Oʻzbekiston Respublikasining “Aholi bandligi toʻgʻrisida”gi 642-sonli Qonuni hamda Oʻzbekiston Respublikasi Vazirlar Mahkamasining 2017-yil 5-dekabrdagi 965-sonli qarori bilan tasdiqlangan “Ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchun ish oʻrinlarining eng kam sonini belgilash va zahiraga qoʻyish tartibi toʻgʻrisida”gi Nizomga asosan, tumanda ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchun ish oʻrinlarining eng kam sonini belgilash maqsadida qaror qilaman:

1. Xonqa tumanida 2026-yil uchun ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchun ish oʻrinlarining eng kam sonini belgilash boʻyicha korxonalar, muassasalar va tashkilotlar roʻyxati 1-ilovaga muvofiq tasdiqlansin.

2. Ushbu qarorning 1-ilovasida koʻrsatilgan korxonalar, tashkilotlar va muassasalarda xodimlarning roʻyxati boʻyicha oʻrtacha sonidan kelib chiqqan holda zahiraga qoʻyiladigan ish oʻrinlarining eng kam soni belgilansin. Shu jumladan:

oʻn toʻrt yoshga toʻlmagan bolalari, nogironligi boʻlgan bolalari bor yolgʻiz otaga yoki onaga, shuningdek, koʻp bolali oilalarning ota-onalari uchun 13 ta ish oʻrni;

umumiy oʻrta va oʻrta maxsus taʼlim tashkilotlarini, kasb-hunar maktablarini, kasb-hunar kollejlarini hamda texnikumlarni tamomlab, kasbga ega boʻlgan yoshlar, “Mehribonlik” uylarining bitiruvchilari, shuningdek, oliy taʼlim muassasalarining davlat grantlari boʻyicha taʼlim olgan bitiruvchilari uchun 37 ta ish oʻrni;

Oʻzbekiston Respublikasi Mudofaa vazirligining, Ichki ishlar vazirligining, Favqulodda vaziyatlar vazirligining, Milliy gvardiyasining, Davlat xavfsizlik xizmatining qoʻshinlaridagi muddatli harbiy xizmatdan boʻshatilgan shaxslar uchun 0 ta ish oʻrni;

nogironligi boʻlgan shaxslar uchun 7 ta ish oʻrni;

pensiyaoldi yoshidagi shaxslar uchun 0 ta ish oʻrni;

jazoni ijro etish muassasalaridan ozod qilingan yoki sud qaroriga koʻra oʻziga nisbatan tibbiy yoʻsindagi majburlov choralari qoʻllanilgan shaxslar uchun 1 ta ish oʻrni;

odam savdosidan jabrlanganlar uchun 0 ta ish oʻrni;

atrofdagilar uchun xavf tugʻdirmaydigan ijtimoiy ahamiyatli kasalliklardan azob chekuvchi shaxslar uchun 0 ta ish oʻrni;

oilaviy (maishiy) zoʻravonlik natijasida jabrlangan ayollar uchun 2 ta ish oʻrni belgilansin.

3. Ushbu toifa shaxslar uchun ish oʻrinlari xodimlar tomonidan oʻzlarining mehnat majburyatlarini toʻsiqlarsiz bajarishini taʼminlaydigan sanitariya va gigiyena normalari va mehnat sharoitlariga muvofiq boʻlishi taʼminlansin, shu jumladan:

oʻn toʻrt yoshga toʻlmagan bolalari, nogironligi boʻlgan bolalari bor yolgʻiz otaga yoki onaga, shuningdek, koʻp bolali oilalarning ota-onalari uchun — bolalarni tarbiyalash majburiyatlari va mehnat majburiyatlari bajarilishini birga qoʻshib olib borish imkonini beruvchi ishning moslashuvchan jadvaliga ega boʻlgan ish oʻrinlari;

umumiy oʻrta va oʻrta maxsus taʼlim tashkilotlarini, kasb-hunar maktablarini, kasb-hunar kollejlarini hamda texnikumlarni tamomlab, kasbga ega boʻlgan yoshlar shuningdek, oliy taʼlim muassasalarining davlat grantlari boʻyicha taʼlim olgan hamda “Mehribonlik” uylari bitiruvchilari uchun — ularning kasbiy tayyorgarligiga hamda mutaxassisligiga muvofiq boʻlgan ish oʻrinlari;

muddatli harbiy xizmatdan boʼshatilganlar uchun ularning professional tayyorgarligiga mos boʻlgan ish oʻrinlari;

nogironligi boʻlgan shaxslar uchun — mehnat sharoitlari boʻyicha attestatsiyadan oʻtkazilgan va xodimga sogʻligʻining holatini hamda mehnat faoliyatiga doir belgilangan qarshi koʻrsatmalar hisobga olingan holda mehnat majburiyatlarini moneliksiz bajarish imkonini beradigan ish oʻrinlari.

