Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish chora-tadbirlari toʻgʻrisida”gi PQ-5-son qarori, Oʻzbekiston Respublikasi Vazirlar Mahkamasining 2013-yil 19-martdagi 82-son qarori bilan tasdiqlangan “Oʻzbekiston Respublikasida suvdan foydalanish va suv isteʼmoli tartibi toʻgʻrisida”gi Nizom talablaridan kelib chiqib, Oʻzbekiston Respublikasi “Mahalliy davlat hokimiyati toʻgʻrisida”gi Qonunining 6- va 24-moddalariga muvofiq, xalq deputatlari Pastdargʻom tuman Kengashining oʻn oltinchi sessiyasi qaror qiladi:

1. Pastdargʻom tumani Suv yetkazib berish xizmati davlat muassasasining 2025-yil 29-sentyabrdagi 04/118-soni xati asos va maʼlumot uchun qabul qilinsin.

2. Pastdargʻom tumani “Suv yetkazib berish xizmati” davlat muassasasi direktori A.Turayevning Pastdargʻom tumani hududidagi kanallar va suv olish nuqtalariga 2025-2026 yillardagi kuzgi-qishki sugʻorish mavsumiga ajratilgan cheklangan suv miqdori (limit)ni tasdiqlash toʻgʻrisidagi taklifi maʼqullansin va ilovaga muvofiq tasdiqlansin.

3. Tuman Suv yetkazib berish xizmati davlat muassasasi direktori (A.Turayev)ga:

Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish chora-tadbirlari toʻgʻrisida”gi PQ-5-son qarori asosida ishlarni tashkil etish;

belgilangan limitlar asosida isteʼmolchilarga suv yetkazib berish;

hududda suvning hisobi va hisobotini yuritish, muammolar aniqlanganda, bartaraf etish hamda rahbarlarni ogohlantirish choralarini koʻrish;

sugʻorish tarmoqlari va ulardagi gidrotexnik inshootlarni soz holatda saqlash, taʼmirlash-tiklash tadbirlarini amalga oshirish;

suv olish joylarini suvni boshqarish va hisobga olish vositalari bilan jihozlash, suv monitoringi, hisobi va hisoboti yuritilishini raqamlashtirish;

isteʼmolchilar kesimida isteʼmol qilingan suv hajmi toʻgʻrisidagi maʼlumotlarni soliq organlariga taqdim etib borish;

suv isteʼmolchilarining buyurtmanomasi asosida boshqa suv xoʻjaligi xizmatlarini koʻrsatish;

amalga oshirilgan ishlar yuzasidan xalq deputatlari tuman Kengashiga hisobotlarni oʻz vaqtida berib borish vazifalari yuklatilsin.

4. Mazkur qarorning ijrosini nazorat qilish tuman hokimining qishloq va suv xoʻjaligi masalalari boʻyicha oʻrinbosari - tuman qishloq xoʻjaligi boʻlimi boshligʻi (B.Yakubov) hamda xalq deputatlari tuman Kengashining Agrar, suv xoʻjaligi masalalari va ekologiya boʻyicha doimiy komissiyasi raisi (F.Turayev) zimmalariga yuklatilsin.

5. Ushbu qaror qabul qilingan kundan eʼtiboran kuchga kiradi.