Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish sarmaradorligini oshirish chora-tadbirlari toʻgʻrisida”gi 5-sonli qaroriga hamda Oʻzbekiston Respublikasi Suv xoʻjaligi Vazirligining 2024-yil 15-martdagi 72-sonli buyrugʻiga asosan tuman “Suv yetkazib berish xizmati” DM tomonidan har yili 1-aprelga qadar vegetatsiya davri uchun yakuniy isteʼmolchilar kesimida ekinlarni sugʻorish uchun suv olish limitlarini hududlar boʻyicha tasdiqlangan limit doirasida ishlab chiqishi va tasdiqlash uchun xalq deputatlari tuman Kengashiga kiritilishi belgilangan.

Jumladan,

Tuman boʼyicha jami sugʼoriladigan ekin maydoni — 24 925 ga, jami fermerlar va suv istemolchilar soni — 449 tani tashkil etadi.

2026-yilning sugʼorish mavsumiga tuman boʼyicha talab etiladigan suv miqdori 196,922 mln. m3 boʼlib, reja boʼyicha tizimlardan olinadigan suv miqdori — 218,802 mln. m³. Yuqori Chirchiq tumani uchun 2026-yilda sugʼorish mavsumi uchun ajratilgan suv olish limiti jami 143,1 mln. m³ ajratilgan.

Shu jumladan, sug'orishga (qishloq xo'jaligi) — 136,2 mln. m³, baliqchilikka — 6,4 mln. m³, boshqalarga — 0,5 mln. m³.

Yuqoridagilarni inobatga olgan holda Yuqori Chirchiq tumani “Suv yetkazib berish xizmati” DM direktori J. Turopovning hisobotini tinglab, “Mahalliy davlat hokimiyati toʻgʻrisida”gi Oʻzbekiston Respublikasi Qonunining 6 va 24-moddalariga muvofiq,Xalq deputatlari tuman Kengashi qaror qiladi:

1. Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish sarmaradorligini oshirish chora-tadbirlari toʻgʻrisida”gi 5-sonli qarori ijrosi yuzasidan Yuqori Chirchiq tumani “Suv yetkazib berish xizmati” DM direktori J. Turopovning hisoboti maʼlumot uchun qabul qilinsin.

2. Yuqori Chirchiq tumanidagi hududlar boʻyicha 2026-yil sugʻorish mavsumida fermer xoʻjaliklari va boshqa suv isteʼmolchilari kesimida qishloq xoʻjalik ekinlarini joylashishi 1-ilovaga;

tuman fermer xoʻjaliklari va boshqa suv isteʼmolchilarining 2026-yil sugʻorish mavsumi uchun suv miqdorini hisob-kitobi 2-ilovaga;

tuman “Suv yetkazib berish xizmati” DM 2026- yilning sugʻorish davrida suv manbalaridan olinadigan cheklangan suv miqdori (limit) 3-ilovaga;

tuman Suv isteʼmolchilarining 2026-yil sugʻorish mavsumiga cheklangan suv miqdori (limit) 4-ilovalarga muvofiq tasdiqlansin.

3. “Suv yetkazib berish xizmati” DM (J. Turopov)ga:

Oʻzbekiston Respublikasi Prezidentining 2024-yil 5-yanvardagi 5-sonli qarori asosida ishlarni tashkil etish;

belgilangan limitlar asosida isteʼmolchilarga suv yetkazib berish;

oʻziga biriktirilgan hududda suvning hisobi va hisobotini yuritish;

sugʻorish tarmoqlari va ulardagi gidrotexnik inshootlarni soz holatda saqlash,

taʼmirlash-tiklash tadbirlarini amalga oshirish vazifalari topshirilsin.

4.Amalga oshirilgan ishlar yuzasidan xalq deputatlari tuman Kengashiga hisobotlarni oʻz vaqtida berib borish vazifalari yuklatilsin.

5. Ushbu qarorning ijrosini nazorat qilish tuman Kengashining Agrar, suv xoʻjaligi va ekologiya boʻyicha doimiy komissiyasi (J.Shodiyev) hamda tuman hokimining qishloq va suv xoʻjaligi masalalari boʻyicha oʻrinbosari R. Utamaliyev zimmasiga yuklatilsin.

6. Ushbu qaror imzolangan kundan eʼtiboran kuchga kiradi.