pensiyaoldi yoshidagi shaxslar uchun — ularning kasbiy tayyorgarligiga mos boʻlgan yoki, maxsus malakani talab etmaydigan ish oʻrinlari;

jazoni ijro etish muassasalaridan ozod qilingan yoki, sud qaroriga koʻra oʻziga nisbatan tibbiy yoʻsindagi majburlov choralari qoʻllanilgan shaxslar uchun - ularning kasbiy tayyorgarligini hisobga olgan holda yoki maxsus malakani talab etmaydigan ish oʻrinlari;

odam savdosi qurbonlari uchun — ularning kasbiy tayyorgarligini hisobga olgan holda yoki maxsus malakani talab etmaydigan ish oʻrinlari xarakterli talablarga muvofiq boʻlgan mehnat sharoitlarini taʼminlaydigan ish oʻrinlari tashkil qilinsin.

4. Tashkilotlar rahbarlari Oʻzbekiston Respublikasi Vazirlar Mahkamasining 2017-yil 5-dekabrdagi 965-sonli qarori bilan tasdiqlangan “Ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchun ish oʻrinlarining eng kam sonini belgilash va zaxiraga qoʻyish tartibi toʻgʻrisida”gi Nizomga muvofiq, ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarga koʻrsatilgan ish oʻrinlari tashkil etilishini taʼminlasinlar.

5. Oʻzbekiston Respublikasi Bandlik va mehnat munosabatlari vazirining “Oʻzbekiston Respublikasi Bandlikka koʻmaklashish davlat jamgʻarmasi mablagʻlari hisobidan subsidiya va grantlar ajratish tartibi toʻgʻrisida nizomni tasdiqlash haqida”gi (Oʻzbekiston Respublikasi Adliya vazirligi tomonidan 2019-yil 31-mayda roʻyxatga olingan, roʻyxat raqami 3 163) buyrugʻiga asosan subsidiya ajratib berish tartibi boʻyicha ijtimoiy ehtiyojmand aholi qatlamlariga mansub shaxslarni kvotalangan eng kam sondan ortiq miqdorda ishga qabul qilgan tashkilotlarga — har bir xodim uchun 12 oy davomida har oyda bazaviy hisoblash miqdorining 2 baravari miqdorida haq toʻlash belgilanganligi inobatga olinsin.

6. Ushbu qarorning ikkinchi ilovasida koʻrsatilgan korxona, tashkilot va muassasalarda ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchun band qilingan kasb va lavozimlar tashkil qilinsin.

7. Ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslar uchun ish oʻrinlarini band qilib qoʻyish boʻyicha mazkur qaror ijrosini bajarmagan korxonalar, tashkilotlar va muassasalarning mansabdor shaxslariga Oʼzbekiston Respublikasi Maʼmuriy javobgarlik toʻgʻrisidagi kodeksiga koʻra maʼmuriy javobgarlik belgilanadi.

8. Xonqa tumani Kambagʻallikni qisqartirish va bandlikka koʻmaklashish boʻlimi besh kun muddatda ushbu qarorni 1-ilovasida koʻrsatilgan korxonalar, tashkilotlar va muassasalarning rahbarlari eʼtiboriga yetkazsin.

9. Ushbu qaror 2026-yil 1-yanvardan kuchga kirishi munosabati bilan Xonqa tumani hokimining 2024-yil 31-oktabrdagi 406-12-175-Q/24-sonli qarori oʻz kuchini yoʻqotgan deb hisoblansin.

10. Xonqa tumani hokimining axborot xizmati boshligʻi Sh.Xoʻjaniyozov mazkur qarorni tuman hokimligining rasmiy veb-saytiga joylashtirsin.

11. Ushbu qaror tuman hokimligining rasmiy nashri hisoblangan “Xonqa hayoti” gazetasida eʼlon qilinsin.

12. Ushbu qarorning bajarilishini nazorat qilish tuman hokimining birinchi oʻrinbosari M.Sapayev, tuman Kambagʻallikni qisqartirish va bandlikka koʻmaklashish boʻlimi boshligʻi U.Sh.Yaxshibayev zimmasiga yuklatilsin.