Tumanda geografik obyektlarning nomlari sohasidagi ishlarni tartibga solish chora-tadbirlari toʻgʻrisida Geografik obyektlarni nomlash va qayta nomlash masalalari boʻyicha respublika komissiyasi majlisining 2024-yil 10-maydagi 35-sonli bayoni topshiriqlari asosida Davlat kadastrlari palatasi tuman filiali va mahalla fuqarolar yigʻinlari masʼullari bilan birgalikda oʻtkazilgan xatlov natijasida tumanda aniqlangan va toifalarga ajratilgan 576 ta koʻchalarni nomlash boʻyicha mahalla fuqarolar yigʻinlari Kengashlarining takliflari tuman komissiyasining yigʻilishida koʻrib chiqilib, tegishli hujjatlar viloyat komissiyasiga taqdim etilgan.

“Geografik obyektlarning nomlari toʻgʻrisida”gi Oʻzbekiston Respublikasi Qonunining 4-, 6-, 10-moddalari, Vazirlar Mahkamasining 2012-yil 16-oktabrdagi “Geografik obyektlarning nomlari sohasidagi ishlarni tartibga solish chora-tadbirlari haqida” 295-sonli qaroriga muvofiq tumandagi mahalla fuqarolar yigʻinlaridagi 576 ta geografik obyektlar(koʻcha)ni nomlash boʻyicha takliflar Iqtisodiyot va moliya vazirligi huzuridagi Kadastr agentligi Geografik obyektlarga nom berish va ularni qayta nomlash toʻgʻrisidagi takliflarni davlat ekspertizasidan oʻtkazish ekspert komissiyasi tomonidan koʻrib chiqilgan va “Geografik obyektlarning nomlari toʻgʻrisida”gi qonun hujjatlari talablariga muvofiq deb topilib, ekspertiza xulosasi tasdiqlangan.

Iqtisodiyot va moliya vazirligi huzuridagi Kadastr agentligining 2025-yil 9-oktabrdagi 05-19-17582-sonli xati, ekspertiza xulosasi va bayoniga asosan tuman hokimining oʻrinbosari M.Abdullayevning axborotini atroflicha muhokama qilib, Oʻzbekiston Respublikasi “Geografik obyektlarning nomlari toʻgʻrisida”gi Qonunining 10-moddasi, “Mahalliy davlat hokimiyati toʻgʻrisida”gi Qonunning 6- va 24-moddalariga asosan xalq deputatlari Xatirchi tuman Kengashi qaror qiladi:

1. Iqtisodiyot va moliya vazirligi huzuridagi Kadastr agentligining 2025-yil 9-oktabrdagi 05-19-17582-sonli xati va ekspertiza xulosasi maʼqullansin.

2. Respublika ekspert komissiyasining ekspertiza xulosasiga asosan qonun hujjatlari talablariga muvofiq deb topilgan tumandagi 576 ta geografik obyektlar(koʻcha)ning roʻyxati 1-ilovaga;

tumandagi mahallalarning chegarasi, toifalangan koʻchalar nomi koʻrsatilgan xaritalar 2-ilovaga muvofiq tasdiqlansin.

3. Tuman hokimining oʻrinbosarlari (A.Narziyev, M.Abdullayev), Mahallalar uyushmasi tuman boʻlimi (V.Avlanov), Davlat kadastrlari palatasi tuman filiali (G. Xoliqov), Davlat soliq inspeksiyasi (A. Keldiyorov), Statistika boʻlimi (A. Xusanov), Iqtisodiyot va moliya boʻlimi (O. Ernazarov), Davlat xizmatlari markazi (J. Shodiyev) tegishli tashkilotlar bilan birgalikda qonun hujjatlariga muvofiq deb topilgan 576 ta geografik obyektlar(koʻcha)ning nomi boʻyicha ish yuritish hujjatlariga tegishli oʻzgartirish va qoʻshimchalar kiritish bilan bogʻliq barcha tadbirlarni amalga oshirish vazifasi yuklatilsin.

4. Ichki ishlar boʻlimi (O. Roʻzimurodov) geografik obyektlar(koʻcha)ning nomlari aholining fuqarolik pasportlariga tegishli oʻzgartirishlar kiritish ishlarining tashkiliy ravishda amalga oshirilishi yuzasidan zarur boʻlgan chora-tadbirlarni amalga oshirsin.

5. Davlat kadastrlari palatasi tuman filiali (G. Xoliqov), Mahallalar uyushmasi tuman boʻlimi (V. Avlanov), mahalla fuqarolar yigʻinlari raislariga:

mazkur qarorning 2-ilovasi bilan tasdiqlangan har bir mahallaning chegarasi, toifalangan koʻchalar nomi koʻrsatilgan xaritasini belgilangan tartibda mahalla binosiga oʻrnatish choralarini koʻrish;

geografik obyektlar(koʻcha)ning nomlanayotganligini aholiga tushuntirish, targʻibot-tashviqot ishlarini amalga oshirish;

Obodonlashtirish boshqarmasi (J. Rahmonov) bilan hamkorlikda hududlardagi nom berilgan koʻchalarga ularning nomlari qayd etilgan metall koʻrsatkichlar oʻrnatish vazifalari topshirilsin.

Belgilansinki, geografik obyektlarning nomlari sohasidagi ishlarni moliyalashtirish mahalliy budjet mablagʻlari va qonun hujjatlarida taqiqlanmagan boshqa manbalar hisobidan amalga oshiriladi.

6. Tuman hokimining oʻrinbosarlari (A.Narziyev, M.Abdullayev), Mahallalar uyushmasi tuman boʻlimi (V. Avlanov), Iqtisodiyot va moliya boʻlimi (O.Ernazarov), Davlat kadastrlari palatasi tuman filiali (G. Xoliqov) tumandagi mahalla fuqarolar yigʻinlari raislari bilan birgalikda mahalla fuqarolar yigʻinlarida koʻcha nomlari aks ettirilgan peshlavhalarni belgilangan tartibda oʻrnatish vazifasi topshirilsin.

7. Tuman hokimligi axborot xizmati (Z.Neʼmatov) mazkur qarorni “Xatirchi hayoti” gazetasida eʼlon qilish hamda tuman hokimligining rasmiy saytiga joylashtirish vazifasi yuklatilsin.

8. Mazkur qarorning bajarilishini nazorat qilish xalq deputatlari tuman Kengashining Qonuniylikni taʼminlash va korrupsiyaga qarshi kurashish masalalari boʻyicha doimiy komissiyasi (A.Boymirzayev), mazkur qarorning ijrosini taʼminlash Geografik obyektlarga nom berish va ularning nomlarini oʻzgartirish masalalari boʻyicha tuman komissiyasi aʼzolari zimmasiga yuklansin.

9. Mazkur qaror rasmiy eʼlon qilingan kundan eʼtiboran kuchga kiradi.