Oʻzbekiston Respublikasi Prezidentining 2024-yil 5-yanvardagi PQ-5-sonli qarori bilan “har yili 1 oktyabrga qadar novegetatsiya davri uchun yakuniy isteʼmolchilar kesimida ekinlarni sugʻorish uchun suv olish limitlarini hududlar boʻyicha tasdiqlangan limit doirasida ishlab chiqib, tasdiqlash uchun Xalq deputatlari tuman Kengashlariga kiritish” topshirigʻi berilgan.

Shuningdek, Suv yetkazib berish xizmatlari rahbarlari tegishlicha amalga oshirilgan ishlar yuzasidan bir yilda ikki marta xalq deputatlari tuman Kengashlariga hisobot berib borishi belgilab qoʻyilgan.

Shu bilan birga, Vazirlar Mahkamasining 2013-yil 82-sonli qarori bilan tasdiqlangan Nizomga asosan xalq deputatlari tuman (shahar) Kengashlari qarorlari bilan suv isteʼmolchilariga, shuningdek, boshqa suvdan foydalanuvchilarga tuman ahamiyatiga ega boʻlgan suv obyektlaridan manbalar, hududlar va iqtisodiyot tarmoqlari boʻyicha belgilanishi koʻrastib oʻtilgan.

Shundan kelib chiqib, hududlar boʻyicha tasdiqlangan limit doirasida ishlab chiqilgan yakuniy isteʼmolchilar kesimida ekinlarni sugʻorish uchun suv olish limitlarini tasdiqlashni hamda Romitan tuman “Suv yetkazib berish xizmati” davlat muassasasi tomonidan suv xoʻjaligida amalga oshirilgan ishlari boʻyicha hisobotini Xalq deputatlari tuman Kengashining navbatdagi sessiya yigʻilishida koʻrib chiqib, tasdiqlanishida amaliy yordam berishingizni soʻrayman.

Oʻzbekiston Respublikasining “Mahalliy davlat hokimiyati toʻgʻrisida”gi qonunining 6 va 24-moddalariga muvofiq, xalq deputatlari tuman Kengashi qaror qiladi:

1. Romitan tumani “Suv yetkazib berish xizmati” Davlat muassasasi direktori Gʻ.Gʻaybullayevning Oʻzbekiston Respublikasi Prezidentining 2024-yil 5-yanvardagi PQ-5-sonli qarorining tumanda ijrosi yuzasidan “Har yili 1-oktyabrga qadar kuz-qish davri uchun yakuniy isteʼmolchilar kesimida ekinlarni sugʻorish uchun suv olish limitlarini hududlar boʻyicha limit doirasida ishlab chiqilgan takliflari” toʻgʻrisidagi hisoboti maʼlumot uchun qabul qilinsin.

2. Tumanda 2025/2026-yilning kuzgi-qishki davrida fermer xoʻjaliklari va boshqa suv isteʼmolchilarining suv olish limiti 1-ilovaga;

Romitan tuman hududlarida 2025/2026 yillar novegetatsiya davri uchun ajratilgan cheklangan suv miqdori 2-ilovaga muvofiq maʼqullansin.

3.Tuman qishloq xoʻjaligi boʻlimi (A.Raxmatov), tuman fermerlar kengashi va tuman “Suv yetkazib berish xizmati” Davlat muassasasi direktori Gʻ.Gʻaybullayevlarga:

Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish chora-tadbirlari toʻgʻrisida”gi PQ-5-sonli qarori asosida ishlarni tashkil etish;

belgilangan limitlar asosida isteʼmolchilarga suv yetkazib berish;

suv resurslaridan foydalanish samaradorligini oshirish, suvdan foydalanish madaniyatini yuksaltirish;

suvni tejaydigan sugʻorish texnologiyalarini kengaytirilgan tartibda joriy etishni davom ettirish;

oʻziga biriktirilgan hududda suvning hisobi va hisobotini yuritish;

sugʻorish tarmoqlari va ulardagi gidrotexnik inshootlarni soz holatda saqlash, taʼmirlash-tiklash tadbirlarini amalga oshirish;

suv olish joylarini suvni boshqarish va hisobga olish vositalari bilan jihozlash, suv monitoringi, hisobi va hisoboti yuritilishini raqamlashtirish;

amalga oshirilgan ishlar yuzasidan xalq deputatlari tuman Kengashiga hisobotlarni oʻz vaqtida berib borish vazifalari yuklatilsin.

4. Mazkur qarorning ijrosini nazorati Agrar, suv xoʻjaligi va ekologiya masalalari boʻyicha doimiy komissiyasi zimmasiga yuklatilsin.