jizzax suv taʼminoti” masʼuliyati cheklangan jamiyatining viloyatdagi suv taʼminoti va oqova suv xizmatlari uchun tartibga solinadigan narxlarni (tariflarni) belgilash toʻgʻrisidagi taklifi maʼqullansin.

2. Jizzax viloyatida maʼqullangan ichimlik suvi va oqova suv xizmatlari narxlari ilovaga muvofiq tasdiqlansin.

3. Ushbu qaror qabul qilinishi munosabati bilan xalq deputatlari Jizzax viloyati Kengashining 2024-yil 15-fevraldagi VI-51-38-3-0-K/24-sonli qarori oʻz kuchini yoʻqotgan deb hisoblansin.

4. Viloyat hokimligi Axborot xizmati (A.Binoqulov), Oʻzbekiston Milliy teleradiokompaniyasi Jizzax viloyat teleradiokanali Davlat muassasasi direktori E.Shermonov, “Jizzax haqiqati”-“Джизакская правда” gazetasi tahririyati (B.Nazarov)ga sohada amalga oshirilayotgan ishlarni ommaviy axborot vositalarida va internet tarmoqlarida keng yoritib borish tavsiya etilsin.

5. Ushbu qaror ijrosini oʻz vaqtida taʼminlash vazifasi viloyat hokimi oʻrinbosari Sh.Djurayev zimmasiga yuklansin.

6. Mazkur qarorning ijrosini nazorat qilish xalq deputatlari Jizzax viloyati Kengashining Mahalliy budjet, tadbirkorlikni rivojlantirish va iqtisodiy islohotlar masalalari boʻyicha doimiy komissiyasi raisi A.Rahmonqulov zimmasiga yuklansin.

7. Mazkur qaror rasman eʼlon qilingan kundan boshlab kuchga kiradi.