Oʻzbekiston Respublikasi Prezidentining 2024-yil 5-yanvar “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish chora-tadbirlari toʻgʻrisida”gi PQ-5-son qarori ijrosini taʼminlash maqsadida hamda ushbu masala boʻyicha Oʻzbekiston Ekologik partiyasi deputatlik guruhining oʻrganishlarini hisobga olib, “Mahalliy davlat hokimiyati toʻgʻrisida”gi Oʻzbekiston Respublikasi qonunining 6- va 24-moddalariga muvofiq xalq deputatlari Bogʻot tumani Kengashi qaror qiladi:

1. “Bogʻot tumanida 2025-2026-yillarning kuz-qish davri uchun suv olish limitini tasdiqlash toʻgʻrisida”gi masala yuzasidan tuman hokimining qishloq va suv xoʻjaligi masalalari boʻyicha oʻrinbosari I.Raximovning axboroti maʼlumot uchun qabul qilinsin.

2. Bogʻot tumani “Suv yetkazib berish xizmati” davlat muassasasining suv manbalari, iqtisodiyot tarmoqlari hamda hududlari boʻyicha 2025-2026-yillarning kuz-qish (shoʻr yuvish) davrida suv manbalaridan olinadigan suv miqdori (limit) 1 va 2-ilovalarga muvofiq tasdiqlansin.

3. Tuman hokimining qishloq va suv xoʻjaligi masalalari boʻyicha oʻrinbosari I.Raximov, Bogʻot tumani “Suv yetkazib berish xizmati” davlat muassasasi direktori M.Allayorov:

- 5 kun muddatda suv manbalari, iqtisodiyot tarmoqlari va hududlari boʻyicha ishlab chiqilgan suv olish limitlarini barcha suv isteʼmolchilariga yetkazish;

- suv isteʼmolchilari bilan ularga ajratilgan suv olish limitlari doirasida suvdan foydalanish yoki suv isteʼmoli toʻgʻrisidagi shartnornalarning tuzilishini hamda ularni belgilangan tartibda roʻyxatdan oʻtkazilishini taʼminlasin.

4. Bogʻot tumani “Suv yetkazib berish xizmati” davlat muassasasi M.Allayorov hamda tuman qishloq xoʻjaligi boʻlimi Sh.Norboyev bilan birgalikda suvdan maqsadli va samarali foydalanish boʻyicha oʻquv seminarlari va tushuntirish ishlari olib borish vazifasi yuklatilsin.

5. Mazkur qarorning ijrosini nazorat qilish tuman hokimining oʻrinbosari I.Raximov hamda xalq deputatlari tuman Kengashining “Agrar, suv xoʻjaligi va ekologiya masalalari boʻyicha” doimiy komissiyasi raisi Sh.Rajabov zimmasiga yuklatilsin.

6. Ushbu qaror qabul qilingan kundan kuchga kiradi.